ప్రమాదంలో యూపీ వాసి మృతి

గోరంట్ల: ద్విచక్ర వాహనం అదుపు తప్పి కిందపడిన ఘటనలో యూపీకి చెందిన ఓ యువకుడు మృతి చెందాడు. వివరాలు... ఉత్తర్‌ప్రదేశ్‌కు చెందిన కొందరు పాలసముద్రం వద్ద ఉన్న నాసిన్‌ అకాడమీలో పనిచేస్తున్నారు. ఈ క్రమంలో తన బంధువు రవి ఇంటికి ఇటీవల యూపీకి చెందిన జిందూయాదవ్‌ కుమారుడు ఆనంద్‌ యాదవ్‌ (18) వచ్చాడు. మంగళవారం ఉదయం అకాడమీ వద్దకు ద్విచక్ర వాహనంపై బయలుదేరిన ఆనంద్‌యాదవ్‌ మార్గమధ్యంలో నియంత్రణ కోల్పోవడంతో డివైడర్‌ను ఢీకొని కిందపడ్డాడు. తీవ్రంగా గాయపడిన ఆయనను అటుగా వెళుతున్న వారు గుర్తించి వెంటనే హిందూపురంలోని ఆస్పత్రికి తరలించారు. చికిత్సకు స్పందించక ఆనంద్‌యాదవ్‌ మృతి చెందాడు. మృతుడి తండ్రి ఫిర్యాదు మేరకు కేసు నమోదు చేసి, దర్యాప్తు చేపట్టినట్లు పోలీసులు తెలిపారు.