సైఫ్‌పై దాడి.. నిందితుడు బంగ్లాదేశీ: ముంబై పోలీసులు

ముంబై: బాలీవుడ్‌ నటుడు సైఫ్ అలీఖాన్‌ దాడి ఘటనపై ముంబై పోలీసులు ఆదివారం ఉదయం మీడియా సమావేశం నిర్వహించారు. సైఫ్‌పై దాడికి పాల్పడిన నిందితుడు గురించి విస్తుపోయే వివరాలు వెల్లడించారు. నిందితుడు భారతీయుడుకాదని.. బంగ్లాదేశ్‌ నుంచి అక్రమంగా వచ్చినట్లు గుర్తించామని ముంబై డీసీపీ జోన్ 9 దీక్షిత్ గెడం వెల్లడించారు. 

సైఫ్ అలీఖాన్‌పై కత్తితో దాడి చేసిన నిందితుడి పేరు విజయ్‌ దాస్‌ అని, స్థానికంగా ఓ పబ్‌లో పని చేస్తున్నాడని ఇంతకు ముందు ప్రచారం జరిగింది. అయితే విచారణలో పోలీసులకు నిందితుడు అనేక పేర్లు చెప్పినట్లు తెలుస్తోంది. లోతుగా విచారించగా.. మహ్మద్ షరీఫుల్ షెహజాద్‌గా తేలింది. ఇందుకు సంబంధించిన ఆధారాలు తమకు లభ్యమయ్యాయని ముంబై డీసీపీ వెల్లడించారు.

సైఫ్ అలీఖాన్‌పై కత్తితో దాడి చేసిన నిందితుడిని ముంబై పోలీసులు శనివారం అరెస్ట్‌ చేశారు. పుణెలోని హీరానందని ఎస్టేట్‌లోని టీసీఎస్ కాల్‌ సెంటర్‌ వెనుక మెట్రో నిర్మాణ స్థలంలో నిందితుడిని అదుపులోకి తీసుకుని అరెస్ట్‌ చేసినట్లు డీసీపీ దీక్షిత్‌ గెడం తెలిపారు. 

#WATCH | Saif Ali Khan Attack case | Mumbai: DCP Zone 9 Dixit Gedam says, "There is primary evidence to anticipate that the accused is a Bangladeshi. He does not have valid Indian documents. There are some seizures that indicate that he is a Bangladeshi national...As of now, we… pic.twitter.com/aV22IhKF30

— ANI (@ANI) January 19, 2025

ఆరు నెలల కిందటే..
ఈ సందర్భంగా ఆయన మాట్లాడుతూ.. నిందితుడు బంగ్లాదేశీయుడని అంచనా. తగిన ప్రాథమిక ఆధారాల్ని స్వాధీనం చేసుకున్నాం. అందుకే  నిందితుడిపై పాస్‌పోర్ట్ చట్టంలోని సంబంధిత సెక్షన్‌లను కేసులో చేర్చాం. నిందితుడు భారతీయుడని నిర్ధారించేందుకు ఎలాంటి పత్రాలు లభ్యం లేదు. సైఫ్‌పై దాడి చేసిన ప్రధాన నిందితుడు భారతదేశంలోకి అక్రమంగా ప్రవేశించాడు. మారు పేర్లతో ప్రాంతాలు మారుతూ 5-6 నెలల క్రితం ముంబైకి వచ్చాడు. కొన్ని రోజులు ముంబైలో ఉన్నాడు. కొన్ని రోజుల పాటు అదే ప్రాంతంలో హౌస్ కీపింగ్ ఏజెన్సీలో పని చేశాడు. ఓ పబ్‌లో వెయిటర్‌గా పనిచేశాడు. విజయ్ దాస్, బిజోయ్ దాస్, మహ్మద్ ఇలియాస్‌తో సహా పలు పేర్లను ఉపయోగించుకున్నాడు. ప్రస్తుతం ఖర్ పోలీస్ స్టేషన్‌లో అతని విచారణ జరుగుతోందని తెలిపారు.