దేశ స్వాతంత్య్రోద్యమంలో ఉన్నత పదవులే కాదు, ఉన్నదంతా ధారపోసిన మహానుభావులున్నారు. ఈ పోరాట స్ఫూర్తిలోంచే విలువలతో కూడిన రాజకీయం ఆవిర్భవించింది. ప్రజాసేవే లక్ష్యంగా...పైసాకి కూడా వెతుక్కునే గొప్ప నాయకులను భారతావని అందించింది. ఇవన్నీ చెబితే ఈ తరం నమ్ముతుందా? అవేవో పుక్కిట పురాణాలు అనుకుంటారు ప్రజలు. నేటితరం రాజకీయాలు వ్యవస్థను అలా తయారు చేశాయంటారు సీనియర్‌ నేత డీకే సమరసింహారెడ్డి. ఉమ్మడి మహబూబ్‌నగర్‌ జిల్లా గద్వాల నుంచి తిరుగులేని నేతగా సుదీర్ఘకాలం గెలిచిన శాసనసభ్యుడాయన. హోం, రెవెన్యూ, విద్యుత్, పంచాయతీరాజ్‌ సహా కీలక మంత్రి పదవుల్లో సమర్థత నిరూపించుకున్న వ్యక్తి ఆయన. అసెంబ్లీ సమావేశాల ఉన్నతిలో ఆయన పాత్ర స్పష్టంగా కన్పిస్తుంది. రాష్ట్ర ఎన్నికల వేళ ఆయనను కలిసినప్పుడు ఎన్నో విషయాలు నెమరువేసుకున్నారు. అందులోంచి కొన్ని ఆయన మాటల్లోనే...  రాజకీయాల్లో దూషణలు..అసభ్య పదజాలం.?  ఒకరిపై ఒకరు దూషణలు.. అసభ్య పద ప్రయోగం..అనుచిత వ్యాఖ్యలు... ఇవీ నేటి రాజకీయాల్లో కనిపించేవి..బాధేస్తుంది..జాలేస్తోంది. అరే.. విధానపరమైన విమర్శలు చేస్తే తప్పేంటి? దీన్ని నేతలు ఎందుకు స్వీకరించడం లేదు. ప్రతి విమర్శలు గాడి తప్పుతున్నాయి. సిద్ధాంతపరమైన విమర్శలే రాజకీయాల్లో ఉండాలి. కానీ వ్యక్తిగత విమర్శనావాదం వచ్చేసింది. ప్రజాస్వామ్యానికి ఇది మంచిది కాదు. నేతలు ధన రాజకీయాల వైపే వెళ్తున్నారు. తేలికగా డబ్బు సంపాదిస్తున్నారు. దాన్ని ఎన్నికల్లో ఖర్చు చేస్తున్నారు.  సభా మర్యాద ముఖ్యం..   చట్టసభలకు ఎంతో ప్రాధాన్యం ఉంది. ఎన్నికయ్యే ప్రతీ ఎమ్మెల్యే దాన్ని గుర్తించాలి. చట్టసభల విలువలు కాపాడే ప్రయత్నం చేయాలి. మేం అసెంబ్లీకి వెళ్తు న్నామంటే దృష్టంతా దానిపైనే ఉండేది. మంత్రిగా సమాధా నంచెప్పాల్సివస్తే..ముందే విద్యార్థిలా ప్రిపేర్‌ అయ్యేవారం, చాలామంది మంత్రులు అసెంబ్లీలో అధికారులపై ఆధారపడకుండానే సమాధానమిచ్చే వారు. తమ శాఖలపై అంత కమాండ్‌ ఉండేది. అసెంబ్లీ నియమాలు..ఏ అంశాన్ని ఏ రూల్‌ కింద లేవనెత్తాలి... వాకౌట్‌ ఎప్పుడు చేయాలి? ఇవన్నీ పార్లమెంటరీ నిబంధనలు చదివినప్పుడే తెలుస్తాయి. దీనికోసం ఎన్నో పుస్తకాలు చదివేవారం. అసెంబ్లీలో చిన్నమాట తప్పుగా మాట్లాడినా పెద్ద వివాదమయ్యేది. మాట్లాడేప్పుడు అది గుర్తుండేది. కానీ ఇప్పుడేంటి? దారుణమైన భాష మాట్లాడుతున్నారు. అసెంబ్లీలో ఏం మాట్లాడుతున్నారో ప్రజలు లైవ్‌లో చూస్తున్నారు. ఎమ్మెల్యేలు ముందుగా నైతిక విలువలు నేర్చుకోవాలి.   ఎవరెటో చెప్పలేని స్థితి  ఓ నాయకుడు ఫలానా పార్టీ అని చెప్పడం కష్టంగా ఉంది. ఎప్పుడు మారతాడో తెలియదు. ఎందుకు మారతాడో అసలే తెలియదు. వ్యక్తిగత అవసరాల కోసం పార్టీలు మారుతున్నారని అందరికీ తెలుసు. పైకి మాత్రం ప్రజాభీష్టమంటారు. నియోజకవర్గ అభివృద్ధి కోసమంటారు. రాజకీయాలు ఇంత దిగజారుతాయని ఎప్పుడూ ఊహించలేదు. ఇదో దురదృష్టకర పరిణామమే. నేతల్లో విలువలు పెరగాలి. ఎన్నికల్లో పార్టీలిచ్చే హామీలు వినసొంపుగా ఉంటున్నాయి. కానీ వాటి అమలే ప్రశ్నార్థ్థకంగా ఉంటు న్నాయి. ఎవరు ఏమిచ్చినా..తిరిగి ఏదో రూపంలో ప్రజల నుంచే రాబడతారనేది అందరూ గుర్తించాలి. తెలంగాణ అభివృద్ధి చెందిందా అంటే... చెందిందనే చెబుతాను. కాకపోతే జరగాల్సిన అభివృద్ధి జరగలేదనేదే నా వాదన. గాడి తప్పిన వ్యవస్థను దారిలో పెట్టగలిగే సామర్థ్యం ప్రజలకే ఉంది. అది ప్రజాస్వామ్యం ప్రజలకిచ్చిన  ఓటు హక్కు. ఇప్పటికైనా ప్రజలు రాజకీయ విలువలకు ప్రాధాన్యమిచ్చే నేతలనే గుర్తించి, చట్ట సభలకు పంపాలి.   బ్యూరోక్రాట్స్‌ సాగిల పడటమేంటి?  ప్రజాస్వామ్య పరిరక్షణలో ఐఏఎస్, ఐసీఎస్‌లది కీలక పాత్ర. వారు దీన్ని మరిచిపోయారేమో అన్పిస్తోంది. సుదీర్ఘ అనుభవంతో చెబుతున్నా. బ్యూరోక్రాట్స్‌ ఇంత సాగిలపడటం ఈ మధ్య కాలంలోనే చూస్తున్నాను. దశాబ్దకాలంగా ఇది మరింత దిగజారింది. బ్యూరోక్రాట్స్‌ సరిగ్గా పనిచేస్తే, రాజకీయ వ్యవస్థ ఇంత భ్రషు్టపడుతుందా? కట్టడి చేయగల సామర్థ్యం వాళ్లకు మాత్రమే ఉంది. నేతలు ఐదేళ్లే అధికారంలో ఉంటారు. అధికారులు సుదీర్ఘ కాలం సర్విస్‌ చేస్తారు. ఇది తెలిసీ నాయకులకు ఎందుకు సాగిలపడుతున్నారు..? మా అప్పుడు ఇలా లేదు. మేం చెప్పేదాంట్లో తప్పుంటే అభ్యంతరం చెప్పేవారు. ఖర్మ కాకపోతే... ఓ ఐఏఎస్‌ అధికారి ఎమ్మెల్యే చెప్పినట్టు వినడమేంటి? అయితే ఈ మధ్య కాలంలో యువ ఐఏఎస్‌లు, ఐపీఎస్‌లు నిక్కచ్చిగా ఉంటున్నారు. వాళ్లలో ఆశయం కన్పిస్తోంది. ఇది శుభ పరిణామమే.   -వనం దుర్గా ప్రసాద్‌

సాక్షి, హైదరాబాద్‌: సీఎం హోదాలో కేసీఆర్‌ అసెంబ్లీ రద్దు లేఖ ఇచ్చిన వెంటనే గవర్నర్‌ నరసింహన్‌ సంతకం పెట్టడమేంటని మాజీ మంత్రి, కాంగ్రెస్‌ నేత డి.కె.సమరసింహారెడ్డి ప్రశ్నించారు. ఆర్టికల్‌ 356 ప్రకారం విచారణ చేయకుండా అసెంబ్లీ రద్దును ఎలా ఆమోదిస్తారని ఆయన అన్నారు. శనివారం గాంధీభవన్‌లో ఆయన విలేకరులతో మాట్లాడుతూ సీఎం, గవర్నర్‌ల వ్యవహారం చూస్తుంటే ఇద్దరూ అనుకునే ముందస్తుగా రద్దు చేశారని అనిపిస్తోందని ఎద్దేవా చేశారు. అసలు అసెంబ్లీని ఎందుకు రద్దు చేశారో చెప్పలేకపోతున్నారని, అసెంబ్లీలో తగిన సంఖ్యాబలం ఉండి, రాష్ట్ర ఆదాయం 21.9 శాతం పెరిగితే రద్దు చేయాల్సిన అవసరం ఏముందని ఆయన ప్రశ్నించారు. ఎన్నికలు నిజాయితీగా జరగాలంటే రాష్ట్రపతి పాలన విధించాలని, కేంద్రం ఈ విషయంలో వెంటనే చొరవ తీసుకోవాలని ఆయన డిమాండ్‌ చేశారు. కాంగ్రెస్‌–టీడీపీలు పొత్తు పెట్టుకుంటాయంటే కేసీఆర్‌లో భయం కనిపిస్తోందని వ్యాఖ్యానించారు. టీడీపీతో తాము పొత్తు పెట్టుకోవడాన్ని కేసీఆర్‌ తప్పుపడుతున్నారని, మరి టీఆర్‌ఎస్, టీడీపీ కలిసి పోటీ చేసినప్పుడు ఏమైందని వ్యాఖ్యానించారు. తాము చేస్తే శృంగారం.. వేరొకరు చేస్తే వ్యభిచారమనే రీతిలో కేసీఆర్‌ వ్యవహరిస్తున్నారని డి.కె. విమర్శించారు.


  అమ్మాయి లాయరట! అబ్బాయి భయపడిపోయాడు.
  అబ్బాయిది సినిమాఫీల్డట! అమ్మాయి భయపడిపోయింది.
  కుదిరే పెళ్లేనా? ఇద్దర్లోనూ సందేహం!
  పెళ్లిచూపులు మొదలయ్యాయి, పూర్తయ్యాయి.
  భయం పోయింది! ఒకరికొకరు నచ్చేశారు.
  పెళ్లై ముప్పై ఏళ్లు. బి.గోపాల్, ఉమ ఇప్పటికీ....
  అప్పుడప్పుడు భయపడుతుంటారు
  ఎప్పుడోగాని వీలవని కబుర్ల వేళ ఏ పనులో వచ్చిపడవు కదాని!
  అంతగా... ఒకటైపోయారు. అంతగా అంటే.. ‘మనసే జతగా..’!
  
 మూడు దశాబ్దాల డెరైక్షన్ కెరీర్‌లో మూడు పదులకు పైగా సినిమాలను తెరకెక్కించారు బి. గోపాల్. బొబ్బిలిరాజా, అసెంబ్లీరౌడీ, లారీ డ్రైవర్, సమరసింహారెడ్డి, నరసింహనాయుడు, ఇంద్ర... వంటి చిత్రాలతో బాక్సాఫీస్‌ని బద్దలుకొట్టిన డెరైక్టర్ బి.గోపాల్ స్వస్థలం ఒంగోలు దగ్గర నిడమానూరు. ఆయన అర్ధాంగి ఉమ గుంటూరువాసి. 30 సినిమాలు - 30 ఏళ్ల దాంపత్యం... వీరి జీవితనౌక ఇంత అన్యోన్యంగా ఎలా ప్రయాణిస్తోందో తెలుసుకోవడానికి హైదరాబాద్ జూబ్లీహిల్స్‌లోని వారి స్వగృహానికి వెళ్లాం.
  
  భయాలు తొలగినవేళ...
 
  పెళ్లినాటికే ఉమ లాయర్ పట్టా పుచ్చుకున్నారు. కోర్టులో తన సత్తా నిరూపించుకోవడానికి సన్నద్ధమవుతున్నారు. ఆ సమయంలోనే తెలిసినవారి ద్వారా గోపాల్ పెళ్లిచూపుల పేరుతో ఎంట్రీ ఇచ్చారు. వ్యవసాయ కుటుంబానికి చెందిన గోపాల్ డిగ్రీ డిస్ కంటిన్యూ చేసి అనుకోకుండా సినీ పరిశ్రమలో చేరారు. తన ప్రతిభతో త్వరలోనే కో డెరైక్టర్‌గా... ఆ తర్వాత డెరైక్టర్‌గా ఎదిగారు. ‘‘లాయర్‌ని పెళ్లి చేసుకోవడమా?! అని ముందు భయపడ్డాను. కాని ఈమెను చూశాక ఆ భయం పోయింది. అమాయకురాలు అనిపించింది’’ అని ఆనాటి రోజులను గుర్తుచేసుకొని గుంభనంగా నవ్వారు బి.గోపాల్. ‘‘సినిమా పరిశ్రమ కదా! అని మా అమ్మ కొంచెం భయపడ్డారు. కాని ఈయన్ని చూసి, మాట్లాడాక, మంచితనం తెలిసాక ఆ భయం పోయింది’’ అంటూ 30 ఏళ్ల క్రితం (1983) జరిగిన తమ పెళ్లినాటి రోజులను గుర్తుచేసుకున్నారు ఉమ.
  
  కొత్తకాపురం... కొత్త భాష...
 
  పెళ్లికి ముందే మద్రాస్‌లో ఉన్నారు గోపాల్. పెళ్లవడంతోనే భర్తతో కలిసి మద్రాస్‌కు కాపురానికి వెళ్లారు ఉమ. తన మెట్టినింటి విశేషాలు, కాపురం తొలినాళ్ల సర్దుబాట్ల గురించి ఉమ వివరిస్తూ - ‘అత్తింటిలో అందరూ నన్ను చాలా అభిమానించేవారు. అందుకే పరాయి ఇల్లులా అనిపించలేదు. నేను సర్దుబాట్లు చేసుకునే అవకాశం లేకుండానే వెంటనే కాపురానికి వెళ్లిపోయాను. అక్కడికి వెళ్లినరోజు రాత్రే షూటింగ్ నెల రోజులు ఉంటుందని ఫోన్. వెళ్లక తప్పదు. నేను ధైర్యంగా ఉంటానని మాట ఇచ్చాక షూటింగ్‌కి ఈయన రాజమండ్రి వెళ్లిపోయారు. తెలియనిచోటు, తెలియని భాష, చేతకాని వంట.. ఇవీ అప్పుడు నా ముందున్న సమస్యలు. కాని కొన్నిరోజుల్లోనే వాటిని అధిగమించాను. ఈయన తిరిగొచ్చాక మద్రాస్‌లో ‘లా’ ప్రాక్టీస్ కోర్స్‌లో జాయినయ్యాను. అయితే ప్రెగ్నెన్నీ రావడం, అబార్షన్ చేయడం, ఆ తర్వాత డాక్టర్ చేసిన పొరపాటు ఫలితంగా ఆపరేషన్ల మీద ఆపరేషన్లు చేయాల్సి రావడం... దీంతో 20 ఏళ్లు చికిత్స కోసం ఆసుపత్రుల చుట్టూ తిరగడమే సరిపోయింది. ఆ సమయంలో ఈయన నా పట్ల చూపిన ఓర్పు, సహనం, ప్రేమ... బహుశ ఏ భర్తా తన భార్య పట్ల చూపరేమో! త్రిగుణ (ఉమ-గోపాల్‌ల ఏకైక కుమార్తె) మా జీవితంలోకి వచ్చాక మరింత నిండుతనం వచ్చింది’ అంటూ తమ తొమ్మిదేళ్ల పాపను దగ్గరకు తీసుకుంటూ మురిపెంగా చెప్పారు ఉమ.
  
  కోపం వస్తే మౌనమే మందు...
 
  ఇద్దరి మధ్య వాదనలకు చోటు లేదని తేల్చి చెప్పిన ఈ దంపతులు అనుకోకుండా ఎంట్రీ ఇచ్చే కోపతాపాలను ఎలా మ్యానేజ్ చేసుకుంటారో వివరించారు. ఉమ మాట్లాడుతూ - ‘మా మొదటి పెళ్లిరోజు ఆగష్టు 12. ఆగష్టు 11న ఈయన షూటింగ్‌కి వెళ్లిపోయారు. నేను మద్రాస్‌లోను, ఈయన ఊటీలో...  ‘ఇలా అయితే ఎలా!’ అని అప్పుడు కాస్త అప్‌సెట్ అయ్యాను. కాని ఈయన వర్క్ ఎలాంటిదో అర్ధం చేసుకున్నాను. పని విషయంలో మరింత సపోర్ట్‌గా నిలవా లని అప్పుడే అనుకున్నాను. ఈయనకు కోపమే రాదు. ఎప్పుడూ చిరునవ్వే ముందుంటుంది. పొరపాటున ఎప్పుడైనా ఏమైనా అన్నా ఆ సమయంలో మౌనంగా ఉంటాను. నాకెప్పుడైనా కోపం వచ్చినా వెంటనే నిలదీయను. నా కోపాన్నంతా గోడలకు చెప్పుకుంటాను. ఇప్పటికీ అదే మంత్రం’ అంటూ నవ్వేస్తారామె! ‘ఎప్పుడూ లేనిది అప్పుడప్పుడు పాప పెంపకంలో చిన్నచిన్న పట్టింపులు వస్తుంటాయి. ‘కఠినంగా ఉండాలంటుంది ఈవిడ, అవసరం లేదు’ అంటాను నేను. పిల్లల పెంపకంలో అవన్నీ తప్పవు కదా!’ నవ్వుతూనే తెలిపారు గోపాల్.
  
  టెన్షన్లు తీరేలా ఇల్లు...
 
  ‘మొదటి నుంచీ జీవితం ప్రశాంతంగా వెళ్లిపోవాలి, సినీ పరిశ్రమలో ఉన్న నన్ను అర్థం చేసుకున్న అమ్మాయి అర్ధాంగి అయితే చాలు అనుకున్నాను.  నా అదృష్టం కొద్దీ అన్నివిధాలా అర్థం చేసుకునే ఉమ నాకు అర్ధాంగిగా వచ్చింది. అప్పటివరకు తనకు షూటింగ్‌లంటే తెలియదు. నాతో పాటు షూటింగ్‌లకు వచ్చింది. నా పనితీరును అర్థం చేసుకుంది. అందుకే ఎప్పుడూ నా వర్క్‌లో ఇన్‌వాల్వ్ అవలేదు. నాకంటే చదువులో మిన్నగా ఉన్నా ఆ దర్పం ఎప్పుడూ ఏ కోశానా చూపలేదు. పైగా ‘లా’ కన్నా ఇంటికే నా ప్రాధాన్యత’ అంది. ఇంటిని ఎప్పుడూ అందంగా తీర్చిదిద్దుతుంది. అందుకే సినిమా పనులతో ఎన్ని టెన్షన్లు ఉన్నా ఇంటికి రాగానే రిలాక్స్ అయిపోతాను. మాకు ఆలస్యంగా పిల్లలు కలగడంతో మా తమ్ముని పిల్లలను తన బిడ్డలుగా పెంచింది. బంధువులతో, స్నేహితులతో కలుపుగోలుగా ఉంటూ వచ్చింది. సినిమా చూసి మాత్రం మొహమాటం లేకుండా విమర్శించేస్తుంది. మరో విషయం ఏమిటంటే తను ఎంత మంచి ప్రేక్షకురాలంటే.. సినిమాలో కామెడీ సీన్ వస్తే నవ్వు ఆపుకోదు, ఏడుపు సీన్ వచ్చినా అంతే! పక్కనుంచి కంట్రోల్ చేయాల్సిందే!’ అంటూ అర్ధాంగి మనస్తత్వాన్ని అందంగా వివరించారు ఈ మాస్ ఫేవరేట్ డెరైక్టర్.
  
  శోధించి... సాధించి...
 
  ‘నా పుట్టినరోజు కరెక్ట్ తేదీ తెలియడం కోసం మా ఊరు ఆసుపత్రికి వెళ్లి, పాత రికార్డులను శోధించి మరీ కనిపెట్టింది ఉమ. నా ప్రతి పుట్టినరోజునూ పద్ధతిగా చేస్తుంది. ఊహించని కానుకలు ఇచ్చి ఆనందపెట్టడం తనకు ఇష్టం. ఇక పండగలు వచ్చాయంటే మా ఊరికి వెళ్లాల్సిందే! ఉమకు ఉన్న ఆ ఆసక్తి వల్లే నగర వాతావరణం నుంచి పల్లెకు చేరువవుతుంటాం. ఇక్కడే ఉన్నా భోగిమంటలు, పిండివంటల హడావిడి ఉండాల్సిందే’ అన్నారు గోపాల్!
  
  భార్యాభర్తలు అరమరికలు లేకుండా మాట్లాడుకోవడం, ఒకరికి కోపం వచ్చినప్పుడు ఇంకొకరు సర్దుకుపోవడం, స్నేహంగా కలిసిపోవడం... దాంపత్యంలో తప్పనిసరి సూత్రాలు అని చెప్పకనే చెప్పారు ఈ దంపతులు.
   - నిర్మలారెడ్డి
  
  20 ఏళ్లు చికిత్స కోసం నేను ఆసుపత్రుల చుట్టూ తిరగడమే సరిపోయింది. ఆ సమయంలో ఈయన నా పట్ల చూపిన ఓర్పు, సహనం, ప్రేమ... బహుశ ఏ భర్తా తన భార్య పట్ల చూపరేమో!
  - ఉమ
  
   ‘‘లా’ కన్నా ఇంటికే
  నా ప్రాధాన్యత’’ అంది. ఇంటిని ఎప్పుడూ అందంగా, ఆహ్లాదంగా తీర్చిదిద్దుతుంది. అందుకే సినిమా పనులతో ఎన్ని టెన్షన్లు ఉన్నా
  ఇంటికి రాగానే రిలాక్స్ అయిపోతాను.
  - బి.గోపాల్
  


 గద్వాల న్యూటౌన్, న్యూస్‌లైన్:  తెలంగాణ ప్రజలు ఆకాంక్ష, ఆత్మగౌరవం ప్రతిబింబించేలా కేంద్ర కేబినెట్ నిర్ణయం తీసుకోవడం సంతోషకరమని మాజీ మంత్రి డీకే సమరసింహారెడ్డి అన్నారు.శుక్రవారం స్థానిక తన నివాసంలో ఆయన విలేకరులతో మాట్లాడుతూ ప్రత్యేక రాష్ట్ర ఏర్పాటు ప్రక్రియ ఇంకా పూర్తి కాలేదన్నారు. ఆర్టికల్-3 ప్రకారం ముందుగా రాష్ట్రపతి అనుమతితో బిల్లును ప్రవేశ పెట్టి...చివరకు రాష్ట్రపతి ఆమోద ముద్రపడిన తర్వాతే కలసాకారం అవుతుందన్నారు. ఈ ప్రక్రియ ఐదు దశల్లో ఉంటుందని, చివరి ప్రక్రియ జరిగే వరకు తెలంగాణ వాదులు అప్రమత్తంగా ఉండాలన్నారు.
  
  బిల్లు ఆమోదముద్ర పొందిన తర్వాత రాష్ట్రంలో సెక్షన్-3 ప్రకారం సవరణలు తెచ్చిన తర్వాతే ప్రక్రియ పూర్తి అవుతుందన్నారు. తెలంగాణ కల సాకారం అవుతున్న వేళ ఈ ప్రాంత ప్రజలు సీమాంధ్రుల పట్ల ప్రేమపూర్వకంగా ఉండాలని కోరారు. ఆంధ్ర ఎన్‌జీఓలు రెచ్చగొట్టే విధంగా వ్యవహరిస్తున్నారని, అశోక్‌బాబు తనను తాను కంట్రోల్ చేసుకోవాలని సూచించారు. కొంతమంది సీమాంధ్రులు జూరాల ప్రాజెక్టు ఎత్తున పెంచుతారని అసత్య ప్రచారం చేస్తున్నారని, సాంకేతికంగా ఇది సాధ్యం కాదన్నారు. సమావేశంలో టీడీపీ నేతలు వేణుగోపాల్, లత్తిపురం వెంకట్రామిరెడ్డి, ఇస్మాయిల్, కర్ణకుమార్, తదితరులు పాల్గొన్నారు.