ఇండోనేషియా బంపర్‌ ఆఫర్‌.. కానీ ఓ రిస్క్‌!

ఇండోనేషియా ప్రభుత్వం బంపర్‌ ఆఫర్‌ను ప్రకటించింది. ఓ మొసలి మెడలో ఇరుక్కున్న టైర్‌ను తీసిన సాహసవంతులకు భారీ మొత్తంలో నగదు బహుమతి ఇవ్వనున్నట్లు వెల్లడించింది. అయితే ఇందుకోసం వారు 13 అడుగుల మొసలికి ఎదురు వెళ్లాల్సి ఉంటుందని పేర్కొంది. కాగా ఇండోనేషియా సెంట్రల్‌ సులవేసిలోని ఉప్పునీటి సరస్సులో నివసిస్తున్న ఈ మొసలి మెడకు మోటర్‌ సైకిల్‌ టైర్‌ ఇరుక్కుంది. రోజు రోజుకు ఆ టైరు మొసలి మెడ నుంచి పొట్టమీదకు జారుతూ బిగుసుకుపోతోంది. కాగా టైరు వల్ల ఇబ్బంది పడుతున్నమొసలి ప్రాణాలకు ప్రమాదం ఉందని గ్రహించిన అధికారులు దానిని తీయడానికి ఈ భారీ ఆఫర్‌ను ప్రకటించారు. అయితే ఆ ఆఫర్‌కు ఆకర్షితులైన కొంత మంది ఈ సాహసానికి పూనుకుని ముందుకు వచ్చారు.