రానా హీరోగా ‘హిరణ్య కశ్యప’ అనే చిత్రం రూపొందనున్న సంగతి తెలిసిందే. ప్రస్తుతం అమెరికాలో జరుగుతున్న ‘కామిక్‌ కాన్‌ – 2023’ వేడుకల్లో భాగంగా రానా ‘హిరణ్య కశ్యప’ను ప్రకటించారు. దర్శకుడు త్రివిక్రమ్‌ ఈ సినిమాకు కథ అందిస్తున్నారు. అలాగే ఈ సినిమాకు రానా ఓ నిర్మాతగా కూడా వ్యవహరించనున్నట్లు తెలుస్తోంది. అమర్‌ చిత్రకథల ఆధారంగా ఈ చిత్రం రూపొందనుంది. ఇక గతంలో రానాతో ‘హిరణ్య కశ్యప’ తెరకెక్కిస్తానని గుణశేఖర్‌ ప్రకటించిన సంగతి తెలిసిందే. మరి.. ఆయన దర్శకత్వం లోనే ఈ ‘హిరణ్య కశ్యప’ ఉంటుందా? అనేది తెలియాల్సి ఉంది.

‘గుంటూరు కారం’ సినిమాలో హీరోయిన్‌ మీనాక్షీ చౌదరి నటించనున్నారనే టాక్‌ ఫిల్మ్‌నగర్‌లో వినిపిస్తోంది. హీరో మహేశ్‌బాబు, దర్శకుడు త్రివిక్రమ్‌ కాంబినేషన్‌లో రూపొందుతున్న తాజా చిత్రం ‘గుంటూరు కారం’. కథ రీత్యా ఈ చిత్రంలో ఇద్దరు హీరోయిన్స్‌కు చాన్స్‌ ఉంది. పూజా హెగ్డే, శ్రీలీలను ఎంపిక చేశారు. అయితే డేట్స్‌ సర్దుబాటు చేయలేక ఈ సినిమా నుంచి తప్పుకున్నారు పూజా హెగ్డే. దీంతో పూజా ప్లేస్‌లోకి మరో హీరోయిన్‌ను ఎంపిక చేసే పనిలో పడింది టీమ్‌. ఈ నేపథ్యంలో తాజాగా మీనాక్షీ చౌదరి పేరు వినిపిస్తోంది. రవితేజ ‘ఖిలాడి’, అడివి శేష్‌ ‘హిట్‌ 2’ వంటి సినిమాలతో మీనాక్షీ చౌదరి తెలుగు ప్రేక్షకులకు సుపరిచితురాలే. ప్రస్తుతం విశ్వక్‌ సేన్‌ హీరోగా నటిస్తున్న ఓ చిత్రంలో ఈ బ్యూటీ నటిస్తున్నారు. మరి.. ‘గుంటూరు కారం’లో మహేశ్‌కు జోడీగా నటించే బంపర్‌ ఆఫర్‌ని మీనాక్షీ కొట్టేస్తారా? చూడాలి.

‘గుంటూరు కారం’ సెట్స్‌లోకి మహేశ్‌బాబు మరోసారి అడుగుపెట్టడానికి ఇంకాస్త సమయం పట్టేలా ఉంది. మహేశ్‌బాబు, దర్శకుడు త్రివిక్రమ్‌ కాంబినేషన్‌లో రూపొందుతున్న తాజా చిత్రం ‘గుంటూరు కారం’. హారిక అండ్‌ హాసినీ క్రియేషన్స్‌ పతాకంపై ఎస్‌.రాధాకృష్ణ నిర్మిస్తున్నారు. ఈ చిత్రంలో పూజా హెగ్డే, శ్రీలీల హీరోయిన్లుగా నటిస్తున్నారు. కాగా ఈ సినిమా తాజా షెడ్యూల్‌ చిత్రీకరణ ఈ నెల రెండో వారంలో ప్రారంభం కావాల్సి ఉంది. కానీ జూలై మొదటి వారంలో ప్రారంభించాలని యూనిట్‌ భావిస్తోందని ఫిల్మ్‌నగర్‌ సర్కిల్స్‌లో వినిపిస్తోంది. అలాగే జూలైలో ప్రారంభమయ్యే కొత్త షెడ్యూల్‌ చిత్రీకరణ నాన్‌స్టాప్‌గా దాదాపు 40రోజులకుపైగా జరుగుతుందనే టాక్‌ కూడా వినిపిస్తోంది. ఈ చిత్రాన్ని సంక్రాంతి సందర్భంగా జనవరి 13న విడుదల చేయనున్నట్లు గతంలో మేకర్స్‌ ప్రకటించిన సంగతి తెలిసిందే.

హీరో మహేశ్‌బాబు ఫ్యాన్స్‌కు గుడ్‌ న్యూస్‌. మహేశ్‌బాబు హీరోగా నటిస్తున్న తాజా సినిమా టైటిల్‌ను సూపర్‌స్టార్‌ కృష్ణ జయంతి సందర్భంగా ఈ నెల 31న అధికారికంగా ప్రకటించనున్నట్లు  చిత్ర యూనిట్‌ వెల్లడించింది. ఎంపిక చేసిన కొన్ని థియేటర్స్‌లో మహేశ్‌బాబు ఫ్యాన్స్‌ చేతుల మీదగా ఈ సినిమా టైటిల్‌ గ్లింప్స్‌ వీడియోను విడుదల చేసేలా చిత్ర యూనిట్‌ సన్నాహాలు చేస్తోంది. ‘అతడు’, ‘ఖలేజా’ చిత్రాల తర్వాత హీరో మహేశ్‌బాబు, దర్శకుడు త్రివిక్రమ్‌ కాంబినేషన్‌లో వస్తున్న లేటెస్ట్‌ ఫిల్మ్‌ ఇది. ఎస్‌. రాధాకృష్ణ (చినబాబు) ఈ సినిమాను నిర్మిస్తున్నారు. ఈ చిత్రంలో పూజా హెగ్డే, శ్రీలీల హీరోయిన్లుగా నటిస్తున్నారు. జూన్‌ మొదటివారంలో ఈ సినిమా కొత్త షెడ్యూల్‌ ఆరంభం కానున్నట్లు తెలిసింది. కాగా ఇప్పటివరకు ఈ సినిమాకు సంబంధించి విభిన్న రకాల టైటిల్స్‌ తెరపైకి వచ్చినప్పటికీ ‘గుంటూరు కారం’, ‘ఊరికి మొనగాడు’ టైటిల్స్‌లో ఏదొకటి ఖరారు అయ్యే చాన్స్‌ ఉందని సమాచారం. మరి.. వేరే ఏదైనా టైటిల్‌ తెర పైకి వస్తుందా? అనేది చూడాలి. తమన్‌ సంగీతం అందిస్తున్న ఈ సినిమా సంక్రాంతి సందర్భంగా జనవరి 13న విడుదల కానుంది.  

హీరో అల్లు అర్జున్ , దర్శకుడు త్రివిక్రమ్‌ కాంబినేషన్ లో వచ్చిన  ‘జులాయి’, ‘సన్నాఫ్‌ సత్యమూర్తి’, ‘అల.. వైకుంఠపురములో..’ సినిమాలకు మంచి ప్రేక్షకాదరణ లభించింది. వీరి కాంబినేషన్ లో మరో సినిమా వచ్చే ఏడాది సెట్స్‌పైకి వెళ్లనున్నట్లు తెలుస్తోంది. ఇటీవల త్రివిక్రమ్‌ చెప్పిన ఓ స్టోరీ లైన్  అల్లు అర్జున్ కు బాగా నచ్చిందట. దీంతో త్రివిక్రమ్‌తో సినిమా చేసేందుకు అల్లు అర్జున్  గ్రీన్  సిగ్నల్‌ ఇచ్చారని విశ్వసనీయ వర్గాల సమాచారం. ఈ చిత్రాన్ని గీతా ఆర్ట్స్‌ నిర్మించనుందట. ప్రస్తుతం ‘పుష్ప: ది రూల్‌’తో బిజీగా ఉన్నారు అల్లు అర్జున్ . ఇటు మహేశ్‌బాబు సినిమాతో త్రివిక్రమ్‌ బిజీ. సో... వీరి కమిట్‌మెంట్స్‌ పూర్తయ్యాక అల్లు అర్జున్ , త్రివిక్రమ్‌ సినిమా సెట్స్‌కి వెళ్లే అవకాశం ఉంటుందేమో?

‘అతడు’, ‘ఖలేజా’ చిత్రాల తర్వాత దాదాపు పన్నెండేళ్ల అనంతరం హీరో మహేశ్‌బాబు, దర్శకుడు త్రివిక్రమ్‌ కాంబినేషన్‌లో ఓ కొత్త సినిమా రూపొందుతున్న సంగతి తెలిసిందే. ఈ చిత్రంలో పూజా హెగ్డే హీరోయిన్‌గా నటిస్తున్నారు. హారిక అండ్‌ హాసినీ క్రియేషన్స్‌ పతాకంపై ఎస్‌.రాధాకృష్ణ (చినబాబు) నిర్మిస్తున్నారు. ఈ సినిమా తొలి షెడ్యూల్‌ చిత్రీకరణ ముగిసింది. ఈ షెడ్యూల్‌లో యాక్షన్‌ సన్నివేశాలను చిత్రీకరించారు. అయితే ఈ నెల 9న ఆరంభం కావాల్సిన ఈ సినిమా సెకండ్‌ షెడ్యూల్‌ వాయిదా పడింది. అనుకోకుండా మహేశ్‌బాబు తల్లి ఇందిరా దేవి మృతి చెందడంతో ఈ సినిమా షూటింగ్‌కు తాత్కాలికంగా బ్రేక్‌ పడింది. కాగా నవంబరు మొదటివారంలో ఈ సినిమా రెండో షెడ్యూల్‌ను ఆరంభించాలనుకుంటున్నారట. గత వారం ఓ యాడ్‌ షూట్‌లో పాల్గొన్న మహేశ్‌బాబు ప్రస్తుతం ఫారిన్‌ టూర్‌లో ఉన్నారు. మహేశ్‌ తిరిగి హైదరాబాద్‌కు రాగానే ఈ సినిమా షూటింగ్‌ స్టార్ట్‌ అవుతుంది. ఈ సెకండ్‌ షెడ్యూల్‌లో మహేశ్, పూజాలపై కీలక సన్నివేశాలను చిత్రీకరించనున్నారు. తమన్‌ సంగీతం అందిస్తున్న ఈ సినిమా వచ్చే ఏడాది ఏప్రిల్‌ 28న విడుదల కానుంది. 

‘అతడు’(2005), ‘ఖలేజా’ (2010) చిత్రాల తర్వాత హీరో మహేశ్‌బాబు, దర్శకుడు త్రివిక్రమ్‌ కాంబినేషన్‌లో మరో సినిమా తెరకెక్కుతోన్న సంగతి తెలిసిందే. పూజా హెగ్డే హీరోయిన్‌. హారిక అండ్‌ హాసినీ క్రియేషన్స్‌ పతాకంపై చినబాబు (ఎస్‌.రాధాకృష్ణ) నిర్మిస్తున్న ఈ మూవీ తొలి షెడ్యూల్‌ షూటింగ్‌ పూర్తయింది. దసరా తర్వాత ప్రారంభమయ్యే మలి షెడ్యూల్‌లో మహేశ్, పూజలపై సన్నివేశాలు చిత్రీకరించనున్నారు. ఈ సినిమా టైటిల్‌గా గతంలో ‘పార్థు’, ‘అర్జునుడు’ అనే పేర్లు తెరపైకి వచ్చాయి. తాజాగా ‘అయోధ్యలో అర్జునుడు’ అనే టైటిల్‌ను యూనిట్‌ పరిశీలిస్తోందని టాక్‌. త్రివిక్రమ్‌ దర్శకత్వంలో వచ్చిన గత నాలుగు చిత్రాలు (అఆ, అజ్ఞాత వాసి, అరవిందసమేత వీర రాఘవ, అల..వైకుంఠపురములో..) టైటిల్స్‌ ‘అ’ అక్షరంతోనే మొదలయ్యాయి. దీంతో మహేశ్, త్రివిక్రమ్‌ కాంబినేషన్‌లోని తాజా చిత్రం టైటిల్‌ కూడా ‘అ’ తోనే మొదలవుతుందనే ఊహాగానాలు వినిపిస్తున్నాయి. వచ్చే ఏడాది ఏప్రిల్‌ 28న ఈ చిత్రాన్ని రిలీజ్‌ చేస్తున్నట్లు యూనిట్‌ ప్రకటించింది.


 ‘‘నేను దర్శకుడి కంటే ముందు రచయితను. అంతకంటే ముందు ఓ మధ్య తరగతి మనిషిని. మన ఆలోచనలు గొప్పవైతే గొప్పగా ఎదుగుతాం. తక్కువైతే వెనకబడిపోతాం. ప్రపంచం బాగుండాలంటే ఇద్దరు మనుషులు మనసు విప్పి మాట్లాడుకోవాలి. మామూలు కథను బలంగా చెప్పాలనుకుని ఈ చిత్రం చేశా. బూతులు లేని వినోదం పంచడానికి మొదటి నుంచీ నేను ప్రయత్నిస్తున్నా. అందుకే కొంచెం ఆలస్యమైనా మంచినే చెప్పాలనిపిస్తుంది. బిర్యానీ, మసాలాలు తిన్న మనకు ఫుడ్ పాయిజినింగ్ అయితే డాక్టరు చారన్నం తినమంటాడు.
 
 నా దృష్టిలో ఈ చిత్రం చారన్నంలాంటిది’’ అని దర్శకుడు త్రివిక్రమ్ అన్నారు. నితిన్, సమంత, అనుపమా పరమేశ్వరన్ ముఖ్య తారలుగా త్రివిక్రమ్ దర్శకత్వంలో ఎస్.రాధాకృష్ణ (చినబాబు) నిర్మించిన ‘అ..ఆ...’ ఇటీవల విడుదలైన విషయం తెలిసిందే. ఈ చిత్రం విజయోత్సవాన్ని గుంటూరులో నిర్వహించారు. ఈ సందర్భంగా నితిన్ మాట్లాడుతూ -‘‘ ‘సై’ చిత్రం తర్వాత మళ్లీ ఇప్పుడు గుంటూరుకు వచ్చా. ‘అ.. ఆ’ చిత్రంలో నటించిన ప్రతి ఆర్టిస్ట్‌కు సమానంగా పేరొచ్చింది.
 
 ఈ చిత్రానికి అసలైన  హీరో త్రివిక్రమ్‌గారే. ఈ విజయం నాకెంతో కీలకం. ఈ చిత్రాన్ని ఇంత పెద్ద హిట్ చేసిన ప్రేక్షకులకు ధన్యవాదాలు’’ అని తెలిపారు. ‘‘నితిన్‌ను యాభై కోట్ల క్లబ్‌లోకి తీసుకెళ్లినందుకు త్రివిక్రమ్ గారికి థ్యాంక్స్. నితిన్ టార్గెట్ ఇప్పుడు వంద కోట్లు’’ అని నిర్మాత ‘దిల్’ రాజు అన్నారు. త్రివిక్రమ్, రాధాకృష్ణ, నిర్మాత సూర్యదేవర నాగవంశీ, ఎగ్జిక్యూటివ్ నిర్మాత పీడీవీ ప్రసాద్ చిత్రబృందానికి, డిస్ట్రిబ్యూటర్లకు షీల్డ్‌లు అందించారు. హీరోయిన్ అనుపమా పరమేశ్వరన్, నటీనటులు నదియా, హరితేజ, శ్రీనివాసరెడ్డి, అజయ్,  మధునందన్, పాటల రచయిత కృష్ణచైతన్య తదితరులు పాల్గొన్నారు.


  కొన్ని కాంబినేషన్స్ ఆసక్తికరంగా ఉంటాయి. అసలా కాంబినేషన్‌ని ఎవరూ ఊహించరు కూడా. దర్శకుడు త్రివిక్రమ్ - నిర్మాత ‘దిల్’ రాజులది అలాంటి కాంబినేషనే. ఎప్పట్నుంచో ఈ ఇద్దరికీ పరిచయం ఉన్నప్పటికీ ఇప్పటివరకూ త్రివిక్రమ్ దర్శకత్వంలో ‘దిల్’ రాజు సినిమా నిర్మించలేదు. ఇప్పుడు అది జరగబోతోంది.
  
   కుటుంబ కథా చిత్రాలతో పాటు యువతకు నచ్చే ప్రేమకథా చిత్రాలు తెరకెక్కించడంలో మాటల మాంత్రికుడు త్రివిక్రమ్ శ్రీనివాస్ దిట్ట. సకుటుంబ సపరివార సమేతంగా చూడదగ్గ చిత్రాలను నిర్మించడంలో ‘దిల్’ రాజుది అందెవేసిన చేయి. ఈ ఇద్దరి కాంబినేషన్ అంటే ఫుల్ మీల్స్ లాంటి సినిమాని ఎదురు చూడొచ్చు. ఈ చిత్రం గురించి ‘దిల్’ రాజు మాట్లాడుతూ- ‘‘నువ్వేకావాలి’ చిత్రం నుంచి నాకు త్రివిక్రమ్‌తో మంచి స్నేహం ఉంది.
  
   ఎప్పుడు కలిసినా సినిమాల గురించే  మాట్లాడు కుంటుంటాం. ఇప్పుడు మా బ్యానర్‌లో ఆయన దర్శకత్వంలో ఓ భారీ చిత్రం తెరకెక్కించనున్నాం. ఇందులో ఓ స్టార్ హీరో నటిస్తారు. ఇతర నటీనటులు, సాంకేతిక నిపుణుల వివరాలు త్వరలో తెలియజేస్తా’’ అని చెప్పారు. ‘‘జూన్‌లో విడుదలైన పెద్ద చిత్రాలు సక్సెస్ అయినట్టు చరిత్ర లేదు. ‘అ..ఆ’ దాన్ని బ్రేక్ చేసింది. మంచి విజయం అందుకున్న దర్శకుడు త్రివిక్రమ్, నిర్మాత చినబాబుగారికి అభినందనలు’’ అని కూడా ‘దిల్’ రాజు అన్నారు.
  


 గత ఏడాది సమ్మర్‌లో ‘సన్నాఫ్ సత్యమూర్తి’తో తండ్రీకొడుకుల అనుబంధాన్ని తనదైన శైలిలో ఆవిష్కరించిన దర్శకుడు త్రివిక్రమ్. ఈసారి మండు వేసవిలో మలయ సమీరం లాంటి మరో సినిమాతో ముందుకొస్తున్నారు. అనసూయ, ఆనంద్ విహారి అనే రెండు పాత్రల మధ్య జరిగే అందమైన ప్రేమకథను ‘అ..ఆ..’గా తెరపైకి తీసుకొస్తున్నారు. నితిన్, సమంత, అనుపమా పరమేశ్వరన్, నదియా ముఖ్యతారలుగా ఎస్.రాధాకృష్ణ నిర్మించిన ఈ ‘అ...ఆ’ చిత్రం బుధవారం సెన్సార్ కార్యక్రమాలను పూర్తి చేసుకొంది.
 
 కుటుంబ సమేతంగా చూడదగ్గ చిత్రంగా క్లీన్ ‘యు’ సర్టిఫికెట్ పొందింది. నిర్మాత మాట్లాడుతూ-‘‘జూన్ 2న సినిమా రిలీజ్ చేస్తున్నాం. త్రివిక్రమ్ మార్క్ డైలాగ్స్, మిక్కీ జె. మేయర్ సంగీతం ప్రధాన ఆకర్షణ. ఆడియోలో ‘యా యా’, ‘ఎల్లిపోకె శ్యామలా’ పాటలు ఇప్పటికే పెద్ద హిట్. సినిమా ఇంకా బాగుంటుంది’’ అన్నారు. ఆ ఫ్యామిలీ ఎంటర్‌టైనింగ్ ఏమిటో చూడడానికి  మరికొద్దిరోజులే ఆలస్యం.


 సకుటుంబంగా చూడదగ్గ కథలను వెండితెరపైకి ఎక్కించడంలో సిద్ధహస్తుడైన దర్శకుడు త్రివిక్రమ్ చేస్తున్న తాజా ప్రయత్నం - అల్లు అర్జున్ హీరోగా, నిర్మాత ఎస్. రాధాకృష్ణ నిర్మిస్తున్న చిత్రం. శరవేగంతో షూటింగ్ జరుపుకొంటున్న ఈ సినిమాకు సంబంధించి ప్రస్తుతం పతాక సన్నివేశాల చిత్రీకరణ జరుగుతోంది. హైదరాబాద్ శివార్లలోని కోకాపేటలో వేసిన ఇంటి సెట్‌లో ఫైట్ మాస్టర్ పీటర్ హెయిన్ సారథ్యంలో సినిమాలోని ప్రధాన తారాగణమంతా పాల్గొనగా, కీలకమైన ఈ చిత్రీకరణ కార్యక్రమాలు సాగుతున్నాయి.
 
 అల్లు అర్జున్, సమంత, నిత్యా మీనన్, రాజేంద్రప్రసాద్, కోట శ్రీనివాసరావు, ఉపేంద్ర, స్నేహ తదితరులంతా ఈ షూటింగ్‌తో బిజీ బిజీగా గడుపుతున్నారు. ఛాయాగ్రాహకుడు ప్రసాద్ మూరెళ్ళ ఈ కీలక ఘట్టాలను కెమేరాలో బంధిస్తున్నారు. ‘‘ఫిబ్రవరి మొదటి వారంలో చిత్రీకరణ పూర్తి కానున్న ఈ క్లైమాక్స్‌తో టాకీ షూటింగ్ ముగియనుంది. ఇక ఆ తరువాత మిగిలింది - కొన్ని పాటలు. వాటి చిత్రీకరణకు స్పెయిన్‌కు వెళ్ళనున్నాం’’ అని దర్శక - రచయిత త్రివిక్రమ్ ‘సాక్షి’కి తెలిపారు.  
 
 గతంలో ఇదే దర్శక, నిర్మాత, హీరోల కాంబినేషన్‌లో ‘జులాయి’ చిత్రం రూపొందింది. ఆ విజయోత్సవ చిత్రాన్ని మించేలా ఇప్పుడీ చిత్రాన్ని రూపొందించడానికి ప్రయత్నిస్తున్నట్లు నిర్మాత రాధాకృష్ణ పేర్కొన్నారు. ఒక పక్క షూటింగ్ జరుగుతుండగానే, మరో పక్క పోస్ట్ ప్రొడక్షన్ పనులు జరుగుతున్నాయి. అన్ని కార్యక్రమాలూ పూర్తి చేసుకొని, వేసవి కానుకగా ఏప్రిల్ 2న సినిమాను ప్రేక్షకుల ముందుకు తేవాలని సన్నాహాలు జరుపుతున్నారు.
 
 ఇంతకీ ఈ తాజా సినిమా టైటిల్ ఏమిటి? దీనిపై రకరకాల ఊహాగానాలు జరుగుతున్నాయి. అయితే, అత్యంత విశ్వసనీయ సమాచారం ప్రకారం చక్కటి ఈ సకుటుంబ కథా చిత్రానికి ‘సన్ ఆఫ్ సత్యమూర్తి’ అని పేరు ఖరారు చేశారు. అధికారికంగా మాత్రం దర్శక, నిర్మాతలు ఈ టైటిల్‌ను ఇంకా ప్రకటించాల్సి ఉంది. అల్లు అర్జున్ టైటిల్ రోల్ పోషిస్తున్న ఈ చిత్రం త్రివిక్రమ్ మార్కు వినోదాన్నిస్తుందని ఊహించవచ్చు. మరి, ఈ సమ్మర్‌లో బాక్సాఫీస్ ముందుకు మరో ‘అత్తారింటికి దారేది?’ సిద్ధమవుతున్నట్లేనా? వేచి చూద్దాం.