సాక్షి, యాదాద్రి : రాష్ట్రంలో టీఆర్‌ఎస్‌ ప్రభుత్వంపై ప్రజలకు అసంతృప్తి మొదలైందని కేంద్ర మాజీ మంత్రి, బీజేపీ సీనియర్‌ నేత బండారు దత్తాత్రేయ ఆరోపించారు. శుక్రవారమిక్కడ ఆయన మాట్లాడుతూ.. జిల్లాకు ఎయిమ్స్‌ మంజూరు చేసిన ఘనత కేంద్ర ప్రభుత్వానిదేనని, తామే కేం‍ద్రం ద్వారా నిధులను తీసుకొస్తున్నామని స్పష్టం చేశారు. అయితే రాష్ట్ర ప్రభుత్వం దీనికి అనుగుణంగా ఎలాంటి ప్రయత్నాలు చేయడం లేదని ఆగ్రహం వ్యక్తం చేశారు. మూసీ నది కాలుష్య నివారణలో తెలంగాణ ప్రభుత్వం విఫలమైందని, మూసీ పరివాహక రైతులకు వెంటనే నష్ట పరిహారం ఇవ్వాలని డిమాండ్‌ చేశారు. బునాదిగాని కాలువ పూర్తి చేయకపోవడం నాయకుల వైఫల్యమేనని విమర్శించారు. మిషన్‌ కాకతీయ ద్వారా ఎక్కడ చెరువులు నిండాయో శ్వేతపత్రం విడుదల చేయాలని డిమాండ్‌ చేశారు. అవినీతి పెరిగిపోతుంది నయీం కేసులో నిందితులకు శిక్ష అమలు చేసి, బాధితులకు వెంటనే న్యాయం చేయాలని దత్తాత్రేయ వ్యాఖ్యానించారు. తెలంగాణలో బీజేపీకి ఎదురు లేదని, బీజేపీ సభ్యత్వ నమోదు చూసి టీఆర్‌ఎస్‌ గుండెల్లో గుబులు పుడుతోందని ఎద్దేవా చేశారు. కేంద్ర ప్రభుత్వం పథకం ‘ఆయుష్మాన్‌ భవ’ రాష్ట్రంలో అమలు చేయకుండా తెలంగాణ ప్రభుత్వం అడ్డుపడుతుందని విమర్శించారు. రాష్ట్రంలో అవినీతి బాగా పెరిగిపోతుందని, ఆరోగ్య శ్రీ పేరిట జోరుగా అక్రమాలు జరుగుతున్నాయని ఆరోపించారు.

సాక్షి, న్యూఢిల్లీ : దేశంలో దారిద్య్ర రేఖకు దిగువనున్న పేద ప్రజలకు ఆరోగ్య భీమాను కల్పించేందుకు ఉద్దేశించిన ‘జాతీయ ఆరోగ్య భద్రతా పథకం (ఎన్‌హెచ్‌స్కీ)’ను ప్రధాని నరేంద్ర మోదీ బుధవారం నాడు పంధ్రాగస్టు సందర్భంగా ప్రారంభిస్తున్నారు. ఒక్కో కుటుంబానికి ఐదు లక్షల రూపాయల వరకు ఆరోగ్య భీమాను కల్పించే ఈ పథకానికి ప్రీమియం కూడా ఎక్కువే ఉంటుందని నిపుణులు భావిస్తున్నారు. ప్రత్యక్షంగా దేశంలోని పది వేల కుటుంబాలకు, సరాసరి సగటున కుటుంబంలో ఐదుగురు సభ్యులు ఉంటారనుకుంటే యాభై కోట్ల మందికి ఈ పథకం ద్వారా లబ్ధి చేకూరుతుందని ప్రభుత్వం భావిస్తోంది. అయితే ఈ పథకం చుట్టూ ఇప్పటికే పలు అనుమానాలు ముసురుకొని ఉన్నాయి. ‘ఆయుష్మాన్‌ భారత్‌’లో భాగమైన ఈ పథకం కింద మోదీ ప్రభుత్వం జారీ చేసిన మార్గదర్శకాలను ఇంతవరకు కొన్ని రాష్ట్రాలు మాత్రమే ఆమోదించగా ఇంకా పలు రాష్ట్రాలు ఆమోదించాల్సి ఉంది. ఇప్పటికే ఆయా రాష్ట్రాలు వివిధ పద్ధతుల్లో ఆరోగ్య భీమా పథకాలకు ఫలప్రదంగానే అమలు చేస్తుండడం వల్ల ఈ పథకాన్ని తమకు ఎలా అనుకూలంగా మలుచుకోవాలో అర్థంకాక తికమక పడుతున్నాయి. 2008 సంవత్సరం నుంచి కేంద్ర ప్రభుత్వం ‘రాష్ట్రీయ స్వస్థత ఆరోగ్య భీమా పథకాన్ని’ అమలు చేస్తోంది. ప్రతి పేద కుటుంబానికి 30 వేల వరకు ఆరోగ్య భీమాను కల్పిస్తున్న ఈ పథకానికి 750 రూపాయలను ప్రీమియంగా చెల్లిస్తున్నారు. ఈ పథకం కింద కేంద్రం 75 శాతం వాటా నిధులను భరిస్తుంటే రాష్ట్రం 25 శాతం నిధులను భరిస్తోంది. ఐదులక్షల రూపాయల కవరేజ్‌ గల కొత్త పథకం వచ్చాక ఈ పాత పథకాన్ని రద్దు చేస్తారా, లేదా అన్న విషయంలో ఇంకా స్పష్టత లేదు. ఈ రాష్ట్రీయ స్వస్థత ఆరోగ్య భీమా పథకాన్ని మాత్రమే ఉత్తరాది రాష్ట్రాలు, అది కూడా అరకొరగా అమలు చేస్తుంటే, దక్షిణాది, ఈశాన్య రాష్ట్రాలు సవ్యంగా అమలు చేస్తున్నాయి. ముఖ్యంగా దక్షిణాది రాష్ట్రాలు సొంత ఆరోగ్య పథకాలతో మిలితం చేసి మరింత పటిష్టంగా అమలు చేస్తున్నాయి. తెలంగాణ, ఆంధ్రప్రదేశ్, తమిళనాడు, కేరళ, కర్ణాటక రాష్ట్రాల్లో లక్ష రూపాయల నుంచి రెండు లక్షల రూపాయల వరకు భీమా కవర్‌తో ఆరోగ్య శ్రీ, పేదల ఆరోగ్య భీమా పథకాలను అమలు చేస్తున్నాయి. కేంద్రం కొత్త పథకాన్ని స్వీకరించి ఇప్పటి వరకు తాము అమలు చేస్తున్న ఆరోగ్య పథకాలను మూలన పడేయాలా? అన్న సందిగ్ధంలో ఈ రాష్ట్రాలు కొట్టుమిట్టాడుతున్నాయి. కేంద్ర ప్రతిపాదిత ఐదు లక్షల ఆరోగ్య భీమాకు 1,082 రూపాయలను కేంద్రం ప్రీమియంగా నిర్ణయించింది. అయితే ఏ భీమా కంపెనీ ఈ ప్రీమియంకు ఒప్పుకోదని, ప్రీమియంగా ఇంతకన్నా 63 శాతం ఎక్కువగా అంటే, 1,765 రూపాయలను చెల్లించాల్సి వస్తుందని ‘క్రిసిల్‌’ ఓ నివేదికలో వెల్లడించింది. ఇప్పటికే జాతీయ ఆరోగ్య భద్రతా పథకంలో కేంద్రం 60 శాతం భరిస్తుండగా, రాష్ట్రాలు 40 శాతం నిధులను భరించాలన్నది తెల్సిందే. ఈ అదనపు ప్రీమియం కూడా రాష్ట్రాలే భరించాల్సి రావచ్చు. కేరళలో 41 లక్షల మంది పేదలకు ప్రస్తుతం ఆరోగ్య భీమాను అమలు చేస్తున్నారు. ఇప్పుడు కేంద్ర ప్రభుత్వం స్కీమ్‌లో అక్కడ 22 లక్షల మంది పేదలకు మాత్రమే ఈ స్కీమ్‌ను అమలు చేయాలని సీలింగ్‌ పెట్టారు. ఈ లెక్కన అక్కడి రాష్ట్ర ప్రభుత్వం ప్రస్తుతం అమలు చేస్తున్న 41 లక్షల మందికి కొత్త పథకాన్ని అమలు చేయాలంటే 19 లక్షల మందికి స్వయంగా ప్రీమియం మొత్తాన్ని చెల్లించాల్సి వస్తుంది. 25 కోట్లకుగాను, 3.6 కోట్ల మందికే కేంద్రం ఇప్పటికే అమలు చేస్తున్న ‘రాష్ట్రీయ స్వస్థత భీమా యోజన’ను దేశవ్యాప్తంగా 25 కోట్ల మందికి అమలు చేయాలని లక్ష్యంగా పెట్టుకోగా, కేవలం 3.6 కోట్ల మందికి మాత్రమే అమలు చేస్తున్నారు. ఈ పథకం కింద దారిద్య్ర రేఖకు దిగువనున్న వారికే కాకుండా రోజువారి దినసరి కూలీలు, ఇంటి పనివాళ్లు, భవన నిర్మాణ కూలీలు, వీధుల్లో వ్యాపారం చేసుకునేవారు, రైల్వే పోర్టర్లు, బీడి కార్మికులు, పారిశుద్ధ పనివాళ్లు, రిక్షా కార్మికులు....ఇలా అసంఘటిత రంగానికి చెందిన ప్రతి ఒక్కరు అర్హులైనప్పటికీ 3.6 కోట్ల మందికి మించి అమలు జరగడం లేదు. ఇప్పుడు దారిద్య్ర రేఖకు దిగువనున్న పది కోట్ల మందికి మాత్రమే అమలు చేయాలనుకుంటున్న కొత్త ఆరోగ్యం పథకం రెండు కోట్ల మందికి దాటటం కూడా మహా ఎక్కువన్నది నిపుణుల అంచనా. కార్పొరేట్‌ ఆస్పత్రలు కోసమే ఉత్తరాదిలో కార్పొరేట్‌ వైద్యం అంతగా విస్తరించలేదు. అక్కడ ఆరోగ్య భీమా పథకాలు అంతంత మాత్రమవడం కూడా ఒక కారణం. ఇటు దక్షిణాదిలో కార్పొరేట్‌ ఆస్పత్రులు విస్తరించినప్పటికీ గ్రామీణ ప్రాంతాలకు అవి ఇప్పటికీ దూరంగా ఉన్నాయి. కార్పొరేట్‌ వైద్యం ఖరీదవడం వల్ల గ్రామీణ ప్రాంతాల్లో అవి నిలదొక్కుకోలేక పోతున్నాయి. ఇప్పుడు కేంద్రం ప్రవేశ పెట్టిన ఐదు లక్షల భద్రతా పథకం వల్ల కార్పొరేట్‌ ఆస్పత్రులు గ్రామీణ ప్రాంతాలకు దూసుకుపోతాయని, అందుకోసమే మోదీ ప్రభుత్వం ఈ స్కీమ్‌ను తీసుకొస్తున్నదని బెంగళూరులోని ఇనిస్టిట్యూట్‌ ఆఫ్‌ పబ్లిక్‌ హెల్త్‌ సహ వ్యవస్థాపకులు, డైరెక్టర్‌ ఎన్‌. దేవదాసన్‌ లాంటి వాళ్లు విమర్శిస్తున్నారు. మూడు లక్షలు చాలు తమిళనాడులో ఏటా 72 వేల రూపాయలకన్నా తక్కువ ఆదాయం కలిగిన పేద ప్రజల కోసం రెండు రకాల ఆరోగ్య భీమా పథాన్ని అమలు చేస్తున్నారు. 1205 రకాల వైద్యానికి లక్ష రూపాయలు, 254 రకాల వైద్యానికి రెండు లక్షల రూపాయలను అమలు చేస్తున్నారు. 2009 నుంచి ఈ పథకం సవ్యంగా అమలు జరుగుతున్నది. మహారాష్ట్రలో ఒకటిన్నర లక్షల రూపాయను, రాజస్థాన్‌లో మైనర్‌ వైద్యానికి 30 వేల రూపాయలను మేజర్‌ వైద్యానికి మూడు లక్షల రూపాయలను బీమాను అమలు చేస్తున్నారు. ఈ లెక్కన మోదీ ప్రారంభిస్తున్న జాతీయ ఆరోగ్య భీమా స్కీమ్‌ కింద మూడు లక్షల రూపాయల భీమాను కల్పిస్తే సరిపోతుందని జిందాల్‌ గ్లోబల్‌ యూనివర్శిటీలోని ‘స్కూల్‌ ఆఫ్‌ గవర్నమెంట్‌ అండ్‌ పబ్లిక్‌ పాలసీ’ అసోసియేట్‌ ప్రొఫెసర్‌ ఇంద్రానిల్‌ ముఖోపాధ్యాయ్‌ అభిప్రాయపడ్డారు. క్యాన్సర్, అవయవ మార్పిడి కాస్ట్లీ..! క్యాన్సర్, గుండె, కిడ్నీల మార్పిడి లాంటి శస్త్ర చికిత్సలకే ఐదు లక్షల రూపాయలకు మించి ఖర్చు అవుతుంది. మిగితా జబ్బులన్నింటికి మూడు లక్షల కవరేజ్‌తోని వైద్యం చేయవచ్చని నిపుణులు తెలియజేస్తున్నారు. ఎక్కువ ఖర్చయ్యే వైద్యం కోసం ఎక్కువ కవరేజీ, తక్కువ ఖర్చయ్యే వాటికి తక్కువ కవరేజ్‌తో భీమా పథకాలను అమలు చేయడం ఉత్తమమని నిపుణులు అభిప్రాయపడుతున్నారు. ఎక్కువ కవరేజీ వల్ల కార్పొరేట్‌ ఆస్పత్రులు లాభ పడడమే కాకుండా అనవసరమైన పరీక్షలు, చికిత్సలు చేస్తాయని వారు ఆందోళన వ్యక్తం చేస్తున్నారు. కేంద్ర ప్రభుత్వ ‘రాష్ట్రీయ స్వస్థత భీమా యోజన’ కింద 2011లో బీహార్‌లో 700 మంది మహిళలకు అనవసరంగా కార్పొరేట్‌ ఆస్పత్రులు  శస్త్ర చికిత్సలు చేసి గర్భసంచులు తొలగించారు. ఇలాంటి కేసులు ఆంధ్రప్రదేశ్, కర్ణాటక, రాజస్థాన్, చత్తీస్‌గ«ఢ్‌లలోనూ వెలుగు చూశాయి. 1996 నుంచి 2014 మధ్య కార్పొరేట్‌ వైద్యం మరీ ఖరీదై పోయిందని ఓ ఆధ్యయనం తెలియజేయగా, ఏటా ఎనిమిది శాతం మంది మధ్య తరగతి ప్రజలు వైద్యం కారణంగా పేదవారుగా మారిపోతున్నారని మరో అధ్యయనం వెల్లడించింది.

చ‌ర‌ణ్ తేజ్ హీరోగా త‌న స్వీయ ద‌ర్శక‌త్వంలో తెరకెక్కిస్తున్న సినిమా ఆయుష్మాన్‌ భవ. నేను లోక‌ల్ ఫేం త్రినాథ్ రావు న‌క్కిన కథ అందిస్తూ దర్శకత్వ పర్యవేక్షణ చేస్తున్న ఈ సినిమాకు మరో యువ దర్శకుడు మారుతి సహ నిర్మాతగా వ‍్యవహరిస్తున్నారు. సీనియర్ రచయిత పరుచూరి బ్రదర్స్‌ ఈ సినిమాకు స్క్రీన్‌ప్లే సమకూరుస్తుండటం విశేషం. బాలీవుడ్‌ లో బేబీ డాళ్‌, హ్యాంగ్ ఓవర్‌, హైహీల్స్‌ లాంటి చిత్రాలకు సంగీతమందించిన బ్రోస్‌ ఈ చిత్రానికి సంగీతమందిస్తున్నారు. చరణ్‌ తేజ్‌ సరసన స్నేహా ఉల్లాల్‌ హీరోయిన్‌గా నటిస్తుండగా మరో కీలక పాత్రలో కోలీవుడ్ బ్యూటీ ఆండ్రియా అలరించనున్నారు. అది కూడా పాప్‌ సింగర్‌ జెన్నిఫర్‌ పాత్రలో ఆండ్రియా కనిపించనున్నారు. ప్రేమ పట్ల సమాజం వ్యవహరిస్తున్న తీరు నేపథ్యంలో ఈ సినిమా తెరకెక్కుతోంది. ఇప్పటికే విడుదల చేసిన  దీర్ఝ ఆయుష్మాన్ భవ టీజర్ కు మంచి రెస్పాన్స్ వచ్చింది. త్వర‌లో జెన్నీఫర్‌గా ఆండ్రియా లుక్‌ను విడుదల చేసేందుకు ప్లాన్ చేస్తున్నారు.

చరణ్‌తేజ్‌ హీరోగా నటిస్తూ, దర్శకత్వం వహిస్తున్న చిత్రం ‘ఆయుష్మాన్‌ భవ’, స్నేహా ఉల్లాల్‌ కథానాయిక. ‘నేనులోకల్‌’ చిత్ర దర్శకుడు త్రినాథ్‌రావు నక్కిన కథ, దర్శకత్వ పర్యవేక్షణలో, దర్శకుడు మారుతి సహ నిర్మాతగా సి.టి.ఎఫ్‌ నిర్మాణ సంస్థ నిర్మిస్తోన్న ఈ చిత్రం చివరి షెడ్యూల్‌ జరుపుకుంటోంది. ఈ సందర్భంగా చరణ్‌ తేజ్‌ మాట్లాడుతూ–‘‘సమాజం ప్రేమను చూసే పద్ధతి మారాలి అనే కమర్షియల్‌ పాయింట్‌తో తెరకెక్కుతోన్న చిత్రమిది. ప్రేమించిన అమ్మాయి కులం, మతం వేరైతే మర్చిపోవాలా? పారిపోవాలా? చచ్చిపోవాలా? ప్రపంచం ఏమైతే నాకేంటి. సమాజం ప్రేమను చూసే విధానం మారాలి.. లేదంటే చంపేస్తా. అనుకునే హీరో క్యారెక్టర్‌తో ఈ చిత్రం రూపుదిద్దుకుంటోంది. ఈ సినిమా ద్వారా స్నేహా ఉల్లాల్‌ టాలీవుడ్‌కి రీ ఎంట్రీ ఇస్తున్నారు. మరో తెలుగు టాప్‌ హీరోయిన్‌ కీలక పాత్రలో నటిస్తున్నారు. పరుచూరి బ్రదర్స్, త్రినాథ్‌రావు నక్కిన స్క్రీన్‌ప్లే బాగుంటుంది.  నవంబర్‌ 9న సినిమా విడుదల చేస్తాం’’ అన్నారు. ఈ చిత్రానికి సంగీతం: మీట్‌ బ్రోస్, కెమెరా: దాసరధి శివేంద్ర, అసోసియేట్‌ ప్రొడ్యూసర్స్‌ : బి.ఏ.శ్రీనివాసరావు, హేమరత్న.

చరణ్‌ తేజ్‌ హీరోగా నటిస్తూ, దర్శకత్వం వహించిన చిత్రం ‘ఆయుష్మాన్‌ భవ’. స్నేహా ఉల్లాల్‌ కథానాయిక. ‘నేను లోకల్‌’ చిత్రదర్శకుడు త్రినాథ్‌రావు నక్కిన కథ అందించడంతో పాటు దర్శకత్వ పర్యవేక్షణ చేశారు. దర్శకుడు మారుతి సహ నిర్మాతగా సి.టి.ఎఫ్‌ నిర్మాణంలో తెరకెక్కిన ఈ చిత్రం పోస్ట్‌ ప్రొడక్షన్‌ పనులు జరుపుకుంటోంది. ఈ నెల 21న రచయిత పరుచూరి వెంకటేశ్వరరావు 75వ జన్మదినోత్సవాన్ని పురస్కరించుకుని ఈ సినిమా టీజర్‌ను విడుదల చేయనున్నారు. ఈ సందర్భంగా చరణ్‌ తేజ్‌ మాట్లాడుతూ– ‘‘ప్రేమించిన అమ్మాయి కులం, మతం వేరైతే మర్చిపోవాలా? పారిపోవాలా? చచ్చిపోవాలా? ప్రపంచం ఏమైతే నాకేంటి? సమాజం ప్రేమని చూసే విధానం మారాలి.. లేకపోతే చంపేస్తా.. అనుకునే హీరో క్యారెక్టరైజేషన్‌తో ఈ చిత్రం తెరకెక్కింది. ఫస్ట్‌ లుక్‌ పోస్టర్‌కు అద్భుతమైన స్పందన లభించింది. బాలీవుడ్‌ మ్యూజిక్‌ డైరెక్టర్‌ మీట్‌ అందించిన ఆడియోను యూత్‌ ఎంజాయ్‌ చేస్తున్నారు’’ అన్నారు. హుజన్, పరుచూరి వెంకటేశ్వరావు, రంగరాజన్, అశ్విన్, నిఖిత నటించిన ఈ చిత్రానికి అసోసియేట్‌ ప్రొడ్యూ సర్స్‌: బి.ఏ.శ్రీనివాసరావు, హేమరత్న, కథనం: పరుచూరి బ్రదర్స్, కెమెరా: దాశరథి శివేంద్ర.

‘‘మనకి నచ్చిన అబ్బాయి మనవాళ్లకి నచ్చకపోతే ప్రాబ్లమ్‌ వాళ్ళది.. దానికి మనం ఎందుకు సూసైడ్‌ చేసుకోవాలి? తప్పు.. అలా అని పారిపోతే పిరికితనం.. ఓడిపోతే చేతకానితనం... ఇదే జీవితమా?’’ అనే మాటలు ‘ఆయష్మాన్‌భవ’ చిత్రంపై ఆసక్తి పెంచుతున్నాయి. చరణ్‌ తేజ్‌ హీరోగా నటించి, దర్శకత్వం వహించిన చిత్రం ‘ఆయష్మాన్‌భవ’. దర్శకుడు త్రినాథ్‌రావు నక్కిన కథ అందించి, దర్శకత్వ పర్యవేక్షణ చేయగా, మరో దర్శకుడు మారుతి సహ నిర్మాతగా వ్యవహరిస్తున్నారు. స్నేహా ఉల్లాల్‌ ఓ కథానాయిక. మరో హీరోయిన్‌ హుజన్‌ పుట్టినరోజు సందర్భంగా ఈ చిత్రంలో ఆమె చేసిన సారా పాత్ర మొదటి లుక్‌ విడుదల చేశారు.ఆ పోస్టర్‌లోనే పై విధంగా రాశారు. చరణ్‌ తేజ్‌ మాట్లాడుతూ– ‘‘సమాజం ప్రేమని చూసే పద్ధతి మారాలి’ అనే కమర్షియల్‌ పాయింట్‌తో తెరకెక్కించిన చిత్రమిది. మా చిత్రానికి పరుచూరి బ్రదర్స్‌ చక్కని కథ ఇచ్చారు. బాలీవుడ్‌ సంగీత దర్శకుడు మీట్‌ బ్రోస్‌ అద్భుతమైన సంగీతం అందించారు. ఈ వేసవిలో సినిమాను విడుదల చేయడానికి సన్నాహాలు చేస్తున్నాం’’ అన్నారు. ఈ చిత్రానికి ప్రొడక్షన్‌ హౌస్‌ అండ్‌ ప్రొడ్యూసర్‌: సి.టి.ఎఫ్, అసోసియేట్‌ ప్రొడ్యూసర్స్‌: బి.ఎ.శ్రీనివాసరావు, హేమరత్న, కెమెరా: దాశరథి శివేంద్ర.

ధనలక్ష్మీ గుర్తుందా? అదేనండి... ‘ఉల్లాసంగా ఉత్సాహంగా’ సినిమాలో ఈ పేరుతోనే హీరోయిన్‌గా పరిచయమయ్యారు స్నేహా ఉల్లాల్‌. ఆ సినిమా తర్వాత ‘నేను మీకు తెలుసా’, ‘సింహా’, ‘అలా... మొదలైంది’, ‘మడత కాజా’, యాక్షన్‌ 3డీ’ వంటి చిత్రాల్లో నటించిన ఈ తేనెకళ్ల సుందరి కొన్ని కారణాల వల్ల సిల్వర్‌ స్క్రీన్‌కు దూరమయ్యారు. ఆల్మోస్ట్‌ త్రీ ఇయర్స్‌ తర్వాత  ‘ఆయుష్మాన్‌ భవ’ సినిమాతో తెలుగు తెరపై మరోమారు మెరవనున్నారు. సోమవారం ఆమె పుట్టినరోజు సందర్భంగా చిత్రబృందం సినిమాలోని పోస్టర్‌ను రిలీజ్‌ చేశారు. ‘‘ఏంటి? వైశాలి అంటే ట్రెడిషనల్‌ అనుకుంటున్నారా..? పిచ్చ పోష్‌! ఫిగర్‌ అదరిపోద్ది’’ అని ఈ పోస్టర్‌పై ఉండటం విశేషం. సో.. ఈ సినిమాలో స్నేహా ఉల్లాల్‌ పేరు వైశాలి అని అర్థమైంది కదా. ఇదిలా ఉంటే.. ఈ ఏడాది మంచి హిట్స్‌లో ఒకటి నిలిచిన నాని ‘నేను లోకల్‌’ దర్శకుడు త్రినాథరావు నక్కిన దర్శకత్వం వహిస్తారన్న వార్తలు వచ్చిన నేపథ్యంలో ‘సాక్షి’ ఆయన్ను సంప్రదించగా ‘‘ఈ సినిమాతో నాకు ఎటువంటి సంబంధం లేదు. హీరో రామ్‌తో ఓ లవ్‌స్టోరీ సినిమా చేయనున్నాను. ఫిబ్రవరిలో రెగ్యులర్‌ షూటింగ్‌ స్టార్ట్‌ చేయాలనుకుంటున్నాం’’ అన్నారు త్రినాథరావు.


 కళ్లు బాగున్నాయి... అమలా పాల్‌ కళ్లు ఎంతో బాగున్నాయి! ఆమె కళ్లలో ఏదో కనికట్టు ఉందంటున్నారు కొత్త దర్శకుడు చరణ్‌తేజ్‌. అదేంటి? అమలా పాల్‌ కళ్లు గురించి అంతలా చెబుతున్నారేంటి అనుకుంటున్నారా! బురఖాలోని అమలా పాల్‌ కళ్లనే ఆయన ఎక్కువసేపు ఊహించుకుంటున్నారు. చరణ్‌తేజ్‌ హీరోగా నటించి, దర్శకత్వం వహించనున్న ‘ఆయుష్మాన్‌ భవ’లో అమలా పాల్‌ ముస్లిమ్‌ అమ్మాయి పాత్రలో నటించనున్నారు.
 
 ఆల్మోస్ట్‌ రెండేళ్ల తర్వాత ఈ మలయాళీ కుట్టి సంతకం చేసిన స్ట్రయిట్‌ తెలుగు చిత్రమిది. ‘‘హిందూ అబ్బాయి, ముస్లిమ్‌ అమ్మాయి ప్రేమకథతో రూపొందనున్న ఈ సినిమాలో మధ్య తరగతి కుటుంబాల జీవితాలనూ ఆవిష్కరించనున్నాం. ఏప్రిల్‌ 15న చిత్రీకరణ ప్రారంభిస్తాం’’ అన్నారు చరణ్‌తేజ్‌. ఈ సినిమాలో స్నేహా ఉల్లాల్‌ హీరో స్నేహితురాలి పాత్రలో నటిస్తారనీ, ఓ ప్రత్యేక గీతంలో కూడా సందడి చేస్తారనీ ఆయన తెలిపారు. అంతే కాదండోయ్‌... ప్రముఖ శృంగార తార సన్నీ లియోన్‌ చేత మరో ప్రత్యేక గీతం చేయించేందుకు చరణ్‌ తేజ్‌ చర్చలు జరుపుతున్నారట.