8 నుంచి రాష్ట్రస్థాయి క్రీడా పోటీలు

8 నుంచి రాష్ట్రస్థాయి క్రీడా పోటీలు

నాగమల్లితోట జంక్షన్‌ (కాకినాడ సిటీ): ఫిబ్రవరి 8 నుంచి 10 వరకూ వ్యాయామ విద్య ఉపాధ్యాయులకు రాష్ట్ర స్థాయి సెమినార్‌, క్రీడా పోటీలను రాష్ట్ర వ్యాయామ ఉపాధ్యాయ సంఘ అధ్యక్షుడు ఎల్‌.జార్జి ఆధ్వర్యంలో నిర్వహిస్తున్నారు. ఈ విషయాన్ని జిల్లా వ్యాయామ ఉపాధ్యాయ సంఘ అధ్యక్షుడు వి.రవిరాజు శుక్రవారం తెలిపారు. ఉమ్మడి తూర్పుగోదావరి జిల్లాలో పనిచేస్తూ, ప్రభుత్వ ఐడీ ఉన్న ప్రతి వ్యాయామ ఉపాధ్యాయులు ఈ పోటీల్లో పాల్గొనడానికి అర్హులన్నారు. రాష్ట్ర స్థాయి పోటీల్లో పాల్గొనే ఉమ్మడి జిల్లా జట్టును ఈ నెల 2న ఆదివారం మధ్యా హ్నం 2 గంటలకు డీఎస్‌ఏ క్రీడామైదానంలో ఎంపిక చేస్తామని, ఆసక్తి గల వారు హాజరుకావాలని సంఘ కార్యదర్శి నూకరాజు, కోశాధికారి రవికౌర్‌ తెలిపారు.

రత్నగిరిపై భక్తుల సందడి

అన్నవరం: మాఘ మాసం సందర్భంగా రత్నగిరిపై భక్తుల రద్దీ పెరిగింది. నెల రోజుల విరామం అనంతరం వివాహాలు కూడా మొదలవడంతో పెళ్లి బృందాల హడావుడితో ఆలయ ప్రాంగణం, వివాహ మండపాలు, వివిధ సత్రాలు కనిపించాయి. శుక్రవారం 25 వేల మంది భక్తులు సత్యదేవుని దర్శించుకున్నారు. అనంతరం భక్తులు గోశాలలో సప్త గోవులకు పూజలు చేశారు. రావిచెట్టు వద్ద జ్యోతులు వెలిగించి ప్రదక్షిణ చేశారు. సత్యదేవుని వ్రతాలు రెండు వేల వరకూ నిర్వహించగా, అన్ని విభాగాల ద్వారా దేవస్థానానికి రూ.25 లక్షల ఆదాయం సమకూరిందని అధికారులు తెలిపారు. సత్యదేవుని నిత్యాన్నదాన పథకంలో నాలుగు వేల మంది భోజనం చేశారు. దేవస్థానం చైర్మన్‌ ఐవీ రోహిత్‌, ఈఓ వీర్ల సుబ్బారావు ఏర్పాట్లను పర్యవేక్షించారు. వివాహాల సందడి ప్రారంభమవడంతో శని, ఆదివారాల్లో రత్నగిరిపై రద్దీ కొనసాగనుంది. శనివారం ఉదయం పది గంటలకు సత్యదేవుడు, అమ్మవారిని తిరుచ్చి వాహనంపై, ఆదివారం ఉదయం పది గంటలకు స్వామివారి రథసేవ ఆలయ ప్రాంగణంలో నిర్వహిస్తారు.