కడ్తాల్‌(కల్వకుర్తి) రంగారెడ్డి : గుర్తు తెలియని మహిళ కల్వకుర్తి ప్రభుత్వ ఆస్పత్రిలో చికిత్స పొందుతూ సోమవారం మృతి చెందింది. సంఘటనకు సంబంధించి ఎస్‌ఐ సుందరయ్య తెలిపిన వివరాలు.. ఈ నెల 4వ తేదీన గుర్తు తెలియని మహిళ(50), మండల కేంద్రంలోని ప్రధాన రహదారి సమీపంలో అనారోగ్యంతో బాధపడుతూ పడి ఉంది. స్థానికుల సమాచారం మేరకు గుర్తు తెలియని మహిళను చికిత్స నిమిత్తం కల్వకుర్తి ప్రభుత్వ ఆస్పత్రికి తరలించగా, చికిత్స పొందుతూ సోమవారం ఉదయం మృతి చెందింది. మృతదేహానికి పోస్టుమార్టం నిర్వహించి కేసు నమోదు చేసినట్లు ఎస్‌ఐ తెలిపారు.  

కొవ్వూరు : పట్టణంలో రోడ్డు కం రైలు వంతెన దిగువున గోదావరి నదిలో గుర్తుతెలియని మహిళ మృతదేహం కనిపించింది. సుమారు 50 నుంచి యాభై ఐదేళ్ల వయసు కలిగిన మహిళ మృతదేహాన్ని శుక్రవారం స్థానికులు గుర్తించారు. మూడు, నాలుగు రోజుల క్రితమే ఆమె మృతిచెంది ఉండవచ్చునని భావిస్తున్నారు. పసుపు రంగు చీర ధరించి ఉంది. ఏ విధమైన ఆధారాలు లభ్యం కాలేదని పోలీసులు తెలిపారు. వీఆర్వో పోలుమాటి సూర్యారావు ఇచ్చిన ఫిర్యాదు మేరకు కేసు నమోదు చేసినట్టు ఎస్సై ఎస్‌ఎస్‌ఎస్‌ పవన్‌కుమార్‌ తెలిపారు. మృతదేహాన్ని వెలికితీసి పోస్టుమార్టం నిమిత్తం కొవ్వూరు ప్రభుత్వాసుపత్రికి తరలించామన్నారు. వివరాల కోసం 08813–231100, 94407 96622, 80083 72359 నంబర్‌కి కాల్‌ చేయాలని సూచించారు. మృతదేహం పూర్తిగా పాడై ఉంది. ప్రాథమికంగా లభించిన ఆధారాలను బట్టి ఆత్మహత్యకు పాల్పడి ఉండవచ్చునని పోలీసులు భావిస్తున్నారు.   


 కంకిపాడు(కృష్ణా జిల్లా): కంకిపాడు మండలం దావులూరు శివారులో ఉన్న ఓ షెడ్డులో ఉరివేసుకుని గుర్తుతెలియని వ్యక్తి ఆత్మహత్య చేసుకున్నాడు. మృతుడి వయసు 30 నుంచి 35 మధ్య ఉండవచ్చు. బుధవారం ఉదయం స్థానికులు గమనించి పోలీసులకు సమాచారం అందించారు. పోలీసులు కేసు నమోదు చేసి దర్యాప్తు చేస్తున్నారు.


 హైదరాబాద్: హైదరాబాద్లో దారుణం చోటుచేసుకుంది. బేగంపేటలో ఓ వ్యక్తిని నడి రోడ్డుపై నరికి చంపేశారు. రియాజ్ అనే రియల్టర్ ని గుర్తు తెలియని దుండగులు కత్తులతో పొడిచి చంపేశారు. స్థల వివాదమే ఈ హత్యకు కారణమని పోలీసులు భావిస్తున్నారు. మరిన్ని వివరాలు తెలియాల్సి ఉంది.


 నాగార్జున యూనివర్సిటీ(గుంటూరు): నాగార్జున యూనివర్సిటీ మహిళా హాస్టల్ సమీపంలో గురువారం రాత్రి గుర్తు తెలియని వ్యక్తి కలకలం రేపాడు. మహిళా హాస్టల్ సమీపంలోని కరెంటు స్తంభంపైన రాత్రి 9గంటల ప్రాంతంలో ఒక గుర్తు తెలియని వ్యక్తి ఉండటం హాస్టల్ లోపల ఉన్న విద్యార్థినులు గమనించారు.
 వారు వెంటనే ఆవిషయాన్ని భద్రతా సిబ్బందికి తెలియజేశారు. సెక్యూరిటీ అప్రమత్తమయ్యేలోగానే ఆ ఆగంతకుడు అక్కడి నుంచి వెంటనే దిగి పరారయ్యాడు. ఈ విషయమై పోలీసులకు ఎటువంటి ఫిర్యాదు అందలేదు. కాగా, హాస్టల్ ప్రహరీకి సోలార్ ఫెన్సింగ్ ఉందని సమాచారం.


 రంగారెడ్డి: గుర్తుతెలియని వ్యక్తులు గుప్త నిధుల కోసం తవ్వకాలు జరిపిన సంఘటన మండల పరిధిలోని పెదవేడులో చోటుచేసుకుంది. ఏఎస్‌ఐ మారుతీ కథనం ప్రకారం.. గ్రామానికి చెందిన బల్వంత్‌రెడ్డి, తులిసిరెడ్డి ఇళ్ల వెన కాల మంగళవారం రాత్రి గుర్తుతెలియని వ్యక్తులు గుప్తనిధుల కోసం తవ్వకాలు జరిపారు. గమనించిన తులసిరెడ్డి బుధవారం షాబాద్ ఠాణాలో ఫిర్యాదు చేశాడు.
 ఘటనా స్థలానికి చేరుకున్న పోలీసులు కేసు నమోదు చేసుకొని దర్యాప్తు చేస్తున్నారు.
  


 తూర్పుగోదావరి: గౌతమి గోదావరి నదిలో గుర్తుతెలియని మృతదేహం కొట్టుకొచ్చింది. ఈ సంఘటన గురువారం సాయంత్రం తూర్పుగోదావరి జిల్లా రావులపాలెంలో కొత్తబ్రిడ్జి 6వ స్తంభం సమీపంలో జరిగింది. గుర్తుతెలియని శవం నదిలో కొట్టుకొచ్చి వంతెన కింద ఆగింది. ఈ విషయాన్ని స్థానికులు గమనించి పోలీసులకు సమాచారం అందించారు. పోలీసులు దర్యాప్తు ప్రారంభించారు.


 హైదరాబాద్: హైదరాబాద్లోని గాంధీనగర్ పీఎస్ పరిధిలో గుర్తుతెలియని యువకుడి మృతదేహాన్ని పోలీసులు గుర్తించారు. యువకుడి(25)ని రాళ్లతో కొట్టి చంపినట్లు పోలీసులు గుర్తించారు. మృతదేహన్ని పోస్ట్‌మార్టం కోసం తరలించారు. కేసు నమోదు చేసి నిందితుల కోసం గాలింపు చర్యలు చేపట్టారు.
  


 న్యాన్‌కల్ (మెదక్ జిల్లా): గుర్తుతెలియని వాహనం ఢీకొన్న సంఘటనలో ఇద్దరు అక్కడికక్కడే మృతిచెందారు. ఈ సంఘటన మెదక్ జిల్లా న్యాన్‌కల్ మండలం మామిడి గ్రామ శివారులో ఆదివారం మధ్యాహ్నం జరిగింది. బీదర్‌కు చెందిన నగేష్(35). సూర్య(26) ద్విచక్రవాహనంపై వెళుతుండగా వెనుకనుంచి వేగంగా వచ్చిన గుర్తుతెలియని వాహనం వారిని ఢీకొంది. ఈ ప్రమాదంలో ఇద్దరూ అక్కడికక్కడే మృతిచెందారు. ప్రమాదానికి కారణమైన వాహనం ఆపకుండా వెళ్లిపోయింది.
 విషయం తెలిసిన వెంటనే న్యాన్‌కల్ సబ్‌ఇన్‌స్పెక్టర్ లవ్ కుమార్ సంఘనా స్థలాన్ని పరిశీలించారు. మృతదేహాలను పోస్టుమార్టం నిమిత్తం స్థానిక ప్రభుత్వ ఆస్పత్రికి తరలించారు. ఢీకొట్టి వెళ్లిపోయిన వాహనాన్ని పట్టుకునేందుకు ప్రయత్నిస్తున్నామని చెప్పారు.
  


 హైదరాబాద్ సిటీ: సనత్‌నగర్ పరిధిలో లోథా అపార్ట్‌మెంట్ పక్కనున్న చెట్టుపై కరెంటు తీగల మధ్య గుర్తుతెలియని వ్యక్తి మృతదేహం వేలాడుతూ కనిపించింది. ఈ విషయాన్ని గమనించిన స్థానికులు పోలీసులకు సమాచారం ఇచ్చారు. పోలీసులు సంఘటనాస్థలికి చేరుకుని మృతదేహాన్ని కిందకు దించారు. ఇంతకీ చనిపోయింది ఎవరనేది ఇంకా తెలియరాలేదు. కరెంటు షాక్‌తో మృతిచెంది ఉండవచ్చునని భావిస్తున్నారు. మృతదేహాన్ని పోస్టుమార్టం నిమిత్తం ప్రభుత్వాసుపత్రికి తరలించారు. పోలీసులు కేసు నమోదు చేసుకుని దర్యాప్తు చేస్తున్నారు. పూర్తి వివరాలు తెలియాల్సి ఉంది.


 అనంతపురం: అనంతరపురం జిల్లా పరిగిలో గుర్తుతెలియని వ్యక్తి మృతదేహాన్ని పోలీసులు గుర్తించారు. శనివారం ఉదయం మండల కేంద్రంలోని నిర్జన ప్రదేశంలో మృతదేహాన్ని కనుగొన్నారు. కాగా, హత్యకు గల కారణాలు తెలియలేదని పోలీసులు తెలిపారు. అతనిని ఇక్కడకి తీసుకొని వచ్చి హత్య చేశారా?లేక ఎక్కడైనా హత్య చేసి ఇక్కడ మృతదేహాన్ని వేశారా అన్న కోణంలో పోలీసులు దర్యాప్తు జరుపుతున్నారు.
 వ్యక్తికి సంబంధించిన వివరాలు తెలియలేదని, హత్యకు గల కారణాలు సైతం దర్యాప్తులో తేలుతాయని పోలీసులు ఆశాభావం వ్యక్తం చేశారు.
  


 అదిలాబాద్: అదిలాబాద్ జిల్లా వాంఖడి మండలం సమెలా గ్రామ సమీపంలోని కెనాల్‌లో మంగళవారం ఉదయం గుర్తుతెలియని మృతదేహం కొట్టుకొచ్చింది. దీన్ని గుర్తించిన స్థానికులు పోలీసులకు సమాచారం అందించారు. సంఘటనా స్థలానికి చేరుకున్న పోలీసులు మృతదేహాన్ని బయటకు తీసి అనవాళ్లు పరిశీలిస్తున్నారు.
 ప్రస్తుతానికి అతని పూర్తి వివరాలు తెలియరాలేదు. మృతునికి సుమారు 30 సంవత్సరాలు ఉండొచ్చని అంచనా వేస్తున్నారు.