ముంబై: విక్కీ డోనర్‌ సినిమా నటుడు భూపేష్‌ కుమార్‌ పాండ్యా బుధవారం సాయంత్రం కన్నుమూశారు. ఆయన గత కొంతకాలంగా ఊపిరితిత్తుల క్యాన్సర్‌తో బాధపడుతున్నారు. నేషనల్‌ స్కూల్‌ ఆఫ్‌ డ్రామా పాండ్యా మరణాన్ని వెల్లడిస్తూ ట్వీట్‌ చేసింది. సీనియర్‌ నటులు మనోజ్‌ బాజ్‌పేయి, గజ్‌రాజ్‌ రావు ఆయన మృతి పట్ల సంతాపం ప్రకటించారు. తన భర్త స్టేజి 4 లంగ్ క్యాన్సర్‌తో బాధపడుతున్నాడని పాండ్యా భార్య ఛాయ ఇటీవల మీడియాకు తెలిపారు. అహ్మదాబాద్‌లోని అపోలో ఆస్పత్రిలో ట్రీట్‌మెంట్‌ జరగుతోందని వెల్లడించారు. భర్త ఆరోగ్య పరిస్థితి ఆందోళనకరంగా ఉందని ఆమె ఆవేదన వ్యక్తం చేశారు. కాగా, క్యాన్సర్‌ ట్రీట్‌మెంట్‌ ఖర్చులతో పాండ్యా కుటుంబం ఆర్థికంగా కుదేలైంది. దీంతో ఆ కుంటుంబాన్ని ఆదుకునేందుకు పాండ్యా స్నేహితుడొకరు నిధులు సమీకరించే యత్నం చేశాడు. మనోజ్‌ బాజ్‌పేయి కూడా పాండ్యాకు ఆర్థిక సాయం చేసి నిధులు సమకూర్చేందుకు ముందుకొచ్చారు.  నటుడు గజ్‌రాజ్‌ రూ.25 వేలు, సిఖియా ఎంటర్‌టైన్‌మెంట్స్‌ రూ. 2 లక్షలు సాయమందించినట్టు సమాచారం. (చదవండి: మేమెప్పుడూ ఇలానే ఉండాలి)

ఇంట్లో టీవీ పెడితే యమి గౌతమ్‌ కనిపిస్తుంది. ఫెయిర్‌ అండ్‌ లవ్లీ యాడ్‌ లేని రోజు ఉంటుందా? యమి ఆ క్రీమ్‌ పూసుకుని మెరిసే సౌందర్యవతి. ఫెయిర్‌ అండ్‌ లవ్‌లీ మోడల్‌గా మాత్రమే కాదు నటిగా కూడా ఆమె బాలీవుడ్‌లో పై వరుసలో ఉంది. ఈ అందమైన జీవితంలోనూ సవాళ్లు ఉంటాయి. ప్రశ్నలు ఉంటాయి. వాటిని అధిగమిస్తూ యమి విజేతగా నిలిచింది. కొన్నేళ్ల క్రితం ఉదయం నాలుగ్గంటలకు యమి గౌతమ్‌ ఫోన్‌ మోగింది. చేసింది ఒక ప్రముఖ పత్రిక నుంచి జర్నలిస్ట్‌. ‘ఏంటి?’ అని అడిగింది యమి. ‘మీ మీద ట్రోలింగ్‌ జరుగుతోంది.. దీనికి మీ సమాధానం ఏమిటి?’ అని అడిగాడు జర్నలిస్ట్‌. అప్పటికి ట్రోలింగ్‌ అంటే ఏమిటో యమికి తెలియదు. ‘ట్రోలింగ్‌ అంటే?’ అని అడిగింది. ‘మిమ్మల్ని తిట్టి పోస్తున్నారు’ అన్నాడతను. ‘ఎందుకు?’ అని అడిగింది నెర్వస్‌గా. ఇంతలో ఫోన్‌ కట్‌ అయ్యింది. అభయ్‌ డియోల్‌ బాలీవుడ్‌లో పేరున్న నటుడు. తన ఫేస్‌బుక్‌ పేజిలో ఒక పోస్ట్‌ పెట్టాడు. ‘సినిమా తారలు అనవసరంగా కలరిజమ్‌ను ప్రచారం చేస్తున్నారు. తెల్లరంగే గొప్పది అనే ఈ ప్రచారం ఆ రంగు లేని వారందరినీ అవమానించే స్థాయిలో ఉంది. షారుక్‌ఖాన్, ఐశ్వర్యరాయ్, సోనమ్‌కపూర్, షాహిద్‌ కపూర్, జాన్‌ అబ్రహమ్‌... వీళ్లంతా తెల్లగా చేసే క్రీములంటూ ఫెయిర్‌నెస్‌ క్రీములను ప్రమోట్‌ చేస్తున్నారు. ఇది కరెక్ట్‌ కాదు’ అని పోస్ట్‌ పెట్టాడు. ఈ వరుసలో యమి పేరు కూడా ఉంది. ఎందుకంటే ఫెయిర్‌నెస్‌ క్రీముల్లో ఫెయిర్‌ అండ్‌ లవ్లీ అగ్రస్థానంలో ఉంది. దాని బ్రాండ్‌ అంబాసిడర్‌ యమి. దాంతో సోషల్‌ మీడియాలో యమి మీద విమర్శలు వెల్లువెత్తాయి. భిన్నమైన రంగులు ఉన్నవారిని న్యూనత పరిచే ఇటువంటి యాడ్స్‌లో నటించేవారికి కనీస ఆలోచన లేదని చాలామంది రాశారు. ఇలా జరుగుతుందని యమి  ఊహించలేదు. దానికి ఎలా రియాక్ట్‌ కావాలో కూడా తెలియదు. ఆ రోజంతా వెక్కివెక్కి ఏడుస్తూ కూచుంది. అసలు ఇందుకేనా ఈ రంగంలోకొచ్చింది? ∙∙ యమికి పుస్తకం తప్ప అద్దం తెలియదు. పుస్తకమే తన అద్దం అన్నట్టుగా ఎప్పుడూ అందులోనే తల దూర్చి ఉండేది చిన్నప్పుడు. వాళ్లది హిమాచల్‌ ప్రదేశ్‌లోని బిలాస్‌పూర్‌. తండ్రి ముకేష్‌ గౌతమ్‌ చిన్నస్థాయి పంజాబీ సినిమాల దర్శకుడు. ఆయన పంజాబీ. తల్లి అంజలి గౌతమ్‌ హిమాచల్‌ కొండజాతి మూలాలున్న స్త్రీ. యమి గౌతమ్‌ బాల్యం బిలాస్‌పూర్‌లో గడిచినా హైస్కూల్, కాలేజ్‌ చండీగఢ్‌లోనే సాగాయి. చిన్నప్పటి నుంచి చదువు మీదే ఆమె ధ్యాస. ఐ.ఏ.ఎస్‌ చేయాలనేది కల. స్కూలు సొంతదే అయినా ఆ స్కూల్లో ఆమె చాలా బిడియంగా తిరుగుతూ ఉండేది. నలుగురి ఎదుటకు రావడానికి చాలా సంకోచించేది. వాళ్ల తాతను ఇంప్రెస్‌ చేయడానికి ఒకసారి టీచర్లు యానివర్సరీ డేలో ఏదో కవిత చదివించాలని ప్రయత్నిస్తే యమి స్కూల్‌ వదిలి ఇంటికి పారిపోయింది. ఇలాంటి అమ్మాయిలకు చదువే కరెక్ట్‌ అని అనుకున్నారు అందరూ. కాని విధి వేరేగా ఆమె ప్రయాణాన్ని నిశ్చయించింది. అలా స్కూల్‌ వదిలి బిడియంతో పారిపోయిన అమ్మాయి ఇవాళ వందలాది మంది చూస్తూ ఉండగా కెమెరా ముందు డైలాగ్‌ చెప్పగలుగుతోంది. ఇది వింత కాకపోతే మరేమిటి? ∙∙ యమి లా డిగ్రీలో చేరింది. ఫైనలియర్‌లో ఉంది. ఆ రోజు ముంబైలో ఉండే బంధువులు చుట్టపు చూపుగా వాళ్లింటికి  వచ్చారు. అందులో ఒకామె టీవీ రంగంలో పని చేసింది. ఆమె యమిని చూసిన మరుక్షణం నుంచి నువ్వు టీవీలో పనిచెయ్‌ టీవీలో పనిచెయ్‌ అని వెంటబడింది. ‘అమ్మా... ఏమిటి ఈ నస’ అని కిచెన్‌లోకి వచ్చి విసుక్కుంది యమి, తల్లితో. కాని ఆ వచ్చినామె వద్దన్నా యమి ఫొటో తీసుకుని ముంబై వెళ్లింది. ఆ తర్వాత తనకు తెలిసిన ప్రొడక్షన్‌ హౌస్‌లన్నింటిలో చూపించింది. ఒక ప్రొడక్షన్‌ హౌస్‌ వారు యమి ఫొటోను చూసి ‘వెంటనే రమ్మనమనండి’ అని అన్నారు. ఇప్పుడు నిర్ణయం తీసుకోవాలి. వెళ్లాలా వద్దా. ‘ఏమో.. ట్రై చేయరాదూ’ అని తల్లిదండ్రులు అన్నారు. అలా తన 20వ ఏట యమి ముంబైలో అడుగుపెట్టింది. వెంటనే రెండు సీరియల్స్‌లో పాత్రలు దొరికాయి. ‘కలర్స్‌’ టీవీలో ప్రసారమైన ‘యే ప్యార్‌ నా హోగా కమ్‌’ సీరియల్‌తో యమి స్టార్‌ అయిపోయింది. ఆ వెంటనే ‘ఫెయిర్‌ అండ్‌ లవ్లీ’ ఆమెను తన మోడల్‌గా ఎంపిక చేసుకుంది. కన్నడ రంగం నుంచి తొలిగా ‘ఉల్లాస ఉత్సాహ’ సినిమాలో హీరోయిన్‌ ఆఫర్‌ వచ్చింది. ఇది మన తెలుగు ‘ఉల్లాసంగా ఉత్సాహంగా’కు రీమేక్‌. హీరో కన్నడ స్టార్‌ గణేష్‌. అయితే ఆమెకు బాలీవుడ్‌లో పేరు రావాలి. అక్కడ హిట్‌ కావాలి. ‘వికీ డోనర్‌’ ఆ అవకాశం ఇచ్చింది. దర్శకుడు సూజిత్‌ సర్కార్‌ హీరో జాన్‌ అబ్రహమ్‌ను వొప్పించి అతడు నిర్మాతగా ఒక చిన్న సిన్మాకు దర్శకత్వం వహించే చాన్స్‌ కొట్టాడు. కథాంశం కొత్తది. ప్రత్యుత్పత్తి కేంద్రాలకు ‘వీర్యాన్ని డొనేట్‌ చేస్తూ’ జీవించే కుర్రాడికథ అది. ఆ పాత్రకు కొత్తవాడైన ఆయుష్మాన్‌ ఖురానాను తీసుకున్నాడు. అతడి ప్రియురాలిగా యమి గౌతమ్‌ను తీసుకున్నాడు సూజిత్‌. ‘వికీ డోనర్‌’ పెద్ద హిట్‌. ఆ వెంటనే తెలుగులో అల్లుశిరీష్‌తో ‘గౌరవం’, తరుణ్‌తో ‘యుద్ధం’ సినిమాలు చేసింది యమి. అవి సరిగ్గా ఆడలేదు. అజయ్‌ దేవగణ్‌తో చేసిన ‘యాక్షన్‌ జాక్సన్‌’ కూడా సత్ఫలితం ఇవ్వలేదు. కాని వరుణ్‌ ధావన్‌తో చేసిన ‘బద్లాపూర్‌’ సూపర్‌ డూపర్‌ హిట్‌ అయ్యింది. ఇప్పుడు ఏకంగా హృతిక్‌ రోషన్‌ సరసన నటించే చాన్స్‌ వచ్చింది. ‘కాబిల్‌’ కూడా ప్రేక్షకులు హిట్‌ చేశారు. ఇటీవల ఆమె వికీ కౌశల్‌తో చేసిన ‘ఉరి: ద సర్జికల్‌ స్ట్రయిక్‌’, ఆయుష్మాన్‌ ఖురానాతో చేసిన ‘బాలా’ సూపర్‌ డూపర్‌ హిట్స్‌ అయ్యాయి. ఉరిలో ఇన్‌వెస్టిగేటివ్‌ ఆఫీసర్‌గా, బాలాలో అమాయకమైన స్మాల్‌టౌన్‌ గర్ల్‌గా యమి తన ముద్ర వేసింది. ఇప్పుడు ఆమె బాలీవుడ్‌లో ఎదిగిన నటి. స్టార్‌ పెర్ఫార్మర్‌. పెద్ద బేనర్లు, ఆమె చేస్తే బాగుండు అనుకునే స్క్రిప్ట్‌లు ఆమెకోసం వెయిట్‌ చేస్తున్నాయి. ∙∙ ‘తెల్లరంగు గొప్పది, నల్లరంగు తక్కువది అనే భావన తప్పు. తెల్లరంగు ఉన్నవారికే అవకాశాలు వస్తాయి, ఉద్యోగాలు వస్తాయి, వాళ్లనే అందరూ అభిమానిస్తారు అని ప్రచారం చేయడం కూడా తప్పు. గతంలో ఆ ధోరణిలో యాడ్స్‌ వచ్చేవేమో. ఇప్పుడు మన సౌందర్యాన్ని మనం మరింత పెంచుకోవడం ఎలా అనే పాయింట్‌తో యాడ్స్‌ వస్తున్నాయి. అలాంటి యాడ్స్‌లో చేయడం తప్పు కాదు. నేను అలాంటి యాడ్స్‌నే చేస్తున్నానని గట్టిగా చెప్పగలను. అయినా నేను ఒక స్వతంత్రురాలిని. వేరొకరి ఆలోచనలు, భావధారను బట్టి నేను నా నిర్ణయాలను మార్చుకోను. ఏది సరైనదైతే అదే నేను చేస్తాను’ అని తన మీద వచ్చిన విమర్శలకు జవాబు ఇచ్చింది యమి ఆ తర్వాత. ∙∙ యమికి తన చెల్లెలు సురీలీ గౌతమ్‌తో, తమ్ముడు ఓజస్‌తో ఎక్కువ అటాచ్‌మెంట్‌ ఉంటుంది. తనకు షూటింగ్‌ లేకపోతే వారితోనే సమయాన్ని గడుపుతుంది. ఆమెకు పోల్‌ డాన్స్‌ తెలుసు. ప్రొఫెషనల్‌గా ఆ డాన్స్‌ను నేర్చుకుంది. మనం అనుకునే రంగం వేరు కావచ్చు, ప్రవేశించే రంగం వేరు కావచ్చు... కాని ఏ రంగంలో ఉన్నా ఆ రంగంలో చిత్తశుద్ధితో ప్రయత్నిస్తే గెలుపు అసాధ్యం కాదు అంటుంది యమి. ఆమె తమ బాహ్యసౌందర్యంతో పాటు మానసిక సౌందర్యాన్ని కూడా మెరుగు పెట్టుకుంటున్నదని ఆమె ఎదుగుదల, ఆలోచనలు, వ్యాఖ్యలు తెలియచేస్తున్నాయి. ఆమెను భవిష్యత్తులో మరింత అందంగా మనం చూడబోతున్నాం. – సాక్షి ఫ్యామిలీ

నటుడు హరీష్‌ కల్యాణ్‌తో నటి తాన్యా హోప్‌ జత కట్టనుంది. బిగ్‌బాస్‌ రియాలిటీ గేమ్‌ షోలో పాల్గొన్న తరువాత నటుడు హరీష్‌ కల్యాణ్‌ సినిమాల్లో హీరోగా బిజీ అయిపోయారు. ఈయన నటించిన ప్యార్‌ ప్రేమ కాదల్, ఇస్పేట్‌ రాజావుమ్‌ ఇదయ రాణీయుం వంటి చిత్రాలు మంచి ప్రజాదరణను అందుకున్నాయి. ప్రస్తుతం ధనుష్‌ రాశీ నేయర్‌గళే చిత్రంలో నటిస్తున్నాడు. సంజయ్‌ భారతీ దర్శకత్వం వహిస్తున్న ఈ చిత్రం నిర్మాణంలో ఉంది. తాజాగా హరీష్‌ కల్యాణ్‌ మరో కొత్త చిత్రానికి రెడీ అవుతున్నారు. ఈయన హీరోగా నటించనున్న ఈ చిత్రానికి దారాళ్‌ ప్రభు అనే టైటిల్‌ను నిర్ణయించారు. ఇది హిందీలో మంచి హిట్‌ అయిన విక్కీ డోనర్‌ చిత్రానికి రీమేక్‌. కాగా ఇందులో అతనికి జంటగా తాన్యాహోప్‌ హీరోయిన్‌గా ఎంపికైందన్నది తాజా సమాచారం. ఈ కన్నడ బ్యూటీ గతంలో అరుణ్‌విజయ్‌కు జంటగా తడం చిత్రంలో నటించింది. తొలి చిత్రంతోనే కోలీవుడ్‌లో హిట్‌ను తన ఖాతాలో వేసుకున్న ఈ బ్యూటీకి ఇది రెండో అవకాశం.  కాగా మరిన్ని అవకాశాలు వస్తున్నట్లు తాన్యా చెబుతోంది. ఇకపోతే హిందీలో నటుడు అనుకపూర్‌ పోషించిన ప్రధాన పాత్రను తమిళంలో వివేక్‌ నటించనున్నారు. ఈ చిత్రం ద్వారా కృష్ణ మారిముత్తు దర్శకుడిగా పరిచయం కానున్నారు. ఈ చిత్రాన్ని స్క్రీన్‌ సీన్‌ సంస్థ నిర్మించడానికి సన్నాహాలు చేస్తోంది. త్వరలోనే షూటింగ్‌ ప్రారంభం కానుందని సమాచారం. దీనికి సంబంధించిన పూర్తి వివరాలు త్వరలోనే వెల్లడయ్యే అవకాశం ఉంది. కాగా ఈ చిత్రం తరువాత నటుడు హరీష్‌కల్యాణ్‌ దర్శకుడు శశి దర్శకత్వంలో నటించడానికి అంగీకరించినట్లు తెలిస్తోంది.

తమిళ యంగ్‌ హీరో హరీష్‌ కల్యాణ్‌ కొత్త చిత్రం కోసం దానాలు చేసే ప్రభువుగా మారిపోయారు. ఇంతకి ఏం దానం చేస్తారు? అన్నదానమా? భూములా? కాదు. డబ్బులా? కానే కాదు. వీర్యం దానం చేస్తాడట. బాలీవుడ్‌ సూపర్‌ హిట్‌ మూవీ ‘విక్కీ డోనర్‌’ తమిళ రీమేక్‌లో హరీష్‌ కల్యాణ్‌ హీరోగా నటిస్తున్నారు. ఇటీవల విడుదలైన నాని ‘జెర్సీ’లో నాని కుమారుడిగా నటించింది ఇతగాడే. ఆ సినిమా క్లైమాక్స్‌లో తండ్రి గురించి ఎమోషన్‌ స్పీచ్‌ ఇచ్చి, అందర్నీ ఆకట్టుకున్నాడు హరీష్‌ కల్యాణ్‌. ఇక అతను చేయనున్న ‘విక్కీ డోనర్‌’ రీమేక్‌ విషయానికొస్తే.. ‘యుద్ధం శరణం’ ఫేమ్‌ కృష్ణ మరిముత్తు ఈ రీమేక్‌ను డైరెక్ట్‌ చేయనున్నారు. ఈ చిత్రానికి ‘దారాళ ప్రభు’ అనే టైటిల్‌ను అనుకుంటున్నారని తెలిసింది. జూన్‌ నుంచి ఈ సినిమా సెట్స్‌ మీదకు వెళ్లనుంది.

బాలీవుడ్‌లో నటుడు ఆయుష్మాన్‌ ఖురానా కెరీర్‌లో దూసుకెళ్తున్నారు. ఇటీవల ఆయన హీరోగా నటించిన ‘అంధాధూన్, బదాయి హో’ చిత్రాలు హిందీ చిత్రపరిశ్రమలో మంచి టాక్‌ను సొంతం చేసుకున్నాయి. సినిమాల్లోకి రాకముందు రియాలిటీ షోలు, టీవీ షోలు, రేడియో జాకీగా పని చేశారు ఆయుష్మాన్‌. ఆయనకు చెప్పుకోదగ్గ ఫిల్మీ బ్యాగ్రౌండ్‌ లేదు. ‘‘స్టార్‌ కిడ్‌ అయ్యి ఉంటే మరిన్ని అవకాశాలు వచ్చి ఉండేవి’’ అని మీరు ఆలోచిస్తున్నారా? అన్న ప్రశ్నను ఆయుష్మాన్‌ ముందు ఉంచితే... ‘‘నా 27 ఏళ్ల వయసులో నేను ‘విక్కీ డోనర్‌’ సినిమాతో బాలీవుడ్‌లో ఎంట్రీ ఇచ్చాను. అదే నేను స్టార్‌ కిడ్‌ అయితే 22 ఏళ్లకే సినిమాల్లోకి వచ్చే వాడినేమో. కానీ ఈ ఐదేళ్ల వ్యత్యాసం నాకు పెద్ద సమస్యగా అనిపించడం లేదు. ఎందుకంటే 17 ఏళ్లకే రియాలిటీ షోలో పాల్గొన్నాను. 22 ఏళ్ల వయసులో ఢిల్లీలో ఉన్న యంగెస్ట్‌ రెడీయో జాకీని నేనే. ఇలా అన్ని రకాల ప్లాట్‌ఫామ్స్‌ను దాటుకుంటూ వచ్చాను. ఎక్కువమంది యాక్టర్స్‌కు ఇది సాధ్యం కాకపోవచ్చు. 27 ఏళ్ల వయసులో ఒక యాక్టర్‌కు ఉండాల్సిన మెచ్యూరిటీ థింకింగ్‌ కన్నా ఇప్పుడు నా ఆలోచన స్థాయి ఎక్కువ అని చెప్పగలను’’ అన్నారు.


 ‘ఏమో గుర్రం ఎగరావచ్చు’ చిత్రం తర్వాత కొంత గ్యాప్ తీసుకున్న సుమంత్ ‘నరుడా.. డోనరుడా’ చిత్రంతో ప్రేక్షకుల ముందుకు వస్తున్నారు. హిందీ ‘విక్కీ డోనర్’కు రీమేక్‌గా వస్తున్న ఈ చిత్రాన్ని మల్లిక్‌రామ్ దర్శకత్వంలో వై.సుప్రియ, సుధీర్ పూదోట నిర్మించారు. పల్లవీ సుభాష్ కథానాయిక.
 
 ఈ శుక్రవారం విడుదల కానున్న ‘నరుడా.. డోనరుడా’ గురించి సుమంత్ మాట్లాడుతూ- ‘‘ ‘గోల్కొండ హైస్కూల్’ తర్వాత నా మూడు సినిమాలు సరిగ్గా ఆడలేదు. దాంతో కెరీర్‌జాగ్రత్తగా ప్లాన్ చేసుకోవాలనుకున్నా. ఓ రోజు టీవీలో ‘విక్కీ డోనర్’ చూసిన తాతయ్య (ఏయన్నార్) చాలా బాగుందన్నారు. అటువంటి వైవిధ్యమైన కథలు రాయమని రచయితలకు చెప్పేవాణ్ణి. నిర్మాత రామ్మోహన్‌గారు దర్శకుడు మల్లిక్‌ను పరిచయం చేశారు. మల్లిక్ విజన్ ఉన్న డెరైక్టర్. వీర్యదానం నేపథ్యంలో సాగే చిత్రమిది. వినోదంతో పాటు సందేశం ఉంటుంది. సినిమాలో ఎక్కడా అసభ్యత ఉండదు.
 
 రెగ్యులర్ చిత్రాలు చేయడం మా కుటుంబంలోనే లేదు. ఎప్పుడూ కొత్తవి ట్రై చేస్తుంటాం. రావణాసురుడు, దుర్యోధనుడి తరహా విలన్ పాత్రలు చేయాలనుంది. ఎన్టీఆర్, చిరంజీవి, మోహన్‌బాబుగార్లు తొలుత విలన్‌గా నటించి, సక్సెస్ అయ్యారు. ప్రస్తుతం నాలుగైదు ప్రాజెక్టులు చర్చల దశలో ఉన్నాయి. ఈ చిత్రం విడుదల తర్వాత పూర్తి వివరాలు చెబుతా’’ అన్నారు.


 ‘‘2012లో ‘విక్కీ డోనర్’ చూశా, బాగా నచ్చింది. చివరి రోజుల్లో తాతగారు (అక్కినేని నాగేశ్వరరావు) టీవీలో చూసిన చివరి రెండు మూడు సినిమాల్లో ఇదొకటి. ‘తెలుగులో ఇలాంటి సినిమా ఎందుకు చేయకూడదు’ అన్నారాయన. ఏడాదిపాటు ‘విక్కీ డోనర్’ లాంటి స్క్రిప్ట్ కోసం ఎదురు చూశా. నిర్మాత రామ్మోహన్ సలహాతో రీమేక్‌కి ఓటేశా. రియల్ లైఫ్‌లో నాకు పిల్లలు లేకపోవడం ఈ సినిమా చేయడానికి ఓ కారణం’’ అని సుమంత్ అన్నారు. ఆయన హీరోగా అన్నపూర్ణ స్టూడియోస్ సమర్పణలో సుధీర్ పూదోట, వై.సుప్రియ నిర్మించిన సినిమా ‘నరుడా.. డోనరుడా’. హిందీ ‘విక్కీ డోనర్’కి ఇది రీమేక్. మల్లిక్ రామ్ దర్శకుడు.
 
 ఈ నెల 4న రిలీజవుతోంది. ‘‘ఓ మహిళగా చెబుతున్నా.. ఫ్యామిలీ అందరూ చూడదగ్గ చిత్రమిది. వైవిధ్యమైన, సున్నితమైన కథను మల్లిక్ రామ్ తెరకెక్కించిన తీరు బాగుంది’’ అని వై. సుప్రియ అన్నారు. ‘‘వీర్యదానం మీద చాలా సినిమాలొచ్చాయి. కానీ, ‘విక్కీ డోనర్’ వంటి గొప్ప సినిమా ఇప్పటివరకూ రాలేదు’’ అని మల్లిక్ రామ్ అన్నారు. తనికెళ్ల భరణి మాట్లాడుతూ -‘‘కథ  గీత దాటితే.. జుగుప్సగా, బూతుగా అనిపించే అవకాశం ఉంది. కానీ, హృదయానికి హత్తుకునేలా తీశారు’’ అన్నారు. ‘‘సుమంత్ ఎలాంటి పాత్రలోనైనా నటించగలడని ఈ సినిమా నిరూపిస్తుంది’’ అని సుధీర్ పూదోట అన్నారు.
  


 ముంబై:విక్కీ డోనర్ సినిమాతో విజయం సాధించి బాలీవుడ్ లో తనకంటూ ప్రత్యేక గుర్తింపు సాధించిన ఆయూష్మాన్ ఖురానా తాను ఒక్క నటనకే పరిమితం కాదని, అవసరమైతే పాటలతో కూడా అలరిస్తానని తెలిపాడు.  తనకు నటించడంతో పాటు పాటలు పాటడం ఒక ప్లస్ పాయింట్ గా పేర్కొన్నాడు.  ప్రస్తుతం బాలీవుడ్ యువకుల హవా కొనసాగుతుందన్నాడు. ఆ ప్రవాహంలో తాను నిలదొక్కుకోగలననే ఆశాభవం వ్యక్తం చేశాడు. తనకు నటనతో పాటు పాటల పాడటం అదనపు బలంగా పేర్కొన్నాడు. ఈ రెండు అంశాలతో తాను బాలీవుడ్ దూసుకుపోగలనని ఆయూష్మాన్ తెలిపాడు.  తనకి సీనియర్ నటుడైన రణ్బీర్ కపూర్ పని విధానం ఆకట్టుకుందన్నాడు.
  
 వీర్య దానం మెయిన్ కాన్స్ ప్ట్ గా ఆయుష్మాన్ ఖురానా హీరోగా నటించిన విక్కీ డోనర్ మూవీ జనానికి బాగా నచ్చింది. ఓ డాక్టర్ ప్రోద్బలంతో డబ్బు కోసం ఎక్కువ మందికి వీర్యదానం చేసిన హీరో ఆ తర్వాత పడే కష్టాల చుట్టూ తిరిగిన విక్కీ డోనర్ మూవీ హిట్ కొట్టేయడంతో ఆయూష్మాన్ ప్రస్తుతం సెట్స్ మీద ఉన్న బేవకూ ఫియాం చిత్రంపై దృష్టి సారించాడు. ఈ చిత్రంతో మరోహిట్ సాధించి తనకు తిరుగులేదని నిరూపించుకోవాలని ఉవ్విళ్లూరుతున్నాడు.