అభిషేక్‌ శర్మ ఊచకోత.. యూఏఈపై టీమిండియా ఘన విజయం

టీ20 ఎమర్జింగ్‌ టీమ్స్‌ ఆసియా కప్‌ 2024 టోర్నీలో భాగంగా యూఏఈతో ఇవాళ (అక్టోబర్‌ 21) జరిగిన మ్యాచ్‌లో టీమిండియా 7 వికెట్ల తేడాతో ఘన విజయం సాధించింది. ఈ మ్యాచ్‌లో తొలుత బ్యాటింగ్‌ చేసిన యూఏఈ.. భారత బౌలర్ల ధాటికి 16.5 ఓవర్లలో 107 పరుగులకే కుప్పకూలింది. టీమిండియా పేసర్‌ రసిఖ్‌ సలామ్‌ ఐదు బంతుల వ్యవధిలో మూడు వికెట్లు తీసి యూఏఈని చావుదెబ్బ కొట్టాడు. అనంతరం​ రమణ్‌దీప్‌ సింగ్‌ రెండు ఓవర్లలో రెండు వికెట్లు పడగొట్టాడు. 

అన్షుల్‌ కంబోజ్‌, వైభవ్‌ అరోరా, అభిషేక్‌ శర్మ, నేహల్‌ వధేరా తలో వికెట్‌ దక్కించుకున్నారు. యూఏఈ ఇన్నింగ్స్‌లో రాహుల్‌ చోప్రా ఒక్కడే ఒంటరిపోరాటం చేశాడు. రాహుల్‌ 50 బంతుల్లో​ 2 ఫోర్లు, 3 సిక్సర్ల సాయంతో 50 పరుగులు చేసి చివరి వికెట్‌గా వెనుదిరిగాడు. యూఏఈ ఇన్నింగ్స్‌లో రాహుల్‌తో పాటు కెప్టెన్‌ బాసిల్‌ హమీద్‌ (12 బంతుల్లో 22; ఫోర్‌, 2 సిక్సర్లు), మయాంక్‌ రాజేశ్‌ కుమార్‌ (5 బంతుల్లో 10; ఫోర్‌, సిక్స్‌) మాత్రమే రెండంకెల స్కోర్లు చేశారు.

అభిషేక్‌ శర్మ ఊచకోత..
స్వల్ప లక్ష్యాన్ని ఛేదించేందుకు బరిలోకి దిగిన భారత్‌.. అభిషేక్‌ శర్మ (24 బంతుల్లో 58; 5 ఫోర్లు, 4 సిక్సర్లు) ఆకాశమే హద్దుగా చెలరేగిపోవడంతో 10.5 ఓవర్లలో విజయతీరాలకు చేరింది. భారత ఇన్నింగ్స్‌లో తిలక్‌ వర్మ 21, ప్రభ్‌సిమ్రన్‌ సింగ్‌ 8, అభిషేక్‌ 58 పరుగులు చేసి ఔట్‌ కాగా.. నేహల్‌ వధేరా 6, ఆయుశ్‌ బదోని 12 పరుగులతో అజేయంగా నిలిచారు.