ఫ్యామిలీ హీరో వెంకటేష్‌, మాటల మాంత్రికుడు త్రివిక్రమ్ కాంబినేషన్ లో ఓ సినిమా రూపొందిస్తున్నట్టుగా హారిక అండ్ హాసిని క్రియేషన్స్ ఇప్పటికే ప్రకటించింది. అయితే ఈ సినిమా బాలీవుడ్‌ సూపర్‌ హిట్ జాలీ ఎల్‌ఎల్‌బి 2 చిత్రానికి రీమేక్‌ అన్న టాక్ వినిపిస్తోంది. ఇటీవలే జాలీ ఎల్‌ఎల్‌బి 2 నిర్మాతలను రాధాకృష్ణ కలిసి చిత్ర హక్కులను తీసుకున్నారట. అయితే అది వీరిద్దరి కాంబినేషన్లో వచ్చే సినిమానే అని అధికారికంగా ప్రకటించలేదు.  రీమేక్ సినిమాలు చేయటంలో వెంకటేష్ కు తిరుగులేని రికార్డ్ ఉంది. ఆయన కెరీర్ లో అత్యధిక విజయాలు రీమేక్స్ రూపంలోనే వచ్చాయి. రీసెంట్‌గా గురు సినిమా కూడా రీమేక్ గా తెరకెక్కి విజయం సాధించింది. అయితే త్రివిక్రమ్‌ ఇంతవరకు ఏ సినిమాను రీమేక్‌ చేయలేదు. అయితే  ఈ సినిమా ఓకే అయితే మొదటిసారిగా త్రివిక్రమ్‌ రీమేక్‌ చేసే సినిమా ఇదే అవుతుంది. వీరిద్దరి కాంబినేషన్‌ అనగానే మనకు గుర్తొచ్చే సినిమా నువ్వు నాకు నచ్చావ్‌. విజయ్ భాస్కర్ దర‍్శకత్వంలో తెరకెక్కిన ఈ సినిమాకు త్రివిక్రమ్ రచయితగా పనిచేశాడు. అందులో తన మార్క్‌ డైలాగ్‌లతో, కామెడీతో తన ముద్ర వేశాడు. ఇప్పుడు కూడా అలాంటి ఎంటర్‌టైన్‌మెంట్‌తో ప్రేక్షకుల ముందుకు రావొచ్చని అభిమానులు భావిస్తున్నారు.


 టాలీవుడ్లో తిరుగులేని ఫ్యాన్ ఫాలోయింగ్ ఉన్న పవర్ స్టార్ పవన్ కళ్యాణ్ తన కెరీర్లో ఎక్కువగా రీమేక్ సినిమాలతోనే సక్సెస్ సాధించాడు. ప్రస్తుతం త్రివిక్రమ్ శ్రీనివాస్ దర్శకత్వంలో ఫ్యామిలీ యాక్షన్ డ్రామాలో నటిస్తున్న పవన్ కళ్యాణ్, ఆ సినిమా తరువాత మరోసారి రీమేక్ సినిమాలో నటించేందుకు అంగీకరించాడన్న ప్రచారం జరుగుతోంది. ఇటీవల బాలీవుడ్లో ఘనవిజయం సాధించిన జాలీ ఎల్ఎల్బి 2 సినిమాను పవన్ తెలుగులో రీమేక్ చేసేందుకు ప్లాన్ చేస్తున్నాడట.
 
 గతంలో అక్షయ్ కుమార్ నటించిన ఓ మైగాడ్ సినిమాలోని కృష్ణుడి పాత్రలో నటించిన పవన్, మరోసారి అక్షయ్ చేసిన పాత్రలో నటించేందుకు ఇంట్రస్ట్ చూపిస్తున్నాడు. దర్శకుడు త్రివిక్రమ్ శ్రీనివాస్ సన్నిహితుడు రాధకృష్ణ, జాలీ ఎల్ఎల్బి 2 రీమేక్ రైట్స్ను సొంతం చేసుకున్నారు. అయితే ఇప్పటి వరకు ఈ సినిమాను పవన్ రీమేక్ చేస్తున్నట్టుగా అఫీషియల్ ఎనౌన్స్మెంట్ రాకపోయినా.. పవన్ ఈ రీమేక్లో నటించనున్నాడన్న వార్త టాలీవుడ్ సర్కిల్స్లో బలంగా వినిపిస్తోంది.


 యాక్షన్ హీరోగా సత్తా చాటి ప్రస్తుతం కామెడీ స్టార్గా ఆకట్టుకుంటున్న బాలీవుడ్ హీరో అక్షయ్ కుమార్. ఇటీవల ప్రయోగాత్మక చిత్రాలతో వరుస సక్సెస్లు సాధిస్తున్న ఈ కిలాడీ 2.0 సినిమాతో విలన్ గానూ అలరించనున్నాడు. అక్షయ్ హీరోగా ఇటీవల బాలీవుడ్లో ఘనవిజయం సాధించిన జాలీ ఎల్.ఎల్.బి 2 సినిమాను తెలుగులో రీమేక్ చేసేందుకు రెడీ అవుతున్నారు.
 
 టాలీవుడ్ నిర్మాత ఎస్ రాధకృష్ణ ఈ సినిమా రీమేక్ హక్కులను సొంతం చేసుకున్నారన్న ప్రచారం జరుగుతోంది. హారికా అండ్ హాసిని క్రియేషన్స్ బ్యానర్పై ఓ స్టార్ హీరోతో జాలీ ఎల్ ఎల్ బి సినిమాను రీమేక్ చేసే ఆలోచనలో ఉన్నారు. బాలీవుడ్లో వంద కోట్లకు పైగా వసూళ్లు సాధించిన ఈ సినిమా టాలీవుడ్ ప్రేక్షకులను కూడా అలరిస్తుందన్న నమ్మకంతో ఉన్నారు. ఈ రీమేక్కు సంబంధించిన పూర్తి వివరాలు తెలియాల్సి ఉంది.


 ముంబై: అక్షయ్‌కుమార్‌ హీరోగా నటించిన ’జాలీ ఎల్‌ఎల్‌బీ-2’ బాక్సాఫీస్‌ వద్ద సత్తా చాటింది. విడుదల రెండు వారాల్లో రూ. 100 కోట్ల క్లబ్ లో చేరిన ఈ సినిమా ఇంకా మంచి కలెక్షన్లు రాబడుతోంది. నాలుగు వారాతంలో ఈ సినిమా రూ. 1.50 కోట్లు వసూలు చేసిందని ప్రముఖ ఎనలిస్ట్ తరణ్  ఆదర్శ్ తెలిపారు. ఇప్పటివరకు మొత్తం రూ. 114.47 కోట్ల కలెక్షన్లు రాబట్టిందని వెల్లడించారు. మొదటి వారంలో రూ. 72.98 కోట్లు, రెండో వారంలో రూ. 23.77 కోట్లు, మూడో వారంలో 8.03 కోట్లు వసూలు చేసింది.
 
 అక్షయ్ కుమార్ ఇంతకుముందు నటించిన రుస్తుం, ఎయిర్ లిఫ్ట్, రౌడీ రాథోడ్ తదితర సినిమాలు కూడా రూ. 100 కోట్ల క్లబ్ లో చేరాయి. 2013లో వచ్చిన ’జాలీ ఎల్‌ఎల్‌బీ’ కి సీక్వెల్‌గా తెరకెక్కిన ’జాలీ ఎల్‌ఎల్‌బీ-2’ లో అక్షయ్‌కుమార్‌ లాయర్ గా నటించాడు. అన్నుకపూర్‌, హ్యుమా ఖురేషీ, సౌరబ్‌ శుక్లా ఇతర ముఖ్యపాత్రలు పోషించారు.


 అక్షయ్‌కుమార్‌ న్యాయవాదిగా తెరకెక్కిన ’జాలీ ఎల్‌ఎల్‌బీ-2’  సినిమా బాక్సాఫీస్‌ వద్ద శుభారంభాన్ని ఇచ్చింది. గత శుక్రవారం విడుదలైన ఈ సినిమాకు పాజిటివ్‌ మౌత్‌టాక్‌ రావడంతో అక్షయ్‌ ఖాతాలో మరో హిట్టు ఖాయమని వినిపిస్తోంది. కోర్టుగది డ్రామా నేపథ్యంగా తెరకెక్కిన ఈ సినిమా తొలి రోజు రూ. 13.20 కోట్లు వసూలుచేసింది. మంచి ప్రారంభ వసూళ్లు సాధించిన ’జాలీ ఎల్‌ఎల్‌బీ-2’.. రానున్న శని, ఆదివారాల్లో మరింత మెరుగైన కలెక్షన్లు సాధించవచ్చునని సినీ పండితులు భావిస్తున్నారు. చక్కని ఎంటర్‌టైనర్‌గా తెరకెక్కిన ఈ సినిమాకు అన్నిచోట్ల మంచి రెస్పాన్స్‌ వస్తున్నదని, గుడ్‌ రిపోర్ట్స్‌ వస్తుండటంతో మున్ముందు భారీ వసూళ్లు సాధించే అవకాశముందని బాలీవుడ్‌ ట్రెడ్‌ కోమల్‌ నహతా ట్వీట్‌చేశారు. అక్షయ్‌కుమార్‌, అన్నుకపూర్‌, సౌరబ్‌ శుక్లా నటన అద్భుతంగా ఉందంటూ కితాబిచ్చారు.
 
 2013లో వచ్చిన ’జాలీ ఎల్‌ఎల్‌బీ’ కి ఇది సీక్వెల్‌. మొదటి సినిమాలో అర్షద్‌ వార్సీ, బొమన్‌ ఇరానీ పోషించిన పాత్రలను ఈ సినిమాలో అక్షయ్‌కుమార్‌, అన్ను కపూర్‌ పోషించారు. వారి పాత్రలకు మంచి స్పందన వస్తున్నది. సినీ విమర్శకులు, సినీ అభిమానులు కూడా ఈ సినిమాపై సానుకూల రివ్యూలు ఇస్తున్నారు. వాస్తవికతకు దగ్గరగా కోర్టుగది డ్రామాను, పోలీసు, న్యాయవ్యవస్థలోని అవినీతి అంశాలను స్పృశిస్తూ సాగిన ఈ సినిమా.. అక్షయ్‌కుమార్‌ పంచ్‌ డైలాగులతో చక్కని ఎంటర్‌టైనింగ్‌గా ఉందని చెప్తున్నారు.
  


 అక్షయ్‌కుమార్‌ హీరోగా నటించిన ‘జాలీ ఎల్‌ఎల్‌బి–2’ సినిమా విడుదలకు అడ్డంకులు తొలగిపోయాయి. షెడ్యూల్‌ ప్రకారమే ఫిబ్రవరి 10న ఈ సినిమా ప్రేక్షకుల ముందుకు రానుంది. తమ సినిమా విడుదలకు సెన్సార​బోర్డు పచ్చజెండా ఊపిందని నిర్మాతలు తెలిపారు. అభ్యంతకరంగా ఉన్న నాలుగు సీన్లను తొలగించాలని బాంబే హైకోర్టు ఆదేశించింది. దీనిపై సుప్రీంకోర్టులో పోరాటం చేయాలని భావించిన   నిర్మాతలు తర్వాత మనసు మార్చుకున్నారు. హైకోర్టు చెప్పిన విధంగా నాలుగు సీన్లు కట్‌ చేసి సినిమాను విడుదల చేయాలని నిర్ణయించడంతో వివాదానికి తెర పడింది.
 
 న్యాయవాదులను కించేపరిచేలా ఈ సినిమాలో సన్నివేశాలు ఉన్నాయని లాయర్‌ అజయ్‌ కుమార్‌ వాగ్‌ మారే కోర్టులో కేసు వేయడంతో వివాదం మొదలైంది. ‘జాలీ ఎల్‌ఎల్‌బి–2’వాస్తవ సంఘటన ఆధారంగా తీసిన కామెడీ మూవీ. ఈ సినిమాలో అక్షయ్‌కుమార్‌ సరసన హ్యూమా ఖురేషి నటించింది. ‘జాలీ ఎల్‌ఎల్‌బి’ తరహాలో ఈ సీక్వెల్‌ కూడా మంచి హిట్టవుతుందని చిత్రయూనిట్‌ భావిస్తోంది.


 ‘‘యాక్షన్‌ హీరోగా నాకు మంచి గుర్తింపు ఉంది. ఆ ఇమేజ్‌కి భిన్నమైన పాత్రలు చేయాలని చేసిన ప్రయత్నమే ఈ సినిమా’’ అన్నారు అక్షయ్‌కుమార్‌. ఆయన హీరోగా నటించిన హిందీ సినిమా ‘జాలీ ఎల్‌ఎల్‌బి–2’ ఫిబ్రవరి 10న విడుదల కానుంది. ఈ సందర్భంగా చిత్ర కథానాయిక హ్యూమా ఖురేషితో కలసి అక్షయ్‌ హైదరాబాద్‌ వచ్చారు. ఆయన మాట్లాడుతూ – ‘‘నేనెప్పుడూ న్యాయవాది పాత్ర చేయలేదు. సో, ఈ కథ వినగానే ఎగ్జయిటింగ్‌గా అనిపించింది. న్యాయవ్యవస్థపై సెటైరికల్‌ సినిమా కాదిది... అందులో లోపాలను ఎత్తిచూపే ప్రయత్నమూ చేయలేదు.
 వాస్తవ సంఘటన ఆధారంగా తీసిన కామెడీ మూవీ ఇది. ‘జాలీ ఎల్‌ఎల్‌బి’ సినిమా ఓ ట్రెండ్‌ సెట్టర్‌. ఈ సీక్వెల్‌ను కొత్త కథతో తెరకెక్కించాం. ‘జాలీ ఎల్‌ఎల్‌బి’లో హీరోగా నటించిన అర్షద్‌ వార్సితో నా నటనను పోల్చి చూస్తారని తెలుసు. అర్షద్‌ చిన్నోడు కాదు, మంచి నటుడు. నా స్నేహితుడు కూడా. ‘జాలీ ఎల్‌ఎల్‌బి’ తరహాలో ఈ సీక్వెల్‌ కూడా మంచి హిట్టవుతుందని ఆశిస్తున్నా’’ అన్నారు. ‘‘అక్షయ్‌తో నటించడం హ్యాపీ. సినిమాలో నాకు, ఆయనకూ మధ్య మంచి కెమిస్ట్రీ కుదిరింది’’ అన్నారు హ్యూమా ఖురేషి.