పంట పొలాల దహనం.. రెట్టింపు జరిమానా విధిస్తూ కేంద్రం కీలక నిర్ణయం

న్యూఢిల్లీ: దేశ రాజధాని ఢిల్లీలో గాలి కాలుష్యం మరింత అధ్వాన్నంగా మారుతోంది. రోజురోజుకూ  తీవ్రమవుతున్న కాలుష్యం కారణంగా ఢిల్లీ వాసులు తీవ్ర ఇబ్బందులుపడుతున్నారు. వాయు కాలుష్యంతో ఊపిరితీసుకోవడం ఇబ్బందికరంగా మారుతోంది. 

ఈ క్రమంలో కేంద్రం కీలక నిర్ణయం తీసుకుంది. ఢిల్లీలో గాలి నాణ్యత క్షీణిస్తున్న నేపథ్యంలో పంట వ్యర్థాలను తగలబెట్టిన రైతులకు విధించే జరిమానాను రెట్టింపు చేసింది. పొరుగు రాష్ట్రాల్లో పంట వ్యర్థాలను దహనం చేసే రైతులకు రూ.30,000 వరకు జరిమానాను పెంచింది. ఈ నిబంధన తక్షణం ఆమల్లోకి వస్తుందని తెలిపింది. 

దీని ప్రకారం రెండు ఎకరాలలోపు భూమి ఉన్న రైతులకు రూ. 5 వేల జరిమానా విధించనున్నారు. రెండు నుంచి ఐదు ఎకరాల మధ్య ఉన్న వారికి రూ.10 వేలు, ఐదెకరాల కంటే ఎక్కువ భూమి ఉన్న రైతులకు రూ.30 వేలు జరిమానా విధిస్తారు.

శీతాకాలంలో దేశ రాజధానిని వాయకాలుష్య కోరల్లోకి నెట్టేస్తున్న పంట వ్యర్థాల దహనం ఘటనలపై సర్వోన్నత న్యాయస్థానం తీవ్ర ఆగ్రహం వ్యక్తంచేసిన విషయం తెలిసిందే. ఈ విషయంలో కేంద్రానికి చీవాట్లు పెట్టిన నేపథ్యంలో ఈ చర్యలు వెలుగుచూశాయి. సెంట్రల్ పొల్యూషన్ కంట్రోల్ బోర్డ్ ప్రకారం, ఢిల్లీ ఎన్సీఆర్‌ పరిధిలో గాలి నాణ్యత గురువారం భయంకరంగా పడిపోయింది. పలు ప్రాంతాల్లో కాలుష్యం 'తీవ్రమైన' స్థాయికి చేరుకుంది. నగరంలో సగటు వాయు నాణ్యత సూచిక 362గా నమోదైంది. ఢిల్లీలోని అనేక ప్రాంతాలు 400 మార్కును దాటాయి.  ఇది 'తీవ్రమైన' కేటగిరీ కిందకు వస్తుంది.