‘ఇస్కాన్‌’పై నిషేధానికి బంగ్లా కోర్టు నిరాకరణ!

బంగ్లాదేశ్‌లో ఇస్కాన్ కార్యకలాపాలపై నిషేధం విధించేందుకు హైకోర్టు గురువారం నిరాకరించింది. ఇస్కాన్‌కు చెందిన చిన్మయ్‌ కృష్ణదాస్‌ ప్రభు అరెస్ట్‌ తర్వాత చోటుచేసుకున్న ఉద్రిక్తతల నేపథ్యంలో హిందూ సంస్థ కార్యకలాపాలపై నిషేధం విధించాలన్న పిటిషనర్‌ వాదనను హైకోర్టు తోసిపుచ్చింది.

కాగా స్థానికంగా ‘ఇస్కాన్‌’ కార్యకలాపాలు నిషేధించాలంటూ బంగ్లాదేశ్‌ హైకోర్టులో పిటిషన్‌ దాఖలైన విషయం తెలిసిందే. దీనిపై విచారణ జరిపిన న్యాయస్థానం.. దేశంలో ఇస్కాన్‌ ఇటీవలి కార్యకలాపాలపై ప్రభుత్వం ఎటువంటి చర్యలు తీసుకుందో నివేదిక ఇవ్వాలని అటార్నీ జనరల్‌కు ఆదేశాలు జారీ చేసినట్లు స్థానిక మీడియా కథనాలు ప్రచురించాయి.

కాగా ఇస్కాన్‌కు చెందిన చిన్మయ్‌ కృష్ణదాస్‌ బ్రహ్మచారిని బంగ్లాదేశ్‌ ప్రభుత్వం సోమవారం అరెస్ట్‌ చేసిన విషయం తెలిసిందే. గత అక్టోబర్‌లో కృష్ణదాస్‌ ఓ ర్యాలీలో పాల్గొన్నారు. ఈ సందర్భంగా బంగ్లా జాతీయ జెండాను అగౌరపరిచారనే  ఆరోపణలపై దేశద్రోహం కేసు నమోదు చేసి బంగ్లాదేశ్‌లోని ఢాకా విమానాశ్రయంలో అరెస్టు చేశారు.  కృష్ణ దాస్ బెయిల్ దరఖాస్తును చిట్టగాంగ్ మెట్రోపాలిటన్ మేజిస్ట్రేట్ కోర్టు తిరస్కరించింది.

మరోవైపు కృష్ణదాస్‌ అరెస్టును వ్యతిరేకిస్తూ పలు సంఘాలు ఆందోళనకు దిగాయి. ఈయన అరెస్ట్‌, బెయిల్‌ నిరాకరణను భారత్‌ కూడా ఖండించింది. దాస్ అరెస్టు విషయంలో బంగ్లాదేశ్‌లో శాంతియుతంగా నిరసన తెలుపుతున్న మైనార్టీలపై దాడులను ఖండిస్తున్నట్లు తెలిపింది. హిందువులు, మైనార్టీలందరికీ భద్రత కల్పించాలని బంగ్లాదేశ్‌ అధికారులను కోరినట్లు విదేశాంగ శాఖ అధికార ప్రతినిధి రణ్‌ధిర్‌ జైస్వాల్‌ తెలిపారు.

అయితే చిన్మయ్‌ అరెస్టు మంగళవారం ఘర్షణలకు దారితీసింది, హిందూ నేత మద్దతుదారులకు భద్రతా సిబ్బందికి మధ్య జరిగిన ఘర్షణలో  అసిస్టెంట్ పబ్లిక్ ప్రాసిక్యూటర్ అయిన అడ్వకేట్ సైఫుల్ ఇస్లాం మరణించాడు.