AUS vs IND: ఆస్ట్రేలియా బ్యాట‌ర్ల ఊచకోత.. భారత్ ముందు భారీ టార్గెట్‌

ఆస్ట్రేలియాలో భార‌త మ‌హిళా జ‌ట్టు బౌలర్ల వైఫ‌ల్యం కొన‌సాగుతోంది. పెర్త్‌ వేదికగా జరుగుతున్న మూడో వన్డేలో సైతం భారత బౌలర్లు తీవ్ర నిరాశపరిచారు. మన బౌలర్లను ఆసీస్‌ బ్యాటర్లు  ఉతికారేశారు. తొలుత బ్యాటింగ్‌ చేసిన ఆస్ట్రేలియా నిర్ణీత 50 ఓవర్లలో 6 వికెట్ల నష్టానికి 298 పరుగుల భారీ స్కోర్‌ సాధించింది.

ఆసీస్‌ బ్యాటర్లలో అన్నాబెల్‌ సదర్లాండ్‌(95 బంతుల్లో 110, 9 ఫోర్లు, 4 సిక్స్‌లు) అద్బుతమైన సెంచరీతో చెలరేగగా.. గార్డనర్‌(50), కెప్టెన్‌ మెక్‌గ్రాత్‌(56 నాటౌట్‌) హాఫ్‌ సెంచరీలతో మెరిశారు. భారత బౌలర్లలో ఒక్క అరుంధతి రెడ్డి మినహా మిగతా అందరూ తీవ్ర నిరాశపరిచారు. 

అరుంధతి తన 10 ఓవర్ల కోటాలో కేవలం 26 పరుగులు మాత్రమే ఇచ్చి 4 వికెట్లు పడగొట్టింది. కాగా ఇప్పటికే తొలి రెండు వన్డేల్లో ఘోర ఓటమి చవిచూసిన భారత జట్టు 2-0 తేడాతో సిరీస్‌ను ఆస్ట్రేలియాకు అప్పగించేసింది. కనీసం​ ఆఖరి వన్డేలోనైనా గెలిచి వైట్‌ వాష్‌ నుంచి తప్పించుకోవాలని హర్మాన్‌ సేన భావిస్తోంది. ఇప్పుడు ఆ భారమంతా భారత బ్యాటర్లపైనే ఉంది.