కగిసో రబడ ( ఫైల్‌ ఫొటో)

సాక్షి, స్పోర్ట్స్‌ : రెండు టెస్టులు నిషేధం విధించడంపై దక్షిణాఫ్రికా పేస్‌ బౌలర్‌ కగిసో రబడ పశ్చాతాపం వ్యక్తం చేశాడు. ఆస్ట్రేలియాతో జరుగుతున్న రెండో టెస్టులో 11 వికెట్లతో  ఈ సూపర్‌ బౌలర్‌ దక్షిణాఫ్రికా విజయంలో కీలక పాత్ర పోషించిన విషయం తెలిసిందే. అయితే ఈ మ్యాచ్‌లో రబడ తన ఆగ్రహాన్ని అదుపులో ఉంచుకోలేక తనను, తన జట్టును తీవ్రంగా నష్టపరిచాడు.  తొలి ఇన్నింగ్స్‌లో స్మిత్‌ భుజాన్ని ఉద్దేశపూర్వకంగా ఢీకొట్టి ఆగ్రహం వ్యక్తం చేసిన ఈ యువ పేసర్‌.. రెండో ఇన్నింగ్స్‌లో వార్నర్‌ను బౌల్డ్‌ చేసి తీవ్రంగా అరిచాడు. ఈ ప్రవర్తనతో రబడ తర్వాతి రెండు టెస్టు మ్యాచ్‌లకు దూరమయ్యాడు.

ఐసీసీ విధించిన నిషేదంపై రబడ స్పందిస్తూ.. ‘నేను ఇలా చేసుండాల్సింది కాదు. ఈ ప్రవర్తనతో మనిషిగా, వ్యక్తిగా ఎంతో దిగిజారిపోయా. ఈ ఘటనతో నేనెంతో నేర్చుకున్నా. ఇలాంటి తప్పిదాలను భవిష్యత్తులో పునావృత్తం కానివ్వను. ఈ ఘటనలకు చాలా కారణాలున్నాయి. కానీ రూల్స్‌ రూల్సే.  స్మిత్‌ను ఉద్దేశ్యపూర్వకంగా తాకలేదు. లార్డ్స్‌ మైదానంలో నేను చేసింది తప్పని తెలిసే అప్పుడు అప్పీల్‌ చేయలేదు. నిజాయితీగా చేప్పాలంటే అసలు నేనేం మాట్లాడుతున్నానో నాకే తెలియడం లేదు. ఓ పెద్ద సిరీస్‌ నుంచి దూరమయ్యాను. నేను చాలా ఆడాల్సింది. కీలక సమయంలో జట్టుకు దూరమయ్యానని’ రబడ ఆవేదన వ్యక్తం చేశారు.

జనవరి 2017 నుంచి వేర్వేరు ఘటనల్లో (డిక్‌వెలా, స్టోక్స్, ధావన్‌లతో గొడవ) ఇప్పటికే ఐదు డీమెరిట్‌ పాయింట్లు ఈ పేసర్‌ ఖాతాలో ఉన్నాయి. దాంతో పాయింట్ల సంఖ్య ఎనిమిదికి చేరి రెండు టెస్టుల నిషేధం పడింది. వార్నర్‌ ఘటనలో కూడా 15 శాతం మ్యాచ్‌ ఫీజు జరిమానాతో పాటు 1 డీమెరిట్‌ పాయింట్‌ను ఐసీసీ శిక్షగా విధించింది. దాంతో రబడ మొత్తం పాయింట్ల సంఖ్య 9కి చేరింది. నాలుగు టెస్టు మ్యాచ్‌ సిరీస్‌లో ఇరు జట్టు చెరోమ్యాచ్‌ గెలిచాయి. సరైన సమయంలో రబడా దూరం కావడం దక్షిణాఫ్రికా జట్టుకు నష్టం చేకూరనుంది.