మహా సౌరయాగం ఆరంభం

మహా సౌరయాగం ఆరంభం

ఉప్పలగుప్తం: మండలంలోని విలసవిల్లి గ్రామంలో ఉన్న రామ మందిరంలో మాఘ మాసాన్ని పురస్కరించుకుని నెలరోజుల పాటు జరిగే నవగ్రహ నక్షత్ర పూర్వక మహా సౌరయాగం పూజలు గురువారం మొదలయ్యాయి. అష్టమ వార్షికోత్సవం సందర్భంగా నెలరోజుల పాటు ఆలయ ప్రధాన అర్చకులు మున్నంగి రామకృష్ణ శర్మ ఆధ్వర్యంలో గ్రామంలో వేదఘోష మార్మోగనుంది. ఈ పూజలను గురువారం ఆలయ అర్చకులు ఎమ్మెల్సీ తోట త్రిమూర్తులు కుటుంబీకులతో ప్రారంభించారు. ఈ పూజల్లో భాగంగా ప్రతీ రోజు జన్మనక్షత్రాల రీత్యా ఒక్కోరోజు ఒక్కో మెక్కను పూజించి, సౌర యాగం, సౌర కల్యాణం, విశేష పూజలు చేయించి, చండీయాగం, నక్షత్ర జపాలు, నక్షత్ర హోమాలు, మొదటి తొమ్మిది రోజులు రాజశ్యామల యాగం నిర్వహిస్తున్నామని నిర్వాహక కమిటీ సభ్యులు తెలిపారు. వైఎస్సార్‌ సీపీ యువ నాయకుడు తోట పృఽధ్వీ రాజు, తోట రాము, సర్పంచ్‌ సలాది ఊర్మిళాదేవి, వైఎస్సార్‌ సీపీ గ్రామ కమిటీ అధ్యక్షుడు సలాది సతీష్‌, సలాది స్వామినాయుడు, కోలా ఏసు, పుత్స్యల ఏసు పాల్గొన్నారు.

గాంధీజీకి నివాళి

అమలాపురం రూరల్‌: అహింసా, సత్యా గ్రహాలే ఆయుధాలుగా దేశానికి స్వేచ్ఛా స్వాతంత్య్రాలు అందించిన మహనీయుడు జాతిపిత మహాత్మాగాంధీ అని కలెక్టరేట్‌ పరిపాలనాధికారి కె.కాశీ విశ్వేశ్వరరావు అన్నారు. గురువారం జాతి పిత మహాత్మాగాంధీ 77వ వర్ధంతి సందర్భంగా కలెక్టరేట్‌ ప్రాంగణంలో గాంధీ కాంస్య విగ్రహానికి ఆయన పూలమాలలు వేసి రెవెన్యూ ఉద్యోగులతో కలిసి నివాళులర్పించారు. ఆయన మాట్లాడుతూ గాంధీ సహాయ నిరాకరణ, విదేశీ వస్తు బహిష్కరణ, ఉప్పు సత్యాగ్రహం, క్విట్‌ ఇండియా ఉద్యమాలు నిర్వహించి ఎన్నోమార్లు జైలుకు వెళ్లారన్నారు. వికాస జిల్లా మేనేజర్‌ జి. రమేష్‌ మాట్లాడుతూ గాంధీజీ సత్యం, అహింస, శాంతి ఉత్తమ మార్గాలని దృఢంగా నమ్మి ఆచరించిన మహానీయుడని అన్నారు. మెజిస్టీరియల్‌ సెక్షన్‌ సూపరింటెండెంట్‌ రమణకుమారి, భూసేకరణ సెక్షన్‌ అధికారి ఏసుబాబు, రెవెన్యూ ఉద్యోగులు పాల్గొ న్నారు.

నేడు టెన్త్‌ విద్యార్థులకు ‘ప్రేరణ’

రాయవరం: పదవ తరగతి పరీక్షల్లో విద్యార్థులకు శుక్రవారం ‘ప్రేరణ’ కార్యక్రమం నిర్వహించనున్నారు. ఈ విషయాన్ని జిల్లా విద్యాశాఖాధికారి డాక్టర్‌ షేక్‌ సలీం బాషా గురువారం మండల విద్యాశాఖ అధికారులకు తెలియజేశారు. ముమ్మిడివరం సమీపంలోని చెయ్యేరు శ్రీనివాస ఇనిస్టిట్యూట్‌ ఆఫ్‌ ఇంజినీరింగ్‌ అండ్‌ టెక్నాలజీ కళాశాలలో ఈ ప్రేరణ కార్యక్రమాన్ని నిర్వహిస్తున్నారు. పదవ తరగతి పరీక్షల్లో విద్యార్థులను రాష్ట్ర స్థాయిలో ప్రథమ స్థానంలో నిలిపే విధంగా ప్రోత్సహించేందుకు ‘ప్రేరణ’ కార్యక్రమాన్ని నిర్వహిస్తున్నారు. 100 శాతం ఉత్తీర్ణత సాధించే విధంగా శిక్షణ ఇవ్వడం, పరీక్షల్లో శతశాతం మార్కులు సాధించే విధంగా మోటివేషన్‌ తరగతులు నిర్వహించడం ఈ కార్యక్రమం ముఖ్య ఉద్దేశంగా తెలిపారు. ప్రేరణ కార్యక్రమంలో భాగంగా సమ్మేటివ్‌–1 పరీక్షల్లో 520 మార్కులకు పైగా సాధించిన విద్యార్థులకు మోటివేషన్‌ తరగతులు నిర్వహిస్తున్నారు. జిల్లావ్యాప్తంగా 300 మందికి పైగా విద్యార్థులకు మోటివేషన్‌ తరగతులు నిర్వహిస్తున్నారు.

1, 3న ఇంటర్‌ ఫస్టియర్‌

విద్యార్థులకు పరీక్షలు

కంబాలచెరువు: ఇంటర్మీడియెట్‌ పరీక్షల్లో భాగంగా ప్రథమ సంవత్సరం విద్యార్థులకు ఫిబ్రవరి 1న నైతికత, మానవీయ విలువలు, 3న పర్యావరణ విద్య పరీక్షలు నిర్వహిస్తున్నట్లు ఇంటర్‌ బోర్డు ఆర్‌ఐవో ఎన్‌ఎస్‌వీఎల్‌ నరసింహాం గురువారం తెలిపారు. జిల్లా వ్యాప్తంగా ఈ పరీక్షలకు జనరల్‌ విభాగంలో 20,591 మంది, వృత్తివిద్యా కోర్సుల్లో 2,226 మంది హాజరవుతారన్నారు. ఉదయం 10 నుంచి మధ్యాహ్నాం ఒంటి గంట వరకూ పరీక్షలు జరుగుతాయన్నారు.

1/1

మహా సౌరయాగం ఆరంభం