తిరునాళ్ల ఏర్పాట్లపై నేడు సమీక్ష

నరసరావుపేట రూరల్‌: కోటప్పకొండ తిరునాళ్ల ఏర్పాట్లపై రెండవ సమీక్షా సమావేశం బుధవారం మధ్యాహ్నం 3 గంటలకు ఆలయ ప్రాంగణంలో నిర్వహించనున్నట్లు ఈవో డి.చంద్రశేఖరరావు తెలిపారు. జిల్లా ఇన్‌చార్జ్‌ మంత్రి గొట్టిపాటి రవికుమార్‌, దేవదాయ శాఖ మంత్రి ఆనం రామనారాయణరెడ్డి, రెవెన్యూ శాఖ మంత్రి అనగాని సత్యప్రసాద్‌, దేవదాయ శాఖ ప్రిన్సిపల్‌ సెక్రటరీ ఓడరేవు వినయ్‌చంద్‌, ఎమ్మెల్యే డాక్టర్‌ చదలవాడ అరవిందబాబు, జిల్లా కలెక్టర్‌ పి.అరుణ్‌బాబు, ఎస్పీ కె.శ్రీనివాసరావులు పాల్గొంటారని పేర్కొన్నారు.

3న మున్సిపల్‌ వైస్‌ చైర్మన్‌ ఎన్నిక

పిడుగురాళ్ల : మున్సిపల్‌ వైస్‌ చైర్మన్‌ ఎన్నిక ఫిబ్రవరి 3వ తేదీన జరుగుతుందని కమిషనర్‌ పర్వతనేని శ్రీధర్‌ మంగళవారం విలేకరుల సమావేశంలో తెలిపారు. ఈ మేరకు సోమవారం నోటిఫికేషన్‌ విడుదల చేశారని చెప్పారు. మున్సిపల్‌ వైస్‌ చైర్మన్‌గా ఉన్న కొమ్ము ముక్కంటి 2024 మే 27వ తేదీన అనారోగ్యంతో మృతి చెందారు. అప్పటి నుంచి ఆ పదవి ఖాళీగా ఉంది. ఈ నెల 30వ తేదీ లోపు కౌన్సిల్‌ సభ్యులకు వైస్‌ చైర్మన్‌ ఎన్నిక అజెండా కాపీని అందజేయనున్నట్లు ఆయన చెప్పారు. ఈ ఎన్నికకు పల్నాడు జిల్లా కలెక్టర్‌ పి.అరుణ్‌బాబు ప్రత్యేక అధికారిగా వ్యవహరిస్తారని తెలిపారు.