రంజాన్‌కు... భాయ్‌!

సల్మాన్‌ ఖాన్‌  హీరోగా నటించిన ‘రాధే: యువర్‌ మోస్ట్‌ వాంటెడ్‌ భాయ్‌’ సినిమా విడుదల తేదీ ఖరారైంది. మే 13న ఈ చిత్రం విడుదల కానుంది. ప్రభుదేవా దర్శకత్వం వహించిన ఈ చిత్రంలో రణ్‌దీప్‌ హుడా, దిశా పటానీ, జాకీ ష్రాఫ్, జరీనా వహాబ్‌ కీలక పాత్రలు చేశారు. ‘‘సల్మాన్‌ ఖాన్‌  నటించిన ‘వాంటెడ్‌’, ‘దబాంగ్‌’, ‘బాడీగార్డ్‌’ వంటి చిత్రాలు రంజాన్‌కు విడుదలై సూపర్‌హిట్‌ సాధించాయి. ఆ సెంటిమెంట్‌ను కంటిన్యూ చేస్తూ ఈ సినిమా కూడా హిట్‌ సాధిస్తుందనే నమ్మకం ఉంది.

ఈ సినిమాలో సల్మాన్‌, రణ్‌దీప్‌ల మధ్య ఉండే స్మోక్‌ ఫైట్‌ హైలైట్‌. ఈ ఫైట్‌ను ఓ కొరియన్‌ స్టంట్‌ టీమ్‌ డిజైన్‌  చేసింది. సల్మాన్‌  ఫ్యాన్స్‌కు ఈ చిత్రం ఓ యాక్షన్‌ ట్రీట్‌’’ అని చిత్రబృందం పేర్కొంది. నిజానికి ఈ సినిమా 2020 ఈద్‌కు విడుదల కావాల్సింది. కానీ కరోనాతో వాయిదా పడింది. ఆ తర్వాత ఓటీటీ ప్లాట్‌ఫామ్‌కు ఇచ్చేశారు. కానీ డిస్ట్రిబ్యూటర్స్, థియేటర్స్‌ ఓనర్ల అభ్యర్థనల మేరకు సల్మాన్‌  ఓటీటీ నిర్ణయాన్ని వెనక్కి తీసుకున్నారు. మరో రెండు నెలల్లో సల్మాన్‌  సినిమా థియేటర్స్‌లోకి వస్తుండడంతో అభిమానులు ఫుల్‌ ఖుషీలో ఉన్నారు.