షకీబ్‌ మాయాజాలం

ఢాకా: వెస్టిండీస్‌తో ప్రారంభమైన మూడు మ్యాచ్‌ల వన్డే సిరీస్‌లో బంగ్లాదేశ్‌ స్టార్‌ ఆల్‌రౌండర్‌ షకీబుల్‌ హసన్‌ (4/8) విజృంభించాడు. దాంతో తొలి మ్యాచ్‌లో బంగ్లాదేశ్‌ 6 వికెట్లతో ఘనవిజయం సాధించింది. ముందుగా వెస్టిండీస్‌ 32.2 ఓవర్లలో 122 పరుగులకే  కుప్పకూలింది. కెల్‌ మయేర్స్‌ (40; 4 ఫోర్లు, 1 సిక్స్‌), పావెల్‌ (31 బంతుల్లో 28; 2 ఫోర్లు, 2 సిక్సర్లు) మినహా మిగతా వారు పరుగులు సాధించలేకపోయారు. షకీబ్‌తో పాటు హసన్‌ మహముద్‌ 3, ముస్తఫిజుర్‌ 2 వికెట్లు పడగొట్టారు. అనంతరం బంగ్లాదేశ్‌ 33.5 ఓవర్లలో 4 వికెట్లకు 125 పరుగులు చేసి గెలిచింది. కెప్టెన్‌ తమీమ్‌ ఇక్బాల్‌ (69 బంతుల్లో 44; 7 ఫోర్లు) ఆకట్టుకున్నాడు. షకీబ్‌కు ‘ప్లేయర్‌ ఆఫ్‌ ద మ్యాచ్‌’ పురస్కారం దక్కింది. ఈ మ్యాచ్‌తో వెస్టిండీస్‌ తరఫున ఆరుగురు ప్లేయర్లు, బంగ్లా జట్టులో ఒకరు అంతర్జాతీయ అరంగేట్రం చేశారు.