మధ్య పెన్నార్‌ దక్షిణ కాలువ టెండర్ల బరిలోకి దిగిన  9 సంస్థలు
 బరిలో నుంచి తప్పుకోవాలని ఏడు సంస్థలను బెదిరిస్తున్న ‘అనంత’ ఎంపీ
 ఏడు సంస్థలు వెనక్కి తగ్గకపోవడంతో రంగంలోకి దిగిన ‘ముఖ్య’నేత
 వాటిపై ‘అనర్హత’ వేటు వేయాలని హెచ్చెల్సీ అధికారులపై ఒత్తిడి
 
 సాక్షి, అమరావతి: మధ్య పెన్నార్‌ దక్షిణ కాలువ ఆధునీకరణ పనుల్లో ఇద్దరు ఎంపీల మధ్య విభేదాలను సెటిల్‌ చేసి, రూ.320.26 కోట్లు కాజేసేందుకు వేసిన ఎత్తును ఏడు సంస్థలు చిత్తు చేసేందుకు సిద్ధమవడంతో ‘ముఖ్య’నేత రగలిపోతున్నారు. బరిలో నుంచి తప్పుకోవాలంటూ అనంతపురం జిల్లాకు చెందిన ఎంపీ ఒత్తిడి చేయగా ఆ సంస్థలు లెక్కచేయలేదు. దీంతో వాటిపై అనర్హత వేటు వేయాలంటూ హెచ్చెల్సీ అధికారులకు ‘ముఖ్య’నేత హుకుం జారీ చేశారు. అందుకే టెండర్‌ షెడ్యూల్‌ గడువు ముగిసినా కనీసం టెక్నికల్‌ బిడ్‌ను కూడా ఖరారు చేయలేకపోతున్నామని అధికార వర్గాలు చెబుతున్నాయి.
 
 అంచనా విలువ రూ.421.87 కోట్లకు పెంపు
 మధ్య పెన్నార్‌ దక్షిణ కాలువ ఆధునీకరణలో కేవలం రూ.101.61 కోట్ల విలువైన పనులు మిగిలిపోయాయి. వీటి అంచనా విలువను రూ.421.87 కోట్లకు పెంచేసి, పనులను సన్నిహిత కాంట్రాక్టర్‌కు అప్పగించి, రూ.320.26 కోట్లు కొట్టేయడానికి ‘ముఖ్య’నేత స్కెచ్‌ వేశారు. ఆ మేరకు కేవలం 2 సంస్థలకు మాత్రమే టెండర్లలో పాల్గొనే అవకాశం కల్పించేలా నిబంధనలు రూపొందించి, ఫిబ్రవరి 3న టెండర్‌ నోటిఫికేషన్‌ జారీ చేశారు. ఈ టెండర్లలో పర్సంటేజీలు పంచుకునే విషయంలో అనంతపురం జిల్లాకు చెందిన ఓ ఎంపీకి, ‘ముఖ్య’నేత కోటరీలోని రాజ్యసభ సభ్యుడికి మధ్య విభేదాలు తలెత్తాయి.
 
 ఈ విభేదాలను పరిష్కరించలేక టెండర్‌ గడువును మూడుసార్లు పొడగించారు. ఇద్దరు ఎంపీల మధ్య విభేదాలను ముఖ్యనేత ఇటీవల పరిష్కరించారు. దీంతో మార్చి 30న టెక్నికల్‌ బిడ్‌ను తెరిచారు. ‘ముఖ్య’నేత సూచించిన 2 సంస్థలతోపాటు మరో 7 సంస్థలు షెడ్యూళ్లు దాఖలు చేశాయి.  బరిలో నుంచి తప్పుకోవాలంటూ ఈ ఏడు సంస్థలను అనంతపురం జిల్లాకు చెందిన ఎంపీ బెదిరించారు. కానీ, ఆ సంస్థలు తప్పుకోపోవడంతో ‘ముఖ్య’నేత రంగంలోకి దిగారు.
 
 పాత కేసులు తవ్వి తీస్తున్న వైనం
 తమ మాట వినని ఏడు సంస్థలపై ఎలాగైనా అనర్హత వేటు వేయాలంటూ హెచ్చెల్సీ అధికారులపై ‘ముఖ్య’నేత ఒత్తిడి తెస్తున్నారు. ఆ సంస్థలు గతంలో చేసిన పనులను పరిశీలించి, ఏదో ఒక సాకు చూపించి, వాటిని బ్లాక్‌ లిస్ట్‌లో పెట్టాలని హుకుం జారీ చేశారు. దాంతో ఆ ఏడు సంస్థలు చేసిన పనులు, నాణ్యత, విజిలెన్స్‌ కేసుల పూర్వాపరాలను తవ్వితీసే పనిలో అధికారులు నిమగ్నమయ్యారు. షెడ్యూల్‌ ప్రకారం ఈ నెల 1న ప్రైస్‌బిడ్‌ తెరవాలి. కానీ, టెక్నికల్‌ బిడ్‌ను ఇప్పటికీ ఖరారు చేయకపోవడంతో ప్రైస్‌ బిడ్‌ను తెరవడాన్ని వాయిదా వేశారు.
 
 జీబీసీ ఆధునీకరణ టెండర్లు మళ్లీ పొడగింపు
 మధ్య పెన్నార్‌ దక్షిణ కాలువ ఆధునీకరణ పనుల్లో ఇద్దరు ఎంపీల మధ్య కుదిర్చిన రాజీ ఫార్ములా మేరకు.. రూ.225.57 కోట్లతో చేపట్టిన గుంతకల్‌ బ్రాంచ్‌ కెనాల్‌(జీబీసీ) ఆధునీకరణ పనులను తన కోటరీలోని ఎంపీకి కట్టబెట్టేందుకు ‘ముఖ్య’నేత అంగీకరించారు. మధ్య పెన్నార్‌ ఆధునీకరణ టెండర్లు ఖరారు కాకపోవడంతో జీబీసీ టెండర్ల గడువును మళ్లీ పొడగించారు. తాజా షెడ్యూల్‌ ప్రకారం ఈ నెల 10వ తేదీ వరకూ షెడ్యూళ్లను దాఖలు చేసుకోవడానికి అవకాశం ఇచ్చారు. టెక్నికల్‌ బిడ్, ప్రైస్‌ బిడ్‌ ఎప్పుడు తెరుస్తారన్నది గోప్యంగా ఉంచారు. 


 అనంతపురం : తుంగభద్ర ఎగువ కాలువకు ఈసారి అన్యాయం జరిగిందని వైఎస్ఆర్ సీపీ ఎమ్మెల్యే వై విశ్వేశ్వర్రెడ్డి ఆరోపించారు. శుక్రవారం అనంతపురం జిల్లాలోని గుంతకల్లు బ్రాంచ్ కెనాల్ను ఆయన పరిశీలించారు. అనంతరం వై.విశ్వేశ్వర్రెడ్డి మాట్లాడుతూ... పంటలు ఎండిపోతున్నా టీడీపీ నేతలు పట్టించుకోవడం లేదని విమర్శించారు. హంద్రీనీవా నీటిని తుంగభద్ర ఎగువ కాలువకు మళ్లించి వెంటనే జిల్లాలోని రైతులను ఆదుకోవాలని టీడీపీ ప్రభుత్వాన్ని వై.విశ్వేశ్వరరెడ్డి విజ్ఞప్తి చేశారు.
  


 అనంతపురం: అనంతపురం జిల్లాలోని తుంగభద్ర హైలెవల్‌ కెనాల్‌ (హెచ్ఎల్సీ), గుంతకల్లు బ్రాంచ్‌ కెనాల్‌ (జీబీసీ) కింద ఉన్న ఆయకట్టకు వెంటనే నీటిని విడుదల చేయాలని వైఎస్ఆర్ సీపీ నాయకుడు, ఉరవకొండ ఎమ్మెల్యే వై.విశ్వేశ్వర్రెడ్డి ప్రభుత్వాన్ని డిమాండ్ చేశారు. బుధవారం విశ్వేశ్వర్ రెడ్డి అనంతపురంలో మాట్లాడుతూ.. హెచ్ఎల్సీ, జీబీసీలో భారీగా నీరు ఉన్న... సాగు నీరు విడుదల చేయకపోవడంపై ఆయన ప్రభుత్వంపై ఆగ్రహం వ్యక్తం చేశారు.
 ఆ రెండు కాలువల కింద ఉన్న ఆయకట్టు ప్రాంతాలలో సాగు నీరు లేక రైతులు తీవ్ర ఇబ్బందులు ఎదుర్కొంటున్నారని విశ్వేశ్వర్రెడ్డి ఆవేదన వ్యక్తం చేశారు. రైతుల ఇబ్బందులను దృష్టిలో ఉంచుకుని నీటి విడుదలకు  ప్రభుత్వం వెంటనే చర్యలు చేపట్టాలని సూచించారు. దీనిపై ప్రభుత్వం స్పందించకుంటే రైతులు ఆందోళన బాట పడతారని హెచ్చరించారు.