ఉరి వేసుకుని విద్యార్థి ఆత్మహత్య

ఉరి వేసుకుని విద్యార్థి ఆత్మహత్య

మాచర్ల రూరల్‌: మండల పరిధిలోని రాయవరం గ్రామ సమీపంలో ఉన్న ఓ ప్రైవేటు పాఠశాల హాస్టల్‌ గదిలో 9వ తరగతి విద్యార్థి పంది రాజశేఖర్‌ (16) ఉరి వేసుకొని ఆత్మహత్య చేసుకున్న ఘటన గురువారం చోటు చేసుకుంది. రూరల్‌ పోలీసుల కథనం మేరకు.. వెల్దుర్తి మండలం లోయపల్లి గ్రామానికి చెందిన రాజశేఖర్‌ మధ్యాహ్నం పాఠశాల నుంచి హాస్టల్‌కు వెళ్లి భోజనం చేశాడు. తర్వాత గదిలో ఎవరూ లేని సమయం చూసి ఫ్యాన్‌కు తాడుతో ఉరివేసుకున్నాడు. విషయం తెలుసుకున్న యాజమాన్యం రాజశేఖర్‌ను హుటాహుటిన ప్రభుత్వాసుపత్రికి తరలించింది. చికిత్స నిర్వహిస్తుండగా విద్యార్థి మృతిచెందినట్లు వైద్యులు తెలిపారు. రూరల్‌ ఎస్‌ఐ పి.రవిబాబు కేసు నమోదు చేసి, దర్యాప్తు చేస్తున్నారు.

పారిపోయిన విద్యార్థులు క్షేమంగా ఇంటికి

దాచేపల్లి : చదువుకోమని తల్లిదండ్రులు మందలించడంతో ఇంటి నుంచి పారిపోయిన విద్యార్థులను 24 గంటల్లో పోలీసులు పట్టుకున్నారు. దాచేపల్లి ఎస్‌ఐలు సౌందర రాజన్‌, పాపారావు గురువారం వివరాలు వెల్లడించారు. మండలంలోని కేసానుపల్లి గ్రామానికి చెందిన మీసాల డేవిడ్‌, ఇర్లా శ్రీనివాసరావు, నగేష్‌ కృష్ణ స్థానిక జెడ్పీ ఉన్నత పాఠశాలలో 8వ తరగతి చదువుతున్నారు. బడికి వెళ్లకుండా తిరుగుతుండటంతో వీరిని తల్లిదండ్రులు మందలించారు. దీంతో ఈ ముగ్గురూ బుధవారం మధ్యాహ్నం ఇంటి నుంచి పారిపోయారు. నడికూడి రైల్వే స్టేషన్‌లో రేపల్లె ప్యాసింజర్‌ ఎక్కి రేపల్లెలో దిగి అక్కడ నుంచి సికింద్రాబాద్‌ చేరుకుని, జడ్చర్లకు వెళ్లారు. జడ్చర్లలో అనుమానాస్పదంగా తిరుగుతున్న విద్యార్థులను స్థానిక పోలీసులు గుర్తించి స్టేషన్‌కు తరలించారు. వారి నుంచి సమాచారం సేకరించి, దాచేపల్లి పోలీసులకు తెలిపారు. పోలీసు సిబ్బంది జడ్చర్లకు చేరుకుని విద్యార్థులను తీసుకొచ్చి, స్టేషన్‌లో తల్లిదండ్రులకు అప్పగించారు. పిల్లల పట్ల అప్రమత్తంగా ఉండాలని పోలీసులు తల్లిదండ్రులకు సూచించారు.

కన్న తండ్రిని కాల్వలోకి తోసి చంపిన కొడుకు

ఈపూరు(శావల్యాపురం): కన్న తండ్రినే కాల్వలోకి తోసి చంపాడు కొడుకు. ఈ ఘటన ఈపూరు మండలంలోని భద్రుపాలెం గ్రామం సమీపంలో సాగర్‌ కుడి కాల్వ వద్ద గురువారం చోటు చేసుకుంది. పోలీసుల వివరాల మేరకు.. నూజెండ్ల గ్రామానికి చెందిన గంగినేని కొండయ్య (80)కు ఇద్దరు కొడుకులు. మొదటి కుమారుడు వెంకటేశ్వర్లు నూజెండ్లలో ఫ్యాన్సీ షాపు నిర్వహిస్తున్నాడు. ఇటీవల కొండయ్య భార్య మృతి చెందింది. వెంకటేశ్వర్లు తండ్రిని చూసుకుంటున్నాడు. ఈ నేపథ్యంలో తండ్రి కొండయ్యను ఆరోగ్యం సరిగా లేదని చెప్పడంతో వైద్యశాలకు కారులో తీసుకెళ్లాడు. మార్గ మధ్యలో మూత్ర విసర్జన దిగిన కొండయ్యను భద్రుపాలెం సమీపంలోని సాగర్‌ కెనాల్‌లో వెంకటేశ్వర్లు తోసేసినట్లు స్థానికులు పోలీసులకు సమాచారం అందించారు. దీంతో ఈపూరు ఎస్సై ఎం.ఉమా మహేశ్వరరావు ఘటన స్థలానికి చేరుకున్నారు. స్థానికులు సాయంతో పోలీసులు కాల్వలోని మృతదేహాన్ని వెలికితీశారు. మృతదేహాన్ని వినుకొండ ప్రభుత్వ వైద్యశాలకు తరలించారు. ఈ ఘటన స్థానికంగా తీవ్ర కలకలం రేపింది. పోలీసులు కేసు నమోదు చేసి, దర్యాప్తు చేస్తున్నారు.

1/2

ఉరి వేసుకుని విద్యార్థి ఆత్మహత్య

2/2

ఉరి వేసుకుని విద్యార్థి ఆత్మహత్య