పోలీసులకు ప్రత్యేక శిక్షణ

న్యూఢిల్లీ: మహిళలు, చిన్నారులపై అఘాయిత్యాలకు సంబంధించిన కేసులను సమర్థవంతంగా పరిష్కరించేందుకు త్వరలో ఢిల్లీ పోలీసులకు ప్రత్యేక శిక్షణ కార్యక్రమాలను చేపట్టనున్నారు. ఈ మేరకు ఢిల్లీ పోలీస్ కమిషనర్ బి.ఎస్.బస్సీ ప్రణాళికను సిద్ధం చేస్తున్నారు. దీని ప్రకారం ఢిల్లీ పోలీస్ శాఖలోని సీనియర్ అధికారులతో సహా ప్రతి ఒక్కరూ ఏడాదికి కనీసం వారం రోజులపాటు ఈ శిక్షణ కార్యక్రమాల్లో పాల్గొనాల్సి ఉంటుంది. ఢిల్లీపోలీస్ శిక్షణ శాఖలోని ఒక సీనియర్ అధికారి మీడియాతో మాట్లాడుతూ ‘ బయట విధుల్లో ఉన్న పోలీసులందరినీ శిక్షణ తరగతులకు రప్పించడం కష్టం కాబట్టి శిక్షణాధికారులే సిబ్బంది దగ్గరకు వెళ్లే విధంగా ప్రణాళికలు సిద్ధం చేశాం. దీని ప్రకారం శిక్షణ ఇచ్చే అధికారులను ఆరు బృందాలుగా విభజించాం. ఒక్కో బృందంలో ఇద్దరు అధికారులుంటారు. ఈ బృందాలు ప్రతిరోజూ ఆరు పోలీస్‌స్టేషన్లను సందర్శిస్తాయి.