కాంగ్రెస్‌పై మోడీ ధ్వజం
  ‘ఒక ర్యాంకు-ఒక పెన్షన్’పై 2004 నుంచి ఏం చేసింది
  అవినీతిపై రాహుల్ మాట్లాడటం హాస్యాస్పదం
  అధికారమిస్తే దేశాన్ని అభివృద్ధి చేస్తా
  
  లూధియానా: సాయుధ దళాలను కాంగ్రెస్ పార్టీ మోసం చేస్తోందని బీజేపీ ప్రధాని అభ్యర్థి నరేంద్ర మోడీ ఆరోపించారు. మాజీ సైనికోద్యోగులకు ‘ఒక ర్యాంకు-ఒక పెన్షన్’ను అమలు చేయడంలో కాంగ్రెస్ జాప్యాన్ని ఆయన తూర్పారబట్టారు. గత పదేళ్లుగా అధికారంలో ఉన్నప్పటికీ యూపీఏ ప్రభుత్వం ఈ విధానాన్ని అమలు చేయకుండా ఎన్నికల వేళ హడావుడిగా ప్రకటన చేయడంలోని ఆంతర్యాన్ని గుర్తించాలని కోరారు. ఆదివారం పంజాబ్‌లోని లూధియానా, మాల్వాలలో నిర్వహించిన బహిరంగ సభల్లో మిత్రపక్షమైన శిరోమణి-అకాలీదళ్ నేతలతో కలసి మోడీ మాట్లాడారు. సంప్రదాయ సిక్కు తలపాగా ధరించిన మోడీ సుమారు అరగంటపాటు చేపట్టిన ప్రసంగంలో కాంగ్రెస్‌పై విరుచుకుపడ్డారు.
  
  ఆయన ప్రసంగంలోని ముఖ్యాంశాలు...
      మాజీ సైనికోద్యోగుల సంక్షేమంపట్ల కాంగ్రెస్ పార్టీకి ఒకవేళ నిజంగా చిత్తశుద్ధి ఉండుంటే 2004 నుంచీ అధికారంలో ఉన్నా ‘ఒక ర్యాంకు-ఒక పెన్షన్’ను ఎందుకు అమలు చేయలేదు?
  
      ఈ అంశంపై నేను తరచూ మాట్లాడుతుండటంతో ఈసారి బడ్జెట్‌లో ప్రకటన చేసింది. వాజ్‌పేయి సారథ్యంలోని ఎన్డీయే ప్రభుత్వం 2004లో అధికారంలోకి వచ్చి ఉంటే దీన్ని వెంటనే అమలు చేసేది.
  
      ‘ఏబీసీ’లకు కొత్త నిర్వచనం (ఏ-ఆదర్శ్ హౌసింగ్ స్కాం, బీ-బోఫోర్స్ కుంభకోణం, సీ-కోల్ స్కాం) ఇస్తూ ఓవైపు కాంగ్రెస్ అవినీతిలో కూరుకుపోతుంటే ఆ పార్టీ ఉపాధ్యక్షుడు రాహుల్ గాంధీ అవినీతి విషయంలో విపక్షాలపై వేలెత్తి చూపడం హాస్యాస్పదంగా ఉంది.
  
       కేంద్రం నుంచి రూపాయి పంపితే 15 పైసలే గ్రామానికి చేరుతోందంటూ నాటి ప్రధాని రాజీవ్‌గాంధీ పేర్కొనడమే కాంగ్రెస్ అవినీతికి నిదర్శనం.
  
      అధికారంలోకి వస్తే ప్రధాని పదవిని దేశానికి కాపాలాదారుగా స్వీకరిస్తా. ప్రభుత్వ ఖజానాపై ‘చెయ్యి’ పడకుండా చూస్తా.
  
      కాంగ్రెస్ ఇప్పటివరకూ ప్రజల కళ్లలో మట్టి కొట్టి మోసం చేయగా తాజాగా పెప్పర్ స్ప్రే చల్లడం మొదలు పెట్టింది (తెలంగాణ బిల్లును ప్రభుత్వం లోక్‌సభలో ప్రవేశపెట్టకుండా అడ్డుకునేందుకు కాంగ్రెస్ విజయవాడ ఎంపీ (ప్రస్తుతం మాజీ) లగడపాటి రాజగోపాల్ పెప్పర్ స్ప్రే చల్లడాన్ని ఉదహరిస్తూ...)
  
      గుజరాత్‌లోని కచ్ ప్రాంతం నుంచి సిక్కు రైతులు వలస వెళ్తున్నారంటూ సాగుతున్న ప్రచారమంతా బూటకం. పంజాబ్‌లో బీజేపీ-ఎస్‌ఏడీ కూటమి హిందువులు-సిక్కుల ఐక్యతకు చిహ్నం.
  
      సుపరిపాలన ఎలా అందించాలో బన్సీలాల్, ప్రకాశ్‌సింగ్ బాదల్ (ఎస్‌ఏడీ నేత), ఓం ప్రకాశ్ చౌతాలా (ఐఎన్‌ఎల్‌డీ అధినేత), ఫరూఖ్ అబ్దుల్లా (నేషనల్ కాన్ఫరెన్స్ చీఫ్) నుంచి నేర్చుకున్నా.
  
      అధికారం అందిస్తే దేశాన్ని అభివృద్ధి బాటలో నడిపిస్తా.
      రైతులకు మేలు చేకూరాలంటే వ్యవసాయ ఉత్పత్తుల మార్కెటింగ్ పెరగాలి. నష్టాల ఊబిలో ఉన్న రైతులను ఆదుకునేందుకు భారత ఆహార సంస్థ (ఎఫ్‌సీఐ)ని మూడు విభాగాలుగా చేయాలి. మొదటి విభాగం ఉత్పత్తులను సేకరిస్తే రెండో విభాగం వాటిని నిల్వ చేసే బాధ్యతను, మూడో విభాగం వాటిని సమర్థంగా పంపిణీ చేసే బాధ్యతను చేపట్టాలి.
  
      గిడ్డంగుల్లో నిల్వ ఉన్న గోధుమలను రైతుల మధ్య పంపిణీ చేయాలంటూ సుప్రీంకోర్టు ఆదేశించినా కేంద్రం మాత్రం గోధుమ నిల్వలు కుళ్లిపోయే వరకూ నిరీక్షించి ఆ తర్వాత లిక్కర్ తయారీ బెవరేజీలకు అమ్ముకుంది.
  
      వ్యవసాయ ఉత్పాదకతను పెంచేందుకు రైతులు ఆధునిక సాంకేతిక పరిజ్ఞానాన్ని అందిపుచ్చుకోవాలి.
  
  సంక్షిప్తంగా...
      2011లో తమిళనాడులో జరిగిన ఓ కార్యక్రమానికి హాజరైన బీజేపీ అగ్రనేత ఎల్.కె. అద్వానీ లక్ష్యంగా అమర్చిన పైపు బాంబు ఉదంతంలో ప్రధాన నిందితుడిని కేరళలో ఆదివారం అరెస్టు చేసినట్టు పోలీసులు తెలిపారు.
  
      21 మంది అఫ్ఘానిస్థాన్ సైనికులను తాలిబాన్లు ఆదివారం కాల్చి చంపి, మరో ఏడుగురిని అపహరించిన ఘటనపై అఫ్ఘాన్ అధ్యక్షుడు హమీద్ కర్జాయ్ మండిపడ్డారు. పాకిస్థాన్‌లోని ఉగ్రవాద స్థావరాలను ఏరివేయడంలో ఆ దేశ ప్రభుత్వం విఫలమైందని విమర్శించారు.  
  
      {పపంచవ్యాప్తంగా అడవుల నాశనాన్ని ఎప్పటికప్పుడు కళ్లకు కట్టినట్లు చూపే వెబ్‌సైట్‌ను గూగుల్ సెర్చ్ ఇంజిన్ ప్రారంభించింది. ‘గ్లోబల్ ఫారెస్ట్ వాచ్’ పేరుతో ప్రారంభించిన ఈ సైట్‌లో అటవీప్రాంత నిర్మూలన సమాచారం, నివేదికలు, మ్యాపులు ఉన్నాయి.
  
      ఛత్తీస్‌గఢ్‌లోని నారాయణ్‌పూర్ జిల్లాలో భద్రతా బలగాలకు మావోయిస్టులకు మధ్య జరిగిన ఎదురుకాల్పుల్లో ఒక నక్సల్ మృతి చెందాడు. జిల్లాలోని ధాదాయ్ పోలీస్ స్టేషన్ పరిధిలో ఉన్న అడవుల్లో ఆదివారం ఉదయం కోబ్రా, సీఆర్‌పీఎఫ్ బలగాలు కూంబింగ్ చేపట్టినప్పుడు ఎన్‌కౌంటర్ జరిగిందని అధికారులు చెప్పారు.
  


 
  ముంబై: ఆదర్శ్ కుంభకోణంలో మాజీ ముఖ్యమంత్రి అశోక్ చవాన్‌ను ప్రాసిక్యూట్ చేసేందుకు సీబీఐ పెట్టుకున్న దరఖాస్తును గవర్నర్ శంకర నారాయణన్ తిరస్కరించడంపై బీజేపీ మండిపడింది. అతడిని వెంటనే రీకాల్ చేయాలని ఆ పార్టీ రాష్ట్ర శాఖ శనివారం కేంద్ర ప్రభుత్వాన్ని డిమాండ్ చేసింది. అసలు సీబీఐ అభ్యర్థనను గవర్నర్ ఎందుకు తిరస్కరించారో బహిర్గతపరచాలని ఆ పార్టీ అధికార ప్రతినిధి రవిశంకర్ ప్రసాద్ ప్రశ్నించారు. యూపీఏ సర్కారు పాలనలో బయటపడిన పలు కుంభకోణాలపై చర్చించేందుకు బీజేపీ చార్జిషీట్ కమిటీ నిర్వహిస్తున్న రెండు రోజుల సమావేశానికి ఆయన శనివారం హాజరయ్యారు. ఈ సందర్భంగా ప్రసాద్ మీడియాతో మాట్లాడారు.
  
   మాజీ ముఖ్యమంత్రిని ప్రాసిక్యూట్ చేసేందుకు సీబీఐకి అనుమతి ఇవ్వకపోవడం వెనుక గవర్నర్‌పై ఒత్తిడి ఉందని ఆయన అనుమానం వ్యక్తం చేశారు. ఆదర్శ్ కుంభకోణంపై జ్యుడీషియల్ కమిషన్ నివేదికలో చవాన్‌పై స్పష్టమైన ఆధారాలు ఉన్నప్పటికీ సీబీఐ విచారణకు గవర్నర్ ఒప్పుకోకపోవడంలో ఔచిత్యమేమిటని ఆయన ప్రశ్నించారు. తాము ఈ విషయమై త్వరలోనే రాష్ట్రపతిని కలిసి మాజీ ముఖ్యమంత్రిపై విచారణకు గవర్నర్ ఆమోదించేలా విజ్ఞప్తి చేస్తామన్నారు. అలాగే గవర్నర్‌ను వెనక్కి పిలవాలని డిమాండ్ చేస్తామని చెప్పారు. కాంగ్రెస్ పార్టీ నాయకులకు ఈ కుంభకోణంలో ఉన్న సంబంధాలను బహిర్గతపరుస్తామని ఆయన నొక్కిచెప్పారు. కాగా, కుంభకోణంలో మాజీ సీఎం పాత్రపై ఆధారాలను చూపడంలో సీబీఐ విఫలమవ్వడంతో గవర్నర్ అతడిపై విచారణకు తిరస్కరించారు. అంతకుముందు చవాన్ పేరును నిందితుల చిట్టా నుంచి తొలగించేందుకు సీబీఐ చేసిన అభ్యర్థనను ప్రత్యేక కోర్టు తిరస్కరించిన సంగతి తెలిసిందే. కాగా స్వాతంత్య్రం వచ్చిన తర్వాత అధికారంలో ఉన్న అన్ని ప్రభుత్వాల కంటే యూపీఏదే అత్యంత అవినీతిమయ పాలన అని ప్రసాద్ విమర్శించారు. కాగా, ప్రసాద్‌తోపాటు సమావేశానికి హాజరైన వారిలో లోక్‌సభలో బీజేపీ డిప్యూటీ నాయకుడు గోపీనాథ్ ముండే, మీనాక్షి లేఖి తదితరులు ఉన్నారు.
  
  


  పార్టీ ప్రక్షాళనపై కాంగ్రెస్ అధిష్టానం దృష్టి
      దూకుడు వ్యక్తికి ఎంపీసీసీ పగ్గాలు
      రాష్ర్ట మంత్రివర్గంలోనూ మార్పులు
      కొత్తవారికి చోటుదక్కే అవకాశం
      అవినీతి ముద్రను తొలగించేందుకు యత్నాలు
  
  సాక్షి, ముంబై: అవినీతి ఆరోపణలతో మకిలపడుతున్న రాష్ట్ర కాంగ్రెస్ పార్టీ ప్రతిష్టను పునరుద్ధరించడంపై అధిష్టానం దృష్టి సారించింది. వచ్చే ఎన్నికల్లోపు ప్రజల్లో పార్టీకి ఆదరణ పెంచే దిశగా చర్యలు తీసుకుంటోంది. ప్రస్తుతమున్న రాష్ట్ర మంత్రి వర్గాన్ని పునర్వ్యవస్థీకరించి అవినీతి రహిత పాలన అందించాలని వడివడిగా అడుగులు వేస్తోంది. ఇటీవల జరిగిన నాలుగు రాష్ట్రాల ఎన్నికల్లో దారుణ పరాజయం చవిచూసిన అనంతరం కాంగ్రెస్ ఈ నిర్ణయాన్ని తీసుకున్నట్టు తెలుస్తోంది. సంక్రాంతి పండుగ వరకు ఈ మంత్రి మండలి విస్తరించే యోచనలో ఉందని సమాచారం. అవినీతి, కుంభకోణాలతో సతమతమవుతున్న కాంగ్రెస్ పార్టీ...మంత్రి మండలిలో కొందరు కొత్త ముఖాలకు అవకాశం ఇవ్వాలని భావిస్తోంది. ఈ నేపథ్యంలో మంత్రి మండలిలో ఎలాంటి మార్పులు చోటుచేసుకోనున్నాయనే విషయం అందరికీ ఉత్కంఠను రేపుతోంది.
  
  ఎంపీసీసీ అధ్యక్షునిగా రాణే, విఖే పాటిల్ పేర్లు...!
  ఆదర్శ్ కుంభకోణం దెబ్బ కాంగ్రెస్ పార్టీలో ప్రక్షాళనకు బాటలు వేసింది. వచ్చే ఎన్నికల్లో ప్రత్యర్థి పార్టీలను ధీటుగా ఎదుర్కొవాలంటే దూకుడు స్వభామున్న వారికి పార్టీ పగ్గాలు అప్పజెప్పాలని కాంగ్రెస్ అధిష్టానం యోచిస్తోంది. ఆదర్శ్ కుంభకోణంలో మాజీ ముఖ్యమంత్రి ఆశోక్ చవాన్ విచారించాల్సిన అవసరం లేదని గవర్నర్ కె.శంకర నారాయణన్ సీబీఐ నివేదికను తోసిపుచ్చడంతో ఎంపీసీసీ అధ్యక్ష బాధ్యతలు అప్పగించాలని అనుకుంది. అయితే ప్రతిపక్షాల ఒత్తిడితో ఆదర్శ్ నివేదికను సర్కార్ శాసనసభలో ప్రవేశపెట్టడంతో అశోక్‌కు ఆ పదవి ఇవ్వకపోవడమే ఉత్తమమనే నిర్ణయానికి వచ్చినట్టు తెలుస్తోంది. మంచి వాగ్ధాటి, కార్యకర్తలతో కలుపుకోయే స్వభావం గల నారాయణ రాణే, రాధకృష్ణ విఖేపాటిల్ పేర్లను పరిశీలిస్తున్నట్టు సమాచారం. వీరిలో ఒకరికి పార్టీ పగ్గాలు అప్పజెప్పేందుకు పార్టీ నేతలందరితో చర్చలు జరుపుతున్నట్టు తెలుస్తోంది. రాబోయే ఎన్నికల నేపథ్యంలో  ఏ నిర్ణయమైన త్వరగా తీసుకోవాలని రాష్ట్ర సీనియర్ నాయకులు అధిష్టానానికి ఇప్పటికే సూచించారు.
  
  48 లోక్‌సభ సీట్ల బలాబలాలపై అధ్యయనం...
  ఎన్సీపీ వైఖరితో మింగుడుపడని కాంగ్రెస్ అధిష్టానం అవసరమైతే  రాష్ట్రంలోని 48 లోక్‌సభ నియోజకవర్గాలలో పోటీ చేసేందుకు సిద్దంగా ఉండాలని సూచించినట్టు సమాచారం. దీంతో ఆ స్థానాల్లో బలబలాలపై అధ్యయనం ప్రారంభించినట్టు తెలిసింది. మరోవైపు ముఖ్యమంత్రి పృథ్వీరాజ్ చవాన్, ఎంపీసీసీ అధ్యక్షుడు మాణిక్‌రావ్ ఠాక్రేలు  అధిస్టానం పిలుపుమేరకు చర్చలు జరిపేందుకు ఢిల్లీ వెళ్లారు. 48 స్థానాల్లో పోటీపైనే అక్కడ ఢిల్లీ పెద్దలతో చర్చలు జరుపుతున్నారు. 2014లో జరగబోయే లోక్‌సభ, అసెంబ్లీ ఎన్నికలు, పార్టీ బలాలపై చర్చిస్తున్నట్టు తెలిసింది. లోక్‌సభ ఎన్నిక ల్లో పోటీ చేసే అభ్యర్థులకు ప్రచారం కోసం కావల్సిన సమయం లభించేందుకు కాంగ్రెస్ ఉపాధ్యక్షుడు రాహుల్ గాంధీ జనవరిలోనే తొలి జాబితాను ప్రకటిచేందుకు సన్నాహాలు చేపట్టారని చెబుతున్నారు. ఈ నేపథ్యంలో రాష్ట్రంలోని లోక్‌సభ నియోజకవర్గాల్లో సమర్థులైన అభ్యర్థుల పేర్లపై అన్ని కోణాల్లో చర్చలు జరిపిన రాహుల్...వారికి ఆయా నియోజకవర్గాల్లో ఎంత అనుకూలత ఉందనే విషయమై కూడా చర్చల్లో అడిగి తెలుసుకుంటున్నట్టు సమాచారం. కాంగ్రెస్ కోటలోకి 26 సీట్లు రావడం ఖాయమైనప్పటికీ 29 సీట్లను ఇవ్వాలని మిత్రపక్షమైన ఎన్సీపీని డిమాండ్ చేస్తున్న విషయం తెలిసిందే.
  
   ఈ నేపథ్యంలో అభ్యర్థులెవరనే విషయమై ఇప్పటి నుంచే చర్చలు ప్రారంభమయ్యాయి. పార్టీని గెలిపించే సత్తా ఉన్న అభ్యర్థులుగా పార్టీ అధిష్టానం భావిస్తున్న కొందరి పేర్లను రాష్ట్ర కాంగ్రెస్ పార్టీకి సూచించింది. వీరిలో ముంబైకి చెందిన ఐదుగురు పార్లమెంట్ సభ్యులు ఉన్నారు. కేంద్ర మంత్రి మిలింద్ దేవ్‌రా, ప్రియాదత్, సంజయ్ నిరూపమ్, గురుదాస్ కామత్‌లను మళ్లీ బరిలోకి దింపడం ఖాయం చేశారని చెప్పవచ్చు. వీరి పేర్లు తొలి జాబితాలో ప్రకటించే అవకాశాలున్నాయి. ఇక సాంగ్లీ ఎంపీ ప్రతీక్ పాటిల్, నాగపూర్ ఎంపీ విలాస్ ముత్తెంవార్, ధుళే మాజీ మంత్రి అమ్రీష్ పాటిల్‌ల పేర్లు కూడా మొదటి జాబితాలోనే వెల్లడించే అవకాశాలున్నాయి.