ప్రతీ మనిషి కల కంటాడు. ఆ కలల్ని నిజం చేసుకునేందుకు ప్రయత్నిస్తుంటాడు. అవి నెరవేరితే..  సంతోషం. నెరవేరకపోతే!. అయితే.. ఆ కల ఆధారంగా అత్యాశకి పోతేనే అసలు సమస్య మొదలయ్యేది. ఆ ప్రయత్నంలో.. ప్రాణం కూడా పోవచ్చు. అలాంటిదే ఇప్పుడు చెప్పుకోబోయే ఘటన. పేరాశకు పోయి ప్రాణం పొగొట్టుకున్నాడు ఇక్కడో పెద్దాయన.  ఆయన వయసు ఏడు పదులపైనే. ఓరోజు నిద్రలో తన ఇంటి నేల కింద బంగారం ఉన్నట్లు కలగన్నాడట. అంతే.. అప్పటి నుంచి వంట గదికే పరిమితం అయ్యాడు. ఏడాది కాలం అదే పనిగా ఆ గదిలో తవ్వుకుంటూ పోయాడు. అలా.. 130 అడుగుల లోతుదాకా పోయాడు. ఈ మధ్యలో రాళ్లు అడ్డుపడితే డైనమెట్‌లను కూడా ఉపయోగించాడట. దీంతో చుట్టుపక్కల వాళ్లకు విషయం తెలిసింది. అది ప్రమాదకరమని హెచ్చరించినా.. అధికారులతో చెప్పించినా ఆ పెద్దాయన వినలేదు.  చివరకు.. ఆ భారీ గొయ్యిలోనే అదుపు తప్పి పడిపోయి ప్రాణం విడిచాడు. దాదాపు 12 అంతస్థుల భవనం లోతు ఉన్న గొయ్యలో పడి తల పగిలి.. కాళ్లు చేతులు విరిగి అతను చనిపోయినట్లు వైద్యులు ప్రకటించారు. అలా.. కలను నిజం చేసుకోవాలని.. అదీ ఈ వయసులో అత్యాశకు పోయి ప్రాణం విడిచిన ఆ పెద్దాయన పేరు జోయో పిమెంటా. ఊరు.. బ్రెజిల్‌లోని మినాస్ గెరైస్. అందుకే.. పేరాశ ప్రాణాంతకం అని ఈయనలాంటి పెద్దలు ఊరికే అనలేదు. ఇదీ చదవండి: మాల్దీవులు-భారత్ వివాదం.. ఇదే మార్గం!

నేటికీ భూమి మూలం ఏమిటనేది శాస్త్రవేత్తలకు సైతం అంతుచిక్కని ప్రశ్నగా మిగిలింది. భూమి చరిత్ర ఏమిటి? అది ఎలా పుట్టింది? దీనిపై జీవం ఎలా మొదలైంది?.. ఇలాంటి కొన్ని ప్రశ్నలకు ఖచ్చితమైన సమాధానాలు ఇప్పటి వరకు వెల్లడికాలేదు. అయితే ఇప్పుడు గ్రావిటీ హోల్‌ దీనికి సరైన సమాధానం చెప్పనున్నది. దీని సాయంతో శాస్త్రవేత్తలు భూమి ఆవిర్భావానికి గల కారణాలను తెలుసుకునేందుకు ముమ్మర ప్రయత్నాలు చేస్తున్నారు.  పరిశోధనలో ఏమి తేలింది? ఇటీవల బెంగుళూరులోని సెంటర్ ఫర్ ఎర్త్ సైన్సెస్, ఇండియన్ ఇన్‌స్టిట్యూట్ ఆఫ్ సైన్స్ సంయుక్తంగా ఒక పరిశోధనను నిర్వహించాయి. హిందూ మహాసముద్రంలో గ్రావిటీ హోల్ ఉందన్న విషయాన్ని వారు గుర్తించారు. ఈ గురుత్వాకర్షణ కేంద్రం ఒక పురాతన సముద్ర అవశేషం అని శాస్త్రవేత్తలు చెబుతున్నారు. లక్షల సంవత్సరాల క్రితమే ఈ సముద్రం భూమి నుండి కనుమరుగైంది. ఈ పరిశోధన భూ ఆవిర్భావ రహస్యాల పొరలను తెరిచింది. దీని సాయంతో రానున్న కాలంలో వీటి ఆధారంగా భూమి మూలానికి సంబంధించిన పలు విషయాలు తెలుసుకోగలమని శాస్త్రవేత్తలు భావిస్తున్నారు. గురుత్వాకర్షణ రంధ్రం ఎంత లోతున ఉంది? పరిశోధకులు ఈ గురుత్వాకర్షణ రంధ్రంనకు ఐఓజీఎల్‌ అనే పేరు పెట్టారు. ఇది హిందూ మహాసముద్రంలో సుమారు రెండు మిలియన్ చదరపు మైళ్ల మేరకు విస్తరించి ఉంది. ఇక దీనిలోతు విషయానికి వస్తే ఇది భూమి క్రస్ట్ కింద 600 మైళ్లకు మించిన లోతున ఉంది. ఈ ఐఓజీఎల్‌ ఏనాడో అదృశ్యమైన టెథిస్ మహాసముద్రంలోని ఒక భాగమని శాస్త్రవేత్తలు భావిస్తున్నారు. కొన్ని మిలియన్‌ సంవత్సరాల క్రితం ఇది భూమి లోతుల్లో మునిగిపోయివుంటుందని శాస్త్రవేత్తలు చెబుతున్నారు. కాగా గోండ్వానా, లారాసియా ఖండాలను టెథిస్ మహాసముద్రం వేరుచేసిందని కూడా శాస్త్రవేత్తలు చెబుతుంటారు.  కొన్ని కోట్ల సంవత్సరాల క్రితం.. శాస్త్రవేత్తలు తెలిపిన వివరాల ప్రకారం ఈ గురుత్వాకర్షణ రంధ్రం సుమారు రెండు కోట్ల సంవత్సరాల క్రితం ఏర్పడి ఉంటుందని, ఇది రాబోయే కొన్ని మిలియన్‌ సంవత్సరాల వరకు అలాగే ఉంటుందని శాస్త్రవేత్తలు చెబుతున్నారు. ఇలా జరగడం వెనుక గురుత్వాకర్షణ శక్తి ఉందని శాస్త్రవేత్తలు చెబుతున్నారు. భూమి విపరీతమైన గురుత్వాకర్షణ శక్తి గుండా వెళుతున్నప్పుడు ఈ గ్రావిటీ హోల్‌ ఏర్పడివుంటుందని శాస్త్రవేత్తలు భావిస్తున్నారు. ఈ గురుత్వాకర్షణ రంధ్రంపై జరిగిన పరిశోధన వివరాలు జియోఫిజికల్ రీసెర్చ్ లెటర్స్‌లో ప్రచురితమయ్యాయి.  ఇది కూడా చదవండి: ‘స్మైలింగ్‌ డెత్‌’ అంటే ఏమిటి? చనిపోయే ముందు ఎందుకు నవ్వుతుంటారు?

తుమ్ములు రావడం సర్వసాధారణం. కొంతమంది త్ముమ్మడానికి సిగ్గుపడి ఆపుకుంటుంటారు. మీటింగ్‌ సమయంలో లేదా ఏదైనా సీరియస్‌ కార్యక్రమంలో చాలామంది తుమ్ము వస్తున్నా ఏదోలా ఆపేస్తారు. ఇలా ఆపడం వల్ల ఒక్కొసారి ప్రాణాంతకం అవుతుంది. ముక్కు నరాలు చిట్లడం వంటివి జరగుతాయి కూడా. ఇక్కడొక వ్యక్తి కూడా అలానే చేసి ఏకంగా గొంతునే కోల్పోయాడు. అసలు తమ్మును ఆపొచ్చా! ఆపితే ఇక అంతేనా!..దాని గురించే ఈ కథనం. 34 ఏళ్ల బ్రిటీష్‌ వ్యక్తి బహిరంగ ప్రదేశంలో తుమ్మేందుకు సిగ్గుపడి నాసికా రంధ్రాలను గట్టిగా అదిమి, నోటిని కూడా మూసేశాడు. దీంతో ఒక్కసారిగా ముక్కు లేదా నోటి నుంచి గాలి వెళ్లే మార్గం లేక గాలి బుడగల రూపంలో ఛాతిపై ఒత్తిడి చూపడంతో మెడ చుట్టు ఉన్న నరాలు పొంగి పగలిపోయే స్థితికి వచ్చేశాయి. ఆ తర్వాత గొంతులో రంధ్రం ఏర్పడి ఇక మింగే అవకాశం లేకుండా పోయింది. ఇక నెమ్మది నెమ్మదిగా స్వరాన్ని కూడా కోల్పోయాడు.  గొంతులో రంధ్రం ఎలా ఏర్పడిందంటే.. గొంతులో ఉండే ఫారింక్స్‌ అంత సులభంగా చీలిపోదు. పదేపదే వాంతులు, దగ్గు లేదా బాహ్య గాయం కారణంగా మాత్రమే చీలీపోయే అవకాశం ఉంటుంది. కానీ ఈ వ్యక్తి విషయంలో గాలి బయటకు వెళ్లే మార్గం లేక గాలి బుడగలు అతని ఛాతీలోని కణజాలం, కండరాలలో స్థిరపడటం ప్రారంభించాయి. దీంతో మెడ అంతటా పాపింగ్‌, పగుళ్లు ఏర్పడ్డాయని చెప్పారు వైద్యులు. ఇది తమకే చాలా షాకింగ్‌ అనిపించిందన్నారు. గొంతులోని పక్కటెముక నొప్పితో పాటు అతని గొంతు ప్రాంతంలో ఇన్ఫెక్షన్‌ కూడా ఉందని చెప్పారు. ప్రస్తుతం అతనికి ఫీడింగ్‌ ట్యూబ్‌ ఏర్పాటు చేశామని, దాని సాయంతో ఆహారం తీసుకుంటున్నాడని చెప్పుకొచ్చారు. యాంటీబయోటిక్స్‌ మందులతో ఇప్పుడిప్పుడే నెమ్మదిగా కోలుకుంటున్నాడని అన్నారు వైద్యులు.  Em caso raro, homem rompe garganta e tem dificuldade para falar após segurar espirro https://t.co/KyYpmX91A0 #G1 pic.twitter.com/7h9ApBJUvW — g1 (@g1) January 16, 2018 అసలు ఎందుకు తుమ్ము వస్తుందంటే.. ధూళి, పుప్పొడి, పోగ వంటి ఇతరత్ర కణాలు నాసికా రంధ్రంలోకి ప్రవేశించి చికాకు కలిగించడంతో తుమ్ము రావడం జరుగుతుంది. ముక్కులోని డెస్ట్‌ క్లియర్‌ చేసేందుకు శరీర ధర్మంగా వచ్చేదే ఈ తుమ్ము అని వైద్యులు చెబుతున్నారు. ఇది ముక్కుకి బాక్టీరియా, బగ్‌ల దాడి నుంచి రక్షణ ఇచ్చే ఒక సాధనం లాంటిది. మనం తుమ్మగానే కొద్దిపాటి తేమతో కూడిని గాలి బయటకు బలంగా వస్తుంది. దీని వల్ల గాల్లోకి సూక్ష్మ జీవులు ఈజీగా రిలీజ్‌ అవుతాయి. దీని కారణంగానే ఫ్లూ వంటి కొన్ని రకాల అంటువ్యాధులు ఈజీగా వ్యాప్తి చెందుతాయి. అందుకే కాస్త చేయి అడ్డుపెట్టుకుని తుమ్మండి అని చెబుతుంటారు. అదేపనిగా వచ్చే తుమ్ములతో చాలా ఇబ్బంది ఉంటుంది. కొన్ని రకాల సీజన్లలో మరి ఎక్కువగా ఉంటుంది. గట్టిగా తుమ్మితే ఒక్కొసారి ముక్కు నుంచి రక్తం కారడం కూడా జరగుతుంది. చాలావరకు తుమ్ములు ఆందోళన కలిగించేవి కాకపోయిన తుమ్మును ఆపుకోకుండా ఉంటేనే మంచిదంటున్నారు వైద్యులు. తుమ్ము అనేది మానవ శరీర ధర్మం. గనుక పదిమందిలో తుమ్మేందుకు సిగ్గుపడి, లేనిపోని సమస్యలు కొనితెచ్చుకోవద్దు అని అంటున్నారు వైద్యులు. ఇది అందరికీ కామన్‌ కాబట్టి లేనిపోని రిస్క్‌లు కొని తెచ్చుకోకండి అని హెచ్చరిస్తున్నారు వైద్యులు. (చదవండి: కడుపులో కణితి.. ఇలాంటివి ప్రాణాంతకమా? కాదా?)

ఆండ్రెస్‌ కాంటో అనే ఈ స్పానిష్‌ కుర్రాడికి కోపం వచ్చింది. ఎవరి మీదంటారా? తల్లిదండ్రుల మీదే! కారణం మరీ పెద్దదేమీ కాదు గాని, అసలు కథలోకి వచ్చేద్దాం. ఎనిమిదేళ్ల కిందట ఆండ్రెస్‌ పద్నాలుగేళ్ల కుర్రాడు. ట్రాక్‌సూట్‌తోనే ఊళ్లోకి బలాదూరుగా తిరగడానికి వెళతానన్నాడు. ట్రాక్‌సూట్‌లో అలా తిరగొద్దని తల్లిదండ్రులు మందలించారు. అంతే! ఆండ్రెస్‌కు చర్రున కోపం తన్నుకొచ్చింది. కోపం వస్తే ఎవరైనా ఊరుకుంటారా? ఆండ్రెస్‌ కూడా ఊరుకోలేదు. విసవిసా పెరట్లోకి వెళ్లాడు. పెరట్లో పాతకాలం నాటి గడ్డపలుగు కనిపించింది. వెంటనే ఆ గడ్డపలుగు పుచ్చుకుని, చేతులు నొప్పెట్టే వరకు పెరట్లో మట్టిని తవ్విపోశాడు. ఇలా ఒకరోజు రెండురోజులు కాదు, ఎనిమిదేళ్లు అదేపనిగా తవ్విన చోటనే తవ్వుతూ, తాను తలదాచుకోవడానికి అనువైన నేలమాళిగను నిర్మించుకున్నాడు. తనకు అవసరమైన కుర్చీ, బల్ల, మంచం వంటి సామగ్రిని ఇంటి నుంచి అందులోకి చేరవేసుకున్నాడు. వైఫై, స్పీకర్లు, వంట చేసుకోవడానికి ఒక బొగ్గుల పొయ్యి కూడా అందులో అమర్చుకున్నాడు. ఇప్పుడు ఆ నేలమాళిగనే తన ప్రత్యేక స్థావరంగా వాడుకుంటున్నాడు. 

సాక్షి, శ్రీకాకుళం జిల్లా: దొంగతనానికి వెళ్లిన దొంగ.. గోడలో ఇరుక్కుపోయిన ఘటన శ్రీకాకుళం జిల్లాలో చోటు చేసుకుంది. కంచికి సమీపంలోని జడిపుడి గ్రామంలో పొరుగు గ్రామానికి చెందిన పాపారావు అనే వ్యక్తి.. గాల జమ్మి గుడిలో దొంగతనానికి ప్రయత్నించాడు. తొలిత గోడకు ఓ వైపున చిన్న కన్నం పెట్టి గుడిలోకి ప్రవేశించాడు. చదవండి: యువతిపై అత్యాచారయత్నం.. ప్రతిఘటించడంతో నేలకేసి కొట్టి.. గోడలో నుండి గుడిలోకి బాగానే వెళ్లిపోయిన ఆ దొంగ.. హుండీలో ఉన్న కానుకలు చేత పట్టి ఈజీగా బయటకు రాలేకపోయాడు. చివరికి గోడలో ఇలా ఇరుకున్నాడు. స్థానికులు గమనించి దొంగని పట్టుకుని పోలీసులకు అప్పగించారు. స్థానికులు దీనిని వీడియో చిత్రించారు. ఇప్పుడు ఈ వీడియో వైరల్‌గా మారింది.


  నంద్యాలరూరల్‌: మండల పరిధిలోని కానాల గ్రామం వద్ద పొన్నాపురం కేసీ కెనాల్‌ సబ్‌చానెల్‌కు ఆదివారం తెల్లవారుజామున పడిన గండిని మంగళవారం నాటికి పూడ్చివేశారు. నీటి ప్రవాహం సబ్‌ చానెల్‌లో పెరగడం, కాల్వ గట్లు బలహీనంగా ఉండటంతో  మిట్నాల బ్రిడ్జి 11కి.మీ. వద్ద కేసీ సబ్‌ చానెల్‌కు గండి పడింది. దీంతో సుమారు 157ఎకరాల ఆవాల పంటకు నష్టం వాటిల్లిందని రైతులు ఆవేదన వ్యక్తం చేశారు. ఇందుకు సంబంధించి సాక్షి దినపత్రికలో కథనాలు ప్రచురితమయ్యాయి. ఇందుకు స్పందించిన కేసీ కెనాల్‌ జిల్లా ఉన్నతాధికారులు వెంటనే నంద్యాల కేసీ కెనాల్‌ ఏఈ చంద్రుడిని అప్రమత్తం చేశారు. దీంతో మంగళవారం కాల్వకు పడిన గండిని పూడ్చివేశారు. ఈ సందర్భంగా ఏఈ చంద్రుడు మాట్లాడుతూ ఆదివారం తెల్లవారుజామున కేసీ సబ్‌చానెల్‌కు గండి పడటంతో నీరు పంట పొలాలను పట్టుకుందన్నారు. రైతుల సమాచారం మేరకు ఉన్నతాధికారులు ఆదేశాలు జారి చేయడంతో సోమ, మంగళవారాల్లో వర్క్‌ ఇన్‌స్పెక్టర్లు, లస్కర్లు శ్రమించి ట్రాక్టర్లు, ప్రొక్లెయిన్ల ద్వారా మట్టి, ఇసుక, సిమెంట్, రాళ్లు వేసి గండి పూడ్చివేశామని తెలిపారు. వర్క్‌ ఇన్‌స్పెక్టర్‌ నూర్‌బాషా లస్కర్లు రాజు, ఉమామహేశ్వరరెడ్డి, మద్దిలేటి, రాజమల్లయ్య గండి పూడ్చివేత పనుల్లో పాల్గొన్నారని తెలిపారు. 
  


 – 157 ఎకరాల పంట నష్టం 
 – అధికారుల నిర్లక్ష్యమే కారణమంటున్న రైతులు
 కానాల(నంద్యాలరూరల్‌): మండల పరిధిలోని కానాల గ్రామ సమీపంలోని  మిట్నాల మోరి  పొన్నాపురం సబ్‌ చానెల్‌ 11వ కి.మీ వద్ద ఆదివారం తెల్లవారుజామున గండి పడింది. సబ్‌చానెల్‌కు గండి పడటంతో సమీపంలోని మద్దెల చిన్న చెన్నప్ప, పెద్దచెన్నప్ప, గజ్జెల చిన్న హుసేని, గుర్రప్ప, బంక వెంకటరామిరెడ్డి, కిరణ్, నెరవాటి బాబు, డీసీ హుసేన్, కల్లూరు మాబువలి, అసన్, హుసేన్, తదితరులకు చెందిన సుమారు 157 ఎకరాల ఆవాలు, జొన్న, కంది పంటలు నీటి మునిగాయి. నీటి ప్రవాహ ఉద్ధృతికి కొని​‍్నచోట్ల  భూమి కోతకు గురైంది.
  
    రబీ పంటకు సాగునీరు అందదు.. ఆరుతడి పంటలు వేసుకోండి అని కేసీకెనాల్‌ అధికారులు చెప్పారు. వారు చెప్పినట్టు  తాము ఆరుతడి పంటలు వేసుకున్నామని, మరి ఉన్నట్టుండి సబ్‌చానెల్‌కు ఎక్కువ నీరు ఎందుకు వదిలారని రైతులు, అధికారులను నిలదీస్తున్నారు. అనధికారికంగీఆ కుందూనదికి నీటి ప్రవాహం పెంచి నెల్లూరుకు నీరు అందించేందుకే  ఇలా చేశారని ఆరోపించారు.  కేసీ కాల్వ గట్లు బలహీనంగా ఉన్నాయని పలుమార్లు ఉన్నతాధికారుల దృష్టికి తీసుకెళ్లినా పట్టించుకోలేదని, వాపోయారు. ప్రస్తుతం కాలువ గట్లు తెగి  పంటకు భారీ  నష్టం జరిగిందని, తమకు  పరిహారం చెల్లించాలని కానాల రైతులు కోరుతున్నారు. ఇదిలా ఉంటే సబ్‌చానల్‌కు నీటి విడుదలను ఆపేసి తాత్కాలికంగా గండిని పూడ్చేసేందుకు చర్యలు తీసుకుంటున్నట్లు కేసీ కెనాల్‌ ఏఈ చంద్రుడు వెల్లడించారు.
  


  
 
 భాగ్యనగర్‌కాలనీ: నిత్యం రద్దీగా ఉండే ఉషా ముళ్లపూడి చౌరస్తాలోని జాతీయ రహదారిపై భారీ గుంత ఏర్పడింది. దీంతో వాహనాల రాకపోకలకు త్రీవ అంతరాయం కలిగింది. నాణ్యత కొరవడిన కారణంగా తరచూ రోడ్లు కుంగిపోయి గుంతలు పడుతున్నాయి.  ఎప్పుడే ప్రమాదం జరుగుతుందో అని భయాందోళనతో వాహనదారులు ఆందోళన చెందుతున్నారు. ఇటీవల కురిసిన వర్షాలకు నెక్లెస్‌ రోడ్డులో పడిన భారీ గుంత సంఘటన మరవక ముందే ఇక్కడి జాతీయ రహదారిపై గుంత ఏర్పడటంపై ఇటు అధికారులను, వాహనదారులను కలవరానికి గురి చేస్తోంది. నిత్యం వేలాది వాహనాలు రాకపోకలు సాగించే ఈ రహదారిపై గుంత ఏర్పడిన సమయంలో వాహనాలు రద్దీ లేకపోవడంతో పెద్ద ప్రమాదమే తప్పినట్లయింది. 
 
      గుంత ఏర్పడిన విషయం తెలుసుకున్న వాటర్‌వర్కు, జీహెచ్‌ఎంసీ, ట్రాఫిక్‌ అధికారులు సంఘటనా స్ధలానికి చేరుకున్నారు. గుంత ఏర్పడటానికి గల కారణాలు తెలుసుకున్నారు. గతంలో ఉషాముళ్లపూడి నుంచి కేపీహెచ్‌బీకాలనీ వైపు గోదావరి ప్రధాన పైపులై వేశారు. పైపులై లీకేజీ కారణంగానే గుంత ఏర్పడి ఉండవచ్చని అధికారులు పేర్కొంటున్నారు. ప్రధానంగా జాతీయ రహదారికి రెండు వైపులా నీటి లీకేజీతో అడుగు భాగం నానిపోయి గుంత పడింది. సంబంధిత అధికారులు పొక్లెయితో మరమ్మతుల చేపట్టేందుకు చర్యలకు ఉపక్రమించారు.
 
  
 
  


 బిడ్డకు గుండెలో రంధ్రంతో తల్లిదండ్రుల ఆవేదన
 దాతల సాయం కోసం ఎదురుచూపులు 
 తాళ్లరేవు:  రెక్కాడితే కానీ డొక్కాడని నిరుపేద కుటుంబంలో పుట్టిన ఆ చిన్నారికి గుండెకు రంధ్రం ఉందని తెలియడంతో ఆ కుటుంబం బెంబేలెత్తుతోంది. చిన్నారికి వైద్యం చేయించడం తమకు శక్తిమించిన పని కావడంతో దాతల సాయం కోసం వారు ఎదురు చూస్తున్నారు. వివరాల్లోకి వెళితే.. తాళ్లరేవు మండలం ఇంజరం పంచాయతీ గౌతం నగర్‌కు చెందిన కోట ధనరాజు, గంగ దంపతులు చిన్నచిన్న కూలిపనులు చేసుకుంటూ జీవితాన్ని గడుపుతున్నారు. వారికి స్వర్ణరాజు అనే 9 నెలల బాలుడు ఉన్నాడు. ఇటీవల స్వర్ణరాజు అనారోగ్యానికి గురవడంతో స్థానిక సబ్‌సెంటర్‌లో చూపించారు. ఆ బాలుడికి గుండె సంబంధింత వ్యాధి ఉందని, స్కానింగ్‌ చేయించాలని చెప్పారు. స్థానిక పంచాయతీ గుమాస్తా కుడుపూడి వీర వెంకట సత్యనారాయణ(సత్తిబాబు) అందించిన ఆర్థిక సహకారంతో ఆ బాబుకు స్కానింగ్‌ చేయించారు. బాలుడి గుండెకు రంధ్రం ఉందని, హైదరాబాద్‌లో శస్త్రచికిత్స చేయింతాలని వైద్యులు చెప్పారు. ఇంటి పోషణే కష్టంగా ఉన్న తాము బిడ్డకు వైద్యం ఎలా చేయించాలో దిక్కుతోచక ఆదంపతులు తల్లడిల్లుతున్నారు. గడప గడపకూ వైఎస్సార్‌ కార్యక్రమంలో పాల్గొంటున్న ముమ్మిడివరం నియోజకవర్గ కో ఆర్డినేటర్‌ పితాని బాలకృష్ణకు బాలుని పరిస్థితి గురించి చెప్పడంతో ఆయన ఆస్పత్రి ఖర్చులకు రూ. రెండు వేలు ఇచ్చారు. బాలునికి ఆరోగ్యశ్రీ పథకంలో శస్త్ర చికిత్స చేయించేందుకు అవసరమైన చర్యలు చేపట్టాల్సిందిగా స్థానిక నాయకులకు ఆయన సూచించారు. బాలుడి శస్త్ర చికిత్సకు లక్షలాది రూపాయలు అవసరం కానున్న నేపథ్యంలో ఆదుకునే దాతలు నెం. 90149 31377ను సంప్రదించాలని ధనరాజు, గంగ దంపతులు కోరారు.  
  


 ప్రసాద్‌ సంస్మరణసభలో పలువురి నివాళి
 రాజమహేంద్రవరం సిటీ : బాస్కెట్‌బాల్‌ క్రీడాభివృద్ధి జీవితాన్ని అంకితం చేసిన టీవీఎస్‌ఎన్‌ ప్రసాద్‌ మృతి ఆ క్రీడకు రాష్ట్రంలో తీరని లోటని జిల్లా బాస్కెట్‌బాల్‌ అసోసియేషన్‌ అధ్యక్షుడు  డాక్టర్‌ చెలికాని స్టాలిన్‌ సంతాపం వ్యక్తం చేశారు. జాతీయ బాస్కెట్‌బాల్‌ ఫెడరేషన్‌ ఎగ్జిక్యూటివ్‌ సభ్యుడు, రాష్ట్ర, జిల్లా  బాస్కెట్‌బాల్‌ అసోసియేషన్‌ల ప్రధాన కార్యదర్శి, పేపరుమిల్లు ఉద్యోగి టీవీఎస్‌ఎన్‌ ప్రసాద్‌ సంస్మరణసభను పేపరుమిల్లు క్వార్టర్స్‌ అసోసియేషన్‌ హాల్‌లో బుధవారం నిర్వహించారు. రాష్ట్రంలోని అన్ని ప్రాంతాల నుంచీ వచ్చిన క్రీడాభిమానులు, కోచ్‌లు, రిఫరీలు, ఫిజికల్‌ డైరెక్టర్లు ప్రసాద్‌ చిత్రపటానికి పూలమాలలు వేసి నివాళులర్పించారు. పలువురు మాట్లాడుతూ బాస్కెట్‌బాల్‌ క్రీడాభివృద్ధికి  ప్రసాద్‌ చేసిన కృషి అద్వితీయమన్నారు. జిల్లాలో బాస్కెట్‌బాల్‌ క్రీడను 15 ప్రాంతాల్లో అభివృద్ధి చేసిన ఘనత ఆయనకే దక్కుతుందన్నారు. ప్రసాద్‌ జ్ఞాపకార్థం బాస్కెట్‌ బాల్‌ టోర్నమెంట్‌ నిర్వహిస్తే ట్రోఫీతో పాటు అవసరమైన సహాయం అందిస్తామని జిల్లా పుట్‌బాల్‌ అసోసియేషన్‌ కార్యదర్శి సుంకర నాగేంద్రకిశోర్‌ ప్రకటించారు. ఇండియన్‌ బాస్కెట్‌బాల్‌ ఫెడరేషన్‌ టెక్నికల్‌ కమిటీ సభ్యుడు నార్మన్‌ ఐజాక్, రాష్ట్ర ఉపాధ్యక్షుడు బొజ్జ రామయ్య, కోశాధికారి చక్రవర్తి తదితరులు పాల్గొన్నారు.
  
  


 శంకరపట్నం: శంకరపట్నం మండలం ఇప్పలపల్లె శివారులో అండర్‌ టన్నెల్‌ వద్ద సొరంగం పూడ్చివేత పనులు బుధవారం ప్రారంభమయ్యాయి. ‘అండర్‌టన్నెల్‌కు సొరంగం’ శీర్షికన మంగళవారం సాక్షిలో కథనం ప్రచురితమవడంతో బుధవారం ఎస్సారెస్పీ ఈఈ శ్రీనివాస్‌ సొరంగం పడ్డ అండర్‌టన్నెల్‌ను పరిశీలించారు. ఎస్సారెస్పీ ప్రధానకాలువ  అండర్‌టన్నెల్‌కు 172.65 కిలోమీటర్‌ వద్ద సొరంగం పడింది. దీంతో రైతులు తీవ్ర ఆందోళనకు గురయ్యారు. ‘సాక్షి’ కథనంతో స్పందించిన ఈఈ శ్రీనివాస్‌  ప్రదాన కాలువను పరిశీలించి స్కిన్‌వాల్‌ నిర్మాణం ప్రారంభించి వారంలోగా పనులు పూర్తిచేయాలని ఆదేశించారు. కాలువ లైనింగ్‌  పనులు కూడా చేపడతామన్నారు. ఆయన వెంట డీఈ కవిత, ఏఈలు వేణు, రవికాంత్‌ ఉన్నారు. 
  
  


 శ్రీశైలం: తెలంగాణా జెన్‌కో ఆధ్వర్యంలో సుమారు రూ.50 కోట్ల వ్యయంతో నిర్మిస్తున్న శ్రీశైలం టెయిల్‌పాండ్ కాంక్రీట్ డ్యాంకు గండిపడింది. శ్రీశైలంలో విద్యుత్ ఉత్పాదన జరుగుతుండడంతో కొద్దిపాటి ప్రవాహానికి నిర్మాణంలో ఉన్న డ్యాం మధ్యభాగంలో సుమారు 30 అడుగుల వెడల్పు, ఎత్తులో కాంక్రీట్ డ్యాం కొట్టుకుపోయింది. నిల్వ ఉన్న నీరు దిగువ ప్రాంతానికి విడుదలవుతుంది. గురువారం రాత్రి 9గంటల సమయంలో కాంక్రీట్‌డ్యాంకు గండిపడిందని అక్కడి మత్సకారులు అంటున్నారు.
 
 శ్రీశైల జలాశయానికి 12 కి.మీ దూరంలో తెలంగాణా- ఆంధ్ర సరిహద్దు ప్రాంతాలను కలుపుకుని టైల్‌పాండ్ డ్యాంను నిర్మిస్తున్నారు. నీటిలో వేయవల్సిన ట్రీమి కాంక్రీట్‌లో నాణ్యత లోపించడం వల్లే కాంక్రీట్ డ్యాంకు గండిపడినట్లు ఇంజనీర్లు విస్మయం వ్యక్తం చేస్తున్నారు. అయితే పూర్తి వివరాలను వెల్లడించేందుకు అక్కడి ఇంజనీర్లు నిరాకరిస్తున్నారు. అకస్మాత్తుగా కాంక్రీట్‌డ్యాంకు గండిపడడంతో మత్సకారుల వలలు, బుట్టలు, ప్రమాదానికి గురై దెబ్బతిన్నట్లు అక్కడి మత్సకారులు తెలిపారు. పూర్తిస్థాయిలో విచారణ చేపట్టి ప్రభుత్వ ధనం వృథా కాకుండా చర్యలు చేపట్టాలని ఆ ప్రాంతంలోని ప్రజలు అంటున్నారు.


 క్యాన్సర్ కౌన్సెలింగ్
 నా వయసు 45. నాకు దాదాపు 20 ఏళ్ల క్రితం పేగుకు రంధ్రం పడితే జీజే ఆపరేషన్ చేశారు. ఇటీవలే ఈ విషయాన్ని ఒక డాక్టర్ గారి దగ్గర ప్రస్తావిస్తే ‘నీకు పేగు క్యాన్సర్ వచ్చే అవకాశం ఉంది’ అన్నారు. అప్పట్నుంచి నాకు చాలా భయంగా ఉంది. ఇది నిజమేనా? నేనేమైనా ముందస్తు పరీక్షలు చేయించుకోవాలా? వివరంగా చెప్పండి.
 - హయగ్రీవాచారి, ఖమ్మం
 
 పేగుకు రంధ్రం పడిన సమయంలో దాన్ని మూసేందుకు చేసే శస్త్రచికిత్స జీజే. నిజానికి దీనికీ, క్యాన్సర్‌కూ ఎలాంటి సంబంధమూ లేదు. అది సాధారణంగా క్యాన్సర్‌కు దారితీసే అవకాశం అంతగా ఉండదు. అయితే మీ వయసు 45 అంటున్నారు. ప్రతి ఒక్కరిలోనూ నలభై ఏళ్లు దాటాక శారీరకంగా కొన్ని మార్పులు వస్తుంటాయి. దానిలో క్యాన్సర్‌కు దారితీసే అంశాలు ఉంటే ఉండవచ్చు. అలాంటి సమయాల్లో క్యాన్సర్‌ను చాలా తొలిదశలో గుర్తిస్తే... వైద్యవిజ్ఞాన ప్రగతి వల్ల ఇప్పుడున్న సాంకేతిక పరిజ్ఞానంతో  క్యాన్సర్‌ను పూర్తిగా తగ్గించడం సాధ్యమవుతుంది. అందుకే మీకు జీజే ఆపరేషన్ జరిగింది అన్న విషయంతో క్యాన్సర్‌కు ఎలాంటి సంబంధం లేకపోయినా, అందరిలాగే మీరూ రొటీన్ క్యాన్సర్ స్క్రీనింగ్ పరీక్షలు చేయించుకోండి. ఈ పరీక్షలు ఏడాదికోసారి చేయించుకోవడం అవసరం.
  
 నాకు ఒక సందేహం ఉంది. క్యాన్సర్ రావడానికి రేడియేషన్ కూడా ఒక కారణం అంటారు. మళ్లీ క్యాన్సర్ వచ్చిన వారికి అదే రేడియేషన్ ఇస్తుంటారు కదా. మరి అలాంటప్పుడు ఈ రేడియేషన్ వల్ల క్యాన్సర్ తిరగబెట్టదా? మా బంధువుల్లో ఒకరికి రేడియేషన్ చికిత్స ఇస్తున్నారు. అప్పట్నుంచి నాకు ఈ సందేహం వస్తోంది. వివరించగలరు.
  - సీహెచ్. సుదర్శన్‌రావు, ఒంగోలు
  
 సాధారణంగా వాతావరణంలోనూ రేడియేషన్ పాళ్లు తక్కువ మోతాదులోనే ఎంతో కొంత ఉంటుంటాయి. వాటిని మన శరీరం నిత్యం ఎదుర్కొంటూ ఉంటుంది. అలాగే మనం ఎక్స్-రే, సీటీస్కాన్ లాంటి పరీక్షలు చేయించుకున్నప్పుడు కూడా మనకు తక్కువ మోతాదులో రేడియేషన్ తగులుతుంది. ఈ రేడియేషన్ మనం తీసుకోడానికి అనుమతించే స్థాయి (పర్మిసిబుల్ లిమిట్) లోనే ఉంటుంది. అలాకాక న్యూక్లియర్ యుద్ధాల్లో వేలాదిమందికి రేడియేషన్ తగులుతుంది. దీనివల్ల చాలా రకాల క్యాన్సర్లు (ఉదా: బ్లడ్ క్యాన్సర్, థైరాయిడ్ క్యాన్సర్, బ్రెస్ట్ క్యాన్సర్లు మొ॥వచ్చే అవకాశం ఎక్కువ. ఇక చిన్నపిల్లల్లో రేడియేషన్ చికిత్స ఇచ్చినప్పుడు కూడా 10 - 20 ఏళ్ల తర్వాత రేడియేషన్ ఇండ్యూస్ క్యాన్సర్స్ వచ్చే అవకాశం ఉంది. అందువల్ల పిల్లల్లో రేడియేషన్ చికిత్సను చేయం.ఇక రేడియేషన్ చికిత్సలో ఒకేసారి ఎక్కువ మోతాదు రేడియేషన్‌ను, ప్రమాదకరమైన క్యాన్సర్ కణితిని మాడ్చేచేసేందుకు చికిత్సలా ప్రసరింపజేస్తాం. ఇదీ  వాతావరణంలో ఉండే మామూలు రేడియేషన్‌కూ, చికిత్సకోసం ఉపయోగించే రేడియేషన్‌కూ ఉండే తేడా.
 డాక్టర్ పి. విజయానందరెడ్డి
 డెరైక్టర్, అపోలో క్యాన్సర్ హాస్పిటల్,
 అపోలో హెల్త్‌సిటీ, జూబ్లీహిల్స్, హైదరాబాద్.