సాక్షి, విశాఖపట్నం: ఆంధ్రప్రదేశ్‌లో క్రికెట్ అభివృద్ధికై రోడ్ మ్యాప్ తయారు చేశామని ఆంధ్ర క్రికెట్‌ అసోసియేషన్‌ కార్యదర్శి ఎస్.ఆర్. గోపినాథ్‌రెడ్డి తెలిపారు. అధ్యక్షుడు పి.శరత్ చంద్రారెడ్డి ఆదేశాల మేరకు చర్యలు చేపట్టామని పేర్కొన్నారు. ఏసీఏ 70 ఏళ్ల పండగను సోమవారం వైజాగ్‌లో ఘనంగా నిర్వహించారు. ఈ సందర్భంగా ఏర్పాటు చేసిన సమావేశంలో ఏసీఏ కార్యదర్శి గోపినాథ్‌రెడ్డి మాట్లాడుతూ.. ఆటగాళ్ల భవిష్యత్‌ గురించే తాము నిత్యం తపనపడుతుంటామని పేర్కొన్నారు. ఏసీఏ ఆధ్వర్యంలో  దేశంలోనే మొట్ట మొదటి సారిగా వుమెన్ టీ20 మ్యాచ్ నిర్వహించినట్లు ఆయన గుర్తు చేశారు.   ఆంధ్రలో వేగంగా క్రికెట్‌ అభివృద్ధి: టీమిండియా మాజీ క్రికెటర్‌ అనంతరం ఇండియా మాజీ క్రికెటర్, ఇండియన్ నేషనల్ క్రికెట్ మాజీ కోచ్ మదన్ లాల్ మాట్లాడుతూ.. ‘‘ఆంధ్రలో ఎంతో మంది ప్రతిభ ఉన్న క్రికెటర్లు ఉన్నారు., భవిష్యత్తులో వారు జాతీయ జట్టుకు ప్రాతినిథ్యం వహించేలా ఎదగాలి’’ అని ఆకాంక్షించారు. ఇక్కడున్న యువ క్రికెటర్లను ఇక్కడ చూడటం ఎంతో ఆనందంగా ఉందన్నారు. ఏసీఏ పనితీరు అద్భుతం అని మదన్‌ లాల్‌ ఈ సందర్భంగా ప్రశంసించారు. ఏపీఎల్‌ సూపర్‌ ప్రతిభ ఉన్న యువ క్రికెటర్లను వెలికి తీసేందుకు ఆంధ్ర ప్రీమియర్‌ లీగ్‌ నిర్వహించడం అభినందనీయం అన్నారు. ఆంధ్రలో క్రికెట్ ఎంతో అభివృద్ధి చెందుతోందని మదన్‌ లాల్‌ ప్రశంసించారు. ఇక ఈ సమావేశంలో.. పలువురు మాజీ రంజీ ప్లేయర్లు, మాజీ ఉమెన్ సీనియర్ ప్లేయర్స్, రంజీ ట్రోఫీ కెప్టెన్లు, క్రికెట్ కమిటీ సభ్యులకు, ఏసీఏ ఉద్యోగులకు, లీగల్ కమిటీలకు గోపినాథ్ రెడ్డి, ఏసీఏ ఉపాధ్యక్షులు పి. రోహిత్ రెడ్డి, మదన్ లాల్ జ్ఞాపికలను అందజేశారు. ఈ కార్యక్రమంలో ఏపీఎల్ చైర్మన్ మాంచో ఫెర్రర్, ఏసీఏ సంయుక్త కార్యదర్శి ఎ. రాకేశ్, ట్రెజరర్ ఏ.వి. చలం, అపెక్స్ కౌన్సిల్ సభ్యులు కె.వి.పురుషోత్తం, జితేంద్ర నాథ్ శర్మ, సిఈఓ ఎం.వి. శివారెడ్డి, మాజీ రాష్ట్ర కార్యదర్శులు ఎన్. వెంకట రావు, చాముండేశ్వరి నాథ్ , అరుణ్ కుమార్ తదితరులు పాల్గొన్నారు. కాగా ఆదివారం జరిగిన ఆంధ్ర ప్రీమియర్‌ లీగ్‌ సీజన్‌ 2 ఫైనల్‌కు టీమిండియా మాజీ కెప్టెన్‌ క్రిష్ణమాచారి శ్రీకాంత్‌ హాజరైన విషయం తెలిసిందే. విశాఖపట్నంలోని డాక్టర్‌ వైఎస్‌ రాజశేఖరరెడ్డి స్టేడియంలో జరిగిన తుదిపోరులో డిపెండింగ్‌ చాంపియన్‌ కోస్టల్‌ రైడర్స్‌ను రాయలసీమ కింగ్స్‌ ఓడించింది. తద్వారా ఏపీఎల్‌-2 విజేతగా అవతరించింది.  చదవండి: 13 ఏళ్ల వయస్సులోనే అవమానాలెన్నో.. అయినా వరల్డ్‌ ఛాంపియన్‌! 

ఆంధ్ర ప్రీమియర్ లీగ్ సీజన్ 2 విజేతగా రాయలసీమ కింగ్స్ అవతరించింది. ఆదివారం నాటి ఫైనల్లో కోస్టల్ రైడర్స్ పై 5 వికెట్ల తేడాతో విజయం సాధించింది.  విశాఖపట్నంలోని డాక్టర్ వైయస్ రాజశేఖరరెడ్డి క్రికెట్ స్టేడియంలో రాయలసీమ కింగ్స్ ఆదివారం కోస్టల్ రైడర్స్ తో తలపడింది. టాస్ గెలిచి తొలుత బౌలింగ్ ఎంచుకున్న రాయలసీమ కింగ్స్ కోస్టల్ రైడర్స్ ను 155 పరుగులకు కట్టడి చేసింది. రైడర్స్ బ్యాటర్లలో ఓపెనర్ ధరణి కుమార్ 30 పరుగులతో టాప్ స్కోరర్ గా నిలిచాడు.  కింగ్స్ బౌలర్లలో షేక్ కలీముద్దీన్ మూడు వికెట్లతో చెలరేగాడు. హరీష్ శంకర్ రెడ్డి రెండు వికెట్లు తీయగా, జాగర్లపూడి రామ్, బోదాల వినయ్, కెప్టెన్ హనుమ విహారి తలా ఒక వికెట్ తీశారు. లక్ష్య ఛేదనకు దిగిన రాయలసీమ కింగ్స్ కు ఓపెనర్ తోట శ్రావణ్ 24 పరుగులతో శుభారంభం అందించాడు. మరో ఓపెనర్ కోగటం హనీష్ రెడ్డి డకౌట్ కాగా, వన్ డౌన్ బ్యాటర్ తన్నీరు వంశీకృష్ణ 3 పరుగులకే నిష్క్రమించాడు. ఇలా జట్టు కష్టాల్లో ఉన్న సమయంలో హనుమ విహారి 29 బంతుల్లోనే 46 పరుగులతో కెప్టెన్ ఇన్నింగ్స్ ఆడాడు. బోదాల కుమార్ 53 పరుగులతో అతడికి అండగా నిలిచాడు. ఆఖరిలో గిరినాథ్ రెడ్డి 17 బంతుల్లో 29 పరుగులతో రాణించి విహారితో కలిసి అజేయంగా నిలిచాడు. ఈ మ్యాచ్ కు వర్షం అంతరాయం కలిగించిన నేపథ్యంలో విజేడి (వి.జయదేవన్ సిస్టం) పద్ధతి ద్వారా విజేతను నిర్ణయించారు. 16.3 ఓవర్లలో ఐదు వికెట్ల నష్టానికి 160 పరుగులు చేసిన రాయలసీమ కింగ్స్ ఛాంపియన్ గా అవతరించింది. డిఫెండింగ్ ఛాంపియన్ కోస్టల్ రైడర్స్ ను ఓడించి టైటిల్ ఎగరేసుకుపోయింది. ఆంధ్ర ప్రీమియర్ లీగ్ సీజన్ 2 ఫైనల్ స్కోర్లు కోస్టల్ రైడర్స్- 155/8 (18 ఓవర్లు) రాయలసీమ కింగ్స్- 160/5 (16.3 ఓవర్లు) 👉: (ఫొటో గ్యాలరీ కోసం ఇక్కడ క్లిక్ చేయండి)

సాక్షి, విశాఖపట్నం: ఆంధ్ర క్రికెట్ అసోసియేషన్ ప్రతిష్టాత్మకంగా ప్రారంభించిన ఆంధ్ర ప్రీమియర్ లీగ్ సీజన్ 1 అభిమానులను ఆకట్టుకుంది. స్థానిక ఆటగాళ్లలోని ప్రతిభను నిరూపించుకునేందుకు వేదిక అయింది. ఈ క్రమంలో  ఏపీఎల్ రెండో ఎడిషన్ పై అంచనాలు పెరిగాయి.  అందుకు తగ్గట్టుగానే ఆరు జట్లు పోటాపోటీగా తలపడి కావాల్సినంత వినోదం అందించాయి. ఇక ఇప్పుడు ఏపీఎల్-2 తుది అంకానికి చేరుకుంది. కోస్టల్ రైడర్స్, రాయలసీమ కింగ్స్ ఫైనల్ ఆడేందుకు అర్హత సాధించాయి. ఈ నేపథ్యంలో ఆంధ్ర క్రికెట్ అసోసియేషన్ సెక్రటరీ గోపినాథ్ రెడ్డి మాట్లాడుతూ.. దేశంలో చాలా మంది సీజన్ 1 చాలా బాగా నిర్వహించారని ప్రశంసించినట్లు చెప్పారు. ఇక ఆంధ్ర ప్రీమియర్ లీగ్ 2 ఫైనల్స్ కి ముఖ్య అతిథిగా మాజీ ఇండియన్ క్రికెటర్ కృష్ణమాచారి  శ్రీకాంత్ హాజరయ్యాడు.  ఈ సందర్భంగా.. ఆంధ్రప్రదేశ్ నాకు చాలా ఇష్టమైన రాష్ట్రం. ఆంధ్ర క్రికెట్ అసోసియేషన్ ఆధ్వర్యంలో టోర్నీ జరగడం చాలా ఆనందంగా ఉంది. ఆంధ్ర ప్రదేశ్ నుంచి మరి కొంత మంది క్రికెటర్లు రావాలని కోరుకుంటున్న. ఇప్పటికే ఏపీ మంచి క్రికెటర్లను అందించింది. యువ క్రికెటర్లకు మంచి అవకాశం ఆంధ్ర క్రికెట్ అసోసియేషన్ కల్పిస్తుంది అని పేర్కొన్నాడు.

విశాఖ స్పోర్ట్స్‌: ఆంధ్ర ప్రీమియర్‌ లీగ్‌ (ఏపీఎల్‌)లో రాయలసీమ కింగ్స్‌ ఫైనల్లోకి ప్రవేశించింది. శనివారం జరిగిన రెండో క్వాలిఫయర్‌ మ్యాచ్‌లో కింగ్స్‌ 3 పరుగుల తేడాతో గోదావరి టైటాన్స్‌పై విజయం సాధించింది. ముందుగా రాయలసీమ జట్టు 20 ఓవర్లలో 7 వికెట్ల నష్టానికి 218 పరుగుల భారీ స్కోరు సాధించింది. ‘ప్లేయర్‌ ఆఫ్‌ ద మ్యాచ్‌’ కోగటం రెడ్డి (47 బంతుల్లో 92; 7 ఫోర్లు, 8 సిక్స్‌లు) మెరుపు ఇన్నింగ్స్‌ ఆడగా, గిరినాథ్‌ రెడ్డి (20 బంతుల్లో 43; 2 ఫోర్లు, 4 సిక్స్‌లు), వంశీ కృష్ణ (34 బంతుల్లో 43; 3 ఫోర్లు, 1 సిక్స్‌) అండగా నిలిచారు. అనంతరం గోదావరి టీమ్‌ 20 ఓవర్లలో 9 వికెట్లకు 215 పరుగులు చేసి పోరాడి ఓడింది. భూపతి రాజు వర్మ (40 బంతుల్లో 89; 12 ఫోర్లు, 5 సిక్స్‌లు) ఒంటిచేత్తో జట్టును గెలిపించే ప్రయత్నం చేయగా, ఇతర ఆటగాళ్లనుంచి సహకారం లభించలేదు. నేడు జరిగే ఫైనల్లో కోస్టల్‌ రైడర్స్‌తో రాయలసీమ కింగ్స్‌ తలపడుతుంది. ముగింపు కార్యక్రమానికి బీసీసీఐ అధ్యక్షుడు రోజర్‌ బిన్నీ, మాజీ కెపె్టన్‌ కె.శ్రీకాంత్‌ ముఖ్య అతిథులుగా హాజరు కానున్నారు. చదవండి: మూడో వన్డేలోను పాకిస్తాన్‌దే విజయం 

Andhra Premier League 2023: లీగ్‌ చివరి మ్యాచ్‌ ఏడు వికెట్ల తేడాతో పరాజయం పాలైన గోదావరి టైటాన్స్‌ ప్లే ఆఫ్‌ అవకాశాన్ని కోల్పోయింది. 16 పాయింట్లతో కోస్టల్‌ రైడర్స్‌ ఆధిక్యాన్ని ప్రదర్శించింది. ఉత్తరాంధ్ర లయన్స్‌, రాయలసీమ కింగ్స్‌ జట్లు 12 పాయింట్లు సాధించగా.. మెరుగైన రన్‌ రేట్‌తో లయన్స్‌ రెండో స్థానంలో నిలిచింది. బెజవాడ టైగర్స్‌, గోదావరి టైటాన్స్‌ ఎనిమిదేసి పాయింట్లతో నిలిచినా మెరుగైన రన్‌రేట్‌తో టైగర్స్‌ ప్లేఆఫ్‌నకు అర్హత సాధించింది. దీంతో ఎలిమినేటర్‌ మ్యాచ్‌లో కింగ్స్‌తో టైగర్స్‌ తలపడనుండగా క్వాలిఫైయిర్‌ వన్‌లో రైడర్స్‌తో లయన్స్‌ తలపడనుంది. వైజాగ్‌ వారియర్స్‌ నాలుగు పాయింట్లతో రెండో సీజన్‌ ముగించింది. విశాఖ స్పోర్ట్స్‌: కోస్టల్‌ రైడర్స్‌ మరోసారి ప్లేఆఫ్‌నకు చేరుకుంది. ఏపీఎల్‌ సీజన్‌–2 లీగ్‌ చివరి మ్యాచ్‌లో రాయలసీమ కింగ్స్‌పై విజయం సాధించి 16 పాయింట్లతో టాప్‌లో నిలిచింది. వైఎస్సార్‌ ఏసీఏ వీడీసీఏ స్టేడియంలో బుధవారం జరిగిన తొలి మ్యాచ్‌లో టాస్‌ గెలిచిన కోస్టల్‌ రైడర్స్‌ లక్ష్య ఛేదనకే మొగ్గు చూపింది. బ్యాటింగ్‌కు దిగిన రాయలసీమ కింగ్స్‌ 18 ఓవర్లలో 131 పరుగులు చేసింది. వరుణుడి అంతరాయం వరుణుడు 13 ఓవర్‌ వద్ద అంతరాయం కలిగించగా.. అప్పటికి కింగ్స్‌ జట్టు ఏడు వికెట్లకు 98 పరుగులు చేసింది. కెప్టెన్‌ హనుమ విహారి డకౌట్‌గా వెనుదిరగ్గా.. మరో ఓపెనర్‌ వీరారెడ్డి 45 బంతుల్లో 78 పరుగులు సాధించాడు. చివర్లో కమరుద్దీన్‌( 21 బంతుల్లో 23 పరుగులు)తో కలిసి స్కోర్‌ను ముందుకు నడిపాడు. తిరిగి ఆటను కొనసాగించగా కింగ్స్‌ తొమ్మిది వికెట్లు కోల్పోయి 131 పరుగులు చేయగా.. మరోసారి వర్షం కారణంగా ఆటను నిలిపివేశారు. అబ్దుల్లా 4 వికెట్లు తీయగా స్టీఫెన్‌, మనోహార్‌ రెండేసి వికెట్లు పడగొట్టారు. చిరంజీవి అజేయ ఇన్నింగ్స్‌ దీంతో కోస్టల్‌ రైడర్స్‌కు డీఎల్‌ఎస్‌ పద్ధతిలో 17 ఓవర్లలో 124 పరుగుల విజయలక్ష్యాన్ని నిర్దేశించారు. 14 ఓవర్లలోనే రెండు వికెట్లకు 127 పరుగులతో రైడర్స్‌ విజయం సాధించారు. ఓపెనర్‌ ధరణీకుమార్‌(18), కెప్టెన్‌ రషీద్‌(4) వికెట్లను 65 పరుగులకే రైడర్స్‌ కోల్పోయింది. మరో ఓపెనర్‌ ప్రణీత్‌ 64, చిరంజీవి 32 పరుగులతో అజేయంగా నిలిచి జట్టుకు విజయాన్నందించారు. కమరుద్దీన్‌, హనుమ విహారి చెరో వికెట్‌ తీశారు. ప్లే ఆఫ్స్‌లో బెజవాడ టైగర్స్‌, ఉత్తరాంధ్ర లయన్స్‌ అసలు పోరులో చేతులెత్తేసిన టైటాన్స్‌ తప్పనిసరిగా గెలవాల్సిన మ్యాచ్‌లో గోదావరి టైటాన్స్‌ చేతులెత్తేసింది. రెండో మ్యాచ్‌లో టైటాన్స్‌ టాస్‌ గెలిచి తొలుత బ్యాటింగ్‌కు దిగింది. ఓపెనర్లు కెప్టెన్‌ జ్ఞానేశ్వర్‌(2), హేమంత్‌(1) ఎనిమిది పరుగులకే పెవిలియన్‌కు చేరారు. శ్యామ్‌ 11, సమన్విత్‌ 14, సత్యనారాయణ 16 పరుగులు చేశారు. మిగిలిన వారంతా సింగిల్‌ డిజిట్‌ స్కోర్లకే పరిమితమయ్యారు. మరో బంతి ఉండగానే టైటాన్స్‌ 77 పరుగులకే ఆలౌటైంది. పృధ్వీ, తేజస్వి మూడేసి వికెట్లు తీయగా అయ్యప్ప రెండు, అజయ్‌, వాసు ఒక్కో వికెట్‌ పడగొట్టారు. స్వల్ప లక్ష్యంతో బరిలోకి దిగిన ఉత్తరాంధ్ర లయన్స్‌ ఓపెనర్‌ కెప్టెన్‌ భరత్‌(4), అతని స్థానంలో వచ్చిన రోహిత్‌ డకౌట్‌గా అయ్యారు. ఓపెనర్‌ గుల్ఫమ్‌(29)కు రాహుల్‌ తోడై మూడో వికెట్‌కు 50 పరుగుల భాగస్వామ్యం అందించాడు. రాహుల్‌(33), తపస్వి(10) అజేయంగా నిలిచి 13.4 ఓవర్లలోనే 79 పరుగుల చేసి జట్టుకు విజయాన్నందించారు. మల్లికార్జున రెండు వికెట్లు, కమిల్‌ ఓ వికెట్‌ తీశాడు. రాయలసీమ కింగ్స్‌ చదవండి: అక్క చేసిన ఆ పని వల్లే.. ఇలా! ఆ తల్లికేమో ‘భయం’.. అందుకే తండ్రితో పాటు! విరాట్‌ కోహ్లికి బీసీసీఐ వార్నింగ్‌.. కారణమిదే! మరోసారి అలా చేయొద్దంటూ!

విశాఖ స్పోర్ట్స్‌: ఆంధ్ర ప్రీమియర్‌ లీగ్‌ టి20 టోర్నమెంట్‌ రెండో సీజన్‌లో రాయలసీమ కింగ్స్‌ జట్టు వరుసగా మూడో విజయంతో ‘హ్యాట్రిక్‌’ నమోదు చేసింది. ఇక్కడి డాక్టర్‌ వైఎస్‌ రాజశేఖర రెడ్డి ఏసీఏ వీడీసీఏ స్టేడియంలో ఆదివారం జరిగిన మ్యాచ్‌లో రాయలసీమ కింగ్స్‌ ఐదు వికెట్ల తేడాతో గోదావరి టైటాన్స్‌ జట్టును ఓడించింది. ఆరు జట్లు పాల్గొంటున్న ఈ లీగ్‌లో రాయలసీమ కింగ్స్‌ 12 పాయింట్లతో టాప్‌ ర్యాంక్‌లో ఉంది. ముందుగా బ్యాటింగ్‌ చేసిన గోదావరి టైటాన్స్‌ 20 ఓవర్లలో 9 వికెట్లకు 150 పరుగులు చేసింది. త్రిపురాణ విజయ్‌ (25 బంతుల్లో 63 నాటౌట్‌; 6 ఫోర్లు, 5 సిక్స్‌లు) మెరుపు ఇన్నింగ్స్‌తో అజేయ అర్ధ సెంచరీ చేశాడు. రాయలసీమ కింగ్స్‌ బౌలర్లలో హరిశంకర్‌ రెడ్డి మూడు వికెట్లు, గిరినాథ్‌ రెడ్డి రెండు వికెట్లు తీశారు. అనంతరం రాయలసీమ కింగ్స్‌ 17.4 ఓవర్లలో 5 వికెట్లకు 153 పరుగులు చేసి గెలిచింది. కెపె్టన్‌ హనుమ విహారి (12 బంతుల్లో 21; 3 ఫోర్లు, 1 సిక్స్‌), అభిషేక్‌ రెడ్డి (37 బంతుల్లో 53; 7 ఫోర్లు, 2 సిక్స్‌లు), తన్నీరు వంశీకృష్ణ (39 నాటౌట్‌; 3 ఫోర్లు, 1 సిక్స్‌) రాణించారు. గోదావరి టైటాన్స్‌ బౌలర్లు ఏకంగా 21 ఎక్స్‌ట్రాలు ఇవ్వడం గమనార్హం.   తపస్వి ఆల్‌రౌండ్‌ ప్రదర్శన  మరో మ్యాచ్‌లో ఉత్తరాంధ్ర లయన్స్‌ 93 పరుగుల తేడాతో వైజాగ్‌ వారియర్స్‌పై ఘనవిజయం సాధించింది. ముందుగా ఉత్తరాంధ్ర లయన్స్‌ 20 ఓవర్లలో 6 వికెట్లకు 206 పరుగులు చేసింది. కెపె్టన్‌ కోన శ్రీకర్‌ భరత్‌ (23 బంతుల్లో 45; 3 ఫోర్లు, 4 సిక్స్‌లు), వెంకట్‌ రాహుల్‌ (36 బంతుల్లో 53; 3 ఫోర్లు, 3 సిక్స్‌లు), పిన్నింటి తపస్వి (23 బంతుల్లో 38; 4 ఫోర్లు, 2 సిక్స్‌లు), సిర్లా శ్రీనివాస్‌ (13 బంతుల్లో 33 నాటౌట్‌; 1 ఫోర్, 4 సిక్స్‌లు) దూకుడుగా ఆడారు. అనంతరం వైజాగ్‌ వారియర్స్‌ 14.4 ఓవర్లలో 113 పరుగులకు ఆలౌటై ఓడిపోయింది. తపస్వి, పృథీ్వరాజ్‌ మూడు వికెట్ల చొప్పున తీశారు.    

విశాఖ స్పోర్ట్స్‌: ఆంధ్రా ప్రీమియర్‌ లీగ్‌ (ఏపీఎల్‌) రెండో సీజన్‌కు వైఎస్సార్‌ స్టేడియం సర్వసన్నద్ధమైంది. ఈ క్రికెట్‌ ఈవెంట్‌కు బుధవారం తెరలేవనుంది. ఏసీఏ అపెక్స్‌ కౌన్సిల్‌ ఆధ్వర్యంలో ఏపీఎల్‌ గవర్నింగ్‌ కౌన్సిల్‌ పర్యవేక్షణలో రోజూ రెండు చొప్పున 19 మ్యాచ్‌లు జరగనున్నాయి. టైటిల్‌ పోరు ఈ నెల 27న జరగనుంది. మొత్తం ఆరు ఫ్రాంచైజీ జట్లు పాల్గొంటున్నాయి. తొలిసీజన్‌ టైటిల్‌ పోరులో ఢీకొట్టిన బెజవాడ టైగర్స్‌, కోస్టల్‌ రైడర్స్‌ ఈసారి లీగ్‌ ప్రారంభ మ్యాచ్‌లోనే తలపడనుండడంతో ఏపీఎల్‌ – 2 ఆది నుంచే హోరాహోరీగా సాగనుంది. మ్యాచ్‌లు వీక్షించే అభిమానులకు లక్కీడిప్‌ ద్వారా విశాఖ వేదికగా త్వరలో జరగనున్న భారత్‌ ఆస్ట్రేలియా మ్యాచ్‌కు టికెట్లు అందించనున్నారు. సినీనటి శ్రీలీల తొలిరోజు మ్యాచ్‌ వీక్షించేందుకు రానున్నారు. బెజవాడ టైగర్స్‌: వికెట్ల వెనుక నుంచే... టైటిల్‌ పోరులో ఢీకొట్టి కేవలం ఏడు పరుగుల తేడాతో వెనుకబడిపోయిన బెజవాడ టైగర్స్‌ ఈసారి వికెట్ల వెనుక నుంచే మ్యాచ్‌ను ముందుకు నడిపించే ప్రణాళిక సిద్ధం చేసుకుంది. టైటిల్‌ సాధించడమే లక్ష్యంగా బరిలోకి దిగుతున్నామంటూ ఫ్రాంచైజీ అధినేత రమణమూర్తి అంటున్నారు. అందులో భాగంగానే ఈ సీజన్‌లో అత్యధిక ధరతో రికీబుయ్‌ను నిలబెట్టుకుంది. ఇటీవల మంచి ఫామ్‌లో ఉన్న రికీ మిడిలార్డర్‌లో ఇన్నింగ్స్‌ చక్కదిద్దడమే గాక జట్టును ముందుకు నడపనున్నాడు. మహీప్‌ వికెట్ల వెనుక సత్తా చాటనుండగా అవసరమైతే నేనున్నా అంటున్నాడు మహిమా. ఆల్‌రౌండర్లు షోయిబ్‌, సాయురాహుల్‌తోపాటు లలిత్‌, అవినాష్‌లుండగా సాయితేజ బంతితో చెలరేగనున్నాడు. రాయలసీమ కింగ్స్‌ : టాప్‌ ఆర్డర్‌ పటిష్టం సౌత్‌జోన్‌నే విజేతగా నిలిపిన హనుమ విహారి ఈసారి రాయలసీమ కింగ్స్‌ను టైటిల్‌ దిశగా నడిపించనున్నాడు. బౌలింగ్‌ ఆల్‌రౌండర్లు గిరినాథ్‌, సాకేత్‌లను నిలబెట్టుకోగా మాధవ్‌, కలియప్పలను తీసుకుంది. అభిషేక్‌, వంశీకృష్ణ ఓపెనర్లుగా నిలదొక్కుకుంటే పొట్టి ఫార్మెట్‌లో పరుగుల వరదే. సుదర్శన్‌ కొత్త బంతితో ప్రత్యర్థికి చుక్కలు చూపించనున్నాడు. హరిశంకర్‌, పవన్‌ సత్తా చాటాలని ఉవ్విళ్లూరుతున్నారు. ఉత్తరాంధ్ర లయన్స్‌ : ఫైనల్‌ పోరే లక్ష్యం తొలి సీజన్‌లో టాప్‌ 4లో నిలిచి ఎలిమినేటర్‌లోనే వెనుతిరిగిన ఉత్తరాంధ్ర లయన్స్‌ ఈ సారి ఫైనల్స్‌లో గర్జించేందుకు సిద్ధమైంది. స్థానికుడైన అంతర్జాతీయ టెస్ట్‌ క్రికెటర్‌ భరత్‌ మినహా మిగిలిన ఐదుగురిని తక్కువ ధరకే నిలబెట్టుకున్న ఫ్రాంచైజీ ఐదుగురు కీలక ఆటగాళ్లను దక్కించుకుంది. వీళ్లందరినీ ఫ్రాంచైజీ అధినేత వెంకటరెడ్డి వేలం చివరి వరకు ఉండి మరీ సొంతం చేసుకున్నారు. వీరిలో పృథ్వీ భౌలింగ్‌ ప్రారంభించనుండగా టాప్‌ ఆర్డర్‌లో తపస్వి, రాహుల్‌ బ్యాట్‌ ఝళిపించనుండగా వాసు, శ్రీనివాస్‌ ఆల్‌రౌండ్‌ ప్రతిభ కనబరచనున్నారు. ఇక జట్టుకు ఓపెనర్‌గా గుల్ఫమ్‌, వికెట్ల వెనుక భరత్‌, టాప్‌లో శ్యామ్‌, బౌలర్‌గా అజయ్‌, బౌలింగ్‌ ఆల్‌రౌండర్‌ రఫీ, అండర్‌ 16లో రాణిస్తున్న రచిత్‌ ఉండనే ఉన్నారు. గోదావరి టైటాన్స్‌: మిడిలార్డర్‌తో బ్యాలెన్స్‌ గోదావరి టైటాన్స్‌ ఈ సారి ఓపెనర్లు, టాప్‌ ఆర్డర్‌ను పక్కా ప్రణాళికతో మ్యాచ్‌కు సిద్ధం చేసుకోగా మిడిలార్డర్‌లో ఇన్నింగ్స్‌ చక్కదిద్దే ధీరజ్‌కుమార్‌కు జట్టును ముందుకు నడిపించే బాధ్యత అప్పగించింది. ఓపెనర్‌ హిమకర్‌, ఆల్‌రౌండర్లు శశికాంత్‌, సత్యనారాయణను జట్టు సొంతం చేసుకుంది. ఓపెనర్‌ వంశీతోపాటు టాప్‌ ఆర్డర్‌లో సాత్విక్‌, పాండురంగ, హేమంత్‌ను నిలబెట్టుకోగా మాధవ్‌ బౌలింగ్‌ చేయనున్నాడు. ►తలపడనున్న జట్లు : 6 ►మొత్తం మ్యాచ్‌లు : 19 ►టైటిల్‌ పోరు : 27న ►అన్ని మ్యాచ్‌లు ఫ్యాన్‌ కోడ్‌ యాప్‌లో ప్రత్యక్ష ప్రసారం. చదవండి: టీమిండియాతో సిరీస్‌ నాటికి వచ్చేస్తా.. వరల్డ్‌కప్‌ తర్వాత కెప్టెన్‌ అతడే! 

విశాఖ స్పోర్ట్స్‌: ఏపీఎల్‌ ప్లేఆఫ్‌కు రాయలసీమ కింగ్స్‌ చేరుకోగా.. వైజాగ్‌ వారియర్స్‌ ఇంటి ముఖం పట్టింది. ఏపీఎల్‌ ప్లేఆఫ్‌కు చేరుకోవడమే లక్ష్యంగా వైజాగ్‌ వారియర్స్, రాయలసీమ కింగ్స్‌ జట్లు బుధవారం తలపడ్డాయి. వైఎస్‌ఆర్‌ స్టేడియంలో లీగ్‌ చివరి మ్యాచ్‌లో రాయలసీమ కింగ్స్‌ టాస్‌ గెలిచి బౌలింగ్‌ ఎంచుకుంది. దీంతో తొలుత బ్యాటింగ్‌కు దిగిన వైజాగ్‌ వారియర్స్‌ ఓపెనర్‌ సాయికృష్ణ(3) గిరినాథ్‌ బౌలింగ్‌లో సాకేత్‌కు క్యాచ్‌ ఇవ్వగా.. కెప్టెన్‌ అశ్విన్‌(15 ఒక ఫోర్, ఒక సిక్స్‌తో) సాకేత్‌ బౌలింగ్‌లో ప్రశాంత్‌కు క్యాచ్‌ ఇచ్చి ఓపెనర్లు 29 పరుగుల వద్దే పెవిలియన్‌ బాట పట్టారు. కరణ్‌ రెండు ఫోర్లతో 21 పరుగుల వద్ద వినయ్‌కు బౌల్డ్‌ అయ్యాడు. దీంతో 15 ఓవర్లు పూర్తయ్యేప్పటికి నాలుగు వికెట్లు కోల్పోయి 93 పరుగులు చేశారు. నరేన్, దృవ్‌లు అర్ధసెంచరీ భాగస్వామ్యాన్ని నెలకొల్పారు. నరేన్‌ 34 పరుగులతో బౌల్డయ్యాడు. తర్వాత బంతికే మనోహార్‌(0)బౌల్డ్‌ కాగా.. సిద్ధార్థ కూడా తర్వాత బంతికే క్యాచ్‌ ఇచ్చి వెనుతిరగడంతో సంతోష్‌ హాట్రిక్‌ నమోదు చేశాడు. ఏపీఎల్‌లో సంతోష్‌ తొలి హాట్రిక్‌ చేసిన బౌలర్‌గా నిలిచాడు. వెంటనే గిరినాథ్‌ బౌలింగ్‌లో దృవ్‌ వరుసగా మూడు బౌండరీలు బాదాడు. దృవ్‌(53), రామన్‌(3) అజేయంగా నిలవడంతో వైజాగ్‌ వారియర్స్‌ ఏడు వికెట్లకు 140 పరుగులు చేసింది. సంతోష్‌ మూడు, వినయ్‌ రెండు వికెట్లు తీయగా, గిరినాథ్, సాకేత్‌ చెరో వికెట్‌ తీశారు.   141 పరుగుల విజయ లక్ష్యంతో బ్యాటింగ్‌కు దిగిన రాయలసీమ కింగ్స్‌ తరఫున ఏపీఎల్‌లోనే ప్రశాంత్‌ తొలి సెంచరీ నమోదు చేసి అజేయంగా నిలిచాడు. ఓపెనర్‌ అభిషేక్‌ పరుగుల ఖాతా ప్రారంభించకుండానే కార్తీక్‌ వేసిన రెండో బంతికి వికెట్ల వెనుక దృవ్‌కు క్యాచ్‌ ఇచ్చి పెవిలియన్‌కు చేరాడు. మరో ఓపెనర్‌ ప్రశాంత్‌తో రషీద్‌(14) స్కోర్‌ను 45 పరుగులకు చేర్చి రన్‌ అవుటయ్యాడు. వంశీకృష్ణ కూడా ఏడు పరుగులు చేసి వేణు బౌలింగ్‌లో ఆశ్విన్‌కు క్యాచ్‌ ఇచ్చి వెనుతిరిగాడు. వినయ్‌ ఒక ఫోర్, సిక్స్‌తో 15 పరుగులతో నిలవగా.. ప్రశాంత్‌ 17.2 ఓవర్‌లో ఆంజనేయులు వేసిన బంతిని బౌండరీకి తరలించి ఇన్నింగ్స్‌కు ముగింపు పలికాడు. మూడే వికెట్లు కోల్పోయి 146 పరుగులతో విజయం సాధించి రాయలసీమ కింగ్స్‌ ప్లేఆఫ్‌కు చేరింది. కార్తీక్, వేణు చెరో వికెట్‌ తీశారు. ప్రశాంత్‌ మ్యాచ్‌ బెస్ట్‌తో పాటు బ్యాటర్‌గా నిలవగా హ్యాట్రిక్‌ వీరుడు సంతోష్‌ బెస్ట్‌ బౌలర్‌గా నిలిచాడు.  ప్లేఆఫ్‌లు ఖరారు  ఏపీఎల్‌ ప్లేఆఫ్‌కు రాయలసీమ కింగ్స్, కోస్టల్‌ రైడర్స్, బెజవాడ టైగర్స్‌ పన్నేండేసి పాయింట్లతో.. పది పాయింట్లుతో ఉత్తరాంధ్ర లయన్స్‌ చేరుకున్నాయి. వైజాగ్‌ వారియర్స్‌ ఎనిమిది పాయింట్లు, గోదావరి టైటాన్స్‌ ఆరు పాయింట్లే సాధించి లీగ్‌ దశలోనే ఇంటి దారి పట్టాయి.  తొలి క్వాలిఫైయింగ్‌లో టైగర్స్‌తో రైడర్స్‌  ఏపీఎల్‌ ప్లేఆఫ్‌లో క్వాలిఫైయింగ్‌ తొలి మ్యాచ్‌లో బెజవాడ టైగర్స్‌తో కోస్టల్‌ రైడర్స్‌ తలపడనుంది. ఎలిమినేటర్‌ మ్యాచ్‌లో రాయలసీమ కింగ్స్‌తో ఉత్తరాంధ్ర లయన్స్‌ తలపడనుంది. ఈ మ్యాచ్‌లో విజయం సాధించిన జట్టు క్వాలిఫైయింగ్‌ తొలి మ్యాచ్‌లో పరాజయం చెందిన జట్టుతో ఆడనుంది. క్వాలిఫైయింగ్‌ తొలి మ్యాచ్‌లో విజయం సాధించిన జట్టు నేరుగా టైటిల్‌ పోరుకు అర్హత సాధించనుంది.    చదవండి: Ind Vs WI: టీ20 సిరీస్‌కు కోహ్లి దూరం! ఫ్యాన్స్‌కు ఓ గుడ్‌న్యూస్‌! వైస్‌ కెప్టెన్‌ వచ్చేస్తున్నాడు! Andhra Premier League 2022: ప్లేఆఫ్‌నకు కోస్టల్‌ రైడర్స్, ఉత్తరాంధ్ర లయన్స్‌ .. ఇప్పటికే

విశాఖ స్పోర్ట్స్‌: ఏపీఎల్‌ టోర్నీ తొలి సీజన్‌ ప్లేఆఫ్‌కు బెజవాడ టైగర్స్‌ జట్టు చేరుకుంది. టోర్నీలో తలపడుతున్న ఆరుజట్లు నాలుగేసి మ్యాచ్‌లు పూర్తిచేయగా.. బెజవాడ టైగర్స్‌ జట్టు 12 పాయింట్లతో ఆధిక్యంలో కొనసాగుతోంది. రాయలసీమ కింగ్స్,కోస్టల్‌రైడర్స్, వైజాగ్‌ వారియర్స్‌ ఎనిమిదేసి పాయింట్లతో కొనసాగుతున్నాయి. ఉత్తరాంధ్ర లయిన్స్, గోదావరి టైటాన్స్‌ ఆరేసి పాయింట్లతో టోర్నిలో చివరి మ్యాచ్‌ ఆడేందుకు సిద్ధమవుతున్నాయి. కాగా బెజవాడ టైగర్స్‌ ప్లేఆఫ్‌కు చేరిన తొలి జట్టుగా చరిత్ర సృష్టించగా.. మిగిలిన మూడు జట్లు చివరి మ్యాచ్‌లో ఫలితాన్ని బట్టి ప్లేఆఫ్‌కు అర్హత సాధించనున్నాయి. కాగా ఏపీఎల్‌లో మరోసారి వరుణుడి రాకతో సోమవారం జరగాల్సిన మధ్నాహ్నం మ్యాచ్‌ రద్దు అయింది. సాయంత్రం ఫ్లడ్‌లైట్ల వెలుతురులో జరగాల్సిన మ్యాచ్‌ తొమ్మిది ఓవర్లకు కుదించారు. వైఎస్‌ఆర్‌ స్టేడియంలో మధ్యాహ్నం రాయలసీమ కింగ్స్‌తో బెజవాడ టైగర్స్‌తో తలపడాల్సి ఉండగా ఈ మ్యాచ్‌ రద్దు కావడంతో ఇరుజట్లకు రెండేసి పాయింట్లు కేటాయించారు. కాగా ఆంధ్ర ప్రీమియర్‌ లీగ్‌లో మ్యాచ్‌ గెలిచిన జట్టుకు 4 పాయింట్లు లభిస్తాయి. ఫలితం తేలనట్లయితే రెండు పాయింట్లు వస్తాయి. ఐదు వికెట్ల తేడాతో రైడర్స్‌ విజయం   ఇక సాయంత్రం జరిగిన మ్యాచ్‌లో వైజాగ్‌ వారియర్స్‌పై కోస్టల్‌ రైడర్స్‌ టాస్‌ గెలిచి ఫీల్డింగ్‌ ఎంచుకుంది. తొలుత బ్యాటింగ్‌కు దిగిన వైజాగ్‌ వారియర్స్‌ ఓపెనర్‌ గిరినాథ్‌ ఒక పరుగే చేసి వెనుదిరగ్గా మరో ఓపెనర్‌ అశ్విన్‌ 28 పరుగులు చేశాడు. ఓపెనర్లతో పాటు అర్జున్‌ సైతం ఆశిష్‌ బౌలింగ్‌లోనే పెవిలియన్‌కు చేరాడు. సాయికృష్ణ(13), సిద్ధార్థ(18) మినహా మిగిలిన వారంతా వేగంగా పరుగులు చేయడానికే ప్రయత్నించి సింగిల్‌ డిజిట్‌ స్కోర్ల్‌తోనే పెవిలియన్‌కు చేరారు. 34 పరుగుల వద్ద రెండో వికెట్‌ కూలగా.. చివరికి తొమ్మిది ఓవర్లలో ఎనిమిది వికెట్లకు 80 పరుగులతో వారియర్స్‌ ఇన్నింగ్స్‌ ముగిసింది. 81 పరుగుల విజయలక్ష్యంతో బ్యాటింగ్‌కు దిగిన కోస్టల్‌ రైడర్స్‌ ఓపెనర్లు తపస్వి, కెప్టెన్‌ జ్ఞానేశ్వర్‌ చెరో నాలుగేసి పరుగులు చేసి పెవిలియన్‌కు చేరారు. మునీష్‌ 9 పరుగులు చేయగా లేఖజ్‌ తొలిబంతికే లేని పరుగుకు రనౌటయ్యాడు. 24పరుగులకే నాలుగు వికెట్లు కోల్పోయిన స్థితిలో శ్రీనివాస్‌ (38 పరుగులు)కు హర్ష తోడై స్కోర్‌ను పరిగెత్తించారు. హర్ష రెండు ఫోర్లతో 16 పరుగులతోనూ, అబ్బాస్‌ ఒక ఫోర్‌తో ఆరు పరుగులు చేసి అజేయంగా నిలిచి జట్టుకు విజయాన్నందించారు. మరో రెండు బంతులుండగానే రైడర్స్‌ విజయలక్ష్యాన్ని ఛేదించారు. చదవండి: Ind Vs Eng 1st ODI Details: ముఖాముఖి రికార్డులు, తుది జట్ల అంచనా.. పూర్తి వివరాలు! ఇక టాస్‌ గెలిచిన జట్టు తొలుత.. Surya Kumar Yadav: ప్రపంచ రికార్డు సృష్టించిన సూర్యకుమార్‌ యాదవ్‌! మాక్సీ రికార్డు బద్దలు.. మరెన్నో!

విశాఖ స్పోర్ట్స్‌: ఆంధ్రా క్రికెట్‌ అసోసియేషన్‌ ప్రతిష్టాత్మకంగా తలపెట్టిన ఆంధ్రా ప్రీమియర్‌ లీగ్‌(ఏపీఎల్‌) మొదటి సీజన్‌ బుధవారం ప్రారంభమైంది. వైఎస్సార్‌ ఏసీఏ–వీడీసీఏ స్టేడియంలో గోదావరి టైటాన్స్, కోస్టల్‌ రైడర్స్‌ జట్ల మధ్య జరిగిన మొదటి మ్యాచ్‌ను ఏసీఏ అధ్యక్షుడు పి.శరత్‌చంద్ర టాస్‌ వేసి ప్రారంభించారు. తొలుత స్టేడియంలో ఏసీఏ, ఏపీఎల్‌ నిర్వాహక బృందాల సమక్షంలో విజేతలకు అందించే ట్రోఫీలను ఆయన ఆవిష్కరించారు. లీగ్‌ ఆరంభ మ్యాచ్‌లో వరుణుడు ఆగమనం చేశాడు. దీంతో ఊహించని విధంగా కోస్టల్‌ రైడర్స్‌ జట్టు రెండు పరుగుల తేడాతో మ్యాచ్‌ను చేజార్చుకుంది. టాస్‌ గెలిచిన కోస్టల్‌ రైడర్స్‌ కెప్టెన్‌ జ్ఞానేశ్వర్‌.. గోదావరి టైటాన్స్‌ కెప్టెన్‌ శశికాంత్‌కు బ్యాటింగ్‌కు ఆహ్వానించాడు. శ్రీరాం ఏపీఎల్‌ ఆరంభ మ్యాచ్‌లో సూపర్‌ స్ట్రయికర్‌గా నితీష్‌కుమార్, సూపర్‌ సిక్సర్‌తో జ్ఞానేశ్వర్, సూపర్‌ సేవర్‌గా విమల్‌ కుమార్, బెస్ట్‌ క్యాచర్‌గా గిరీష్‌కుమార్, బెస్ట్‌గా శశికాంత్‌ నిలిచి అతిథుల చేతుల మీదుగా అవార్డులందుకున్నారు. ఈ కార్యక్రమంలో ఏసీఏ కోశాధికారి ఎస్‌ఆర్‌ గోపీనాథ్‌రెడ్డి, సీఈవో వీరారెడ్డి, సభ్యుడు రెహ్మాన్, వై.సత్యప్రసాద్‌ తదితరులు పాల్గొన్నారు.  అలా మొదలైంది..   స్టీఫెన్‌ వేసిన టోర్నీ తొలి బంతిని ఓపెనర్‌ హేమంత్‌ ఎదుర్కొన్నాడు. మూడో బంతికి కవర్‌ మీదుగా బంతిని పంపి సింగిల్‌ తీయడంతో గోదావరి టైటాన్స్‌ పరుగుల ఖాతా ప్రారంభించింది. తర్వాత రెండో బంతిని మరో ఓపెనర్‌ వంశీకృష్ణ లాంగాఫ్‌ మీదుగా తరలించడంతో తొలి బౌండరీ నమోదైంది. తొలి ఓవర్‌(ఆట రెండో ఓవర్‌) వేస్తున్న హరిశంకర్‌ రెండో బంతిని ఆడబోయి స్లిప్‌లో ఉన్న శ్రీనివాస్‌కు క్యాచ్‌ ఇచ్చి హేమంత్‌(1) వెనుతిరగడంతో టోర్నీలో తొలి వికెట్‌ నమోదైంది. తొలి నాలుగు వికెట్లను 4.4 ఓవర్లలోనే 21 పరుగుల స్కోర్‌కు కోల్పోయింది. ఈ దశలో కెప్టెన్‌ శశికాంత్‌కు నితీష్‌(25) తోడై స్కోర్‌ను ముందుకు నడిపారు. 9.3 ఓవర్లలో 50 పరుగుల మార్కు, 18.3 ఓవర్‌కు వంద పరుగుల మార్కును అందుకోగలిగింది. 17.4 ఓవర్‌లో హరిశంకర్‌ వేసిన బంతిని ఆడబోయి ధీరజ్‌(13) హిట్‌ వికెటై పెవిలియన్‌కు చేరుకున్నాడు. ఇన్నింగ్స్‌ చివరి బంతిని డీప్‌ ఎక్స్‌ట్రా కవర్‌ మీదుగా శశికాంత్‌ బౌండరీకి తరలించడంతో గోదావరి టైటాన్స్‌ ఆరు వికెట్లకు 115 పరుగులను  చేయగలిగింది. శశికాంత్‌(55) టోర్నీలో తొలి అర్ధ సెంచరీ నమోదు చేసి సాత్విక్‌(5)తో కలిసి అజేయంగా నిలిచాడు. స్టీఫెన్, హరిశంకర్, దీపక్‌ రెండేసి వికెట్లు తీశారు.  టాస్‌ గెలిచారు.. మ్యాచ్‌ ఓడారు..   లక్ష్యం చేరుకునేందుకు కోస్టల్‌ రైడర్స్‌ ఇన్నింగ్స్‌ నిదానంగానే ప్రారంభించారు. శశికాంత్‌ వేసిన తొలి ఓవర్‌కు కేవలం ఒక పరుగే చేశారు. ఓపెనర్‌గా వచ్చిన కెప్టెన్‌ జ్ఞానేశ్వర్‌ 15 బంతులాడి 20 పరుగులే చేయగా.. మరో ఓపెనర్‌ ప్రణీత్‌ 18 బంతులాడి ఏడు పరుగులే చేశాడు. ఓపెనర్ల స్థానంలో వచ్చిన మునీష్‌ ఆరు బంతులాడి మూడు పరుగులే చేయగా.. తపస్వి మూడు బంతులాడి ఒక పరుగే చేశాడు. ఏడు ఓవర్లకు రెండు వికెట్లు కోల్పోయి 32 పరుగులు చేసిన స్థితిలో వరుణుడు ఆగమనం చేశాడు. వర్షం కారణంగా ఆట ముందుకు సాగకపోవడంతో వీజేడీ పద్ధతిలో విజేతను నిర్ణయించేందుకు ఏడు ఓవర్లకు 35 పరుగుల టార్గెట్‌ విధించారు. దీంతో కోస్టల్‌ రైడర్స్‌ పరాజయాన్ని చవిచూడాల్సి వచ్చింది. ఏపీఎల్‌ ఆరంభ మ్యాచ్‌ వరుణుడి రాకతో ఇలా ముగిసింది. గర్జించిన ఉత్తరాంధ్ర లయన్స్‌  ఫ్లడ్‌లైట్ల వెలుతురులో సాయంత్రం 6.30 గంటలకు ప్రారంభం కావాల్సిన మరో మ్యాచ్‌ వర్షం కారణంగా.. 1.45 గంటలు ఆలస్యమైంది. దీంతో 13 ఓవర్ల ఇన్నింగ్స్‌గా నిర్ణయించారు. టాస్‌ గెలిచిన ఉత్తరాంధ్ర లయన్స్‌ ఫీల్డింగ్‌ను ఎంచుకుని రాయలసీమ కింగ్స్‌ను బ్యాటింగ్‌కు ఆహ్వానించింది. ఓపెనర్లు అభిషేక్‌(30) వంశీకృష్ణ(17) జోడి ధాటిగానే బ్యాటింగ్‌ చేయడంతో.. 5.3 ఓవర్లలో వికెట్‌ కోల్పోకుండా జట్టు 50 పరుగుల మార్కును చేరింది. తర్వాత రెండు పరుగులు జోడించి ఓపెనర్లు పెవిలియన్‌కు చేరారు. రషీద్‌ ఐదు నిమిషాల పాటు క్రీజ్‌లో ఉండి ఐదు బంతులాడి ఐదు పరుగులు చేసి వెనుతిరిగాడు. చివర్లో కీపర్‌ పృథ్వీ(8) ఓ భారీ సిక్స్‌ చేసి రనౌటయ్యాడు. కెప్టెన్‌ గిరినాథ్‌ 25 పరుగులతో నిలవగా రాయలసీమ కింగ్స్‌ జట్టు ఏడు వికెట్లకు 99 పరుగులు చేసింది. 100 పరుగుల లక్ష్యంతో ఉత్తరాంధ్ర లయన్స్‌ బరిలోకి దిగి ఓవర్‌ మిగిలి ఉండగానే ఐదు వికెట్లు కోల్పోయి విజయలక్ష్యాన్నందుకుంది. ఓపెనర్లు గుల్ఫమ్‌ (30), క్రాంతి(10) తొలి రెండు ఓవర్లు ధాటి గానే ఆడి 21 పరుగులు చేశారు. జట్టు 50 పరుగుల మా ర్కును ఓ వికెట్‌ కోల్పోయి 6.5 ఓవర్లలో సాధించింది. 10 ఓవర్లు ముగిసేటప్పటికి మూడు వికెట్లు కోల్పోయి 80 పరుగులు చేసింది. తరుణ్‌ 24 పరుగులు చేశాడు.    చదవండి: Virat Kohli: ఇదే చివరి అవకాశం.. రిపీట్‌ అయితే ప్రపంచకప్‌ జట్టు నుంచి కోహ్లి అవుట్‌!