మధ్యాహ్న మంటలు

 సాక్షి ప్రతినిధి, ఏలూరు : ఒక నాయకుడికి లబ్ది చేకూర్చేందుకు 200 మంది మహిళల ఉపాధిని పణంగా పెట్టారు. పైకి  సేవలాగే కనపడుతున్నా దీని వెనుక పెద్దఎత్తున దోపిడీకి రంగం సిద్ధం అవుతున్నట్టు సమాచారం. జిల్లాలో మొదటి దశలో మధ్యాహ్న భోజన పథకం నిర్వహణ బాధ్యతను ప్రైవేట్‌ సంస్థకు అప్పగిస్తూ డీఈవో డి.మధుసూదనరావు ఆదేశాలు జారీ చేయడం ప్రకంపనలు రేపుతోంది. తొలి దశలో 65 హైస్కూల్స్‌ను ఆ సంస్థకు కేటాయించాలని నిర్ణయించగా ఉండి, ఉంగుటూరు ఎమ్మెల్యేలు అభ్యంతరం చెప్పడంతో ప్రస్తుతానికి తాడేపల్లిగూడెం, తణుకు నియోజకవర్గాల్లోని 35 హైస్కూల్స్‌ను అప్పగించారు. మాజీ ఎమ్మెల్యే, టీడీపీ నాయకుడు చెరుకువాడ శ్రీరంగనాథరాజు అ««దl్యక్షుడిగా ఉన్న గోదావరి విద్యా వికాస్‌ చైతన్య సొసైటీతో ప్రభుత్వం ఈ మేరకు ఒప్పందం కుదుర్చుకుంది. దీని ప్రకారం శుక్రవారం నుంచి జిల్లాలోని ఏడు మండలాల పరిధిలో గల 35 స్కూల్స్‌కు మధ్యాహ్న భోజనం ఈ సొసైటీ నుంచి అందుతుందని డీఈవో ప్రొసీడింగ్స్‌ జారీ చేశారు.  ఈ సొసైటీలో రైస్‌మిల్లర్లతో పాటు స్వచ్ఛంద సేవ చేసేవారు ఉన్నారని, పథకం అమలు బాధ్యతను వారికి అప్పగించడం వల్ల మెరుగైన సేవలు అందుతాయని పేర్కొన్నారు. తాడేపల్లిగూడెం, పెంటపాడు, తణుకు, ఇరగవరం, అత్తిలి, నల్లజర్ల, భీమవరం మండలాల్లో సుమారు 30 కిలోమీటర్ల పరిధిలోని 15,210 మంది విద్యార్థులకు ఈ సొసైటీ మధ్యాహ్న భోజనం అందజేస్తుంది.  ప్రస్తుతం హాజరైన విద్యార్థుల సంఖ్యను బట్టి ఆయా స్కూళ్లలోనే వంటచేసి భోజనం వడ్డిస్తున్నారు. 17 ఏళ్లుగా ఈ పథకం నడుస్తుండగా.. అప్పటినుంచి డ్వాక్రా సంఘాల ద్వారా ఎంపికైన మహిళలే ఈ పథకాన్ని నిర్వహిస్తున్నారు. వారే వంట సామగ్రి సమకూర్చుకుని.. స్కూల్‌ ఆవరణలోనే వంట చేసి విద్యార్థులకు వేడిగా వడ్డిస్తున్నారు. ఇందులో చిన్నపాటి లోపాలున్నా పథకం పూర్తిస్థాయిలోనే అమలవుతోంది.