'చేతులు జోడించి కోరుతున్నా.. వేడుకకు రాండి'

న్యూఢిల్లీ : దేశమంతటిన్నీ ఒకే పన్ను విధానంలోకి తీసుకొస్తూ ఎంతో ప్రతిష్టాత్మకమైన జీఎస్టీని కేంద్రప్రభుత్వం నేటి అర్థరాత్రి అట్టహాసంగా లాంచ్‌ చేయబోతుంది. పార్లమెంట్‌ సెంట్రల్ హాల్‌ వేదికగా లాంచ్‌ కాబోతున్న ఈ వేడుకకు, ప్రతిపక్షాలన్నీ దాదాపు బాయ్‌ కాట్‌ చేస్తున్నాయి. కాంగ్రెస్‌, తృణమూల్‌ కాంగ్రెస్‌, డీఎంకే, సీపీఐలు మాత్రం గైర్హాజరు కాబోతున్నట్టు ప్ర‍కటించాయి. అయితే నేడు అర్థరాత్రి నిర్వహిస్తున్న జీఎస్టీ వేడుకకు కాంగ్రెస్‌తో సహా అన్ని ప్రతిపక్ష పార్టీలు హాజరుకావాలని సమాచార, ప్రసారాల శాఖా మంత్రి వెంకయ్యనాయుడు కోరారు. ప్రతిపక్ష పార్టీలన్నీ ఈ వేడుకను బాయ్‌ కాట్‌ చేయడం సరియైనది కాదని నాయుడు పేర్కొన్నారు. ''మరోసారి రాజకీయ పార్టీలను అభ్యర్థిస్తున్నా. ముఖ్యంగా కాంగ్రెస్‌ పార్టీని. అందరం కలిసి ఈ వేడుకలో పాల్గొంద్దాం. ఇది కేవలం వేడుక మాత్రమే కాదు. పన్ను విధానంలో ఓ చారిత్రాత్మకమైన సంస్కరణ'' అని నాయుడు చెప్పారు. ఈ వేడుకలో నాన్‌-ఎన్డీయే పార్టీలు అన్నాడీఎంకే, జేడీయూ, బీజేడీ, టీఆర్‌ఎస్‌, వైఎస్సార్‌ కాంగ్రెస్‌, ఇండియన్‌ నేషనల్‌ లోక్‌దళ్‌ లు హజరవుతున్నాయి.