సాక్షి ప్రతినిధి, సంగారెడ్డి: మాజీమంత్రి ఈటల రాజేందర్‌ భూవివాదం నేపథ్యంలో విచారణ చేపట్టిన అటవీశాఖ జమున హ్యాచరీస్‌కు నోటీసులు జారీ చేసింది. హ్యాచరీస్‌ పరిశ్రమ కోసం రోడ్డు నిర్మిస్తున్న క్రమంలో మొత్తం 237 చెట్లు (పందిరి గుంజల సైజు) తొలగించినట్లు గుర్తించింది. ఈ మేరకు వాల్టా చట్టం కింద ఎందుకు కేసు నమోదు చేయకూడదో మూడు రోజుల్లో వివరణ ఇవ్వాలని మెదక్‌ జిల్లా రామాయంపేట్‌ రేంజ్‌ ఆఫీసర్‌ కార్యాలయం నుంచి నోటీసులు పంపించారు. ఈ భూవివాదంపై రెవెన్యూ, విజిలెన్స్, ఏసీబీలతోపాటు అటవీశాఖ కూడా వారం రోజులుగా విచారణ చేస్తున్న విషయం విదితమే. జమునా హ్యాచరీస్‌ ఇచ్చే వివరణను బట్టి కేసు నమోదు చేస్తామని అటవీశాఖ ఉన్నతాధికారులు తెలిపారు. వాల్టా చట్టం ప్రకారం.. నిబంధనలకు విరుద్ధంగా చెట్లు తొలగిస్తే ఆ మేరకు రెట్టింపు సంఖ్యలో, నిర్ణీత సమయంలో మొక్కలు నాటాలి. ఒక్కో మొక్క కోసం నిర్ణీత మొత్తంలో డబ్బును అటవీశాఖకు డిపాజిట్‌ చేయాల్సి ఉంటుంది.    అటవీ భూముల ఆక్రమణల్లేవు  జమున హ్యాచరీస్‌ పరిశ్రమకు కేవలం 100 మీటర్ల దూరంలోనే రిజర్వు ఫారెస్టు భూములున్నాయి. అయితే తమ భూములేమీ ఆక్రమణకు గురికాలేదని మెదక్‌ జిల్లా అటవీ శాఖాధికారి జ్ఞానేశ్వర్‌ ‘సాక్షి’తో మాట్లాడుతూ చెప్పారు. చదవండి: Etela Rajender:రాజకీయ భవిష్యత్తు లేకుండా చేయాలనుకుంటున్నారు

సాక్షి, పూసపాటిరేగ(నెల్లిమర్ల) : అక్కడ వాల్టాచట్టానికి తూట్లు పొడుస్తున్నా అధికారులు పట్టించుకోవడం లేదు. వేలాది కుటుంబాలకు తాగునీటి సమస్య తీర్చే బావులకు ముప్పు ఏర్పడుతున్నా... అక్రమార్కులు వెరవడం లేదు. ఇష్టానుసారం ఇసుక తవ్వేస్తూ కాసులు కూడబెట్టడమే ధ్యేయంగా పనిచేస్తున్నారు. ఉచితం మాటున సాగుతున్న ఈ దందాకు చంపావతి ప్రత్యక్ష సాక్షిగా నిలుస్తోంది. పూసపాటిరేగ మండలంలోని చంపావతి ప్రాజెక్టును ఆనుకొని అక్రమ ఇసుక తవ్వకాలు చేయడంతో ప్రాజెక్టుకు ప్రమాదం పొంచి వుంది. ఊటబావులకు నీరందకపోవడమే గాకుండా నీటిసామర్థ్యం తగ్గి మోటార్లు మొరాయిస్తున్నాయి. ప్రాజెక్టు నుంచి పూసపాటిరేగ మండలంలో 32 గ్రామాలు, డెంకాడ మండలంలో 10 గ్రామాలకు తాగునీరు అందుతోంది. కొంత కాలంగా అక్రమ ఇసుకతవ్వకాలకు అడ్డూ అదుపూ లేకుండా పోయింది. ప్రాజెక్టును ఆనుకొని ఇసుక తవ్వకాలు జరపడంతో భూగర్భజలాలు అడుగంటితున్నాయి. పూసపాటిరేగ మండలానికి ఇదే ప్రధాన నీటి వనరు. అదే ఇప్పుడు సరిగ్గా పనిచేయకపోవడంతో పల్లెప్రజలు తాగునీటికి అవస్థలు పడుతున్నారు. 2010లో కేంద్ర గ్రామీణాభివృద్ధిశాఖ నిధులు సుమారు రూ. 12 కోట్లతో అప్పట్లో ప్రాజెక్టు పనులు చేశారు. పనులు పూర్తి చేసిన తరువాత కొన్నాళ్లపాటు ప్రాజెక్టు నిర్మాణం చేపట్టిన కాంట్రాక్టరే దాని నిర్వహణ బాధ్యతలు చూశారు. తాజాగా ఆ నిర్వహణ బాధ్యతను అధికారపార్టీ నాయకులకు అప్పగించడంతో వారు సక్రమంగా చేయడం లేదనే విమర్శలు వెలువడుతున్నాయి. ప్రాజెక్టు పైపులైన్‌ నాసిరకంగా వుండటంతో ఎప్పటికప్పుడు లీకులు ఏర్పడి నీరు వృథా అవుతోంది. దీనికి తోడు ప్రాజెక్టు సమీపంలో అక్రమతవ్వకాలను నిలుపుదల చేయకపోతే మొదటికే మోసం వచ్చే ప్రమాదం ఉందని సర్వత్రా ఆందోళన వ్యక్తమవుతోంది.   పైప్‌లైన్‌ ఉన్నచోటే తవ్వకాలు ప్రాజెక్టు పైపులైన్‌ వున్నచోటనే తవ్వకాలు జరపడంతో పైపులైన్‌ బయటకు తేలిపోయింది. ఇవి తరచూ పగలిపోతుండటంతో నిత్యం మరమ్మతులు చేయాల్సి వస్తోంది. అధికారులు దీనిని పట్టించువడం లేదనే విమర్శలు వినిపిస్తున్నాయి. పూసపాటిరేగతో పాటు సీహెచ్‌.అగ్రహారం, కనిమెట్ట, అల్లాడపాలెం, కనిమెల్ల, కామవరం, పతివాడ, చినపతివాడ, గోవిందపురంతో పాటు పలు గ్రామాలకు ప్రాజెక్టు నీరుసరఫరా అవుతోంది. పూసపాటిరేగ మండలంలో ఫ్లోరైడ్‌ శాతం ఎక్కువగా వుండటంవల్ల ఈ ప్రాజెక్టును నిర్మించారు. అయితే అధికారులు నిర్లక్ష్యం కారణంగా మళ్లీ సమస్య ఉత్పన్నం అవుతోంది. అధికారులు స్పందించి ప్రాజెక్టుకు ఆనుకొని ఇసుక తవ్వకాలను నిరోధించాల్సిన అవసరం ఎంతైనా ఉంది. దీనిపై ఆర్‌డబ్ల్యూఎస్‌ ఏఈ ప్రవీణ్‌ శంకర్‌ వద్ద ప్రస్తావించగా తవ్వకాలు నిలుపుదల చేయడానికి చర్యలు తీసుకుంటామని చెప్పారు.

సాక్షి, అనంతపురం: జిల్లాలోని యాడికి మండలంలోని కోనుప్పలపాడులో వైఎస్సార్‌ కాంగ్రెస్‌ పార్టీ నాయకులు వెంకట శివారెడ్డి ఇంటిపై, టీడీపీ నేత జేసీ దివాకర్‌రెడ్డి వర్గీయులు దాడి చేయడంతో ఉద్రిక్తత చోటు చేసుంది. జేసీ వర్గీయుల దాడిలో ఐదుగురికి గాయాలయ్యాయి. వాల్టా చట్టానికి విరుద్ధంగా జేసీ ముఖ్య అనుచరుడు చవ్వా గోపాల్‌రెడ్డి బోరు వేస్తున్నారని.. వైఎస్సార్‌ సీపీ నేతలు అధికారులకు ఫిర్యాదు చేశారు. తమపై అధికారులకు ఫిర్యాదు చేశారన్న అక్కసుతో జేసీ వర్గీయులు వైఎస్సార్‌ సీపీ నేతలపై దాడికి పాల్పడ్డారు.  అయితే వైఎస్సార్‌ సీపీ నేతలు ఇచ్చిన ఫిర్యాదుపై పోలీసులు కేసు నమోదు చేయలేదు. దీంతో పోలీసుల ఏకపక్ష వైఖరికి నిరసనగా వైఎస్సార్‌ సీపీ నేత పెద్దారెడ్డి యాడికి పోలీస్‌ స్టేషన్‌ వద్ద బైఠాయించారు. వైఎస్సార్‌ సీపీ నేతలపై దాడికి పాల్పడ్డ జేసీ వర్గీయులను వెంటనే అరెస్ట్‌ చేయాలని ఆయన డిమాండ్‌ చేశారు.


 మరికొన్ని గంటల్లో తెల్లారుతుంది. అప్పటిదాకా బోరు తవ్వకాన్ని ఆసక్తిగా గమనించిన వారు పచ్చటి పంట పొలంలో నిద్రకు ఉపక్రమించారు. కొద్దిసేపట్లోనే గాఢనిద్రలోకి జారుకున్నారు. అదే ‘శాశ్వత నిద్ర’ అవుతుందని కలలో కూడా ఊహించి ఉండరు. బోర్‌వెల్ లారీ రూపంలో మృత్యువు వారిని కబళించుకుపోయింది. రెక్కాడితే గానీ డొక్కాడని వారి కుటుంబాల్లో తీరని విషాదాన్ని నింపింది. శెట్టూరు మండలం పర్లచేడులో శనివారం తెల్లవారుజామున బోర్‌వెల్ లారీ దూసుకెళ్లి నలుగురు దుర్మరణం చెందారు.
  
 వారంతా రెక్కల కష్టంపై ఆధారపడ్డ కూలీలు.. ఉగాది పండుగ కావడంతో ఇంటి పట్టునే ఉన్నారు. కుటుంబ సభ్యులతో కలసి హాయిగా పండుగ చేసుకున్నారు. రాత్రైంది. అంతా కలసి భోజనాలు చేశారు. ఎంతకూ నిద్ర రాకపోవడంతో గ్రామ సమీపంలో బోరు వేస్తున్నారని అక్కడికి వెళ్లారు. అర్ధరాత్రయ్యేసరికి అలసటకు తోడు చల్లని గాలి వీచడంతో వారంతా పొలంలోనే నిద్రించారు. అంతే.. బోరుబండి వారి జీవితాలను బుగ్గి చేసింది. తెల్లారేసరికి ఈ విషయం దావానలంలా వ్యాపించడంతో ఊరంతా ఉలిక్కిపడింది. చనిపోయిన నలుగురి కుటుంబాల్లో తీరని విషాదం నెలకొంది.
  
  
 కళ్యాణదుర్గం :  ప్రమాదవశాత్తు బోర్‌వెల్ లారీని రివర్స్‌లో నడపగా వెనుక భాగంలో నిద్రిస్తున్న నలుగురు వ్యక్తులు మృత్యువాత పడటంతో శెట్టూరు మండలం పర్లచేడులో విషాద ఛాయలు అలుముకున్నాయి. శనివారం తెల్లవారుజామున జరిగిన ఈ సంఘటనలో  బోయ సంజీవ (38), బోయ తిమ్మప్ప (35), బోయ మాంతేష్ (30), నరసింహమూర్తి (28) మృతి చెందారు. ఒకేరోజు నలుగురు మృత్యువాత పడటంతో గ్రామంలో ఎక్కడ చూసినా విషాద ఛాయలు అలుముకున్నాయి. కుటుంబ పెద్దలు కానరాని లోకాలకు వెళ్ళిపోవడంతో ఆయా కుటుంబాలకు తీరని నష్టం జరిగింది. మృతులంతా కూలీ పని చేసుకుని కుటుంబాల్ని పోషించుకునేవారు. అలాంటి వారు మృత్యువాత పడటంతో బాధిత కుటుంబ సభ్యుల పోషణ చూసే వారు కరువయ్యారు. దీంతో ఆయా కుటుంబాలు వీధిన పడ్డాయి. మృతుల కుటుంబ స భ్యులు, భార్యలు, పిల్లల రోధనలు చూపరులను కలిసివేశాయి. ‘మాకు ఇక దిక్కెవరంటూ.. గుండెలు బాదుకుని రోధించారు.’
 
 
  మృతులంతా కూలీలే...
 ప్రమాదంలో మృతి చెందిన బోయ సంజీవ, బోయ తిమ్మప్ప, బోయ మాంతేష్, నరసింహమూర్తి కూలీ పనిచేసి కుటుంబాన్ని పోషించుకుంటున్నారు. సంజీవ ట్రాక్టర్ నడుపుతూ జీవనం సాగిస్తున్నాడు. ఇతడికి భార్య నాగలక్ష్మి, కుమార్తె బుజ్జెమ్మ, కొడుకు తిప్పేస్వామి ఉన్నారు. బోయ తిమ్మప్ప స్వగ్రామం బొచ్చుపల్లి కాగా పదేళ్ల క్రితం పర్లచేడులో బయలమ్మను పెళ్ళి చేసుకుని అదే గ్రామంలో స్థిరపడ్డాడు. బోయ మాంతేష్ కూడా ట్రాక్టర్ డ్రైవర్‌గా పనిచేస్తూ జీవనం సాగిస్తున్నాడు. అతనికి భార్య లక్ష్మిదేవి, 18 నెలల కూతురు అక్షిత ఉన్నారు. నరసింహమూర్తి టైలర్ పని చేస్తూ కుటుంబాన్ని పోషించేవాడు. వికలాంగురాలైన తల్లి హనుమక్క ఆలనాపాలన కోసం టైలర్ పనిచేస్తూ కాలం గడిపేవాడు.
 
 
 మృతుల్లో ఇద్దరు బావ, బామర్దులు,  మరో ఇద్దరు స్నేహితులు..
 మృతుడు సంజీవ పిన తల్లి సుశీలమ్మ కూతురు బయలమ్మను మృతుడు తిమ్మప్ప పెళ్ళిచేసుకోగా వీరిద్దరూ బావ, బామర్దులు. అదేవిధంగా మృతుడు సంజీవ, నరసింహమూర్తి ప్రాణస్నేహితులు. ఎక్కడికెళ్లాలన్నా కలిసిమెలిసి వెళ్లేవారు. చివరికి మరణంలో కూడా వారి బంధం వీడలేదు.
 
 కాగా... రెవెన్యూ అధికారులు వాల్టా చట్టాన్ని అమలు చేయడంలో విఫలమయ్యారని, దీంతో అమాయకులైన పేదలు నలుగురు బలి కావాల్సి వచ్చిందని శెట్టూరులో  వైఎస్సార్‌సీపీ రాష్ట్ర కార్యదర్శి ఎల్‌ఎం మోహన్ రెడ్డి ఆధ్వర్యంలో ధర్నా చేపట్టారు. మృతదేహాలతో శెట్టూరులో బైఠాయించి ఆందోళన చేపట్టారు.


 మహబూబ్ నగర్: పర్యావరణ సమతౌల్యాన్ని కాపాడాల్సిన బాధ్యత అధికారులపై ఉంది. కానీ అధికారుల నిర్లక్ష్యం, బాధ్యతారాహిత్యం వాల్టా చట్టానికి తూట్లూ పొడుస్తుంది. ఇష్టానుసారంగా ఇసుకను తరలించడం, చెట్లను నరికివేయడం, ఎక్కడపడితే అక్కడ బోర్లు వేస్తూ జిల్లా రైతులు, గ్రామీణ ప్రాంతాల వారు చట్టం నిబంధనలను అతిక్రమిస్తున్నారు.
 
 పర్మిషన్ లేకుండా బోర్లు, అక్రమంగా ఇసుక రవాణా
 బోర్లు పగలు వేయడం వల్ల అభ్యంతరాలు వ్యక్తమవుతున్నాయన్న ఉద్దేశంతో రైతులు, గ్రామ వాసులు రాత్రి వేళల్లో బోర్లు వేస్తున్నారు. అధికారులు పక్కపక్కనే రిగ్గులు వేస్తూ రైతుల మధ్యన గొడవకు కారణమవుతున్నారు. బోరు వేయాలంటే తహసీల్దార్ కార్యాలయం నుంచి అనుమతి పొందాల్సి ఉంటుంది. అలా కాకుండా ఇష్టానుసారంగా బోర్లు వేస్తూ నిబంధనలు అతిక్రమిస్తూ పర్యావరణ సమతౌల్యాన్ని దెబ్బతీస్తున్నారు. జిల్లాలోని కానాయపల్లి, గోవిందహళ్లి, పామాపురం, అప్పరాల, కనిమెట్ట తదితర గ్రామాల వాగులు, వంకల నుంచి అక్రమంగా ఇసుకను తరలిస్తున్నారు. ఎలాంటి అనుమతులు లేకుండా ఇసుక తరలిస్తూ సంపదను అర్జిస్తున్నారు. పగటిపూట గ్రామ శివారులలో ఇసుకను డంపింగ్ చేస్తూ, రాత్రి వేళ్లల్లో దర్జాగా అమ్ముకుంటున్నారు.
 
 చెట్ల నరికివేత
 ఇష్టానుసారంగా పచ్చని చెట్లను నరికివేస్తున్నారు. స్థానికులు నిబందనలు అతిక్రమిస్తూ వాల్టా చట్టానికి తూట్లూ పొడుస్తుంటే అధికారులు నిమ్మకు నీరెత్తనట్లుగా ఉండటంపై తీవ్ర విమర్శలు వెల్లువెత్తుతున్నాయి.


 బాన్సువాడ : జిల్లాలో విచ్చలవిడిగా బోర్లు వేస్తూ వాల్టా చట్టాన్ని ఉల్లంఘిస్తున్న వారిపై కనీస చర్యలు తీసుకోవడంలో అధికారులు విఫలమవుతున్నారు. జిల్లాలో ప్రస్తుతం రోజూ సగటున 60 వరకు బోర్లు వేస్తున్నారని ఆర్‌డబ్ల్యూఎస్ శాఖనే ధ్రువీకరిస్తోంది. ఈ బోర్లకు ఏ ప్రాంతంలోనూ అనుమతి తీసుకొ న్న దాఖలాలు లేవు. వాల్టా చట్టం ప్రకారం బోర్లు వేసే సందర్భంలో తప్పకుండా సంబంధిత శాఖ ద్వారా అనుమతి తీసుకోవాలి.
 
 అయితే ఈ చట్టం కాగితాలకే పరిమితమైంది. విచ్చల విడిగా బోర్లు వేస్తుండడంతో భూగర్భ జలాలు అడుగంటుతున్నాయి. ఈ పరిస్థితుల్లో జిల్లాలో 127 గ్రామాల్లో బోర్ల తవ్వకాన్ని నిషేధిస్తూ ఇటీవల కలెక్టర్ ఉత్తర్వులు జారీ చేయడంపై రైతులు హర్షం వ్యక్తం చేస్తున్నారు.ఇటీవల పంట పొలాలతో పాటు ఇండ్ల నిర్మాణానికి బోర్లు వేస్తున్న వారి సంఖ్య పెరిగింది. వంద మీటర్లలోపు దూరంలో రెండు బోర్లు వేయకూడదనే నిబంధనలున్నాయి. అయితే వీటిని ఎవరూ పట్టించుకోవడం లేదు. ఇష్టారాజ్యంగా బోర్లు వేస్తున్నారు. భూమికి చిల్లు పెట్టడమే కాదు జేబుకు చిల్లు పడుతున్నా లెక్క చేయడం లేదు.
 
 గ్రామ పంచాయతీల  ఆవ రణలో ‘అనుమతి లేనిదే బోరు వేయకూడదు. పర్యావరణానికి విఘాతం కలిగించవ ద్దు. ఎడాపెడా బోర్లు వేయొద్దు’ అని పేర్కొం టూ వాల్టా చట్టం గురించి రాస్తున్నా.. వాటిని అమలు చేయడంలో అధికారులు నిర్లక్ష్యాన్ని వహిస్తున్నారు. అనేక ప్రాంతాల్లో నీళ్లు లేవనే నిజం గ్రహించకుండానే బోర్ల తవ్వకానికి పూనుకొంటున్నారు. రైతులకు తోడు ప్రస్తు తం పట్టణ ప్రాంతాల్లో గృహ నిర్మాణాలు వే గం పుంజుకోవడంతో తాగునీటికి సైతం బో ర్లు వేసే వారి సంఖ్య పెరిగిపోయింది.
 
 బోరు లేనిదే ఇండ్ల నిర్మాణం చేపట్టమంటూ మేస్త్రీలు మొండికేయడంతో బోర్లు వేసిన తర్వాతే ఇం డ్ల నిర్మాణాన్ని చేపడుతున్నారు. బోరు యం త్రాల యజమానులు సైతం కనీస నిబంధనలను పాటించకుండా బోర్లు వేస్తున్నారు. అనుమతి పత్రం లేనిదే బోరు బండిని పంపకూడదు. కానీ యజమానులు మాత్రం పట్టించుకోవడం లేదు. ప్రస్తుతం బాన్సువాడ, పిట్లం, బిచ్కుంద, ఎల్లారెడ్డి, కామారెడ్డి, బోధన్, ఆర్మూర్, నిజామాబాద్ తదితర ప్రాంతాల్లో బోరు బండ్లు అనేకంగా కనిపిస్తున్నాయి.
 
 ముఖ్యంగా బాన్సువాడ, జుక్కల్, కామారెడ్డి, ఎల్లారెడ్డి, బోధన్ నియోజకవర్గాల్లో నిత్యం బోరు వేసే యంత్రం చప్పుడు వినిపించని గ్రామాలు లేవంటే అతిశయోక్తి కాదు. వర్షాభావ పరిస్థితులకు తోడు విచ్చలవిడిగా బోర్లు వేస్తుండడంతో భూగర్భ జల మట్టం గణనీయంగా తగ్గిపోయింది. ఒక్కో బోరు 400 నుంచి 500 అడుగుల లోతు వరకు వేస్తున్నాఫలితం ఉండడం లేదు. రోజూ 10 నుంచి 20 బోర్లకు నీళ్లు పడడం లేదని తెలుస్తోంది. చివరికి నీళ్లు పడకపోవడంతో రైతులకు అప్పులే మిగులుతున్నాయి.
 
 రైతులు ఈ బోర్లు వేయడానికి రూ. 30 వేల వరకు ఖర్చు చేస్తున్నారు. ప్రజల అవసరం బోరు యంత్రపు యజమానులకు కాసుల పంట కురిపిస్తోంది. తలసరి నీటి లభ్యత 15 లీటర్లకు తగ్గితేనే భూగర్భ జలాలు పూర్తి స్థాయిలో అడుగంటినట్లు నిర్ధారిస్తారు. ప్రస్తుతం 40 నుంచి 60 లీటర్ల వరకు తలసరి నీటి లభ్యత ఉంది. రానున్న వేసవిలో బోరు బావులు, చేతి పంపుల నుంచి నీటిని అధికంగా వాడడం వల్ల భూగర్భ జలాలు తగ్గే అవకాశం ఉంది.
 
 ఇదిలా ఉండగా బోర్లు వేసి నష్టపోతున్న పేదరైతులకు అవగాహన కల్పిం చే చర్యలు చేపట్టడం లేదు. జిల్లాలో భూగర్భ జలాల పరిస్థితి దారుణంగా ఉండడంతో కలెక్టర్ స్పందించారు. 127 గ్రామాల్లో బోర్లు వేయడాన్ని మూడేళ్ల పాటు నిషేధిస్తూ ఉత్తర్వులు జారీ చేశారు. అయితే కలెక్టర్ ఆదేశాలను కిందిస్థాయి అధికారులు ఎంతవరకు అమలు చేస్తారు అన్నది వేచి చూడాల్సిందే.


 అనంతపురం కలెక్టరేట్, న్యూస్‌లైన్ :  పక్క పొలాల వారు ‘వాల్టా’ చట్టానికి తూట్లు పొడుస్తూ బోర్లు వేసి.. తన పొలంలోని బోరులో నీరు తగ్గిపోయేలా చేశారని, తనకు న్యాయం చేయాలని అధికారులకు పదేపదే విన్నవించుకున్నా నిర్లక్ష్యం చేస్తున్నారని రైతు దేవ్లానాయక్ (33) కలెక్టరేట్‌లో సోమవారం ప్రజావాణి(గ్రీవెన్స్)లో అధికారుల సమక్షంలోనే ఆత్మహత్యాయత్నం చేశాడు. ఈ సంఘటన అధికార వర్గాల్లో కలకలం రేపింది. వివరాలిలా ఉన్నాయి. నల్లమాడ మండలం గోపేపల్లి తండాకు చెందిన దేవ్లానాయక్‌కు సర్వే నంబర్ 181/2లో 2.50 ఎకరాల పొలం ఉంది.
 
 అందులో బోరు నీటి ద్వారా వేరుశనగ సాగు చేస్తున్నాడు. ఏడాది కిందట సమీపంలోని ముగ్గురు రైతులు వారి పొలాల్లో బోర్లు వేయించుకున్నారు. దీంతో దేవ్లానాయక్ పొలంలోని బోరులో నీరు తగ్గిపోయింది. వాల్టా నిబంధనలను తుంగలో తొక్కి బోర్లు వేయడం వల్లే తన బోరులో నీళ్లు తగ్గిపోయాయని, దీంతో వేరుశనగ పంట ఎండిపోయిందని మండల అధికారుల దృష్టికి తీసుకెళ్లాడు. ‘వాల్టా’ను ఉల్లంఘించిన వారిపై చర్యలు తీసుకుని, తనకు న్యాయం చేయాలని విజ్ఞప్తి చేశాడు. పలుమార్లు వినతులు ఇచ్చుకోవడంతో అధికారులు నాలుగు నెలల కిందట గ్రామానికెళ్లి సమీప పొలాల రైతులను మందలించి.. దేవ్లానాయక్ పొలంలో మరో బోరు వేయించారు. వారి పొలాల్లో బోర్లు అలాగే ఉండడంతో ప్రస్తుతం ఈ బోరులో కూడా నీళ్లు తగ్గిపోవడంతో రైతు తనకు న్యాయం చేయాలని పెనుకొండలో ప్రజావాణిలో ఫిర్యాదు చేశాడు.
 
 అనంతపురంలో మూడు సార్లు అర్జీలు  ఇచ్చుకున్నాడు. చివరకు సోమవారం మరోసారి అనంతపురంలో నిర్వహించిన ప్రజావాణికి మధ్యాహ్నం రెండు గంటలకు వచ్చాడు. తనకు న్యాయం చేయడంలో అధికారులు నిర్లక్ష్యం ప్రదర్శిస్తున్నారని వెంట తెచ్చుకున్న పురుగు మందు తాగాడు.  తోటి అర్జీదారులు అడ్డుకునేలోగానే కొంత తాగేశాడు. వెంటనే 108 వాహనంలో సర్వజనాస్పత్రికి తరలించారు. పరిస్థితి విషమంగా ఉండటంతో రాత్రి కర్నూలుకు తరలించారు. వన్‌టౌన్ పోలీసులు కేసు దర్యాప్తు చేస్తున్నారు.