‘పని అనుభవం’ భవితకు పునాది

‘పని అనుభవం’ భవితకు పునాది

ఉద్యాన సంచాలకుడు డాక్టరు గోవిందరాజులు

నల్లజర్ల: ఉద్యాన రైతులకు సాంకేతికతను చేరువ చేయాలని, గ్రామీణ పని అనుభవం విద్యార్థుల మంచి భవిష్యత్తుకు పునాది అని డాక్టర్‌ వైఎస్సార్‌ ఉద్యాన యూనివర్శిటీ సంచాలకులు డాక్టర్‌ బి.గోవిందరాజులు సూచించారు. పార్వతీపురం ఉద్యాన కళాశాలలో చదువుతున్న 10మంది విద్యార్థులు గ్రామీణ ఉద్యాన పని అనుభవం కార్యక్రమం కింద తెలికిచెర్ల గ్రామంలో 110 రోజుల పాటు రైతుల నుంచి వివిధ అంశాలు నేర్చుకున్నారు. శుక్రవారం ముగింపు సందర్భంగా ఆ గ్రామంలో రైతు సదస్సు నిర్వహించారు. ముఖ్యఅతిథిగా పాల్గొన్న డాక్టర్‌ గోవిందరాజులు మాట్లాడుతూ విద్యార్థులకు పని అనుభవం నేర్పిన గ్రామస్తులను అభినందించారు. కృషివిజ్ఙాన కేంద్రం నుంచి ఈ గ్రామంలో 10 మంది యువత, మహిళా రైతులకు ఉపాధి పొందే విధంగా వివిధ అంశాలలో శిక్షణ ఇస్తామని వివరిస్తూ పంటల సాగులో మహిళా రైతుల ప్రాముఖ్యతను తెలిపారు. మండల ఉద్యానశాఖాధికారి యం.బబిత పంటల సాగు అనుభవం వివరించారు. కేవీకే శాస్త్రవేత్త డాక్టర్‌ రేఖ సమన్వయకర్తగా వ్యవహరించారు. సీనియర్‌ శాస్త్రవేత్త, కృషి విజ్ఞాన కేంద్ర హెడ్‌ పి.విజయలక్ష్మి, డాక్టర్‌ అరుణకుమారి, డాక్టర్‌ పెదబాబు, డాక్టరు దీప్తి, సర్పంచ్‌ బండి చిట్టి, గ్రామపెద్దలు సుంకర సుబ్బారావు, సీమకుర్తి రాము, సుంకర రామకృష్ణ, చౌటుపల్లి పెదమహాంకాళి పాల్గొన్నారు.

నేడు పెన్షన్ల పంపిణీ

సీటీఆర్‌ఐ (రాజమహేంద్రవరం): జిల్లాలో 2,36, 331 మందికి శనివారం ఎన్టీఆర్‌ భరోసా సామాజిక భద్రత పెన్షన్ల పంపిణీ చేసేందుకు ఏర్పాట్లు చేశామని కలెక్టర్‌ పి.ప్రశాంతి శుక్రవారం ఒక ప్రకటనలో తెలిపారు. గ్రాడ్యుయేట్‌ ఎమ్మెల్సీ ఎన్నికల నోటిఫికేషన్‌, ఎన్నికల ప్రవర్తన నియమావళి అమలు నేపథ్యంలో క్షేత్ర స్థాయి అధికారులకు, పెన్షన్‌ పంపిణీ చేసే సిబ్బందికి తగిన సూచనలు చేసినట్లు పేర్కొన్నారు. జిల్లావ్యాప్తంగా పెన్షన్లను 9,041 క్లస్టర్‌ ఏరియాల్లో 5,158 మంది పీడీవోల ద్వారా పంపిణీ చేస్తామని తెలిపారు.

సజావుగా ఎమ్మెల్సీ ఎన్నికలు

నోడల్‌ అధికారులతో జేసీ టెలి కాన్ఫరెన్స్‌

సీటీఆర్‌ఐ (రాజమహేంద్రవరం): ఎన్నికల కమిషన్‌ ఆదేశాల మేరకు తూర్పు, పశ్చిమ గోదావరి పట్టభద్రుల ఎమ్మెల్సీ ఎన్నికల ప్రక్రియ సజావుగా నిర్వహించేందుకు నోడల్‌ అధికారులను నియమిస్తున్నట్టు జాయింట్‌ కలెక్టర్‌ ఎస్‌.చిన్నరాముడు తెలిపారు. శుక్రవారం నోడల్‌ అధికారులతో జేసీ చాంబర్‌ నుంచి టెలి కాన్ఫరెన్స్‌ నిర్వహించారు. ఈ సందర్భంగా జేసీ మాట్లాడుతూ తూర్పు–పశ్చిమ గోదావరి పట్టభద్రుల నియోజకవర్గం నుంచి ఆంధ్రప్రదేశ్‌ శాసనమండలికి ద్వైవార్షిక–ఎన్నికల నిర్వహణకు భారత ఎన్నికల సంఘం షెడ్యూల్‌ను ప్రకటించిందన్నారు.

ఎన్నిక షెడ్యూల్‌

నోటిఫికేషన్‌ జారీ తేదీ : 03.02.2025

నామినేషన్లు వేయడానికి చివరి తేదీ : 10.02.2025

నామినేషన్ల పరిశీలన : 11.02.2025

ఉపసంహరణకు చివరి తేదీ : 13.02.2025

పోలింగ్‌ తేదీ : 27.02.2025

పోలింగ్‌ సమయం –ఉదయం 8 నుంచి సాయంత్రం 4 గంటల వరకు

ఓట్ల లెక్కింపు తేదీ – 3.03.2025

ఎన్నికల ప్రక్రియ ముగింపు తేదీ – 8.03.2025

ఎలక్షన్‌ కమిషన్‌ జారీ చేసిన మార్గదర్శకాలకు అనుగుణంగా నోడల్‌ అధికారులు శాసన మండలి గ్రాడ్యుయేట్‌ ఎమ్మెల్సీ ద్వైవార్షిక ఎన్నికలు పూర్తయ్యే వరకు సమన్వయంతో విధులను నిర్వహించాలన్నారు. తూర్పు గోదావరి జిల్లాలో అధికారులు నిర్వర్తించాల్సిన బాధ్యతల పై సూచనలు చేస్తూ, ఆమేరకు ఉత్తర్వులు ఇచ్చామన్నారు.

సీనియర్‌ తైక్వాండో పోటీలలో

జిల్లాకు పతకాలు

నాగమల్లితోట జంక్షన్‌ (కాకినాడ సిటీ): హైదరాబాద్‌లోని కోట్ల విజయ భాస్కరరెడ్డి స్టేడియంలో జనవరి 28 నుంచి 30 వరకు జరిగిన జాతీయస్థాయి సీనియర్స్‌ తైక్వాండో పోటీలలో జిల్లా క్రీడాకారులు పాల్గొని పతకాలు సాధించారని తైక్వాండో సంఘ కార్యదర్శి బి.అర్జునరావు శుక్రవారం తెలిపారు. ఈ పోటీలలో పాల్గొన్న హరికిరణ్‌, లక్కి రజత పతకాలు సాధించారన్నారు. ఈ సందర్భంగా డీఎస్‌డీఓ బి.శ్రీనివాస్‌ కుమార్‌ పతకాలు సాధించిన క్రీడాకారులను, నేషనల్‌ రిఫరీ ఎం.హర్షవర్ధన్‌ను అభినందించారు.

1/1

‘పని అనుభవం’ భవితకు పునాది