పారిస్‌: అంతర్జాతీయ వాణిజ్యం, ఎగుమతులు, ప్రపంచదేశాలతో సత్సంబంధాల్లో ‘పెద్దన్న’ అనే పేరు కోసం తమతో పోటీపడుతున్న చైనాను నిలువరించేందుకు అమెరికా మరో అడుగు ముందుకేసింది. యునెస్కోలోని చైనా పలుకుబడిని తగ్గించేందుకే అమెరికా ఈ నిర్ణయానికి వచ్చినట్లు తెలుస్తోంది. కృత్రిమ మేథ, సాంకేతిక విద్య వంటి అంశాల్లో యునెస్కోలో ప్రపంచవ్యాప్తంగా పాటించే ప్రమాణాలు, విధాన నిర్ణయాలను తనకు అనువుగా మార్చేందుకు చైనా యత్నిస్తోందని ఇటీవల అమెరికా ఉన్నతాధికారి ఒకరు ఆరోపించడం తెల్సిందే. దీంతో యునెస్కోలో తాజా సభ్యత్వం కోసం అమెరికా రంగంలోకి దిగుతోంది. యునెస్కోలో అమెరికా మళ్లీ చేరబోతున్నట్లు ఆ దేశ అధికారులు సోమవారం ప్రకటించారు. గతంలో పాలస్తీనాను సభ్యదేశంగా చేర్చుకునే అంశాన్ని తీవ్రంగా వ్యతిరేకించిన అమెరికా యునెస్కో నుంచి తప్పుకుంటానని బెదిరించింది. 2017లో నాటి ట్రంప్‌ సర్కార్‌ యునెస్కో నుంచి వైదొలగింది. ఆనాటి నుంచి దాదాపు రూ.5,100 కోట్ల విరాళాలు ఆపేసింది. తాజాగా ఆ నిధులన్నీ చెల్లిస్తామంటూ యునెస్కో మహిళా డైరెక్టర్‌ జనరల్‌ ఆండ్రీ ఆజౌలేకు అమెరికా ఉన్నతాధికారి రిచర్డ్‌ వర్మ లేఖ రాశారు. గతంలో యునెస్కోకు అమెరికానే అతిపెద్ద దాతగా ఉండేది. ఇది యునెస్కోకు చరిత్రాత్మక ఘటన అంటూ అమెరికా తాజా నిర్ణయాన్ని ఆండ్రీ స్వాగతించారు.

గూగుల్‌ ఫొటోస్‌.. ఫొటోలు, వీడియోల బ్యాకప్‌ కోసం ఉపయోగిస్తున్న గూగుల్‌ బేస్డ్‌ ఫ్రీ యాప్‌. చాలామంది ఇందులో ఫొటోలు, వీడియోలను భద్రంగా ఉన్నాయనుకుంటారు. ఆటోమేటిక్‌గా ఫొటోలు అందులోకి వెళ్తున్నాయని భావిస్తుంటారు. కానీ, గూగుల్‌ ఫొటోస్‌కూ ఓ పరిమితి అంటూ ఉంటుంది. అది దాటినా.. లేదంటే ఫుల్‌ మొమరీతో ఎక్కువ కాలం నడిపించినా.. ఆ మొత్తం ఫొటోలు, వీడియోలు ఎగిరిపోతాయని మీకు తెలుసా?. కాబట్టి, గూగుల్‌ ఫొటోస్‌కు సంబంధించి ఈ విషయాలు తెలుసుకుని జాగ్రత్త పడండి.    గూగుల్‌ ఫొటోస్‌ యాప్‌ కోసం ప్రతీ గూగుల్‌ అకౌంట్‌కు ఉచితంగా కొంత స్పేస్‌ ఇస్తుంది గూగుల్‌. ఇందులో ఎక్స్‌ప్రెస్‌, స్టోరేజ్‌ సేవర్‌, ఒరిజినల్‌ క్వాలిటీ అనే ఆప్షన్లు ఉంటాయి. ఒకవేళ ఒరిజినల్‌ క్వాలిటీని గనుక క్లిక్‌ చేయకపోతే.. ఫొటోలు, వీడియోలు మంచి క్వాలిటీతో సేవ్‌ కావు. అప్పుడు ఫొటోలు తక్కువ సైజులో సేవ్‌ అయ్యి.. ఆ ఫొటోలు, వీడియోలు బ్లర్‌గా గూగుల్‌ ఫొటోల్లో కనిపిస్తుంటాయి. చాలామంది గూగుల్‌ ఫొటోస్‌లో స్పేస్‌ కోసం తక్కువ క్వాలిటీకే ప్రయారిటీ ఇస్తారు. కానీ, క్వాలిటీ ఫొటోల్ని దాచుకోవాలనుకుంటే.. ఒరిజినల్‌ క్వాలిటీ ఆప్షన్‌ను క్లిక్‌ చేయకతప్పదు.  స్టోరేజ్‌ మించితే..  గూగుల్‌ అకౌంట్‌ స్టోరేజ్‌లో గూగుల్‌ డ్రైవ్‌ మాదిరిగానే.. గూగుల్‌ ఫొటోస్‌కి కూడా 15 జీబీ స్పేస్‌ ఇస్తుంది గూగుల్‌. ఈ పరిమితి దాటిపోతే.. తర్వాతి నుంచి తీసే ఫొటోలు, వీడియోలు గూగుల్‌ ఫొటోస్‌ యాప్‌లో ఆటోమేటిక్‌గా సేవ్‌ కావు. అప్పుడు ఆల్రెడీ సేవ్‌ అయి ఉన్న డాటాపై(ఆల్రెడీ ఉన్న ఫొటోలు, వీడియోపై) ప్రభావం పడే ఛాన్స్‌ ఉంది. కాబట్టి, గూగుల్‌ వన్‌ సబ్ స్క్రిప్షన్  ద్వారా అదనపు స్టోరేజ్‌ను గూగుల్‌ ఫొటోస్‌ కోసం కొనుక్కోవచ్చు.   ఒకవేళ కొనుక్కోకపోతే..  గూగుల్‌ ఫొటోస్‌ పూర్తి కోటా అయిపోయినా(15 జీబీ పూర్తి కావడం), లేకుంటే అదనపు స్టోరేజ్‌ను కొనుక్కోకపోయినా.. ఆ తర్వాతి ఫొటోలు, వీడియోలు గూగుల్‌ ఫొటోస్‌ బ్యాకప్‌కు వెళ్లవు. అంటే.. స్టోర్‌ కావన్నమాట. ఒకవేళ ఓవర్‌ కోటాతో అలాగే గూగుల్‌ ఫొటోస్‌ యాప్‌ను 24 నెలలపాటు నడిపిస్తే.. ఆల్రెడీ అందులో ఉన్న ఫొటోలు, వీడియోలు ఆటోమేటిక్‌గా డిలీట్‌ అయ్యే ప్రమాదం ఉంది. కాబట్టి, గూగుల్‌ ఫొటోస్‌ మొమరీ ఫుల్‌ అయితే గూగుల్‌ ఫొటోస్‌ యాప్‌ను ఉపయోగించడం ఆపేయాలి(సెట్టింగ్స్‌ ద్వారా).  గూగుల్‌ చెబుతుంది జీమెయిల్‌గానీ, గూగుల్‌ ఫొటోస్‌గానీ, గూగుల్‌ డ్రైవ్‌గానీ(గూగుల్‌ డాక్స్‌, షీట్స్‌, స్లైడ్స్‌, డ్రాయింగ్స్‌, ఫామ్స్‌, జామ్‌బోర్డ్‌, సైట్స్‌ ఫైల్స్‌) ఏదైనా సరే.. రెండేళ్లపాటు ఉపయోగించకుండా ఉంటే అందులో ఉండే మొత్తం కంటెంట్‌, డాటా ఆటోమేటిక్‌గా డిలీట్‌ అయిపోతుంది. అయితే అలా చేయడానికి కంటే ముందు ఈ-మెయిల్స్‌, నోటిఫికేషన్స్‌ ద్వారా గూగుల్‌ తన యూజర్‌ను అప్రమత్తం చేస్తుంది కూడా. ఇక డిలీట్‌ చేయడానికి మూడు నెలల ముందు యూజర్‌ను మరోసారి అప్రమత్తం చేస్తుంది. అంతేకాదు ఆ టైంలో కంటెంట్‌ డౌన్‌లోడ్‌ చేసుకునేందుకు వీలు కల్పిస్తుంది.  ఒకవేళ జీమెయిల్‌, డ్రైవ్‌ల విషయంలో యాక్టివ్‌గా ఉండి.. గూగుల్‌ ఫొటోస్‌ను రెండేళ్లపాటు పట్టించుకోకుండా ఉన్నారనుకోండి. గూగుల్‌ ఫొటోస్‌లో ఉన్న కంటెంట్‌ మొత్తాన్ని గూగుల్‌ తొలగిస్తుంది.  డేటా డిలీట్‌ కాకుండా ఉండాలంటే..  తరచూ గూగుల్‌ అకౌంట్‌కు లాగిన్‌ అయ్యి.. ఇంటర్నెట్‌ కనెక్టివిటీ ద్వారా జీమెయిల్‌, గూగుల్‌ డ్రైవ్‌, గూగుల్‌ ఫొటోలను చెక్‌ చేస్తూ ఉండాలి(వెబ్‌ లేదా యాప్‌లో అయినా సరే). అవసరం లేని ఫొటోలు, వీడియోలు, కంటెంట్‌ను తీసేస్తూ.. ఫ్రీ స్పేస్‌ను మెయింటెన్‌ చేస్తూ ఉండాలి. మరో ముఖ్యమైన విషయం ఏంటంటే.. చాలామంది ఒకే ఫోన్‌లో రెండు, మూడు గూగుల్‌ అకౌంట్లను మెయింటెన్‌ చేస్తుంటారు. కాబట్టి, అన్ని అకౌంట్‌లకు సంబంధించిన ఫొటోస్‌, డ్రైవ్‌, జీమెయిల్‌ అకౌంట్లను తప్పనిసరిగా వెరిఫై చేస్తూ ఉండాలి. ఇదీ చదవండి: ఇంట్లో కరెంట్‌ బోర్డు సమస్యలను ఇలా గుర్తించొచ్చు!


 
      జేఎన్‌టీయూకి అవినీతి చెదలు
 
      అంగడి సరుకుగా మారిన పట్టాల వ్యవహారం
 
      చేతివాటం చూపుతున్న అధికారులు
 
      ప్రతి పనికీ ఓ రేటు
 
      మంటగలుస్తున్న విశ్వ విఖ్యాత జేఎన్‌టీయూ ప్రతిష్ట
 
      కష్టపడే వారికి దక్కని ఫలితం
 
      ఆందోళన చెందుతున్న విద్యార్థులు
 
 సాక్షి, సిటీబ్యూరో: జేఎన్‌టీయూ అక్రమాల పుట్టగా మారింది. డబ్బులిస్తే ఏ పరీక్షనైనా పాస్ చేస్తున్నారు. డబ్బులకు మరిగిన కొందరు అధికారులు అవినీతి బాగోతంలో నిండా మునిగి తేలుతున్నారు. ఇలాంటి చర్యల కారణంగా సాంకేతిక విద్యారంగంలో రాష్ట్రానికే తలమానికంగా మారి ప్రపంచ స్థాయిలో పేరు తెచ్చుకున్న జవహర్‌లాల్ నెహ్రూ సాంకేతిక విశ్వవిద్యాలయం ప్రతిష్ట మసకబారుతోంది.
 
 మేథస్సుకు పదును పెట్టాల్సిన చోట, సరికొత్త ఆవిష్కరణలకు అంకురార్పణ జరగాల్సిన ప్రదేశంలో అవినీతి రాజ్యమేలుతోంది. డబ్బులకు కక్కుర్తి పడుతున్న కొందరు పీహెచ్‌డీ పట్టాలను అంగడి సరుకుగా విక్రయిస్తున్నారు. ఒక్కో పరీక్షకు ఓ రేటు నిర్ణయించి దర్జాగా వసూలు చేస్తున్నారు. డబ్బున్నోడు చదవకుండానే పట్టా పొందుతున్నాడు. అదే సమయంలో కష్టపడి చదివిన వారు వెనకబడిపోతున్నారు.
 
 గత కొన్నేళ్లుగా వర్సిటీలో జరుగుతోన్న ఈ అవినీతి దందాపై పలువురు విద్యార్థులు గగ్గోలు పెడుతున్నారు. విద్యా వ్యవస్థలో వేళ్లూనుకుంటున్న ఈ అవినీతిపై విద్యావేత్తలు, విద్యార్థులు, మేధావులు సైతం తీవ్ర ఆగ్రహావేశాలు వ్యక్తం చేస్తున్నారు.
  
 పీహెచ్‌డీ పట్టా ధర రూ.2 లక్షలు!
  
 విస్తృత పరిశోధనలు చేయకుండానే, సిద్ధాంత పత్రాలు పూర్తిస్థాయిలో సమర్పించకుండానే కొందరు పీహెచ్‌డీ పట్టాలు పొందుతున్నారు. వర్సిటీలో తిష్టవేసిన అక్రమార్కులు ఈ తతంగాన్ని నడుపుతున్నారు. కేవలం రూ.2 లక్షలు వారి చేతిలో పెడితే చాలు వర్సిటీ నిబంధనలకు పక్కనపెట్టి పీహెచ్‌డీ ఫైల్‌ను వారే ముందుకు నడిపిస్తారని తెలిసింది. లేకపోతే అదే ఫైల్‌ను తొక్కిపెడతారని సమాచారం. డబ్బులిచ్చిన వారికి సంబంధించిన  పీహెచ్‌డీ ఫైల్‌ను స్వయంగా వారే వీసీ వద్దకు తీసుకెళ్లి పట్టా వచ్చేందుకు పూర్తి స్థాయి సహాయ సహకారాలు అందిస్తారన్న ఆరోపణలు వినిపిస్తున్నాయి.
  
 ప్రీ పీహెచ్‌డీ పరీక్ష పేపర్ ధర రూ.50 వేలట..
  
 వివిధ సబ్జెక్టుల్లో పీహెచ్‌డీ అడ్మిషన్ పొందిన ప్రతి విద్యార్థి తప్పనిసరిగా ప్రీ పీహెచ్‌డీ పరీక్షలో రెండు పేపర్లలో ఉత్తీర్ణులు కావాల్సి ఉంటుంది. ఈ పరీక్ష పాస్‌కావడం కష్టసాధ్యమని పలువురు అభ్యర్థులు భావిస్తారు. కానీ ఈ వర్సిటీలో కొందరు అక్రమార్కులకు ప్రతి పేపరుకు రూ.50 వేల చొప్పున సమర్పిస్తే చాలు ప్రీ పీహెచ్‌డీ పరీక్ష పాస్ కావడం సులువేనని పలువురు స్కాలర్లు చెబుతున్నారు.
  
 బీటెక్, ఎంటెక్ పరీక్ష పేపరుకు రూ.10 వేలు?..
  
 ఇక బీటెక్, ఎంటెక్ కోర్సుల్లోని పలు సబ్జెక్టుల్లో ఉత్తీర్ణులు కావాలనుకునే వారు ప్రతి పేపరుకు రూ.10 వేలు చొప్పున చెల్లిస్తే కష్టపడి చదవకుండానే పాస్ కావచ్చట. పాస్ మార్కులు వేసేందుకు పేపరుకు రూ.10 వేల చొప్పున వర్సిటీలో తిష్టవేసిన అక్రమార్కులు వసూలు చేస్తున్నారని పలువురు విద్యార్థులు ఆరోపిస్తున్నారు.
  
 స్టేషనరీ రుసుములోనూ కక్కుర్తే..
  
 జేఎన్‌టీయూ గుర్తింపు పొందిన ప్రైవేటు కళాశాలలు ఏటా ప్రతి విద్యార్థిపైమౌలిక వసతుల కల్పన ఫీజు (ఇన్‌ఫ్రాస్ట్రక్చర్ ఫీ)కింద నిర్ణీత మొత్తాన్ని జేఎన్‌టీయూకు చెల్లించాల్సి ఉంటుంది.
  
 ఇది లక్షల రూపాయల్లో ఉండడంతో పలు కళాశాలలు తమ ఆర్థిక ఇబ్బందులను చూపుతూ ఈ ఫీజును చెల్లించడంలేదు. దీన్ని సాకుగా తీసుకొని కొందరు అధికారులు పరీక్షల నిర్వహణకు అవసరమైన  ఖాళీ సమాధాన పత్రాలు(బ్లాంక్ ఆన్సర్ బుక్స్) సరఫరా చేయడాన్ని నిలిపివేస్తున్నారు. దీంతో చేసేదిలేక కళాశాలల యాజమాన్యాలు కళాశాలకు రూ.లక్ష నుంచి రూ.2 లక్షల చొప్పున వారికి కప్పం చెల్లించి సమాధాన పత్రాలు(స్టేషనరీ) తీసుకెళుతున్నాయి.
  
 లేకుంటే ఇన్‌ఫ్రాస్ట్రక్చర్ ఫీ చెల్లించాలని వారు ఒత్తిడి తెస్తున్నారని పలువురు కళాశాలల నిర్వాహకులు పేర్కొంటున్నారు.
  
 విజిలెన్స్ విచారణకు డిమాండ్..
 
 వర్సిటీలో జరుగుతోన్న అక్రమాలు, మూల్యాంకన విభాగంలోని అవినీతిపై విజిలెన్స్ విచారణ జరిపిం చాలని విద్యారంగ నిపుణులు డిమాండ్ చేస్తున్నారు. ఇలాంటి అవినీతి, అక్రమాలతో వర్సిటీ ప్రతిష్ట మంటగలుస్తుందని ఆవేదన వ్యక్తం చేస్తున్నారు.
  
  రూ.లక్ష ఇస్తే పరీక్ష కేంద్రమే మార్పు..
 
 ఇంజనీరింగ్ కోర్సులో ఏటా జరిగే సెమిస్టర్ ఎగ్జామ్స్‌కు పరీక్ష కేంద్రాలను కోరిన చోట వేయించుకునేందుకు లక్ష రూపాయలిస్తే సరిపోతుందట. ప్రైవేటు కళాశాలల యాజమాన్యాలు కోరిన కేంద్రాల్లో పరీక్ష రాసుకునే వెసులుబాటు కల్పించే దుస్సంప్రదాయం వర్సిటీలో నెలకొంది. ఒకవేళ కళాశాలలో విద్యార్థుల సంఖ్య పెరిగితే ఆ లక్ష రూపాయలు కాస్త రూ.2 లక్షలు అవుతుందని సమాచారం. జేఎన్‌టీయూ పరిధిలో సుమారు 450 ప్రైవేటు కళాశాలలున్నాయి. ఆయా కళాశాలల యాజమాన్యాలు కోరిన చోట పరీక్ష కేంద్రాలు కేటాయించి రూ.లక్షల్లో దండుకుంటున్నట్టు ఆరోపణలు వినిపిస్తున్నాయి.