సాక్షి, హైదరాబాద్‌: జేఈఈ మెయిన్స్‌–2 పరీక్ష తేదీలు మారే అవకాశం కన్పిస్తోంది. దీనిపై నేషనల్‌ టెస్టింగ్‌ ఏజెన్సీ (ఎన్‌టీఏ) నిర్ణయం వెల్లడించాల్సి ఉంది. వాస్తవానికి ఏప్రిల్‌ 2, 3, 4, 7, 8 తేదీల్లో రెండో విడత జేఈఈ మెయిన్స్‌ జరగాల్సి ఉంది. ఇందుకు సంబంధించిన అడ్మిట్‌ కార్డులను శనివారం విడుదల చేస్తామని ఎన్‌టీఏ ప్రకటించింది. అయితే ఇదే రోజు సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌ఈ) పరీక్ష ఉంటుంది. సీబీఎస్‌ఈ ఫిబ్రవరి 15 నుంచి ఏప్రిల్‌ 4 వరకు పరీక్షల షెడ్యూల్‌ను ప్రకటించింది. దీని ప్రకారం ఏప్రిల్‌ 2న లాంగ్వేజెస్, 3న హోం సైన్స్, 4న ఫిజియాలజీ ఉంటుంది.సీబీఎస్‌ఈ పరీక్ష ఉదయం 10.30 నుంచి మధ్యాహ్నం 1.30 గంటల వరకు కొనసాగుతుంది. జేఈఈ మెయిన్స్‌ పరీక్ష ఉదయం 9 నుంచి మధ్యాహ్నం 12 గంటల వరకు, మరో షిఫ్ట్‌ సాయంత్రం 3 నుంచి 6 గంటల వరకు ఉంటుంది.దీంతో సీబీఎస్‌ఈ పరీక్ష రాసే విద్యార్థులు జేఈఈ మెయిన్స్‌కు హాజరయ్యే అవకాశం లేకుండా పోతుంది. లేదా మెయిన్స్‌ రాసే విద్యార్థులు సీబీఎస్‌ఈ పరీక్షను వదిలేయాల్సి ఉంటుంది. పలువురు విద్యార్థులు ఈ విషయాన్ని కేంద్రం దృష్టికి తీసుకెళ్లారు. దీంతో శుక్రవారం ఈ అంశంపై కేంద్ర ప్రభుత్వ అధికారులు టెలికాన్ఫరెన్స్‌ ద్వారా సమీక్షించారు. పరీక్ష మార్పు లేదా ప్రత్యామ్నాయాలపై నిర్ణయం ప్రకటించాలని కేంద్రం ఎన్‌టీఏకి సూచించింది.

సాక్షి, హైదరాబాద్‌: సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌ఈ) నిర్వహించే 12వ క్లాస్‌ పరీక్షలకు ఇకనుంచి ప్రాథమిక స్థాయి (బేసిక్‌) కాలిక్యులేటర్‌ను అనుమతించనున్నారు. 2025–26 విద్యా సంవత్సరం నుంచి ఇది అమలులోకి వస్తుంది. సాధారణ కూడికలు, తీసివేతలు, భాగాహారాలకు సంబంధించిన ప్రోగ్రామ్‌ ఉండే కాలిక్యులేటర్‌ను మాత్రమే విద్యార్థులు పరీక్షకు తీసుకెళ్ళవచ్చు. అత్యాధునిక సాంకేతికతతో కూడిన కాలిక్యులేటర్‌ను అనుమతించరు. సీబీఎస్‌ఈ 140వ బోర్డ్‌ మీటింగ్‌ సోమవారం జరిగింది. ఇందులో కాలిక్యులేటర్‌కు అనుమతితో పాటు పలు కీలక నిర్ణయాలు తీసుకున్నారు. విద్యార్థి ఆలోచన శక్తిని సరికొత్త కోణంలో అంచనా వేయడం, సిలబస్‌ విధానం, మూల్యాంకనంలో మార్పులు తదితర సంస్కరణలు తీసుకొచ్చారు. ఇకనుంచి ఆన్‌ స్క్రీన్‌ మార్కింగ్‌ విధానం ఇకనుంచి ఆన్‌ స్క్రీన్‌ మార్కింగ్‌ (ఓఎంఎస్‌) విధానంతో డిజిటల్‌ మూల్యాంకనం పద్ధతిని అనుసరించాలని సీబీఎస్‌ఈ నిర్ణయించింది. ప్రశ్నపత్రాలను స్కాన్‌ చేసి, సాఫ్ట్‌వేర్‌ ద్వారా మూల్యాంకనం చేస్తారు. దీనివల్ల ఫలితాలు త్వరగా వెల్లడయ్యే వీలుంది. అంతే కాకుండా మూల్యాంకనంలో తప్పులను సాఫ్ట్‌వేర్‌ గుర్తించేలా కూడా ఏర్పాట్లు చేస్తున్నారు. ఈ ప్రక్రియను ముందుగా 10, 12 తరగతుల సైన్స్, మేథ్స్‌ సప్లిమెంటరీ పరీక్షలకు పైలెట్‌ ప్రాజెక్టుగా చేపట్టాలని నిర్ణయించారు. సబ్జెక్టుల్లో నైపుణ్యం మేళవింపు చదువుతున్నప్పుడే నైపుణ్యం సంపాదించాలనే సరికొత్త విధానాన్ని అందుబాటులోకి తేవాలని సీబీఎస్‌ఈ నిర్ణయించింది. పారిశ్రామిక భాగస్వామ్యంతో నైపుణ్యాన్ని సబ్జెక్టుల్లో మేళవించే ఏర్పాట్లు చేయాలని భావిస్తోంది. టెన్త్‌ స్టాండర్డ్‌ నుంచే దీన్ని అందుబాటులోకి తేవాలని నిర్ణయించింది. పాఠం పూర్తయిన రోజే సైన్స్, సోషల్‌ సబ్జెక్టులకు పరీక్షలు నిర్వహిస్తారు. లోతైన ప్రశ్నలతో కూడిన రీజనింగ్‌ అంశాలను విద్యార్థులకు అందిస్తారు. ఈ మేరకు బోధన ప్రణాళికకు బోర్డు ఆమోదం తెలిపింది. ఈ విధానం 2026–27 విద్యా సంవత్సరం నుంచి అందుబాటులోకి తేవాలని నిర్ణయించింది.

చెన్నైలో CBSE పరీక్షల సమయంలో స్కూల్ గోడ ఎక్కి, తమ పిల్లల కోసం తల్లిదండ్రులు చూస్తున్న ఈ ఫోటో ఇప్పుడు వైరల్ అవుతోంది. దీన్ని చూసి మనమందరం ఆలోచించాల్సిన సమయం వచ్చింది.ఇలాంటి ఘటనలు ఏ ప్రశ్నలు లేవనెత్తుతున్నాయి?🔹మన విద్యా వ్యవస్థ పిల్లలపై ఎంత ఒత్తిడిని పెడుతోంది?🔹తల్లిదండ్రుల ఆందోళన పిల్లల మనసుపై ఎలా ప్రభావం చూపుతోంది?🔹తల్లిదండ్రుల ప్రేమ వారికి బలాన్ని ఇస్తుందా, భయాన్ని పెంచుతుందా?ప్రతీ సంవత్సరం పరీక్షల సీజన్ వచ్చినప్పుడల్లా విద్యార్థుల కన్నా ఎక్కువగా ఒత్తిడిలో ఉంటున్న వారు తల్లిదండ్రులే. "తప్పక పాస్ అవ్వాలి!", "అగ్రశ్రేణి మార్కులు రావాలి!", "లేకపోతే భవిష్యత్తు అంధకారం!" – ఇవీ తల్లిదండ్రులలో నిండిపోయిన భయాలు. ర్యాంక్ కోసమే మన ప్రేమ అని పిల్లలకు అనిపించకూడదు.ఇదీ చదవండి: చందాకొచ్చర్‌ న్యూ జర్నీ: కార్పొరేట్‌ వర్గాల్లో తీవ్ర ఆసక్తి తల్లిదండ్రులు చేయకూడనిది...❌ హెలికాప్టర్ పేరెంటింగ్:ప్రతీ చిన్న విషయాన్ని తల్లిదండ్రులు గమని…పిల్లలను ఎలా ప్రోత్సహించాలి?✅ పరీక్ష ఫలితాలు ఆశించినంత రాలేదనుకోండి. పిల్లలు దిగులుగా ఉన్నప్పుడు, "నీ ప్రయత్నం గొప్పది, మార్కులు మాత్రమే జీవితానికి అద్దం కాదు" అని చెప్పండి. ఆత్మవిశ్వాసాన్ని పెంచండి.✅ పిల్లలకు చదువు అంటే భయం కాకుండా ఆసక్తిగా ఉండేలా చేయండి. "ఏ విషయం నచ్చింది? ఏ ప్రశ్న ఆసక్తికరంగా అనిపించింది?" అని అడిగితే, పిల్లలు చదువును ఒత్తిడిగా కాకుండా, నేర్చుకునే ప్రక్రియగా భావిస్తారు.✅ "నీ ఫ్రెండ్ అజయ్ టాప్ ర్యాంక్ తెచ్చుకున్నాడు, నీవు ఎందుకు సాధించలేకపోతున్నావు?" అనే మాటలు పిల్లల ఆత్మవిశ్వాసాన్ని దిగజార్చతాయి. ప్రతి ఒక్కరికీ తన ప్రయాణం ఉంటుంది. అందుకే పోల్చడం మానండి.✅ తప్పిదాలను సహజంగా అంగీకరించండి. "ఈసారి ఏమి తప్పైంది? తర్వాత ఎలా మెరుగుపరచుకోవచ్చు?" అనే విధంగా ప్రశ్నించడం ద్వారా పిల్లలు సమస్యలను అర్థం చేసుకొని, మెరుగుపడటాన్ని నేర్చుకుంటారు.గుర్తుంచుకోవాల్సిన విషయాలు📌 పరీక్షలు జీవితాన్ని నిర్ణయించవు. అవి ఒక చిన్న అంచనా మాత్రమే.📌 పిల్లలకు భయం పోగొట్టండి. పరీక్షలు అంటే భయపడేలా కాకుండా, కొత్త విషయాలు నేర్చుకునే అనుభవంగా చూడమని ప్రేరేపించండి.📌 పిల్లలు మానసికంగా ఆరోగ్యంగా ఉండాలి. ఒత్తిడితో విజయం సాధించడమే కాదు, ఆనందంగా ఎదగాలి.📌 గోడలు ఎక్కే తల్లిదండ్రులు కాకుండా, పిల్లలకు మార్గదర్శకంగా ఉండండి.పరీక్షల సమయం పిల్లలకు ఒత్తిడిగా కాకుండా, నేర్చుకునే మంచి అవకాశంగా మార్చే బాధ్యత తల్లిదండ్రులదే. పిల్లల భవిష్యత్తును భయంతో నింపకుండా, ధైర్యంగా ముందుకు నడిపిద్దాం!మీకేమైనా కౌన్సెలింగ్ సహాయం కావాలంటే నన్ను సంప్రదించండి.-సైకాలజిస్ట్‌ విశేష్‌

సాక్షి, అమరావతి: రాష్ట్ర ఇంటర్మీడియట్‌ విద్యలో మార్పులు చోటుచేసుకుంటున్నాయి. 2025–26 విద్యా సంవత్సరం నుంచి ప్రభుత్వ జూనియర్‌ కాలేజీల్లో ఇంటర్‌లో ఎన్సీఈఆర్టీ సిలబస్‌ను, సీబీ ఎస్‌ఈ విధానాలను అమలు చేయడానికి ప్రభుత్వం నిర్ణయం తీసుకుంది. జూనియర్‌ కాలేజీలు ఏప్రిల్‌ 1వ తేదీనే ప్రారంభం కానున్నాయి. ఆ రోజు ఇంటర్‌ రెండో సంవత్సరం సిలబస్‌ బోధన మొదలవుతుంది. ఏప్రిల్‌ 5 నుంచి మొదటి సంవత్సరం ప్రవేశాలు చేపడతారు. ఏప్రిల్‌ 23 నుంచి జూన్‌ ఒకటో తేదీ వరకు వేసవి సెలవులు ఇస్తారు. జాతీయ విద్యా విధానం–2020కి అనుగుణంగా ఇప్పటికే పాఠశాల విద్యలో సీబీఎస్‌ఈ విధానంలో ఎన్సీఈఆర్టీ పాఠాలను బోధిస్తున్నారు. ప్రస్తు త (2024–25) విద్యా సంవత్సరంలో పదో తరగతి బోధన సైతం ఇదే విధానంలోకి మారింది. వచ్చే నెలలో (మార్చిలో) పదో తరగతి పరీక్షలు రాసే విద్యార్థులకు అనుగుణంగా 2025–26 వి ద్యా సంవత్సరం నుంచి ఇంటర్మీడియట్‌ విద్యలో ఎన్సీఈఆర్టీ సిలబస్, సీబీఎస్‌ఈ విధానాలు అమలుచేస్తారు. ఇంటర్‌ విద్యలో జాతీయ స్థాయి సిలబస్‌ అమలు సాధ్యాసాధ్యాలు, చేపట్టాల్సిన మా­ర్పు­లపై నియమించిన కమిటీలు 12 రాష్ట్రాల్లో పర్యటించి ఇచ్చిన నివేదిక మేరకు ఈ మార్పులకు శ్రీకారం చుట్టారు. 2025–26 విద్యా సంవత్సరంలో ఇంటర్‌ మొదటి సంవత్సరం, 2026–27లో రెండో సంవత్సరంలో కొత్త సిలబస్‌ ప్రవేశపెడతారు. అలాగే, వచ్చే విద్యా సంవత్సరంలో కొత్తగా ఎంబైపీసీ కోర్సును సైతం ప్రవేశపెడుతున్నారు. సీబీఎస్‌ఈ తరహాలో మార్పులుఇప్పటి వరకు ఇంటర్‌ పరీక్షల తర్వాత వేసవి సెలవులు, ఆ తర్వాత జూన్‌ 1వ తేదీ నుంచి కొత్త విద్యా సంవత్సరం ప్రారంభమయ్యేది. 223 రోజులు పనిదినాలు ఉండేవి. అయితే, సీబీఎస్‌ఈ విధానాన్ని అనుసరిస్తున్న నేపథ్యంలో ఏప్రిల్‌ 1 నుంచి విద్యా సంవత్సరం ప్రారంభించి, ఇంటర్‌ రెండో ఏడాది బోధన మొదలు పెడతారు. ఏప్రిల్‌ 23 నుంచి వేసవి సెలవులు ఇస్తారు. జూన్‌ ఒకటిన కాలేజీలు తిరిగి ప్రారంభమవుతాయి. తొలి 23 రోజుల్లో కనీసం 15 శాతం సిలబస్‌ పూర్తిచేసి వేసవి సెలవులు ఇస్తారు. పని దినాలు సైతం నెల రోజులు పెరిగాయి. ప్రభుత్వ జూనియర్‌ కాలేజీల్లో ఏప్రిల్‌ 5 నుంచే మొదటి సంవత్సరంలో ప్రవేశాలు చేపట్టనున్నారు. ఏప్రిల్‌ ఒకటో తేదీ వరకు టెన్త్‌ పరీక్షలు జరుగుతాయి. అందువల్ల పదో తరగతి పరీక్షలు (రెగ్యులర్‌/ అడ్వాన్స్‌డ్‌ సప్లిమెంటరీ) రాసిన ప్రతి విద్యార్థి ప్రభుత్వ జూనియర్‌ కాలేజీల్లో ప్రవేశం పొందవచ్చు. పాసైన వారిని కొనసాగించి, ఫెయిలైనవారిని తొలగిస్తారు.ప్రభుత్వ కాలేజీల్లో జేఈఈ, ఎంసెట్‌ శిక్షణ రాష్ట్రంలోని సైన్స్‌ విద్యార్థుల్లో ఎక్కువ మంది జేఈఈ, నీట్‌ వంటి జాతీయ స్థాయి పోటీ పరీక్షలు రాస్తున్నందున ప్రభుత్వ జూనియర్‌ కాలేజీల్లో చదివే విద్యార్థులకు కూడా వీటిలో శిక్షణ ఇవ్వనున్నారు. ప్రభుత్వ జూనియర్‌ లెక్చరర్లతోనే శిక్షణ ఇవ్వాలని నిర్ణయించారు. అవసరం మేరకు ప్రత్యేక నిపుణులతో తరగతులు చెప్పిస్తారు. ఇందుకోసం ప్రత్యేక మెటీరియల్‌ను సిద్ధం చేస్తున్నారు. ఉదయం 9 నుంచి మధ్యాహ్నం 3 గంటల వరకు అకడమిక్‌ తరగతులు నిర్వహిస్తారు. మధ్యాహ్నం 3 నుంచి సాయంత్రం 5 వరకురెండు గంటలు జేఈఈ, ఎంసెట్‌ శిక్షణ ఇస్తారు.

న్యూఢిల్లీ: సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌(సీబీఎస్‌ఈ) అధికారుల ఆకస్మిక తనిఖీల్లో ‘డమ్మీ’ విద్యార్థుల బాగోతం బయటపడింది. ఆయా సీబీఎస్‌ఈ అఫిలియేటెడ్‌ పాఠశాలల్లో వాస్తవ విద్యార్థుల సంఖ్యకు మించి ఎన్‌రోల్‌మెంట్‌ ఉన్నట్లు గుర్తించారు. ఢిల్లీ, బెంగళూరు, వారణాసి, బిహార్, గుజరాత్, ఛత్తీస్‌గఢ్‌లలోని మొత్తం 29 పాఠశాలల్లో ఇలాంటి దందా జరుగుతున్నట్లు తేల్చారు. బాధిత పాఠశాలలకు నోటీసులు జారీ చేశారు. మౌలిక సదుపాయాల లేమి వంటి ఇతర నిబంధనల తీవ్ర ఉల్లంఘనకు పాల్పడిన ఈ పాఠశాలల యాజమాన్యాలపై న్యాయపరంగానూ చర్యలు తీసుకోనున్నారు.బుధ, గురువారాల్లో 29 బృందాలు ఈ మేరకు తనిఖీలు చేపట్టాయని సీబీఎస్‌ఈ కార్యదర్శి హిమాన్షు గుప్తా చెప్పారు. అవకతవకలను గుర్తించిన స్కూళ్లలో దేశ రాజధాని ఢిల్లీలోనివే 18 కాగా, వారణాసిలో మూడు, బెంగళూరు, పట్నా, అహ్మదాబాద్, బిలాస్‌పూర్, ఛత్తీస్‌గఢ్‌లలో రెండేసి చొప్పున ఉన్నాయన్నారు. ఇంజినీరింగ్, మెడికల్‌ కళాశాలల్లో ప్రవేశాలకు ప్రిపేరయ్యే విద్యార్థుల్లో కొందరు డమ్మీ స్కూళ్లలో ప్రవేశాలు పొంది, పరీక్షలకు సిద్ధమయ్యేందుకే పూర్తి సమయం కేటాయిస్తున్నారు.తరగతులకు హాజరు కాకుండా వీరు నేరుగా బోర్డ్‌ పరీక్షలు రాసేలా ఆయా స్కూళ్లు వీరికి వెసులుబాటు కల్పిస్తున్నాయి. ఏయే రాష్ట్రాల్లో మెడికల్‌ లేదా ఇంజినీరింగ్‌ సీట్లు పొందేందుకు అవకాశం ఉంటుందో చూసుకుని మరీ సంబంధిత ప్రాంతాల్లోని డమ్మీ స్కూళ్లలో ప్రవేశాలు తీసుకుంటున్నారు. చ‌ద‌వండి: కొబ్బరినూనెపై ‘పన్ను’ వివాదంలో సుప్రీంకోర్టు కీలక తీర్పు

ప్రపంచమంతా ఇంగ్లిష్‌ ప్రాధాన్యతను గుర్తిస్తోంది. యూరోపియన్‌ యూనియన్‌ ఇకనుంచీ జర్మన్‌కు బదులుగా ఇంగ్లిష్‌ అధికారిక భాషగా ఉంటుందని ప్రకటించింది. ప్రపంచంలోని చాలా దేశాలు తమ మాతృభాషతో పాటు ఆంగ్ల మీడియం పాఠశాల విద్యకు మారుతున్నాయి. కానీ భారతదేశం మాత్రం కాలాన్ని వెనక్కి తిప్పడానికి ప్రయత్నిస్తోంది. ఇంగ్లిష్‌ భాషను వలసవాదంతో ముడిపెట్టడం విధానపరమైన తప్పిదం. ముఖ్యంగా ఆంధ్రప్రదేశ్‌లో అధికారంలోకి వచ్చిన కూటమి ప్రభుత్వం అన్ని ప్రభుత్వ పాఠశాలల్లో ఇంగ్లిష్‌ మీడియం విద్యను నిర్వీర్యం చేసేందుకు నడుం బిగించింది. వైసీపీ ప్రభుత్వ హయాంలో మొదలైన ఆంధ్ర మోడల్‌ విద్యా ప్రయోగం దుష్ట రాజకీయ శక్తుల కుట్రవల్ల ఆగిపోకూడదు.యావత్‌ ప్రపంచం ఇంగ్లిష్‌ను పాఠశాల స్థాయి బోధనా భాషగా స్వీకరిస్తున్న సమ యంలో, భారతదేశం ఒక నిర్దిష్టమైన ప్రణాళికతో ఇంగ్లిష్‌ విద్యకంటే వెనుకటి రోజులకు కాలాన్ని తిప్పుతోంది. ఇంగ్లిష్‌ భాషను వలస వాదంతో ముడిపెట్టడం ఒక ప్రధాన విధానపరమైన తప్పిదం. బీజేపీ అధికారంలోకి వచ్చినప్పటి నుండి ఇంగ్లిష్‌ ఒక వలస భాష అనే సిద్ధాంతాన్ని మరింత స్పష్టంగా తీసుకొస్తున్నారు.ఆంధ్రప్రదేశ్‌లో టీడీపీ, జనసేన, బీజేపీ కూటమి 2024 ఎన్నికల్లో అధికారంలోకి వచ్చిన తర్వాత, భారతదేశంలోని ప్రభుత్వ పాఠశా లల్లో ఇంగ్లిష్‌ మాధ్యమ విద్యపై జరిగిన మొట్టమొదటి అతి పెద్ద ప్రయోగాన్ని వెనక్కి తిప్పేశాయి. ఇప్పటికే కొత్త ప్రభుత్వం ప్రైవేట్‌ పాఠశాలలతో పాటు అన్ని ప్రభుత్వ పాఠశాలల్లో తప్పనిసరి చేసిన సీబీఎస్‌ఈ సిలబస్‌ను ఉపసంహరించుకుంది. ‘అమ్మ ఒడి’ పేరుతో తల్లులకు సంవత్సరానికి ఇచ్చే 15,000 రూపాయల ఆర్థిక సహా యాన్ని నిశ్శబ్దంగా నిలిపివేశారు. సహజంగానే, కూటమిలో భాగంగా అధికారంలోకి వచ్చిన మూడు పార్టీలు ప్రభుత్వ పాఠశాలల్లో ఇంగ్లిష్‌ మాధ్యమాన్ని ప్రవేశపెట్టడాన్ని వ్యతిరేకించాయి. అవి ప్రైవేట్‌ రంగ ఇంగ్లిష్‌ మాధ్యమ విద్యకు గట్టిగా మద్దతు ఇచ్చాయి. ప్రభుత్వ రంగంలోని అన్ని పాఠశాలల్లో ఇంగ్లిష్‌ మీడియం విద్యను నిర్వీర్యం చేసి మళ్లీ తెలుగు మీడియం వైపు మళ్లించేందుకు అన్ని విధాలా నడుం బిగిస్తా మన్న స్పష్టమైన సంకేతంతో, ప్రైవేట్‌ ఇంగ్లిషు మీడియం స్కూళ్లు, కాలేజీల యజమాని నారాయణను మళ్లీ మంత్రిని చేశారు చంద్ర బాబు. ఈ దిశ స్పష్టంగా ఉంది.కేంద్రంలోని ఎన్డీయే ప్రభుత్వం కూడా ప్రభుత్వ పాఠశాలల్లో ఇంగ్లిషు మీడియం విద్యను అనుమతించొద్దనే విషయంలో స్పష్టంగా ఉంది. ఎన్డీయేలోని ప్రధాన నేతలు నరేంద్ర మోదీ, అమిత్‌ షా, నితీష్‌ కుమార్, చంద్రబాబు నాయుడు అందరూ ఈ విషయమై ఒకే మాట మీద ఉన్నారు. నితీష్‌ కుమార్‌ అయితే తన సమావేశాల్లో పార్టీ నాయ కుడైనా, అధికారి అయినా ఇంగ్లిష్‌లో మాట్లాడినా ఇష్టపడరు.సుప్రీంకోర్టులోనూ, ప్రతి హైకోర్టులోనూ అన్ని వ్యవహారాలుఆంగ్లంలో ఉండాలని భారత రాజ్యాంగంలోని ఆర్టికల్‌ 348(1)(ఎ) పేర్కొన్నప్పటికీ, ప్రాంతీయ భాషను ఉపయోగించాలంటూ సుప్రీంకోర్టు, హైకోర్టులను కూడా ఒత్తిడి చేసే ప్రయత్నం జరుగుతోంది. ఈ రకమైన విద్యా విధానం పట్ల ఆంధ్రప్రదేశ్‌లో లేదా జాతీయ స్థాయిలో కాంగ్రెస్‌ మౌనంగా ఉంది. రిజర్వేషన్లు ఉన్నా లేకపోయినా, భవిష్యత్తులో కూడా ప్రభుత్వ పాఠశాలల్లో చదువుకున్న యువత ప్రైవేట్‌ ఇంగ్లిషు మీడియంలో చదువుకున్న యువతతో పోటీపడే అవకాశం లేదని ఇది చూపుతోంది. అందరూ మాట్లాడిన ‘ఆంధ్రా మోడల్‌’ సృష్టించిన ఆశ నిరాశగా మారుతోంది. ప్రభుత్వ పాఠశాలల్లో ఇంగ్లిషు మీడియం విద్యా విస్తరణకు భారత కమ్యూనిస్టు పార్టీలు, గ్రూపులు కూడా అడ్డంకిగా మారాయి.దేశంలో ఇంగ్లిష్‌ విద్య 1817లో ప్రారంభమైంది. ఇది భారతదేశంలో ఆ భాష ప్రవేశించిన 207వ సంవత్సరం. అక్టోబర్‌ 5న భారతీయ ఇంగ్లిష్‌ దినోత్సవం అనే విషయం తెలిసిందే.భారతదేశంలో ప్రతి సంవత్సరం ఒక్కో భాషా దినోత్సవ వేడుకలు జరుగు తాయి. కానీ ఇంగ్లిష్‌ను ప్రపంచ, భారతీయ అవకాశాల భాషగా నేర్చుకుని, దాని నుండి ప్రయోజనం పొందినవారు... అధికారం,సంపద, ప్రపంచ చలనశీలత భాషగా దాన్ని ఉపయోగి స్తున్నప్పటికీ ఒక భాషగా ఆంగ్ల దినోత్సవాన్ని జరుపుకోరు. పైగా బహిరంగ వేదికల నుండి దాన్ని వలస భాషగా ఖండిస్తూనే ఉంటారు.ఇంగ్లిషు భాష నుండి అత్యధికంగా ప్రయోజనం పొందిన వ్యక్తులు అగ్రవర్ణాలు, ముఖ్యంగా బ్రాహ్మణులు, బనియాలు, కాయ స్థులు, ఖత్రీలు. చారిత్రకంగా భారతీయ పాలక కులమైన క్షత్రియులు ఈ భాష శక్తిని ఇటీవలే గ్రహించారు. వారి పిల్లలను ఇంగ్లిష్‌ మాధ్య మంలో చదివిస్తున్నారు.ఆంగ్లం వల్లే ప్రపంచ స్థాయికమలా హ్యారిస్‌ భారతీయ సంతతికి చెందిన బ్రాహ్మణ మహిళ. 245 సంవత్సరాల రాజ్యాంగబద్ధ ప్రజాస్వామ్యం ఉనికిలో ఉన్న అమెరికాకు మొదటి మహిళా అధ్యక్షురాలిగా అవతరించే అవకాశం ఉంది. ఆ దేశంలో ఇప్పటి వరకు ఏ శ్వేతజాతీయురాలూ అధ్యక్షురాలు లేదా ఉపాధ్యక్షురాలు కాలేదు. కమల ఇప్పటికే అమెరికా తొలి ఉపాద్యక్షురాలు అయ్యారు. వలసరాజ్యాల కాలంలో ఇంగ్లిష్‌ భారత దేశానికి రాకపోతే, ప్రపంచ భాషగా ఇంగ్లిష్‌ లేకుండా ఉంటే ఇది సాధ్యమయ్యేదా? తమిళ బ్రాహ్మణ సంప్రదాయ కుటుంబంలో పుట్టి పెరిగిన అమ్మాయి అయిన ఆమె తల్లి శ్యామలా గోపాలన్‌ ఇంగ్లిష్‌ చదవకుండా ఉండి ఉంటే అమెరికా వెళ్లి తన జీవితాన్ని తీర్చిదిద్దుకుని తన ఇద్దరు కూతుళ్లు కమల, మాయలను చదివించి ఉండేవారా? ఒక సాధారణ మధ్యతరగతి ఒంటరి తల్లి కుటుంబం నుండి వచ్చిన కమల ఇంగ్లిష్‌ భాష లేకుండా, తన స్థాయికి తగ్గ లాయర్‌గా ఎదిగి, ప్రపంచంలోని అత్యంత శక్తిమంతమైన దేశానికి ఉపాధ్యక్షురాలిగా ఎదిగి, ఇప్పుడు అత్యంత సంపన్నుడైన శ్వేతజాతి అమెరికన్‌ డోనాల్డ్‌ ట్రంప్‌ను అధ్యక్ష రేసులో సవాలు చేసే అవకాశాన్ని పొందగలదని మనం ఊహించగలమా? పశ్చిమ భారతదేశానికి చెందిన ఖత్రీ కుటుంబానికి చెందిన రిషి సునాక్‌ తల్లిదండ్రులు ఇంగ్లిష్‌ భాషలో విద్య నేర్వకపోయి ఉంటే, రెండు వందల సంవత్సరాలకు పైగా భారతదేశాన్ని పాలించినబ్రిటన్కు ఆయన ప్రధాన మంత్రి కావడం మనం ఊహించగలమా? భారతదేశం స్వాతంత్య్రం సాధించే నాటికి అగ్రవర్ణాల ఇళ్లలోనిసాంస్కృతిక వాతావరణాన్ని ఇంగ్లిష్‌ మార్చింది. కానీ ఆ భాష పరిధిని, శక్తిని ఉపయోగించి అనేక విధాలుగా ప్రయోజనం పొందిన అదే వ్యక్తులకు ఇప్పుడు రైతులు, కార్మికుల పిల్లలు ఆ భాష నేర్చు కోవడం ఇష్టం లేదు. ఇది వైరుధ్యం కాదా?యూరప్‌ కూడా ఆంగ్లం దిశగా...యూరోపియన్‌ యూనియన్‌ ఈ సంవత్సరం ఇకనుంచీ జర్మన్ కు బదులుగా ఇంగ్లిష్‌ అధికారిక భాషగా ఉంటుందని ప్రకటించింది. ప్రపంచంలోని చాలా దేశాలు తమ మాతృభాషతో పాటు తమ పాఠశాలల్లో ఆంగ్ల మీడియం పాఠశాల విద్యకు మారుతున్నాయి.ఫ్రా¯Œ ్స, జపాన్, చైనా, రెండు కొరియన్‌ దేశాలు ఒకే జాతీయ భాషతో వ్యవహరిస్తున్నప్పటికీ, మొదటి నుండీ తమ పాఠశాలల్లో ఆంగ్లాన్ని బోధించడం ప్రారంభించాయి. ప్రపంచీకరణ చెందిన ప్రపంచంలో భాషతో ముడిపడి ఉన్న జాతీయవాదం తగ్గుముఖం పట్టింది. రెండవ ప్రపంచ యుద్ధానంతర సందర్భంలో బ్రిటిషేతర దేశాలన్నీ తీవ్రమైన భాషాపరమైన మనోభావాలను కలిగి ఉండేవి. కానీ ప్రతి ఐరోపా దేశం కూడా ఇప్పుడు ఆర్థికాభివృద్ధికి ఇంగ్లిష్‌ తప్పనిసరి అని గ్రహించింది. మునుపటి ఫ్రెంచ్, స్పానిష్‌ కాలనీలు కూడా నెమ్మదిగా తమ పాఠశాలల్లో ఆంగ్ల బోధనకు మారుతున్నాయి.భావోద్రేక భరితమైన మాతృభాష సిద్ధాంతంతో భారతదేశం అనేక చిన్న భాషలు మాట్లాడే జాతులుగా విభజించబడింది. శూద్రులు, దళితులు, ఆదివాసీలు తమదైన చిన్న భాషా ప్రపంచంలో ఇరుక్కుపోయారు. ఈ రకమైన భాషాపరమైన నిర్బంధం వారిని సరైన పౌరసత్వ పాత్రలోకి ఎదగనివ్వదు. ఆంధ్రప్రదేశ్‌లో ప్రారంభించినటువంటి విద్యా ప్రయోగానికి దుష్ట రాజకీయ శక్తుల కుట్రతో చావుదెబ్బ తగలకూడదు.- ప్రొ‘‘ కంచ ఐలయ్య షెపర్డ్‌, వ్యాసకర్త ప్రముఖ రచయిత, సామాజిక కార్యకర్త (నేడు ఇండియన్‌ ఇంగ్లిష్‌ డే)-

ప్రభుత్వ ఆస్తులను, ప్రజాధనాన్ని పరిరక్షించాల్సిన సర్కారే.. ఖజానా దోపిడీకి లైన్‌ క్లి­య­ర్‌ చేసింది. రివర్స్‌ టెండరింగ్‌ విధానాన్ని రద్దు చేస్తూ పాత పద్ధతి (2003 జూలై 1న జారీ చేసిన జీవో 94) ప్రకారమే టెండర్లు పిలిచి, పనులను కాంట్రాక్టర్లకు అప్ప­గించాలని ఆగస్టు 28న రాష్ట్ర మంత్రివర్గం నిర్ణయించింది. దానిని అమలు చేస్తూ ఆదివారం జలవనరుల శాఖ ప్రత్యేక ప్రధాన కార్యదర్శి జి.సాయిప్రసాద్‌ ఉత్తర్వులు (జీవో ఎంఎస్‌ నంబర్‌ 40) జారీ చేశారు. దీంతో 2014–19 మధ్య కాంట్రాక్టర్లతో కలిసి ప్రభు­త్వ ఖజానాను దోచేసినట్లుగానే ఇప్పుడూ దోపిడీకి ప్రభుత్వ పెద్దలు సిద్ధమయ్యారు. సీబీఎస్‌ఈ సిలబస్‌ రద్దు.. ఇంగ్లిష్‌ మీడి­యం రద్దు.. టోఫెల్‌ వ్యవస్థ రద్దు.. సెబ్‌ రద్దు.. వలంటీర్‌ వ్యవస్థ రద్దు.. ఇలా గత ప్రభుత్వం ప్రతిష్టాత్మకంగా తెచ్చిన వ్యవస్థలన్నీంటినీ చంద్రబాబు ప్రభుత్వం రద్దు చేయడమే లక్ష్యంగా అడుగు­లేస్తోంది. కీలక వ్యవస్థలను నిర్వీర్యం చేస్తోంది. ఈ పరంపరలో పొరుగు రాష్ట్రాల ప్రశంసలు పొందిన రివర్స్‌ టెండరింగ్‌ విధానాన్నీ తాజాగా రద్దు చేస్తూ ఆదేశాలు జారీ చేసింది.ప్రతిపాదన దశలోనే బేరసారాలు రాష్ట్ర విభజన తర్వాత అధికారంలోకి వచ్చిన చంద్రబాబు ప్రభుత్వంలో ముఖ్య నేతలు ఒక పని ప్రతిపాదన దశలోనే కాంట్రాక్టర్లతో బేరసారాలాడి కమీషన్లు ఖరారు చేసుకునేవారు. ఈ మేరకు అంచనాలు పెంచేయించడం.. ఎక్కువ కమీషన్‌ ఇచ్చేందుకు అంగీకరించిన కాంట్రాక్టర్‌కే ఆ పని దక్కేలా నిబంధనలను రూపొందించి టెండర్లు పిలవడం.. అదే కాంట్రాక్టర్‌కు అధిక ధరకు పనులు కట్టబెట్టడం.. ప్రభుత్వ ఖజానా నుంచి ఆ కాంట్రాక్టర్‌కు మొబిలైజేషన్‌ అడ్వాన్సు ఇచ్చేసి.. వాటినే కమీషన్‌లుగా రాబట్టుకుని తమ జేబులో వేసుకోవడం రివాజుగా మార్చుకున్నారు. అప్పట్లో కేవలం టెండర్ల వ్యవస్థను నీరుగార్చి ప్రభుత్వ ఖజానా నుంచి సుమారు రూ.20 వేల కోట్లను దోచేశారు. 7,500కోట్లు ఆదా వైఎస్సార్‌సీపీ ప్రభుత్వం వచ్చిన తర్వాత బోర్డ్‌ ఆఫ్‌ చీఫ్‌ ఇంజనీర్స్‌(బీవోసీఈ) ఇచ్చిన నివేదిక ఆధారంగా టెండర్ల వ్యవస్థను ప్రక్షాళన చేశారు. జ్యుడిషియల్‌ ప్రివ్యూ, రివర్స్‌ టెండరింగ్‌ విధానం వంటి విప్లవాత్మక సంస్కరణలను అమల్లోకి తెస్తూ 2019, ఆగస్టు 16న ఉత్తర్వులు(జీవో 67) జారీ చేశారు. మొబిలైజేషన్‌ అడ్వాన్సులను పూర్తిగా రద్దు చేశారు. అత్యంత పారదర్శకంగా రివర్స్‌ టెండరింగ్‌ విధానంలో టెండర్లు నిర్వహించడంతో కాంట్రాక్టర్లు భారీ ఎత్తున పోటీ పడ్డారు. దీంతో కాంట్రాక్టు విలువ కంటే తక్కువ ధరకే పనులు చేయడానికి ముందుకొచ్చారు. 2019 ఆగస్టు 16 నుంచి 2024 మే వరకు ప్రభుత్వ ఖజానాకు రూ.7,500 కోట్లకుపైగా ఆదా అయ్యాయి. రివర్స్‌ టెండరింగ్‌ విధానాన్ని అమలు చేయాలంటూ 2019, జూలై 26న నివేదిక ఇచ్చిన బీవోసీఈతోనే... ఆ విధానం రద్దు చేయాలంటూ గత నెల 21న చంద్రబాబు ప్రభుత్వం నివేదిక తెప్పించుకుంది. ఆ నివేదికను అదే నెల 28న కేబినెట్‌లో ఆమోదించి.. పాత విధానంలో టెండర్ల నిర్వహణకు గ్రీన్‌ సిగ్నల్‌ ఇచ్చి0ది.– సాక్షి, అమరావతి

సాక్షి, అమరావతి: మొన్న టోఫెల్‌.. నిన్న ఐబీ.. నేడు సీబీఎస్‌ఈ.. గత ముఖ్యమంత్రి వైఎస్‌ జగన్‌ ఎంతో ఉన్నతాశయంతో పేద విద్యార్థుల భవి­ష్యత్తుకు వీటి ద్వారా బంగారు బాటలు వేస్తే ప్రస్తుత చంద్ర­బాబు ప్రభుత్వం వాటిని ఒక్కొ­క్క­టిగా అటకెక్కి­స్తోంది. రాష్ట్ర విద్యార్థుల భవి­ష్యత్తు ఉజ్వలంగా ఉండా­లన్న సత్సంకల్పంతో విద్యా­రంగంలో జగన్‌ అనేక సంస్కరణలు అమలుచేస్తే.. ఆయన మీద అక్కసుతో చంద్ర­బాబు సర్కారు పేద విద్యార్థుల భవి­ష్యత్తును అంధకారంలోకి నెట్టేస్తూ పాఠశాల విద్యను తిరోగమనం బాట పట్టిస్తోంది. ఇందులో భాగంగా.. జగన్‌ అమలుచేసిన ఒక్కో అంశానికీ స్వస్తి చెబుతోంది. టోఫెల్, ఇంటర్నే­షనల్‌ బాకలారియెట్‌ (ఐబీ) బోధనకు ఇప్పటికే చరమగీతం పాడిన ఈ ప్రభుత్వం అమ్మఒడి, ఫీజు రీయింబర్స్‌మెంట్, వసతిదీవెన ఊసెత్తడంలేదు. తాజాగా.. సీబీఎస్‌ఈ బోధనకూ తూచ్‌ అంటూ పేద పిల్లలకు అందుతున్న నాణ్యమైన విద్యను దూరం చేస్తోంది. ప్రభుత్వ పాఠశాలల పీక పిసికేస్తోంది.విద్యా సంవత్సరంలో మధ్యలో..గత వైఎస్సార్‌సీపీ ప్రభుత్వం ఐదేళ్ల పాలనలో ప్రభుత్వ బడులను అద్భుతంగా తీర్చిదిద్ది తల్లిదండ్రుల్లోను, విద్యార్థుల్లోను వాటిపై పెంచిన నమ్మకాన్ని చంద్రబాబు ప్రభుత్వం నిర్వీర్యం చేయడమే పనిగా పెట్టుకుంది. ఇందులో భాగంగానే రాష్ట్రవ్యాప్తంగా గత విద్యా సంవత్సరంలో వైఎస్‌ జగన్‌ సర్కారు 1,000 ప్రభుత్వోన్నత పాఠశాలల్లో సీబీఎస్‌ఈ బోధనను అమల్లోకి తెస్తే.. చంద్రబాబు సర్కారు ఈ విద్యా సంవత్సరం మధ్యలో దానిని రద్దుచేసేసింది. అధికారంలోకి రాగానే ఇంగ్లిష్‌ మీడియం రద్దుచేస్తామని మొన్నటి ఎన్నికల ప్రచారంలో చంద్రబాబునాయుడు బహిరంగంగా చేసిన ప్రకటనకు అనుగుణంగానే ఆయనిప్పుడు నిర్ణయాలు తీసుకుంటున్నట్లు స్పష్టమవుతోంది. అలాగే, విద్యార్థుల్లో ఇంగ్లిష్‌ భాషా పరిజ్ఞానాన్ని పెంపొందించేందుకు వైఎస్‌ జగన్‌ ప్రవేశపెట్టిన ‘టోఫెల్‌’ శిక్షణను అధికారంలోకి వచ్చీరాగానే జూన్‌లో రద్దుచేసి పారేశారు. ఇప్పుడు కొత్తగా ప్రభుత్వ బడుల్లోని విద్యార్థులు సీబీఎస్‌ఈ ప్రమాణాలను అందుకోలేకపోతున్నారని చెబుతూ 1,000 ప్రభుత్వ పాఠశాలల్లో అమల్లోకి తెచ్చిన సీబీఎస్‌ఈ బోధనను రద్దుచేశారు. అలాగే, విద్యార్థులు తక్కువగా ఉన్నారన్న సాకుతో అక్కడి ఉపాధ్యాయులను సర్దుబాటు పేరుతో బదిలీ చేసింది. ఇలా ప్రభుత్వ నిరంకుళ విధానాల కారణంగా.. ఇంగ్లిష్‌ మీడియం కోరుకునే ప్రభుత్వ పాఠశాలల్లోని విద్యార్థులు టీసీలు తీసుకుని వెళ్లిపోతున్న పరిస్థితి రాష్ట్రంలో దాపురించింది.జగన్‌పై కోపంతోనే విద్యపై అక్కసు..‘పేదలకు ఉచితంగా చదువు చెప్పడం ప్రభుత్వ బాధ్యత కాదు, ప్రభుత్వ బడుల్లో సదుపాయాలు ఉండవు, ప్రైవేటు బడులు బాగుంటాయి. డబ్బున్న వారు అక్కడ చదువుకుంటారు, మీరూ ఫీజులు కట్టి ప్రైవేటు స్కూళ్లకు వెళ్లండి’.. అని గతంలో సీఎం హోదాలో చంద్రబాబు బహిరంగంగా అన్నారు. దాదాపు 40 ఏళ్ల రాజకీయ అనుభవం, రాష్ట్రానికి 14 ఏళ్లు సీఎంగా పనిచేసిన ఆయనకు పేదలన్నా.. పేదల పిల్లల చదువులన్నా ఎంత చులకనో ఈ మాటలే చెబుతున్నాయి. ఆయన తన నైజాన్ని మరోసారి రుజువు చేసుకుంటూ పేదల విద్యను నిర్వీర్యం చేసే చర్యలకు పూనుకున్నారు. ఇందులో భాగంగానే కార్పొరేట్‌ విద్యా సంస్థలకు బాహాటంగా కొమ్ముకాస్తూ రాష్ట్రంలో పేద పిల్లల చదువును పూర్తిగా అంధకారంలోకి నెట్టేస్తున్నారు. ఉదా.. గతంలో తక్కువ మంది విద్యార్థులున్నారని 2014–19 మధ్య 1,785 పాఠశాలలను మూసివేసి అక్కడి విద్యార్థులను గాలికొదిలేశారు. అలాగే, 4,300 ప్రభుత్వ పాఠశాలలను ఆయన హయాంలోనే మూసివేశారు. ఇప్పుడు వైఎస్‌ జగన్‌పై కోపంతో ఇంగ్లిష్‌ మీడియం, సీబీఎస్‌ఈ బోధనకు సైతం అదే గతి పట్టించారు.విద్యా సంస్కరణలకు జగన్‌ శ్రీకారం..పిల్లలకు మనమిచ్చే ఆస్తి ఏదైనా ఉందంటే అది నాణ్యమైన విద్య మాత్రమేనని, పేదరికం పోవాలంటే విద్యతోనే సాధ్యమవుతుందని బలంగా నమ్మిన వైఎస్‌ జగన్‌ తన పాలనలో విద్యా సంస్కరణలకు శ్రీకారం చుట్టారు. నాడు–నేడుతో ప్రభుత్వ బడులను అద్భుతంగా తీర్చిదిద్ది, పేద విద్యార్థులకు డిజిటల్‌ విద్యా బోధనను అందుబాటులోకి తెచ్చారు. పేదింటి పిల్లలు అంతర్జాతీయంగా రాణించాలంటే వారికి ఇంగ్లిష్‌ మీడియం బోధన ఉండాలని అన్ని ప్రభుత్వ పాఠశాలల్లో ఏడాదికి ఒక తరగతి చొప్పున పెంచుతూ ఇంగ్లిష్‌ మీడియం అమలుచేశారు. విద్యార్థులకు భాషపై భయం పోగొట్టేందుకు బైలింగ్వుల్‌ పాఠ్య పుస్తకాలను సైతం అందించారు. మరోపక్క.. ఇంగ్లిష్‌ భాషా నైపుణ్యాలను మెరుగుపరిచేందుకు ‘టోఫెల్‌’ను సిలబస్‌లో అంతర్భాగం చేశారు. మరోపక్క.. జాతీయ విద్యా విధానం–2020లో భాగంగా రాష్ట్రంలోని ఎక్కువమంది విద్యార్థులకు సీబీఎస్‌ఈ విద్యను అందించేందుకు 1,000 ప్రభుత్వోన్నత పాఠశాలల్లో 2023–34 విద్యా సంవత్సరంలో 9వ తరగతి నుంచి సీబీఎస్‌ఈ బోధనను అందుబాటులోకి తెచ్చారు. దీంతో దాదాపు 84 లక్షల మంది విద్యార్థులు 2024–25 విద్యా సంవత్సరంలో సీబీఎస్‌ఈ పరీక్షలు రాసేందుకు సిద్ధమవుతున్నారు. ఈ క్రమంలో ఇప్పటికే ఒక యూనిట్‌ పరీక్షలు కూడా ముగిసిన తర్వాత ఉన్నపళంగా రాష్ట్ర ప్రభుత్వం సీబీఎస్‌ఈ పరీక్షా విధానం రద్దుచేసి విద్యార్థులను గందరగోళంలోకి నెట్టేసింది.అంధకారంలోకి 84 వేల సీబీఎస్‌ఈ విద్యార్థుల భవిష్యత్తు..నిజానికి.. గత విద్యా సంవత్సరంలో పదో తరగతికి ఇంగ్లిష్‌ మీడియం అమలుచేయకున్నా దాదాపు 1.94 లక్షల మంది ప్రభుత్వ పాఠశాలల్లోని విద్యార్థులు ఇంగ్లిష్‌లో పరీక్షలు రాసి ఉత్తీర్ణులయ్యారంటే ఈ మీడియం బోధనను విద్యార్థులు ఎంత బలంగా కోరుకుంటున్నారో అర్థం చేసుకోవచ్చు. అలాగే, 2023–24 విద్యా సంవత్సరం నుంచి 1,000 ప్రభుత్వ పాఠశాలల్లో సీబీఎస్‌ఈ బోధనను అందుబాటులోకి తేగా ఇప్పుడీ స్కూళ్లల్లో దాదాపు 84 వేల మంది టెన్త్‌ విద్యార్థులు, 82 వేల మంది 9వ తరగతి చదువుతున్నారు. అయితే, ఇటీవల పదో తరగతి విద్యార్థుల్లో సామర్థ్యాలను మదింపు చేస్తామంటూ 50 మల్టిపుల్‌ చాయిస్‌ ప్రశ్నలతో ట్యాబ్స్‌ ద్వారా పరీక్ష నిర్వహించారు. పేపర్‌–పెన్‌ విధానంలో రాత పరీక్ష నిర్వహించాల్సిన చోట తప్పుడు అంచనాలతో పరీక్ష నిర్వహించి.. విద్యార్థుల్లో సామర్థ్యాలు లేవంటూ దుష్ప్రచారానికి తెరతీసి సీబీఎస్‌ఈ బోర్డు పరీక్షలను రద్దుచేసింది.‘ప్రైవేటు’కు 2 లక్షల మంది విద్యార్థులు..ఇదిలా ఉంటే.. తాము అధికారంలోకి వచ్చాక ఇంగ్లిష్‌ మీడియంను సైతం రద్దుచేస్తామనడంతో ప్రభుత్వ బడుల్లో తమ పిల్లలను చదివిస్తున్న తల్లిదండ్రులు ఆందోళన చెందారు. దాదాపు నాలుగేళ్లు ఇంగ్లిష్‌ మీడియంలో చదివిన తమ పిల్లల భవిష్యత్‌ ఎక్కడ అంధకారమవుతుందోనని భయపడ్డారు. దీంతో ఇంగ్లిష్‌ మీడియం కోరుకునే ప్రభుత్వ బడుల్లోని విద్యార్థులు టీసీలు తీసుకుని వెళ్లిపోతున్నారు. 2024–25 విద్యా సంవత్సరంలో ఇప్పటివరకు దాదాపు 2 లక్షల మంది తగ్గిపోయారంటే ప్రభుత్వ పాఠశాలల పరిస్థితిని చంద్రబాబు ప్రభుత్వం ఎంతగా దిగజార్చిందో అర్థంచేసుకోవచ్చు. మరోవైపు.. ప్రభుత్వ బడుల్లో విద్యార్థులు తగ్గిపోవడంతో ఆయా పాఠశాలల్లో ఉపాధ్యాయులు అదనంగా ఉన్నారన్న సాకుతో ప్రభుత్వం వారిని వేరే పాఠశాలల్లో సర్దుబాటు చేసింది. ఈ ప్రక్రియ పూర్తికాగానే ‘రేషనలైజేషన్‌’ పేరుతో విద్యార్థుల్లేని స్కూళ్లలో టీచర్‌ పోస్టులను ప్రభుత్వం రద్దుచేసే అవకాశముందని ఉపాధ్యాయ సంఘాలు ఆందోళన వ్యక్తంచేస్తున్నాయి.తల్లికి వందనం ఎగనామం!మరోవైపు.. తల్లికి వందనం కింద ఇంట్లో ఎంతమంది పిల్లలు ఉంటే అంతమందికీ రూ.15 వేలు చొప్పున ఇస్తామని ఎన్నికల్లో టీడీపీ–జనసేన–బీజేపీ కూటమి ప్రకటించింది. దీంతో.. తల్లికి వందనం కింద వచ్చే రూ.15 వేలకు అదనంగా కొంత మొత్తం ఫీజుగా చెల్లిస్తే సరిపోతుందని ప్రైవేటు స్కూళ్లు ఆకర్షిస్తుండడంతో తల్లిదండ్రులు అటువైపు వెళ్లారు. కానీ, అధికార పగ్గాలు చేపట్టాక మాటమార్చి వచ్చే విద్యా సంవత్సరంలో చూద్దామని శాసనసభ సాక్షిగా ఆ శాఖా మంత్రి లోకేశ్‌ ప్రకటించి తల్లిదండ్రుల ఆశలపై నీళ్లు జల్లారు.నిర్దాక్షిణ్యంగా ‘టోఫెల్‌’ రద్దు..ఇక పదో తరగతి, ఇంటర్‌ తర్వాత ఉన్నత విద్యా కోర్సుల్లో మన విద్యార్థులు ఇబ్బందులు పడకుండా, అంతర్జాతయ విద్యా ప్రమాణాలను అందుకోవాలన్న లక్ష్యంతో ఇంగ్లిష్‌లో ప్రావీణ్యం సంపాదించేందుకు వీలుగా గత విద్యా సంవత్సరం జగన్‌ సర్కారు టోఫెల్‌ శిక్షణను ప్రవేశపెట్టింది. ఇందులో భాగంగా.. 3–5 తరగతుల పిల్లల కోసం టోఫెల్‌ ప్రైమరీ, 6–9 తరగతుల పిల్లల కోసం టోఫెల్‌ జూనియర్‌ పేరుతో ప్రాథమిక శిక్షణను ప్రారంభించింది. నాడు–నేడు పథకంలో భాగంగా స్మార్ట్‌ టీవీలు, ఐఎఫ్‌పీలు అందుబాటులోకి తెచ్చిన స్కూళ్లల్లో ఈ శిక్షణ అందించారు. ఈ ఏడాది ఏప్రిల్‌లో నిర్వహించిన టోఫెల్‌ జూనియర్‌ విభాగంలో 16,52,142 మందికి గాను 11,74,338 మంది (70 శాతం) విద్యార్థులు, ప్రైమరీ విభాగంలో 4,53,265 మందికిగాను 4,17,879 మంది (92 శాతం) విద్యార్థులు పరీక్ష రాశారు. ఈ పరీక్షల్లో ఉత్తీర్ణత సాధించిన విద్యార్థులకు అమెరికాకు చెందిన ఈటీఎస్‌ సంస్థ సర్టిఫికెట్లను ప్రదానం చేయాల్సి ఉంది. కానీ, గత పరీక్షల ఫలితాలను ప్రకటించకపోగా, ఈ విద్యా సంవత్సరంలో టోఫెల్‌ శిక్షణను రాష్ట్ర ప్రభుత్వం పూర్తిగా రద్దుచేసింది.ఐబీ శిక్షణకూ అదే గతి..‘టోఫెల్‌ అనేది డిగ్రీ తర్వాత విదేశాల్లో చదువుకునే వారికి మాత్రమేగాని, స్కూలు పిల్లలకు ఎందుకు? ఈ విధానం సరైంది కాదు’.. అని ఇటీవల ఉప ముఖ్యమంత్రి పవన్‌కళ్యాణ్‌ ఓ బహిరంగ సభలో వ్యాఖ్యలకు తగ్గట్లుగానే టీడీపీ ప్రభుత్వం టోఫెల్‌ శిక్షణకు జూలైలో టాటా చెప్పేసింది. అలాగే, అంతర్జాతీయ విద్య కూడా అనవసరమంటూ ఎస్సీఈఆర్టీ కార్యాలయంలోని ‘ఐబీ’ కార్యాలయాన్ని మూసివేశారు. దీంతో 2025 జూన్‌ నుంచి అంతర్జాతీయ ప్రామాణిక విద్యగా గుర్తింపు పొందిన ఐబీ సిలబస్‌ను ప్రభుత్వ పాఠశాలల్లో అందించాలన్న లక్ష్యం నీరుగారిపోయింది. వాస్తవానికి.. ఈ ఏడాది ఉపాధ్యాయులకు ఐబీ సిలబస్‌పై శిక్షణ నిర్వహించాలని ఏర్పాట్లుచేశారు. కానీ, ఇప్పుడా కార్యాలయాన్నే తొలగించడంతో మొత్తం ప్రక్రియ అటకెక్కినట్లయింది.

సాక్షి, విజయవాడ: ఏపీ విద్యారంగంలో వైఎస్‌ జగన్‌మోహన్‌ రెడ్డి తీసుకువచ్చిన సంస్కరణలకు కూటమి సర్కార్‌ తిలోదకాలు పలికింది. విద్యారంగంలో తెచ్చిన సంస్కరణలను ఆపేయాలని చంద్రబాబు ప్రభుత్వం నిర్ణయించింది. వైఎస్‌ జగన్‌కు పేరు రాకుండా చేయాలనే ఉద్దేశ్యంతో సంస్కరణలపై వేటు వేస్తోంది...ఏపీలో వైఎస్ జగన్ ప్రభుత్వం తెచ్చిన కీలక సంస్కరణలను ఆపేయాలని ప్రభుత్వం నిర్ణయించింది. ప్రభుత్వ పాఠశాలల్లో ఐబీ సిలబస్ నిలిపివేయాలని ప్రభుత్వం నిర్ణయం తీసుకుంది. ఈ మేరకు టీడీపీ ఎమ్మెల్సీ అశోక్‌ బాబు అధికారికంగా ప్రకటించారు. ఇదే సమయంలో సీబీఎస్‌ఈ సిలబస్‌ను కూడా ఎత్తేస్తామని ఆయన తెలిపారు. ఇక, బైజూస్‌ ట్యాబ్‌లు దండగ అంటూ టీడీపీ ముద్ర వేసింది. పిల్లలకు ఇచ్చే ట్యాబ్‌ల పంపిణీకి కూడా మంగళం పాడేయాలని కూటమి సర్కార్‌ నిర్ణయించుకుంది.మరోవైపు.. నేషనల్ ఎడ్యుకేషన్ పాలసీ అమలుపైనా నీలినీడలు కమ్ముకున్నాయి. వచ్చే ఏడాది నుండి ఎత్తేసే ఆలోచనలో ఉన్నట్టు అశోక్‌ బాబు తెలిపారు. ఇక, ఇప్పటికే టోఫెల్ శిక్షణను ప్రభుత్వం నిలిపివేసిన విషయం తెలిసిందే. కాగా, ప్రభుత్వ పాఠశాలల్లో విద్యార్థుల కోసం అంతర్జాతీయ ప్రమాణాలు తేవాలని వైఎస్‌ జగన్‌ ఎంతగానో ప్రయత్నించారు. కార్పొరేట్ పాఠశాలతో పోటీ పడేందుకు ఆధునిక పద్ధతులను తీసుకువచ్చారు. ఈ క్రమంలోనే టోఫెల్, ఐబీ సిలబస్, సీబీఎస్ఈ సిలబస్, బైజూస్ వంటి వాటిని వైఎస్‌ జగన్‌ అమలుచేశారు. దీంతో, వైఎస్‌ జగన్‌కు పేరు రావొద్దని భావించిన చంద్రబాబు.. సంస్కరణలు అన్నింటినీ ఎత్తేయాలని చూస్తున్నారు. కార్పొరేట్ స్కూళ్లకు మేలు చేసేందుకు ప్రభుత్వ పాఠశాలల్లో సంస్కరణలపై వేటు వేస్తున్నారు. ఈ నేపథ్యంలో ముందు తన పార్టీ ఎమ్మెల్సీలు, ఎల్లో పత్రికలతో విద్యాశాఖ మంత్రి నారా లోకేష్‌ ప్రచారం చేయిస్తున్నారు. క్రమంగా ఒక్కో సంస్కరణపై చంద్రబాబు వేటు వేసుకుంటూ వస్తున్నారు.

» ఇదీ జగన్‌ బ్రాండ్‌ గవర్నెన్స్‌ » పేద విద్యార్థుల చెంతకు ఇంగ్లిష్‌ చదువులు » ప్రస్తుత ప్రపంచంలో మన పిల్లలు రాణించేలా నైపుణ్య శిక్షణ » అన్ని స్థాయిల్లోను యాక్టివిటీ బేస్డ్‌ పాఠ్యపుస్తకాల రూపకల్పన » ఐటీ కోర్సుల్లో శిక్షణకు స్కిల్‌ ఎక్స్‌పర్ట్స్‌ నియామకం » నిత్య జీవిత సమస్యలను అధిగమించేందుకు ‘సంకల్పం’ శిక్షణ » డిజిటల్‌ విద్య కోసం 8వ తరగతి విద్యార్థులు, ఉపాధ్యాయులకు రూ.1,306 కోట్లతో 9,52,925 ఉచిత బైజూస్‌ కంటెంట్‌ ట్యాబ్‌ల పంపిణీ » ఆరో తరగతి నుంచి ఆపైన రూ.838 కోట్లతో ప్రతి తరగతిలోను 62 వేల ఇంటరాక్టివ్‌ ఫ్లాట్‌ ప్యానెల్స్‌ (ఐఎఫ్‌పీ),ప్రాథమిక పాఠశాలల్లో 45 వేల స్మార్ట్‌ టీవీల ఏర్పాటు సోమవారంహాట్‌ పొంగల్, ఉడికించిన గుడ్డు లేదా వెజిటబుల్‌ పులావు, గుడ్డు కూర, చిక్కీ మంగళవారంఉదయం 10.20కు రాగిజావ, మధ్యాహ్నం 12.20కు చింతపండు పులిహోర, దొండకాయ పచ్చడి, ఉడికించిన గుడ్డు బుధవారంవెజిటబుల్‌ అన్నం, ఆలూ కుర్మా, ఉడికించిన గుడ్డు, చిక్కీ గురువారంఉదయం రాగిజావ, మధ్యాహ్నం సాంబార్‌ బాత్‌/నిమ్మకాయ పులిహోర, టమాటా పచ్చడి, ఉడికించిన గుడ్డు శుక్రవారంఅన్నం, ఆకుకూర పప్పు, ఉడికించిన గుడ్డు, చిక్కీ శనివారంఉదయం రాగిజావ, మధ్యాహ్నం ఆకుకూరతో చేసిన అన్నం, పప్పుచారు, స్వీట్‌ పొంగల్‌–సాక్షి, అమరావతిమన ఇంగ్లిష్‌ విద్యపై ప్రశంసల జల్లు » ‘‘ఆంధ్రప్రదేశ్‌లో ప్రభుత్వ పాఠశాలల విద్యార్థులకు బైలింగువల్‌ పాఠ్యపుస్తకాలను అందించడం గొప్ప పరిణామం– కేంద్ర విద్యాశాఖ మంత్రి ధర్మేంద్ర ప్రదాన్‌ కితాబు..’’ » ‘‘ప్రాథమిక స్థాయి నుంచి నాణ్యమైన విద్య అందించడంలో పనితీరు అద్భుతంగా ఉంది: కేంద్ర పాఠశాల విద్య, అక్షరాస్యత శాఖ కార్యదర్శి సంజయ్‌ కుమార్‌’’ » ‘‘మహారాష్ట్ర, ఒడిశా, అసోం, హరియాణా, ఛత్తీస్‌గఢ్, మిజోరాం, మధ్యప్రదేశ్, పశ్చిమ బెంగాల్, నాగాలాండ్, గుజరాత్, పుదుచ్చేరి, కేరళ, తెలంగాణ, అండమాన్‌ –నికోబార్, డామన్‌ డయ్యూ, దాద్రానగర్‌ హవేలీ విద్యాశాఖాధికారులు మన సంస్కరణలు అమలుకు సిద్ధం’’ » ‘‘అమెరికాలోని ఐక్యరాజ్యసమితి ప్రధాన కార్యాలయంలో సుస్థిర అభివృద్ధి లక్ష్యాలపై జరిగిన ఉన్నత స్థాయి సదస్సులో 140 దేశాల విద్యావేత్తలు మన విద్యా సంస్కరణలపై ప్రశంసలు’’ప్రభుత్వ బడుల్లో చదువుతున్న విద్యార్థులకే గాక, ప్రైవేటు విద్యా సంస్థల్లో చదువుతున్న వారికీ అమ్మ ఒడి అమలు చేసి, 2022–23 విద్యా సంవత్సరం వరకు మొత్తం రూ.25,809.5 కోట్లు తల్లుల ఖాతాల్లో జమచేశారు. నాడు– నేడులో చేసిన ఖర్చు విడత పాఠశాలలు ఖర్చు (రూ.కోట్లలో) మొదటి 15,715 3,669 రెండో 22,344 8,000

న్యూఢిల్లీ: టీనేజీ విద్యార్థులకు ఏదైనా ఒక విషయాన్ని సమాజం.. తప్పుడు కోణంలో చెప్పేలోపే దానిని స్పష్టమైన భావనతో, సహేతుకమైన విధానంలో పాఠంగా చెప్పడం మంచిదని సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌(సీబీఎస్‌ఈ) సీబీఎస్‌ఈ నిర్ణయించుకుంది. పిల్లలతో తల్లిదండ్రులు చర్చించడానికి విముఖత చూపే డేటింగ్, రిలేషన్‌షిప్‌ వంటి సున్నితమైన అంశాలపై టీనేజీ విద్యార్థుల్లో సుస్పష్టమైన ఆలోచనను పాదుకొల్పే సదుద్దేశంతో సీబీఎస్‌ఈ ముందడుగు వేసింది. ఇందులో భాగంగా డేటింగ్, రిలేషన్‌షిప్‌ వంటి ఛాప్టర్‌లను తమ 9వ తరగతి ‘వాల్యూ ఎడిషన్‌’ పాఠ్యపుస్తకాల్లో చేర్చింది. టీనేజీ విద్యార్థుల్లో హార్మోన్ల ప్రభావంతో తోటి వయసు వారిపై ఇష్టం, కలిసి మెలసి ఉండటం వంటి సందర్భాల్లో ఎలా వ్యవహరించాలో సవివరంగా చెబుతూ ప్రత్యేకంగా పాఠాలను జతచేశారు. ‘డేటింగ్‌ అండ్‌ రిలేషన్‌షిప్స్‌: అండర్‌స్టాండింగ్‌ యువర్‌సెల్ఫ్‌ అండ్‌ ది అదర్‌ పర్సన్‌’ పేరుతో ఉన్న ఒక పాఠం, కొన్ని పదాలకు అర్ధాలు, ఇంకొన్ని భావనలపై మీ అభిప్రాయాలేంటి? అనే ఎక్సర్‌సైజ్‌ సంబంధ పేజీలు సామాజిక మాధ్యమాల్లో ప్రత్యక్షమయ్యాయి. ఫొటోలవంటి ఇతరుల సమాచారాన్ని దొంగతనంగా సేకరించి వాటితో ఇంకొకరిని ఆకర్షించే ‘క్యాట్‌ఫిషింగ్‌’, సంజాయిషీ లేకుండా బంధాన్ని హఠాత్తుగా తెగతెంపులు చేసుకునే ‘ఘోస్టింగ్‌’, ‘సైబర్‌ బులీయింగ్‌’ పదాలకు అర్ధాలను వివరిస్తూ చాప్టర్లను పొందుపరిచారు. ‘క్రష్‌’, ‘స్పెషల్‌’ ఫ్రెండ్‌ భావనలను చిన్న చిన్న కథలతో వివరించారు.

సాక్షి, అమరావతి: సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌ఈ) సిలబస్‌ బోధిస్తున్న ప్రభుత్వ పాఠశాలల్లో సీబీఎస్‌ఈ బోర్డు పరీక్షలు అందుబాటులోకి వచ్చాయి. ఈ విద్యా సంవత్సరం నుంచి 8, 9 తరగతుల విద్యార్థులు పీరియాడిక్‌ రాత పరీక్షలు (పీడబ్ల్యూటీ), టర్మ్‌ పరీక్షలు రాయ­నున్నారు. గతేడాది 1,000 ప్ర­భుత్వ పాఠశాలలకు సీబీఎస్‌ఈ గుర్తింపు వచ్చి­న సంగతి తెలిసిందే. అయితే అప్పటికే దాదాపు విద్యా సంవత్సరం పూర్తవడంతో ఆయా పాఠశాలల్లోని విద్యార్థు­లు స్టేట్‌ బోర్డు పరీక్షలైన ఫార్మేటివ్, సమ్మేటివ్‌ అసెస్‌­మెంట్లకే హాజ­ర­య్యారు. కాగా, ఈ విద్యా సంవత్స­రం (2023­–24) నుంచి సీబీఎస్‌ఈ బోర్డు నిర్వహించే పీడబ్ల్యూటీ, టర్మ్‌ పరీక్షలు రాయను­న్నారు. 2022–23 విద్యా సంవత్సరంలో వెయ్యి పాఠ­శాలల్లో 8వ తరగతి నుంచి సీబీఎస్‌ఈ బోధ­నకు అను­మతి వచ్చింది. ఈ పాఠశాలల్లో 8, 9 తర­గతు­లు చదువుతున్న విద్యార్థులు 2023–24 నుం­చి సీబీఎస్‌­ఈ అకడమిక్‌ క్యాలెండర్‌ ప్రకా­రం ఆ బోర్డు పరీక్షలు రాస్తారని పాఠశాల విద్యా­శాఖ ప్రకటించింది. ఈ మేరకు అన్ని జిల్లాల విద్యాశాఖా­ధి­కారులకు కమిషన­ర్‌ ఇటీవల ఉత్తర్వులు సైతం జారీ చేశారు. దీని ప్రకా­రం 8, 9 తరగతులకు ఫార్మేటివ్, సమ్మేటివ్‌ పరీక్షల తరహాలో పీరియాడిక్‌ పరీక్షలు (పీడబ్ల్యూటీ), టర్మ్‌ టెస్టులు నిర్వహించనున్నారు. ఈ నెల 6 నుంచి 9 వరకు పీడబ్ల్యూటీ జరగనున్నాయి.  విషయ పరిజ్ఞానం పెంచేలా.. విద్యా సంవత్సరంలో పీడబ్ల్యూటీలు నాలుగు, టర్మ్‌ పరీక్షలు రెండు ఉంటాయి. టర్మ్‌–1 నవంబర్‌లో, టర్మ్‌–2 (వార్షిక) పరీక్షలను మార్చిలో నిర్వహిస్తారు. మ్యాథమెటిక్స్, సైన్స్, సోషల్, రెండు భాషా పేపర్లు (మొదటి భాషగా ఆంగ్లం, రెండో భాషగా తెలుగు) రాయాల్సి ఉంటుంది. ఒక్కో సబ్జెక్టు 50 మార్కులకు నిర్వహించే పీడబ్ల్యూటీలో 40 మార్కులకు రాత, 10 మార్కులకు ఇంటర్నల్‌ థియరీ పరీక్ష ఉంటుంది. 100 మార్కుల టర్మ్‌ పరీక్షలో 80 మార్కులకు రాత, 20 మార్కులకు అంతర్గత పరీక్షలు (ఇంటర్నల్‌ థియరీ) ఉంటాయి. విద్యార్థులు ఉత్తీర్ణులవ్వాలంటే ప్రతి సబ్జెక్టులో 33 శాతం మార్కులు పొందాల్సి ఉంటుంది. సబ్జెక్టుల్లో ప్రాజెక్టులు, ల్యాబ్‌ టెస్టులు కూడా ఉంటాయి. పిల్లలు జాతీయ, అంతర్జాతీయంగా విద్యార్థులతో పోటీపడేలా పరీక్షల్లో విషయ పరిజ్ఞానంపై ప్రశ్నలు ఇవ్వనున్నారు. అకడమిక్‌ మార్కులు కంటే.. విద్యార్థి మానసిక వికాసం, విశ్లేషణ సామర్థ్యాలను పెంచేందుకు వీలుగా ఇంటర్నల్‌ పరీక్షలు ఉంటాయి. ఇందులో పెన్‌ పేపర్‌ టెస్ట్‌ (5 మార్కులు), మల్టిపుల్‌ అసెస్‌మెంట్‌ (5), ఫోర్ట్‌పోలియో (5), సబ్జె­క్టుపై విద్యార్థికున్న అవగాహనకు 5 మార్కులు మొత్తం 20 మార్కులు కేటాయించారు. భాషా పరీక్షలో వ్యూహాత్మకంగా పరిష్కరించే పజిల్స్, క్లాస్‌వర్క్, ఇంగ్లిష్‌ మాట్లాడడం, విని అర్థం చేసుకునే సామర్థ్యంపైన ప్రశ్నలు ఉంటాయి. ప్రస్తుతం 9వ తరగతి చదువుతున్న 85,353 మంది విద్యార్థులకు సీబీఎస్‌ఈ బోర్డు రిజిస్ట్రేషన్‌ ప్రక్రియ ప్రారంభమైంది. వీరికి వచ్చే ఏడాది మార్చి 31 నాటికి అన్ని పరీక్షలు పూర్తిచేసి, ఏప్రిల్‌ 1 నుంచి 10వ తరగతి సిలబస్‌ను బోధించనున్నారు. ఈ మేరకు విద్యాశాఖ ప్రణాళిక సిద్ధం చేసింది.  10వ తరగతిలో ‘స్కిల్‌’ సబ్జెక్టు  ప్రస్తుతం 9వ తరగతి చదువుతున్న విద్యార్థులు వచ్చే విద్యా సంవత్సరం(2024–25)లో 10వ తరగతిలో సీబీఎస్‌ఈ బోర్డు పరీక్షలు రాయనున్నారు. ఈ క్రమంలో వీరికి ఆరో సబ్జెక్టుగా ‘స్కిల్‌ టెస్ట్‌’ను ప్రవేశ­పెట్టారు. మ్యాథమెటిక్స్, సైన్స్, సోషల్‌ పరీక్షలో తప్పిన విద్యార్థులు స్కిల్‌ సబ్జెక్టులో ఉత్తీర్ణులైతే ఈ మార్కులను పరిగణనలోకి తీసుకుని పాస్‌ చేస్తారు. ఆరో సబ్జెక్టుగా విద్యార్థుల కోసం ఇన్ఫర్మేషన్‌ టెక్నాలజీ, ఆర్టిఫిషియల్‌ ఇంటెలిజెన్స్‌ సబ్జెక్టులను ప్రవేశపెట్టారు. పదో తరగతి విద్యార్థులు ఈ రెండింటిలో ఒకదాన్ని ఆరో సబ్జెక్టుగా చదవాల్సి ఉంటుంది.  జాగ్రత్త పాటించండి సీబీఎస్‌ఈ బోర్డు క్యాలెండర్‌ ప్రకారం.. వచ్చే మార్చి 31 నాటికి 9వ తరగతి పరీక్షలు పూర్తిచేసి, ఏప్రిల్‌ 1 నుంచి 10వ తరగతి బోధన చేపట్టాలి. అందుకనుగుణంగా చర్యలు తీసుకున్నాం. ప్రస్తుతం 9వ తరగతి విద్యార్థుల బోర్డు రిజిస్ట్రేషన్‌ ప్రక్రియ ఈ నెల 12 వరకు కొనసాగుతుంది. విద్యార్థుల వివరాల నమోదులో పాఠశాలల ప్రిన్సిపాళ్లు జాగ్రత్తలు పాటించాలి. విద్యార్థి పేరు, ఆధార్, తల్లిదండ్రుల వివరాలు పుట్టిన తేదీ ఇలా ప్రతి అంశంలోనూ జాగ్రత్త వహించాలి. – ఎం.వి.కృష్ణారెడ్డి, డైరెక్టర్, సీబీఎస్‌ఈ స్కూల్స్‌. 

వైఎస్‌ జగన్‌మోహన్‌రెడ్డి రాష్ట్ర ముఖ్యమంత్రిగా ప్రమాణ స్వీకారం చేసినప్పటి నుంచి ఇప్పటి దాకా 2019–23 మధ్య విద్యా రంగంలో పలు ప్రగతిశీల మార్పులు చోటుచేసుకున్నాయి. రాష్ట్రంలోని ప్రభుత్వ పాఠశాలలు కార్పొరేట్‌ సంస్థలను తలదన్నేలా సకల సదుపాయాలతో రూపు దిద్దుకున్నాయి. ‘మనబడి నాడు–నేడు’ పథకంతో ప్రభుత్వ విద్యా సంస్థలు సమూల మార్పులతో సమున్నతంగా మారాయి. ప్రభుత్వం విద్యా రంగానికి అత్యధిక ప్రాధాన్యమిచ్చింది. ఒకప్పుడు ప్రభుత్వ స్కూళ్లు అంటే చులకనగా చూసే పరిస్థితి నుంచి ఇంగ్లిష్‌ మీడియంలో పదో తరగతి పరీక్షలు రాసి.. టాప్‌ మార్కులు సాధించే దిశగా అడుగులు వేస్తున్నారు. ప్రభుత్వ సంస్కరణలకు అద్దంపట్టారు. విద్యా రంగ సంస్కరణల కోసమే గత నాలుగేళ్లల్లో రాష్ట్ర ప్రభుత్వం ఏకంగా రూ.59,173.72 కోట్లు వెచ్చించింది. ఇందులో భాగంగా జగనన్న అమ్మ ఒడి, మనబడి నాడు–నేడు, జగనన్న విద్యా కానుక, జగనన్న గోరుముద్ద, పాఠ్యాంశాల సంస్కరణలు, మరుగుదొడ్ల నిర్వహణ నిధి, పాఠశాల నిర్వహణ నిధి వంటి పథకాలు, కార్యక్రమాలను అమలు చేస్తోంది. ప్రభుత్వ పాఠశాలల్లో చదివే పిల్లల అభ్యసన ఫలితాలను మెరుగు పరిచే లక్ష్యంతో సమగ్ర విద్యా, పరిపాలనా సంస్కరణలు అమలు చేశారు. స్కూళ్లలో చేపట్టిన నాడు–నేడు పనులు పూర్తయి విద్యార్థులకు అందుబాటులోకి రాగా, ప్రస్తుతం రెండో దశ పనులు జరుగుతున్నాయి.      – సాక్షి, అమరావతి నాలుగేళ్లలోఎంత తేడా!  నాడు  విరిగిన బెంచీలు.. బీటలు వారిన గోడలు..  పెచ్చులూడే పైకప్పులు.. వర్షం వస్తే సెలవులే.. సగం విద్యా సంవత్సరం పూర్తయ్యే దాకా అందని పాఠ్య పుస్తకాలు, అసలు పిల్లలు బడికి వస్తున్నారో లేదో పట్టించుకోని పరిస్థితి. ఇదీ నాలుగేళ్ల క్రితం వరకు రాష్ట్రంలో ప్రభుత్వ పాఠశాలల దుస్థితి.  నేడు  ప్రస్తుతం అందమైన భవనాలు.. పిల్లల కోసం డబుల్‌ డెస్క్‌ బెంచీలు.. డిజిటల్‌ తరగతి గదులు.. ద్విభాషా పాఠ్య పుస్తకాలు.. ఇంగ్లిష్‌ ల్యాబ్‌లు, ఆర్వో నీరు.. పరిశుభ్రంగా ఉండే మరుగుదొడ్లు.. విద్యా సంవత్సరం ప్రారంభంలోనే రెండు జతల యూనిఫారం, బూట్లు, బెల్టు, పుస్తకాలు పెట్టి స్కూలు బ్యాగు అందజేత.. అన్నింటికీ మించి పిల్లలను బడికి పంపించే తల్లుల ఖాతాలో ఏటా రూ.15 వేల కానుక.  విద్యపై చేసే ఖర్చు భవిష్యత్‌కు పెట్టుబడి  ప్రతిపక్ష నేతగా వైఎస్‌ జగన్‌మోహన్‌రెడ్డి తన సుదీర్ఘ పాదయాత్రలో ప్రభుత్వ పాఠశాలల దుస్థితిని, విద్యార్థులు, ఉపాధ్యాయుల ఇబ్బందులను చూశారు. కనీస సదుపాయాలు లేక ప్రభుత్వ పాఠశాలల్లో  ప్రమాణాలు పడిపోయి విద్యార్థుల భవిష్యత్‌ ఏంటో తెలియని పరిస్థితి. విద్యా వ్యవస్థను గాడిలో పెట్టేందుకు వీలుగా అధికారంలోకి  వచ్చిన వెంటనే ప్రభుత్వ పాఠశాలల్లో మౌలిక సదుపాయాలను మెరుగుపరిచే బృహత్తర సంస్కరణలకు శ్రీకారం చుట్టారు. ఇందులో భాగంగా నాడు–నేడు ద్వారా రూ.వేల కోట్ల ని«ధులతో పనులు చేపట్టారు. రాష్ట్రంలోని 45 వేలకు పైగా ప్రభుత్వ పాఠశాలలను మూడు విడతల్లో అభివృద్ధి పరిచేలా కార్యక్రమాన్ని అమల్లోకి తెచ్చారు. 2019–20లో తొలి విడతగా 15,715 స్కూళ్లలో  రూ.3,669 కోట్లతో కనీసం 9 రకాల మౌలిక సదుపాయాల కల్పనకు శ్రీకారం చుట్టారు. నీటి వసతితో మరుగు దొడ్లు, తాగునీటి సదుపాయం, మేజర్, మైనర్‌ మరమ్మతులు, విద్యుత్‌ సదుపాయం, విద్యార్థులు, టీచర్లకు డ్యూయెల్‌ డెస్కులు, బెంచీలు, కుర్చీలు, బీరువాలు, టేబుళ్లు వంటి ఫర్నీచర్, గ్రీన్‌ చాక్‌ బోర్డులు, పాఠశాల మొత్తానికి పెయింటింగ్, ఇంగ్లిష్‌ ల్యాబ్, కాంపౌండ్‌ వాల్‌ నిర్మాణం వంటి వసతులు కల్పించారు. ఆ తర్వాత కిచెన్‌షెడ్లు, అదనపు తరగతి గదులు, డిజిటల్‌ తరగతులు దీనికి జోడించారు. ప్రభుత్వ స్కూళ్లతో పాటు జూనియర్‌ కాలేజీలు, హాస్టళ్లు, భవిత కేంద్రాలు, జిల్లా విద్యా బోధనా శిక్షణ కళాశాలల(డైట్స్‌)తో పాటు ప్రభుత్వం ప్రతిష్టాత్మకంగా అమల్లోకి తెస్తున్న శాటిలైట్‌ ఫౌండేషన్‌ స్కూళ్లనూ నాడు–నేడులోకి చేర్చింది. స్కూళ్లు, కాలేజీలు, హాస్టళ్లు, కేజీబీవీలు.. మొత్తంగా తొలివిడతలో 61,661 విద్యా సంస్థల్లో రూ.16,450.69 కోట్లతో పది రకాల సదుపాయాలు కలి్పంచారు. నాడు–నేడు రెండో దశలో రూ.8,000 కోట్లతో 22,344 స్కూళ్లలో పనులు చేపట్టారు.   అమ్మ ఒడి.. గోరుముద్ద.. విద్యా కానుక  పిల్లల చదువుకు తల్లిదండ్రుల పేదరికం అడ్డురాకూడదనే ఉద్దేశంతో ప్రభుత్వం అమ్మ ఒడి పథకంతో అర్హురాలైన ప్రతి పేద తల్లికి ఏటా రూ.15 వేల చొప్పున ఇప్పటి దాకా రూ.19,674.34 కోట్లు తల్లులకు అందించింది. జగనన్న గోరుముద్ద పథకంతో నాణ్యమైన, రుచికరమైన పోషకాహారాన్ని మధ్యాహ్న భోజనంగా పిల్లలకు అందించేందుకు రోజుకో రకం మెనూ ప్రకటించింది. వారంలో ఐదు రోజులు గుడ్డు, మూడు రో­జులు చిక్కి (వేరుశనగ, బెల్లంతో తయారీ) పిల్లలకు అందిస్తున్నారు. ఏటా ఈ కార్యక్రమానికి ప్రభుత్వం రూ.1,800 కోట్లు వెచ్చిస్తోంది. పాఠశాలల్లో పిల్లల ఆత్వవిశ్వాసాన్ని పెంచేందుకు ప్రభుత్వం బోధన–అభ్యాస సా­మగ్రిని  సరఫరా చేస్తోంది. అందుకోసం జగనన్న విద్యా కానుకగా ప్రతి కిట్‌లో ఒక బ్యాగ్, స్టిచింగ్‌ చార్జీతో సహా 3 జతల యూ­నిఫారాలు, ఒక బెల్ట్, జత షూ, రెండు జతల సాక్స్‌లు, పాఠ్య పుస్తకాలు, నోట్‌బుక్‌లు, వర్క్‌బుక్‌లు ఇంగ్లిష్‌–తెలుగు ఆక్స్‌ఫర్డ్‌ డిక్షనరీ అందిస్తోంది. ప్రభుత్వం జగనన్న విద్యా కానుక కింద 47 లక్షల మంది  విద్యార్థుల కోసం మూడేళ్లలో రూ.2,368.33 కోట్లు ఖర్చు చేసింది.    బోధన, పాఠ్య ప్రణాళికలో సంస్కరణలు   వైఎస్సార్‌ ప్రభుత్వం వచ్చాక రాష్ట్రంలోని ప్రభుత్వ స్కూళ్లలో ఆంగ్ల మాధ్యమాన్ని ప్రవేశపెట్టి, పేదింటి పిల్లలు అంతర్జాతీయ స్థాయిలో పోటీపడేలా ప్రమాణాలను తీసుకొచ్చింది. సెంట్రల్‌ బోర్డు ఆఫ్‌ సెకండరీ ఎడ్యుకేషన్‌ (సీబీఎస్‌ఈ) విధానాన్ని దశల వారీగా అమలు చేస్తోంది. ఇప్పటికే 1,000 పాఠశాలల్లో సీబీఎస్‌ఈ అమలు చేస్తోంది. పునాది స్థాయి నుంచే విద్యా రంగాన్ని పటిష్టం చేసేలా కరిక్యులమ్‌ సంస్కరణలు చేపట్టింది. విద్యార్థులు, ఉపాధ్యాయులకు ప్రయోజనకరంగా బైలింగ్యువల్‌ పాఠ్య పుస్తకాలను అందిస్తోంది. ఉన్నత పాఠశాలలో పదో తరగతి పాసైన బాలికలందరూ చదువుకు దూరం కాకూడదని ప్రతి మండలంలో ఒక జూనియర్‌ కళాశాల ఏర్పాటుకు చర్యలు తీసుకుంది. 292 ఉన్నత పాఠశాలలను బాలికల కోసం హైసూ్కల్‌ ప్లస్‌గా అప్‌గ్రేడ్‌ చేసింది. మొత్తం 352 కేజీబీవీలలో ప్లస్‌ 2 ప్రవేశపెట్టింది. మొత్తం 679 మండలాల్లో బాలికల కోసం కనీసం ఒక జూనియర్‌ కళాశాల ఉంది. కోవిడ్‌ అనుభవాల నేపథ్యంలో ప్రభుత్వ పాఠశాలల విద్యార్థుల కోసం డిజిటల్‌ లెర్నింగ్‌ విధానాన్ని అందుబాటులోకి తెచ్చింది. అన్ని స్థాయిల్లో పాఠ్య పుస్తకాలను డిజిటల్‌ పీడీఎఫ్‌ రూపంలో ఆన్‌లైన్‌లో ఉంచడంతో పాటు 2022–23లో 8వ తరగతి విద్యార్థులకు రూ.686 కోట్లతో బైజూస్‌ కంటెంట్‌తో కూడిన 5.18 లక్షల ట్యాబులను ఉచితంగా అందించింది. వీటితో పాటు నాడు–నేడు మొదటి దశలో అభివృద్ధి చేసిన 15,715 పాఠశాలల్లో 30,213 ఇంటరాక్టివ్‌ ఫ్లాట్‌ ప్యానెళ్లు, 10,038 స్మార్ట్‌ టీవీలను సరఫరా చేసేందుకు చర్యలు చేపట్టింది. జగనన్న విదేశీ విద్యా దీవెన కింద 1,858 మందికి రూ.132.41 కోట్ల లబ్ధి చేకూరింది. 

న్యూఢిల్లీ: సెంట్రల్ బోర్డ్ ఆఫ్ సెకండరీ ఎడ్యుకేషన్‌(సీబీఎస్‌ఈ) పదో తరగతి ఫలితాలను విడదుల చేసింది. విద్యార్థులు తమ ఫలితాలను https://cbseresults.nic.in/ వెబ్‌సైట్‌తో పాటు డిజిలాకర్, ఇతర వెబ్‌సైట్లలో చెక్‌చేసుకోవచ్చు.  సీబీఎస్‌ఈ టెన్త్ పరీక్షలు ఫిబ్రవరి 15 నుంచి మార్చి 21 వరకు జరిగాయి. మొత్తం 21, 86,940 మంది విద్యార్థులు పరీక్షకు హాజరయ్యారు. కాగా.. సీబీఎస్‌ఈ 12వ తరగతి ఫలితాలు కూడా ఇప్పటికే విడుదల అయ్యాయి. చదవండి: మోదీ 'మన్‌ కీ బాత్' వినలేదని 36 మంది విద్యార్థులకు శిక్ష.. టీఎంసీ ఎంపీ మహువా మొయిత్రా ఫైర్..

సాక్షి, అమరావతి: రాష్ట్రంలో 2025 విద్యాసంవత్సరం నుంచి టెన్త్‌ పబ్లిక్‌ పరీక్షల్లో సమూల మార్పులు రానున్నాయి. ఆ విద్యాసంవత్సరం నుంచి టెన్త్‌ పబ్లిక్‌ పరీక్షలు సెంట్రల్‌ బోర్డు ఆఫ్‌ సెకండరీ ఎడ్యుకేషన్‌ (సీబీఎస్‌ఈ) విధానంలో జరగనున్నాయి. రాష్ట్రంలో సీబీఎస్‌ఈ విధానంపై ప్రభుత్వం నిర్ణయం తీసుకోవడంతోపాటు ఈ విద్యాసంవత్సరం 8వ తరగతి నుంచి అమల్లోకి తెచ్చిన సంగతి తెలిసిందే. ఈ విద్యాసంవత్సరం ఎనిమిదో తరగతి విద్యార్థులకు సీబీఎస్‌ఈ తరహాలో పాఠ్యపుస్తకాలను అందించారు. విద్యార్థులకు ఇబ్బంది లేకుండా ఉండేందుకు వీటిని ద్విభాషా (బైలింగ్యువల్‌) విధానంలో ముద్రించి ఇచ్చారు. ఈ విద్యార్థులు 2025లో టెన్త్‌ పబ్లిక్‌ పరీక్షలను రాయనున్నారు. వీటిని సీబీఎస్‌ఈ ప్యాట్రన్‌లో నిర్వహించనున్నారు. ఆ తరువాత నుంచి వచ్చే బ్యాచ్‌ల విద్యార్థులు సీబీఎస్‌ఈ ప్యాట్రన్‌లోనే అభ్యసనం సాగించనున్నందున వారికి పరీక్షలు కూడా అదే విధానంలో నిర్వహించేలా విద్యాశాఖ ఏర్పాట్లు చేస్తోంది. 2022–23, 2023–24 విద్యాసంవత్సరపు విద్యార్థులకు మాత్రమే ప్రస్తుతం నిర్వహిస్తున్న తరహా పరీక్షలు ఉంటాయి. ఆతరువాత నుంచి పూర్తిగా సీబీఎస్‌ఈ విధానంలోనే పరీక్షలు కొనసాగనున్నాయి.   టెన్త్‌ పబ్లిక్‌ పరీక్షల్లో అంతర్గత మార్కులు తప్పనిసరి   ప్రస్తుతం ఎస్సెస్సీ బోర్డు ద్వారా నిర్వహిస్తున్న పబ్లిక్‌ పరీక్షలను.. అంతర్గత మార్కులు 20 కలపకుండా నేరుగా 100 మార్కులకు నిర్వహిస్తున్నారు. సీబీఎస్‌ఈ విధానంలో 80 మార్కులకు పబ్లిక్‌ పరీక్షలు నిర్వహించి మిగిలిన 20 అంతర్గత మార్కులను పరిగణనలోకి తీసుకుంటున్నారు. సమగ్ర నిరంతర మూల్యాంకనం (కాంప్రహెన్సివ్, కంటిన్యూ ఇవాల్యుయేషన్‌ – సీసీఈ) విధానం ప్రకారం గతంలో ఎస్సెస్సీ పరీక్షల్లో అంతర్గత మార్కులు ఉండేవి. అంతర్గత ప్రాజెక్టులకు 20 మార్కులు, పబ్లిక్‌  పరీక్షలను 80 మార్కులకు నిర్వహించేవారు. అయితే అంతర్గత మార్కుల విషయంలో ప్రైవేటు స్కూళ్లు అడ్డగోలుగా వ్యవహరిస్తూ తమ విద్యార్థులకు 20కి 20 మార్కులు వేసుకుంటున్నాయన్న విమర్శలు వెల్లువెత్తడంతో ప్రభుత్వం గతంలో టెన్త్‌ పబ్లిక్‌ పరీక్షల నుంచి అంతర్గత మార్కులను తొలగించింది. పూర్తిగా 100 మార్కులకు పరీక్షలు నిర్వహిస్తోంది. సీబీఎస్‌ఈ విధానాన్ని అనుసరించనున్నందున 2025 నుంచి జరిగే టెన్త్‌ పరీక్షల్లో ఎస్సెస్సీ బోర్డు కూడా ఆ తరహాలోనే అంతర్గత మార్కులను పరిగణనలోకి తీసుకోవలసి ఉంటుంది. ఇందుకు అనుగుణంగా ప్రభుత్వం టెన్త్‌ పబ్లిక్‌ పరీక్షల్లో అంతర్గత మార్కులను పునరుద్ధరిస్తూ ఉత్తర్వులు ఇవ్వవలసి ఉంటుందని ఎస్సెస్సీ బోర్డు వర్గాలు తెలిపాయి. రాష్ట్రంలో ఏటా ఆరులక్షల మందికిపైగా విద్యార్థులు టెన్త్‌ పబ్లిక్‌ పరీక్షలు రాస్తున్నారు. ప్రస్తుత విద్యాసంవత్సరం (2022–23)లో కూడా ఆరులక్షల మందికిపైగా విద్యార్థులు టెన్త్‌ పరీక్షలు రాయనున్నారు.   తొలివిడతగా 1,092 స్కూళ్లకు రానున్న సీబీఎస్‌ఈ గుర్తింపు   రాష్ట్రంలో సీబీఎస్‌ఈ విధానాన్ని ప్రవేశపెడుతున్నందున ప్రభుత్వ హైస్కూళ్లకు సీబీఎస్‌ఈ గుర్తింపునకోసం విద్యాశాఖ ఇప్పటికే ఆ బోర్డుకు ప్రతిపాదనలు పంపింది. సీబీఎస్‌ఈ నిబంధనలకు అనుగుణంగా ఉండే 1,092 స్కూళ్లకు తొలివిడతగా ఈ గుర్తింపు రానుంది. ఈ స్కూళ్ల విద్యార్థులకు సీబీఎస్‌ఈ విధానాలను అనుసరించి పరీక్షలు ఉంటాయి. నేరుగా ఆ బోర్డే ఈ స్కూళ్ల విద్యార్థులకు పరీక్షలు పెడుతుంది. సీబీఎస్‌ఈ గుర్తింపులేకున్నా దాని సిలబస్, ప్యాట్రన్‌ను మిగిలిన స్కూళ్లలో అనుసరించనున్నందున ఆ స్కూళ్ల పదోతరగతి విద్యార్థులకు మాత్రం ఎస్సెస్సీ బోర్డు ద్వారా.. సీబీఎస్‌ఈ ప్యాట్రన్‌లోనే పబ్లిక్‌ పరీక్షలు నిర్వహిస్తారు.   

సాక్షి, హైదరాబాద్‌: ప్రైవేటు పాఠశాలల ఇష్టారాజ్యానికి ముకుతాడు వేయాలని విద్యాశాఖ భావిస్తోంది. డీఏవీ స్కూల్‌ ఉదంతం నేపథ్యంలో అన్ని ప్రైవేటు పాఠశాలలపై దృష్టి సారించాలని నిర్ణయించింది. పాఠశాలల్లో డొనేషన్లు, ఫీజులు కనీస వసతులతో పాటు నిర్వహణ తీరుతెన్నులపై కూడా ఆరా తీసేందుకు సిద్ధమైంది. సీసీ కెమెరాల నిఘా నడుమ పాఠశాల నిర్వహణ కొనసాగే విధంగా చర్యలు చేపట్టనుంది. ఇప్పటికే ప్రైవేటు పాఠశాలపై పర్యవేక్షణ కోసం ప్రత్యేక కమిటీ ఏర్పాటు చేసింది. మండలం యూనిట్‌గా ఆయా పాఠశాల వ్యవహారంపై సమగ్ర నివేదిక తెప్పించుకొని దాని ఆధారంగా రానున్న విద్యా సంవత్సరంలో పాఠశాల అనుమతి  పునరుద్ధరించే సమయంలో చర్యలకు ఉపక్రమించాలని భావిస్తోంది. పాఠశాలకు అనుమతి రెన్యువల్‌ చేయడమో.. లేక  తిరస్కరించడమో చేయనుంది. నిబంధనలు తూచ తప్పకుండా పాటించే విధంగా షరతులను అనుమతికి కొర్రీగా పెట్టనుంది.  నిబంధనలు అమలు చేసే అవకాశం లేకపోలేదని విద్యాశాఖ నిపుణులు పేర్కొంటున్నారు.  ఇతర స్కూళ్లపై కూడా..   ►స్టేట్‌ సిలబస్‌తో పాటు సీబీఎస్‌ఈ, ఐసీఎస్‌ఈ స్కూల్స్‌పై కూడా పర్యవేక్షణ కొనసాగే విధంగా చర్యలు చేపట్టనుంది. స్టేట్‌ సిలబస్‌ పాఠశాలపై పర్యవేక్షణ పూర్తిగా రాష్ట్ర విద్యాశాఖ అధికారులది ఉండగా, సీబీఎస్‌ఈ, ఐసీఎస్‌ఈ గుర్తింపునకు మాత్రం నిరభ్యంతర పత్రం (ఎన్‌ఓసీ) మాత్రమే జారీ చేస్తోంది.   ►ఈ పాఠశాలలు ఇష్టానుసారంగా వ్యవహరిస్తే ఎన్‌ఓసీ సైతం ఉపసంహరించే విధంగా నిబంధనలు అమలు చేయాలని నిర్ణయించింది. కేవలం ఫీజులపై దృష్టి ప్రైవేటు, కార్పొరేట్‌ పాఠశాలల యాజమాన్యాలు ఫీజులు దండుకునే విషయంలో చూపే శ్రద్ధ.. మౌలిక వసతులను కల్పించడంలో లేకపోవడం సర్వసాధారణంగా తయారైంది.   ►ప్రైవేటు  యాజమాన్యాలు విద్యకు మినహా ఆటలకు, భద్రతకు ఏమాత్రం ప్రాధాన్యం  ఇవ్వడం లేదనే ఆరోపణలు  మెండుగా ఉన్నాయి.  అపార్టుమెంట్లు, ఇరుకు గదుల్లో తరగతులను నిర్వహిస్తూ విద్యార్థుల భద్రతను గాలిలో దీపంలా ఉంచుతున్నారు. ఏదైనా సమస్య రానంత వరకూ బాగానే ఉంటుంది. ఏదైనా జరగరాని  ప్రమాదం జరిగితే మాత్రం భారీ మూల్యం చెల్లించుకోక తప్పదని విద్యావేత్తలు విద్యార్థుల తల్లిదండ్రులు ఆందోళన వ్యక్తం చేస్తున్నారు.    నిబంధనలు గాలికి..  ►ప్రభుత్వ నిబంధనల ప్రకారం ప్రతి పాఠశాల ఏర్పాటుకు ముందు అగ్నిమాపక శాఖ నుంచి ఫైర్‌ సర్టిఫికెట్‌ పొందాలి. సంబంధితశాఖ అధికారులు భవనం అనుకూలతను పరిశీలించి అనువుగా ఉంటేనే ధ్రువీకరించాలి.   ►కొన్ని నిబంధనలకు అనుగుణంగా లేకపోయినా ఒత్తిళ్లు, పలుకుబడితో  అనుమతులు లభించినట్లు ఆరోపణలు కూడా ఉన్నాయి.  రెన్యువల్‌ సమయంలో కూడా కేవలం పేపర్ల ఆధారంగానే సర్టిఫై చేస్తున్నారనే విమర్శలు ఉన్నాయి. దీని వెనుక భారీ మొత్తంలో డబ్బులు చేతులు మారుతున్నట్లు ఆరోపణలు లేకపోలేదు. ఇక విద్యాశాఖ అధికారులది కూడా అదే పరిస్థితి అని పలువురు పెదవి విరుస్తున్నారు. పాఠశాలలను పరిశీలించకుండానే అనుమతుల జారీ అనుమానాలకు తావిస్తోది.  

న్యూఢిల్లీ:  సీబీఎస్‌ఈ 10వ తరగతి పరీక్ష ఫలితాల్లో అమ్మాయిలు సత్తా చాటారు. బాలికలు 95.21 శాతం మంది ఉత్తీర్ణత సాధించగా.. బాలురు 93.80 శాతం మంది పాసయ్యారు. బాలికల్లో దియా నామ్‌దేవ్, బాలురలో మయాంక్‌ యాదవ్‌ నేషనల్‌ టాపర్స్‌గా నిలిచారు. వీరిద్దరూ 100 శాతం ఉత్తీర్ణత సాధించారు. వీరిద్దరూ ఉత్తరప్రదేశ్‌కు చెందినవారే కావడం విశేషం. కాన్సెప్ట్‌లను అర్థం చేసుకుని చదివా షామ్లీ జిల్లాకు చెందిన దియా నామ్‌దేవ్.. స్థానిక స్కాటిష్ ఇంటర్నేషనల్ స్కూల్‌లో చదివారు. తల్లిదండ్రులకు, ఉపాధ్యాయుల ప్రోత్సాహంతోనే తాను టాపర్‌గా నిలిచానని దియా నామ్‌దేవ్ తెలిపారు. ఫలితాలు విడుదలైన తర్వాత ఆమె మీడియాతో మాట్లాడుతూ.. ‘నా తల్లిదండ్రులకు, ఉపాధ్యాయులకు ఎంతో రుణపడి ఉంటాను. నేను ప్రతిరోజూ 7 నుంచి 8 గంటలు చదువుకున్నాను. కాన్సెప్ట్‌లను బాగా అర్థం చేసుకుని చదవడం వల్ల టాపర్‌గా నిలిచాన’ని అన్నారు.  అన్ని సబ్జెక్టుల్లో పూర్తి మార్కులు నోయిడాలోని అమిటీ ఇంటర్నేషనల్‌ స్కూల్‌లో చదివిన మయాంక్‌ యాదవ్‌ కూడా 100 శాతం మార్కులతో టాపర్‌గా నిలిచాడు. అన్ని సబ్జెక్టుల్లో పూర్తి మార్కులు తెచ్చుకుని సత్తా చాటాడు. టాపర్‌గా నిలవడం పట్ల మయాంక్‌తో పాటు అతడి కుటుంబ సభ్యులు, టీచర్లు సంతోషం వ్యక్తం చేశారు. త్రివేండ్రం టాప్‌.. గువాహటి లాస్ట్‌ సీబీఎస్‌ఈ టెన్త్‌ ఫలితాల్లో త్రివేండ్రం ముందు వరుసలో నిలిచింది. త్రివేండ్రంలో అత్యధికంగా 99.68 శాతం ఉత్తీర్ణత నమోదయింది. గువాహటి 82.23 శాతం ఉత్తీర్ణతతో చివరి స్థానంలో ఉంది. ఢిల్లీలో 86.55 శాతం మంది విద్యార్థులు పాసయ్యారు. తూర్పు ఢిల్లీలో 86.96 శాతం, పశ్చిమఢిల్లీలో 85.94 శాతం ఉత్తీర్ణత నమోదయింది. ( కాలేజీ విద్యార్థుల కిస్సింగ్ కాంపిటీషన్.. పోలీసుల అదుపులో ఒకరు)

న్యూఢిల్లీ:  విద్యార్థుల్లోని అభ్యసనా సామర్థ్యాలను అంచనా వేసే పద్ధతిలో నూతన సంస్కరణలను వచ్చే విద్యా సంవత్సరం నుంచి దేశవ్యాప్తంగా అన్ని పాఠశాలల్లో అమల్లోకి తీసుకురావాలని సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌(సీబీఎస్‌ఈ) నిర్ణయించింది. విద్యార్థులు ఆర్జించిన నైపుణ్యాలు, సామర్థ్యాల ఆధారంగా వారి ప్రతిభను పూర్తిస్థాయిలో మదింపు(అసెస్‌మెంట్‌) చేసేలా కొత్త మార్పులు తీసుకొస్తున్నట్లు సీబీఎస్‌ఈ ఇప్పటికే ప్రకటించింది. జాతీయ విద్యా విధానం–2020ను ప్రాతిపదికగా తీసుకొని ఈ మార్పులు ఉంటాయని పేర్కొంది. విద్యార్థుల ప్రతిభను మదింపు చేసే సంస్కరణలను కొన్ని స్కూళ్లలో ప్రయోగాత్మకంగా అమలు చేశారు. మంచి ఫలితాలు వచ్చాయని అధికారులు చెబుతున్నారు. అందుకే అన్ని స్కూళ్లలో అమల్లోకి తీసుకొచ్చేందుకు సన్నద్ధమవుతున్నట్లు సీబీఎస్‌ఈ కార్యదర్శి అనురాగ్‌ త్రిపాఠి చెప్పారు.  కొత్త మార్పులు ఏమిటంటే..  విద్యార్థుల నైపుణ్యాలను సమగ్రంగా అంచనా వేయడానికి వీలుగా ప్రాక్టికల్‌ పరీక్షలు లేని సబ్జెక్టులకు కూడా ఇంటర్నల్‌ మార్కులు ఉంటాయి. విద్యార్థుల తల్లిదండ్రులు, టీచర్ల అభిప్రాయాల ఆధారంగా 20 శాతం మార్కులు కేటాయిస్తారు. అంటే అన్ని సబ్జెక్టుల్లో ఇంటర్నల్‌ మార్కులు ఉంటాయి.  క్వశ్చన్‌ పేపర్‌లో ప్రశ్నల సంఖ్యను మరో 33 శాతం పెంచుతారు. వాటిలో తగిన ప్రశ్నలను ఎంచుకొని, సమాధానాలు రాసే అవకాశాన్ని కల్పిస్తారు.  సమర్థత, నైపుణ్యాలను నిశితంగా పరీక్షించేలా ప్రశ్నలు అడుగుతారు. పుస్తకాల్లో లేని ప్రశ్నలు అడిగేందుకు ఆస్కారం ఉంది. విద్యార్థులు విశ్లేషణాత్మకంగా ఆలోచించి, సమాధానాలు రాయాల్సి ఉంటుంది.  3, 5, 8 తరగతుల పిల్లలకు సామర్థ్య సర్వే పరీక్షలు నిర్వహిస్తారు. ఇవి మార్కుల ఆధారంగా ఉండవు. విద్యార్థుల అభ్యసన స్థాయి, గతంలో పోలిస్తే ప్రతిభను ఎంతవరకు మెరుగుపర్చుకున్నారో వీటిద్వారా తెలుస్తుంది.  విద్యార్థుల టాలెంట్‌ను అన్ని కోణాల్లో అంచనా వేసేలా ప్రత్యేక ప్రోగ్రెస్‌ కార్డ్‌ను సీబీఎస్‌ఈ జారీ చేస్తుంది.  

న్యూఢిల్లీ: 2022–23 విద్యా సంవత్సరానికి 11,  12వ తరగతుల సిలబస్‌లో సీబీఎస్‌ఈ పలు మార్పులు ప్రకటించింది. చరిత్ర, రాజనీతి శాస్త్రాల్లోని అలీనోద్యమం, ప్రచ్ఛన్నయుద్ధ కాలం, ఆసియా–ఆఫ్రికా దేశాల్లో ముస్లిం సామ్రాజ్యాల అవతరణ, మొగలుల పాలన, పారిశ్రామిక విప్లవం పాఠ్యాంశాలను తొలగించింది. 10వ తరగతిలో ఫుడ్‌ సెక్యూరిటీ చాప్టర్‌లోని ఇంపాక్ట్‌ ఆఫ్‌ గ్లోబలైజేషన్‌ ఆన్‌ అగ్రికల్చర్‌ను తీసేసింది. ఉర్దూ కవి ఫయీజ్‌ అహ్మద్‌ ఫయిజ్‌ అనువాద కవితలను, డెమోక్రసీ అండ్‌ డైవర్సిటీ చాప్టర్లను తీసేసింది. సిలబస్‌లో హేతుబద్ధత కోసమే ఈ మార్పులు చేసినట్టు చెప్పింది. గత విద్యా సంవత్సరంలో రెండు దఫాలుగా నిర్వహించిన ఫైనల్‌ పరీక్షను ఈసారి ఒకే దఫా నిర్వహించాలని నిర్ణయించింది. 2020లోనూ 11వ తరగతి రాజనీతి శాస్త్రంలో పలు చాప్టర్లు తొలగించిన సీబీఎస్‌ఈ, నిరసనలతో మరుసటి ఏడాది నుంచి వాటిని పునరుద్ధరించింది.

సాక్షి, అమరావతి: ఐఐటీ, ఎన్‌ఐటీ, ఐఐఐటీ తదితర జాతీయ విద్యా సంస్థల్లో ప్రవేశాలకు నిర్వహించే జాయింట్‌ ఎంట్రన్స్‌ ఎగ్జామినేషన్‌ (జేఈఈ) మెయిన్‌ను ఎన్టీఏ వాయిదా వేసింది. ఈమేరకు బుధవారం రాత్రి పబ్లిక్‌ నోటిఫికేషన్‌ జారీచేసింది. దేశవ్యాప్తంగా విద్యార్థుల నుంచి వస్తోన్న విన్నపాలను పరిశీలించిన ఎన్టీఏ జేఈఈ 2 విడతల పరీక్షలను వాయిదా వేసింది. తొలి విడత పరీక్షలను జూన్‌లో, రెండో విడత జులైలో నిర్వహించనుంది. ఇంతకు ముందు ఫస్ట్, సెకండ్‌ సెషన్లను 6 రోజుల చొప్పున నిర్వహించాలని నిర్ణయించగా సవరించిన షెడ్యూల్‌లో పదేసి రోజులకు పెంచారు. తొలివిడత పరీక్షల రిజిస్ట్రేషన్ల ప్రక్రియ మంగళవారంతో ముగిసింది. బుధవారం నుంచి దరఖాస్తుల్లో సవరణలకు అవకాశం ఇచ్చారు. రెండో విడత రిజిస్ట్రేషన్ల ప్రక్రియ త్వరలోనే ప్రారంభమవుతుంది. ఇంతకుముందు పేర్కొన్న ప్రకారం రెండో విడత దరఖాస్తు ప్రక్రియ 8వ తేదీ నుంచి ప్రారంభం కావలసి ఉంది. అడ్మిట్‌ కార్డులు డౌన్‌లోడ్‌ చేసుకొనే తేదీని కూడా తరువాత వెల్లడిస్తామని ఎన్టీఏ తెలిపింది.  సెంట్రల్‌ బోర్డు ఆఫ్‌ సెకండరీ ఎడ్యుకేషన్‌ (సీబీఎస్‌ఈ)తో పాటు పలు రాష్ట్రాల ఇంటర్‌ బోర్డులు, హయ్యర్‌ సెకండరీ బోర్డుల పరీక్షలు ఏప్రిల్, మే నెలల్లో జరుగుతున్నాయి. అదే సమయంలో జేఈఈ మెయిన్‌ కూడా జరుగుతుండడంతో విద్యార్థులు గందరగోళంలో పడ్డారు. 2 పరీక్షలూ కీలకమైనవి కావడంతో దేనిపై దృష్టి పెట్టాలో తెలియక ఒత్తిడికి లోనవుతున్నారు. జేఈఈ షెడ్యూల్‌ దృష్ట్యా బోర్డు పరీక్షలు ఇప్పటికే 2 సార్లు మారాయి. ఇంటర్‌ పరీక్షలు నెల పాటు ఆలస్యమయ్యాయి. ఏపీలో ఏప్రిల్‌ 8 నుంచి 28 వ తేదీవరకు ఇంటర్‌ పరీక్షలు జరగాల్సి ఉండగా జేఈఈ తొలి షెడ్యూల్‌ ఏప్రిల్‌ 16 నుంచి 21 వరకు ప్రకటించడంతో బోర్డు పరీక్షల తేదీలను మార్చారు. ఏప్రిల్‌ 22 నుంచి మే 12 వరకు నిర్వహించాలని నిర్ణయించారు. జేఈఈ తేదీలను మళ్లీ ఏప్రిల్‌ 21 నుంచి మే 4వరకు మార్చడంతో ఇంటర్‌ పరీక్షల తేదీలను కూడా మార్చి మే 6 నుంచి మే 24 వరకు పెట్టారు. ఇప్పుడు జేఈఈ పరీక్షలు వాయిదా పడటంతో విద్యార్థులు ఊపిరిపీల్చుకుంటున్నారు.  అడ్వాన్స్‌డ్‌ పైనా ప్రభావం  జేఈఈ మెయిన్‌ వాయిదా ప్రభావం జేఈఈ అడ్వాన్స్‌డ్‌పైనా పడుతోంది. జూలై 3 న జేఈఈ అడ్వాన్స్‌డ్‌ పరీక్ష నిర్వహించాలని ముంబై ఐఐటీ ఇంతకు ముందే షెడ్యూల్‌ ప్రకటించింది. ఇప్పుడు జేఈఈ మెయిన్‌ పరీక్షలు జూలై 21 నుంచి 30వ తేదీవరకు జరుగనున్నాయి. ఆ పరీక్షల ఫలితాలు వెల్లడైతేనే అడ్వాన్స్‌డ్‌ నిర్వహించేందుకు వీలుంటుంది. ఆగస్టు చివరి వారం లేదా సెప్టెంబరు మొదటి వారంలో అడ్వాన్స్‌డ్‌ పరీక్ష జరుగుతుందని భావిస్తున్నారు.   

సాక్షి, హైదరాబాద్‌: జేఈఈ మెయిన్స్‌ పరీక్షను మేలో నిర్వహించాలని నేషనల్‌ టెస్టింగ్‌ ఏజెన్సీ (ఎన్‌టీఏ) నిర్ణయించినట్లు తెలిసింది.ఈ దిశగా ఇప్పటికే సూత్రప్రాయ అంగీకారం కుదిరినట్లు తెలిసింది. నోటిఫికేషన్‌ వచ్చే వారం విడుదల చేయాలని భావిస్తున్నారు. రిజిస్ట్రేషన్ల ప్రక్రియ త్వరలో మొదలవనుంది. వాస్తవానికి ఏప్రిల్‌లోనే పరీక్ష నిర్వహించాలను కున్నా సీబీఎస్‌ఈ టర్మ్‌–2 పరీక్షలు ఏప్రిల్‌ 26 నుంచి మొదలవుతుండటంతో అవి పూర్తయ్యాకే  మెయిన్స్‌ పరీక్ష నిర్వహించాలని నిర్ణయించారు. నిబంధనలు సడలించాలని డిమాండ్లు  జేఈఈ మెయిన్స్‌ నిబంధనలు సడలించాలని అన్ని రాష్ట్రాల విద్యార్థులు డిమాండ్‌ చేస్తున్నారు. పరీక్ష రాసేందుకు కనీసం ఇంటర్, ప్లస్‌–2లో 75 శాతం మార్కులు ఉండాలన్న నిబంధనను ఈసారీ సడలించాలని పట్టుబడుతున్నారు. గత రెండేళ్లుగా కరోనా కారణంగా ఈ నిబంధనకు మినహాయింపు ఇవ్వగా తాజాగా కరోనా వ్యాప్తి తగ్గడంతో ఆ నిబంధనను మళ్లీ అమలు చేయాలని ఎన్‌టీఏ భావిస్తోంది. విద్యార్థులు మాత్రం దీన్ని వ్యతిరేకిస్తున్నారు. గత రెండేళ్లుగా పరీక్షలు రాయకుండానే విద్యార్థులు ప్రమోట్‌ అవుతున్నారు. తెలంగాణలో టెన్త్‌ పరీక్షలు లేకుండా ఇంటర్‌కు పంపారు. ఇంటర్‌ ఫస్టియర్‌ పరీక్షలు తొలుత నిర్వహించకుండా సెకెండియర్‌కు అవకాశం ఇచ్చారు. ఆ తర్వాత పరీక్షల నిర్వహించినా కేవలం 49 శాతమే ఉత్తీర్ణత సాధించారు. దీంతో అందరినీ కనీస మార్కులతో పాస్‌ చేశారు. ఇప్పుడు వీళ్ళే జేఈఈ మెయిన్స్‌ రాయాల్సి ఉంటుంది. దీన్నిబట్టి చాలామందికి 75 మార్కులు ఇంటర్‌లో వచ్చే అవకాశం కన్పించడం లేదు. ఈ కారణంగా ఈ నిబంధన సడలింపు కోరుతున్నారు.  రెండుసార్లు చాలు!  జేఈఈ మెయిన్స్‌ను రెండుసార్లు నిర్వహిస్తే చాలన్న అభిప్రాయంతో అన్ని రాష్ట్రాలు ఏకీభవిస్తున్నాయి. తమిళనాడు, ఢిల్లీ విద్యార్థులు 4 సార్లూ మెయిన్స్‌ నిర్వహించాలని, ఎందులో ఎక్కువ మార్కులు వస్తే దాన్ని పరిగణనలోకి తీసుకోవాలని డిమాండ్‌ చేస్తున్నారు. ఎన్‌టీఏ మాత్రం ఈ అవకాశం ఇచ్చేందుకు ఇష్టపడట్లేదు. గతేడాది కూడా 4 అవకాశాలు ఇచ్చినా విద్యార్థులు పెద్దగా వినియోగించుకోలేదు. దరఖాస్తు చేసిన వారిలో ఎక్కువ మంది పరీక్షకు హాజరవలేదు. ఆఖరి రెండు దఫాలకు  హాజరు బాగా తగ్గిందని ఎన్‌టీఏ అధికారులు చెబుతున్నారు. ఈ దృష్ట్యా పరీక్షను రెండుసార్లే నిర్వహించడంపై ఎన్‌టీఏ దృష్టి పెట్టింది.

సాక్షి, అమరావతి: సెంట్రల్‌ బోర్డు ఆఫ్‌ సెకండరీ ఎడ్యుకేషన్‌ (సీబీఎస్‌ఈ) విధానం అమలవుతున్న స్కూళ్లలో 10, 12 తరగతుల పరీక్షలకు ఒకే ఏడాది వేర్వేరు విధానాలను అనుసరిస్తుండడంపై విద్యార్థులు, టీచర్లు ఆందోళన వ్యక్తం చేస్తున్నారు. ఒకే ఏడాది వేర్వేరు రకాలుగా పరీక్షలు నిర్వహించడం వల్ల విద్యార్థులు సమస్యలు ఎదుర్కొంటారని, పాఠ్యబోధనలో తమకూ ఇబ్బందులు తప్పవని టీచర్లు చెబుతున్నారు. సీబీఎస్‌ఈ ఈ ఏడాది 10, 12 తరగతుల విద్యార్థులకు రెండు టర్మ్‌ల పరీక్షల విధానాన్ని అమల్లోకి తెచ్చింది. ఇందులో భాగంగా ఒకే ఏడాదిలో ఫస్ట్‌ టర్మ్, సెకండ్‌ టర్మ్‌ పరీక్షలు నిర్వహిస్తోంది. ఈ విద్యా సంవత్సరానికి సంబంధించి ఫస్ట్‌ టర్మ్‌ పరీక్షలు గతేడాది నవంబర్‌–డిసెంబర్‌ల్లో జరిగాయి. బహుళైచ్ఛిక సమాధాన ప్రశ్నలు, ఆబ్జెక్టివ్‌ తరహా ప్రశ్నలతో ఈ పరీక్షలను నిర్వహించారు. రెండో టర్మ్‌ పరీక్షలను వచ్చే మార్చిలో నిర్వహించే అవకాశాలున్నాయి. దీనికి సంబంధించిన షెడ్యూల్‌ను బోర్డు ఇంకా విడుదల చేయలేదు. రెండో టర్మ్‌ పరీక్షలను వ్యాసరూప (డిస్క్రిప్టివ్‌) ప్రశ్నల విధానంలో నిర్వహించాలని నిర్ణయించింది. ఇదే ప్రస్తుతం విద్యార్థులు, ఉపాధ్యాయుల్లో గందరగోళానికి కారణమవుతోంది.  ఒకే విధానంలో పరీక్షలు ఉండాలి.. సీబీఎస్‌ఈ 10, 12 తరగతి పరీక్షలు రెండింటికీ ఒకే విధానాన్ని కాకుండా వేర్వేరు విధానాలను అనుసరించడం సరికాదన్నది పలు ప్రైవేటు పాఠశాలల యాజమాన్యాలు, టీచర్ల అభిప్రాయం. ఆబ్జెక్టివ్‌ తరహా ప్రశ్నలతో విద్యార్థుల్లో సృజనాత్మకత, అవగాహన శక్తి, ఇతర నైపుణ్యాలను లోతుగా అంచనా వేసే అవకాశాలు తక్కువని చెబుతున్నారు. వ్యాసరూప ప్రశ్నలతో అయితే విద్యార్థి సమాధానాల తీరును పరిశీలించడం ద్వారా ఆ నైపుణ్యాలను తెలుసుకోగలుగుతామని కొందరు అంటున్నారు. ఆబ్జెక్టివ్‌ ప్రశ్నల ద్వారానే విద్యార్థిని లోతుగా, సంపూర్ణంగా అన్ని అంశాల్లో పరిశీలించవచ్చని మరికొందరు వాదిస్తున్నారు. పైగా వివిధ పోటీపరీక్షల్లో ఆబ్జెక్టివ్‌ ప్రశ్నలే ఉంటున్నాయని గుర్తు చేస్తున్నారు. అందువల్ల ఆబ్జెక్టివ్‌ ప్రశ్నల విధానంతో విద్యార్థులకు వాటిని ఎదుర్కొనేలా ముందుగానే తర్ఫీదునిచ్చే అవకాశం ఉంటుందని పేర్కొంటున్నారు. కాబట్టి ఒక ఏడాదిలో ఈ రెండింటిలో ఏదో ఒక విధానంలోనే పరీక్షలు నిర్వహించడం సరైనదని అంటున్నారు. ఒకే విద్యా సంవత్సరంలో సగం రోజులు ఒక తరహా పరీక్షలకు బోధించి, ఆ వెంటనే మరో తరహాలో బోధించడం కష్టమని వివరిస్తున్నారు.  విద్యార్థుల విముఖత విద్యార్థులు కూడా కొన్ని రోజులు ఆబ్జెక్టివ్‌కు అలవాటు పడి.. ఆ వెంటనే డిస్క్రిప్టివ్‌ విధానంలో పరీక్షలు రాయడం కష్టమేనని చెబుతున్నారు. దీనివల్ల వారిపై ఒత్తిడి పెరుగుతుందని అంటున్నారు. రెండు విధానాల్లో పరీక్షలపై విద్యార్థులు కూడా విముఖంగా ఉన్నారని పేర్కొంటున్నారు. ఇప్పటికిప్పుడు వ్యాసరూప ప్రశ్నలకు విద్యార్థులు సన్నద్ధం కావడం కష్టమని వివరిస్తున్నారు. ముఖ్యంగా ఆబ్జెక్టివ్‌ తరహా ప్రశ్నల ద్వారా గణితం, అర్థశాస్త్రం వంటి సబ్జెక్టులను నేర్చుకున్న విద్యార్థులు.. ఇప్పుడు వ్యాసరూప ప్రశ్నలకు సమాధానాలు ఇవ్వడానికి చాలా కష్టపడాల్సి వస్తుంది. అందువల్ల ఒక ఏడాదికి ఒకే తరహా పరీక్షలు పెడితే ఇబ్బంది ఉండదని అంటున్నారు. ఇప్పటికే పలు పాఠశాలల విద్యార్థులు, తాము సీబీఎస్‌ఈకి ఈ విషయంలో విజ్ఞప్తి చేశామని టీచర్లు చెబుతున్నారు. 

సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌(సీబీఎస్‌ఈ).. తల్లిదండ్రులకు ఏకైక బాలికా సంతానంగా ఉన్న ప్రతిభ కలిగిన విద్యార్థినుల కోసం సింగిల్‌ గర్ల్‌ చైల్డ్‌ స్కాలర్‌షిప్‌(ఎస్‌జీసీఎస్‌) పథకాన్ని అమలుచేస్తోంది. ఏకైక సంతానంగా ఉన్న ఆడపిల్లల చదువును ప్రోత్సహించేందుకు గాను ఈ స్కాలర్‌షిప్‌ను సీబీఎస్‌ఈ 2006లో ప్రారంభించింది. సీబీఎస్‌ఈ పదోతరగతి పరీక్షలో ఉత్తీర్ణులైన ప్రతిభావంతులైన బాలికల నుంచి దరఖాస్తులు కోరుతోంది. అర్హతలు ► విద్యార్థిని తల్లిదండ్రులకు ఏకైక కుమార్తె(సింగిల్‌ గర్ల్‌చైల్డ్‌) అయి ఉండాలి. ► ఈ స్కాలర్‌షిప్‌కు కేవలం భారతీయ పౌరులు మాత్రమే అర్హులు. ► విద్యార్థిని సీబీఎస్‌ఈలో పదోతరగతి ఉత్తీర్ణురాలై, సీబీఎస్‌ఈ అనుబంధ పాఠశాలలో 11వ తరగతి, 12వ తరగతి చదువుతూ ఉండాలి. ► పదో తరగతి పరీక్షలో కనీసం 60శాతం లేదా అంతకంటే ఎక్కువ మార్కులు సాధించి ఉండాలి. ► విద్యార్థిని ట్యూషన్‌ ఫీజు నెలకు రూ.1500 కంటే మించకూడదు. ► 11వ తరగతి, 12వ తరగతి చదువుతున్న విద్యార్థినులు మాత్రమే అర్హులు. ► 2020 సంవత్సరంలో పదోతరగతి ఉత్తీర్ణులైన విద్యార్థినులు మాత్రమే ఈ స్కాలర్‌షిప్‌నకు అర్హులు. ► సీబీఎస్‌ఈ బోర్డుకు సంబంధించి ఎన్‌ఆర్‌ఐ విద్యార్థిని అయితే ట్యూషన్‌ ఫీజు నెలకు రూ.6000కు మించకుండా ఉంటే స్కాలర్‌షిప్‌కు అర్హురాలే. ► విద్యార్థిని ఏకైక సంతానం అని రుజువు చేయడానికి సంబంధించి సీబీఎస్‌ఈ వెబ్‌సైట్లో పేర్కొన్న ఫార్మెట్లో ఫస్ట్‌ క్లాస్‌ జ్యుడీషియల్‌ మేజిస్ట్రేట్‌/ఎడీఎం /ఎగ్జిక్యూటివ్‌ మెజిస్ట్రేట్‌/నోటరీ అటెస్ట్‌ చేసిన ఒరిజనల్‌ అఫిడవిట్‌ను సమర్పించాల్సి ఉంటుంది. స్కాలర్‌షిప్‌ వ్యవధి ► స్కాలర్‌షిప్‌కు ఎంపికైన విద్యార్థినులు 11వ తరగతి తర్వాత ప్రతి సంవత్సరం రెన్యువల్‌ చేసుకోవాల్సి ఉంటుంది. ► స్కాలర్‌షిప్‌ రెన్యువల్‌ చేయించుకోవాలంటే.. విద్యార్థిని 11వ తరగతి నుంచి ఆపై తరగతులలో కనీసం 50శాతం లేదా అంతకంటే ఎక్కువ మార్కులు సాధించి ఉండాలి. ► విద్యార్ధిని సత్ప్రవర్తనతోపాటు పాఠశాలలో హాజరు శాతం కూడా బాగుండాలి. ► ఒకవేళ విద్యార్థిని పాఠశాల లేదా కోర్సు మారాలంటే.. బోర్డు ముందస్తు అనుమతి తీసుకుంటేనే స్కాలర్‌షిప్‌ కొనసాగుతుంది. ► స్కాలర్‌షిప్‌ ఒక్కసారి రద్దయితే తిరిగి పునరుద్ధరించరు. స్కాలర్‌షిప్‌ మొత్తం ► విద్యార్థినులకు రెండేళ్ల పాటు నెలకు రూ.500 చొప్పున అందిస్తారు. ► ఆన్‌లైన్‌ దరఖాస్తులకు చివరి తేది: 17.01.2022  ► సీబీఎస్‌ఈ పాఠశాలల దరఖాస్తు ధృవీకరణకు చివరి తేది: 25.01.2022 ► వెబ్‌సైట్‌: cbse.nic.in

ఢిల్లీ: పదోతరగతి ఆంగ్ల పరీక్షా పత్రంలో వచ్చిన ఒక వివాదాస్పద వ్యాసం తీవ్ర దుమారం రేపింది. దాంతో దీన్ని ఉపసంహరిస్తున్నామని సీబీఎస్‌ఈ సోమవారం ప్రకటించింది. విద్యార్థులందరికీ ఈ ప్రశ్నకు సంబంధించి ఫుల్‌ మార్కులు ఇస్తామని పేర్కొంది. వ్యాసంలో అంశాలపై పశ్చాత్తాపం వ్యక్తం చేసిన బోర్డు, ఇది ఒక దురదృష్ట ఘటనగా అభివర్ణించింది. విద్యాభ్యాసనలో సమానత్వానికి, శ్రేష్టతకు సీబీఎస్‌ఈ కట్టుబడి ఉంటుందని ఒక ప్రకటనలో తెలిపింది. సీబీఎస్‌ఈ 10వ తరగతి ఇంగ్లిషు టర్మ్‌ 1 ప్రశ్నాపత్రంలోని ఒక వ్యాసంలో లైంగిక వివక్ష, తిరోగామి విశ్వాసాలను ప్రతిబింబించే అభిప్రాయాలున్నాయని శనివారం తీవ్ర విమర్శలు వచ్చాయి.  దీంతో వెంటనే సీబీఎస్‌ఈ అప్రమత్తమైంది. ఈ వ్యాసంలో ‘‘ పిల్లలపై తల్లిదండ్రుల అధికారాన్ని స్త్రీ విముక్తి నాశనం చేసింది’’, ‘‘భర్త మార్గాన్ని అనుసరించడం ద్వారానే పిల్లల విధేయతను తల్లి పొందగలదు’’ అనే వాక్యాలున్నాయి. ‘‘స్త్రీ స్వాతంత్య్రం అనేక సామాజికార్థిక సమస్యలకు కారణమైంది, భర్తకు భార్య విధేయత చూపకపోవడంతో పిల్లల్లో క్రమశిక్షణారాహిత్యం పెరిగింది’’ అనే వ్యాఖ్యలు కూడా ఉన్నాయి. దీంతో సీబీఎస్‌పై విమర్శలు వెల్లువెత్తాయి. సోషల్‌ మీడియాలో సీబీఎస్‌ఈ ‘ఇన్‌సల్ట్స్‌ ఉమెన్‌’ పేరిట హ్యాష్‌ట్యాగ్‌లు దర్శనమిచ్చాయి. బోర్డు స్త్రీద్వేష, తిరోగామి భావనలకు మద్దతినిస్తోందని పలువురు దుయ్యబట్టారు. దీంతో స్పందించిన బోర్డు సదరు వ్యాసం తమ ప్రశ్నాపత్రాల రూపకల్పనా నిబంధనలకు అనుగుణంగా లేదని, విద్యార్ధులకు పూర్తి మార్కులు కేటాయిస్తామని బోర్డు పరీక్షా కంట్రోలర్‌ సన్యామ్‌ భరధ్వాజ్‌ ప్రకటించారు.  లోక్‌సభలో ప్రస్తావించిన కాంగ్రెస్‌  సీబీఎస్‌ఈ పరీక్షా పత్రంలోని వ్యాసం అసంబద్ధం, స్త్రీ ద్వేషపూర్వకమని కాంగెస్ర్‌ అధ్యక్షురాలు సోనియా గాంధీ విమర్శించారు. చదువు, పరీక్షలకు సంబంధించిన ప్రమాణాలు నాసిరకంగా మారాయని ఈ వ్యాసం నిరూపిస్తోందన్నారు. సోమవారం లోక్‌సభ జీరో అవర్‌లో ఈ విషయాన్ని ఆమె ప్రస్తావించి పభ్రుత్వం క్షమాపణ చెప్పాలని డిమాండ్‌ చేశారు. పరీక్షలో స్త్రీద్వేష పూర్వక వ్యాసం ప్రత్యక్షమవడమై తీసుకున్న చర్యలకు సంబంధించి ఈనెల 17లోగా నివేదిక ఇవ్వాలని సీబీఎస్‌ఈకి ఢిల్లీ మహిళా కమిషన్‌  నోటీసులు జారీ చేసింది.  

సాక్షి, అమరావతి: రాష్ట్రంలోని పాఠశాలల్లో సెంట్రల్‌ బోర్డు ఆఫ్‌ సెకండరీ ఎడ్యుకేషన్‌ (సీబీఎస్‌ఈ) విధానాన్ని అమలు చేసేందుకు విద్యా శాఖ ఏర్పాట్లు ముమ్మరం చేసింది. పాఠశాల విద్యలో సమూల సంస్కరణలు తెస్తున్న నేపథ్యంలో సీబీఎస్‌ఈ విధానాన్ని అమలు చేయాలని ప్రభుత్వం ఇప్పటికే ఉత్తర్వులు జారీ చేసిన సంగతి తెలిసిందే. పాఠశాల విద్యా వ్యవస్థలో ముఖ్యంగా మూల్యాంకన విధానంలో పూర్తి సంస్కరణలు తీసుకురావాల్సిన అవసరాన్ని రాష్ట్ర ప్రభుత్వం గుర్తించింది. ఇందుకు ప్రభుత్వ స్కూళ్లలో సీబీఎస్‌ఈ విధానాన్ని ప్రవేశపెట్టాలని నిర్ణయించింది. ప్రభుత్వ పాఠశాలల విద్యార్థులు భవిష్యత్‌లో జాతీయ, అంతర్జాతీయ పరీక్షలను ఎదుర్కోవాల్సి ఉంటుంది. అందుకు అనుగుణంగా వారిని తీర్చిదిద్దే ఉద్దేశంతో సీబీఎస్‌ఈ విధానానికి శ్రీకారం చుట్టింది. ఇందుకు ముందుగా సీబీఎస్‌ఈకి పాఠశాల విద్యాశాఖ ప్రతిపాదనలు పంపగా సుముఖత వ్యక్తపరిచింది. దీంతో రాష్ట్ర ప్రభుత్వం సీబీఎస్‌ఈ నిబంధనలకు అనుగుణంగా ఉన్న 1,092 పాఠశాలలను ఎంపిక చేసింది. మొదటి దశ కింద వీటిలో సీబీఎస్‌ఈ అమలుకు నిర్ణయించింది. 2024–25 విద్యా సంవత్సరంలో సీబీఎస్‌ఈ టెన్త్‌ పరీక్షలు రాసేలా ప్రస్తుత విద్యాసంవత్సరంలో ఏడో తరగతి నుంచి అమలు చేయాలని ముందు నిర్ణయించారు. అయితే సీబీఎస్‌ఈ అఫిలియేషన్‌ ప్రక్రియ కొనసాగుతుండడం, ప్రస్తుత విద్యాసంవత్సరం ప్రారంభమై రెండు నెలలు గడచిపోతుండడంతో వచ్చే ఏడాది నుంచి అంటే ఎనిమిదో తరగతి నుంచి సీబీఎస్‌ఈ విధానాన్ని అమలు చేయనున్నారు.  కేజీబీవీలకు అగ్రస్థానం తొలి విడతగా సీబీఎస్‌ఈ విధానాన్ని అమలు చేయడానికి ప్రభుత్వంలోని 10 విభాగాల యాజమాన్యాల పరిధిలో ఉన్న వివిధ స్కూళ్లను ఎంపిక చేశారు. వీటిలో నిరుపేద, అనాధ బాలికలు విద్యనభ్యసిస్తున్న కస్తూర్బా గాంధీ బాలికా విద్యాలయాలకు ప్రాధాన్యమిచ్చారు. ఆ తర్వాత ఏపీ మోడల్‌ స్కూళ్లు, వివిధ సంక్షేమ శాఖల ఆధ్వర్యంలో నడిచే గురుకుల స్కూళ్లు, మున్సిపల్‌ స్కూళ్లు, జెడ్పీ, ప్రభుత్వ స్కూళ్లను ఎంపిక చేశారు.  అత్యధికంగా అనంతపురం జిల్లాలో.. సీబీఎస్‌ఈ విధానం తొలి విడత అమలుకు సంబంధించి ఎంపిక చేసిన స్కూళ్లలో అత్యధికం అనంతపురం జిల్లాలో ఉన్నాయి. ఈ జిల్లాలో 137 స్కూళ్లను ఎంపిక చేయగా రెండో స్థానంలో కర్నూలు (128) మూడో స్థానంలో ప్రకాశం (94) ఉన్నాయి.  

సాక్షి, అమరావతి: కోవిడ్‌ కారణంగా పాఠశాలలను చాలాకాలంగా మూసి ఉంచినందున విద్యా సంవత్సరపు పని దినాలను తగ్గించి పాఠ్యప్రణాళికలో మార్పులు చేసిన సెంట్రల్‌ బోర్డు ఆఫ్‌ సెకండరీ ఎడ్యుకేషన్‌ (సీబీఎస్‌ఈ) అందుకు అనుగుణంగా ల్యాబ్‌ ప్రయోగాల (ప్రాక్టికల్స్‌)లోనూ మార్పులు చేసింది. 9, 10 తరగతుల విద్యార్థులకు అనుకున్న మేర ప్రయోగాల ప్రక్రియను ల్యాబ్‌లలో నిర్వహించే పరిస్థితులు లేనందున ఇంటినుంచే అందుబాటులో ఉన్న వనరులతో ప్రయోగాలు చేపట్టేలా ప్రత్యామ్నాయాలను నిర్దేశించింది. ఇందుకు సంబంధించి సీబీఎస్‌ఈ తాజాగా విధివిధానాలను ప్రకటించింది. ఉపాధ్యాయుల ముఖాముఖి సూచనలతో నిర్వహించే ల్యాబ్‌ ప్రయోగాలకు బదులు వారి మార్గనిర్దేశంలో ఇంటినుంచే విద్యార్థులు తమ ప్రాక్టికల్‌ వర్కులు, ప్రాజెక్టు వర్కులు పూర్తిచేయవచ్చని సూచించింది. ఈ ప్రయోగాల ద్వారా అభ్యాస ఫలితాలు ఒకే విధంగా ఉండేలా ఆయా అంశాలను రూపొందించి విద్యార్థులకు అందుబాటులో ఉంచింది. గత ఏడాది సెప్టెంబర్‌లో లాక్‌డౌన్‌ కారణంగా ల్యాబ్‌ ప్రయోగాలు నిర్వహించలేని పరిస్థితుల్లో సీబీఎస్‌ఈ అన్ని పాఠశాలల్లోని 9 నుంచి 12 తరగతుల విద్యార్థులతో ఆన్‌లైన్‌ ప్లాట్‌ఫాం ‘ఓల్యాబ్‌స్టో’ ద్వారా సీబీఎస్‌ఈ కరిక్యులమ్‌ను, ప్రయోగాల ప్రక్రియలను వర్చువల్‌ రూపంలో విద్యార్థులకు అందుబాటులో ఉంచింది. తాజాగా వీటితోపాటు జాతీయ విద్యాపరిశోధన శిక్షణ మండలి (ఎన్‌సీఈఆర్టీ) మాన్యువల్‌ నుంచి మరికొన్ని ఇతర ప్రయోగ కార్యకలాపాలను విద్యార్థులకు అందుబాటులో ఉంచినట్టు ప్రకటించింది.  అందుబాటులో ఉండే వనరులతోనే ప్రయోగాలు విద్యార్థులు తమ ఇంటివద్ద అందుబాటులో ఉండే వనరులతోనే ఈ ప్రయోగాలు చేపట్టేలా ఎన్‌సీఈఆర్టీ రూపొందించిన ప్రక్రియలను విద్యార్థులతో అనుసరింప చేయాలని సీబీఎస్‌ఈ ఆయా పాఠశాలలకు సూచనలు చేసింది. ఈ కంటెంట్‌ దీక్షా పోర్టల్‌ ద్వారా కూడా అందుబాటులో ఉంచినట్టు వెల్లడించింది. విద్యార్థులకు ఇబ్బంది రాకుండా రక్షిత పద్ధతుల్లో ఇంటివద్దే ప్రయోగాలు చేసేలా ఆయా మెటీరియల్‌ను సూచించాలని టీచర్లకు నిర్దేశించింది. విద్యార్థుల్లో జ్ఞానాన్ని పెంపొందించడంలో పాఠ్యబోధన ఎంత ముఖ్యమో.. ప్రాక్టికల్స్‌ కూడా అంతకంటే ముఖ్యమైనవని పేర్కొంటున్న సీబీఎస్‌ఈ వీటికి ఎంతో ప్రాధాన్యత ఇస్తోంది. సీబీఎస్‌ఈలో ప్లస్‌ 2లోనే ప్రయోగాలు చేపట్టించేలా కాకుండా 9వ తరగతి నుంచే విద్యార్థులకు వాటిని అమలు చేయిస్తోంది.

సాక్షి, న్యూఢిల్లీ: వచ్చే నెలలో ప్రారంభంకానున్న 10, 12 తరగతుల మొదటి టర్మ్‌ బోర్డు పరీక్షలకు సంబంధించి పరీక్షా కేంద్రం నగరాన్ని మార్చుకొనేందుకు సీబీఎస్‌ఈ అనుమతించింది. అడ్మిషన్‌ తీసుకున్న నగరంలో కాకుండా విద్యార్థి వేరే నగరంలో ఉన్న పరిస్థితుల్లో ఆ నగరంలో పరీక్ష రాసేందుకు అవకాశాన్ని కల్పిస్తూ సీబీఎస్‌ఈ బుధవారం ప్రకటన జారీ చేసింది. కొందరు విద్యార్థులు వారు అడ్మిషన్‌ తీసుకున్న నగరంలో కాకుండా ఇప్పటికీ ఇతర నగరాల్లో నివసిస్తున్నారని సీబీఎస్‌ఈ దృష్టికి వచ్చిందని ఎగ్జామినేషన్‌ కంట్రోలర్‌ సన్యామ్‌ భరద్వాజ్‌ తెలిపారు. ఈ పరిస్థితుల్లో పరీక్షా కేంద్రం నగరాన్ని మార్చడానికి విద్యార్థుల సంబంధిత పాఠశాలలకు ఒక అభ్యర్థన చేసేందుకు నిర్ధిష్ట సమయాన్ని ఇవ్వనున్నామని పేర్కొన్నారు. ఈ అవకాశాన్ని వినియోగించుకోవాలన్న విద్యార్థులు, ఆ సమయంలో దరఖాస్తు చేసుకుంటేనే బోర్డు అంగీకరిస్తుందని భరద్వాజ్‌ తెలిపారు. కాగా 10వ తరగతి ఫస్ట్‌ టర్మ్‌ పరీక్షలు నవంబర్‌ 30 నుంచి, 12 తరగతి పరీక్షలు డిసెంబర్‌ 1 నుంచి నిర్వహించేందుకు ప్రణాళిక సిద్ధమైన విషయం తెలిసిందే. (ఈ కోర్సులు చదవితే జాబ్‌ ఆఫర్లు అపారం!)

సాక్షి,  మియాపూర్‌(హైదరాబాద్‌): చక్కగా చదువుకోలేకపోతున్నాననే మానసిక ఒత్తిడి తట్టుకోలేక ఓ విద్యార్థిని భవనంపై నుంచి దూకి ఆత్మహత్య చేసుకున్న ఘటన మియాపూర్‌ పోలీస్‌ స్టేషన్‌ పరిధిలో చోటుచేసుకుంది. ఎస్‌ఐ రవికుమార్‌ చెప్పిన వివరాల ప్రకారం.. ఢిల్లీలోని దయాళ్‌పూర్‌నకు చెందిన వీరేంద్రసింగ్‌ నేగి, సోనియా నేగి దంపతులకు కుమార్తె జాహ్నవి నేగి (17), కుమారుడు ఉన్నారు. వీరు మియాపూర్‌ మైహోమ్స్‌లో టార్క్‌ ఐఎస్‌ బ్లాక్‌లో 9వ అంతస్తులో జీవనం కొనసాగిస్తున్నారు. జాహ్నవి ప్రస్తుతం సీబీఎస్‌ఈ 12వ తరగతి చదువుతోంది. ఈ క్రమంలో సోమవారం రాత్రి 7 గంటల ప్రాంతంలో ఆమె తల్లిదండ్రులు వాకింగ్‌కు వెళ్లారు. ఈ సమయంలో ఇంట్లో ఎవరూ లేకపోవడంతో 9వ అంతస్తు నుంచి కిందకి దూకింది. గమనించిన సెక్యూరిటీ గార్డు వెంటనే ఆస్పత్రికి తరలించారు. పరిశీలించిన వైద్యులు జాహ్నవి అప్పటికే మృతి చెందినట్లు చెప్పారు. చదువులో మానసిక ఒత్తిడి తట్టుకోలేకనే ఆమె ఆత్మహత్యకు పాల్పడి ఉంటుందని పోలీసులు తెలిపారు. ఈ మేరకు  కేసు దర్యాప్తు చేస్తున్నారు.    చదవండి: డేటింగ్‌ యాప్‌లో పరిచయం.. చాటింగ్‌లో మునిగితేలారు.. చివరకు

సాక్షి, అమరావతి: రాష్ట్రంలోని పాఠశాలల్లో 8వ తరగతి సిలబస్‌ను మార్పు చేయాలని విద్యా శాఖ నిర్ణయించింది. ఇందుకు ఈ నెల 21న విద్యావేత్తలు, నిపుణులతో సదస్సు నిర్వహించనుంది. రాష్ట్రంలోని ప్రభుత్వ పాఠశాలల్లో సీబీఎస్‌ఈ (సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌) విధానాన్ని అమలు చేయాలని సంకల్పించిన నేపథ్యంలో ఆ దిశగా 8వ తరగతి సిలబస్‌ను రూపొందించనున్నారు. ఇప్పటికే 7వ తరగతి వరకు ఉన్న పాఠ్యపుస్తకాల సిలబస్‌ను మార్పు చేసి.. దాన్ని అమలులోకి తీసుకువచ్చారు. ప్రభుత్వ పాఠశాలల్లో ఆంగ్ల మాధ్యమం ఏర్పాటు చేసినందున విద్యార్థులకు బైలింగ్యువల్‌ (ద్విభాష) పాఠ్యపుస్తకాలను రూపొందించి పంపిణీ చేశారు. ఇప్పుడు 8వ తరగతి సిలబస్‌ను కూడా సీబీఎస్‌ఈ విధానానికి అనుగుణంగా మార్పులు చేసి వచ్చే విద్యా సంవత్సరంలో కొత్త పాఠ్యపుస్తకాలను అందించనున్నారు. ఈ నెల 21న జరిగే సదస్సులో విద్యా శాఖ మంత్రి ఆదిమూలపు సురేష్‌ దిశానిర్దేశం చేయనున్నారు. కాగా రాష్ట్రంలోని ప్రభుత్వ పాఠశాలల్లో దశలవారీగా సీబీఎస్‌ఈ విధానాన్ని అమలు చేసేందుకు విద్యా శాఖ సీబీఎస్‌ఈకి ప్రతిపాదనలు పంపిన సంగతి తెలిసిందే. సీబీఎస్‌ఈ నిబంధనలకు అనుగుణంగా ఉన్న పాఠశాలలను ఎంపిక చేసి.. వాటిలో ముందుగా ఈ విధానాన్ని అమల్లోకి తేనున్నారు. ఇప్పటికే 1,092 స్కూళ్లను అధికారులు గుర్తించారు. వీటిలో మోడల్‌ స్కూళ్లు 164, ఏపీఆర్‌ఐఈ సొసైటీ స్కూళ్లు 50, బీసీ వెల్ఫేర్‌ స్కూళ్లు 78, కేజీబీవీలు 352, ఎంపీపీ, జడ్పీ స్కూళ్లు 126, మున్సిపల్‌ స్కూళ్లు 5, సోషల్‌ వెల్ఫేర్‌ స్కూళ్లు 180, ప్రభుత్వ స్కూళ్లు 4, ట్రైబల్‌ వెల్ఫేర్‌ స్కూళ్లు 126, ట్రైబల్‌ వెల్ఫేర్‌ డిపార్ట్‌మెంట్‌ స్కూళ్లు 7 ఉన్నాయి.   

న్యూఢిల్లీ: 10, 12వ తరగతుల టర్మ్‌–1 బోర్డు పరీక్షలను ఆఫ్‌లైన్‌ విధానంలోనే నిర్వహించనున్నట్లు సెంట్రల్‌ బోర్డ్‌ ఆఫ్‌ సెకెండరీ ఎడ్యుకేషన్‌(సీబీఎస్‌ఈ) గురువారం ప్రకటించింది. నవంబర్‌–డిసెంబర్‌లో ఈ పరీక్షలు జరుగుతాయని తెలిపింది. పరీక్షల షెడ్యూల్‌ను ఈ నెల 18న ప్రకటించే అవకాశాలు ఉన్నట్లు వెల్లడించింది. ఆబ్జెక్టివ్‌ టైప్‌ పరీక్ష ఉంటుందని, ఒక్కో టెస్టు వ్యవధి 90 నిమిషాలని పేర్కొంది. చలి కాలాన్ని దృష్టిలో పెట్టుకొని ఉదయం 10.30 గంటలకు కాకుండా 11.30 గంటలకు పరీక్షలు ప్రారంభించనున్నట్లు స్పష్టం చేసింది. టర్మ్‌–1, టర్మ్‌–2 పరీక్షల తర్వాత తుది ఫలితాలను ప్రకటించనున్నట్లు సీబీఎస్‌ఈ ఎగ్జామ్‌ కంట్రోలర్‌ భరద్వాజ్‌ తెలిపారు. టర్మ్‌–2 పరీక్షలను వచ్చే ఏడాది మార్చి–ఏప్రిల్‌లో నిర్వహించనున్నట్లు చెప్పారు.  

సాక్షి, న్యూఢిల్లీ: వైద్య విద్య కోర్సుల్లో ప్రవేశాలకు నిర్వహించే నీట్‌ పరీక్ష వాయిదాకు సుప్రీంకోర్టు నో చెప్పింది. ముందుగా వెల్లడించిన షెడ్యూల్ ప్రకారం సెప్టెంర్‌ 12న ఆదివారమే ఈ పరీక్షను నిర్వహించాలని కోర్టు అధికారులను ఆదేశించింది.  నీట్ పరీక్ష నిర్వహిస్తున్న రోజునే ఇతర పోటీ పరీక్షలు కూడా ఉన్నాయని.. అలాగే సీబీఎస్‌ఈ కంపార్ట్‌మెంట్ పరీక్షలు కూడా జరుగుతున్నాయని.. అందువల్ల నీట్‌ పరీక్షను మరో తేదీకి వాయిదా వేయాలని కొందరు సుప్రీంకోర్టులో పిటిషన్లు దాఖలు చేశారు.  ఈ పిటిషన్లను సుప్రీం తోసిపుచ్చింది. షెడ్యూల్ ప్రకారం సెప్టెంబర్ 12, ఆదివారమే జరుగుతుందని సుప్రీంకోర్టు స్పష్టం చేసింది.

సాక్షి, న్యూఢిల్లీ: 12వ తరగతి ఫలితాల వెల్లడిలో థియరీ ఫార్ములా ప్రాక్టికల్స్‌కు వర్తింపజేయొద్దని సీబీఎస్‌ఈకి ఢిల్లీ కమిషన్‌ ఫర్‌ ప్రొటెక్షన్‌ ఫర్‌ చైల్డ్‌ రైట్స్‌ (డీసీపీసీఆర్‌) సూచించింది. ఆ విధంగా చేయడం సీబీఎస్‌ఈ సొంత పాలసీకి విరుద్ధమని పేర్కొంది. 12వ తరగతి విద్యార్థి తండ్రి ఇచ్చిన ఫిర్యాదుపై డీసీపీసీఆర్‌ ఈ మేరకు స్పందించింది. పరీక్ష కేంద్రం పొరపాటు వల్ల తన కుమారుడు 2019–20లో గణితం ప్రాక్టికల్‌ పరీక్షకు హాజరు కానట్లు నమోదయిందని, అసెస్‌మెంట్‌లో 20కుగానూ 17 మార్కులు వచ్చాయని విద్యార్థి తండ్రి పేర్కొన్నారు. అయితే ప్రొ–రాటా (నిష్పత్తి) ప్రకారం 20కు నాలుగు మార్కులు మాత్రమే ఇస్తున్నట్లు సీబీఎస్‌ఈ రీజినల్‌ డైరెక్టర్‌ చెప్పారని తన ఫిర్యాదులో పేర్కొన్నారు. ‘‘పరీక్షలు నిర్వహించడం, ఫలితాలు వెల్లడించడం సీబీఎస్‌ఈ పాత్ర. పరిధికి మించి అధికారాలు ఉపయోగించడం రాజ్యాంగ విరుద్ధం’’అని డీసీపీసీఆర్‌ ఛైర్‌పర్సన్‌ అనురాగ్‌ తన ఆదేశాల్లో పేర్కొన్నారు. డీసీపీసీఆర్‌–2005 చట్టం ప్రకారం.. విద్యార్థి పరీక్షకు హాజరైనప్పటికీ అబ్సెంట్‌గా నమోదు చేయడం వల్ల విద్యార్థి నష్టపోవడమే కాదు అతడి రాజ్యాంగ హక్కులు ఉల్లంఘించినట్లేనని పేర్కొన్నారు. ఇంటర్నల్‌ గ్రేడ్‌లు ఒకసారి అప్‌లోడ్‌ చేసిన తర్వాత మార్చడం కుదరదని, విద్యార్థి భవిష్యత్తుపై ప్రభావం పడకుండా హాజరు సరిదిద్దే క్రమంలోనే ప్రొ–రాటా విధానం ప్రకారం ప్రాక్టికల్‌ మార్కులు లెక్కించి 20కు నాలుగు మార్కులు ఇచ్చినట్లు కమిషన్‌కు సీబీఎస్‌ఈ వివరించింది. విద్యార్థి ఎన్ని మార్కులు సాధించాడో అన్ని మార్కులు ఇవ్వాలని, ప్రొ–రాటా విధానం ప్రకారం ఇవ్వరాదని డీసీపీసీఆర్‌ స్పష్టం చేసింది. మార్కులు తగిన విధంగా ఇవ్వడానికి సీబీఎస్‌ఈ పాలసీని సవరించాలని పేర్కొంది. భవిష్యత్తులో ఇలాంటి పొరపాట్లు జరగకుండా విద్యాశాఖ చర్యలు చేపట్టాలని సూచించింది. సర్వీసు రూల్స్‌ ప్రకారం బాధ్యులైన వారిపై చర్యలు తీసుకొని విద్యార్థికి రూ.50వేల నష్టపరిహారం చెల్లించాలని ఆదేశించింది. చదవండి: కోవిడ్‌తో 77 మంది లాయర్ల మృతి.. సుప్రీంకోర్టు నివాళి 

సాక్షి, న్యూఢిల్లీ: 12వ తరగతి ఐచ్ఛిక పరీక్షలు ఆగస్టు 15– సెప్టెంబరు 15 మధ్య నిర్వహిస్తామని సీబీఎస్‌ఈ పేర్కొంది. అదీ పరిస్థితులు అనుకూలిస్తేనే అని స్పష్టం చేసింది. ఈ మేరకు సుప్రీంకోర్టులో అదనపు అఫిడవిట్‌ దాఖలు చేసింది. ఫలితాల వెల్లడికి కాలపరిమితి నిర్ణయిస్తామని తెలిపింది. ఫలితాల అనంతరం విద్యార్థుల కోసం వివాద పరిష్కార యంత్రాంగం ఏర్పాటు చేస్తామని కూడా పేర్కొంది. అసెస్‌మెంట్‌ పాలసీ ప్రకారం జూలై 31లోగా 12వ తరగతి ఫలితాలు వెల్లడిస్తామని, తమకు వచ్చిన మార్కులతో సంతృప్తి చెందని విద్యార్థులు ఆన్‌లైన్‌ ద్వారా ఐచ్ఛిక పరీక్షలకు రిజిస్టర్‌ చేసుకోవచ్చని తెలిపింది. వీరికి పరీక్షల్లో వచ్చి న మార్కులనే తుది ఫలితంగా ఖరారు చేస్తామని వివరించింది. సీబీఎస్‌ఈ 12వ తరగతి పరీక్షలను రద్దు చేసిన నేపథ్యంలో మూడేళ్ల ప్రతిభను ఆధారంగా మూల్యాంకనం చేస్తామని, 30:30:40 ఫార్ములాను అనుసరిస్తామని సీబీఎస్‌ఈ ప్రతిపాదించగా సుప్రీంకోర్టు ఆమోదించడం తెలిసిందే. పదో తరగతి మార్కులను 30 శాతానికి, 11వ తరగతి మార్కులకు 30 శాతానికి, 12వ తరగతిలో యూనిట్‌ టెస్టులు, మిడ్‌టర్మ్‌ పరీక్షలు, ప్రీ ఫైనల్స్‌ను కలిపి 40 శాతానికి పరిగణనలోకి తీసుకొని మార్కులకు కేటాయిస్తామని సీబీఎస్‌ఈ వివరించింది. సెప్టెంబర్‌ ఒకటిలోపు పరీక్షలు నిర్వహిస్తామని సీఐఎస్‌సీఈ తెలిపింది. చదవండి: ఈ పోటీలో గెలిస్తే రూ. 2 లక్షలు మీ సొంతం కోల్పోయిన ఆధార్ నెంబర్ తిరిగి పొందడం ఎలా..?

న్యూఢిల్లీ: కరోనా వైరస్‌ వ్యాప్తి, లాక్‌డౌన్‌ వల్ల 2020–21 విద్యా సంవత్సరంలో 12వ తరగతి బోర్డు పరీక్షల రద్దు నేపథ్యంలో సెంట్రల్‌ బోర్డు ఆఫ్‌ సెకండరీ ఎడ్యుకేషన్‌ (సీబీఎస్‌ఈ), కౌన్సిల్‌ ఫర్‌ ద ఇండియన్‌ స్కూల్‌ సర్టిఫికెట్‌ ఎగ్జామినేషన్‌ (సీఐఎస్‌సీఈ)లు ప్రతిపాదించిన అసెస్‌మెంట్‌ స్కీమ్‌కు సుప్రీంకోర్టు గురువారం ఆమోదముద్ర వేసింది. దేశంలో 12వ తరగతి బోర్డు పరీక్షల రద్దు నిర్ణయంపై ఇక పునరాలోచన లేదని న్యాయస్థానం తేల్చిచెప్పింది. 10, 11, 12వ తరగతుల ఫలితాల ఆధారంగా విద్యార్థులకు తుది మార్కులు కేటాయించేందుకు 30:30:40 ఫార్ములాను సీబీఎస్‌ఈ తెరపైకి తీసుకొచ్చింది. తుది ఫలితాలను ప్రకటించే విషయంలో గత ఆరేళ్లలో విద్యార్థులు కనబరిచిన ప్రతిభను పరిగణనలోకి తీసుకుంటామని సీఐఎస్‌సీఈ వెల్లడించింది. జూలై 31వ తేదీలోగా ఫలితాలను ప్రకటిస్తామని రెండు బోర్డులు తెలియజేశాయి. అసెస్‌మెంట్‌ స్కీమ్‌ పట్ల సంతృప్తి చెందని విద్యార్థులు కరోనా వ్యాప్తి తగ్గుముఖం పట్టిన తర్వాత నిర్వహించే పరీక్షలకు హాజరు కావొచ్చని సీబీఎస్‌ఈ, సీఐఎస్‌సీఈ సూచించాయి. విద్యార్థులు 10, 11, 12వ తరగతుల్లో సాధించిన మార్కులకు వెయిటేజీ ఇచ్చి, 30:30:40 ఫార్ములా ప్రకారం తుది ఫలితాలు వెల్లడిస్తామని సీబీఎస్‌ఈ పేర్కొంది. 10వ తరగతి మార్కులకు 30 శాతం, 11వ తరగతి మార్కులకు 30 శాతం, 12వ తరగతిలో యూనిట్‌ టెస్టు, మిడ్‌–టర్మ్, ప్రి–బోర్డు పరీక్షల్లో సాధించిన మార్కులకు 40 శాతం వెయిటేజీ ఉంటుందని తెలిపింది. 12వ తరగతిలో ప్రాక్టికల్, ఇంటర్నల్‌ అసెస్‌మెంట్‌లో విద్యార్థులు సాధించిన మార్కులను సంబంధిత పాఠశాలలు సీబీఎస్‌ఈ పోర్టల్‌లో అప్‌లోడ్‌ చేయాలని, తుది ఫలితాలను ప్రకటించే విషయంలో వాటిని కూడా పరిగణనలోకి తీసుకుంటామని స్పష్టం చేసింది. పదో తరగతిలో ప్రధాన ఐదు సబ్జెక్టుల్లో అత్యధిక మార్కులు సాధించిన మూడు సబ్జెక్టులను మూల్యాంకనంలో పరిగణనలోకి తీసుకుంటారు.   విద్యార్థులపై వివక్ష చూపే ప్రశ్నే లేదు 12వ తరగతి బోర్డు పరీక్షల రద్దును సవాలు చేస్తూ సీనియర్‌ అడ్వొకేట్‌ వికాస్‌ సింగ్‌ దాఖలు చేసిన పిటిషన్‌పై జస్టిస్‌ ఎ.ఎం.ఖన్వీల్కర్, జస్టిస్‌ దినేష్‌ మహేశ్వరితో కూడిన సుప్రీంకోర్టు ప్రత్యేక ధర్మాసనం గురువారం వీడియో కాన్ఫరెన్స్‌ ద్వారా విచారణ జరిపింది. పిటిషన్‌ను తిరస్కరించింది. పరీక్షల రద్దు నిర్ణయంపై పునరాలోచన ప్రసక్తే లేదని ఉద్ఘాటించింది. ‘‘పరీక్షల విషయంలో సీఐఎస్‌సీఈ, సీబీఎస్‌ఈ తీసుకున్న నిర్ణయాన్ని ఇప్పటికే ఆమోదించాం. పరీక్షలు రాయాలని, మార్కులు మెరుగుపర్చుకోవాలని కోరుకునే విద్యార్థులకు ఎలాంటి ఇబ్బంది ఉండదు. వారు పరీక్షలు రాసుకోవచ్చు. పరీక్షలకు హాజరు కావాలని ఆశించే వారిపై వివక్ష చూపే ప్రశ్నే లేదు’’అని ధర్మాసనం వ్యాఖ్యానించింది. సీబీఎస్‌ఈ ప్రతిపాదించిన అసెస్‌మెంట్‌ స్కీమ్‌ను స్వీకరించేందుకు తమకు అభ్యంతరాలు లేవని వెల్లడించింది. దీనిపై బోర్డు ముందుకెళ్లవచ్చని సూచించింది. అసెస్‌మెంట్‌ స్కీమ్‌ను ఖరారు చేసి, నోటిఫై చేసుకోవడానికి సీఐఎస్‌సీఈ, సీబీఎస్‌ఈకి స్వేచ్ఛ ఉందని వివరించింది. ఇంకా ఏవైనా ప్రతిపాదనలు చేస్తే పరిశీలిస్తామని తెలియజేసింది. తదుపరి విచారణను ఈ నెల 21వ తేదీకి వాయిదా వేసింది. సీబీఎస్‌ఈ తరపున అటార్నీ జనరల్‌ కె.కె. వేణుగోపాల్‌ వాదనలు వినిపించారు. వివాదాల పరిష్కారానికి యంత్రాంగాన్ని ఏర్పాటు చేయండి అసెస్‌మెంట్‌ స్కీమ్‌పై ఏవైనా వివాదాలు తలెత్తితే పరిష్కారం కోసం ప్రత్యేక యంత్రాంగాన్ని ఏర్పాటు చేయాలని సీఐఎస్‌సీఈ, సీబీఎస్‌ఈకి సుప్రీంకోర్టు ధర్మాసనం సూచించింది. వివాదాల పరిష్కారంపై ప్రొవిజన్స్‌ను ఈ స్కీమ్‌లో చేర్చాలని స్పష్టం చేసింది. తుది మార్కులపై సంతృప్తి చెందని విద్యార్థులు కోర్టు తలుపులు తట్టే అవకాశం ఉందని గుర్తుచేసింది.    సీబీఎస్‌ఈ చరిత్రలో ఇదే తొలిసారి ‘‘సీబీఎస్‌ఈ 1929 నుంచి మనుగడలో ఉంది. పరీక్షలను వాయిదా వేసే పరిస్థితి సీబీఎస్‌ఈ చరిత్రలో ఎప్పుడూ రాలేదు. ఈసారి మాత్రం తప్పడం లేదు. అసెస్‌మెంట్‌ స్కీమ్‌ను నిపుణుల కమిటీ రూపొందించింది. తుది ఫలితాల విషయంలో 10, 11, 12వ తరగతుల్లో విద్యార్థుల ప్రతిభను పరిగణనలోకి తీసుకోవాలని సీబీఎస్‌ఈ నిర్ణయించింది. 10వ తరగతిలో ప్రధానమైన ఐదు సబ్జెక్టులు ఉండగా, విద్యార్థులు అత్యుత్తమ మార్కులు సాధించిన మూడు సబ్జెక్టులను పరిగణనలోకి తీసుకుంటాం. ఈ మూడు సబ్జెక్టుల్లో పొందిన మార్కులకు 30% వెయిటేజీ లభిస్తుంది. 11వ తరగతిలో థియరీ పేపర్‌లో సాధించిన మార్కులకు 30% వెయిటేజీ ఉంటుంది. ఇక 12వ తరగతిలో యూనిట్‌ టెస్టు, మిడ్‌–టర్మ్, ప్రి–బోర్డు పరీక్షల్లో సాధించిన మార్కులకు మరో 40% వెయిటేజీ ఉంటుంది. ఈ మూడు రకాల వెయిటేజీల ఆధారంగా తుది ఫలితాలను ప్రకటిస్తాం’’అని అటార్నీ జనరల్‌ కె.కె.వేణుగోపాల్‌ తెలిపారు.

న్యూఢిల్లీ: 12వ తరగతి మార్కుల నిర్థారణ విధానాన్ని సీబీఎస్‌ఈ గురువారం ప్రకటించింది. 10,11వ తరగతి మార్కుల ఆధారంగా 12వ తరగతి మార్కులు ఇవ్వనున్నట్లు తెలిపింది. కాగా 30:30:40 ఫార్ములా ఆధారంగా ఫలితాలు విడుదల చేయనున్నట్లు సీబీఎస్‌ఈ పేర్కొంది. ఇందుకు సంబంధించిన మార్కుల ప్రణాళికను సీబీఎస్‌ఈ బోర్డు  గురువారం సుప్రీంకోర్టుకు  సమర్పించింది. ఇందులో 10,11 తరగతుల మార్కుల నుంచి 30 శాతం వెయిటేజీ, 12వ తరగతిలో టెర్మ్‌ పరీక్షల నుంచి 40 శాతం వెయిటేజీ ఇవ్వనున్నారు.ఈ విధానంతో సంతృప్తి చెందనివారు పరీక్షలకు హాజరుకావొచ్చని పేర్కొంది. కాగా జూలై 31లోపు సీబీఎస్‌ఈ 12వ తరగతి ఫలితాలు విడుదలవుతాయని సీబీఎస్‌ఈ బోర్డు తెలిపింది. చదవండి: 12వ తరగతి ఫలితాల నిర్ధారణపై కమిటీ

న్యూఢిల్లీ: 12వ తరగతి పరీక్షలు రద్దయిన నేపథ్యంలో ఆ తరగతి విద్యార్థుల ఫలితాలను నిర్ధారించే విధానాన్ని రూపొందించడానికి 13 మంది సభ్యులతో ఒక కమిటీని సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌(సీబీఎస్‌ఈ) ఏర్పాటు చేసిం ది. ఆ కమిటీ 10 రోజుల్లోగా నివేదిక సమర్పించనుందని శుక్రవారం సీబీఎస్‌ఈ ఎగ్జామినేషన్‌ కంట్రోలర్‌ సన్యం భరద్వాజ్‌ తెలిపారు. కమిటీలో తనతో పాటు కేంద్ర విద్యాశాఖ సంయుక్త కార్యదర్శి విపిన్‌ కుమార్, కేంద్రీయ విద్యాలయ సంఘటన్‌ కమిషనర్‌ నిధి పాండే, నవోదయ విద్యాలయ సమితి కమిషనర్‌ వినాయక్‌ గార్గ్, సీబీఎస్‌ఈ డైరెక్టర్‌(ఐటీ) అంత్రిక్ష జోహ్రి, సీబీఎస్‌ఈ డైరెక్టర్‌(అకడమిక్‌) జోసెఫ్‌ ఇమ్మాన్యుయేల్‌ తదితరులు సభ్యులుగా ఉంటారన్నారు. ఒకవేళ ఎవరైనా విద్యా ర్థుల పరీక్ష రాయాలనుకుంటే వారికి కరోనా పరిస్థితులు చక్కబడిన తర్వాత పరీక్షలను నిర్వహించాల ని కూడా ఆ సమావేశంలో నిర్ణయించారు. 10వ తరగతి పరీక్షలను సీబీఎస్‌ఈ ఇప్పటికే రద్దు చేసి, విద్యార్థుల మార్కుల నిర్ధారణకు ప్రత్యామ్నాయ విధానాన్ని రూపొందించిన విషయం తెలిసిందే. 

సాక్షి, చెన్నై: పరీక్ష రాద్దామా, వద్దా..? అని తేల్చుకునేందుకు విద్యార్థులు, వారి తల్లిదండ్రుల అభిప్రాయాలను వాట్సాప్‌ ద్వారా గురువారం తమిళనాడు విద్యాశాఖ సేకరించింది. మెజారిటీ శాతం తల్లిదండ్రులు కరోనా పరిస్థితులు సద్దుమనిగిన అనంతరం పరీక్షలు నిర్వహించాలని సూచించడం గమనార్హం. కేంద్రం పరిధిలోని ప్లస్‌టూ సీబీఎస్‌ఈ పరీక్షల రద్దు చేసిన నేపథ్యంలో అన్ని వర్గాల అభిప్రాయాల మేరకు నిర్ణయం తీసుకోవాలని ప్రభుత్వం నిర్ణయించింది. గురువారం విద్యార్థుల ఫోన్‌ నెంబర్ల ఆధారంగా వారి తల్లిదండ్రుల అభిప్రాయాల్ని వాట్సాప్‌ ద్వారా సేకరించారు. మెజారిటీ శాతం తల్లిదండ్రులు, విద్యార్థులు కరోనా పరిస్థితులు పూర్తిగా సద్దుమనిగిన తర్వాత పాఠశాలల్లో లేదా ఆన్‌లైన్‌ ద్వారా పరీక్షల నిర్వహించాలని సూచించడం గమనార్హం. అలాగే విద్యా వేత్తలు, ఉపాధ్యాయులు, విద్యార్థి సంఘాల అభిప్రాయాలు సేకరిస్తున్నారు. శుక్రవారం మధ్యాహ్నంలోపు ఈ ప్రక్రియను ముగించి సీఎం స్టాలిన్‌కు సమర్పించనున్నారు. దీనిని సమీక్షించిన అనంతరం శనివారం సీఎం ప్రకటన విడుదల చేస్తారని విద్యాశాఖ మంత్రి అన్బిల్‌ మహేష్‌ తెలిపారు. తమకు విద్యార్థుల ఆరోగ్యం, భవిష్యత్తు రెండు ముఖ్యమని ఆయన మీడియాకు వివరించారు. టెట్‌ ద్వారా ఎంపికైన టీచర్ల నియామకం గురించి పాఠశాలల రీ ఓపెనింగ్‌ సమయంలో పరిశీలిస్తామని ఓ ప్రశ్నకు సమాధానం ఇచ్చారు.   6న టీఐఎంఈ ప్రతిభా పరీక్ష..  క్యాట్‌ 2021–22కు సిద్ధం అవుతున్న విద్యార్థులకు టైమ్స్‌ ఇన్‌స్టిట్యూట్‌ (టీఐఎంఈ) టాలెంట్‌ సెర్చ్‌ పేరిట జూన్‌ 6న పరీక్ష ఆన్‌లైన్‌లో నిర్వహించనుంది. ఉదయం 10, సాయంత్రం 6 గంటలకు రెండు స్లాట్లుగా పరీక్ష నిర్వహించనున్నట్టు పేర్కొంది. విద్యార్థులు తమ పేర్లను నమోదు చేసుకోవచ్చని, వివరాలకు తమ వెబ్‌ సైట్‌ను సంప్రదించాలని సంస్థ సూచించింది.  చదవండి: వ్యాక్సిన్‌ వేసుకుంటే.. బిర్యానీ, బైకు, బంగారం.. ఎక్కడో తెలుసా?

న్యూఢిల్లీ: పరీక్షలు రద్దు అయిన నేపథ్యంలో ఖాళీ సమయాన్ని సృజనాత్మకంగా, నిర్మాణాత్మకంగా ఉపయోగించుకోవాలని ప్రధాన మంత్రి నరేంద్ర మోదీ సీబీఎస్‌ఈ 12వ విద్యార్థులకు ఉద్బోధించారు. ‘పరీక్షలు రద్దు అయినందుకు చాలా సంతోషిస్తున్నట్లు కనిపిస్తోంది’ అంటూ వారితో చమత్కరించారు. పరీక్షల గురించి ఎప్పుడూ టెన్షన్‌ పడవద్దని సూచించారు. విద్యార్థులు, వారి తల్లిదండ్రులతో గురువారం కేంద్ర విద్యా శాఖ నిర్వహించిన ఒక ఆన్‌లైన్‌ ఇంటరాక్షన్‌ కార్యక్రమంలో ప్రధాని అకస్మాత్తుగా ప్రత్యక్షమై అందరినీ ఆశ్చర్యానందాలకు గురి చేశారు. ‘పరీక్షలను రద్దు చేయడంతో మీ ఆనందానికి హద్దులు లేనట్లు కనిపిస్తోంది’ అన్నారు. పరీక్షలు జరుగుతాయేమోనని ఆందోళన పడ్డారా? అన్న ప్రధాని ప్రశ్నకు విద్యార్థులు అవునని సమాధానమివ్వడంతో.. ‘అయితే పరీక్షలంటే ఆందోళన వద్దు అంటూ నేను రాసిన ఎగ్జామ్‌ వారియర్‌ పుస్తకం సత్ఫలితాలను ఇవ్వలేదన్నమాట’ అని వ్యాఖ్యానించారు. పరీక్షలు రద్దవడంతో ఈ ఖాళీ సమయాన్ని ఎలా గడపాలనుకుంటున్నారని విద్యార్థులను ప్రశ్నించారు. ‘ఐపీ ఎల్, చాంపియన్స్‌ లీగ్‌ చూస్తారా? ఒలింపిక్స్‌ కోసం ఎదురు చూస్తున్నారా?’ అని ప్రశ్నించారు. ఆరోగ్యంగా ఉండడానికి ఏం చేస్తున్నారని వారిని ప్రశ్నించారు. ఆరోగ్యమే మహాభాగ్యం అనే మం త్రాన్ని సదా గుర్తుంచుకోవాలన్నారు. పరీక్షల రద్దు నిర్ణయంతో ఊరట పొందామని పలువురు విద్యార్థులు ప్రధానికి తెలిపారు. ‘రద్దు నిర్ణయం వెలువడే వరకు ప్రిపరేషన్‌తో బిజీబిజీగా ఉండి ఉంటారు కదా!’ అన్న ప్రధాని మాటకు.. గువాహటికి చెందిన ఒక విద్యార్థి స్పందిస్తూ.. ‘పరీక్షలను పండుగలా భావించాలని గతంలో మీరు చెప్పిన విషయం గుర్తుంది’ అని చెప్పాడు. టాపర్‌గా ఉండాలనుకుని కష్టపడి చదివానని మరో విద్యార్థి తెలిపాడు. విద్యార్థుల ప్రయోజనాలను దృష్టిలో పెట్టుకునే పరీక్షలను రద్దు చేయాలని నిర్ణయించామని ప్రధాని తెలిపారు. 75 ఏళ్ల భారత స్వాతంత్య్రంపై ఒక వ్యాసం రాయమని ప్రధాని విద్యార్థులకు సూచించారు. పలువురు తల్లిదండ్రులు ప్రధానితో తమ అభిప్రాయాలను పంచుకున్నారు. ‘పిల్లలు చాలా ఒత్తిడితో ఉన్నారు. పరీక్షల రద్దు సరైన సమయంలో తీసుకున్న సరైన నిర్ణ యం’ అని ఒక పేరెంట్‌ వ్యాఖ్యానించారు. కరోనా విజృంభణ నేపథ్యంలో సీబీఎస్‌ఈ 12వ తరగతి పరీక్షలను రద్దు చేస్తూ ప్రభుత్వం నిర్ణయం తీసుకున్న విషయం తెలిసిందే.   ఏ ప్రక్రియను అనుసరిస్తారు..? రెండు వారాల్లో తెలపండి: సుప్రీంకోర్టు 12వ తరగతి ఫలితాల వెల్లడికి ఏవిధమైన ప్రక్రియను అవలంబిస్తారో రెండు వారాల్లో తెలపాలని సీబీఎస్‌ఈ, ఐసీఎస్‌ఈలను సుప్రీంకోర్టు ఆదేశించింది. న్యాయవాది మమత శర్మ దాఖలు చేసిన పిటిషన్‌ను గురువారం  విచారించి, ఈ మేరకు ఆదేశాలు జారీ చేసింది.

సీబీఎస్‌ఈ పన్నెండో తరగతి పరీక్షలు కూడా రద్దయ్యాయి. పిల్లలు ఇంతటి విషమ పరిస్థితుల్లో తప్పనిసరిగా పరీక్షలు రాయాల్సిందేనా లేక రద్దవుతాయా అని అనేకులు మథనపడుతున్న సమ యంలో ప్రధాని నరేంద్ర మోదీ అధ్యక్షతన మంగళవారం జరిగిన అత్యున్నత స్థాయి సమావేశం వాటిని రద్దు చేయాలని నిర్ణయం తీసుకుంది. సీఐఎస్‌సీఈ కూడా ఈ పనే చేసింది. సీబీఎస్‌ఈ, ఇతర సంస్థలు, రాష్ట్ర ప్రభుత్వాలు పదో తరగతి పరీక్షలను ఇప్పటికే రద్దుచేశాయి. ఇంటర్మీడియెట్‌ పరీక్షల విషయంలోనూ చాలా ప్రభుత్వాలు ఇలాగే నిర్ణయించాయి. బిహార్‌ ఫిబ్రవరిలోనే పరీక్షలు నిర్వహించింది. కేరళ పన్నెండో తరగతి పరీక్షలను ఏప్రిల్‌లో పూర్తిచేసుకుంది. ఛత్తీస్‌గఢ్‌ ఓపెన్‌ బుక్‌ విధానం ద్వారా ఈ నెల 1నుంచి పన్నెండో తరగతి పరీక్షలు మొదలుపెట్టింది. మరికొన్ని రాష్ట్రాలు దానిపై ఇంకా తుది నిర్ణయం తీసుకోవాల్సివుంది. పరీక్షల ద్వారానే తాము ఉత్తీర్ణత సాధిస్తామని ఎవరైనా విద్యార్థులు ముందుకొచ్చిన పక్షంలో అనుకూల పరిస్థితులు ఏర్పడ్డాక ఆ విషయాన్ని పరి శీలించాలని కూడా కేంద్రం నిర్ణయించింది. కరోనా మూడో దశ అంచనాలున్న నేపథ్యంలో ఈ అనిశ్చితి ఎన్నాళ్లుంటుందో ఎవరూ చెప్పలేరు. విద్యార్థుల ప్రతిభను నిర్ణయించటానికి దీర్ఘకాలంగా అమలు చేస్తున్న ప్రామాణిక వ్యవస్థ పరీక్షలే. ఉన్న ఆ ఒక్క విధానమూ రద్దు చేయక తప్పని స్థితి ఏర్పడటం, వేరేవిధమైన కొలమానాలు లేకపోవటం దురదృష్టకరం. అలాగే ఇంటర్నెట్, విద్యుత్‌ సదుపాయాలు పల్లెసీమల్లో అరకొరగా వుండటం... అట్టడుగు వర్గాల పిల్లలకు ల్యాప్‌టాప్‌లు లేక పోవటం ఆన్‌లైన్‌ విధానంపై నమ్మకం పెట్టుకోవటాన్ని అసాధ్యం చేసింది. ఆ పేరుతో నిరుడు, ఈ ఏడాది తరగతులు నిర్వహించినా చాలామందికి ఉపయోగపడింది లేదు. అలాగని మున్ముందు పరిస్థితులెలావుంటాయోనన్న అవగాహన లేకుండా, పరీక్షలు లేవని చాలాముందుగా ప్రకటించటం కూడా అవాంఛనీయమవుతుంది. ఎంతో కొంత శ్రద్ధ చూపించే పిల్లల్లో సైతం అది నిరాసక్తతకు దారి తీస్తుంది. తగిన సమయంలో అప్పటికున్న పరిస్థితులను సమీక్షించి తుది నిర్ణయం తీసుకోవటమే సముచితం. పిల్లల ప్రాణాలు ముఖ్యమా, పరీక్షలు ముఖ్యమా అని కొందరు వాదించారు. ఆ రకంగా పిల్లల ప్రాణాలపై తమకు ఆదుర్దా వున్నదని చెప్పుకోవటానికి ప్రయత్నించారు. కానీ పిల్లలు ఎటూ చదువుకోవటం తప్పనిసరిగనుక పరీక్షలు వుంటాయన్న అభిప్రాయం కలగజేయటం వల్ల నష్టం లేదని, కరోనా వైరస్‌ తీవ్రతను బట్టి పరీక్షల రద్దు అంశాన్ని  ప్రభుత్వాలు చివరిక్షణంలో నిర్ణయిస్తేనే సముచితమని మరికొందరు భావించారు.   దేశంలో ప్రభుత్వాలు, నాయకులు ముందుచూపుతో నిర్ణయాలు తీసుకుంటే  కరోనా మహ మ్మారి రెండో దశ ఇంతగా స్వైర విహారం చేసేది కాదు. ఎన్నికల కోసం వెంపర్లాడటం, ఎప్పటిలాగే భారీగా జనసమీకరణలు, కుంభమేళా నిర్వహణ వగైరాలు బాగా దెబ్బతీశాయి.  తొలి దశలో కరోనా కాటు వల్ల ఎందరో ప్రాణాలు కోల్పోయారని, ఉపాధి కరువై లక్షలాది కుటుంబాలు దెబ్బతిన్నాయని తెలిసి కూడా ఎన్నికలు నిర్వహించారు. వైఎస్‌ జగన్‌మోహన్‌ రెడ్డి నాయకత్వలోని ఆంధ్రప్రదేశ్‌ ప్రభుత్వం స్థానిక సంస్థల ఎన్నికలు వాయిదా వేయాలని, అందరికీ టీకాలు పూర్తయ్యాక నిర్వహిం చుకోవచ్చని చెప్పినా రాష్ట్ర ఎన్నికల సంఘం పట్టించుకోలేదు. న్యాయస్థానాలు సైతం నిబంధనల పేరు చెప్పి ఎన్నికల సంఘాన్నే సమర్థించాయి. కరోనా తీవ్రతను గమనించి తిరుపతి ఉప ఎన్నిక సమయంలో జగన్‌మోహన్‌ రెడ్డి తన ఎన్నికల ప్రచార సభను రద్దు చేసుకున్నారు. భారీ జనసమీకరణల కారణంగా దేశంలో కరోనా రెండో దశ ఉగ్రరూపం దాల్చింది. చివరకిప్పుడు విద్యార్థుల పరీక్షలు కూడా రద్దు చేయకతప్పని పరిస్థితులు ఏర్పడ్డాయి.  పదో తరగతి పరీక్షలు రద్దు చేసినప్పుడు మార్కుల షీట్‌లో కేవలం ఉత్తీర్ణతను మాత్రమే ప్రక టించాలని చాలా రాష్ట్రాలు నిర్ణయించాయి. సీబీఎస్‌ఈ విభిన్నమైన విధానం ప్రకటించింది. పాఠశాలల వారీగా ఫలితాల కమిటీలను నియమించాలని, అందులో ఆ పాఠశాల సభ్యులతోపాటు బయటి విద్యాసంస్థల ప్రతినిధులుండాలని నిర్దేశించింది. యూనిట్‌ టెస్ట్‌లు, అర్థ సంవత్సర పరీ క్షలు, చివరగా నిర్వహించే పరీక్షలు, అంతర్గత మదింపు వగైరాలకు వంద మార్కులు నిర్ణయించి, దాని ప్రాతిపదికన విద్యార్థి ప్రతిభను లెక్కేయాలని తెలిపింది. అలాగే గత మూడేళ్లలో ఒక విద్యా సంస్థ పదో తరగతి పరీక్షల్లో ప్రదర్శించిన పనితీరును పరిగణనలోకి తీసుకోవాలని సూచించింది. ఆ పాఠశాలనుంచి ఉత్తీర్ణులైనవారికి నిర్దిష్టమైన పాఠ్యాంశాల్లో వచ్చిన సగటు మార్కుల ఆధారంగా వాటి పనితీరు కొలుస్తారు. ఇప్పుడు పన్నెండో తరగతికి ఏం చేస్తారన్నది అయోమయంగానే వుంది.  డిగ్రీ చదువులకెళ్లాల్సిన విద్యార్థులకు వారి ప్రతిభతోపాటు, వారు చదువుకున్న పాఠశాలల పనితీరు కూడా లెక్కేయటం అన్యాయమని వారు చెబుతున్నారు.  కొన్ని విద్యాసంస్థలు పరీక్షలకు కఠినమైన విధానాన్ని అనుసరిస్తాయి. మరికొన్ని ఉదారంగా వుంటాయి. ప్రశ్నపత్రాల తయారీలో అందరికీ ఒకే విధానం లేనప్పుడు పాఠశాల పనితీరును పరిగణించటం వల్ల విద్యార్థికి అన్యాయం జరగదా అన్న ప్రశ్న వస్తోంది. ఇంజనీరింగ్, మెడిసిన్‌ కోర్సులకు వెళ్లదల్చుకున్నవారికి ఎటూ ఎంట్రెన్స్‌ పరీక్షలుం టాయి. కానీ ఆర్ట్స్‌ కోర్సులకు ఎంపిక కేవలం పన్నెండో తరగతి పరీక్షల మార్కులే గీటురాయి. కనుక విద్యార్థి ప్రతిభను కొలిచేందుకు తీసుకొచ్చే ఏ విధానమైనా హేతుబద్ధంగా, ప్రామాణికంగా వుండేలా చూడాలి. అప్పుడు మాత్రమే ఉన్నంతలో అందరికీ న్యాయం జరుగుతుంది.

న్యూఢిల్లీ: కరోనా సెకండ్‌ వేవ్‌ కారణంగా అన్ని రకాల పరీక్షలు వాయిదా, రద్దు అవుతున్నాయి. ఈ ఏడాది సెకండ్‌ వేవ్‌తో అనూహ్యంగా కరోనా కేసులు పెరగడం, ప్రాణనష్టం ఉండడంతో సీబీఎస్‌ఈ బోర్డు పన్నెండో తరగతి పరీక్షలను రద్దు చేస్తున్నట్లు కేంద్రం ప్రకటించిన విషయం తెలిసిందే. మంగళవారం ప్రధానమంత్రి నరేంద్రమోదీ అధ్యక్షతన జరిగిన సమావేశంలో పరీక్షలు రద్దు చేస్తూ కేంద్రం నిర్ణయించింది. విద్యార్థుల ఆరోగ్యమే అత్యంత ముఖ్యమని, దీనిపై రాజీపడే ప్రసక్తే లేదని ప్రధాని పేర్కొన్నారు. విద్యార్థులు రిస్క్‌లో పడేందుకు ఈ పరీక్షలు కారణం కాకూడదని సూచించారు. పరీక్షలు రద్దవడంతో విద్యార్థులంతా ఎంతో సంతోషంగా ఉన్నారు. అయితే ప్రధాని నిర్ణయంతో ఏకీభవించని ఓ విద్యార్థికి వింత కోరిక కలిగింది. 12వ తరగతి ముగించుకుని స్కూల్ నుంచి బయటకు వెళ్లే తమకు ఫేర్ వెల్ పార్టీ లేదని బాధతో ఏకంగా ప్రధాని నరేంద్ర మోడీ కే ట్వీట్ చేశాడు. ‘"సర్ ఫేర్‌వెల్‌ పార్టీ అయినా చేసుకోనివ్వండి. 12వ తరగతి బి సెక్షన్ నేహాను నేను చీరలో చూడాలనుకుంటున్నాను’ అని ట్వీట్ చేశాడు. ఇక ప్రస్తుతం ఈ ట్వీట్‌ నెట్టింట్లో వైరలవుతోంది. దీనిపై స్పందించిన అనేకమంది నెటిజన్లు ఫన్నీ కామెంట్స్‌ చేస్తున్నారు. చదవండి: సీబీఎస్‌ఈ 12వ తరగతి పరీక్షలు రద్దు  Government of India has decided to cancel the Class XII CBSE Board Exams. After extensive consultations, we have taken a decision that is student-friendly, one that safeguards the health as well as future of our youth. https://t.co/vzl6ahY1O2 — Narendra Modi (@narendramodi) June 1, 2021 Sir farewell to kraa do....wo 12th B wali neha ko साड़ी me dekhna tha. — Kuki Aggarwal (@kukiaggarwal) June 1, 2021

సాక్షి, న్యూఢిల్లీ: సీబీఎస్‌ఈ పన్నెండో తరగతి పరీక్షలను రద్దు చేస్తూ కేంద్ర ప్రభుత్వం కీలక నిర్ణయం తీసుకుంది. అత్యున్నత ప్రమాణాలను అనుసరించి నిర్దిష్ట కాలవ్యవధిలో 12వ తరగతి ఫలితాలను వెల్లడించేందుకు సీబీఎస్‌ఈ తగిన చర్యలు తీసుకోవాలని కూడా కేంద్రం సూచించింది. విద్యార్థుల ప్రయోజనాల దృష్ట్యా ఈ నిర్ణయం తీసుకుంటున్నట్టు ప్రధానమంత్రి నరేంద్ర మోదీ సమావేశంలో వెల్లడించారు. ప్రధాని అధ్యక్షతన మంగళవారం జరిగిన అత్యున్నత స్థాయి సమావేశంలో ఈ కీలక నిర్ణయం తీసుకున్నారు. గత ఏడాది పరీక్షలు ప్రారంభమైన కొద్దిరోజులకు కోవిడ్‌–19తో లాక్‌డౌన్‌ విధింపు, కేసుల పెరుగుదల కారణంగా పరీక్షల రద్దు కోరుతూ సుప్రీంకోర్టులో పిటిషన్లు దాఖలైన నేపథ్యంలో కేంద్ర ప్రభుత్వం వాటిని రద్దు చేస్తూ నిర్ణయం తీసుకుంది. ఈ ఏడాది సెకండ్‌ వేవ్‌లో అనూహ్యంగా కరోనా కేసులు పెరగడం, ప్రాణనష్టం ఉండడంతో సీబీఎస్‌ఈ బోర్డు పదో తరగతి పరీక్షలను కేంద్రం రద్దు చేసింది. పన్నెండో తరగతి పరీక్షలను వాయిదా వేసింది. అయితే దీనిపై సుప్రీంకోర్టులో పిటిషన్‌ దాఖలవగా, గత ఏడాది తీసుకున్న నిర్ణయం కంటే భిన్నమైన నిర్ణయం తీసుకుంటే అందుకు సహేతుక కారణాలు ఉండాలని సోమవారం నాటి విచారణ సందర్భంగా సుప్రీంకోర్టు వ్యాఖ్యానించింది. ఈ నేపథ్యంలో రెండు రోజుల్లో నిర్ణయం ప్రకటిస్తామని కేంద్రం సుప్రీంకోర్టుకు తెలియపరిచింది. జూన్‌ మూడో తేదీన తదుపరి విచారణ ఉండగా మంగళవారం ప్రధానమంత్రి అధ్యక్షతన జరిగిన సమావేశంలో పరీక్షలు రద్దు చేస్తూ కేంద్రం నిర్ణయించింది. ఈ సమావేశానికి ముందే కేంద్ర విద్యా శాఖ సీబీఎస్‌ఈ పరీక్షల నిర్వహణపై రాష్ట్రాల అభిప్రాయాలు సేకరించింది. మెజారిటీ రాష్ట్రాలు పరీక్షల నిర్వహణకే మొగ్గుచూపాయి. అయితే విద్యార్థులకు వ్యాక్సిన్‌ వేశాకే పరీక్షలు నిర్వహించాలని మరికొన్ని రాష్ట్రాలు అభిప్రాయపడ్డాయి. ఈ నేపథ్యంలో పరీక్షల నిర్వహణకే బోర్డు మొగ్గు చూపింది. కానీ సుప్రీంకోర్టు తాజా విచారణ సందర్భంగా చేసిన వ్యాఖ్యల నేపథ్యంలో కేంద్రం పరీక్షల రద్దుకు నిర్ణయించింది. వివిధ రాష్ట్ర ప్రభుత్వాల అభిప్రాయాలు, స్పందనలను వివరిస్తూ ఉన్నతాధికారులు ప్రధానికి ఈ సమావేశంలో ప్రజెంటేషన్‌ ఇచ్చారు.  ఆందోళనకు తెరపడాలి: ప్రధాని  కోవిడ్‌ మహమ్మారి కారణంగా అకడమిక్‌ క్యాలెండర్‌ దెబ్బతిన్నదని, బోర్డు పరీక్షల నిర్వహణపై నెలకొన్న అనిశ్చితి... విద్యార్థులు, తల్లిదండ్రులు, ఉపాధ్యాయుల్లో తీవ్ర ఆందోళన పెంచిందని ప్రధాన మంత్రి విచారం వ్యక్తంచేశారు. ఈ ఆందోళనకు వెంటనే ముగింపు పలకాల్సిన అవసరం వచ్చిందని పేర్కొన్నారు. కొన్ని రాష్ట్రాలు సూక్ష్మస్థాయిలో కట్టడి చర్యలు చేపడుతూ కరోనాను నియంత్రిస్తున్నాయని, మరికొన్ని రాష్ట్రాలు లాక్‌డౌన్‌ను ఎంచుకున్నాయని వివరించారు. ఈ దశలో తల్లిదండ్రులు, ఉపాధ్యాయులు విద్యార్థుల ఆరోగ్యంపై ఆందోళన చెందారని తెలిపారు. ఈ ఒత్తిడితో కూడిన పరిస్థితుల్లో విద్యార్థులు పరీక్షలకు హాజరయ్యేలా బలవంతపెట్టరాదని వివరించారు. విద్యార్థుల ఆరోగ్యమే అత్యంత ముఖ్యమని, దీనిపై రాజీపడే ప్రసక్తే లేదని పేర్కొన్నారు. విద్యార్థులు రిస్క్‌లో పడేందుకు ఈ పరీక్షలు కారణం కాకూడదని సూచించారు. ఈ ప్రక్రియలో భాగస్వాములందరితో చర్చించి విద్యార్థి ప్రయోజనాలకు అనుగుణంగా నిర్ణయం తీసుకోవడానికి దోహదపడిన సంప్రదింపుల కార్యక్రమాన్ని ప్రశంసించారు. రాష్ట్రాలు తమ అభిప్రాయాలు తెలిపినందుకు ధన్యవాదాలు తెలిపారు. కాగా గత ఏడాదిలాగే ఎవరైనా విద్యార్థులు పరీక్ష రాయాలనుకుంటే పరిస్థితులు చక్కబడిన తరువాత సీబీఎస్‌ఈ అందుకు అవకాశాన్ని ఇవ్వాలని సమావేశం నిర్ణయించింది. సీబీఎస్‌ఈ పరీక్షల నిర్వహణ అంశంపై నిర్ణయం తీసుకునేందుకు ప్రధానమంత్రి అధ్యక్షతన ఉన్నతస్థాయి సమావేశం ఇదివరకు మే 21న జరిగింది. కేంద్ర రక్షణ శాఖ మంత్రి రాజ్‌నాథ్‌సింగ్‌ అధ్యక్షతన మరోసారి మే 25న సమావేశం జరిగింది. ఈసమావేశంలో వివిధ రాష్ట్రాల అభిప్రాయాలను తీసుకుని చర్చించారు. తాజా సమావేశంలో కేంద్ర హోం శాఖ, రక్షణ శాఖ, వాణిజ్య శాఖ, సమాచార ప్రసార శాఖ, పెట్రోలియం శాఖ, స్రీ, శిశు సంక్షేమ శాఖల మంత్రులు, ఉన్నతాధికారులు పాల్గొన్నారు.   వీడియో కాన్ఫరెన్స్‌ ద్వారా సమీక్ష సమావేశంలో పాల్గొన్న ప్రధాని మోదీ   

న్యూఢిల్లీ: బోర్డు పరీక్షలు జరిపేందుకే మొగ్గు చూపుతోంది సీబీఎస్‌ఈ. ఇందుకు సంబంధించి రెండు విధి విధానాలను పరిశీలిస్తోంది. ఆ వివరాలను ఇప్పటికే కేంద్ర ప్రభుత్వానికి సీఈఎస్‌ఈ తెలియజేసింది. అయితే దీనిపై ఇంకా కేంద్రం ఎటువంటి నిర్ణయం తీసుకోలేదు. ఇప్పటికే సీబీఎస్‌ఈ  12వ తరగతి పరీక్షలు జరగాల్సి ఉండగా కరోనా కారణంగా వాయిదా పడ్డాయి. సెకండ్‌వేవ్‌ విజృంభణతో ఈ పరీక్షలు వాయిదా వేస్తారని ప్రచారం జరిగింది. అయితే పరీక్షల నిర్వాహణకే సీబీఎస్‌ఈ మొగ్గు చూపింది. మూడు నెలల్లో 12 తరగతి పరీక్షలు నిర్వహించేందుకు రెండు పద్దతులను కేంద్రం ముందు ఉంచింది సీబీఎస్‌ఈ. ఇందులో మొదటి పద్దతి ప్రకారం పరీక్షల ప్రక్రియను మూడు నెలల్లో పూర్తి చేయాల్సి ఉంటుంది. మొదటి నెలలో ప్రీ ఎగ్జామ్స్‌ యాక్టివిటీస్‌,  రెండో నెలలో పరీక్షల నిర్వహించడం, మూడో నెలలో ఫలితాలు వెల్లడి వంటివి ఉంటాయి. అయితే పరీక్షలు ప్రధాన సబ్జెక్టులకే నిర్వహిస్తారు. ఇందులో వచ్చే మార్కుల ఆధారంగా మిగిలిన సబ్జెక్టుల్లో మార్కులు కేటాయిస్తారు. దీని ప్రకారం జూన్‌లో పరీక్షా తేదీలను ప్రకటించి జులైలో పరీక్షలు నిర్వహించే అవకాశం ఉంది.  నాలుగు సబ్జె‍క్టులే  ఇక రెండో ఆప్షన్‌ ప్రకారం పరీక్షా సమయాన్ని కేవలం 90 నిమిషాలకు కుదించి 4 సబ్జెక్టుల్లో పరీక్షలు నిర్వహిస్తారు. ఇందులో ఒకటి కచ్చితంగా భాషకు సంబంధించి అయి ఉండాలి. మిగిలిన మూడు సబ్జెక్టులను విద్యార్థులు ఎంపిక చేసుకోవచ్చు. మొత్తంగా విద్యార్థులు నాలుగు పరీక్షలు రాయాల్సి ఉంటుంది. ఇందులో వచ్చే మార్కుల ఆధారంగా మిగిలిన రెండు సబ్జె‍క్టులకు మార్కులు కేటాయిస్తారు.

సాక్షి, న్యూఢిల్లీ: విద్యార్థుల భవిష్యత్తుకు బాటలు వేసే సీబీఎస్‌ఈ 12వ తరగతి పరీక్షలు రద్దు చేయడం సరికాదంటూ టోనీ జోసెఫ్‌ అనే ఉపాధ్యాయుడు సుప్రీంకోర్టును ఆశ్రయించారు. 12వ తరగతి బోర్డు పరీక్షలు రద్దు చేయడం వల్ల కష్టపడి చదివే విద్యార్థులకు అన్యాయం చేసినట్లు అవుతుందని టోనీ తరఫు న్యాయవాది జోస్‌ అబ్రహం ఈ పిటిషన్‌ దాఖలు చేశారు. న్యాయవాది మమతా శర్మ దాఖలు చేసిన పిటిషన్‌లో ఇంప్లీడ్‌ అవడానికి అవకాశం ఇవ్వాలని కోరారు. ‘‘12వ తరగతి పరీక్షలు అనేవి విద్యార్థుల భవిష్యత్తుకు ఎంతో కీలకం. ఉన్నత విద్యలో చేరడానికి ఈ పరీక్షా ఫలితాలు ఎంతో ముఖ్యం. ఈ పరీక్షలను రద్దు చేస్తే కష్టపడి చదివే విద్యార్థులకు అన్యాయం చేసినట్లే. ఇంటర్నల్‌ అసెస్‌ మెంట్, విద్యా సంస్థలు నిర్వహించే ఆన్‌లైన్‌ పరీక్షలు ఆధారంగా ఉత్తీర్ణత చేయడం అన్యాయం. ఇంటర్నల్‌ పరీక్షలు అన్నీ కూడా ఇంట్లో కూర్చొనే విద్యార్థులు రాశారు’’ అని పిటిషన్‌లో పేర్కొన్నారు. కోవిడ్‌–19 కేసులు పెరుగుతున్న దృష్ట్యా పరీక్షలు వాయిదా వేశారని, జూన్‌ 1న పరిస్థితిని సమీక్షిస్తామని సీబీఎస్‌ఈ పేర్కొందని కోర్టు దృష్టికి తీసుకొచ్చారు. చదవండి: ఈ పోటీలో గెలిస్తే రూ.50 వేలు మీ సొంతం? కొవిడ్‌తో అనాథలైన పిల్లలకు ప్రతి నెల రూ.2500

సాక్షి, హైదరాబాద్‌: రాష్ట్రంలో ఇంటర్మీడియట్‌ ప్రథమ, ద్వితీయ సంవత్సర పరీక్షలు వాయిదా పడే అవకాశం ఉంది. ఆ దిశగానే అధికారులు ఆలోచిస్తున్నారు. కరోనా కేసుల వ్యాప్తి తగ్గకపోవడంతో ప్రభుత్వం కూడా ఇంటర్‌ పరీక్షలను వాయిదా వేసేందుకే మొగ్గు చూపుతున్నట్లు తెలిసింది. సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌ఈ) వచ్చే నెల 4వ తేదీ నుంచి నిర్వహించాల్సిన 12వ తరగతి పరీక్షలను వాయిదా వేసింది. ఇక పదో తరగతి పరీక్షలను పూర్తిగా రద్దు చేసింది. ఇంటర్నల్‌ అసెస్‌మెంట్‌ ఆధారంగా వారికి మార్కులను కేటాయించాలని నిర్ణయించింది. ఈ నేఫథ్యంలో రాష్ట్రంలోనూ పరీక్షల నిర్వహణపై నేడో, రేపో ఉన్నతస్థాయి సమావేశం నిర్వహించి నిర్ణయం తీసుకునే అవకాశం ఉంది.  నిర్వహణ ఇబ్బందికరమే...  కరోనా వ్యాప్తి పెరుగుతున్న నేపథ్యంలో లక్షల మంది విద్యార్థులకు ఒకేసారి పరీక్షలు నిర్వహించడం ఇబ్బందికరమేనన్న భావనలో అధికారులు ఉన్నారు. ప్రత్యక్ష బోధన లేని ప్రస్తుత పరిస్థితుల్లో ఆన్‌లైన్‌ బోధన అంతంతగానే కొనసాగుతోంది. విద్యార్థులందరికి ఆన్‌లైన్‌ పాఠాలు అందడం లేదు. టీశాట్‌ వీడియో పాఠాల ప్రసారాన్ని విద్యార్థులంతా చూడటం లేదు. ఈ పరిస్థితుల్లో విద్యార్థుల్లోనూ పరీక్షలు ఎలా రాయాలన్న ఆందోళన నెలకొంది. మరోవైపు కరోనా కేసులు పెరుగుతున్న నేపథ్యంలో నిర్వహణ ఇబ్బందికరమేనన్న ఆలోచన అధికారుల్లో ఉంది. షెడ్యూలు ప్రకారం మే 1వ తేదీ నుంచి ఇంటర్మీడియట్‌ ప్రథమ సంవత్సర పరీక్షలను, 2వ తేదీ నుంచి ద్వితీయ సంవత్సర పరీక్షలను నిర్వహించాల్సి ఉంది. అయితే ఆయా పరీక్షలకు దాదాపు 10 లక్షల మంది విద్యార్థులు హాజరు కానున్నారు. రోజు విడిచి రోజు చొప్పున పరీక్షలు నిర్వహిస్తున్నందున ప్రతిరోజు 5 లక్షల మంది విద్యార్థులు వస్తారని, భౌతికదూరం పాటించడం కష్టమేనన్న భావన నెలకొంది. బస్సుల్లో, ఆటోల్లో ప్రయాణించేప్పుడు, పరీక్ష కేంద్రాల్లోనూ ఇబ్బందికరమేనని అధికారులు పేర్కొంటున్నారు. సాధారణ సమయంలో ఏర్పాటు చేసే 1,350 కేంద్రాలకు బదులు రెట్టింపు కేంద్రాలను ఏర్పాటు చేసినా విద్యార్థులు ఇబ్బందులు పడాల్సి వస్తుందేమోనన్న ఆలోచన అధికారుల్లో ఉంది.  కేంద్రమే వద్దనుకున్నపుడు రాష్ట్రంలో ఎలా?  కరోనా వ్యాప్తి చెందుతున్న ప్రస్తుత పరిస్థితుల్లో 12వ తరగతి పరీక్షలను వాయిదా వేస్తున్నామని కేంద్రం ప్రకటించింది. ఈ నేపథ్యంలో రాష్ట్రంలో ఇంటర్మీడియట్‌ విద్యార్థులకు ఇప్పుడే పరీక్షల నిర్వహణ అవసరమా? అన్న భావన విద్యాశాఖ వర్గాల్లో నెలకొంది. కేంద్ర ప్రభుత్వమే జూన్‌లో పరిస్థితి సమీక్షించి పరీక్షలు ఎప్పుడు నిర్వహించాలనే దానిపై నిర్ణయం తీసుకుంటామని పేర్కొంది. ఈ నేపథ్యంలో రాష్ట్రంలో మే 1వ తేదీ నుంచి పరీక్షలు నిర్వహించడం అవసరమా? అన్న భావన అధికారుల్లో నెలకొంది. దీనిపై ప్రభుత్వం ఏ నిర్ణయం తీసుకుంటుందో నేడో రేపో తేలనుంది. ఇక రాష్ట్రంలో 260 సీబీఎస్‌ఈ స్కూళ్లు ఉండగా అందులో 15 వేల మంది పదో తరగతి విద్యార్థులు ఉన్నారు. వారందరికి పరీక్షలు రద్దయ్యాయి. 12వ తరగతి చదివే మరో 10 వేల మంది విద్యార్థులు జూన్‌ వరకు వేచి చూడాల్సిందే.  టెన్త్‌ పరీక్షలపై వేచి చూద్దామా?  సీబీఎస్‌ఈ పదో తరగతి పరీక్షలను రద్దు చేసిన నేపథ్యంలో రాష్ట్రంలో టెన్త్‌ పరీక్షల విషయంలో ప్రభుత్వం ఏ నిర్ణయం తీసుకుంటుందన్నది తేలాల్సి ఉంది. షెడ్యూలు ప్రకారం మే 17వ తేదీ నుంచి పదో తరగతి పరీక్షలు నిర్వహించాల్సి ఉంది. అంటే మరో నెల రోజుల సమయం ఉంది. ఈ నేపథ్యంలో వాటిపై ప్రభుత్వం ఇప్పుడే నిర్ణయం తీసుకుంటుందా? కొన్ని రోజుల తరువాత కరోనా కేసుల పరిస్థితిని బట్టి నిర్ణయం తీసుకుంటుందా? అనేది త్వరలోనే తేలనుంది. అయితే విద్యాశాఖ వర్గాలు మాత్రం పదో తరగతి పరీక్షలు అవసరమే లేదని, విద్యార్థులందరిని పాస్‌ చేస్తే సరిపోతుందన్న భావనలో ఉన్నాయి.       జేఈఈ మెయిన్‌ పరీక్షలు జరిగేనా? ఈనెల 27, 28, 29, 30 తేదీల్లో నిర్వహించాల్సిన జేఈఈ మెయిన్‌ మూడో దఫా పరీక్షలపైనా కేంద్రం త్వరలో నిర్ణయం తీసుకోనుంది. కరోనా కేసులు పెరుగుతున్న నేపథ్యంలో జేఈఈ మెయిన్‌ పరీక్షలను షెడ్యూలు ప్రకారం నిర్వహిస్తారా? లేదా? అన్నది త్వరలోనే ప్రకటించే అవకాశం ఉంది.  చదవండి: ఆదమరిస్తే అంతే! 

ఢిల్లీ: సెకండ్‌ వేవ్‌లో కరోనా విజృంభిస్తున్న నేపథ్యంలో కేంద్ర విద్యాశాఖ కీలక నిర్ణయం తీసుకుంది. సీబీఎస్‌ఈ పదో తరగతి పరీక్షలను రద్దు చేస్తున్నట్లు ప్రకటించింది. విద్యార్థుల ప్రతిభ, పనితీరు ఆధారంగా వారికి మార్కులు కేటాయిస్తామని వెల్లడించింది. 12వ తరగతి పరీక్షలు మాత్రం వాయిదా వేస్తున్నట్లు తెలిపింది. ఈ మేరకు కేంద్రమంత్రి రమేశ్‌ పోఖ్రియాల్‌ ట్వీట్‌ చేశారు. "దేశంలో కరోనా మహమ్మారి తీవ్రత, విద్యార్థుల భద్రతను దృష్టిలో పెట్టుకుని మే 4 నుంచి జూన్‌ 7 వరకు జరగాల్సిన సీబీఎస్‌ఈ 10వ తరగతి పరీక్షలు రద్దు చేస్తున్నాం. బోర్డు తయారు చేసే ఆబ్జెక్టివ్‌, క్రైటీరియా ఆధారంగా విద్యార్థుల పదో తరగతి ఫలితాలు ప్రకటిస్తాం. ప్రస్తుతానికి 12వ తరగతి పరీక్షలు వాయిదా వేస్తున్నాం. జూన్‌ 1న పరిస్థితిని సమీక్షించిన తర్వాత 12వ తరగతి ఎగ్జామ్స్‌పై నిర్ణయం తీసుకుంటాం. ఒకవేళ పరీక్షలు పెట్టాలనుకుంటే 15 రోజుల ముందుగానే వాటి వివరాలు ప్రకటిస్తాం" అని తెలిపారు. కోరలు చాస్తున్న కరోనాను దృష్టిలో పెట్టుకుని పరీక్షలు రద్దు చేయాలని డిమాండ్లు వెల్లువెత్తిన నేపథ్యంలో ప్రధానమంత్రి నరేంద్రమోదీ బుధవారం కీలక సమావేశం నిర్వహించారు. విద్యార్థుల శ్రేయస్సే ప్రభుత్వ ప్రథమ ప్రాధాన్యమని మోదీ చెప్పారని ఈ భేటీకి హాజరైన విద్యాశాఖ మంత్రి రమేశ్‌ పోఖ్రియాల్ తెలిపారు. అనంతరం టెన్త్‌ పరీక్షలను రద్దు చేస్తూ నిర్ణయం తీసుకున్నారు. మరిన్ని వివరాల కోసం సీబీఎస్ఈ అధికారిక వెబ్‌సైట్ cbse.nic.inను వీక్షించండి. చదవండి: ఈ ఏడాదే సీబీఎస్‌ఈ సీబీఎస్ఈ పరీక్షల షెడ్యూల్‌ విడుదల

సాక్షి, అమరావతి: విద్యా రంగంలో సీబీఎస్‌ఈ (సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌) విధానం విప్లవాత్మక మార్పుగా నిలిచిపోతుందని ముఖ్యమంత్రి వైఎస్‌ జగన్‌మోహన్‌ రెడ్డి అన్నారు. వచ్చే విద్యా సంవత్సరంలో (2021–22) అన్ని ప్రభుత్వ స్కూళ్లకు సీబీఎస్‌ఈ అఫిలియేషన్‌ రానుందని, 2024–25లో రాష్ట్ర విద్యార్థులు సీబీఎస్‌ఈ విధానంలో టెన్త్‌ బోర్డు పరీక్షలు రాయనున్నారని చెప్పారు. ప్రభుత్వ పాఠశాలల్లో మన బడి నాడు–నేడు, జగనన్న విద్యా కానుక, సీబీఎస్‌ఈ అఫిలియేషన్‌పై బుధవారం ఆయన తన క్యాంపు కార్యాలయంలో ఉన్నత స్థాయి సమీక్ష నిర్వహించారు. ఈ సందర్భంగా సీఎం మాట్లాడుతూ.. సీబీఎస్‌ఈపై టీచర్లకు అవగాహన కోసం శిక్షణ ఇవ్వాలని ఆదేశించారు. విద్యార్థుల నిష్పత్తికి తగినట్లుగా టీచర్లు ఉండాలని స్పష్టం చేశారు. ఒక దార్శనికతతో విద్యా రంగంలో విప్లవాత్మక చర్యలు చేపట్టామని, ఇంత ఖర్చు, ఇంత శ్రద్ధ ఎప్పుడూ పెట్టలేదని అన్నారు. మంచి విద్య అందరికీ అందాలి.. పేద పిల్లలు గొప్పగా చదువుకోవాలన్న సదుద్దేశంతో ఈ నిర్ణయాలన్నీ అమలు చేస్తున్నామని పేర్కొన్నారు. ఇన్‌స్పెక్షన్, మానిటరింగ్‌ పటిష్టంగా ఉండాలని, ఇందు కోసం ఏం చేయాలన్న దానిపై కార్యాచరణ రూపొందించాలని అధికారులను ఆదేశించారు. ప్రస్తుతం ఉన్న సమస్యలకు అధికారులు పరిష్కారాలు కనుక్కోవాలని, ఎడ్యుకేషన్‌ మానిటరింగ్‌ కమిషన్‌ మరింత సమర్థవంతంగా పని చేయాలని చెప్పారు. ఏపీలో ప్రత్యేకంగా సీబీఎస్‌ఈ ఒక కార్యాలయాన్ని తెరవనుందని ఈ సందర్భంగా అధికారులు సీఎంకు వివరించారు. ఈ సమీక్షలో సీఎం ఇంకా ఏమన్నారంటే..  ఇంగ్లిష్ , తెలుగులో పాఠ్య పుస్తకాలు  ► పాఠ్య పుస్తకాలను ఇప్పుడు ఇంగ్లిష్, తెలుగులో ఇస్తున్నాం. ఇంగ్లిష్ లో బోధించడం, ఇంగ్లిష్ లో మాట్లాడడం అలవాటు చేయాలి. ప్రారంభంలో తడబాట్లు, తప్పులు ఉంటాయి. కానీ ప్రయత్నం చేసుకుంటూ ముందుకు వెళ్తే తప్పకుండా మెరుగు పడుతుంది.   ► ఈ అంశాలను టీచర్లకు అర్థమయ్యేలా చేరవేసి వారిలో స్ఫూర్తిని నింపాలి. వైఎస్సార్‌ ప్రీ ప్రైమరీ –1 (పీపీ–1లో) కింద అంగన్‌వాడీల్లో కూడా ఇంగ్లిష్‌ మాధ్యమాన్ని ప్రవేశ పెడుతున్నాం.   ఎక్కడ తిన్నా ఒకేలా జగనన్న గోరుముద్ద రుచి   ► జగనన్న గోరుముద్దపై వచ్చిన ఫిర్యాదులు వెంటనే పరిష్కరించాలి. తిరిగి అలాంటివి పునరావృతం కాకూడదు. ఎక్కడ తిన్నా కూడా జగనన్న గోరుముద్ద రుచి ఒకేలా ఉండాలి. గోరుముద్ద కార్యక్రమాన్ని సమర్థవంతంగా నిర్వహించాలి. ఆహార పదార్థాల నాణ్యత ఎక్కడ చూసినా ఒకేలా ఉండాలి.    ► ఆహార పదార్థాలను తయారు చేయడంపై ఎస్‌వోపీ (స్టాండర్డ్‌ ఆపరేటింగ్‌ ప్రొసీజర్‌) అందుబాటులోకి తీసుకు రావాలి. గోరుముద్ద, టాయిలెట్ల నిర్వహణపై ప్రతి రోజూ స్కూళ్ల నుంచి ఫీడ్‌ బ్యాక్‌ కచ్చితంగా వచ్చేలా చర్యలు తీసుకోవాలి.   ► ఎక్కడ ఏ సమస్య వచ్చినా వెంటనే దాన్ని సరిదిద్దే వ్యవస్థ ఉండాలి. చిన్న రిపేరు వచ్చినా వెంటనే దాన్ని సరిదిద్దాలి. సమస్య తెలిసిన దగ్గర నుంచీ అది పరిష్కారమయ్యే వరకు ఏ విధంగా వ్యవహరించాలన్న దానిపై ఒక ఎస్‌వోపీ ఉండాలి. దీనికి సంబంధించి అధికారులకు అలర్ట్స్‌ రావాలి.    ఇక పాఠశాలల నిర్వహణపై దృష్టి పెట్టాలి  ► మొదటి దశలో మన బడి నాడు– నేడు కింద పనులు పూర్తయిన పాఠశాలల్లో స్వయం సహాయక సంఘాల మహిళలతో పరిశీలన చేయించాలి. వీరికి సులువుగా అర్థమయ్యేలా నాడు– నేడు పనుల పరిశీలనపై విద్యా శాఖ అధికారులు ప్రశ్నావళి పంపాలి.    ► మన బడి నాడు–నేడు కింద పెద్ద ఎత్తున పనులు చేసినందున, ఇప్పుడు స్కూళ్ల నిర్వహణపై దృష్టి పెట్టాలి. నిర్వహణ సరిగ్గా లేకపోతే ఉపయోగం ఉండదు. ఏప్రిల్‌ 30న తొలి దశలో అభివృద్ధి చేసిన పాఠశాలలను ప్రజలకు అంకితం చేస్తాం.  ► అధికారులు ఎవరైనా పాఠశాలలకు వెళ్లినప్పుడు తప్పనిసరిగా నిర్వహణ ఎలా ఉందన్న దానిపై కచ్చితంగా దృష్టి పెట్టాలి. టాయిలెట్ల నిర్వహణ బాగుందా? లేదా? అన్న విషయాన్ని తప్పనిసరిగా చూడాలి.  స్కూళ్లు ప్రారంభమయ్యే నాటికి జగనన్న విద్యా కానుక  ► మళ్లీ స్కూళ్లు ప్రారంభమయ్యే నాటికి కచ్చితంగా పిల్లలకు విద్యా కానుక అందాలి. ఇందులో ఎలాంటి జాప్యం జరగడానికి వీల్లేదు. (ఈ సందర్భంగా డిక్షనరీ, పాఠ్య పుస్తకాలు, నోట్‌ పుస్తకాలు, బ్యాగులను సీఎం పరిశీలించారు.)   ► విద్యా రంగంలో రాష్ట్ర ప్రభుత్వం తీసుకున్న చర్యలు విప్లవాత్మక మార్పులకు దారి తీస్తాయి. ప్రతి ఒక్కరూ నైపుణ్యాన్ని, సమర్థతను పెంచుకుంటారు. తద్వారా ఉద్యోగ అవకాశాలు, జీతాలు పెరిగి జీవన ప్రమాణాలు మారుతాయి.   ► హాస్టళ్లలో నాడు–నేడు కింద చేపట్టనున్న పనులను సమీక్షించారు. ఈ సందర్భంగా జవహర్‌ నవోదయ, కేంద్రీయ విద్యాలయ స్కూల్స్‌లో ఉన్న మౌలిక సదుపాయాలు, నాడు –నేడు కింద ప్రభుత్వం చేపట్టిన మౌలిక సదుపాయాల మధ్య తేడాలను అధికారులు ముఖ్యమంత్రికి వివరించారు.   ► మనబడి నాడు – నేడు కార్యక్రమంలో భాగంగా రెండో దశలో చేపట్టాల్సిన పనులు, కార్యక్రమాలపై విద్యా సంస్థల అభివృద్ధి కమిటీలు, అధికారుల శిక్షణా కరదీపికను సీఎం జగన్‌ ఆవిష్కరించారు.    ► జగనన్న గోరుముద్దలో మధ్యాహ్నం నాణ్యమైన భోజనం తయారీ, టాయిలెట్ల నిర్వహణపై ఎస్‌వోపీతో కూడిన పుస్తకాన్ని సీఎం ఆవిష్కరించారు.   ► ఈ సమీక్షలో విద్యాశాఖ మంత్రి ఆదిమూలపు సురేష్, పాఠశాల విద్యా శాఖ ముఖ్య కార్యదర్శి బుడితి రాజశేఖర్, పాఠశాల విద్యా శాఖ కమిషనర్‌ వాడ్రేవు చినవీరభద్రుడు, సర్వశిక్షా అభియాన్‌ స్టేట్‌ ప్రాజెక్ట్‌ డైరెక్టర్‌ వెట్రిసెలి్వ, ఇతర ఉన్నతాధికారులు పాల్గొన్నారు.   

సాక్షి, అమరావతి: రాష్ట్ర విద్యార్థులు జాతీయ స్థాయి పరీక్షల్లో అత్యుత్తమంగా రాణించే లక్ష్యంతో ఆంధ్రప్రదేశ్‌లో 2021 – 22 విద్యా సంవత్సరం నుంచి 1 నుంచి 8వ తరగతి వరకు సీబీఎస్‌ఈ (సెంట్రల్‌ బోర్డు ఆఫ్‌ సెకండరీ ఎడ్యుకేషన్‌) విద్యా విధానానికి శ్రీకారం చుడుతున్నట్లు ముఖ్యమంత్రి వైఎస్‌ జగన్‌మోహన్‌రెడ్డి తెలిపారు. ప్రభుత్వ విద్యాసంస్థల్లో ఆ తరువాత తరగతులకు వరుసగా ఒక్కో ఏడాది పెంచుకుంటూ దీన్ని వర్తింప చేస్తామన్నారు. 12వ తరగతి వరకు సీబీఎస్‌ఈ విధానాన్ని దశలవారీగా అమలు చేస్తామన్నారు. దీనికి సంబంధించి ఎఫిలియేషన్‌ కోసం సీబీఎస్‌ఈ బోర్డుతో చర్చించి ఒప్పందం కుదుర్చుకోవాలని అధికారులను ఆదేశించారు. కామన్‌ సిలబస్‌ వల్ల జాతీయ స్థాయి పోటీ పరీక్షలకు సిద్ధం కావడం సులభంగా ఉంటుందని ముఖ్యమంత్రి జగన్‌ పేర్కొన్నారు. ఆంగ్లంపై మరింత పట్టు సాధించి మన విద్యార్థులు ఎక్కడైనా రాణించే అవకాశం ఉంటుందన్నారు. ఒత్తిడికి గురి కాకుండా విద్యార్థుల సర్వతోముఖాభివృద్ధికి ఇది ఉపకరిస్తుందన్నారు. ‘స్పందన’ కార్యక్రమంలో భాగంగా సీఎం జగన్‌ మంగళవారం తన క్యాంపు కార్యాలయం నుంచి కలెక్టర్లు, ఎస్పీలు, జేసీలు.. ఉన్నతాధికారులతో వీడియో కాన్ఫరెన్స్‌ నిర్వహించారు. ఉపాధి హామీ పనులు, ఇళ్ల పట్టాలు, స్కూళ్లు, అంగన్‌వాడీ కేంద్రాలలో నాడు –నేడు, మల్టీపర్పస్‌ ఫెసిలిటీ సెంటర్లు, మెడికల్‌ కాలేజీలు, ఆర్‌ అండ్‌ బీ, వైఎస్‌ఆర్‌ బీమా, జగనన్న తోడు, వైఎస్‌ఆర్‌ చేయూత, వైఎస్‌ఆర్‌ ఆసరాతోపాటు ఏప్రిల్‌లో అందించనున్న జగనన్న విద్యా దీవెన, రైతులకు వైఎస్‌ఆర్‌ సున్నా వడ్డీ, పొదుపు సంఘాలకు వైఎస్‌ఆర్‌ సున్నా వడ్డీ, జగనన్న వసతి దీవెన, వలంటీర్లకు సత్కార కార్యక్రమాలపై సమీక్షించి అధికార యంత్రాంగానికి దిశా నిర్దేశం చేశారు. ఈ సందర్భంగా ఆయా కార్యక్రమాలు, పథకాలపై సీఎం జగన్‌ ఏమన్నారంటే.. ఉపాధిహామీ పనుల్లో రికార్డు సృష్టించాం.. ఉపాధిహామీ పనుల్లో రికార్డు సృష్టించాం. కలెక్టర్లకు అభినందనలు. మార్చి 15 నాటికి 24.27 కోట్ల పనిదినాలు కల్పించాం. 2020–21 ఆర్ధిక సంవత్సరంలో 25.25 కోట్ల పనిదినాలను చేరుకోబోతున్నాం. దాదాపు రూ.6 వేల కోట్లు ఉపాధిహామీ కింద కూలీలకు ఇవ్వగలిగాం. యుద్ధ ప్రాతిపదికన గ్రామ సచివాలయాల నిర్మాణాలను పూర్తి చేయాలి. 2021 మే నాటికి అన్ని భవనాలూ పూర్తయ్యేలా చూడాలి. ఆర్బీకేలను పూర్తి చేయడంపైనా దృష్టి పెట్టాలి. ఆర్బీకేల ఏర్పాటును ప్రభుత్వం ప్రతిష్టాత్మకంగా తీసుకుంది. వైఎస్‌ఆర్‌ హెల్త్‌ క్లినిక్స్‌ను పూర్తి చేయడంపైనా దృష్టి సారించాలి. వీటన్నింటిపైనా కలెక్టర్లు, అధికారులు ప్రత్యేక శ్రద్ధ తీసుకోవాలి. అమూల్‌తో కలిసి గ్రామాల్లో విప్లవాత్మక చర్యలు అమూల్‌తో కలిసి గ్రామీణ ప్రాంతాల్లో విప్లవాత్మక చర్యలకు శ్రీకారం చుట్టాం. పాడి రైతులకు మంచి ధర వచ్చేలా కార్యక్రమాన్ని ముందుకు తీసుకెళ్తున్నాం. దీనివల్ల గ్రామీణఆర్థిక వ్యవస్థ బలోపేతం అవుతుంది. బీఎంసీ (బల్క్‌ మిల్క్‌ కలెక్షన్‌ సెంటర్లు), ఏంఎంసీ (ఆటోమెటిక్‌ మిల్క్‌ కలెక్షన్‌ సెంటర్లు)ల నిర్మాణాలపై దృష్టిపెట్టాలి. నెలాఖారు కల్లా అన్ని ప్రాంతాల్లో వీటి నిర్మాణం మొదలుపెట్టి ఆగస్టు కల్లా పూర్తిచేయాలి. ఉపాధిహామీ కింద ప్రారంభించిన సీసీ రోడ్లు, డ్రైన్స్‌ వెంటనే పూర్తి చేయాలి. కొత్తగా 11,334 మందికి వెంటనే ఇళ్ల పట్టాలు  అక్కడక్కడా మిగిలిపోయిన ఇళ్ల పట్టాల పంపిణీని వెంటనే పూర్తి చేయాలి. కొత్తగా దరఖాస్తు చేసుకున్న అర్హులకు 90 రోజుల్లోగా ఇళ్ల స్థలాల పట్టాలివ్వాలి. కచ్చితంగా నిర్ణీత సమయంలోగా ఇంటి స్థలం పట్టా అందాల్సిందే. కొత్తగా అర్హులుగా గుర్తించిన 11,334 మందికి పట్టాలను వెంటనే అందించాలి. మిగిలిన దరఖాస్తుల వెరిఫికేషన్‌  పూర్తి చేయాలి. ఏప్రిల్‌ నుంచి వీరికి అవసరమైన భూముల గుర్తింపు, కొనుగోలు ప్రక్రియలపై దృష్టి పెట్టాలి. ఏప్రిల్‌ 15 నుంచి ఇళ్ల నిర్మాణాలు ప్రారంభం  తొలివిడతలో 15.60 లక్షల ఇళ్లను నిర్మించబోతున్నాం. దీనికి సంబంధించి అన్ని రకాల ప్రక్రియలను పూర్తి చేయాలి. సన్నాహక పనులను ముమ్మరం చేయాలి. ఏప్రిల్‌ 15 కల్లా లేఅవుట్లలో కరెంటు, నీటి సదుపాయాలను ఏర్పాటు చేయాలి. ఏప్రిల్‌ 15 నుంచి ఇళ్ల నిర్మాణం ప్రారంభం అవుతుంది. ప్రతి కాలనీలో ఒక మోడల్‌హౌస్‌ కట్టాలి. తామే ఇల్లు కట్టుకుంటామన్న వారికి నిర్మాణ సామగ్రిని అందించాలి. పెద్ద మొత్తంలో ప్రభుత్వం నిర్మాణ సామగ్రిని కొనుగోలు చేస్తున్నందున లబ్ధిదారులకు తక్కువ ధరకు సిమెంటు, స్టీలు, మెటల్‌ లభిస్తుంది. దీంతో వారికి మేలు జరుగుతుంది. గ్రామ సచివాలయాల్లోని ఇంజనీరింగ్‌ అసిస్టెంట్లు, డిజిటల్‌ అసిస్టెంట్లు, వెల్ఫేర్‌ అసిస్టెంట్లు, వలంటీర్ల సేవలను వినియోగించుకోవాలి. స్కూళ్లలో మార్చి 31కి నాడు – నేడు తొలివిడత పనులు పూర్తి  నాడు – నేడు కింద స్కూళ్లలో మొదటి విడతలో చేపట్టిన పనులు మార్చి 31 నాటికి పూర్తి కావాలి. పది రకాల సదుపాయాలు స్కూళ్లకు సమకూరుతున్నాయి. పెయింట్‌ పనులపై దృష్టి పెట్టాలి. అంగన్‌ వాడీల్లో నాడు–నేడు.. వైఎస్‌ఆర్‌ ప్రీ ప్రైమరీ స్కూళ్ల కింద అంగన్‌వాడీ కేంద్రాల్లో నాడు–నేడు పనులు చేపడుతున్నాం. చిన్నారుల్లో 6 ఏళ్ల లోపు వయసులోనే మెదడు 80 శాతం వరకూ అభివృద్ది చెందుతుంది. అందుకనే ఈ వయసులో ఉన్న చిన్నారులపై దృష్టిపెట్టాం. ప్రీ ప్రైమరీ స్కూళ్ల పట్ల ప్రత్యేక శ్రద్ధ తీసుకున్నాం. భవనాల నిర్మాణం కోసం స్థలాలపై కలెక్టర్లు దృష్టిపెట్టాలి. అంగన్‌వాడీ వర్కర్లు, హెల్పర్లకు ఇవ్వనున్న శిక్షణపై అధికారులు శ్రద్ధ చూపాలి. మల్టీపర్పస్‌ ఫెసిలిటీ సెంటర్లు.. ఆర్బీకేల పరిధిలో ఏర్పాటయ్యే మల్టీపర్పస్‌ సెంటర్ల కోసం 50 సెంట్ల నుంచి ఎకరం వరకూ స్థలం అవసరం. వీలైనంత త్వరగా భూములను గుర్తించి సంబం«ధిత శాఖకు అప్పగించాలి. గోడౌన్లు, కోల్డు స్టోరేజీలు, డ్రైయింగ్‌ ఫ్లాట్‌ఫాం లాంటి సదుపాయాలు గ్రామాల స్థాయి వరకూ రావాలి. రైతుల వ్యవసాయ ఉత్పత్తులకు మంచి ధరలు రావాలంటే ఈ సదుపాయాలు ఉండాలి. మెడికల్‌ కాలేజీల నిర్మాణం.. ప్రతి పార్లమెంట్‌ నియోజకవర్గంలో ఒక మెడికల్‌ కాలేజీని తెస్తున్నాం. బోధనాసుపత్రితోపాటు నర్సింగ్‌ కాలేజీ ఉండేలా చర్యలు తీసుకుంటున్నాం. కాలేజీలకు భూములను గుర్తించి సేకరణ పనులు పూర్తి చేయాలి. పులివెందుల, పిడుగురాళ్ల, అమలాపురం, పాలకొల్లు, ఆదోని, మచిలీపట్నంలలో నిర్మాణాలు ఏప్రిల్‌లో ప్రారంభించేలా చర్యలు తీసుకుంటున్నాం. జాతీయ రహదారులు జాతీయ రహదారుల నిర్మాణానికి భూములను త్వరగా సేకరించడంపై కలెక్టర్లు దృష్టి పెట్టాలి. ప్రత్యేక సెల్‌ను ఏర్పాటు చేయాలి. ఏప్రిల్‌ 6న వైఎస్సార్‌ బీమాతో 12,039 మందికి పరిహారం బ్యాంకులు ఎన్‌రోల్‌ చేయని కుటుంబాల్లో సహజ మరణాలు, ప్రమాదాల కారణంగా మరణించిన 12,039 మంది నామినీలకు వైఎస్‌ఆర్‌ బీమా కింద ఏప్రిల్‌ 6న పరిహారం చెల్లింపులు చేస్తాం. జగనన్న తోడు అర్హులందరికీ పథకం వర్తించేలా డీసీసీల సమావేశం  నిర్వహించాలి. వైఎస్‌ఆర్‌ చేయూత, ఆసరాపై దృష్టి పెట్టండి వైఎస్‌ఆర్‌ చేయూత, వైఎస్‌ఆర్‌ ఆసరా పథకాలపై దృష్టి పెట్టండి. 98 శాతం మంది దుకాణాలు ఏర్పాటు చేసుకున్నారు. మిగిలిన 2 శాతం మందితో కూడా దుకాణాలు ఏర్పాటు చేయించేలా చర్యలు తీసుకోవాలి. చేయూత, ఆసరా కింద సుస్థిర ఉపాధి మార్గాల కోసం చేపట్టిన ఇతర కార్యక్రమాల్లో బ్యాంకు లింకేజీ ప్రక్రియను ముమ్మరం చేయాలి. ఏప్రిల్‌లో ముఖ్యమైన కార్యక్రమాలు ఇవీ ► ఈ ఏడాది ఏప్రిల్‌కు సంబంధించి పలు కార్యక్రమాల తేదీలను ప్రకటించిన ముఖ్యమంత్రి జగన్‌ ఈమేరకు చర్యలు తీసుకోవాలని ఆదేశించారు. పెండింగ్‌లో ఏవైనా దరఖాస్తులు ఉంటే పరిశీలన చేసి జాబితాలను సచివాలయాల్లో ఉంచాలని సూచించారు. అర్హులకు పథకాలు అందేలా చర్యలు తీసుకోవాలని కలెక్టర్లను ఆదేశించారు.   ► ఏప్రిల్‌ 9న జగనన్న విద్యాదీవెన  ► ఏప్రిల్‌ 13న ఉగాదిరోజు వలంటీర్లను సత్కరించే కార్యక్రమం ప్రారంభం. ప్రతి రోజూ ఒక అసెంబ్లీ నియోజకవర్గానికి మంత్రులు, ఎమ్మెల్యేలు, కలెక్టర్లు, ఎస్పీలు వెళ్లాలి.  వలంటీర్లను సేవామిత్ర, సేవారత్న, సేవావజ్ర అవార్డులతో సత్కరించాలి. వలంటీర్లు అందిస్తున్న సేవలను గుర్తించాలి. అది వారికి మరింత ఉత్సాహాన్నిస్తుంది.  ► ఏప్రిల్‌ 16న రైతులకు వైఎస్‌ఆర్‌ సున్నా వడ్డీ డబ్బులు ► ఏప్రిల్‌ 20న డ్వాక్రా అక్కచెల్లెమ్మలకు వైఎస్‌ఆర్‌ సున్నా వడ్డీ డబ్బులు ► ఏప్రిల్‌ 27న జగనన్న వసతి దీవెన సమీక్షలో పాల్గొన్న మంత్రులు, ఉన్నతాధికారులు.. ఈ కార్యక్రమంలో మంత్రులు పెద్దిరెడ్డి రామచంద్రారెడ్డి, ఆదిమూలపు సురేష్, పినిపే విశ్వరూప్, చెరుకువాడ శ్రీరంగనాధరాజు, ప్రభుత్వ ప్రధాన కార్యదర్శి ఆదిత్యనాథ్‌దాస్, డీజీపీ గౌతం సవాంగ్, స్పెషల్‌ చీఫ్‌ సెక్రటరీ సీసీఎల్‌ఏ నీరబ్‌ కుమార్‌ ప్రసాద్, స్పెషల్‌ చీఫ్‌ సెక్రటరీ ఆర్‌ అండ్‌ బీ ఎం.టి.కృష్ణబాబు, స్పెషల్‌ చీఫ్‌ సెక్రటరీ గృహనిర్మాణశాఖ అజయ్‌ జైన్, స్పెషల్‌ చీఫ్‌ సెక్రటరీ బీసీ వెల్ఫేర్‌ జి.అనంతరాము, మహిళా, శిశు సంక్షేమ శాఖ ప్రిన్సిపల్‌ సెక్రటరీ ఏ.ఆర్‌.అనురాధ,  వైద్య, ఆరోగ్యశాఖ ప్రిన్సిపల్‌ సెక్రటరీ అనిల్‌ కుమార్‌ సింఘాల్, పంచాయతీరాజ్, గ్రామీణాభివృద్ధి శాఖ ప్రిన్సిపల్‌ సెక్రటరీ గోపాలకృష్ణ ద్వివేది, రెవెన్యూ శాఖ ప్రిన్సిపల్‌ సెక్రటరీ వి ఉషారాణి, కార్మికశాఖ ప్రిన్సిపల్‌ సెక్రటరీ బి ఉదయలక్ష్మి, పాఠశాల విద్యాశాఖ ప్రిన్సిపల్‌ సెక్రటరీ బుడితి రాజశేఖర్, సాంఘిక సంక్షేమశాఖ ప్రిన్సిపల్‌ సెక్రటరీ కె.సునీత, పంచాయతీరాజ్, గ్రామీణాభివృద్ధిశాఖ కమిషనర్‌ గిరిజాశంకర్, వ్యవసాయశాఖ స్పెషల్‌ కమిషనర్‌ హెచ్‌.అరుణకుమార్, సివిల్‌ సఫ్లైస్‌ కమిషనర్‌ కోన శశిధర్, సెర్ప్‌ సీఈఓ రాజబాబు, ఉన్నతాధికారులు పాల్గొన్నారు. 6 రోజుల్లో ముగిసే ఎన్నికల ప్రక్రియ సాగదీతతో అభివృద్ధికి ఆటంకాలు ► రాష్ట్ర ఎన్నికల కమిషన్‌ గతేడాది అర్థాంతరంగా మధ్యలో నిలిపివేసిన జెడ్పీటీసీ, ఎంపీటీసీ ఎన్నికలకు సంబంధించి ఇక కేవలం 6 రోజుల ప్రక్రియ మాత్రమే మిగిలి ఉందని, అది ముగిస్తే వ్యాక్సినేషన్, పరిపాలన, అభివృద్ధి కార్యక్రమాల మీద పూర్తి స్థాయిలో దృష్టి సారించవచ్చని ముఖ్యమంత్రి వైఎస్‌ జగన్‌మోహన్‌రెడ్డి పేర్కొన్నారు.  ► దీన్ని పూర్తి చేయకుండా సాగదీయడంతో అభివృద్ధి పనులకు అవరోధాలు ఎదురవుతు న్నాయని సీఎం జగన్‌ చెప్పారు. ఆరు రోజుల్లో పూర్తయ్యే ఆ ప్రక్రియను ముగిస్తే మిగతా పనులు సజావుగా సాగుతాయన్నారు. ఆ ఎన్నికలను మధ్యలో నిలిపివేసి దీర్ఘకాలం సాగదీయడం, కోడ్‌ కారణంగా అభివృద్ధి, వ్యాక్సినేషన్‌ మందగించాయన్నారు.  ► అధికార యంత్రాంగం అంతా ఇతర కార్యక్రమాల్లో ఎక్కువ రోజులు నిమగ్నం కావడంతో అభివృద్ధి పనులకు ఆటంకం కలుగుతోందని ముఖ్యమంత్రి వైఎస్‌ జగన్‌  పేర్కొన్నారు. స్థానిక సంస్థల ఎన్నికల కారణంగా చాలా రోజులుగా కలెక్టర్లతో సమావేశాలు నిర్వహించలేకపోయామన్నారు. 

న్యూఢిల్లీ: సెకండరీ ఎడ్యుకేషన్ యొక్క సెంట్రల్ బోర్డ్(సీబీఎస్ఈ) 10, 12వ తరగతులకు సంబందించిన పరీక్షల షెడ్యూల్‌ విడుదలైంది. 2020-2021 విద్యా సంవత్సారానికి సంబంధించి 10, 12వ తరగతుల పరీక్షల షెడ్యూల్‌ను కేంద్ర విద్యాశాఖ మంత్రి రమేశ్‌ ఫోక్రియాల్‌ నిషాంక్ నేడు ట్విటర్‌లో ప్రకటించారు. ఈ పరీక్షలు మే 4 నుంచి జూన్ 10 వరకు జరగనున్నాయి.(చదవండి: ఆధార్ సేవా కేంద్రాల కోసం హెల్ప్‌లైన్) షెడ్యూల్: మే 4 నుంచి జూన్‌ 7 వరకు 10వ తరగతి పరీక్షలు జరగనున్నాయి మే 4 నుంచి జూన్‌ 11 వరకు 12వ తరగతి పరీక్షలు జరగనున్నాయి మార్చి 1 నుంచి ప్రాక్టికల్‌ పరీక్షలు జులై 15 తేదీలోగా సీబీఎస్‌ఈ ఫలితాలు విడుదల  పదో తరగతి పరీక్షలు రోజూ ఉదయం 10.30గం నుంచి మధ్యాహ్నం 1.30గం  వరకు కొనసాగనున్నాయి. అలాగే, 12వ తరగతి పరీక్షలు రెండు షిఫ్ట్‌లలో నిర్వహించనున్నారు. తొలి షిఫ్ట్‌ ఉదయం 10.30గం నుంచి 1.30గం వరకు, రెండో షిఫ్ట్‌ మధ్యాహ్నం 2.30గం నుంచి 5.30గం వరకు నిర్వహిస్తారు. మహమ్మారి కారణంగా10, 12 తరగతుల సిలబస్‌ను 30 శాతం తగ్గించారు. కోవిడ్-19 పాండమిక్ ప్రోటోకాల్స్‌ను అనుసరించి పరీక్షలు జరుగుతాయి. ఫేస్ మాస్క్ ధరించడం, సామాజిక దూరం పాటించడం తప్పనిసరి. మరిన్ని వివరాల కోసం సీబీఎస్ఈ అధికారిక వెబ్‌సైట్ cbse.nic.inను వీక్షించండి.  

సాక్షి, న్యూఢిల్లీ: సెంట్రల్‌ బోర్డు ఆఫ్‌ సెకండరీ ఎడ్యుకేషన్‌ (సీబీఎస్‌ఈ) పరిధిలో ఏర్పాటు కానున్న విద్యాసంస్థలకు గుర్తింపు (అఫిలియేషన్‌) మంజూరు ప్రక్రియలో పలు మార్పులు చేసినట్టు సీబీఎస్‌ఈ ప్రకటించింది. అఫిలియేషన్‌ ప్రక్రియ మొత్తం ఆన్‌లైన్‌లో నిర్వహించేలా చర్యలు చేపట్టింది. జాతీయ నూతన విద్యా విధానం–2020 ప్రకారం సీబీఎస్‌ఈ బైలాలో పలు మార్పులు చేసింది. ఈ విషయాలతో తన అధికారిక వెబ్‌సైట్‌లో తాజాగా ఒక నోటిఫికేషన్‌ పొందుపరిచింది. 2021 మార్చి 1 నుంచి ఈ కొత్త విధానం అమల్లోకి రానుంది. వివిధ కమిటీల సిఫార్సుల మేరకు నూతన విద్యా విధానంలో చేసిన సూచనల ప్రకారం ఈ మార్పులు చేస్తున్నట్టు సీబీఎస్‌ఈ పేర్కొంది. పునర్వ్యవస్థీకరణ లక్ష్యం ఇలా.. సీబీఎస్‌ఈ గుర్తింపు మంజూరుకు 2006 నుంచి ఆన్‌లైన్‌ విధానాన్ని అనుసరిస్తున్నారు. ప్రస్తుతం పూర్తిగా డిజిటలైజేషన్‌, డేటా అనలటిక్స్‌ ఆధారంగా తక్కువ మానవ వనరుల వినియోగంతో గుర్తింపు మంజూరు చేసేలా చర్యలు తీసుకుంటున్నట్టు సీబీఎస్‌ఈ వివరించింది. త్వరితగతిన గుర్తింపు పొందడం, ఆటోమేటెడ్, డేటా డ్రైవన్‌ ఆధారిత నిర్ణయాలు తీసుకోవడం, పారదర్శకత పెంచడం, మొత్తం అఫిలియేషన్‌ విధానంలో అకౌంట్‌బిలిటీని పెంచడం, త్వరితంగా, కాల పరిమితిలోగా దరఖాస్తులను పరిష్కరించడం లక్ష్యంగా కొత్త విధానాన్ని చేపడుతున్నట్టు పేర్కొంది. ఇందుకు పూర్తి నిర్దేశిత సమయాలను పాటించనుంది. ఆయా విద్యాసంస్థలు అవసరమైన డాక్యుమెంట్లను సీబీఎస్‌ఈ వెబ్‌సైట్‌ ద్వారా అప్‌లోడ్‌ చేయాల్సి ఉంటుందని వివరించింది.   చదవండి: వివాదాస్పద తీర్పుపై సుప్రీంకోర్టు స్టే

సాక్షి, హైద‌రాబాద్ : ఇంట‌ర్ ప్ర‌థ‌మ‌, ద్వితీయ సంవ‌త్స‌రాల పాఠ్య ప్ర‌ణాళిక‌ను ఈ విద్యా సంవ‌త్స‌రానికి  (2020-21) గాను 30 శాతం త‌గ్గించారు. బోర్డు ప్ర‌తిపాద‌న‌కు ఇటీవ‌ల తెలంగాణ రాష్ట్రప్ర‌భుత్వం ఆమోదం తెల‌ప‌డంతో తొలిగించిన పాఠ్యాంశాల వివ‌రాల‌ను ఇంట‌ర్ బోర్డు ఓ ప్ర‌క‌ట‌న‌లో వెల్ల‌డించింది. సీబీఎస్ఈ తొల‌గించిన పాఠ్యాంశాల‌ను ఇక్క‌డా తొలిగించామ‌ని ఇంటర్మీడియ‌ట్ బోర్డు సెక్రెటరీ సయ్యద్ ఉమర్ జలీల్ తెలిపారు. క‌రోనా కార‌ణంగా విద్యాసంస్థ‌లు మూత‌ప‌డ‌టంతో దాదాపు నెల క్రిత‌మే 30 శాతం సిల‌బ‌స్‌లో కోత విధిస్తూ సీబీఎస్ఈ నిర్ణ‌యం తీసుకున్న సంగ‌తి తెలిసిందే. ఆర్ట్స్ గ్రూపు స‌బ్జెక్టులైన చ‌రిత్ర‌, ఆర్థిక శాస్త్రం, రాజ‌నీతి శాస్త్రం స‌హా ఇత‌ర స‌బ్జెక్టుల సిల‌బ‌స్‌పై నిపుణుల క‌మిటీల‌తో చ‌ర్చించి వాటి సిఫార‌సు ఆధారంగా త‌గ్గించామ‌ని పేర్కొన్నారు. ఇక సిల‌బ‌స్ త‌గ్గింపు అంశం ఈ సంవ‌త్స‌రానికే వ‌ర్తిస్తుంద‌ని తెలిపారు. 

న్యూఢిల్లీ : సీబీఎస్‌ఈ 12వతరగతి కంపార్ట్‌మెంట్‌ పరీక్షలపై విచారణను సుప్రీంకోర్టు వచ్చేవారానికి వాయిదా వేసింది. ప్రస్తుత పరిస్థితులు కంపార్ట్‌మెంట్‌ పరీక్షల నిర్వహణకు అనుకూలంగా లేవని, పైగా ఈ పరీక్షలు పూర్తయ్యేనాటికి పైతరగతుల్లోకి అడ్మీషన్లు పూర్తయిపోతాయని, దీంతో విద్యాసంవత్సరాన్ని విద్యార్ధులు నష్టపోతారని పిటీషనర్లు కోర్టును ఆశ్రయించారు. డిగ్రీ క్లాసుల్లోకి అడ్మీషన్లు వాయిదా వేయాలని కాలేజీలను ఆదేశించాలని పిటీషనర్లు కోరారు. ఈ విషయంపై విచారణ జరిపిన కోర్టు పైతరగతుల్లో అడ్మీషన్ల ప్రక్రియకు సీబీఎస్‌ఈ ఏమీ చేయలేదని వ్యాఖ్యానించింది.  ఈ విషయంలో పిటీషనర్లు తమ అభ్యర్ధనను కేంద్రానికి పంపవచ్చని సూచించింది. తదుపరి విచారణను ఈనెల 14కు వాయిదా వేసింది. (తల్లిదండ్రులుఅనుమతిస్తేనే..!) అంతకుముందు పిటీషనర్ల తరఫు న్యాయవాది వాదిస్తూ ప్రధాన పరీక్షలనే కోవిడ్‌ కారణంతో నిలిపివేయకుండా నిర్వహించారని, ఆ పరీక్షల మూల్యాంకనాన్ని ప్రత్యామ్నాయ పద్ధతులతో పూర్తి చేశారని, దీనివల్ల ఎంతో మంది విద్యార్ధులు కంపార్ట్‌మెంట్‌ను ఎదుర్కొంటున్నారని చెప్పారు. ఈ దఫా దాదాపు 87వేల మంది విద్యార్ధులు ఫెయిలయ్యారని, ఇందుకు సీబీఎస్‌ఈ ఏమీ చేయలేదని కోర్టు అభిప్రాయపడింది. ఈనెల 22– 29 మధ్య కంపార్ట్‌మెంట్‌ పరీక్షలు నిర్వహించేందుకు సీబీఎస్‌ఈ సన్నాహాలు చేస్తోంది. అసలు పరీక్షలనే రద్దు చేయాలన్న పిటీషన్‌ సుప్రీం ముందుకు ఈ నెల 4న రాగా, దానిపై విచారణ జరిపిన ధర్మాసనం ఆ డిమాండ్‌ను తోసి పుచ్చింది. (ఠాక్రేపై అనుచిత వ్యాఖ్యలు చేశారు)

బెంగళూర్‌ : ఈ ఏడాది విద్యాసంవ‌త్స‌రంలో సిల‌బ‌స్‌లో మార్పులు చేస్తూ తీసుకున్న నిర్ణ‌యంపై క‌ర్ణాట‌క స‌ర్కార్ వెనక్కి త‌గ్గింది.18వ శ‌తాబ్ధ‌పు మైసూర్ పాల‌కుడు టిప్పు సుల్తాన్ ,హైద‌ర్ అలీకి సంబంధించి పాఠ్యాంశాల‌ను తొల‌గిస్తూ చేసిన ప్ర‌క‌ట‌న‌ను ప్ర‌భుత్వం నిలిపివేసింది. ప్ర‌స్తుతానికి దీనికి సంబంధించి ఎలాంటి నిర్ణ‌యం ఖ‌రారు కాలేద‌ని, త్వ‌ర‌లోనే స్ప‌ష్ట‌త ఇవ్వ‌నున్న‌ట్లు పేర్కొంది. లాక్‌డౌన్ కార‌ణంగా పాఠ‌శాల‌ల పునఃప్రారంభంపై ఇప్ప‌టివ‌ర‌కు ఎలాంటి ప్ర‌క‌ట‌న రానుందున విద్యా సంవ‌త్స‌రం ఇంకా ఎన్ని రోజులు మిగిలి ఉన్నాయో తెలియ‌దని, ఈ నేప‌థ్యంలో  సిల‌బ‌స్‌లో మార్పుల అంశంపై తుది వివరాల‌ను వెబ్‌సైట్‌లో వెల్ల‌డిస్తామ‌ని తెలిపింది. (పాఠ్యాంశాల నుంచి టిప్పు సుల్తాన్‌ చాప్టర్‌ తొలగింపు) తొమ్మిది నుంచి పన్నెండో తరగతి సిలబస్‌ను కుదించే క్రమంలో లౌకికవాదం, పౌరసత్వం, సమాఖ్య వ్యవస్థల వంటి అంశాలను తొలగించాలన్న సీబీఎస్‌ఈ నిర్ణయం వివాదాస్పదమైన విషయం తెలిసిందే. దీనికి అనుబంధంగా క‌ర్ణాట‌క సైతం సిలబస్‌ను 30 శాతం తగ్గించే ఉద్దేశంతో పాఠ్య పుస్తకాల నుంచి మైసూర్‌ పాలకులు హైదర్‌ అలీ, టిప్పు సుల్తాన్‌ చాప్టర్‌లను తొలగిస్తూ ప్ర‌క‌ట‌న జారీ చేసింది. మొఘల్‌, రాజ్‌పుత్‌ల చరిత్రకు సంబంధించిన అథ్యాయాలు, జీసస్‌, మహ్మద్‌ ప్రవక్త బోధనల అథ్యాయాలు రద్దు చేస్తున్న‌ట్లు వెల్ల‌డించింది. ఈ నేప‌థ్యంలో రాజ‌కీయ దుమారం త‌లెత్త‌డంతో స‌ర్కార్ కాస్త వెనక్కి తగ్గిన‌ట్లు తెలుస్తోంది. ఈ అంశంపై ఇప్పుడే నిర్ణ‌యం తీసుకోలేమ‌ని, త్వ‌ర‌లోనే ఖ‌రారు చేస్తామ‌ని వెల్ల‌డించింది. కాగా మహమ్మారి నేపథ్యంలో తీసుకున్న సిల‌బ‌స్ కుదింపు నిర్ణ‌యం  ప్రస్తుత విద్యా సంవత్సరానికే సిలబస్‌ కుదింపు వర్తిస్తుందని అధికారులు పేర్కొన్నారు. ఒకటి నుంచి పదోతరగతి వరకూ సాధారణ విద్యాసంవత్సరంలో 210-220 పనిదినాలు కాగా, ఈ ఏడాది మాత్రం 120-140  ఉండ‌నున్న‌ట్లు పేర్కొన్నారు. దీనికి అనుగుణంగానే సిలబస్‌ను కుదిస్తూ మార్పులు చేప‌ట్టారు. (పాఠశాల, ఉన్నత విద్యలో భారీ సంస్కరణలు)

బెంగళూర్‌ : కోవిడ్‌-19 మహమ్మారి నేపథ్యంలో తొమ్మిదో తరగతి నుంచి 12వ తరగతి వరకూ సిలబస్‌ను సీబీఎస్‌ఈ తగ్గించిన అనంతరం కర్ణాటక సైతం ఈ దిశగా అడుగులు వేసింది. రాష్ట్ర ప్రభుత్వం నిర్వహించే పాఠశాలల్లో సిలబస్‌ను 30 శాతం తగ్గించే ఉద్దేశంతో పాఠ్య పుస్తకాల నుంచి మైసూర్‌ పాలకులు హైదర్‌ అలీ, టిప్పు సుల్తాన్‌ చాప్టర్‌లను తొలగించింది. విద్యార్ధుల సౌలభ్యం కోసం కర్ణాటక టెక్స్ట్‌బుక్స్‌ సొసైటీ పలు పాఠ్యాంశాలను సిలబస్‌ నుంచి తొలగించింది. మొఘల్‌, రాజ్‌పుత్‌ల చరిత్రకు సంబంధించిన అథ్యాయాలు, జీసస్‌, మహ్మద్‌ ప్రవక్త బోధనల అథ్యాయాలు రద్దుల పద్దులో చేరాయి. కాగా ప్రస్తుత విద్యా సంవత్సరానికే సిలబస్‌ కుదింపు వర్తిస్తుందని అధికారులు పేర్కొన్నారు. ఒకటి నుంచి పదోతరగతి వరకూ సాధారణ విద్యాసంవత్సరంలో 210-220 పనిదినాలు కాగా, ఈ ఏడాది 120-140 పనిదినాలే లక్ష్యంగా సిలబస్‌ను కుదించారు. కాగా తొమ్మిది నుంచి పన్నెండో తరగతి సిలబస్‌ను కుదించే క్రమంలో లౌకికవాదం, పౌరసత్వం, సమాఖ్య వ్యవస్థల వంటి అంశాలను తొలగించాలన్న సీబీఎస్‌ఈ నిర్ణయం వివాదాస్పదమైన విషయం తెలిసిందే. అయితే ఈ అంశాలను సిలబస్‌ క్రమబద్ధీకరణతో లేదా ఎన్‌సీఈఆర్‌టీ ప్రత్యామ్నాయ అకడమిక్‌ కేలండర్‌ ద్వారా కవర్‌ అవుతాయని సీబీఎస్‌ఈ ఆ తర్వాత వివరణ ఇచ్చింది. స్వాతంత్ర్య పోరాటానికి సంబంధించిన చాప్టర్లను ఉద్దేశపూర్వకంగా తొలగిస్తున్నారని కాంగ్రెస్‌ ఆందోళన వ్యక్తం చేస్తోంది. చదవండి : ‘లాక్‌డౌన్‌ పొడిగించినా కరోనా వ్యాప్తి తగ్గలేదు’

నోయిడా:  ఆ క‌వ‌ల‌లిద్ద‌రూ ఒకేలా ఉండ‌ట‌మే కాదు సీబీఎస్ఈ ఫ‌లితాల్లోనూ ఒకే విధ‌మైన మార్కులు సాధించారు. ఢిల్లీ నోయిడాకు చెందిన క‌వ‌ల‌లు మాన్సి, మాన్య చూడ‌టానికి అచ్చుగుద్దిన‌ట్లు ఒకేలా క‌నిపిస్తారు. ఒకే పాఠ‌శాల‌లో చ‌ద‌వ‌డ‌మే కాదు అన్ని స‌బ్జెక్టుల్లోనూ స‌మాన మార్కులు సంపాదించి ఔరా అనిపించా‌రు. జూలై13న విడుద‌లైన సీబీఎస్ఈ 12వ త‌ర‌గ‌తి ఫ‌లితాల్లో ఇద్ద‌రూ 95.8 శాతం స్కోరు సాధించారు. ఇంజ‌నీరింగ్ చ‌ద‌వాల‌న్న‌ది తమ క‌ల అని క‌వ‌లలు పేర్కొన్నారు. సెప్టెంబ‌ర్‌లో జ‌ర‌గ‌నున్న జేఈఈ మొయిన్స్‌కు స‌మాయత్త‌మ‌వుతున్నామ‌ని వివ‌రించారు.  (సీబీఎస్ఈ పదో తరగతి ఫలితాలు విడుదల ) 'మా ఇద్ద‌రి మ‌ధ్య ఎప్పుడూ ఆరోగ్య‌క‌ర‌మైన పోటీనే ఉంటుంది. అంతేకాకుండా మా ఇష్టాలు కూడా వేర్వేరుగా ఉంటాయి. నాకు కెమిస్ట్రీ స‌బ్జెక్ట్‌ అంటే ఇష్టం కాగా మాన్సికి భౌతిక‌శాస్ర్తం మీద మ‌క్కువ‌. ప‌రీక్ష‌ల‌కు ఇద్ద‌రం క‌లిసే ప్రిపేర్ అయ్యాం. యాదృచ్చికంగా జ‌రిగింది కానీ ఇద్ద‌రికీ స‌మానంగా మార్కులు వ‌స్తాయ‌ని అయితే ఊహించ‌లేదు' అని  మాన్య పేర్కొంది. ఈ ఏడాది విడుద‌లైన సీబీఎస్ఈ ఫ‌లితాల్లో 88.79 శాతం ఉత్తీర్ణ‌త న‌మోదైంది. ఇది గ‌త సంవ‌త్స‌రంతో పోలిస్తే 5.38 శాతం పెరిగింది. ఫ‌లితాల్లో అబ్బాయిల కంటే అమ్మాయిలు ముంద‌జ‌లో ఉన్నారు.  ఫలితాల్లో 92.15 శాతం మంది బాలికలు, 86.19 శాతం మంది బాలురు ఉత్తీర్ణత సాధించారు. బాలుర ఉత్తీర్ణత కంటే బాలికల ఉత్తీర్ణత 5.96 శాతం అధికం. 66.67 శాతం ట్రాన్స్‌జెండర్లు ఉత్తీర్ణులు కావడం విశేషం.  (సీబీఎస్‌ఈ ‘12’లో బాలికలదే పైచేయి )

న్యూఢిల్లీ: సీబీఎస్‌ఈ 12వ తరగతి పరీక్ష ఫలితాల్లో బాలురపై బాలికలే పైచేయి సాధించారు. ఈ ఫలితాలను సీబీఎస్‌ఈ సోమవారం ప్రకటించింది. గత ఏడాది కంటే ఈసారి ఉత్తీర్ణత 5.38 శాతం పెరిగింది. కరోనా వైరస్‌ వ్యాప్తి నేపథ్యంలో ఈ ఏడాది మెరిట్‌ లిస్టు ప్రకటించకూడదని బోర్డు భావిస్తున్నట్లు సమాచారం. అలాగే ఉత్తీర్ణత సాధించని వారి మార్కుల లిస్టులో ఫెయిల్‌ బదులు ఎసెన్షియల్‌ రిపీట్‌ అనే పదం చేర్చనున్నారు. 12వ తరగతి ఫలితాల్లో 92.15 శాతం మంది బాలికలు, 86.19 శాతం మంది బాలురు ఉత్తీర్ణత సాధించారు. బాలుర ఉత్తీర్ణత కంటే బాలికల ఉత్తీర్ణత 5.96 శాతం అధికం. 66.67 శాతం ట్రాన్స్‌జెండర్లు ఉత్తీర్ణులు కావడం విశేషం. 2019లో మొత్తం 83.40 శాతం మంది ఉత్తీర్ణులు కాగా, ఈసారి 88.78 శాతం మంది ఉత్తీర్ణులయ్యారు. ఈ ఏడాది 11.92 లక్షల మంది 12వ తరగతి పరీక్షలకు హాజరు కాగా, దాదాపు 1.57 లక్షల మంది విద్యార్థులు 90 శాతానికిపైగా మార్కులు సాధించారు. 38,000 మంది 95 శాతానికిపైగా మార్కులు పొందారు. జవహర్‌ నవోదయ విద్యాలయాల విద్యార్థులు 98.70 శాతం మంతి ఉత్తీర్ణులయ్యారు. కేరళలోని త్రివేండ్రం రీజియన్‌లో అత్యధికంగా 97.67 శాతం మంది ఉత్తీర్ణులయ్యారు.

న్యూఢిల్లీ: విద్యార్థులు ఎంత‌గానో ఎదురు చూస్తున్న సెంట్ర‌ల్ బోర్డ్ ఆఫ్ సెకండ‌రీ ఎడ్యుకేష‌న్‌(సీబీఎస్ఈ) ఇంట‌ర్మీడియ‌ట్ ఫ‌లితాలు వ‌చ్చేశాయి. సీబీఎస్ఈ 12వ త‌ర‌గ‌తి ఫ‌లితాల‌ను సోమ‌వారం అధికారులు విడుద‌ల చేశారు. ఈ ఏడాది 88.78 శాతం ఉత్తీర్ణ‌త న‌మోదైంది. ఇది గ‌తేడాది క‌న్నా 5.38 శాతం ఎక్కువ‌గా కావ‌డం విశేషం. ఫ‌లితాల్లో త్రివేండ్ర‌మ్ 97.67 శాతంతో ప్ర‌భం‌జనం సాగించ‌గా ప‌ట్నా 74.57 శాతం ఉత్తీర్ణ‌త‌తో చివ‌రిస్థానంలో ఉంది. విద్యార్థులు cbse.nic.in సైట్‌లో లాగిన్ అయి ఫ‌లితాలు తెలుసుకోవ‌చ్చు. (సీబీఎస్‌ఈ రద్దయిన పరీక్షలకు.. ప్రతిభ ఆధారంగా మార్కులు) క‌రోనా వైర‌స్ వ్యాప్తి భ‌యంతో సీబీఎస్ఈ ప‌రీక్ష‌లు అర్ధాంతరంగా వాయిదా ప‌డిన విష‌యం తెలిసిందే. 10,12వ త‌ర‌గ‌తి విద్యార్ధి ఇప్ప‌టికే రాసిన ప‌రీక్ష‌ల్లో చూపిన అత్యుత్త‌మ ప్ర‌తిభ ఆధారంగానే ర‌ద్ద‌యిన ప‌రీక్ష‌ల స‌బ్జెక్టుల‌కు మార్కులు నిర్ణ‌యిస్తామ‌ని సీబీఎస్ఈ ప్ర‌క‌టించింది. మూడు స‌బ్జెక్టులు మాత్ర‌మే రాసిన వారికి రెండు సబ్జెక్టుల్లో మార్కులను బట్టి.. ఢిల్లీ అల్ల‌ర్ల కార‌ణంగా 12వ తరగతి ఒకటి, రెండు సబ్జెక్టులు మాత్రమే రాసిన వారికి... రాసిన సబ్జెక్టులు, ఇంటర్నల్‌/ప్రాక్టికల్స్‌లో చూపిన ప్రతిభ ఆధారంగా ఫలితాలను నిర్ణయిస్తామ‌ని సుప్రీంకోర్టుకు తెలిపింది. ఈ మేర‌కు నేడు సెకండియ‌ర్ ఫ‌లితాల‌ను వెల్ల‌డించింది. (సిలబస్‌ నుంచి పౌరసత్వం, నోట్లరద్దు కట్‌) Central Board of Secondary Education (CBSE) Class 12 exam results announced. Overall Pass Percentage is 88.78%. pic.twitter.com/MKswRe5NpA — ANI (@ANI) July 13, 2020

విద్యార్థులపై ప్రభుత్వాలు కరుణ చూపే సందర్భాలు గతంలో చాలా తక్కువుండేవి. ఏవో కొన్ని రాష్ట్రాలు మినహా మిగిలిన ప్రభుత్వాలుగానీ, కేంద్రంగానీ వారి గోడు పట్టించుకున్న దాఖలాలు పెద్దగా లేవు. దేశంలో విద్యను ప్రైవేటుకు విడిచిపెట్టి, కార్పొరేట్‌ పాఠశాలలు, కళాశాలలు దశాబ్దా లుగా భారీ ఫీజులతో పీల్చిపిప్పిచేస్తున్నా నామమాత్రం చర్యలతో పాలకులు పొద్దుపుచ్చారు. ప్రభుత్వ పాఠశాలల్ని, కళాశాలల్ని పరోక్షంగా తూట్లుపొడిచారు. ఈ విధానం ఇప్పట్లో మారుతుందో లేదోగానీ... కరోనా మహమ్మారి పుణ్యమా అని సిలబస్‌లో మాత్రం మూడో వంతు తగ్గిస్తున్నట్టు సీబీఎస్‌ఈ ప్రకటించింది. 2020–21 విద్యా సంవత్సరానికి 9 నుంచి 12వ తరగతి వరకూ వున్న సిలబస్‌లో 30 శాతాన్ని తగ్గిస్తూ బుధవారం ఆ సంస్థ నిర్ణయం తీసుకుంది. దీనిపై ఆ తరగతుల విద్యార్థులు సంబరాలు చేసుకుంటున్నారని సామాజిక మాధ్యమాల్లోని స్పందనలు చెబుతున్నాయి. నీట్, జేఈఈ పరీక్షలకు ప్రశ్న పత్రాలు రూపొందించేటపుడు దీన్ని దృష్టిలో పెట్టుకోవాలన్నదే వారి ఏకైక డిమాండు. ఇతర తరగతులవారు సైతం మా సంగతేమిటని ప్రశ్నిస్తున్నారు. ఆ వయసు పిల్లల్లో అత్యధికులు సిలబస్‌ భారం తగ్గిందంటే వేరే విధంగా స్పందిస్తారని అనుకోనవసరం లేదు. కానీ విపక్షాలు మాత్రం అభ్యంతరం చెబుతున్నాయి. ఈ నిర్ణయంలో దురుద్దేశాలున్నాయని ఆరోపిస్తు న్నాయి. సిలబస్‌ తొలగింపులో కాదు... విపక్షాల పాక్షిక దృక్పథంలోనే దురుద్దేశం వుందని కేంద్ర మానవ వనరుల అభివృద్ధి శాఖ మంత్రి రమేష్‌ పోఖ్రియాల్‌ నిశాంక్‌ వాదన. అందుకాయన కొన్ని కారణాలు చెబుతున్నారు. ఒక్క సామాజిక శాస్త్రాల్లో మాత్రమే కాక సైన్స్, గణితం, ఇంగ్లిష్, హిందీ, హోంసైన్స్, జామెట్రీ వంటి వేర్వేరు సబ్జెక్టుల్లో కూడా సిలబస్‌ తొలగించారని ఆయన వివరణ. సిలబస్‌ తగ్గింపుపై రాజకీయం వద్దని కూడా ఆయన సలహా ఇచ్చారు. కరోనా వైరస్‌ మహమ్మారి కారణంగా తలెత్తిన ప్రత్యేక పరిస్థితుల పర్యవసానంగా 190 సబ్జెక్టుల్లో సిలబస్‌ కుదించామని, ఇది ఈ విద్యా సంవత్సరానికి మాత్రమే పరిమితమని అటు సీబీఎస్‌ఈ చెబుతోంది.  ఈసారికి సిలబస్‌ తగ్గించాలన్న డిమాండు తొలిసారి ఢిల్లీ ఉపముఖ్యమంత్రి మానిష్‌ సిసోడియా నుంచి వచ్చింది. కానీ ఇప్పుడు తొలగించిన అంశాలు చూశాక ఆయనే ఆశ్చర్యపోతున్నారు. అన్నింటి మూలాలు రాజకీయాలతో ముడిపడిన వర్తమానంలో సిలబస్‌ కుదింపు అంశం వివాదం కావడంలో ఆశ్చర్యం లేదు. అన్నింటా సిలబస్‌ కుదించాం కదా అన్న కేంద్రమంత్రి పోఖ్రియాల్‌ వాదన సరైందే కావొచ్చు. కానీ ఇతర సబ్జెక్టులకూ, సామాజిక శాస్త్రాలకూ చాలా వ్యత్యాసం వుంది. పరస్పరం సంఘ ర్షిస్తున్న సిద్ధాంతాలు, భావనలు సమాజంలో అనేకం వుంటాయి. ఏకీభావం కుదిరే అంశాల్లో సైతం భిన్న దృక్పథాలుంటాయి. వాటిని గురించి చర్చించేవి, వివరించేవి, విద్యార్థికి అవగాహన కలిగించేవి సామాజిక శాస్త్రాలు. కనుక సహజంగానే ఆ శాస్త్రాల్లో తొలగించిన సిలబస్‌పై ప్రశ్నలు తలెత్తుతాయి. ఫలానా అంశం కాకుండా ఇదే ఎందుకు తొలగించవలసివచ్చిందన్న సంశయం వస్తుంది. ఆ తొల గింపు వెనకున్న ప్రయోజనాలేమిటన్న ఆరా ఉంటుంది. విపక్షాలను సంతృప్తిపర్చడానికో, మరెవ రికో తలెత్తే అనుమానాలు తీర్చడానికో కాదు... విద్యారంగ నిపుణులనుంచి ఎలాంటి అభ్యంతరం రాకుండా వుండాలంటే సీబీఎస్‌ఈ అయినా, మరెవరైనా సిలబస్‌ తొలగింపు విషయంలో పారదర్శ కంగా వుండాలి. అసలు ఫలానా అంశం లేకపోయినా ఫర్వాలేదనో... తొలగించి తీరాలనో ఏ ప్రాతి పదికన నిర్ణయానికొచ్చారో, అందుకు అనుసరించిన విధానంలోని హేతుబద్ధత ఏమిటో చెప్పాల్సిన బాధ్యత సీబీఎస్‌ఈకి వుంటుంది. సీబీఎస్‌ఈ తొలగించిన పాఠ్యాంశాలు చూస్తే ఆశ్చర్యం కలగడం సహజం. ఉదాహరణకు పద కొండో తరగతిలో ప్రజాస్వామిక హక్కులు, పౌరసత్వం, ఫెడరలిజం, జెండర్, మతం, జాతీయ వాదం, లౌకికవాదం వంటి అంశాలు సిలబస్‌ కుదించాక ఎగిరిపోయాయి. ఇవన్నీ ఏ దేశంలోని ప్రజాస్వామ్య వ్యవస్థకైనా అత్యంత ప్రాథమికమైనవి. మరోవిధంగా చెప్పాలంటే అవి ప్రజాస్వామ్య వ్యవస్థకు పునాదులు. ఈ అంశాల్లో సమాజం వైఖరి ఎలావుందన్నదాన్ని బట్టే ఆ సమాజం ప్రజాస్వామికమైనదా, కాదా అన్నది తేలుతుంది. సామాజిక శాస్త్రాలు చదివే విద్యార్థులు ఆ అంశాల జోలికిపోకుండా ప్రజాస్వామ్యం గురించి ఏం అవగాహన చేసుకుంటారు? పన్నెండో తరగతి సిల బస్‌లో ‘ఇరుగు పొరుగుతో భారత్‌ సంబంధాలు’, సంస్కరణలతో ఆర్థికాభివృద్ధి, సామాజిక ఉద్య మాలు, పెద్దనోట్ల రద్దు వంటి అంశాలను తొలగించారు. మాయమైన ఈ అంశాలపై విద్యార్థులకు అవగాహన కలిగేందుకు అనువుగా ఎన్‌సీఈఆర్‌టీ రూపొందించిన ప్రత్యామ్నాయ విద్యా విషయక క్యాలెండర్‌లో పొందుపరిచారు గనుక ఆందోళన పడొద్దని సీబీఎస్‌ఈ వివరిస్తోంది. కానీ ఈ అంశా లను లోతుగా అధ్యయనం చేయడం, చర్చించడం ఎలా సాధ్యం? ఈ కరోనా కాలం కొత్త అనుభవా లను కలిగిస్తోంది. ఎన్నడూ ఊహించడానికి శక్యంకానివి కళ్లముందు సాక్షాత్కరిస్తున్నాయి. ఒక ప్పుడు మోడరేషన్‌ కింద ఒకటి రెండు మార్కులు కలపాలంటే ఉద్యమాలు చేయాల్సివచ్చేది. కానీ ఇప్పుడు బడికి వెళ్లాల్సిన భారం లేకపోవడం, చదవకుండానే, పరీక్షలు రాయకుండానే విద్యార్థులు ఉత్తీర్ణులు కావడం, ఇప్పటికే ఫెయిలై సప్లిమెంటరీ రాయవలసినవారు కూడా పైతరగతులకు అర్హులు కావడం వంటివన్నీ జరిగిపోతున్నాయి. కేంద్రంలో బీజేపీ నేతృత్వంలోని ఎన్‌డీఏ ప్రభుత్వం ఉంది గనుక, తొలగించిన అంశాలకు సంబంధించి బీజేపీకున్న దృక్పథమేమిటో తెలుసు గనుక సహజం గానే విపక్షాలు ప్రశ్నిస్తున్నాయి. నిరుడు ఏప్రిల్‌లో కూడా సీబీఎస్‌ఈ కుల ఘర్షణలు, ప్రజాస్వామ్యం, ప్రజాస్వామ్యానికి ఎదురయ్యే సవాళ్లు, భిన్నత్వంవంటి అంశాలు తొలగించింది. విద్యార్థులకు సిల బస్‌ భారాన్ని తొలగించాలనుకోవడం ఆహ్వానించదగ్గదే. కానీ ఆ పేరుతో అసలు ఆలోచించే భారాన్నే కుదించాలనుకోవడం మంచిది కాదు. ఈ కుదింపు తరచుగా వివాదాస్పదమవుతున్నది గనుక అందులో పారదర్శకతకు చోటీయడం ఉత్తమం.

న్యూఢిల్లీ: కరోనా కారణంగా విద్యా సంవత్సరం తగ్గించాల్సి రావడంతో సిలబస్‌ను కూడా సీబీఎస్‌ఈ తగ్గించింది. దీనికోసం తొలగించిన అంశాల్లో లౌకికవాదం, పౌరసత్వం, జాతీయ వాదం, నోట్ల రద్దు వంటి అంశాలు. 9 నుంచి 12 తరగతుల వారికి దాదాపు 30 శాతం సిలబస్‌ ను తగ్గిస్తూ తాజా సిలబస్‌ను బుధవారం వెల్లడించింది. ఇందులో పదో తరగతిలో తొలగించిన వాటిలో ప్రజాస్వామ్యం– వైవిధ్యత, లింగం, కులమతాలు, ప్రజాస్వామ్యంలో ఉద్యమాలు, సమస్యలు వంటి అంశాలు ఉన్నాయి. 11వ తరగతిలో సమాఖ్యవిధానం, పౌరసత్వం, జాతీయవాదం, భారతదేశంలో స్థానిక ప్రభుత్వాలు లౌకిక వాదం అనే అంశాలను తొలగించారు. 12వ తరగతిలో భారత్‌తో పాకిస్తాన్, మయన్మార్, బంగ్లాదేశ్, శ్రీలంక, నేపాల్‌ దేశాల సంబంధాలు, భారతదేశ ఆర్థిక అభివృద్ధి, భారత్‌ లో సామాజిక ఉద్యమాలు, పెద్ద నోట్ల రద్దు వంటి అంశాలను తొలగించారు. విద్యార్థులపై భారం పడకుండా ఉండేలా సిలబస్‌ను రూపొందించినట్లు హెచ్చార్డీ మంత్రిత్వ శాఖ తెలిపింది. ఈ సిలబస్‌ నుంచి ఇంటర్నల్‌ పరీక్షల్లోగానీ, సంవత్సరాంతపు పరీక్షల్లోగానీ ప్రశ్నలు రావని సీబీఎస్‌ఈ తెలిపింది. ఈ నిర్ణయాన్ని విపక్షాలు తీవ్రంగా తప్పుబట్టాయి. ఒక్కసారి మాత్రమే..  9 నుంచి 12 తరగతుల వరకూ తగ్గించిన సిలబస్‌ కేవలం ఒక్క విద్యా సంవత్సరానికి (2020–21) మాత్రమేనని సీబీఎస్‌ఈ సెక్రెటరీ అనురాగ్‌ తిపాఠి చెప్పారు. 190 సబ్జెక్టులకు సంబంధించి 30 శాతం సిలబస్‌ తగ్గించామని చెప్పారు. ఏఏ అంశాలను తొలగించారో స్పష్టంగా తెలిసేందుకు పాఠశాలలు ఎన్సీఈఆర్టీ రూపొందించిన క్యాలెండర్‌ను పాటించాలని సూచించారు. తొలగించిన అంశాలకు సంబంధించిన పాఠాలు సిలబస్‌లో ఎక్కడో ఒక చోట ఉండేలా చూసుకున్నామని చెప్పారు.

సాక్షి, హైదరాబాద్‌: పాఠశాల విద్యలోనూ జాతీయ స్థాయిలో 30 శాతం సిలబస్‌ తగ్గింపునకు కసరత్తు చేస్తున్న నేపథ్యంలో రాష్ట్రంలోనూ ఆ దిశగా విద్యాశాఖ యోచిస్తోంది. జూన్‌ 12 నుంచి ప్రారంభమై కొనసాగాల్సిన పాఠశాలలు కరోనా కారణంగా ఇప్పటికీ ప్రారంభం కాలేదు. రోజురోజుకూ పెరుగుతున్న కరోనా కేసులతో వచ్చే నెలలోనూ ప్రారంభమయ్యే పరిస్థితులు కనిపించట్లేదు. ఈ నేపథ్యంలో రాష్ట్రంలోనూ పాఠశాల విద్యలో సిలబస్‌ను 30 శాతం వరకు తగ్గించే విషయమై విద్యాశాఖ ఆలోచిస్తోంది. దీనిపై ఇటీవల ఉన్నత స్థాయి సమావేశం నిర్వహించి చర్చించింది. అయితే జాతీయ స్థాయిలో స్పష్టత వచ్చాక ముందుకు సాగాలన్న అభిప్రాయం వ్యక్తమైనా, సిలబస్‌ కుదింపు అమలు చేయాల్సి వస్తే ఏయే పాఠ్యాంశాలను తొలగించాలి, ఎలా ముందుకెళ్లాలనే అంశాలపై ప్రణాళికలను సిద్ధం చేయాలనే భావనకు వచ్చారు.  ప్రతి సబ్జెక్టులో 30 శాతం  కరోనా కారణంగా సెంట్రల్‌ బోర్డు ఆఫ్‌ సెకండరీ ఎడ్యుకేషన్‌ (సీబీఎస్‌ఈ) తమ పరిధిలోని స్కూళ్లలో 30 శాతం సిలబస్‌ కుదింపునకు ఆదేశాలు జారీచేసింది. ముఖ్యంగా 9 నుంచి 12వ తరగతి వరకు సిలబస్‌ కుదింపునకు చర్యలు చేపట్టింది. మరోవైపు జాతీయ ఉపాధ్యాయ విద్యా మండలి (ఎన్‌సీఈఆర్‌టీ) కూడా పాఠశాలల్లో సిలబస్‌ కుదింపు, అకడమిక్‌ వ్యవహారాలు ఎలా ఉండాలనే దానిపై కసరత్తు చేస్తోంది. ఈ నేపథ్యంలో రాష్ట్ర విద్యాశాఖ తరగతుల వారీగా ఏయే సబ్జెక్టులో ఎంత సిలబస్‌ను తగ్గించవచ్చనే అంశాలపై ప్రణాళికలు రూపొందిస్తోంది. తరగతుల వారీగా ప్రతి సబ్జెక్టులో 30 శాతం వరకు సిలబస్‌ను తగ్గించే ప్రణాళికలపై దృష్టి సారించింది. రాష్ట్ర ప్రభుత్వం తీసుకునే ఏ నిర్ణయానికైనా అనుగుణంగా సిద్ధంగా ఉండేలా విద్యాశాఖ అధికారులు ఏర్పాట్లు చేసుకుంటున్నారు.  సెలవు రోజుల్లోనూ పాఠశాలలు  కరోనా అదుపులోకి వస్తే సెప్టెంబరులో పాఠశాలను ప్రారంభించే అవకాశాలున్నాయి. ఒకవేళ రాకుంటే అక్టోబరు కావచ్చు లేదా ఇంకా ఆలస్యం కావచ్చు. కాబట్టి సిలబస్‌ తగ్గించినా పని దినాలు సర్దుబాటయ్యే పరిస్థితి ఉండదని అధికారులు అంటున్నారు. సెప్టెంబరు నాటికే దాదాపు 70 రోజులకు పైగా పనిదినాలు కోల్పోయినట్టవుతుంది. స్కూళ్ల ప్రారంభం ఇంకా ఆలస్యమైతే ఇంకా పని దినాలు కోల్పోవాల్సి వస్తుంది. కాబట్టి అందుకు అనుగుణంగా సెలవు దినాల్లో బడులను కొనసాగించేలా ప్రణాళికలను సిద్ధం చేసేందుకు విద్యాశాఖ నడుంబిగించింది. రెండో శనివారాలు, వీలైతే ఆదివారాలు, ఇతర పనిదినాల్లోనూ స్కూళ్లను కొనసాగించేలా ప్రణాళికలను రూపొందించడంపై దృష్టి సారించింది.

సాక్షి, న్యూఢిల్లీ: దేశంలో కరోనా కేసులు నమోదైన కొన్ని రోజులకే పాఠశాలలకు సెలవులు ప్రకటించారు. తరువాత దేశంలో కరోనా విజృంభించడంతో లాక్‌డౌన్‌ ఎత్తివేసినప్పటికీ స్కూళ్లు మాత్రం తెరవలేదు. ఈ క్రమంలోనే అన్ని తరగతుల పరీక్షలను రాష్ట్ర ప్రభుత్వాలతో పాటు  కేంద్ర ప్రభుత్వం కూడా  రద్దు చేసింది.   ఈ నేపథ్యంలోనే విద్యార్థులకు ఆన్‌లైన్‌ క్లాసులు నిర్వహిస్తున్నారు. కరోనా కేసులు పెరుగుతుండటంతో ఈ ఏడాది పాఠశాలలు తెరవడం కష్టంగానే  కనిపిస్తోంది. ఈ నేపథ్యంలో వివిధ రాష్ట్రాలు విద్యార్థులపై భారం పడకుండా సిలబస్ తగ్గిస్తున్నాయి. ఈ క్రమంలోనే తాజాగా సీబీఎస్ఈ కూడా 9 నుంచి 12 వ తరగతి వరకు 30 శాతం సిలబస్ తగ్గిస్తున్నట్టు ప్రకటించింది. (ఫేస్‌బుక్‌తో జతకట్టిన సీబీఎస్‌ఈ) ఇది  2020-21 విద్యా సంవత్సరానికి వర్తిస్తుందని కేంద్ర మానవనరుల శాఖ మంత్రి రమేశ్‌ పోఖ్రియాల్‌  మంగళవారం ప్రకటించారు. కరోనా పరిస్థితుల కారణంగా విద్యార్థులు నష్టపోయిన కాలం ఈ నిర్ణయం ద్వారా భర్తీ అవుతుందని ఆయన తెలిపారు. అయితే కుదించిన సిలబస్‌ను కూడా టీచర్లు విద్యార్థులు  చెప్పాలని, అయితే వాటిని పరీక్షలు ఇవ్వబోమని తెలిపారు. సిలబస్‌ కుదింపు విషయంలో  కీలక పాఠ్యాంశాల జోలికి వెళ్లబోవడంలేదని ఆయన స్పష్టం చేశారు. సిలబస్‌ కుదింపునకు సంబంధించి మానవవనరుల శాఖకు ఇప్పటి వరకు 1500 పైగా నిపుణులు సలహాలు ఇచ్చారు. ఢిల్లీ ఉపముఖ్యమంత్రి మనీష్‌ సిసోడియా కూడా విద్యార్ధుల సిలబస్‌ 30 శాతం తగ్గించాలని ప్రభుత్వానికి సూచించారు. (సీబీఎస్‌ఈ రద్దయిన పరీక్షలకు.. ప్రతిభ ఆధారంగా మార్కులు)

న్యూఢిల్లీ: సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌ఈ) సోషల్‌ మీడియా దిగ్గజం ఫేస్‌బుక్‌తో జత కట్టింది. విద్యార్థులకు, అధ్యాపకులకు ‘డిజిటల్‌ సేఫ్టీ, ఆన్‌లైన్‌ వెల్‌బీయింగ్, అగ్‌మెంటెడ్‌ రియాలిటీ’ వంటి వాటిని నేర్పించడానికి ఈ భాగస్వామ్యం ఏర్పడినట్లు కేంద్ర మానవ వనరుల అభివృద్ధి శాఖ మంత్రి రమేశ్‌ నిశాంక్‌ పోఖ్రియాల్‌ ఆదివారం వెల్లడించారు. ఆసక్తి కలిగిన విద్యార్థులు, అధ్యాపకులు దరఖాస్తు చేసుకోవచ్చని సూచించారు.  కనీసం 10 వేల మంది ఇందులో భాగస్వాములవుతారని ఆశిస్తున్నట్లు వెల్లడించారు.   

న్యూఢిల్లీ: కోవిడ్‌–19 మహమ్మారి వ్యాప్తి దృష్ట్యా జూలైలో జరగాల్సిన పరీక్షలను రద్దు చేస్తూ కేంద్ర ప్రభుత్వం, సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌(సీబీఎస్‌ఈ) తీసుకున్న నిర్ణయాన్ని సుప్రీంకోర్టు సమర్థించింది. మిగిలిన పేపర్లకు మార్కులు వేసే సీబీఎస్‌ఈ నాలుగు అంశాల ఫార్ములాకు కూడా న్యాయస్థానం ఆమోదం తెలిపింది. దేశంలో కరోనా వ్యాప్తి తీవ్రంగా ఉన్నందున జూలై 1నుంచి 15వ తేదీల మధ్యన జరగాల్సిన సీబీఎస్‌ఈ పెండింగ్‌ పరీక్షలను రద్దు చేయాలంటూ దాఖలైన పిటిషన్లపై జస్టిస్‌ ఏఎం ఖాన్విల్కర్, జస్టిస్‌ దినేశ్‌ మహేశ్వరి, జస్టిస్‌ సంజయ్‌ ఖన్నాల ధర్మాసనం శుక్రవారం విచారణ చేపట్టింది. కేంద్రం, సీబీఎస్‌ఈ తరఫున సొలిసిటర్‌ జనరల్‌ తుషార్‌ మెహతా వాదనలు వినిపించారు. కోవిడ్‌ మహమ్మారి వ్యాప్తి తీవ్రంగా ఉన్నందున 10, 12వ తరగతి పెండింగ్‌ సబ్జెక్టుల పరీక్షలను రద్దు చేయాలని కేంద్ర ప్రభుత్వం, సీబీఎస్‌ఈ నిర్ణయించాయన్నారు. ఢిల్లీ, మహారాష్ట్ర, తమిళనాడు వంటి రాష్ట్రాలు బోర్డు పరీక్షలు నిర్వహించలేమంటూ అశక్తత వ్యక్తం చేశాయని ఆయన ధర్మాసనానికి తెలిపారు. 10, 12వ తరగతి విద్యార్థులు ఇప్పటికే నిర్వహించిన పరీక్షల్లో చూపిన ప్రతిభ ఆధారంగా ఫలితాలను ప్రకటిస్తారని తెలిపారు. జూలై 15వ తేదీ నాటికి ఫలితాలను వెల్లడిస్తామన్నారు. మిగిలి ఉన్న పరీక్షలకు హాజరు కావడమా లేక ఇప్పటికే హాజరైన పరీక్షల్లో చూపిన ప్రతిభను బట్టి వేసే మార్కులకు అంగీకరించడమా అనే ఆప్షన్‌ను 12వ తరగతి విద్యార్థులకు మాత్రమే ఇస్తున్నామన్నారు.  సీబీఎస్‌ఈ విధానాన్నే అటూఇటుగా తామూ అనుసరిస్తామని ఇండియన్‌ సర్టిఫికెట్‌ ఆఫ్‌ సెకండరీ ఎడ్యుకేషన్‌(ఐసీఎస్‌ఈ) ధర్మాసనానికి నివేదించింది. 10,12వ తరగతి పరీక్షల ఫలితాలను జూలై 15వ తేదీకల్లా ప్రకటిస్తామని ఐసీఎస్‌ఈ తెలిపింది. 10, 12వ తరగతులకు గత పరీక్షల్లో విద్యార్థులు చూపిన ప్రతిభ ఆధారంగానే ఫలితాలు ప్రకటిస్తామని ఐసీఎస్‌ఈ స్పష్టం చేసింది. కరోనా వ్యాప్తి భయంతో సీబీఎస్‌ఈ పరీక్షలు  అర్థంతరంగా వాయిదా పడిన విషయం తెలిసిందే. అత్యుత్తమ సరాసరి మార్కులే ఆధారం 10, 12వ తరగతి విద్యార్థి ఇప్పటికే రాసిన పరీక్షల్లో చూపిన అత్యుత్తమ ప్రతిభ ఆధారంగానే  రద్దయిన పరీక్షల సబ్జెక్టులకు మార్కులు నిర్ణయిస్తామని సీబీఎస్‌ఈ ప్రకటించింది. మూడు కంటే ఎక్కువ సబ్జెక్టుల పరీక్షలు రాసిన వారికి, మూడు పరీక్షల్లో సాధించిన అత్యుత్తమ మార్కుల సరాసరిని పరిగణనలోకి తీసుకుంటామని తెలిపింది. మూడు సబ్జెక్టులు మాత్రమే రాసిన వారికైతే రెండు సబ్జెక్టుల్లో మార్కులను బట్టి మార్కులు వేస్తాయనుంది. ఢిల్లీలో అల్లర్ల కారణంగా 12వ తరగతి ఒకటి, రెండు సబ్జెక్టులు మాత్రమే రాసిన వారికి... రాసిన సబ్జెక్టులు, ఇంటర్నల్‌/ప్రాక్టికల్స్‌లో చూపిన ప్రతిభ ఆధారంగా ఫలితాలను నిర్ణయిస్తారు.  

ఢిల్లీ : కరోనా నేపథ్యంలో ప‌ది, 12వ త‌ర‌గ‌తుల‌కు చెందిన ప‌రీక్ష‌ల‌ను సీబీఎస్ఈ ర‌ద్దు చేసిన సంగతి తెలిసిందే. ఇంటర్నల్‌ అసెస్‌మెంట్‌ ద్వారా ఫ‌లితాల‌ను వెల్ల‌డిస్తామ‌ని సీబీఎస్‌ఈ పేర్కొన్నవిష‌యం తెలిసిందే. తాజాగా సీబీఎస్‌ఈ సమర్పించిన అసెస్‌మెంట్ మార్క్‌ల స్కీమ్‌కు శుక్రవారం సుప్రీంకోర్టు ఆమోదం తెలిపింది. ఇవాళ జ‌స్టిస్ ఏఎం ఖాన్‌విల్క‌ర్‌, దినేశ్ మ‌హేశ్వ‌రి, సంజివ్ ఖ‌న్నాల‌తో కూడిన త్రిస‌భ్య ధ‌ర్మాస‌నం ఈ కేసులో విచార‌ణ చేపట్టింది. సీబీఎస్ఈ కోర్టుకు స‌మ‌ర్పించిన అసెస్‌మెంట్ స్కీమ్‌ను అంగీక‌రించింది. పెండింగ్ ప‌రీక్ష‌లకు ఇంటర్నల్‌ అసెస్‌మెంట్‌ ద్వారా మార్క్‌లు వేసి ఈ ఏడాది జూలై 15వ తేదీలోగా తుది ఫ‌లితాల‌ను సీబీఎస్ఈ బోర్డు రిలీజ్ చేయ‌నున్న‌ది.   ఇప్పటికే పూర్తయిన బోర్డు  పరీక్షల ఫలితాల ఆధారంగా తదుపరి  సబ్జెక్టులకు మార్కులను కేటాయించనుంది. కాగా ఏ పరీక్షలు రాయని విద్యార్థులకు మాత్రం అసెస్‌మెంట్‌, గత ఇంటర్నల్ పరీక్షలు, ప్రాజెక్టుల మూల్యాంకనం ద్వారా మార్కులను కేటాయించనున్నారు. మళ్లీ పరీక్షలు రాయాలనుకునే విద్యార్థులకు కూడా పరీక్షలు రాసే అవకాశాన్ని సీబీఎస్‌ఈ కల్పించింది. ఆప్షనల్‌ పరీక్షలు రాయాలా వద్దా అనేది విద్యార్థులకే వదిలివేసినట్లు సీబీఎస్‌ పేర్కొంది. ఒకవేళ పరిస్థితులు అనుకూలంగా ఉంటే పరీక్షలు రాయాలనుకుంటున్న విద్యార్థులకు సెప్టెంబర్‌లో నిర్వహించే అవకాశముందని సీబీఎస్‌ఈ తెలిపింది. (సీబీఎ‍స్‌ఈ పరీక్షలు రద్దు) సీబీఎస్‌ఈ 12వ తరగతి పరీక్షలు గత ఫిబ్రవరి 15న ప్రారంభం కాగా లాక్‌డౌన్‌ కారణంగా మధ్యలోనే ఆగిపోయాయి.  10వ తరగతి పరీక్షలు కూడా ఫిబ్రవరి 21 నుంచి మార్చి 29 వరకు నిర్వహించాల్సి ఉండగా సగంలోనే నిలిచిపోయాయి. దీంతో జూలైలో మిగిలిపోయిన పరీక్షలను నిర్వహించాలని సీబీఎస్‌ఈ భావించింది. కానీ ప్రస్తుత కరోనా దృష్యా అది సాధ్యం కాదని తెలిసి రద్దు చేయాలని నిర్ణయించింది. ఇంటర్నల్స్‌ ఆధారంగా  ఫలితాలు ప్రకటించేలా బోర్డులను ఆదేశించాలని పలువురు విద్యార్థుల తల్లిదండ్రులు సుప్రీంకోర్టులో పిటిషన్లు వేశారు. ఇదే అంశంపై వివిధ కోర్టుల్లో పెండింగ్‌లో ఉన్న పిటిష‌న్ల‌ను సుప్రీం ధ‌ర్మాస‌నం ర‌ద్దు చేసింది.  కాగా ఐసీఎస్ఈ బోర్డు త‌ర‌పున సుప్రీంలో న్యాయ‌వాది జ‌య‌దీప్ గుప్తా వాదించారు. అసెస్‌మెంట్‌ మార్కుల విధానం సీబీఎస్ఈతో పోలిస్తే ఐసీఎస్ఈలో తేడా ఉంటుంద‌ని, అయితే ప‌ద‌వ త‌ర‌గ‌తి విద్యార్థుల‌కు అన్నీ అనుకూలించిన‌ప్పుడు ప‌రీక్ష రాసే అవ‌కాశం క‌ల్పిస్తామ‌ని ఐసీఎస్ఈ న్యాయ‌వాది కోర్టుకు తెలియ‌జేశారు. కోర్టుకు సీబీఎస్ఈ స‌మ‌ర్పించిన అఫిడ‌విట్ త‌ర‌హాలోనే త‌మ‌ది కూడా ఉంద‌ని, కానీ స‌గ‌టు మార్కుల విధానం ఒక్క‌టే తేడా ఉంద‌ని జ‌య‌దీప్ తెలిపారు.

సాక్షి, న్యూఢిల్లీ: కరోనా నేపథ్యంలో పలు రాష్ట్ర ప్రభుత్వాలు పదవ తరగతితో పాటు డిగ్రీ, పీజీ అన్ని రకాల పరీక్షలు రద్దు చేశాయి. తాజాగా సెంట్రల్‌ బోర్డు ఆఫ్‌ సెకండరీ ఎడ్యుకేషన్‌(సీబీఎస్‌ఈ) కూడా పరీక్షలను రద్దు చేసింది. 10, 12 తరగతి పరీక్షలను రద్దు చేసినట్టు సుప్రీంకోర్టుకు తెలిపింది. జూలై జరగాల్సిన పరీక్షలను సీబీఎస్‌ఈ రద్దు చేసినట్టు సొలిసిటర్‌ జనరల్‌ తుషార్‌ మెహతా సర్వోన్నత న్యాయస్థానానికి గురువారం తెలిపారు. వీటితో పాటు ఐసీఎస్‌ఈ పరీక్షలు రద్దు  చేసినట్టు వెల్లడించారు.  12వ తరగతి విద్యార్థులకు రెండు ఆప్షన్లు ఇచ్చినట్టు కోర్టుకు సీబీఎస్‌ఈ తెలిపింది. పరీక్షకు హాజరవుతారా? ఇంటర్నర్‌ మార్కుల ఆధారంగా సర్టిఫికెట్‌ తీసుకుంటారా అనేది విద్యార్థుల నిర్ణయానికే వదిలిపెట్టినట్టు వెల్లడించింది. సీబీఎస్‌ఈ తీసుకున్న తాజా నిర్ణయాలకు సంబంధించిన నోటిఫికేషన్‌ రేపు(శుక్రవారం) వెలువడనుంది. 

సాక్షి, న్యూఢిల్లీ: సెంట్రల్ బోర్డ్ సెకండరీ ఎడ్యుకేషన్ (సీబీఎస్ఈ) పరిధిలోని పరీక్షల నిర్వహణపై సందిగ్దత కొనసాగుతూనే ఉంది. 10వ తరగతి, 12వ తరగతి మినహా మిగతా తరగతుల వారిని ఇంటర్నల్‌ మార్కుల ఆధారంగా పైతరగతులకు ప్రమోట్‌ చేసింది. కాగా, 12వ తరగతి పరీక్షలను జులై 1-15 మధ్య నిర్వహించేందుకు ఏర్పాట్లు చేస్తున్నారు. అయితే కరోనా వైరస్‌ మహమ్మారి విజృంభిస్తున్న నేపథ్యంలో పరీక్షలను రద్దుచేయాలంటూ విద్యార్థుల తల్లిదండ్రులు సుప్రీంకోర్టులో పిటిషన్‌ దాఖలు చేశారు. దీంతో  10, 12వ తరగతి పరీక్షల రద్దు అవకాశాలను పరిశీలించాలని సీబీఎస్ఈ బోర్డును సుప్రీంకోర్టు ఆదేశించిన విషయం తెలిసిందే. (ఇప్పట్లో విద్యార్థులకు పరీక్షలు వద్దు!) ‘కరోనా కేసులు రోజురోజుకు విపరీతంగా పెరుగుతున్న నేపథ్యంలో పరీక్షలు నిర్వహించడం సాధ్యం కాకపోవచ్చు.  అలా అని ఆలస్యంగా పరీక్షలు నిర్వహించే అవకాశం లేదు. ఎందుకంటే ఇప్పటికే 19 రాష్ట్రాలు ఇంటర్‌ పరీక్షలు నిర్వహించాయి. అంతేకాకుండా అనేక రాష్ట్రాలు పలితాలు కూడా విడుదల చేశాయి. దీంతో కొన్ని యూనివర్సిటీలు కొత్త అడ్మిషన్‌లకు నోటిఫికేషన్‌ విడుదల చేసేందుకు సిద్దంగా ఉన్నాయి. అప్పుడు సీబీఎస్‌ఈ విద్యార్థులు నష్టపోయే అవకాశం ఉంది.  దీంతో 12వ తరగతి విద్యార్థుల పరీక్షలు సైతం రద్దు చేసి ఇంటర్నల్‌ మార్కుల ఆధారంగా పాస్‌ చేసి గ్రేడ్స్‌ ఇవ్వాలని అనుకుంటున్నాం. అయితే మార్కులు/గ్రేడ్స్‌ విషయంలో ఎవరికైన అభ్యంతరాలు ఉంటే వారికి తర్వాత పరీక్షలు నిర్వహించాలనే ఆలోచన కూడా చేస్తున్నాం. రెండు మూడు రోజుల్లో 12వ తరగతి పరీక్షల నిర్వహణపై పూర్తి స్పష్టత వచ్చే అవకాశం ఉంది. ఇక జేఈఈ, నీట్‌ పరీక్షలు నిర్వహించడం ఆలస్యం అవుతుంది కావచ్చు. కానీ ఆ పరీక్షలు రద్దు చేయడం అసాధ్యం’ అని ఓ ప్రభుత్వాధికారి అనధికారికంగా తెలిపారు. (క‌రోనా సోకిన వ్య‌క్తి ఫోన్ చోరీ చేశాడు..)

సాక్షి, న్యూఢిల్లీ : ‘సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్ (సీబీఎస్‌ఈ), కౌన్సిల్‌ ఫర్‌ ఇండియన్‌ స్కూల్‌ సర్టిఫికేట్‌ ఎగ్జామినేషన్‌’ ఆధ్వర్యంలో దేశవ్యాప్తంగా ప్రారంభమైన పది, పన్నెండో తరగతి పరీక్షలు అర్ధాంతరంగా కరోనా వైరస్‌ కారణంగా వాయిదా పడిన విషయం తెల్సిందే. కరోనా వైరస్‌ భారత్‌లో బయట పడిన తర్వాతనే ఈ పరీక్షల షెడ్యూల్‌ ఖరారు చేశారు. మార్చి 25వ తేదీ నుంచి దేశవ్యాప్తంగా లాక్‌డౌన్‌ విధించిన నేపథ్యంలో ఈ పరీక్షలను వాయిదా వేయాల్సి వచ్చింది. అప్పటికే కొన్ని రాష్ట్రాల్లో ఎక్కువ పరీక్షలు పూర్తికాగా, కొన్ని రాష్ట్రాల్లో కొన్ని పరీక్షలే జరిగాయి. కొన్ని రాష్ట్రాల్లో పదవ తరగతి పరీక్షలు మొదలే కాలేదు. మొత్తానికి చూస్తే ఎక్కువ పరీక్షలేమిగిలిపోయాయి.  జూన్‌ 14వ తేదీ నాటికి దేశంలో రోజుకు నమోదవుతున్న కరోనా కేసులు 12 వేలకు చేరుకోగా, దేశంలో మొత్తం కేసులు మూడు లక్షల ముప్పై వేలకు చేరుకుంది. జూలై చివరి నాటికి ఒక్క ఢిల్లీలోనే కరోనా కేసులు ఐదున్నర లక్షలకు చేరుకుంటాయని నిపుణులు తెలియజేస్తున్నారు. ఇలాంటి ఆందోళనకర పరిస్థితుల్లో ఇప్పట్లో విద్యార్థులకు పది, పన్నెండవ తరగతులకు పరీక్షలే నిర్వహించరాదని, నిర్వహించకుండా పాస్‌ చేసినప్పటికీ విద్యాలయాలను ఇప్పట్లో ప్రారంభించరాదని విద్యావేత్తలు, వైద్య నిపుణులు సూచిస్తున్నారు. ఈ విషయమై ఇప్పటికే పలు రాష్ట్రాల్లో పేరెంట్స్‌ కమిటీలు హైకోర్టులను ఆశ్రయించాయి. థర్మో అనలైజర్లు, శానిటైజర్లు, సామాజిక దూరం నిబంధనలు విద్యార్థినీ విద్యార్థుల విషయంలో ఆశించిన ఫలితాలు ఇవ్వలేవని వారంటున్నారు. ఓ తరగతి గదిలో ఒక్కరికి వైరస్‌ సోకినా దాని ప్రభావం ఊహించలేనంతా ప్రమాదకరంగా ఉంటుందని వారు హెచ్చరిస్తున్నారు. 

న్యూఢిల్లీ: పెండింగ్‌లో ఉన్న సీబీఎస్‌ఈ 10, 12 తరగతుల పరీక్షలను దేశవ్యాప్తంగా 15 వేల కేంద్రాల్లో నిర్వహించనున్నట్టు కేంద్ర మానవ వనరుల శాఖ మంత్రి రమేష్‌ పోఖ్రియాల్‌ నిశాంక్‌ వెల్లడించారు. కోవిడ్‌–19 కారణంగా వాయిదా పడిన ఈ పరీక్షలు జూలై 1 నుంచి 15 వరకు జరగనున్నాయి. గతంలో నిర్ణయించినట్టు మూడువేల కేంద్రాల్లో ఈ పరీక్షలు నిర్వహించాల్సి ఉండగా సామాజిక దూరాన్ని పాటించేందుకూ, విద్యార్థులు ఎక్కువ దూరం ప్రయాణించే అవసరం లేకుండా ఉండేందుకూ, అత్యధిక పరీక్ష కేంద్రాలను ఎంపిక చేసినట్టు మంత్రి చెప్పారు. హోంశాఖ నిబంధనల ప్రకారం కోవిడ్‌–19 కంటైన్మెంట్‌ ప్రాంతాల్లో పరీక్షలు నిర్వహించరు. అలాగే విద్యార్థులు పరీక్షా కేంద్రాలకు వెళ్లేందుకు రవాణా సదుపాయాలను కల్పించే బాధ్యత ఆయా రాష్ట్ర ప్రభుత్వాలపై ఉంటుంది. 12వ తరగతి పరీక్షలు దేశవ్యాప్తంగాను,  ఈశాన్య ఢిల్లీలో  వాయిదా పడిన 10వ తరగతి పరీక్షలు ఇప్పుడు జరుగుతాయి. 

న్యూఢిల్లీ: సీబీఎస్‌ఈ 10, 12వ తరగతుల పెండింగ్‌ పరీక్షల విషయంలో కేంద్ర మానవ వనరుల అభివృద్ధి శాఖ కీలక ప్రకటన జారీ చేసింది. విద్యార్థులు బయటి కేంద్రాలకు వెళ్లాల్సిన అవసరం లేదని, తాము ప్రస్తుతం చదువుకుంటున్న స్కూల్‌లోనే ఈ పరీక్షలు రాయొచ్చని సూచించింది. లాక్‌డౌన్‌ కంటే ముందు నిర్వహించిన పరీక్షల జవాబు పత్రాల మూల్యాంకనం ఇప్పటికే మొదలైంది. బోర్డు పరీక్షల ఫలితాలను జూలై మాసాంతం నాటికి వెళ్లడించేలా మానవ వనరుల అభివృద్ధి శాఖ ప్రణాళిక రూపొందిస్తోంది. సీబీఎస్‌ఈ 10, 12వ తరగతుల పరీక్షల నిర్వహణకు లాక్‌డౌన్‌ నిబంధనల నుంచి మినహాయింపు ఇస్తున్నట్లు కేంద్ర హోంశాఖ మంత్రి అమిత్‌ షా చెప్పారు.

న్యూఢిల్లీ: దేశవ్యాప్త లాక్‌డౌన్, ఈశాన్య ఢిల్లీ అల్లర్ల కారణంగా వాయిదా పడిన పరీక్షల షెడ్యూల్‌ను సీబీఎస్‌ఈ(సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌) ప్రకటించింది. నిలిచిపోయిన 10, 12వ తరగతి పరీక్షలను జూలై ఒకటి నుంచి 15వ తేదీ వరకు నిర్వహించనున్నట్లు బోర్డ్‌ సోమవారం తెలిపింది. 10వ తరగతి పరీక్షలు ఈశాన్య ఢిల్లీలో అల్లర్లతో నిలిచిపోగా, 12వ తరగతి పరీక్షలు దేశవ్యాప్త లాక్‌డౌన్‌ అమలు కారణంగా వాయిదా పడ్డాయి. 12వ తరగతి విద్యార్థులకు జూలై 1న హోం సైన్స్, 2న హిందీ, 7న కంప్యూటర్‌ సైన్స్, 9న బిజినెస్‌ స్టడీస్, 10న బయో టెక్నాలజీ, 11న జియోగ్రఫీ, 13వ తేదీన సోషియాలజీ పరీక్షలుంటాయి.

సాక్షి, న్యూఢిల్లీ :  సీబీఎస్ఈ 12వ తరగతి పరీక్షల షెడ్యూల్ విడుదలైంది. జూలై 1 నుంచి 15 వరకు 12వ తరగతి పరీక్షలు జరుగనున్నాయి. పరీక్షలకు ప్రతి ఒక్క విద్యార్థి మాస్క్‌ తప్పనిసరిగా ధరించాలని నిబంధన విధించారు. అలాగే సానిటైజర్స్‌తో రావాలని సీబీఎస్‌ఈ తెలిపింది. అనారోగ్యంగా ఉన్న విద్యార్థులను పరీక్షలకు అనుమతించరని ఓ ప్రకటన విడుదల చేసింది. ఈ మేరకు కేంద్ర మంత్రి రమేష్ పోఖ్రియాల్ ట్విట్టర్ ద్వారా వెల్లడించారు. దేశంలోని 3 వేల సీబీఎస్ఈ పాఠశాలలను మూల్యాంకన కేంద్రాలుగా ఎంపిక చేసినట్లు రమేష్ పోఖ్రియాల్ ప్రకటించారు. దాదాపు 1.5 కోట్లకు పైగా జవాబు పత్రాలను ఉపాధ్యాయులు మూల్యాంకనం చేయనున్నట్లు ఆయన తెలిపారు. కాగా లాక్‌డౌన్‌ కారణంగా షెడ్యూల్‌ ప్రకారం జరగాల్సిన పరీక్షలు తొలుత వాయిదా పడ్డ విషయం తెలిసిందే.

సాక్షి, న్యూఢిల్లీ  : పెండింగ్‌లో ఉన్న పది, పన్నెండో తరగతి సీబీఎస్‌ఈ బోర్డు పరీక్షల తేదీలను మానవవనరుల అభివృద్ధి (హెచ్‌ఆర్‌డీ) శాఖ మంత్రి రమేష్‌ పోక్రియాల్‌ సోమవారం ప్రకటిస్తారు. సీబీఎస్‌ఈ బోర్డు పరీక్షల తేదీలను సోమవారం వెల్లడిస్తామని మంత్రి ట్వీట్‌ చేశారు.  పెండింగ్‌లో ఉన్న సబ్జెక్టులకు మాత్రమే పరీక్షలు జరుగుతాయని, ఇప్పటికే ముగిసిన పరీక్షలను తిరిగి నిర్వహించబోమని మంత్రి వివరణ ఇచ్చారు. హెచ్‌ఆర్‌డీ మంత్రి పరీక్షల తేదీలను ప్రకటించనుండగా, సీబీఎస్‌ఈ వెబ్‌సైట్‌లో పరీక్షలకు సంబందించి పూర్తి వివరాలను పొందుపరుస్తారు. కాగా సీబీఎస్‌ఈ పెండింగ్‌ పరీక్షలు  జులై 1 నుంచి జులై 15 మధ్య జరుగుతాయని గతంలో హెచ్‌ఆర్‌డీ మంత్రి పేర్కొన్న సంగతి తెలిసిందే. మరోవైపు పరీక్షలకు సన్నద్ధమయ్యేందుకు విద్యార్ధులకు తగినంత సమయం ఇచ్చేలా షెడ్యూల్‌ను ప్రకటిస్తామని సీబీఎస్‌ఈ స్పష్టం చేసింది. చదవండి : ఫెయిలైన వారికి సీబీఎస్‌ఈ మరో చాన్స్‌

న్యూఢిల్లీ: పాఠశాల స్థాయి 9, 11వ తరగతుల పరీక్షల్లో ఫెయిలైన విద్యార్థులకు మరో అవకాశం కల్పించనున్నట్లు సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌ఈ) తెలిపింది. ‘విద్యార్థులు ఆన్‌లైన్‌ లేదా ఆఫ్‌లైన్‌లో ఈ పరీక్షలకు హాజరుకావచ్చు. కోవిడ్‌ సంక్షోభం దృష్ట్యా ప్రస్తుత సంవత్సరానికి మాత్రమే వర్తించేలా, విద్యార్థులు తమ ప్రతిభా పాటవాలను మెరుగు పరుచుకునేందుకు ఈ మేరకు నిర్ణయం తీసుకున్నాం.’ అని గురువారం సీబీఎస్‌ఈ ప్రకటించింది. ఇప్పటికే పరీక్షలు రాసిన, ఫలితాలు వెలువడిన, ఇప్పటి వరకు పరీక్షలు రాయని, అన్ని సబ్జెక్టుల వారికి ఈ వెసులుబాటు వర్తిస్తుందని సీబీఎస్‌ఈ పరీక్షల కంట్రోలర్‌ సన్యమ్‌ భరద్వాజ్‌ తెలిపారు. ఈ పరీక్షలో ఫలితాల ప్రాతిపదికన విద్యార్థులను పై తరగతులకు పంపవచ్చని పాఠశాలల యాజమాన్యాలకు తెలిపారు. పరీక్షలకు ప్రిపేర్‌ అయ్యేలా విద్యార్థులకు తగిన విధంగా సమయం ఇవ్వాలన్నారు. వాయిదాపడిన సీబీఎస్‌ఈ 10, 12వ తరగతుల పరీక్షలను జూలై ఒకటో తేదీ నుంచి నిర్వహించనున్నట్లు ఇప్పటికే బోర్డు ప్రకటించింది. ప్రతిభతో సంబంధం లేకుండా 8వ తరగతి వరకు విద్యార్థులందరినీ పై తరగతులకు ప్రమోట్‌ చేస్తున్నట్లు గత నెలలో సీబీఎస్‌ఈ ప్రకటించడం తెల్సిందే. ‘పరీక్షలు సరిగా రాయలేకపోయిన విద్యార్థులు మరింత నిరుత్సాహానికి గురవడం సహజం. అందుకే, వారి ఆందోళనను పోగొట్టి, మానసిక స్థైర్యం కల్పించేందుకు ప్రయత్నిస్తున్నాం’ అని భరద్వాజ్‌ తెలిపారు.

సాక్షి, అమరావతి: కరోనా వైరస్‌ నేపథ్యంలో తమ పబ్లిక్‌ పరీక్షల సమాధాన పత్రాల మూల్యాంకన విధానంలో కేంద్ర మానవవనరుల అభివృద్ధి మంత్రిత్వ శాఖ మార్పులు చేసింది. ఒకేచోట ఎగ్జామినర్లందరినీ కూర్చోబెట్టి మూల్యాంకనాన్ని చేయించే బదులు, వాటిని టీచర్లకిచ్చి వారి ఇళ్ల వద్దే మూల్యాంకనం చేయించేలా ఏర్పాట్లు చేయాలని ఆ శాఖ పరిధిలోని కేంద్రీయ సెకండరీ ఎడ్యుకేషన్‌ బోర్డు (సీబీఎస్‌ఈ) నిర్ణయించింది. దేశవ్యాప్తంగా నిర్వహించే 2020 పరీక్షలకు సంబంధించిన సమాధాన పత్రాల మూల్యాంకనాన్ని టీచర్ల ఇళ్ల వద్దే చేయించనుంది.   – సీబీఎస్‌ఈ పదో తరగతిలో మిగిలి ఉన్న పేపర్లకు, 12 తరగతుల పరీక్షలకు సంబంధించి ఇటీవలే సీబీఎస్‌ఈ షెడ్యూల్‌ విడుదల చేసిన సంగతి తెలిసిందే.. జూలై ఒకటో తేదీ నుంచి 12 వరకు ఇవి జరుగుతాయి.  – ఈ పరీక్షల కోసం బోర్డు గతంలో టెన్త్‌కు 5,376 సెంటర్లు, 12వ తరగతికి 4,983 సెంటర్లను ఏర్పాటుచేసింది.  – ఈ పరీక్షలకు దేశవ్యాప్తంగా దాదాపు 30 లక్షల మంది హాజరవుతున్నారు. – పరీక్షలు రాసేటప్పుడు భౌతిక దూరం పాటించాల్సి ఉన్నందున పరీక్ష కేంద్రాల సంఖ్యలో మార్పులు జరగనున్నాయి. –  వీటి సమాధాన పత్రాలను టీచర్లతో వారి ఇళ్ల వద్దే మూల్యాంకనం చేయించేలా చర్యలు చేపట్టినట్టు కేంద్ర మానవవనరుల అభివృద్ధి శాఖ మంత్రి రమేష్‌పోఖ్రియాల్‌ నిశాంక్‌ ఆదివారం మీడియాతో చెప్పారు.  – ఆయా విద్యార్థులు ఎంచుకున్న సబ్జెక్టులను అనుసరించి మొత్తం 1.50 కోట్ల పరీక్ష పత్రాలను ఎగ్జామినర్ల ద్వారా ఇళ్ల వద్దే దిద్దించాల్సి ఉంటుంది. 

న్యూఢిల్లీ: సీబీఎస్‌ఈ 10, 12వ తరగతుల బోర్డు పరీక్షల జవాబు పత్రాలను ఉపాధ్యాయులు తమ ఇళ్లలోనే మూల్యాంకనం చేయవచ్చని కేంద్ర మానవ వనరుల అభివృద్ధి శాఖ మంత్రి రమేష్‌ పోఖ్రియాల్‌ నిశాంక్‌ శనివారం చెప్పారు. ఈ జవాబు పత్రాలను టీచర్లకు అందజేయడానికి 3 వేల పాఠశాలలను గుర్తించామని తెలిపారు. ఇప్పటికే  నిర్వహించిన పరీక్షలకు సంబంధించిన 1.5 కోట్ల ఆన్సర్‌ షీట్లను టీచర్లకు అందజేస్తామన్నారు. ఆదివారం నుంచి ప్రారంభమయ్యే మూల్యాంకనాన్ని 50 రోజుల్లోగా పూర్తి చేస్తామన్నారు. సీబీఎస్‌ఈ బోర్డు పరీక్షలు జూలై 1 నుంచి 15వ తేదీ వరకు జరగనున్నాయి.

న్యూఢిల్లీ: లాక్‌డౌన్‌ కారణంగా వాయిదాపడిన సీబీఎస్‌ఈ 10, 12వ తరగతుల పరీక్షలను జూలై 1 నుంచి 15 వరకు నిర్వహించనున్నట్టు కేంద్ర మానవ వనరుల శాఖామంత్రి రమేశ్‌ పోఖ్రియాల్‌ నిశాంక్‌ ప్రకటించారు. ఇంజనీరింగ్‌ ఎంట్రన్స్, జూలై 18 నుంచి 23 వరకు జరగనున్న జేఈఈ మెయిన్స్, జూలై 26న జరగనున్న నీట్‌ కన్నా ముందుగానే సీబీఎస్‌ఈ వాయిదాపడిన పరీక్షలను నిర్వహించాలన్న లక్ష్యంతో ఈ తేదీలను నిర్ణయించారు. లాక్‌డౌన్‌తో వాయిదా పడిన 12వ తరగతి పరీక్షలు దేశవ్యాప్తంగా నిర్వహించాల్సి ఉండగా, అల్లర్ల కారణంగా ఈశాన్య ఢిల్లీలో వాయిదా పడిన 10వ తరగతి పరీక్షలను ఇప్పుడు నిర్వహిస్తామని తెలిపారు. షెడ్యూల్‌ వచ్చేవారం ప్రకటిస్తామన్నారు.  జవాబు పత్రాల మూల్యాంకనం ఉపాధ్యాయుల ఇళ్ళనుంచి జరిపే అవకాశాన్ని పరిశీలిస్తున్నామన్నారు. ఐఐటీ, జేఈఈ అడ్వాన్స్‌డ్‌ మెరిట్‌ లిస్ట్‌ ప్రకటించడానికి ముందే, ఆగష్టు చివరికి 12వ తరగతి రిజల్ట్సును ప్రకటించేందుకు యత్నిస్తున్నట్టు వెల్లడించారు. 

సాక్షి, న్యూఢిల్లీ : పెండింగ్‌లో ఉన్న పది, పన్నెండో తరగతి బోర్డు పరీక్షలను సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌ఈ) జులైలో నిర్వహిస్తుందని వెల్లడించింది. ఈ తరగతులకు సంబంధించి పెండింగ్‌లో ఉన్న సబ్జెక్టుల పరీక్షలను సీబీఎస్‌ఈ జులై 1 నుంచి  15 వరకూ నిర్వహిస్తుందని మానవ వనరుల అభివృద్ధి (హెచ్‌ఆర్‌డీ) మంత్రిత్వ శాఖ తెలిపింది. కాగా అంతకుమందు విద్యార్ధులతో లైవ్‌లో ముచ్చటించిన హెచ్‌ఆర్‌డీ మంత్రి రమేష్‌ పోఖ్రియాల్‌ పది, పన్నెండో తరగతి పరీక్షలపై సీబీఎస్‌ఈ ఓ నిర్ణయం తీసుకుంటుందని చెప్పారు. ఇదే సమావేశంలో జేఈఈ మెయిన్‌, నీట్‌ పరీక్షల షెడ్యూల్‌ను మంత్రి ప్రకటించారు. ఈ ఎంట్రన్స్‌ పరీక్షలు జులై ద్వితీయార్ధంలో జరుగుతాయని తెలిపారు. కాగా పెండింగ్‌లో ఉన్న పది, పన్నెండో తరగతి పరీక్షలను రద్దు చేయలేదని, వాటిని నిర్వహిస్తామని సీబీఎస్‌ఈ ఇటీవల వివరణ ఇచ్చింది. పరీక్షల నిర్వహణకు ముందు విద్యార్ధులకు ప్రిపరేషన్‌ కోసం తగినంత సమయం ఇస్తామని స్పష్టం చేసింది. చదవండి : పెండింగ్‌లో ఉన్న పరీక్షలు నిర్వహిస్తాం

న్యూఢిల్లీ: పాఠశాలలు, కళాశాలలు పునఃప్రారంభమయ్యాక విద్యార్థుల రక్షణకోసం చేపట్టాల్సిన చర్యలపై మానవ వనరుల మంత్రిత్వ శాఖ తాజాగా మార్గదర్శకాలను విడుదల చేసింది. పాఠశాలల్లో ఉదయపు అసెంబ్లీలను రద్దు చేయడం. క్రీడాకార్యకలాపాలను నిలిపివేయడం, స్కూల్‌ బస్సులకు నిబంధనలను తయారుచేయడం, స్కూల్‌ యూనిఫామ్‌లో మాస్కులను తప్పనిసరి చేయడం. మరుగుదొడ్లు వినియోగించడంలో పాటించాల్సిన నియమాలూ, క్యాంటీన్ల నిర్వహణలో తీసుకోవాల్సిన జాగ్రత్తలు విద్యాసంస్థల భవనాలను క్రమం తప్పకుండా డిస్‌ఇన్ఫెక్ట్‌ చేయడం లాంటి కీలకమైన విషయాలు ఈ మార్గదర్శకాల్లో ఉన్నాయి. ఇప్పటికే ఇండియన్‌ ఇనిస్టిట్యూట్‌ ఆఫ్‌ టెక్నాలజీ లాంటి కొన్ని విద్యాసంస్థల్లో భౌతిక దూరం పాటించేందుకూ, విజిటర్స్‌ని పరిమితం చేసేందుకూ, షిఫ్ట్‌ల విధానంలో తరగతులు, లాబొరేటరీల సమయాల్లో మార్పు చేయడానికి అధికారులు ప్రయత్నిస్తున్నారు. ఆన్‌లైన్‌ పరీక్షలు, పోటీ పరీక్షల నిర్వహణలో కూడా రక్షణ చర్యలు చేపట్టాలని ఆ మార్గదర్శకాల్లో పేర్కొన్నారు. నూతన విద్యార్థులకు సెప్టెంబర్‌ నుంచి, సీనియర్‌ విద్యార్థులకు ఆగస్టు నుంచి తరగతులు ప్రారంభించనున్నటు యూజీసీ  ప్రకటించింది. సెమిస్టర్‌ పరీక్షలను ఆన్‌లైన్‌లో కానీ, నేరుగా గానీ జూలై నెలలో నిర్వహించుకోవచ్చని యూజీసీ సిఫార్సు చేసింది. పది, పన్నెండు తరగతులలో మిగిలిన సబ్జెక్టులకు పరీక్షలను త్వరలోనే నిర్వహించనున్నట్టు సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌సీ) తెలిపింది.

న్యూఢిల్లీ: లాక్‌డౌన్‌ కారణంగా పెండింగ్‌లో పడిన 10, 12వ తరగతుల బోర్డు పరీక్షలను కచ్చితంగా నిర్వహిస్తామని సీబీఎస్‌ఈ ఎగ్జామినేషన్స్‌ కంట్రోలర్‌ సాన్యం భరద్వాజ్‌బుధవారం చెప్పారు. లాక్‌డౌన్‌ కంటే ముందు కొన్ని సబ్జెక్టుల పరీక్షలు నిర్వహించారు. ఆయా జవాబు పత్రాల మూల్యాంకనం ప్రారంభించాలని కేంద్ర మానవ వనరుల అభివృద్ధి శాఖ ఆదేశించిన సంగతి తెలిసిందే. ఈ నేపథ్యంలో విద్యార్థులు అండర్‌ గ్రాడ్యుయేట్‌ కోర్సుల్లో ప్రవేశించడానికి వీలుగా అత్యంత ముఖ్యమైన 29 సబ్జెక్టుల పరీక్షలు నిర్వహించేందుకు సీబీఎస్‌ఈ సన్నద్ధమవుతోంది. ఇంకా 40కిపైగా సబ్జెక్టులు పెండింగ్‌లో ఉండగా, 29 సబ్జెక్టుల పరీక్షలు నిర్వహించాలని నిర్ణయించారు. పెండింగ్‌ పరీక్షలు ఎప్పటినుంచి జరుగుతాయన్న దానిపై విద్యార్థులకు 10 రోజుల ముందే నోటీసు ఇస్తామని భరద్వాజ్‌ తెలిపారు. 

సాక్షి, న్యూఢిల్లీ : పదో తరగతి పెండింగ్‌ సబ్జెక్టు పరీక్షలపై నెలకొన్న గందరగోళానికి సీబీఎస్‌ఈ తెరదించింది. పది, పన్నెండో తరగతి పెండింగ్‌లో ఉన్న పరీక్షలు నిర్వహించనందున ఇంటర్నల్‌ మార్కుల ఆధారంగా విద్యార్ధులను ప్రమోట్‌ చేయాలని ఢిల్లీ డిప్యూటీ సీఎం మనీష్‌ సిసోడియా కోరుతూ కేంద్ర మానవ వనరుల అభివృద్ధి మంత్రిత్వ శాఖ జోక్యం చేసుకోవాలని పేర్కొనడంతో అసలు ఈ పరీక్షలు రద్దయ్యాయా లేదా అనే గందరగోళం ఏర్పడింది. మరోవైపు పెండింగ్‌లో ఉన్న పదవ తరగతి మైనర్‌ సబ్జెక్టుల పరీక్షలు రద్దవుతాయని సీబీఎస్‌ఈ కార్యదర్శి అనురాగ్‌ త్రిపాఠి పేర్కొన్నారు. రద్దు చేసినా విద్యార్థుల కెరీర్‌పై ఎలాంటి ప్రభావం చూపని మైనర్‌ సబ్జెక్టుల పరీక్షలనే రద్దు చేసినట్టు సీబీఎస్‌ఈ బుధవారం జారీ చేసిన ప్రకటనలో పేర్కొంది. ఇక పెండింగ్‌లో ఉన్న పదో తరగతి ప్రధాన సబ్జెక్టుల పరీక్షలను బోర్డు నిర్వహిస్తుందని స్పష్టం చేసింది. బోర్డు పరీక్షల నిర్వహణకు సంబంధించి ఏప్రిల్‌ 1న జారీ చేసిన ప్రకటనలో ఎలాంటి మార్పూ లేదని సీబీఎస్‌ఈ పేర్కొంది. ఢిల్లీ అల్లర్లతో అక్కడ వాయిదా పడిన ప్రధాన పేపర్ల పరీక్షలను లాక్‌డౌన్‌ ఎత్తివేసిన తర్వాత నిర్వహిస్తామని తెలిపింది. పరీక్షలు ప్రారంభమయ్యే పది రోజుల ముందుగానే అందరకి పరీక్షల వివరాలను తెలియచేస్తామని పేర్కొంది. కాగా పన్నెండో తరగతి పెండింగ్‌ పరీక్షల గురించి బోర్డు ప్రస్తావించకపోవడం గమనార్హం. చదవండి : సీబీఎస్‌ఈ సిలబస్‌ హేతుబద్ధీకరణ 

న్యూఢిల్లీ :  పెండింగ్‌లో ఉన్న టెన్త్  ప‌రీక్ష‌ల‌న్నింటిని ర‌ద్దు చేస్తూ  సీబీఎస్‌ఈ ఇటీవ‌ల నిర్ణ‌యం తీసుకున్న సంగ‌తి తెలిసిందే. అయితే సీబీఎస్ఈ ప‌రిధిలోని ప్ల‌స్‌టూ (12 వ త‌ర‌గ‌తి) పరీక్ష‌ల‌ను ర‌ద్దుచేసే ఆలోచ‌న ఇప్పుడు  లేద‌ని, దీనిపై త్వ‌ర‌లో నిర్ణ‌యం తీసుకుంటామ‌ని సీబీఎస్ఈ కార్య‌ద‌ర్శి అనురాగ్ త్రిపాఠి వెల్ల‌డించారు. క‌రోనాకు వ్య‌తిరేకంగా ప్ర‌పంచం మొత్తం పోరాడుతుంద‌ని, దానికి సీబీఎస్ఈ కూడా అతీతం కాద‌ని అన్నారు. త‌ల్లిదండ్రులు సంయ‌మ‌నం పాటించాల‌ని కోరారు. ప‌రిస్థితి మెరుగుప‌డ్డాక పరీక్ష‌ల గురించి వెల్ల‌డిస్తామ‌ని, అప్ప‌టివ‌ర‌కు ఓపిక‌తో ఉండాల్సింగా పేర్కొన్నారు.   (కోవిడ్‌-19 ఎఫెక్ట్‌ : టెన్త్‌ పెండింగ్‌ పరీక్షలు రద్దు) అంతేకాకుండా పెండింగ్‌లో ఉన్న టెన్త్ ప‌రీక్ష‌లు ర‌ద్దు చేసినందున‌, వారి ఇంట‌ర్న‌ల్ మార్కులు, మ‌రికొన్ని అంశాల ఆధారంగా త‌ర్వాతి త‌ర‌గ‌తుల‌కు ప్ర‌మోట్ చేయ‌బ‌డ‌తార‌ని స్ప‌ష్టం చేశారు. అయితే క‌రోనా సంక్షోభ ప‌రిస్థితుల్లో ప‌రీక్ష‌లు నిర్వ‌హించ‌డం సాధ్యం కానందున విద్యార్థుల ప‌నితీరు, ప్రీవియస్ మార్కుల‌ను దృష్టిలో ఉంచుకొని 10, 12వ త‌ర‌గ‌తి విద్యార్థుల‌ను ప్ర‌మోట్ చేయాల‌ని ఢిల్లీ ఉప‌ ముఖ్య‌మంత్రి మ‌నీష్ సినోడియా సూచించారు. ఈ విష‌యంలో మాన‌వ వ‌న‌రుల అభివృద్ది శాఖ మంత్రి జోక్యం చేసుకోవాల‌ని కోరారు.  1. CBSE की 10 व 12वीं की बची हुई परीक्षाएँ कराना अभी सम्भव नहीं होगा अतः internal exams के आधार पर ही बच्चों को पास किया जाय जैसा कि 9 वीं और 11वीं के बच्चों को पास किया गया है. 2/4 — Manish Sisodia (@msisodia) April 28, 2020

సాక్షి, న్యూఢిల్లీ : కరోనా మహమ్మారి కట్టడికి దేశవ్యాప్తంగా లాక్‌డౌన్‌ అమల్లో ఉన్న క్రమంలో సీబీఎస్‌ఈ కీలక నిర్ణయం తీసుకుంది. పెండింగ్‌లో ఉన్న టెన్త్‌ పరీక్షలను రద్దు చేస్తున్నట్టు సీబీఎస్‌ఈ ప్రకటించింది. పెండింగ్‌లో ఉన్న సబ్జెక్టులకు పరీక్షలు నిర్వహించబోమని బోర్డు స్పష్టం చేసింది. కోవిడ్‌-19 వ్యాప్తి నేపథ్యంలో నెలకొన్న పరిస్థితిని నిశితంగా పరిశీలించిన మీదట ఈ నిర్ణయం తీసుకున్నట్టు అధికారులు పేర్కొన్నారు. కాగా పది, పన్నెండో తరగతి పరీక్షలను పూర్తిగా రద్దు చేస్తారని గతంలో వచ్చిన వార్తలను సీబీఎస్‌ఈ తోసిపుచ్చింది. పరీక్షలను పూర్తిగా రద్దు చేసే అంశంపై తుది నిర్ణయం తీసుకోలేదని గతంలో ప్రకటించిన సీబీఎస్‌ఈ బోర్డు తాజాగా పదో తరగతి పెండింగ్‌ పరీక్షలను రద్దు చేస్తున్నట్టు పేర్కొంది. చదవండి : సీబీఎస్‌ఈ సిలబస్‌ హేతుబద్ధీకరణ 

న్యూఢిల్లీ: లాక్‌డౌన్‌ కారణంగా క్లాసులను కోల్పోయిన విద్యార్థుల కోసం సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌ఈ) సిలబస్‌ను హేతుబద్ధం చేసేందుకు సిద్ధమైంది. 9 నుంచి 12 తరగతుల విద్యార్థుల కోసం రానున్న విద్యాసంవత్సరంలో ఈ మేరకు మార్పులకు అవకాశం ఉంది. లాక్‌డౌన్‌ కారణంగా విద్యార్థులు నష్టపోయిన కాలాన్ని, పర్యవసానాలను బోర్డు అంచనా వేస్తోంది. 1–5 తరగతులకు కొత్త కేలండర్‌ను నేషనల్‌ కౌన్సిల్‌ ఫర్‌ ఎడ్యుకేషనల్‌ రీసెర్చ్‌ అండ్‌ ట్రైనింగ్‌ (ఎన్‌సీఈఆర్టీ) ఇప్పటికే ప్రకటించిన విషయం తెలిసిందే. ఈ విధానాన్నే పై తరగతులకు కూడా వర్తించే దిశగా చర్యలు చేపడుతోంది. 1 నుంచి 8 తరగతులకు ఎన్సీఈఆర్టీ కొత్త విద్యా సంవత్సర కేలండర్‌ ను విడుదల చేసినట్లే సీబీఎస్‌ఈ కూడా 9 నుంచి 12 తరగతుల వారికి సిలబస్‌ను హేతుబద్ధం చేసే పనిలో ఉందని బోర్డులోని ఓ సీనియర్‌ అధికారి తెలిపారు. అయితే పరీక్షలు ఎప్పుడు ఉంటాయో ఇప్పుడే చెప్పడం కష్టమని, కనీసం 10 రోజుల ముందే విద్యార్థులకు సమాచారం అందుతుందని తెలిపారు. 

న్యూఢిల్లీ: కరోనా లాక్‌డౌన్‌ నేపథ్యంలో విద్యార్థులంతా ఇళ్లకే పరిమితమయ్యారు. వైరస్‌ భయాలతో తల్లిదండ్రులు పిల్లల్ని కంటికి రెప్పలా కాచుకుని ఉంటున్నారు. అయితే, విద్య అంటే కేవలం తరగతి గదుల్లోనే అనే ఆలోచనల నుంచి బయటపడాలని సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌ఈ) చైర్మన్‌ అనిత కార్వాల్‌ అన్నారు. ‘స్కూళ్లోనే విద్యాభ్యాసం’ విధానం నుంచి ‘స్కూల్‌- ఇల్లు సహకారంతో విద్యాభ్యాసం’ వైపునకు మళ్లాల్సిన సమయం వచ్చిందని ఆమె దేశవ్యాప్తంగా పాఠశాల ప్రిన్సిపాళ్లకు రాసిన లేఖలో పేర్కొన్నారు. లాక్‌డౌన్‌ కాలాన్ని ఒక చాలెంజ్‌గా తీసుకుని.. ఫ్యామిలీతో ఉంటూనే విద్యార్థులు జీవితానికి అవసరమైన పాఠాలు నేర్చుకునే దిశగా కొత్త మార్గాలు అన్వేషించాలని ఆమె పేర్కొన్నారు. మానవ సంబంధాలు, ప్రకృతి గొప్పదనం గురించి పిల్లలకు చెప్పాలని అన్నారు. అకడెమిక్‌ లక్ష్యాలైన పాఠ్యాంశాల బోధన, ఆన్‌లైన్‌ క్లాసులతోపాటు సంస్కృతి, వాతావరణ మార్పులపై బోధించాలని స్కూల్‌ ప్రిన్సిపాళ్లకు సూచించారు. స్వీయ అభ్యాసం, పరిశోధన అలవాట్లు పెంపొందిచాలని అన్నారు. ముఖ్యంగా 5 నుంచి 12వ తరగతి విద్యార్థులపై ఫోకస్‌ పెట్టాలని చెప్పారు. ఇక పిల్లలకు కుటుంబ సభ్యులు ప్రస్తుత విపత్కర పరిస్థితులతోపాటు.. భవిష్యత్‌లో ఎదుర్కోబోయే సవాళ్లపై అవగాహన కల్పించాలని చెప్పారు. ప్రతి ఇంటిలో కిచెన్‌ ఒక ల్యాబ్‌ వంటిదని,  తల్లిదండ్రులు పిల్లలను వంట తయారు చేయడంలో భాగం చేయాలని అన్నారు.

సాక్షి, హైదరాబాద్‌: విద్యార్థుల్లో గణిత నైపుణ్యాలను మరింతగా పెంచేందుకు 11వ తరగతిలో అప్‌లైడ్‌ మేథమెటిక్స్‌ను ఐశ్చిక (ఎలక్టివ్‌) సబ్జెక్టుగా సీబీఎస్‌ఈ అందుబాటులోకి తీసుకువచ్చింది. ఇప్పటివరకు స్కిల్‌ ఎలక్టివ్‌గా ఉన్న ఈ సబ్జెక్టును ఇకపై అకడమిక్‌ సబ్జెక్టుగా అమలు చేసేలా చర్యలు చేపట్టింది. 2020–21 విద్యా సంవత్సరం నుంచే దీనిని అమలు చేసేలా ఆదేశాలు జారీ చేసింది. విద్యార్థులకు భవిష్యత్తులో మేథమెటిక్స్‌ సంబంధ అంశాల్లో అవసరమైన నైఫుణ్యాలను 11వ తరగతిలోనే నేర్పించేలా దీనిని అందుబాటులోకి తీసుకువచ్చింది. విద్యార్థులందరికీ ఇది తప్పనిసరి సబ్జెక్టుగా కాకుండా, ఇష్టమైన విద్యార్థులే దీనిని ఎంచుకునేలా ఏర్పాట్లు చేసింది. అధ్యాపకులు, మౌలిక సదుపాయాలు కలిగిన అనుబంధ పాఠశాలలు దీనిని అమలు చేసేలా చర్యలు చేపట్టినట్లు సీబీఎస్‌ఈ వెల్లడించింది. అయితే 11వ తరగతిలో స్కిల్‌ ఎలక్టివ్‌ సబ్జెక్టుగా అప్‌లైడ్‌ మేథమెటిక్స్‌ను ఎంచుకున్న విద్యార్థులు 12వ తరగతిలో అకడమిక్‌ సబ్జెక్టుగా ఎంచుకోవచ్చని పేర్కొంది. అలాగే ఇకపై ఇది స్కిల్‌ ఎలక్టివ్‌ సబ్జెక్టుగా ఉండబోదని స్పష్టం చేసింది.  

న్యూఢిల్లీ: సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌ఈ) 10, 12 తరగతులకు సంబంధించిన పరీక్షల వివరాలను కేంద్ర మానవ వనరుల అభివృద్ధి శాఖ మంత్రి రమేశ్‌ పోఖ్రియాల్‌ నిశాంక్‌ బుధవారం వెల్లడించారు. ఆయా తరగతుల్లో అతి ముఖ్యమైన 29 సబ్జెక్టులకు మాత్రమే పరీక్షలు పెట్టేలా సీబీఎస్‌ఈకి మంత్రి రమేశ్‌ సూచించారు. పరీక్షలు పెట్టదగ్గ సమయం వచ్చినప్పుడు పరీక్షలు ఉంటాయని అయితే అది కేవలం ఆ 29 సబ్జెక్టులకు మాత్రమే ఉంటాయన్నారు. మిగిలిన సబ్జెక్టులకు పరీక్షలుగానీ, మార్కులుగానీ ఉండవని తెలిపారు.    1–8 క్లాసుల విద్యార్థులు ప్రమోట్‌! కరోనా వైరస్‌ విస్తరిస్తున్న నేపథ్యంలో 1–8 తరగతులు చదువుతున్న విద్యార్థులను పై తరగతులకు ప్రమోట్‌ చేయాలంటూ కేంద్ర మానవ వనరుల అభివృద్ధి శాఖ మంత్రి రమేశ్‌ పోఖ్రియాల్‌ నిశాంక్‌ సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌ఈ)కి సూచించారు. ఈ మేరకు ఆయన ట్విట్టర్‌ ద్వారా బుధవారం వెల్లడించారు.  ప్రవేశ పరీక్షల దరఖాస్తు గడువు పొడిగింపు  కొత్త తేదీలు ప్రకటించిన నేషనల్‌ టెస్టింగ్‌ ఏజెన్సీ  నేషనల్‌ టెస్టింగ్‌ ఏజెన్సీ (ఎన్‌టీఏ).. వివిధ ప్రవేశ పరీక్షల దరఖాస్తుల గడువును పొడిగించింది. కొన్నింటిని ఈనెల 30 వరకు, కొన్ని పరీక్షలకు వచ్చే నెల 15, 16, 31 తేదీల వరకు గడువును పెంచింది.   మార్చి 31తో ముగిసిన నేషనల్‌ కౌన్సిల్‌ ఫర్‌ హోటల్‌ మేనేజ్‌మెంట్‌ జేఈఈ దరఖాస్తుల స్వీకరణ గడువును ఈనెల 30 వరకు పొడిగించారు.  ఇందిరాగాంధీ నేషనల్‌ ఓపెన్‌ యూనివర్సిటీ పీహెచ్‌డీ, ఎంబీఏ ప్రవేవేశాలకు నిర్వహించాల్సిన అడ్మిషన్‌ టెస్టు దరఖాస్తుల స్వీకరణ గడువు, ఇండియన్‌ కౌన్సిల్‌ ఆఫ్‌ అగ్రికల్చర్‌ రీసెర్చ్, జేఎన్‌యూ ప్రవేశ పరీక్ష దరఖాస్తుల గడువు కూడా ఈనెల 30 వరకు పొడిగించారు.  యూజీసీ నెట్‌ (జూన్‌) దరఖాస్తుల గడువును మే 16కి పొడిగించారు.  సీఎస్‌ఐఆర్‌ నెట్‌ దరఖాస్తుల గడువు మే 15కి, ఆల్‌ఇండియా ఆయుష్‌ పోస్టు గ్రాడ్యుయేట్‌ ఎంట్రన్స్‌ టెస్టు (ఏఐఏపీజీఈటీ) దరఖాస్తు గడువును మే 31కి పెంచారు.   

న్యూఢిల్లీ: వారం క్రితం అల్లర్లు జరిగిన ఈశాన్య ఢిల్లీలో పరిస్థితి ఉద్రిక్తంగా ఉన్నా ప్రశాంత వాతావరణం నెలకొంది. అయితే, సోమవారం అల్లర్లు జరిగిన ప్రాంతంలో మరో నాలుగు మృతదేహాలు బయటపడటంతో మృతుల సంఖ్య 45కు చేరుకుందని అధికారులు తెలిపారు. అల్లర్ల కారణంగా వాయిదాపడిన సీబీఎస్‌ఈ 10, 12వ తరగతి పరీక్షలను సోమవారం పటిష్ట బందోబస్తు మధ్య నిర్వహించారు. 98 శాతం మంది విద్యార్థులు పరీక్షలకు హాజరయ్యారని అధికారులు తెలిపారు. సామాజిక మాధ్యమాల్లో పుకార్లు వ్యాపింప జేస్తున్న 40 మందిని అదుపులోకి తీసుకున్నట్లు పోలీసులు తెలిపారు.    అంకిత్‌శర్మ కుటుంబానికి రూ.కోటి సాయం అల్లర్లలో ప్రాణాలు కోల్పోయిన ఇంటెలిజెన్స్‌ బ్యూరో ఉద్యోగి అంకిత్‌ శర్మ కుటుంబానికి రూ.కోటి పరిహారంగా అందజేయనున్నట్లు సీఎం కేజ్రీవాల్‌ తెలిపారు. ఆయన కుటుంబంలో ఒకరికి ఉద్యోగం కూడా కల్పిస్తామన్నారు. అల్లర్లపై రేపు సుప్రీం విచారణ ఢిల్లీ అల్లర్లకు సంబంధించిన పిటిషన్లపై 4న విచారణ జరుపుతామని సుప్రీంకోర్టు తెలిపింది. రాజకీయ నాయకులు, ఇతరుల రెచ్చగొట్టే వ్యాఖ్యల వల్ల అల్లర్లు జరిగాయని, వారిపై ఎఫ్‌ఐఆర్‌లు నమోదుచేయాలంటూ ఢిల్లీ హైకోర్టులో పిటిషన్‌ దాఖలైన సంగతి తెలిసిందే. అయితే హైకోర్టు ఈ వ్యవహారాన్ని నాలుగు వారాల పాటు వాయిదా వేసింది. దీనిపై పిటిషన్‌దారులు సుప్రీంకోర్టును ఆశ్రయించారు. ‘అల్లర్ల కారణంగా ప్రజలు చనిపోతుంటే వాయిదా ఎలా వేయగలరు ?’ అంటూ పిటిషన్‌దారుల తరఫున లాయర్‌ కోలిన్‌ గొంజాల్వెజ్‌ సుప్రీంకోర్టును అడిగారు. అయితే అల్లర్లను నియంత్రించడం తమ పని కాదని, దానికి కార్యనిర్వాహక వ్యవస్థ ఉందని ప్రధాన న్యాయమూర్తి జస్టిస్‌ ఎస్‌ఏ బాబ్డే నేతృత్వంలోని ధర్మాసనం చెప్పింది. బుధవారం విచారణ జరుపుతామని తెలిపింది.

సాక్షి, న్యూఢిల్లీ : అల్లర్లతో దేశ రాజధాని అట్టుడుకుతున్న క్రమంలో ఈనెల 28, 29 తేదీల్లో ఈశాన్య ఢిల్లీలో జరగాల్సిన పది, పన్నెండో తరగతి పరీక్షలను వాయిదా వేసినట్టు సీబీఎస్‌ఈ గురువారం వెల్లడించింది. ఈ తేదీల్లో జరగాల్సిన పరీక్షలను ఈశాన్య ఢిల్లీలో సాధారణ పరిస్థితులు నెలకొన్న తర్వాత నిర్వహిస్తామని సీబీఎస్‌ఈ ట్వీట్‌ చేసింది. ఈశాన్య ఢిల్లీలోని పలు ప్రాంతాల్లో శాంతిభద్రతల పరిస్ధితి సజావుగా లేనందున ఈ నిర్ణయం తీసుకున్నట్టు తెలిపింది. మరోవైపు ఢిల్లీ ప్రభుత్వం సైతం పరీక్షలను వాయిదా వేయాలని సీబీఎస్‌ఈని కోరింది. ఢిల్లీ అల్లర్ల నేపథ్యంలో బోర్డు ఎగ్జామ్స్‌ కోసం సమగ్ర కార్యాచరణ ప్రకటించాలని ఢిల్లీ హైకోర్టు సీబీఎస్‌ఈని ఆదేశించింది. ఇక ఈశాన్య ఢిల్లీలోని 80 పరీక్షా కేంద్రాల్లో నేడు జరగాల్సిన పన్నెండో తరగతి బోర్డు పరీక్షను వాయిదా వేసినట్టు సీబీఎస్‌ఈ ఇప్పటికే ప్రకటించింది.

సాక్షి, న్యూఢిల్లీ : ఢిల్లీలో అల్లర్ల నేపథ్యంలో ఘర్షణలు చోటుచేసుకున్న ఈశాన్య ఢిల్లీ, తూర్పు ఢిల్లీలోని పలు ప్రాంతాల్లో గురువారం జరగాల్సిన సీబీఎస్‌ఈ పన్నెండో తరగతి ఇంగ్లీష్‌ పరీక్షను వాయిదా వేసినట్టు అధికారులు వెల్లడించారు. సీఏఏ ఆందోళనలతో నెలకొన్న ఉద్రిక్తతను పురస్కరించుకుని ఢిల్లీ ప్రభుత్వం వినతి మేరకు విద్యార్ధులు, సిబ్బంది, తల్లితండ్రులకు తలెత్తే అసౌకర్యాన్ని దృష్టిలో ఉంచుకుని ఈ నిర్ణయం తీసుకున్నామని సీబీఎస్‌ఈ కార్యదర్శి అనురాగ్‌ త్రిపాఠి బుధవారం తెలిపారు. మరోవైపు సీఏఏ అనుకూల, వ్యతిరేక వర్గాల మధ్య ఢిల్లీలో చెలరేగిన ఘర్షణల్లో మృతుల సంఖ్య 24కు చేరుకుంది. ఈశాన్య ఢిల్లీలో జాతీయ భద్రతా సలహాదారు అజిత్‌ దోవల్‌ పర్యటించారు. ఢిల్లీలో ప్రస్తుతం పరిస్ధితి పూర్తి అదుపులో ఉందని చెప్పారు.

సాక్షి, న్యూఢిల్లీ: దేశ రాజధానిలో గత కొద్దిరోజులుగా జరుగుతున్న అల్లర్లు మరింత పెట్రేగిపోతున్నాయి. పౌరసత్వ సవరణ చట్టం బిల్లకు మద్దతు తెలుపుతున్న వారు, వ్యతిరేకిస్తున్న వారు రెండు వర్గాలుగా చీలి దాడులకు తెగబడుతున్నారు. పలు ప్రాంతాల్లో సోమవారం ప్రారంభమైన ఈ ఘర్షణలు మరింత హింసాత్మకంగా మారాయి. రాళ్లదాడికి పాల్పడటం, దుకాణాలు, వాహనాలను తగలబెట్టడం ఇలా ఆందోళనలు నానాటికీ మరింత హింసాత్మకంగా మారుతుండటం దేశ ప్రజలను ఆందోళనకు గురి చేస్తున్నాయి. ఈ నేపథ్యంలో సీబీఎస్‌ఈ(సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌) బుధవారం జరగాల్సిన పలు పరీక్షలను వాయిదా వేస్తున్నట్లు ప్రకటించింది. (నష్టం లేదని చెబుతున్నా వినరే!) ఈశాన్య ఢిల్లీలో మొత్తం 86 పరీక్ష కేంద్రాలుండగా.. ఇక్కడ 10,12వ తరగతి పరీక్షలను వాయిదా వేస్తున్నట్లు అత్యవసర నోటిఫికేషన్‌ జారీ చేసింది. ఈశాన్య ఢిల్లీ మినహా మిగతా ప్రాంతాల్లో యధావిధిగా పరీక్షలు జరుగుతాయని స్పష్టం చేసింది. ఢిల్లీ ప్రభుత్వ విద్యాశాఖ సూచన మేరకు ఈ నిర్ణయం తీసుకున్నట్లు వెల్లడించింది. తిరిగి ఈ పరీక్షలను ఎప్పుడు నిర్వహించనున్నామనేది త్వరలోనే తెలియజేస్తామని పేర్కొంది. మరోవైపు ఈశాన్య ఢిల్లీలో నేడు అన్ని ప్రభుత్వ పాఠశాలలు, కళాశాలలు మూసివేయనున్నట్లు రాష్ట్ర ఉప ముఖ్యమంత్రి, విద్యాశాఖ మంత్రి మనీష్‌ సిసోడియా ప్రకటించారు. అన్ని పాఠశాలల్లో ఇంటర్నల్‌ పరీక్షలు కూడా వాయిదా వేస్తున్నట్లు వెల్లడించారు. (ట్రంప్‌ పర్యటిస్తున్న వేళ... సీఏఏపై భగ్గుమన్న ఢిల్లీ) ఆరో తరగతిలో ప్రశ్న.. దళితులంటే ఎవరు..?

సాక్షి, హైదరాబాద్‌: రాష్ట్రంలో కొత్తగా 8 ఏకలవ్య మోడల్‌ స్కూళ్ల ఏర్పాటుకు గిరిజన సంక్షేమ శాఖ చర్యలు వేగిరం చేసింది. ఇప్పటికే రాష్ట్రంలో 8 స్కూళ్లు నిర్వహిస్తుండగా.. మరో 8 స్కూళ్ల ఏర్పాటుకు కేంద్రానికి ప్రతిపాదనలు సమర్పించింది. కేంద్రం అనుమతిస్తే వచ్చే విద్యా సంవత్సరం నుంచి అందుబాటులోకి తేవాలని భావిస్తోంది. ప్రస్తుతమున్న ఈఎంఆర్‌ స్కూళ్లకు శాశ్వత భవనాలున్నప్పటికీ వసతులు అంతంతమాత్రంగానే ఉన్నాయి. ఈ నేపథ్యంలో కేంద్ర గిరిజన సంక్షేమ శాఖ పరిధిలో ఈఎంఆర్‌ఎస్‌ల కోసం ప్రత్యేక సొసైటీని ఏర్పాటు చేసిన క్రమంలో రాష్ట్రంలోని ఈఎంఆర్‌ఎస్‌లకు శాశ్వత ప్రాతిపదికన నిర్మాణాలు, వసతులు కల్పించాలని రాష్ట్ర గిరిజన శాఖ కేంద్రానికి నివేదించింది.  సీబీఎస్‌ఈ అనుమతితో: ఇప్పటికే ఉన్న 8 ఈఎంఆర్‌ఎస్‌లకు సీబీఎస్‌ఈ అనుమతులు వచ్చేశాయి. తాజాగా మరో 8 స్కూళ్లను ప్రారంభించాలని ఆ శాఖ నిర్ణయించడంతో వాటికి సీబీఎస్‌ఈ అనుమతులకు అధికారులు ఆన్‌లైన్‌లో దరఖాస్తులు సమర్పించారు. తాజాగా వీటికి కూడా అనుమతులు ఇస్తున్నట్లు సీబీఎస్‌ఈ సమాచారం ఇచ్చింది. ఈఎంఆర్‌ఎస్‌ల నిర్వహణకు కేంద్రం నుంచి ప్రత్యేక నిధులు విడుదలవుతున్నాయి. దీంతో కొత్తగా ఏర్పాటయ్యే ఒక్కో ఈఎంఆర్‌ఎస్‌కు రూ.20 కోట్లు అవసరమని రాష్ట్ర ప్రభుత్వం కేంద్రానికి నివేదిక పంపింది. దీనిపై కేంద్రం నుంచి ఇంకా స్పందన రాలేదు. వచ్చే ఏడాది సీబీఎస్‌ఈ సిలబస్‌తో ప్రారంభమయ్యే స్కూళ్లు.. సీరోల్, మరిమడ్ల, గాంధారి, ఎల్లారెడ్డిపేట్, కురవి, బాలానగర్, ఇంద్రవెల్లి, గండుగులపల్లి.

చెన్నై : ‘సీబీఎస్‌ఈ ఆధ్యర్యంలో నడిచే కేంద్రీయ విద్యాలయలో అధికారుల నిర్లక్ష్యం బయటపడింది. దళితులు, ముస్లింల మనోభావాలను కించపరిచే విధంగా ఆరో తరగతి పరీక్ష పత్రంలో ప్రశ్నలు పొందుపరిచారు. తమిళనాడులోని ఓ కేంద్రీయ విద్యాలయ నిర్వహించిన పరీక్షలో దారుణమైన ప్రశ్నలడిగారు’అని డీఎంకే చీఫ్‌ ఎంకే స్టాలిన్‌ ఆరోపించారు. సీబీఎస్‌ఈ ఆరో తరగతి ప్రశ్నాపత్రమని పేర్కొంటూ శనివారం ఆయన ఓ ట్వీట్‌ చేశారు. బాధ్యులైన వారిపై తక్షణం చర్యలు తీసుకోవాలని డిమాండ్‌ చేశారు. ఈ ట్వీట్‌ వైరల్‌ అయింది. స్టాలిన్‌ ట్వీట్‌ ప్రకారం.. దళితులంటే ఎవరు..? అనే ప్రశ్నకు.. ఎ)విదేశీయులు, బి)అంటరానివారు, సి)మద్య తరగతివారు, డి)ఎగువ తరగతివారు అని ఆప్షన్లు ఇచ్చారు. ఇక మరో ప్రశ్న.. ముస్లింలకు సంబంధించిన ఈ క్రింది సాధారణాంశమేది..? అనే ప్రశ్నకు ఎ)ముస్లింలు బాలికలను పాఠశాలకు పంపరు. బి)వారు ప్యూర్‌ వెజిటేరియన్‌, సి)వారు రోజా సమయంలో నిద్రపోరు, డి)పైవన్నీ.. అని ఆప్షన్లు ఇచ్చారు. ఆరో తరగతి సాంఘీకశాస్త్రంలోని పాఠ్యాంశం ఆధారంగా ఈ ప్రశ్నలు రూపొందించినట్టు చెప్పారు. దీంతో సీబీఎస్‌ఈ పనితీరుపై సర్వత్రా విమర్శలు వెల్లువెత్తుతున్నాయి. ఇక ఈ వ్యవహారంపై ఏఎంఎంకే చీఫ్‌ టీటీవీ దినకరణ్‌, రాజ్యసభ ఎంపీ వైకో కూడా విమర్శలు చేశారు. బాధ్యులపై చర్యలు తీసుకోవాలని డిమాండ్‌ చేశారు. చిన్నారుల మెదళ్లలో విషాన్ని నింపుతారా అని ఆగ్రహం వ్యక్తం చేశారు. అయితే, స్టాలిన్‌ పోస్టు చేసిన ప్రశ్నాపత్రం అధికారికమైనదేనా అనే సందేహాలు నెలకొన్నాయి. ఇక చెన్నైలోని కేంద్రీయ విద్యాలయ సిబ్బంది ఈ ఆరోపణల్ని ఖండించారు. అలాంటి ప్రశ్నలేవీ అగడలేదని కొట్టిపడేశారు. Shocked and appalled to see that a Class 6 Kendriya Vidyalaya exam contains questions that propagate caste discrimination and communal division. Those who are responsible for drafting this Question Paper must be prosecuted under appropriate provisions of law.@HRDMinistry pic.twitter.com/kddu8jdbN7 — M.K.Stalin (@mkstalin) September 7, 2019

న్యూఢిల్లీ: భారీ స్థాయిలో పెంచిన 10, 12 తరగతుల బోర్డు పరీక్షల ఫీజుపై సీబీఎస్‌ఈ వివరణ ఇచ్చింది. రూ. 200 కోట్ల ఆర్థిక లోటు వల్లే ఫీజులు పెంచాల్సి వచ్చిందని బోర్డు కార్యదర్శి అనురాగ్‌ త్రిపాఠీ మంగళవారం తెలిపారు. 10, 12 తరగతుల పరీక్షా నిర్వహణకు దాదాపు రూ. 500 కోట్ల ఖర్చు అవుతోందని అన్నారు. ఇప్పటి వరకూ నీట్, జేఈఈ వంటి పరీక్షల నిర్వహణ ద్వారా ఆర్థిక వెసులుబాటు ఉండేదన్నారు. ఇప్పుడు అవి మానవ వనరులు, అభివృద్ధి శాఖ ఆధ్వర్యంలోని నేషనల్‌ టెస్టింగ్‌ ఏజెన్సీ కిందకు వెళ్లిపోయాయన్నారు. దీంతో తప్పనిసరై పరీక్ష ఫీజులను పెంచాల్సి వచ్చిందన్నారు. ఇప్పటికే బోర్డు రూ. 200 కోట్ల లోటుతో నడుస్తోందన్నారు. అయితే ఢిల్లీలో షెడ్యూల్డ్‌ కులాలు, షెడ్యూల్డ్‌ తెగల విద్యార్థులు పెంచిన ఫీజు చెల్లించాల్సిన అవసరం లేదని స్పష్టం చేశారు. వారు రూ.50 కడితే సరిపోతుందని తెలిపారు. షెడ్యూల్డ్‌ కులాలు, షెడ్యూల్డ్‌ తెగల విద్యార్థులపై భారం పడకుండా పెంచిన ఫీజు మొత్తాన్ని చెల్లించేందుకు ఢిల్లీ ప్రభుత్వం అంగీకరించిందని వెల్లడించారు. కేజ్రీవాల్‌ సర్కారు నిర్ణయంతో పేద విద్యార్థులకు ఊరట లభించింది. (చదవండి: సీబీఎస్‌ఈ ఫీజు 24 రెట్లు పెంపు)

సాక్షి, విశాఖపట్నం: డైట్‌పై ఎన్నో ఆశలు పెట్టుకున్న కేంద్రీయ విద్యాలయం విద్యార్థులకు నిరాశే మిగిలింది. ఎన్నడూ లేని విధంగా డైట్‌ కౌన్సెలింగ్‌లో పదో తరగతి లేదా ఇంటర్మీడియట్‌లలో తెలుగు సబ్జెక్ట్‌ ఉన్న వాళ్లే అర్హులని కొత్త నిబంధనలు విధించారు. దీంతో దీనిపైనే ఆశలు పెట్టుకున్న కేవీ విద్యార్థులకు అన్యాయం జరిగింది. మొదటిగా డైట్‌ నోటిఫికేషన్‌ను ఎవరు అర్హులు.. ఎవరు అనర్హులో పూర్తి సమాచారంతో విడుదల చేస్తారు. ఈ నోటిఫికేషన్‌లో తెలుగు సబ్జెక్టుగా లేకపోయిన ప్రవేశం ఉందని.. పరీక్షల్లో అర్హత సాధించిన వారికి ర్యాంక్‌ కార్డు కూడా పంపించి ఇప్పుడు కౌన్సెలింగ్‌లో కేవలం తెలుగు సబ్జెక్టుగా ఉన్న విద్యార్థులకు మాత్రమే అర్హత ఉందని నిబంధనలు విధించింది. ఆన్‌లైన్‌ కౌన్సెలింగ్‌ ప్రక్రియలో వారికి నచ్చిన కళాశాలల్లో సీట్ల అలాట్‌మెంట్‌ కూడా జరిగింది. చివరికి సర్టిఫికెట్ల పరశీలనకు హాజరైన కేవీ విద్యార్థులకు కొత్త నిబంధనలతో ఆంక్షలు విధించారు. మూడు నెలల కిందట విడుదలైన డైట్‌ నోటిఫికేషన్‌లో తెలుగు సబ్జెక్ట్‌ తప్పనిసరిగా ఉండాలనే నిబంధన లేదు. గతేడాది కూడా ఇటువంటివి లేవు. ఈ తరహా నిబంధనలతో అన్యాయానికి గురైన విద్యార్థులు విశాఖలోని ప్రతి కళాశాలలో ఐదుగురు చొప్పున ఉన్నారు.  అప్పుడొకలా.. ఇప్పుడొకలా.. ఏపీ డైట్‌ నోటిఫికేషన్‌–2019 విడుదల చేసినప్పుడు ఇంగ్లిష్‌ మీడియం విద్యార్థుల అకడమిక్‌ కోర్సుల్లో తెలుగు తప్పనిసరిగా ఉండాలని, సీబీఎస్‌ఈలో చదివిన వారు అనర్హులని కూడా స్పష్టత ఇవ్వలేదు. ఈ నెల 17న సర్టిఫికెట్ల వెరిఫికేషన్‌కు హాజరవ్వాలని ఒక ప్రొసీడింగ్‌ ఆర్‌సీ నంబర్‌ 1/డీఈసెట్‌/2010–2 విద్యార్థులకు పంపించారు. అందులో సీబీఎస్‌ఈ విద్యార్థులకు అర్హత లేదని ఉంది. కేవలం సర్టిఫికెట్ల వెరిఫికేషన్‌కు మాత్రమే ఈ ప్రొసీడింగ్‌ విడుదల చేయడంతో విద్యార్థుల్లో ఆందోళన నెలకొంది. జిల్లాతో పాటు రాష్ట్ర వ్యాప్తంగా ఈ నిబంధనలతో వేల మంది సీబీఎస్‌ఈ విద్యార్థులకు తీవ్ర నష్టం వాటిల్లింది. ఎంసెట్, ఐఐటీ వంటి ఇతర అవకాశాలను కూడా వదిలి ఈ కౌన్సెలింగ్‌నే నమ్ముకుని ఉన్న విద్యార్థుల ఆశలకు బ్రేకులు పడ్డాయి. జిల్లా విద్యాశాఖ అధికారి లింగేశ్వరరెడ్డి, భీమిలి డైట్‌ కళాశాల ప్రినిపాల్, డైట్‌ జిల్లా కౌన్సెలింగ్‌ ఇన్‌చార్జిని కలిసి తమకు జరిగిన సమస్యలను సీబీఎస్‌ఈ విద్యార్థులంతా విన్నవించుకున్నారు. తమకు న్యాయం జరుగుతుందని ఆశతో ఉన్నారు. మాకు న్యాయం జరగాలి కేంద్రీయ విశ్వవిద్యాలయంలో ఇంటర్‌ పూర్తిచేశాను. మొదటి నుంచి సీబీఎస్‌ఈ సిలబస్సే కావడంతో తెలుగు సబ్జెక్టు ఆప్సన్‌ లేదు. డైట్‌ పరీక్ష రాశాను. ఐఐటీలో అవకాశాన్ని కూడా వదులుకుని కౌన్సెలింగ్‌కి వస్తే అన్యాయం జరిగింది. ఆన్‌లైన్‌లో పెట్టుకుంటే మల్కాపురం డైట్‌ కళాశాల వచ్చింది. ఇప్పుడు కౌన్సెలింగ్‌లో కొత్త నిబంధనలతో కెరీర్‌ ప్రశ్నార్థకంగా మారింది. – కొండ కనకమహాలక్ష్మి, విద్యార్థిని, మల్కాపురం అవకాశం కల్పించండి కేవీలో ఇంటర్‌ చదివాను. డైట్‌ పరీక్ష రాశాను. మంచి ర్యాంకు వచ్చింది. ఆన్‌లైన్‌ కౌన్సెలింగ్‌లో కాలేజ్‌ ఆప్సన్‌ కూడా పెట్టుకున్నాను. సీబీఎస్‌ఈ విద్యార్థులకు తెలుగు సబ్జెక్టు ఉండకపోవడంతో డైట్‌ కౌన్సెలింగ్‌లో సర్టిఫికెట్‌ల పరిశీలనకు అనుమతించ లేదు. ఈ నెల 15, 16 తేదీల్లో డీఎడ్‌ ప్రవేశాలకు కౌన్సెలింగ్‌ ప్రక్రియ పూర్తయింది. ఈ విధానంతో రాష్ట్రంలో చాలామంది నష్టపోయారు. మాకు అవకాశం కల్పించాలి.  – మహేన్‌ లోహి, విద్యార్థి పైఅధికారుల దృష్టికి తీసుకెళతాం డైట్‌ నోటిఫికేషన్‌లో ఎటువంటి సమాచారం లేదు. డైట్‌ కౌన్సెలింగ్‌లో భాగంగా సర్టిఫికెట్ల వెరిఫికేషన్‌లో పదిలో గానీ, ఇంటర్‌లో గానీ తెలుగు సబ్జెక్టు కలిగి ఉన్న వారికి మాత్రమే అర్హత ఉంటుందని నిబంధనలు వచ్చాయి. దాని ప్రకారమే తాము ఆచరించాం. దీనిని పైఅధికారుల దృష్టికి తీసుకెళతాం.     – ఎం.జ్యోతికుమారి, భీమిలి డైట్‌ కళాశాల ప్రిన్సిపాల్, డైట్‌ కౌన్సెలింగ్‌ ఇన్‌చార్జి

న్యూఢిల్లీ: సీబీఎస్‌ఈ ఫలితాల సందర్భంగా ఓ విషాద ఘటన వెలుగు చూసింది. నోయిడాలోని అమిటీ ఇంటర్నేషనల్‌ స్కూల్‌ విద్యార్థి వినాయక్‌ శ్రీధర్‌ సీబీఎస్‌ఈ పరీక్షలో రాసిన మూడు సబ్జెక్టుల్లో దాదాపు 100 శాతం మార్కులు సాధించాడు. అయితే, కంప్యూటర్‌ సైన్స్, సోషల్‌ పరీక్షలు రాయకుండానే మస్క్యులర్‌ డిస్ట్రోఫీ అనే నరాల సంబంధ వ్యాధి ముదిరి ఈ లోకం వీడివెళ్లిపోయాడు. రాసిన సబ్జెక్టులు ఇంగ్లిష్‌లో 100కు 100, సైన్స్‌లో 96, సంస్కృతంలో 97 మార్కులు సాధించాడు. రెండేళ్ల వయస్సులో అతడికి మస్క్యులర్‌ డిస్ట్రోఫీ వ్యాధి సోకింది. వీల్‌చైర్‌లోనే స్కూల్‌కు వచ్చిన అతడికి..ప్రపంచ ప్రఖ్యాత స్టీఫెన్‌హాకింగ్‌ ఆదర్శం. అంతరిక్ష శాస్త్రం చదవాలని, వ్యోమగామి కావాలని కలలు కనేవాడని తల్లి మమత చెప్పారు. 

ఇది పరీక్ష ఫలితాలు వెల్లడయ్యే కాలం. రాష్ట్రాల స్థాయిలో ఉండే పదో తరగతి, ఇంటర్మీడియెట్‌ వార్షిక పరీక్షల ఫలితాలు... కేంద్ర స్థాయిలోని సీబీఎస్‌ఈ, ఐసీఎస్‌ఈ, ఐఎస్‌సీ వంటి బోర్డులు నిర్వ హించిన పది, పన్నెండు తరగతుల ఫలితాలు వరసబెట్టి వెలువడుతున్నాయి. కొన్నింకా వెలువడ వలసి ఉంది. గురువారం వెల్లడైన సీబీఎస్‌ఈ పన్నెండో తరగతి ఫలితాల్లో ఎప్పటిలాగే బాలికల్లో ఉత్తీర్ణత శాతం అధికంగా ఉంది. సీబీఎస్‌ఈ రీజియన్‌లన్నిటా ఇదే ధోరణి. ఫలితాలు వచ్చిన ప్పుడల్లా సహజంగానే అగ్రస్థానాల్లో నిలిచినవారిని మీడియాతోసహా సమాజంలో అందరూ గుర్తి స్తారు. చానెళ్లు, పత్రికలు విజేతలతో మాట్లాడి వారి అభిప్రాయాలు తెలుసుకుంటారు. ఏడాది పొడవునా వారు శ్రమించిన తీరు, వారి విజయానికి దోహదపడిన ఇతర అంశాలు వంటివన్నీ ప్రస్తావన కొస్తాయి. విజేతల్లో కొందరు తాము సామాజిక మాధ్యమాలకు దూరంగా ఉండటం వల్ల పాఠ్యాం శాలపై దృష్టి పెట్టగలిగామని చెప్పారు. ఒత్తిడికి లోనయినప్పుడు దాన్నుంచి బయటపడటానికి పాటలు వినడం, ఆటలాడటం వంటివి చేశామని కొందరు తెలిపారు. ఒకామె ఖాళీ సమయాల్లో దివ్యాంగులకు కథక్‌ నృత్యం నేర్పుతుంటానని చెప్పింది. ఇలాంటి అనుభవాలు ఇతర విద్యార్థులకు ఉపకరిస్తాయి. సీబీఎస్‌ఈ ఫలితాల్లో ఈసారి చాలా రికార్డులున్నాయి. ఆఖరి పరీక్ష పూర్తయిన 28 రోజుల వ్యవధిలోనే ఫలితాలు వెలువడ్డాయి. అంతేకాదు... 90 శాతంకన్నా ఎక్కువగా మార్కులు సాధించిన విద్యార్థుల సంఖ్య 94,299. ఇద్దరు బాలికలకైతే 500 మార్కులకూ 499 వచ్చాయి. 498 తెచ్చుకున్నవారు ముగ్గురైతే, అంతకన్నా ఒక మార్కు తక్కువతో వచ్చినవారు 18మంది. గత ఏడా దితో పోలిస్తే ఈసారి ఉత్తీర్ణత శాతం అధికం. వీటన్నిటివల్లా ఈసారి ఢిల్లీ యూనివర్సిటీ అడ్మిషన్ల కోసం కటాఫ్‌ మార్కుల్ని పెంచవలసిన పరిస్థితి ఏర్పడింది.  ఢిల్లీ ప్రభుత్వం ఆధ్వర్యంలో నడుస్తున్న పాఠశాలల విజయగాధను ప్రత్యేకించి చెప్పుకోవాలి. ఆ పాఠశాలల్లో విద్యార్థుల ఉత్తీర్ణత శాతం 94.29. అంతేకాదు... 203 పాఠశాలల్లో వందశాతం విద్యా ర్థులు ఉత్తీర్ణులయ్యారు. అక్కడి ప్రైవేటు స్కూళ్లతో పోలిస్తే ప్రభుత్వ పాఠశాలల్లోనే ఉత్తీర్ణత అధికంగా ఉంది. 2015 నుంచి అక్కడి రాష్ట్ర ప్రభుత్వం ప్రభుత్వ బడులపై ప్రత్యేక శ్రద్ధపెట్టి వాటికి అవసరమైన మౌలిక సదుపాయాలన్నీ కల్పించింది. అందువల్లే అప్పటినుంచీ ఏటా మంచి ఫలితాలు వస్తున్నాయి. పైలట్‌ ప్రాజెక్టుకింద మొదట 54 పాఠశాలల్ని ఎంపిక చేసి అవసరమైన టీచర్లను నియమించారు. పాఠశాల భవనాలను తీర్చిదిద్దారు. పిల్లల్లో ప్రతిభను వెలికితీసే కార్యక్రమాలు అమలు చేశారు. ప్రధానంగా పిల్లల్ని కొట్టడమనే అలవాటును మాన్పించారు. క్రమేపీ దీన్ని విస్తరించుకుంటూ వెళ్లారు. ప్రభుత్వ పాఠశాలల్లో బాగా చదువు చెబుతున్నారన్న అభిప్రాయం కలగడం మొదలయ్యేసరికి ప్రైవేటు బడులకు పిల్లల్ని పంపే ధోరణి తగ్గిపోయింది. అలాగే మధ్యలో బడి మానేసేవారు దాదాపు లేకుండాపోయారు. కెరీర్‌ విషయమై పిల్లలకు సలహా లిచ్చేందుకు నిపుణుల్ని రప్పించే విధానం మొదలుపెట్టారు. ఇవన్నీ పన్నెండో తరగతిలో ఈ మాదిరి ఫలితాలు రావడానికి దోహదపడ్డాయి. తెలంగాణలోని సాంఘిక సంక్షేమ, గిరిజన సంక్షేమ రెసిడెన్షియల్‌ పాఠశాలలు సైతం ఇదేవిధమైన ఫలితాలు అందిస్తున్నాయి. గతనెల 29న వెలువడిన జేఈఈ ఫలితాల్లో ఈ పాఠశాలల నుంచి 506 మంది ఉత్తీర్ణులయ్యారు. వీరిలో 35మంది ఓపెన్‌ క్యాటగిరీకి అర్హత సాధించారు. ఈ పిల్లలంతా గ్రామీణప్రాంతాలనుంచి వచ్చినవారే కావడం... వారి తల్లిదండ్రులంతా కూలీలుగా, కూరగాయల వ్యాపారులుగా, టీ అమ్ముకునేవారిగా, నిర్మాణ కార్మికులుగా బతుకీడుస్తున్నవారే కావడం గమనిం చదగ్గది. ప్రభుత్వాలు ప్రత్యేక శ్రద్ధ తీసుకుంటే, అంకితభావంతో పనిచేసేవారిని గుర్తించి వారికి సారథ్యం అప్పగిస్తే విద్యా ప్రమాణాలు ఎంత ఉన్నత స్థాయికి చేరతాయో ఢిల్లీ ప్రభుత్వ పాఠశాలలు, తెలంగాణ సాంఘిక సంక్షేమ, గిరిజన సంక్షేమ పాఠశాలలు నిరూపిస్తున్నాయి. అయితే ఈ ఫలి తాలతో సంతృప్తి పడి ఊరుకోకూడదు. వీటినుంచి వచ్చిన అనుభవాలతో ఇతర పాఠశాలల్ని సైతం తీర్చిదిద్దడానికి చర్యలు తీసుకోవాలి. తగిన సంఖ్యలో ఉపాధ్యాయులను నియమించడంతోపాటు ఇతర మౌలిక సదుపాయాలు కల్పించాలి. విద్యాహక్కు చట్టం కింద ఇలాంటివన్నీ తప్పనిసరిగా చేయాల్సి ఉన్నా ప్రభుత్వాలు తగిన శ్రద్ధ పెట్టడం లేదు.  అయితే ఇప్పుడు సీబీఎస్‌ఈ పరీక్షల నిర్వహణ తీరును నిశితంగా విమర్శిస్తున్నవారు లేకపోలేదు. ముఖ్యంగా అన్ని పాఠ్యాంశాల్లో విద్యార్థులకు లోతైన అవగాహన కలిగేలా, ఆ అంశాల్లో తార్కిక శక్తిని పెంచి వారిలో కొత్త ఆలోచనలు రేకెత్తించేలా విద్యావిధానం ఉండటం లేదన్నది వారి ఆరోపణ. ఇటీవలికాలంలో సీబీఎస్‌ఈ పరీక్ష పత్రాల్లో విద్యార్థుల తార్కిక శక్తిని, వారి పరిజ్ఞానాన్ని అంచనా వేసే వ్యాసరూప ప్రశ్నలు ఇవ్వకుండా బహుళ ఐచ్ఛిక ప్రశ్నలు, సంక్షిప్త సమాధానాలు కోరే ప్రశ్నలతో సరిపెడుతున్నారని వారంటున్నారు. ఈ విధానం బట్టీపట్టే ధోరణిని పెంచుతుంది. లోతుగా అధ్యయనం చేసే అలవాటును పోగొడుగుతుంది. ప్రధానంగా కేంద్ర సిలబస్‌లోని పన్నెండో తరగతి అయినా, రాష్ట్రాల స్థాయిలో ఉండే ఇంటర్మీడియెట్‌ అయినా విద్యార్థి జీవితంలో అత్యంత కీలకమైనవి. జీవితంలో తాను ఏ రంగంలో స్థిరపడాలో నిర్ణయించుకునేది ఈ సమ యంలోనే. కనుక ఈ దశలో అందించే విద్య తదనంతర స్థాయికి పిల్లల్ని సంసిద్ధుల్ని చేసేదిగా ఉండాలి. దేనిలో ఆసక్తి ఉందో, ఎక్కడ రాణించడం సాధ్యమో పిల్లలు ఎవరికి వారు అంచనా వేసు కోవడానికి అనువైన విద్య వారికి అందుబాటులో ఉండాలి. సంక్లిష్ట సమస్యలను పరిష్కరించడం, సృజనాత్మకత, విశ్లేషణా సామర్థ్యం, పరిశోధనా తత్వం, టీంవర్క్, నాయకత్వంవహించడం వంటి నైపుణ్యాలు వారిలో పెంచాలి. ఇవన్నీ వారు స్వతంత్రంగా ఆలోచించడానికి, నిర్దిష్టమైన అభిప్రా యాలు ఏర్పరుచుకోవడానికి, పరిణతి సాధించడానికి తోడ్పడతాయి. ప్లస్‌ టు విద్యను సమూలంగా ప్రక్షాళన చేయడంపై ప్రభుత్వాలు దృష్టిపెట్టాలి. 

న్యూఢిల్లీ : సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌(సీబీఎస్‌ఈ) పన్నెండో తరగతి ఫలితాలు గురువారం వెల్లడయ్యాయి. ఈ ఏడాది 84.3 శాతం మంది విద్యార్థులు ఉత్తీర్ణులయ్యారని సంబంధిత అధికారులు తెలిపారు. అయితే ఎప్పటిలాగే ఈసారి కూడా ఉత్తీర్ణత శాతంలో విద్యార్థినులే ముందున్నారు. అదేవిధంగా మొదటి రెండు స్థానాల్లోనూ నిలిచి మరోసారి సత్తా చాటారు. 500 గానూ 499 మార్కులు సాధించిన ఇద్దరు విద్యార్థినులు హన్సికా శుక్లా, కరీష్మా అరోరా టాప్‌ స్కోరర్లుగా నిలిచారు. వీరిద్దరు ఉత్తరప్రదేశ్‌కు చెందిన వారే కావడం విశేషం. ఇక 498 మార్కులతో ముగ్గురు విద్యార్థినులు గౌరంగీ చావ్లా, ఐశ్వర్య(రిషికేశ్‌), భవ్య(హర్యానా) సంయుక్తంగా రెండో స్థానం సంపాదించారు. కాగా సీబీఎస్‌ఈ టాపర్‌గా నిలిచిన హన్సికకు కేంద్ర మంత్రి ప్రకాశ్‌ జవదేకర్‌ శుభాకాంక్షలు తెలిపారు. ఈ మేరకు.. ‘ సీబీఎస్‌ఈ పన్నెండో తరగతి ఫలితాల్లో దేశంలోనే ప్రథమ స్థానంలో నిలిచిన హన్సికా శుక్లాకు అభినందనలు’ అని ఆయన ట్వీట్‌ చేశారు. ఇక గతేడాది కూడా ఉత్తరప్రదేశ్‌కు చెందిన మేఘన శ్రీవాస్తవ 500 మార్కులకు గానూ 499 మార్కులు సాధించి మొదటి స్థానంలో నిలవగా, అదే రాష్ట్రానికి చెందిన మరో విద్యార్థిని అనౌష్క చంద్ర 498 మార్కులతో రెండో స్థానంలో నిలిచిన సంగతి తెలిసిందే.

న్యూఢిల్లీ: పరీక్షల వేళ విద్యార్థులు ఒత్తిడికి లోనుకాకుండా సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌(సీబీఎస్‌ఈ) కీలక నిర్ణయం తీసుకుంది. గణితం పరీక్షను స్టాండర్డ్, బేసిక్‌ అని రెండు విభాగాలుగా విడగొట్టి నిర్వహిస్తామని సీబీఎస్‌ఈ ప్రకటించింది. విద్యార్థులు తమ సామర్థ్యానికి అనుగుణంగా కఠినంగా ఉండే గణితం–స్టాండర్డ్‌ లేదా సులభంగా ఉండే గణితం–బేసిక్‌ పేపర్‌ను ఎంచుకోవచ్చు. 2020 మార్చి నుంచి దీన్ని అమల్లోకి తీసుకొస్తారు. ఈ 2 పేపర్లకు సంబంధించి పాఠ్యాంశాలు, బోధన, అంతర్గత మదింపులో ఎలాంటి మార్పు ఉండదని పేర్కొంది. 

న్యూఢిల్లీ: సీబీఎస్‌ఈ పదోతరగతి చదివే విద్యార్థులకు శుభవార్త. ఇక మీరంతా పదోతరగతి పాస్‌ కావడం పెద్ద కష్టమేమీ కాదు. ఎందుకంటే పాస్‌ మార్కులకు సంబంధించిన నిబంధనలను సవరించి, ఉత్తీర్ణత శాతాన్ని పెంచేందుకు  సెంట్రల్‌ బోర్డ్‌ ఆఫ్‌ సెకండరీ ఎగ్జామినేషన్‌ (సీబీఎస్‌ఈ) త్వరలో పలు కీలక నిర్ణయాలు తీసుకోనుంది.   మొత్తంగా 33 శాతం వస్తే చాలు..  ప్రస్తుతం సీబీఎస్‌ఈ విద్యావిధానంలో పదో తరగతిలో ఓ విద్యార్థి ఉత్తీర్ణుడు కావాలంటే ఇంటర్నల్స్‌లో 33 శాతం, థియరీ పరీక్షల్లో 33 శాతం మార్కులు సాధించాలనే నిబంధన ఉంది. అయితే ఈ నిబంధనను సవరించి, ఇంటర్నల్స్, థియరీలో కలిపి 33 శాతం మార్కులు వస్తే చాలు. అంటే థియరీలో 33 శాతంకంటే తక్కువగా వచ్చి, ఇంటర్నల్స్‌లో  33 శాతం కంటే ఎక్కువ వచ్చినా.. మొత్తంగా 33 శాతం దాటితే ఉత్తీర్ణులైనట్లే. రెండింటిలో 33 శాతం మార్కులు రావాలనే నిబంధన నుంచి మినహాయింపును ఇవ్వాలని సీబీఎస్‌ఈ యోచిస్తున్నట్లు సమాచారం.   మీ అభిప్రాయమేంటో చెప్పండి..  ఇప్పటికే దీనికి సంబంధించిన సర్క్యూలర్‌ని అన్ని సీబీఎస్‌ఈ అనుబంధ పాఠశాలలకు బోర్డు జారీచేసింది. 33 శాతం నిబంధనను సవరించడంపై అభిప్రాయమేంటో చెప్పాలని ఆయా పాఠశాలలను సీబీఎస్‌ఈ కోరింది. వాటి నుంచి సమాధానం వచ్చిన వెంటనే ఈ వారంలోనే సమావేశమై, దీనిపై అధికారిక ప్రకటన జారీ చేయాలని భావిస్తోంది. 2011 నుంచి సీబీఎస్‌ఈ పదోతరగతి పరీక్షలను ఆప్షన్‌  (ఐచ్చికం)గా ప్రకటించిన విషయం తెలిసిందే. ప్రస్తుతం మళ్లీ 7 ఏళ్ల తర్వాత పదో తరగతి పరీక్షలను కచ్చితం చేశాయి. దీంట్లో భాగంగానే పరీక్ష విధానాల్లో ఈ మార్పులు తీసుకురానున్నట్లు సమాచారం.  ఫిబ్రవరి 19 నుంచి పరీక్షలు...  వచ్చే ఏడాది ఫిబ్రవరి 19 నుంచి పరీక్షలు నిర్వహించాలని సీబీఎస్‌ఈ సూచనప్రాయంగా నిర్ణయించినట్లు సమాచారం. అందుకు సంబంధించిన కార్యాచరణను బోర్డు అధికారులు వేగవంతం చేశారు. 10, 12 తరగతుల పరీక్షలకు ముందు జరిగే ‘స్టూడెంట్‌ యాక్టివిటీస్‌’ను వీలైనంత త్వరగా అందజేయాలని ఆయా విద్యా సంస్థలు, పాఠశాలలకు సీబీఎస్‌ఈ అధికారులు లేఖలు పంపారు. దీన్ని బట్టి ఏటా జరిగే తేదీలకంటే ముందుగానే బోర్డు పరీక్షలు ఉండవచ్చని చెబుతున్నారు. ఇదిలాఉండగా.. సీబీఎస్‌ఈ గుర్తింపు పొందిన పాఠశాలల్లో చదివే 9, 10 తరగతుల విద్యార్థుల వివరాలు ఇవ్వాలని బోర్డు ఆదేశించింది. సెకండరీ, సీనియర్‌ సెకండరీ పరీక్షల నిర్వహణ నిమిత్తం ఆయా వివరాలను cbse.nic.inలో నమోదు చేయాలని సూచించింది. 

చండీగఢ్‌ : హరియాణలో సీబీఎస్‌ఈ టాపర్‌, 19 ఏళ్ల విద్యార్థినిపై జరిగిన సామూహిక లైంగిక దాడి కేసులో ప్రధాన నిందితుడు బాధితురాలి పరిస్థితి విషమంగా ఉండటంతో వైద్యుడిని పిలిచాడని పోలీసులు తెలిపారు. నిందితుడు నిషు పొగట్‌ బాధితురాలి పరిస్థితి ఆందోళనకరంగా ఉందని గ్రహించి డాక్టర్‌ సంజీవ్‌ అనే వైద్యుడిని రప్పించాడని పోలీసులు వెల్లడించారు. డాక్టర్‌ సంజీవ్‌తో పాటు లైంగిక దాడి జరిగిన రూమ్‌ యజమానిని పోలీసులు అరెస్ట్‌ చేశారు. టీనేజర్‌పై లైంగిక దాడి కేసులో వైద్యుడి ప్రమేయం ఉందని పోలీసులు అనుమానిస్తున్నారు. బాధితురాలిపై నిందితులు దారుణానికి ఒడిగట్టినా డాక్టర్‌ సంజీవ్‌ పోలీసులకు సమాచారం అందించలేదని చెబుతున్నారు. లైంగిక దాడి జరిగే సమయంలో ఆయన అక్కడే ఉన్నా పోలీసు అధికారులకు సమాచారం ఇవ్వకపోవడంతో పాటు ఈ ఘోరంలో పాలుపంచుకున్నాడని ఆధారాలున్నాయని, ఫోరెన్సిక్‌ ఫలితాల్లో ఇది వెలుగుచూస్తుందని పోలీస్‌ అధికారి నంజీన్‌ భాసిన్‌ చెప్పారు. ఈ ఘటనలో ఆర్మీ జవాన్‌తో సహా మరో ఇద్దరు నిందితుల కోసం గాలింపు చర్యలు ముమ్మరం చేశామని తెలిపారు. కనియా జిల్లాలో కోచింగ్‌ క్లాస్‌కు వెళ్లి తిరిగివస్తున్న ఓ యువతిని బుధవారం ముగ్గురు యువకులు కిడ్నాప్‌చేసి గ్యాంగ్‌రేప్‌ చేసిన సంగతి తెలిసిందే. వీరితో పాటు మరో 9 మంది బాధితురాలిపై లైంగికదాడికి దిగారు. ఆమె స్పృహ కోల్పోవడంతో బస్టాండ్‌లో పడేసి వెళ్లిపోయారు.మరోవైపు ఈ ఘటనను సుమోటోగా విచారణకు స్వీకరించిన జాతీయ మహిళా కమిషన్‌(ఎన్‌డబ్ల్యూసీ).. వీలైనంత త్వరగా దీనిపై నివేదికను సమర్పించాలని హరియాణా డీజీపీ సంధూను ఆదేశించింది.

సాక్షి, న్యూఢిల్లీ : హరియాణాలో సీబీఎస్‌ఈ టాపర్‌పై జరిగిన సామూహిక లైంగిక దాడి కేసులో ఓ వ్యక్తిని పోలీసులు అరెస్ట్‌ చేశారు. నేరం జరిగిన స్ధలంలోని ట్యూబ్‌వెల్‌ యజమానిని అదుపులోకి తీసుకున్నామని పోలీసులు చెప్పారు. ఈ స్థలాన్ని నిందితులకు అతను రెంట్‌కు ఇచ్చాడని వెల్లడించారు. ఘటనలో సైనిక జవాను సహా పరారీలో ఉన్న ముగ్గురు ప్రధాన నిందితుల కోసం పోలీసులు పెద్ద ఎత్తున గాలింపు చర్యలు చేపట్టారు. వీరి అరెస్ట్‌కు సహకరించే సమాచారం అందించిన వారికి పోలీసులు రూ లక్ష నగదు రివార్డును ప్రకటించారు.  కనియా జిల్లాలో కోచింగ్‌ క్లాస్‌కు వెళ్లి తిరిగివస్తున్న ఓ యువతిని బుధవారం ముగ్గురు యువకులు కిడ్నాప్‌చేసి గ్యాంగ్‌రేప్‌ చేసిన సంగతి తెలిసిందే. వీరితో పాటు మరో 9 మంది బాధితురాలిపై లైంగికదాడికి దిగారు. ఆమె స్పృహ కోల్పోవడంతో బస్టాండ్‌లో పడేసి వెళ్లిపోయారు.మరోవైపు ఈ ఘటనను సుమోటోగా విచారణకు స్వీకరించిన జాతీయ మహిళా కమిషన్‌(ఎన్‌డబ్ల్యూసీ).. వీలైనంత త్వరగా దీనిపై నివేదికను సమర్పించాలని హరియాణా డీజీపీ సంధూను ఆదేశించింది.

చండీగఢ్‌/న్యూఢిల్లీ: హరియాణాలో సీబీఎస్‌ఈ టాపర్‌గా నిలిచిన యువతి(19)పై సామూహిక అత్యాచారం చేసినవారిలో ఓ ఆర్మీ జవాను కూడా ఉన్నట్లు ఆ రాష్ట్ర డీజీపీ బీఎస్‌ సంధూ తెలిపారు. బాధితురాలిపై లైంగికదాడికి పాల్పడ్డ దుండగులు ఇంకా పరారీలోనే ఉన్నారని వెల్లడించారు. ఈ కేసును దర్యాప్తు చేసేందుకు నూహ్‌ ఎస్పీ నజ్నీన్‌ భాసిన్‌ నేతృత్వంలో ప్రత్యేక దర్యాప్తు బృందాన్ని(సిట్‌) ఏర్పాటు చేశామన్నారు. బాధితురాలిపై అత్యాచారానికి పాల్పడ్డ ఆర్మీ జవాన్‌ పంకజ్‌ను అరెస్ట్‌ చేసేందుకు ఓ బృందాన్ని రాజస్తాన్‌లోని కోటకు పంపామని సంధూ పేర్కొన్నారు. ఈ ఘటనలో నిందితులను పట్టుకోవడానికి ప్రత్యేక బృందాలను రంగంలోకి దింపామనీ, పరారీలో ఉన్న నిందితుల ఆచూకీ తెలియజేస్తే రూ.లక్ష నజరానాగా అందజేస్తామని ప్రకటించారు. వైద్య పరీక్షల్లో యువతిపై లైంగికదాడి జరిగినట్లు తేలిందన్నారు. కాగా, జవాన్‌ పంకజ్‌ విషయంలో పోలీసులకు సహకరిస్తామని ఆర్మీ ప్రకటించింది. మరోవైపు ఈ ఘటనను సుమోటోగా విచారణకు స్వీకరించిన జాతీయ మహిళా కమిషన్‌(ఎన్‌డబ్ల్యూసీ).. వీలైనంత త్వరగా దీనిపై నివేదికను సమర్పించాలని హరియాణా డీజీపీ సంధూను ఆదేశించింది. కనియా జిల్లాలో కోచింగ్‌ క్లాస్‌కు వెళ్లి తిరిగివస్తున్న ఓ యువతిని బుధవారం ముగ్గురు యువకులు కిడ్నాప్‌చేసి గ్యాంగ్‌రేప్‌ చేసిన సంగతి తెలిసిందే. వీరితో పాటు మరో 9 మంది బాధితురాలిపై లైంగికదాడికి దిగారు. ఆమె స్పృహ కోల్పోవడంతో బస్టాండ్‌లో పడేసి వెళ్లిపోయారు.

ఛండీఘర్‌ : ‘యువతకు సరైన ఉపాధి లేకపోవడం వల్ల తీవ్ర ఒత్తిడికి లోనవుతున్నారు. ఆ కోపం, చిరాకులో వారు అత్యాచారాలకు పాల్పడుతున్నారం’టూ హర్యానా ఉచానా కాలన్‌ నియోజకవర్గానికి చెందిన బీజేపీ ఎమ్మెల్యే ప్రేమ్‌లతా సంచలన వ్యాఖ్యలు చేశారు. హర్యానాలో సీబీఎస్‌ టాపర్‌పై సామూహిక అత్యాచారం జరిగిన సంగతి తెలిసిందే. వివరాల ప్రకారం.. బాధితురాలు బుధవారం ఊరికి సమీపంలోని కోచింగ్‌ సెంటర్‌ నుంచి ఇంటికి తిరిగివచ్చేటప్పుడు కారులో వచ్చిన ముగ్గురు యువకులు ఆమెను కిడ్నాప్ చేసి అత్యాచారానికి పాల్పడ్డారు. ఆ తర్వాత నిందితులు బాధితురాలిని బస్టాండ్‌ సమీపంలో వదిలి వెళ్లిపోయారు. బాధితురాలి తండ్రి ఇచ్చిన ఫిర్యాదు మేరకు పోలీసులు కేసు నమోదు చేశారు. ప్రభుత్వం ఈ కేసును దర్యాప్తు చేయడానికి మేవట్‌ ఎస్పీ నాజ్నేన్‌ భాసిన్‌ అధ్వర్యంలో ‘సిట్‌’ని ఏర్పాటు చేసింది. ఈ సందర్భంగా ఎమ్మెల్యే ప్రేమ్‌లతా మాట్లాడుతూ..ఉపాధి లేని యువత ఆ ఒత్తిడిలో ఇలాంటి అత్యాచార నేరాలకు పాల్పడుతున్నారంటూ వివాదాస్పద వ్యాఖ్యలు చేశారు. అంతేకాక నేరస్తులు ఎవరైనా వారిని వదిలిపెట్టం అని తెలిపారు. ఈ కేసులో నిందితులను పట్టుకోవడానికి సాయం చేసినవారికి లక్ష రూపాయల బహుమతి కూడా ఇస్తామని ప్రకటించారు. నిందితులంతా తమ ఊరికి చెందిన వారేనని బాధితురాలు పేర్కొన్న నేపథ్యంలో ఈ ఘటనకు సంబంధించిన ప్రధాన నిందుతుడు రాజస్తాన్‌లో డిఫెన్స్‌ అధికారిగా పనిచేస్తున్నట్లు సమాచారం. మరో ఇద్దరు నేరస్తుల వివరాలు తెలియాల్సి ఉందని పోలీసులు తెలిపారు.

చంఢీఘర్‌: హర్యానాలో దారుణం చోటుచేసుకుంది. గతంలో సీబీఎస్‌ఈ ఎగ్జామ్స్‌లో టాపర్‌గా నిలిచి.. రాష్ట్రపతి చేతుల మీదుగా అవార్డు అందుకున్న ఓ యువతిపై దుండగులు సామూహిక అత్యాచారానికి పాల్పడటం కలకలం రేపింది. వివరాల్లోకి వెళ్తే.. హర్యానాలోని రేవారి గ్రామానికి చెందిన 19 ఏళ్ల యువతి ప్రస్తుతం డిగ్రీ రెండో సంవత్సరం చదువుతున్నారు. బుధవారం ఊరికి సమీపంలోని కోచింగ్‌ సెంటర్‌ నుంచి ఇంటికి తిరిగివచ్చేటప్పుడు కారులో వచ్చిన ముగ్గురు యువకులు ఆమెను కిడ్నాప్ చేసి అత్యాచారని పాల్పడ్డారు. ఆ తర్వాత నిందితులు స్పృహ కొల్పోయిన బాధితురాలిని బస్టాండ్‌ సమీపంలో పారేసి వెళ్లిపోయారు. నిందితులంతా తమ ఊరికి చెందిన వారేనని బాధితురాలు పేర్కొన్నారు. తనకు జరిగిన అన్యాయంపై తల్లిదండ్రులు సాయంతో పోలీసులను ఆశ్రయించారు.  ఈ ఘటనపై బాధితురాలి తల్లిదండ్రులు మాట్లాడుతూ.. పోలీసులు తొలుత తమ ఫిర్యాదును స్వీకరించడానికి ముందుకు రాలేదని తెలిపారు. నిందితులు పోలీసులను బెదిరించారని.. తాము కేసు నమోదు చేయడానికి పలు పోలీసు స్టేషన్‌లు తిరగాల్సి వచ్చిందని ఆవేదన వ్యక్తం చేశారు. సీబీఎస్‌ఈ బోర్డ్‌ ఎగ్జామ్స్‌లో టాప్‌ ర్యాంక్‌ సాధించినందుకు ప్రధాని నరేంద్ర మోదీ తమ కూతురిని ప్రశంసించారని తెలిపారు. మోదీ బేటీ బచావో భేటీ పచావో అంటారని.. కానీ అది ఎలా సాధ్యమని ప్రశ్నించారు. తమ కూతురికి న్యాయం జరగాలని డిమాండు చేశారు. ఇప్పటివరకు పోలీసులు ఎటువంటి దర్యాప్తు చేపట్టలేదని పేర్కొన్నారు.  బాధితురాలి ఫిర్యాదుపై స్పందించిన ఓ పోలీసు అధికారి.. ఘటన జరిగిన ప్రదేశం ఆయన స్టేషన్‌ పరిధిలో రాకపోవడంతో జీరో ఎఫ్‌ఐఆర్‌ నమోదు చేశారు. కాగా దీనిని శుక్రవారం ఉదయం రెగ్యూలర్‌ ఎఫ్‌ఐఆర్‌గా సంబంధిత పోలీస్‌ స్టేషన్‌కు బదిలీ చేశామని పోలీసు ఉన్నతాధికారులు తెలిపారు.

న్యూఢిల్లీ: ప్రశ్న పత్రాల లీకేజీ ఇటీవలి కాలంలో పెద్ద సమస్యగా పరిణమించింది. హైస్కూలు స్థాయి నుంచి ఎంసెట్‌ వంటి ప్రవేశపరీక్షలు, పోటీ పరీక్షల వరకు ప్రశ్న పత్రాలు ముందుగానే బయటకు రావడం, దాంతో ఆ పరీక్షలను రద్దు చేసి మళ్లీ నిర్వహించడం సంబంధిత విభాగాలకు తలనొప్పిగా మారింది. సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌(సీబీఎస్‌ఈ) ఈ ఏడాది నిర్వహించిన పది, పన్నెండు తరగతులకు సంబంధించిన గణితం, ఎకనామిక్స్‌ ప్రశ్న పత్రాలు లీకవడంతో ఆ పరీక్షలను మళ్లీ నిర్వహించిన సంగతి తెలిసిందే. ఈ సమస్యను అధిగమించడం కోసం సీబీఎస్‌ఈ మైక్రోసాఫ్ట్‌తో కలిసి డిజిటల్‌ ప్రశ్న పత్రాలను రూపొందించే ప్రక్రియను అభివృద్ధి చేసింది. మూడు నెలల్లో ఈ డిజిటల్‌ ప్రశ్నపత్రం తయారవడం విశేషం. పరీక్షకు ముందే ప్రశ్న పత్రం బయటకు తేవడానికి వీల్లేని విధంగా,ఒకవేళ తెచ్చిన ఏ సెంటర్‌ నుంచి తెచ్చారో వెంటనే తెలిసిపోయే విధంగా ఈ డిజిటల్‌ ప్రశ్న పత్రాన్ని రూపొందించారు.గత జులైలో సీబీఎస్‌ఈ ప్రయోగాత్మకంగా 487 కేంద్రాల్లో  పదో తరగతి సప్లిమెంటరీ పరీక్షలను ఈ డిజిటల్‌ ప్రశ్న పత్రాలతో విజయవంతంగా నిర్వహించింది. దీంతో వచ్చే విద్యా సంవత్సరం నుంచి సీబీఎస్‌ఈ పది,పన్నెండో తరగతుల పరీక్షలన్నింటినీ ఈ డిజిటల్‌ విధానంలోనే నిర్వహిస్తామని మానవ వనరుల అభివృద్ధి శాఖ అధికారులు తెలిపారు. అమలు చేసేదిలా.. విండోస్‌10, ఆఫీస్‌ 365లలో ఉన్న సాఫ్ట్‌వేర్‌ ఆధారంగా ఈ డిజిటల్‌ ప్రశ్నపత్రాలను రూపొందించారు. మొత్తం డిజిటల్‌ ప్రశ్న పత్రాలన్నీ కంట్రోలర్‌ ఆఫ్‌ ఎగ్జామినేషన్స్‌ పర్యవేక్షణలో ఉంటాయి. అక్కడ నుంచే వివిధ పరీక్షా కేంద్రాలకు డౌన్‌లోడ్‌ అవుతాయి. ఈ ప్రశ్న పత్రాన్ని డౌన్‌లోడ్‌ చేసుకోవడానికి సంబంధిత పరీక్షా కేంద్రం అధికారి రెండు రకాల ధ్రువీకరణలను ఇవ్వాల్సి ఉంటుంది. ఓటీపీ ద్వారా లేదా బయోమెట్రిక్‌ ద్వారా ఆ అధికారి తన గుర్తింపును ధ్రువీకరించాలి. ఆధార్‌ ద్వారా కూడా ఈ పని చేయవచ్చు. గుర్తింపు పొందిన అధికారికి కంట్రోలర్‌ ప్రశ్న పత్రాలను ఈ–మెయిల్‌ ద్వారా పంపుతారు. కంట్రోలర్‌ పంపే కోడ్‌ సహాయంతో పరీక్షా కేంద్రం అధికారి ప్రశ్న పత్రాన్ని డౌన్‌లోడ్‌ చేసుకుంటారు. తర్వాత అవసరమైనన్ని కాపీలు ముద్రించి అభ్యర్ధులకు అందజేస్తారు. ఇదంతా పరీక్ష ప్రారంభం కావడానికి కేవలం అరగంట ముందు మాత్రమే జరుగుతుంది. పరీక్షా కేంద్రాల వారీగా డిజిటల్‌ ప్రశ్న పత్రాలపై వేర్వేరు వాటర్‌ మార్క్‌లను ముద్రిస్తారు. దానివల్ల ఒకవేళ ప్రశ్నపత్రం లీకయితే అది ఏ సెంటర్‌లో జరిగిందో వెంటనే తెలుసుకోవచ్చు. ఈ డిజిటల్‌ ప్రశ్నపత్రాల కోసం ప్రతి పరీక్షా కేంద్రంలో విద్యుత్, కంప్యూటర్, ప్రింటర్, ఇంటర్‌నెట్‌లు తప్పనిసరిగా ఉండాలి. కరెంటు లేని చోట జనరేటర్లను ఏర్పాటు చేయాలని, ఇంటర్‌నెట్‌ సదుపాయం లేని కేంద్రాలకు సీడీలను పంపాలని సీబీఎస్‌ఈ నిర్ణయించింది.

న్యూఢిల్లీ: జూలై 8న దేశవ్యాప్తంగా నిర్వహించిన యూజీసీ–నేషనల్‌ ఎలిజిబిలిటీ టెస్ట్‌(నెట్‌) ఫలితాలను సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌(సీబీఎస్‌ఈ) మంగళవారం విడుదలచేసింది. పరీక్ష రాసేందుకు దేశవ్యాప్తంగా 11,48,235 మంది అభ్యర్థులు రిజిస్టర్‌ చేసుకోగా అందులో 8,59,498 మంది పరీక్ష రాశారు. వీరిలో 55,872 మంది అసిస్టెంట్‌ ప్రొఫెసర్‌ ఉద్యోగానికి దరఖాస్తు చేసుకునేందుకు అర్హత సాధించారు. అసిస్టెంట్‌ ప్రొఫెసర్‌ పోస్టుతోపాటు జూనియర్‌ రీసెర్చ్‌ ఫెలోషిప్‌కు దరఖాస్తు చేసుకునేందుకు 3,929 మంది అర్హత సాధించారు. ఈసారి పరీక్షల విధానంలో మార్పులు తెచ్చారు. 84 సబ్జెక్టులకు పరీక్ష నిర్వహించారు. మూడు పేపర్ల విధానాన్ని వదిలేసి రెండు పేపర్లకు పరీక్ష చేపట్టారు. 

న్యూఢిల్లీ : సాధించిన విజయాన్ని ఎవరైనా గుర్తించినప్పుడు కలిగే సంతోషం గురించి చెప్పాల్సిన అవసరం లేదు. అలాంటింది ఓ దివ్యాంగ విద్యార్థిని సాధించిన విజయాన్ని ప్రధాని నరేంద్ర మోదీ గుర్తించి దేశ ప్రజలకు తెలుపడంతో.. ఆ బాలిక ఆనందానికి అవధులు లేకుండా పోయాయి. గురుగ్రామ్‌కు చెందిన 15 ఏళ్ల అనుష్క పాండా వెన్నుముక్కలో కండరాల క్షీణత వల్ల వీల్‌ చైర్‌కే పరిమితమయ్యారు. కానీ తల్లిదండ్రుల ప్రొద్భలంతో తన కలలను నెరవేర్చుకోవడానికి సిద్ధపడ్డారు. ఎన్ని అవంతరాలు ఎదురైనా తన సంకల్పాన్ని మాత్రం వదలలేదు. వీల్‌ చైర్‌లోనే సన్‌ సిటీ స్కూల్‌కు వెళుతూ సీబీఎస్‌ఈ పదవ తరగతి ఫలితాల్లో 97.8 శాతం మార్కులతో టాప్‌ ర్యాంక్‌(వికలాంగుల విభాగంలో) సాధించారు. ఈ విషయం మోదీ దృష్టికి వెళ్లడంతో.. ఆదివారం నాటి మన్‌కీ బాత్‌లో ప్రధాని మాట్లాడుతూ.. అనుష్క ప్రతిభను కొనియాడారు. ఆమె సాధించిన విజయం అద్భుతమని, ఇది ఎందరికో ఆదర్శప్రాయమని తెలిపారు. అనుష్క వెన్నుముక్కలోని కండరాల క్షీణతతో బాధపడుతున్నప్పటికీ.. సమస్యలను అధిగమించి అల్‌ ఇండియా టాపర్‌గా నిలిచారని అభినందించారు. అనుష్కలాగా ఎంతో మంది పేద కుటుంబాలకు చెందిన విద్యార్థులు వారికి ఎదురవుతున్న ప్రతికూల పరిస్థితుల నుంచి బయటకు రాలేకపోతున్నారని ఆవేదన వ్యక్తం చేశారు. బలమైన సంకల్పంతో కష్టపడితే వారు ఎలాంటి లక్ష్యాన్ని అయిన చేరుకోవచ్చని మోదీ వ్యాఖ్యానించారు. చిన్నప్పటి నుంచి అనుష్క జన్యు సంబంధిత వ్యాధితో బాధపడుతున్నట్టు ఆమె తల్లిదండ్రులు పేర్కొన్నారు. ప్రధాని ప్రసంగంలో తనకు శుభాకాంక్షలు తెలపడంపై అనుష్క ఆనందం వ్యక్తం చేశారు. అలాగే మోదీకి కృతజ్ఞతలు తెలిపారు. ఐఐటీలో సీటు సాధించి.. సాఫ్ట్‌వేర్‌ ఇంజనీర్‌ కావడమే తన లక్ష్యమని అనుష్క వెల్లడించారు.

న్యూఢిల్లీ: నీట్‌ ప్రశ్నపత్రాల్లో తప్పులు దొర్లినందుకు గాను విద్యార్థులకు గ్రేస్‌మార్కులు కలపాలన్న మద్రాస్‌ హైకోర్టు తీర్పుపై సుప్రీంకోర్టు స్టే విధించింది. నీట్‌ తమిళం ప్రశ్నపత్రంలో 49 ప్రశ్నలు తప్పుగా ప్రచురితమయ్యాయి. దీనిపై ప్రజా ప్రయోజన వ్యాజ్యం దాఖలైంది. దీన్ని విచారించిన మద్రాస్‌ హైకోర్టు మదురై బెంచ్‌ ఇంగ్లిష్‌ నుంచి తమిళంలోకి అనువదించే క్రమంలో జరిగిన పొరపాటు కారణంగా తప్పుగా ప్రచురితమైన 49 ప్రశ్నలకుగాను పరిహారంగా నాలుగేసి మార్కుల చొప్పున మొత్తం 196 మార్కులు కలపాలని తీర్పిచ్చింది. ఫలితాల జాబితాను మళ్లీ విడుదల చేయాలని నీట్‌ను నిర్వహించిన సీబీఎస్‌ఈను ఆదేశించింది. ఈ తీర్పును సవాల్‌ చేస్తూ సీబీఎస్‌ఈ సుప్రీంకోర్టును ఆశ్రయించగా శుక్రవారం సుప్రీంబెంచ్‌ విచారించింది. హైకోర్టు తీర్పును సమర్ధిస్తే.. తమిళ మాధ్యమంలో పరీక్ష రాసిన విద్యార్థులు మిగతా భాషల్లో రాసిన వారి కంటే మెరుగైన మార్కులు సాధించినట్లవుతుందని న్యాయస్థానం పేర్కొంది. ఈ రకమైన పద్ధతిలో మార్కులు కలపలేమని వ్యాఖ్యానించిన తదుపరి వాదనలను రెండు వారాలకు వాయిదా వేసింది. వైద్య, దంత కళాశాలల్లో ప్రవేశాలకు ఉద్దేశించిన జాతీయ అర్హత, ప్రవేశ పరీక్ష(నీట్‌) మే 6వ తేదీన దేశవ్యాప్తంగా 136 నగరాల్లో జరిగింది. పరీక్షలో 180 ప్రశ్నలకు గాను 720 మార్కులుంటాయి. తమిళనాడులో తమిళ మాధ్యమంలో సుమారు లక్ష మంది విద్యార్థులు ఈ పరీక్ష రాశారు. 

న్యూఢిల్లీ: తరచూ ప్రశ్నాపత్రాల లీకేజీ ఉదంతాలు వెలుగుచూస్తున్న నేపథ్యంలో జాతీయ స్థాయి ప్రవేశ పరీక్షల నిర్వహణలో కేంద్రం భారీ సంస్కరణలకు తెర లేపింది. వైద్య విద్య ప్రవేశ పరీక్ష(నీట్‌), జేఈఈ(మెయిన్స్‌), జాతీయ అర్హత పరీక్ష(నెట్‌) లాంటి పరీక్షలను ఇకపై సీబీఎస్‌ఈకి బదులుగా, కొత్తగా ఏర్పాటైన నేషనల్‌ టెస్టింగ్‌ ఏజెన్సీ(ఎన్‌టీఏ) నిర్వహిస్తుంది. నీట్, ఐఐటీ జేఈఈ–మెయిన్స్‌ పరీక్షలు ఏడాదికి రెండుసార్లు జరుగుతాయి. నీట్‌ను ఫిబ్రవరి, మే నెలల్లో, జేఈఈ–మెయిన్స్‌ను జనవరి, ఏప్రిల్‌ నెలల్లో నిర్వహిస్తారు. విద్యార్థి ఈ పరీక్షలను రెండుసార్లు రాసినా, ఉత్తమ స్కోరునే ప్రవేశాల సమయం లో పరిగణనలోకి తీసుకుంటారు. ఒక్కసారి హాజరైనా సరిపోతుంది. కామన్‌ మేనేజ్‌మెంట్‌ అడ్మిషన్‌ టెస్ట్‌(సీమ్యాట్‌), గ్రాడ్యుయేట్‌ ఫార్మసీ ఆప్టిట్యూడ్‌ టెస్ట్‌(జీప్యాట్‌)ల నిర్వహణ బాధ్యతను కూడా ఎన్‌టీఏకే అప్పగించారు. కేంద్ర మానవ వనరుల అభివృద్ధి మంత్రి ప్రకాశ్‌ జవదేకర్‌ శనివారం ఈ వివరాలను వెల్లడించారు. ప్రశ్నపత్రాల లీకేజీని అడ్డుకుని, పారదర్శకంగా, సమర్థంగా, అంతర్జాతీయ ప్రమాణాలకు దీటుగా పోటీ పరీక్షలు నిర్వహించేందుకే కొత్త విధానం అమల్లోకి తెస్తున్నట్లు ఆయన వివరించారు. ఆయా పరీక్షలకు తాత్కాలిక షెడ్యూల్‌ ప్రకటించారు. నెట్‌తో ప్రారంభం.. విశ్వవిద్యాలయాలు, ఉన్నత విద్యా సంస్థల్లో అసిస్టెంట్‌ ప్రొఫెసర్‌గా పనిచేయాలంటే అర్హత సాధించాల్సిన నెట్‌ పరీక్షతో(డిసెంబర్‌లో) ఎన్‌టీఏ పని ప్రారంభిస్తుంది.  జేఈఈ మెయిన్స్‌ నిర్వహణను ఎన్‌టీఏకు అప్పగించినా, అడ్వాన్స్‌డ్‌ మాత్రం యథావిధిగా ఐఐటీల ఆధ్వర్యంలోనే జరుగుతుందని జవదేకర్‌ వెల్లడించారు. పైన పేర్కొన్న అన్ని పరీక్షలకు సిలబస్, ఫీజు, భాష, ప్రశ్నలు అడిగే తీరు మారవని స్పష్టం చేశారు. టైం టేబుల్‌ను ఎప్పటికప్పుడు మానవ వనరుల మంత్రిత్వ శాఖ వెబ్‌సైట్‌లో అందుబాటులో ఉంచుతామని తెలిపారు. 4–5 రోజుల పాటు జరిగే ఈ పరీక్షలన్నింటినీ ఆన్‌లైన్‌లోనే నిర్వహిస్తామని, పరీక్షకు ఎప్పుడు హాజరుకావాలో విద్యార్థే నిర్ణయించుకోవచ్చని అన్నారు. ప్రశ్నపత్రాల లీకేజీని అరికట్టడానికి అధునాతన ఎన్‌క్రిప్షన్‌ విధానాన్ని అవలంబిస్తామని తెలిపారు. ఎన్‌టీఏ విధానంలో పరీక్షల నిర్వహణ విద్యార్థులకు ఎంతో అనుకూలమని, ఆగస్టు మూడో వారం నుంచి విద్యార్థులు అధీకృత కంప్యూటర్‌ కేంద్రాలకు వెళ్లి ఉచితంగా సాధన చేయొచ్చని జవదేకర్‌ తెలిపారు. పాఠశాలలు, ఇంజనీరింగ్‌ కళాశాలల్లో అలాంటి కేంద్రాలను ఏర్పాటు చేసి, ఆ వివరాలను త్వరలోనే వెల్లడిస్తామని తెలిపారు. గ్రామీణ ప్రాంతాల విద్యార్థులకు కూడా ప్రత్యేకంగా ఉచిత సాధన కేంద్రాలను ఏర్పాటుచేస్తామని వెల్లడించారు.    ఎన్‌టీఏ అంటే... దేశంలో ఉన్నత విద్యా సంస్థల్లో ప్రవేశానికి పరీక్షలు నిర్వహించేందుకు ఎన్‌టీఏని ఏర్పాటుచేయాలని 2017–18 బడ్జెట్‌లో ప్రతిపాదించారు. దానికి కేంద్ర కేబినెట్‌ గతేడాది నవంబర్‌ 10న ఆమోదం తెలిపింది. ఎన్‌టీఏ స్వతంత్ర ప్రతిపత్తి కలిగిన సంస్థగా పనిచేస్తుంది. ప్రముఖ విద్యావేత్తను ఎన్‌టీఏకు డైరెక్టర్‌ జనరల్‌/సీఈఓగా మానవ వనరుల శాఖ నియమిస్తుంది. నిపుణులు, విద్యావేత్తల నేతృత్వంలోని 9 వేర్వేరు విభాగాలు సీఈఓకి సహాయకారిగా ఉంటాయి.యూజీసీ, ఎంసీఐ, ఐఐటీ సభ్యులతో పాలక మండలిని ఏర్పాటుచేస్తారు. కేంద్రం ఎన్‌టీఏకు తొలుత రూ.25 కోట్ల ఏకకాల గ్రాంటు కేటాయిస్తుంది. తరువాత ఆ సంస్థే సొంతంగా నిధులు సమకూర్చుకోవాల్సి ఉంటుంది. ప్రస్తుతం ఎన్‌టీఏకు డైరెక్టర్‌ జనరల్‌గా వినీత్‌ జోషి కొనసాగుతున్నారు.

సాక్షి, అమరావతి/విజయవాడ (హెల్త్‌ యూనివర్సిటీ):  నీట్‌ మెడికల్‌ (యూజీ) రాష్ట్ర ర్యాంకులను డాక్టర్‌ ఎన్టీఆర్‌ హెల్త్‌ యూనివర్సిటీ వైస్‌ చాన్సలర్‌ డాక్టర్‌ సీవీ రావు బుధవారం విడుదల చేశారు. నీట్‌ సీబీఎస్‌ఈ విడుదల చేసిన ర్యాంకుల ఆధారంగా ఈ జాబితా ప్రకటిస్తున్నామన్నారు. నీట్‌ ప్రవేశ పరీక్షలో 8వ ర్యాంకు సాధించిన శ్రీకాకుళం జిల్లాకు చెందిన అంకడాల అనిరుధ్‌బాబు రాష్ట్రస్థాయిలో మొదటి ర్యాంకు సొంతం చేసుకున్నాడు. 680 మార్కులు సాధించిన మొదటి ర్యాంకు నుంచి 96 మార్కులు సాధించిన 39051 ర్యాంకు వరకూ జాబితాలో వెల్లడించారు. విలేకరుల సమావేశంలో డాక్టర్‌ సీవీ రావ్‌ మాట్లాడుతూ ఏపీ నుంచి 54,246 మంది అభ్యర్థులు నీట్‌ మెడికల్‌ పరీక్షకు హాజరుకాగా, 39,051 మంది అర్హత సాధించారన్నారు. ఇందులో ఓపెన్‌ కేటగిరీలో 13,346, బీసీ కేటగిరీలో 16,919, ఎస్సీ కేటగిరీలో 6,784, ఎస్టీ కేటగిరీలో 2,002, దివ్యాంగుల కేటగిరీలో 75 మంది అర్హత సాధించినట్లు వివరించారు. రాష్ట్రవ్యాప్తంగా ఉన్న 1900 ప్రభుత్వ ఎంబీబీఎస్‌ సీట్లలో  283 సీట్లు సెంట్రల్‌ పూల్‌కి ఇచ్చామని, వీటితోపాటు పద్మావతి మెడికల్‌ కళాశాల నుంచి 23 సీట్లు ఎన్‌ఆర్‌ఐలకు కేటాయించామని చెప్పారు. దీంతో మొత్తం 1594 ప్రభుత్వ ఎంబీబీఎస్‌ సీట్లు అందుబాటులో ఉన్నాయన్నారు. ఫాతిమా మైనార్టీ మెడికల్‌ కళాశాలలో 100 సీట్లు అందుబాటులో ఉన్నాయని తెలిపారు.  డెంటల్‌లో వైఎస్సార్‌ జిల్లా కడప, విజయవాడ ప్రభుత్వ డెంటల్‌ కళాశాలల్లో 140 సీట్లలో 21 సీట్లు సెంట్రల్‌పూల్‌కి ఇచ్చామన్నారు. కాగా, ఇంటర్‌æ ఏపీలో చదివి, ఏపీలో చిరునామా ఇచ్చిన వారికి మాత్రమే రాష్ట్రస్థాయి ర్యాంకులు ప్రకటించారు.    ఈనెల 25 నుంచి తొలివిడత కౌన్సెలింగ్‌ ఈనెల 25 నుంచి జూలై 5 వరకు తొలి విడత (ఆన్‌లైన్‌) మెడికల్‌ కౌన్సెలింగ్‌ నిర్వహించనున్నట్లు వీసీ డాక్టర్‌ సీవీ రావు తెలిపారు. తొలి విడత కౌన్సెలింగ్‌లో సీట్లు పొందిన విద్యార్థులు జూలై 12లోగా ఆయా కళాశాలల్లో చేరాలన్నారు. మరో రెండు రోజుల్లో కౌన్సెలింగ్‌ నోటిఫికేషన్‌ విడుదల చేస్తామని పేర్కొన్నారు. అదే విధంగా జూలై 15 నుంచి 26 వరకు రెండో విడత కౌన్సెలింగ్‌ నిర్వహిస్తామని, సీట్లు పొందిన అభ్యర్థులు ఆగస్టు 3లోగా చేరాల్సి ఉంటుందన్నారు.  పై రెండు కౌన్సెలింగ్‌ల్లో మిగిలిన సీట్లు, సెంట్రల్‌ పూల్‌లో ఇచ్చిన సీట్లు మిగిలిపోతే ఆ సీట్లతో కలిపి వాటికి ఆగస్టు 4 నుంచి 8 వరకు మాప్‌ఆప్‌ కౌన్సెలింగ్‌ నిర్వహిస్తామన్నారు. ప్రైవేటు కళాశాలల్లో  అన్ని రకాల (ఏ, బీ, ఎన్‌ఆర్‌ఐ) సీట్లను యూనివర్సిటీనే భర్తీ చేస్తుందన్నారు. ఆగస్టు 18తో కౌన్సెలింగ్‌ ప్రక్రియ ముగుస్తుందని వివరించారు. 

సాక్షి, న్యూఢిల్లీ: జాయింట్‌ ఎంట్రన్స్‌ ఎగ్జామినేషన్‌ (జేఈఈ) అడ్వాన్స్‌డ్‌ ఫలితాలు ఆదివారం విడుదలయ్యాయి. ఐఐటీల్లో ప్రవేశాల కోసం నిర్వహించే ఈ పరీక్షలను ఐఐటీ కాన్పూర్‌ యూనివర్సిటీ మే 20న నిర్వహించింది. ఫలితాలు జేఈఈ అధికారిక వెబ్‌సైట్‌ jeeadv.ac.inలో అందుబాటులో ఉన్నాయి. ‘సాక్షి’ ఎడ్యుకేషన్‌ వెబ్‌సైట్‌లోనూ ఫలితాలు చూడవచ్చు. జేఈఈ అడ్వాన్స్‌డ్‌ 2018 పరీక్షకు 1,55,158 మంది హాజరవగా 18,138 మంది ఐఐటీల్లో ప్రవేశాలకు అర్హత సాధించారు. వీరిలో 16,062 మంది పురుషులు, 2076 మహిళలు ఉన్నారు.  రూర్కి ఐఐటీకి చెందిన ప్రణవ్‌ గోయల్‌ ఆలిండియా టాప్‌ ర్యాంకు సాధించారు. ప్రణవ్‌ 360 మార్కులకు గాను 337 మార్కులు పొందారు. ఐఐటీ గాంధీనగర్‌కు చెందిన సాహిల్‌ జైన్‌ రెండో ర్యాంకు, ఢిల్లీ ఐఐటీకి చెందిన కాలాష్‌ గుప్తా మూడో ర్యాంకు పొందారు. మహిళల క్యాటగిరిలో మీనాల్‌ ప్రకాశ్‌ మొదటి ర్యాంకు కైవసం చేసుకున్నారు. మీనాల్‌ 318 మార్కులు పొంది సీఆర్‌ఎల్‌లో ఆరో ర్యాంకు సాధించారు. ఇక తెలుగు రాష్ట్రాల విద్యార్థుల్లో.. విశాఖపట్నంకు చెందిన కేవీఆర్‌ హేమంత్‌ కుమార్‌ చోడిపిల్లి ఆలిండియా ఏడో ర్యాంకు సాధించడంతో పాటు కాన్పూర్‌ ఐఐటీ పరిధిలో టాపర్‌గా నిలిచాడు. ఎస్టీ క్యాటగిరిలో హైదరాబాద్‌ విద్యార్థి శివతరుణ్‌ మొదటి ర్యాంకు సాధించారు. కాన్పూర్‌ ఐఐటీ పరిధిలో మహిళల విభాగంలో వినీత వెన్నెల 261మార్కులు సాధించి టాప్‌లో నిలిచారు. 

ప్రైవేటు పాఠశాలలు తమ అత్యాçశతో.. విద్యార్థుల భవిష్యత్తును అంధకారంలో నెట్టేస్తున్నాయి. ఓవైపు ఫీజులు.. మరోవైపు పుస్తకాల దందా సాగిస్తున్నారు. ఇదంతా.. ఒక ఎత్తైతే.. ప్రభుత్వ సిలబస్‌నే ప్రామాణికంగా తీసుకోవాలన్న నిబంధనను తుంగలో తొక్కేస్తూ సొంత సిలబస్‌ను పిల్లలపై రుద్దుతున్నారు. దీని వల్ల విద్యార్థులకు భవిష్యత్తులో నష్టం వాటిల్లే ప్రమాదముంది. తెలంగాణ రాష్ట్రంలో సొంత సిలబస్‌తో నడుపుతున్న పాఠశాలలపై విద్యాశాఖాధికారులు దాడులు చేస్తుండగా.. మన జిల్లాలో మాత్రం కార్యాలయం కదలకుండానే ఆ శాఖాధికారులు నిద్దరోతున్నారు. విద్యార్థి పాఠశాల జీవితం అయోమయంలోకి నెడుతోంది. విద్యాశాఖ నిర్లక్ష్యం వహిస్తుండటంతో.. పుట్టగొడుగుల్లా పుట్టుకొస్తున్న ప్రైవేటు స్కూళ్లు.. సొంత నిర్ణయాలు తీసుకుంటూ విద్యార్థుల జీవితాల్ని ఇరుకున పడేస్తున్నాయి. ప్రభుత్వం నిబంధనలు విధించినా.. అవి క్షేత్ర స్థాయిలో అమలు చెయ్యకపోవడంతో.. ఉన్నత చదువులకు వెళ్లే సమయంలో పిల్లలు అర్హత కోల్పోయే ప్రమాదముంది. సాక్షి, విశాఖపట్నం : దేశంలోని అన్ని పాఠశాలల్లో ఒకటి, రెండో తరగతి విద్యార్థులకు హోంవర్కు ఇవ్వడాన్ని నిషేధించాలని కేంద్ర, రాష్ట్ర ప్రభుత్వాలను మద్రాస్‌ హైకోర్టు ఇటీవల ఆదేశించింది. సీబీఎస్‌ఈ పాఠశాలలకు కూడా ఇది వర్తిస్తుందని తెలిపింది. దీంతోపాటు పుస్తకాల మోతను కూడా తగ్గించాలని ఆదేశించింది. ఎన్‌సీఈఆర్‌టీ నిర్దేశించిన మేరకు ఒకటి, రెండో తరగతుల విద్యార్థులకు లాంగ్వేజ్, మేథమేటిక్స్, మూడు నుంచి ఐదు తరగతుల విద్యార్థులకు లాంగ్వేజ్, ఎన్విరాన్‌మెంట్‌ సైన్సెస్, మేథమేటిక్స్‌ మినహాయించి ఇతర ఏ సబ్జెక్టులను ప్రవేశపెట్టకుండా రాష్ట్ర ప్రభుత్వాలను తక్షణమే సూచించాలని కోర్టు కేంద్ర ప్రభుత్వాన్ని ఇటీవల వెలువరించిన తీర్పులో నిర్దేశించింది. తెలంగాణ, మహారాష్ట్ర ప్రభుత్వాలు జారీ చేసిన మార్గదర్శకాల క్రమంలోనే స్కూల్‌ బ్యాగ్‌ల బరువును తగ్గించేందుకు ‘చిల్డ్రన్‌ స్కూల్‌ బ్యాగ్‌ పాలసీ’ని రూపొందించేలా రాష్ట్ర, కేంద్రపాలిత ప్రాంతాల ప్రభుత్వాలను కోరాలని కూడా కేంద్ర ప్రభుత్వాన్ని ఆదేశించింది. 2018–19 విద్యా సంవత్సరం నుంచి  ఈ ఆదేశాలు అమలులోకి వస్తాయి. తమ ఆదేశాలను ఉల్లంఘించే ప్రయత్నం జరిగితే తీవ్రమైన చర్యలుంటాయని కోర్టు హెచ్చరించింది. ఇదో పుస్తక వ్యాపారం తల్లిదండ్రుల నుంచి ఎంత మేర పిండుకోవాలని ప్రైవేట్‌ స్కూళ్లు ఆలోచిస్తున్నాయి. అందిన కాడికి దోచుకునేందుకు అనేక ఫీజుల రూపంలో వసూలు చేస్తున్న స్కూళ్లు.. తాజాగా పుస్తక వ్యాపారానికి తెరతీశారు. సాధారణంగా.. నిబంధనల ప్రకారం ప్రభుత్వ స్కూళ్లకు సంబంధించిన ఒకటో తరగతికి సంబంధించిన ఒక పుస్తకం రూ.10 నుంచి రూ.40 లోపు ఉంటుంది. అలాగే రెండో తరగతికి సంబంధించిన ఒక్కో పుస్తకం కేవలం రూ.20 నుంచి 50 రూపాయలుంటుంది. ఈ తక్కువ ధరలతో పుస్తకాలు అమ్మితే లాభం వచ్చే అవకాశం ఉండదు. అందుకే చాలా పాఠశాలలు కొత్త ఎత్తుగడను వేస్తున్నాయి. పుస్తక ముద్రణ సంస్థతో ముందుగానే మాట్లాడుకొని. తయారీకి అయ్యే ఖర్చు కంటే మూడు రెట్ల ధరను ముద్రించేస్తున్నాయి. దీంతో ఏ స్కూళ్లో చదువుతున్నారో అదే స్కూల్‌ పుస్తకాలు కొనాలనే నిబంధనతో తల్లిదండ్రుల చేతి చమురు వదులుతోంది. ఒకటో తరగతి పుస్తకాలు కొనాలంటే.. రూ.3వేల నుంచి రూ.4 వేలు వసూలు చేస్తున్నారు. అదే ప్రభుత్వ సిలబస్‌ ప్రకారం బోధన జరిగితే.. కేవలం వెయ్యి రూపాయలతో తేలిపోతుంది. ఎల్‌కేజీ, యూకేజీ విద్యార్థులకు గుణాత్మక బోధన చెయ్యాల్సి ఉంటుంది. ఈ తరగతులు చదువుతున్న చిన్నారులను పరిసరాలతో మమేకం చేస్తూ విద్య బోధించాలే తప్ప పుస్తకాలు, హోం వర్క్‌లు ఉండకూడదు. కానీ ఏ ప్రైవేట్‌ స్కూల్‌లోనూ ఈ నిబంధనలు పాటించకుండా పసిమనసులతో పుస్తక వికృత క్రీడను ఆడుతున్నారు.   ఏవేవో పుస్తకాలు తల్లిదండ్రుల బలహీనతను ఆసరాగా చేసుకుంటూ ప్రైవేటు పాఠశాలలు విద్యను వ్యాపారంగా మలచుకుంటున్నాయి. ఎల్‌కేజీ విద్యార్థులకు అవసరం లేని పుస్తకాల్ని సైతం అధిక ధరలకు అంటగడుతున్నారు. ఓనమాలు దిద్దాల్సిన ఎల్‌కేజీ విద్యార్థికి కంప్యూటర్, జీకే, ఎన్విరాన్‌మెంట్‌ సైన్స్‌ పుస్తకాలు కొనుగోలు చేయిస్తుండటం గమనార్హం. ఇవి కూడా ఒక్కో పుస్తకం రూ.70 నుంచి 150 రూపాయల వరకూ ఉంటోంది. స్థాయికి మించిన పుస్తకాలు కొనుగోలు చేయించేస్తున్నారు. చిన్న మెదడుకు చిన్న విద్య అనే సూత్రాన్ని పాటించాలని విద్యా నిపుణులు చెబుతున్నా.. అవన్నీ పెడచెవిన పెట్టేస్తూ.. తల్లిదండ్రుల నుంచి ఎంత గుంజుకోవాలో లెక్కలు వేసుకుంటున్నారు. సైన్స్, సోషల్‌ పాఠాలు సాధారణంగా రెండో తరగతి నుంచి ఒంటబడతాయి. వాటిపై అప్పుడే చిన్నారులకు అవగాహన వస్తుంది. కానీ.. ఎల్‌కేజీలోనే విద్యార్థులకు సైన్స్‌ బోధిస్తున్నారు. అవి వారికి అర్థం కాకపోయినా.. బట్టీ విధానం ద్వారానే నేర్పిస్తూ.. వారిలోని మేధో సంపత్తిని ఆదిలోనే నిర్వీర్యం చేసేస్తున్నారు. 

సాక్షి, హైదరాబాద్‌: వైద్య విద్య సీట్ల భర్తీకి సంబంధించి ప్రస్తుత విద్యా సంవత్సరం నుంచి ‘నేషనల్‌ పూల్‌’అమలు చేయాలని రాష్ట్ర ప్రభుత్వం నిర్ణయించిన విషయం తెలిసిందే. ఈ మేరకు నేషనల్‌ పూల్‌లో చేరాలని రాష్ట్ర ప్రభుత్వం చేసిన ప్రతిపాదనకు.. సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌ఈ), నేషనల్‌ బోర్డ్‌ ఆఫ్‌ ఎగ్జామినేషన్‌ (ఎన్‌బీఈ) అంగీకారం తెలిపాయి. అయితే ఇందుకు అనుగుణంగా నేషనల్‌ పూల్‌ విధానంపై రాష్ట్ర ప్రభుత్వం ఉత్తర్వులు జారీ చేయలేదు. కేంద్ర ప్రభుత్వం నుంచి గత ఫిబ్రవరిలోనే ఆమోదం వచ్చినా.. ఇప్పటి వరకు నేషనల్‌ పూల్‌ విధానంపై స్పష్టత ఇస్తూ ఉత్తర్వులు ఇవ్వలేదు. దీంతో వైద్య విద్య డిగ్రీ సీట్ల భర్తీ ప్రక్రియపై అస్పష్టత నెలకొంది. నేషనల్‌ పూల్‌పై ఉత్తర్వులు జారీ అయితేనే సీట్ల భర్తీకి కౌన్సెలింగ్‌ ప్రక్రియ మొదలవుతుంది. వైద్య విద్య డిగ్రీ సీట్ల భర్తీ కోసం నిర్వహించే జాతీయ అర్హత ప్రవేశ పరీక్ష (నీట్‌) ఫలితాలు ఇటీవల వెల్లడైన విషయం తెలిసిందే. ఈ నేపథ్యంలో సీట్ల భర్తీ కోసం కాళోజీ నారాయణరావు ఆరోగ్య, విజ్ఞాన విశ్వవిద్యాలయం ఏర్పాట్లు చేస్తోంది. జూలైలో నోటిఫికేషన్‌ జారీ చేయనున్నట్లు వర్సిటీ ఉన్నతాధికారులు వెల్లడించారు. అమల్లోనే తెలుగు రాష్ట్రాల కోటా.. నేషనల్‌ పూల్‌ విధానం అమల్లోకి వచ్చినా తెలుగు రాష్ట్రాల కోటా అలానే ఉంటుంది. ఇలా అయితేనే న్యాయపరమైన చిక్కులు ఉండవని న్యాయ శాఖ స్పష్టం చేసింది. దీంతో వైద్య విద్య డిగ్రీ సీట్ల భర్తీలో ఈ ఏడాది నుంచి నేషనల్‌ పూల్‌తోపాటు తెలుగు రాష్ట్రాల కోటా కూడా అమలుకానుంది. దేశంలోని అన్ని ప్రభుత్వ, ప్రైవేటు కాలేజీల్లోని ఎంబీబీఎస్, బీడీఎస్, ఆయుష్‌ వంటి వైద్య విద్య డిగ్రీ సీట్లను నీట్‌ ర్యాంకుల ఆధారంగానే భర్తీ చేస్తారు. ప్రత్యేక ప్రతిపత్తి ఉన్న జమ్మూకశ్మీర్‌ వైద్య సీట్లను సొంతంగానే భర్తీ చేసుకుంటోంది. తెలంగాణ, ఆంధ్రప్రదేశ్‌ రాష్ట్రాలు ఈ ఏడాది నుంచి నేషనల్‌ పూల్‌లోకి చేరాయి. 

సాక్షి, న్యూఢిల్లీ : నీట్‌(నేషనల్‌ ఎలిజిబిలిటీ కమ్‌ ఎంట్రన్స్‌ టెస్ట్‌)- 2018 ఫలితాలను సోమవారం మధ్యాహ్నం వెల్లడించారు. దేశవ్యాప్తంగా మే 6న 2,225 కేంద్రాల్లో నిర్వహించిన నేషనల్‌ మెడికల్‌ ఎంట్రన్స్‌ ఎగ్జామ్‌కు 13 లక్షల మందికిపైగా విద్యార్థులు హాజరయ్యారు. నీట్‌- 2018లో ఏడు లక్షల మంది ఉత్తీర్ణులు కాగా వీరిలో 6.3 లక్షల మంది జనరల్‌ కేటగిరీకి చెందినవారే. ఫలితాల కోసం cbseneet.nic.in, cbseresults.nic.inను క్లిక్‌ చేయవచ్చు. నీట్‌ ఫలితాలను వాయిదా వేయాలంటూ, స్టే ఇవ్వాల్సిందిగా కోరుతూ దాఖలైన పిటిషన్‌ను సుప్రీంకోర్టు తిరస్కరించిన నేపథ్యంలో ఒకరోజు ముందుగానే సీబీఎస్‌ఈ నీట్‌ ఫలితాలను వెల్లడించింది. ఈ రోజు వెల్లడైన నీట్‌ ఫలితాల్లో కల్పనా కుమారి నీట్‌ ఆలిండియా టాపర్‌గా నిలిచారు. 720 మార్కులకు గానూ 690 మార్కులు పొందారు. కాగా ఈ ఏడాది నుంచి తెలుగు రాష్ట్రాలు నేషనల్‌ పూల్‌లోకి రానున్నాయి. ఏపీలోని ప్రభుత్వ మెడికల్‌ కాలేజీల్లో 1,750 సీట్లు ఉండగా 261 నేషనల్‌ పూల్‌లోకి వెళ్లనున్నాయి. ప్రైవేట్‌ మెడికల్‌ కాలేజీల్లో 2250 సీట్లు ఉండగా కన్వీనర్‌ కోటా కింద 1177, బీ కేటగిరీ 730, ఎన్‌ఆర్‌ఐ కోటా కింద 342 సీట్లు అందుబాటులో ఉన్నాయి. తెలంగాణలో మొత్తం 3450 మెడికల్‌ సీట్లు ఉండగా... ప్రభుత్వ మెడికల్‌ కాలేజీల్లో 1250, ప్రైవేట్‌ మెడికల్‌ కాలేజీల్లో 2100 సీట్లు ఉన్నాయి. వీటిలో కన్వీనర్‌ కోటా కింద 1050, బీ కేటగిరీలో 731, ఎన్‌ఆర్‌ఐ కోటా కింద 319 సీట్లు భర్తీ చేయనున్నారు. తెలంగాణలోని 169 సీట్లు నేషనల్‌ పూల్‌లోకి వెళ్లనున్నాయి.

కోల్‌కతా: దేశవ్యాప్తంగా ఉన్న పాఠశాలల్లో 1, 2 తరగతులు చదువుతున్న విద్యార్థులకు త్వరలోనే హోంవర్క్‌ బాధ తప్పనుంది. ఆ తరగతుల విద్యార్థులకు హోంవర్క్‌ ఇవ్వకుండా పాఠశాలలను కట్టడి చేసేందుకు కేంద్ర ప్రభుత్వం రానున్న వర్షాకాల పార్లమెంట్‌ సమావేశాల్లో ‘నో హోంవర్క్‌’ బిల్లును ప్రవేశపెట్టనున్నట్లు కేంద్ర మానవ వనరుల శాఖ మంత్రి ప్రకాశ్‌ జవదేకర్‌ ఆదివారం వెల్లడించారు. ఉచిత నిర్బంధ విద్యా హక్కు చట్టం–2009కు అనుగుణంగా ఈ బిల్లును పార్లమెంట్‌లో ప్రవేశపెడతామని, ఇది  ఆమోదం పొందుతుందని ఆశిస్తున్నట్లు ఆయన తెలిపారు. 1, 2 తరగతుల విద్యార్థుల స్కూల్‌ బ్యాగుల బరువు తగ్గించడంతోపాటు వారికి ఎలాంటి హోంవర్క్‌ ఇవ్వకుండా రాష్ట్రాలు, కేంద్రపాలిత ప్రాంతాలకు ఉత్తర్వులు జారీచేయాల్సిందిగా మద్రాసు హైకోర్టు గత నెల 30న కేంద్రాన్ని ఆదేశించింది. అలాగే ఈ తరగతుల విద్యార్థులకు భాష, గణితం తప్ప మరే ఇతర సబ్జెక్టు బోధించకుండా అన్ని రాష్ట్రాలకు ఉత్తర్వులు జారీ చేయాల్సిందిగా కేంద్రాన్ని హైకోర్టు ఆదేశించింది. దీనిపై మంత్రి స్పందిస్తూ.. కోర్టు తీర్పును స్వాగతిస్తున్నామని, విద్యార్థులపై ఒత్తిడి లేకుండా చేసేందుకు అవసరమైన చర్యలు తీసుకుంటామన్నారు. లెర్న్‌ విత్‌ ఫన్‌ అనే విధానాన్ని తాను విశ్వసిస్తానని ఆయన చెప్పారు.

సీబీఎస్‌ఈ, స్టేట్‌ సిలబస్‌ మేరకు విద్యా బోధనలు సాగిస్తున్న ఒకటి, రెండు తరగతుల విద్యార్థులకు ఇక మీదట హోం వర్క్‌ను రద్దుచేస్తూ మద్రాసు హైకోర్టు ఆదేశాలుజారీచేసింది. పుస్తక భారం మళ్లీ పెరుగుతుండడంపై కోర్టు తీవ్రంగా పరిగణించింది.ఎన్‌సీఈఆర్‌టీ నిబంధనల్ని సీబీఎస్‌ఈ విద్యా సంస్థలు తప్పనిసరిగాఅమలుచేయాల్సిందేని హుకుం జారీచేసింది. సాక్షి, చెన్నై :  ఇటీవల రాష్ట్రంలో సీబీఎస్‌ఈ విద్యా సంస్థలు కోకొల్లలుగా పుట్టుకొస్తున్నాయి. ఇందుకు కారణం అన్నీ నీట్‌ మయం కావడమే. నీట్‌ తరహా శిక్షణ అంటూ ప్రాథమిక స్థాయి నుంచి విద్యార్థుల మీద భారాన్ని మోపే రీతిలో సీబీఎస్‌ఈ విద్యా సంస్థలు విద్యాబోధనల్ని సాగిస్తున్నాయి. నేషనల్‌ కౌన్సిల్‌ ఫర్‌ ఎడ్యుకేషన్‌ల్‌ రీసెర్చ్‌ అండ్‌ ట్రైనింగ్‌(ఎన్‌సీఈఆర్‌టీ) నియమ నిబంధనల్ని తుంగలో తొక్కి మరీ సీబీఎస్‌ఈ విద్యా సంస్థలు వ్యవహరిస్తున్నట్టుగా ఆరోపణలు బయలుదేరాయి. నిర్ణీత పుస్తకాల కంటే, ప్రైవేటు పుస్తకాలను సైతం విద్యార్థుల మీద రుద్దే ప్రయత్నాలు సాగుతున్నాయి. వివిధ పోటీ పరీక్షలు అన్నట్టుగా ప్రైవేటు పుస్తకాల ప్రభావాన్ని విద్యార్థులు మీద మోపుతుండడాన్ని చెన్నైకి చెందిన న్యాయవాది పురుషోత్తమన్‌ పరిగణనలోకి తీసుకున్నారు. ఇటీవల ఆయన మద్రాసు హైకోర్టులో పిటిషన్‌ వేశారు. సీబీఎస్‌ఈలోనూ పుస్తకాల మోత పెరిగిందని, ప్రాథమిక విద్యను అభ్యషిస్తున్న విద్యార్థులు సైతం తమ వయసుకు మించిన పుస్తకాలను మోసుకెళ్లాల్సిన పరిస్థితి ఉందని ఆధారాలతో కోర్టుకు వివరించారు. విద్యార్థులు అత్యధిక బరువు మోయకూడదని, తక్కువ పుస్తకాలను, ఎంపిక చేసిన పుస్తకాలను మాత్రమే ఉపయోగించాలని ఎన్‌సీఈఆర్‌టీ నిబంధనలు పేర్కొంటున్నాయని గుర్తుచేశారు. విద్యార్థులకు హోం వర్క్, అసైన్‌మెంట్‌ అంటూ రకరకాల భారాన్ని ఇంటివద్ద సైతం మోపుతున్నారని వివరించారు. ఆని రకాల నియమ నిబంధనల్ని తుంగలో తొక్కి మరీ విద్యా సంస్థలు వ్యవహరిస్తున్నాయని, దీనిని కట్టడి చేయాలని కోరారు. కోర్టు ఆగ్రహం ఈ పిటిషన్‌ను న్యాయమూర్తి కృపాకరణ్‌ నేతృత్వంలోని బెంచ్‌ విచారణకు స్వీకరించి, ఎన్‌సీఈఆర్‌టీ, సీబీఎస్‌ఈలకు నోటీసులు జారీ చేసింది. ఇందుకు ఎన్‌సీఈఆర్‌టీ కార్యదర్శి హర్షకుమార్‌ వివరణ ఇచ్చారు. ప్రాథమిక స్థాయిలో ఒకటి, రెండు తరగతులకు హోంవర్క్‌ ఇవ్వకూడదన్న నిబంధన ఉందన్నారు. అలాగే, మూడు, నాలుగు, ఐదు తరగతుల విద్యార్థులకు వారంలో రెండు గంటలు మాత్రమే హోం వర్క్‌ ఇవ్వాల్సి ఉందన్నారు. పుస్తకాలు సైతం తక్కువ సంఖ్యలోనే ఉపయోగించాల్సి ఉందని, అది కూడా తాము ఎంపిక చేసిన పుస్తకాలు మాత్రమేనని వివరించారు. విద్యార్థుల మీద ఒత్తిడి, భారం ఉండ కూడదన్న నిబంధనలు ఉన్నాయని కోర్టు దృష్టికి తెచ్చారు. అలాగే, అసిస్టెంట్‌ సొలిసిటర్‌ జనరల్‌ కార్తికేయన్‌ బెంచ్‌ ముందు హాజరై రాష్ట్ర ప్రభుత్వం తరఫున వాదన వినిపించారు. ఇక, సీబీఎస్‌ఈ వర్గాలు తమ తరఫున నిబంధనల్ని కోర్టు దృష్టికి తెచ్చారు. వీటన్నింటిని పరిశీలించి మంగళవారం న్యాయమూర్తి కృపాకరణ్‌ తీర్పు ఇచ్చారు. పుస్తక భారం తగ్గించాలి న్యాయమూర్తి కృపాకరణ్‌ తీర్పు వెలువరిస్తూ, విద్యార్థులకు పుస్తకాలు భారం అని పేర్కొంటూ, ఇందుకు తగ్గ ముసాయిదా ఒకటి కేంద్ర ప్రభుత్వం వద్ద పెండింగ్‌లో ఉన్నట్టు సమాచారం ఉందన్నారు. ఈ దృష్ట్యా, పుస్తక భారం తగ్గింపు వ్యవహారంపై త్వరితగతిన చర్యలు తీసుకోవాల్సిన అవసరం ఉందని వ్యాఖ్యానించారు. ఎంత త్వరగా తగిన చర్యలు తీసుకుంటే, విద్యార్థులకు అంత శ్రేయస్కరం అని అభిప్రాయ పడ్డారు. సీబీఎస్‌ఈ, స్టేట్‌ సిలబస్, ఇతర సిలబస్‌ అనుసరిస్తున్న వారందరికీ ఈ తీర్పు వర్తిస్తుందని పేర్కొంటూ, ఒకటి, రెండు తరగతి విద్యార్థులకు హోం వర్క్‌ను రద్దుచేస్తున్నామని ప్రకటించారు. అలాగే, ఎన్‌సీఈఆర్‌ నిబంధనల్ని తప్పనిసరిగా అనుసరించాల్సిందేని విద్యా సంస్థలకు హుకుం జారీచేశారు. ఆ నియమ నిబంధనల మేరకు ఎంపిక చేసిన పుస్తకాలను ఉపయోగించాలని ఆదేశించారు. ఈ విద్యా సంవత్సరం నుంచే ఈ తీర్పు అమలు చేయాలని ఉత్తర్వులు జారీచేశారు.  ఏమేరకు అమలు చేశారో నాలుగు వారాల్లోపు సీబీఎస్‌ఈ, ఎన్‌సీఈఆర్, స్టేట్‌ సిలబస్‌(రాష్ట్ర ప్రభుత్వం) నివేదికను కోర్టుకు సమర్పించాలని ఆదేశాలు జారీచేశారు. అలాగే, హోం వర్క్‌ రద్దు చేశారా? లేదా, చాప కింద నీరులా హోం వర్క్‌ను విద్యార్థులకు ఇస్తున్నారా..? అని నిఘా వేసే రీతిలో ఫ్లయింగ్‌ స్క్వాడ్‌లను రంగంలోకి దించాలని తీర్పు వెలువరించారు. 

సాక్షి, న్యూఢిల్లీ: పట్టుదలగా ప్రయత్నిస్తే ఫలితాలు వాటంతటవే వస్తాయని మరోసారి రుజువైంది. ఢిల్లీ ట్రాన్స్‌పోర్టు కార్పోరేషన్‌లో పనిచేస్తున్న బస్‌ డ్రైవర్‌ కొడుకు శనివారం విడుదలైన సీబీఎస్‌ఈ ఫలితాల్లో అసాధారణ ప్రతిభ కనబరిచాడు. ఖరీదైన, ‘హైటెక్‌’  ప్రైవేటు విద్యాలయాల్లో చదివితేనే ర్యాంకులు వస్తాయనే అపోహను పటాపంచలు చేశాడు. శనివారం విడుదలైన సీబీఎస్‌ఈ 12వ తరగతి ఫలితాల్లో ఢిల్లీకి చెందిన ప్రిన్స్‌ కుమార్‌ 500 మార్కులకు 485 సాధించి సైన్స్‌ విభాగంలో ప్రభుత్వ పాఠశాలల్లో టాపర్‌గా నిలిచాడు. ఢిల్లీ ఉపముఖ్యమంత్రి ట్విటర్‌లో స్పందిస్తూ.. కుమార్‌ ప్రభుత్వ విద్యాలయాల పట్ల నమ్మకాన్ని పెంచాడని అభినందించారు. ద్వారకా ప్రాంతంలోని సెక్టార్‌ 10లో గల రాజ్‌కియా ప్రతిభా వికాస్‌ విద్యాలయలో విద్యనభ్యసిస్తున్న కుమార్‌ విలేకరులతో మాట్లాడుతూ.. ఇటీవలి కాలంలో ప్రభుత్వం విద్యా పునర్‌వైభవానికి చర్యలు తీసుకుంటోందని చెప్పాడు. ‘మా పాఠశాలలో సౌకర్యాలు చాలా బాగున్నాయి. నా విజయంలో నిపుణులైన మా ఉపాధ్యాయుల సహకారం మరువలేనిది. ప్రభుత్వ పాఠశాలల్లో ఆర్థికంగా, సామాజికంగా వెనకబడిన వర్గాల పిల్లలు ఎక్కువగా చేరుతుంటారు. మా వెన్నుతట్టి ప్రోత్సహిస్తే ఫలితాలు బాగుంటాయ’ని కుమార్‌ తెలిపాడు. తమ పాఠశాలలో పనిచేసే మాస్టార్లు ప్రైవేటు బడుల్లో పనిచేసే వారికంటే ఉన్నత విద్యావంతులని కుమార్ వెల్లడించాడు. ఎలక్ర్టానిక్స్‌ అండ్‌ కమ్యునికేషన్స్‌లో ఇంజనీరింగ్‌ చేస్తానని కుమార్‌ తెలిపాడు. హ్యూమనిటీస్‌ విభాగంలో 95.6 శాతం మార్కులతో చిత్రా కౌశిక్‌ మొదటి స్థానంలో నిలవగా, కామర్స్‌ విభాగంలో 96.2 శాతం మార్కులతో ప్రాచి ప్రకాశ్‌ టాపర్‌గా నిలిచారు. విద్యా శాఖను పర్యవేక్షిస్తున్న సిసోడియా వారిని ట్విటర్‌లో అభినందించారు. మంచి ఫలితాలతో ఎంతో మంది అమ్మాయిలకు ఆదర్శంగా నిలిచారని పేర్కొన్నారు. 168 ప్రభుత్వ పాఠశాలల్లో 100 శాతం ఉత్తీర్ణత నమోదైందని సిసోడియా ఆనందం వ్యక్తం చేశారు. కాగా, సీబీఎస్‌ఈ 12వ తరగతి ఫలితాల్లో ఈసారి ఉత్తీర్ణత పెరిగింది. గతేడాది 82.02 శాతంగా ఉన్న  ఉత్తీర్ణత ఈ యేడు 83.01 శాతానికి పెరిగింది.   Very proud moment, just congratulated Prince Kumar,topper of Delhi Govt school, Science stream in Class 12, Son of a DTC bus driver has got 97% with 100/100 in Maths, 99/100 Eco, 98/100 in Chemistry #DelhiEducationRevolution pic.twitter.com/IeaxhNpX9m — Manish Sisodia (@msisodia) May 26, 2018 It was also touching moment to speak to Prachi Prakash and her family, topper of Delhi Govt school, Commerce stream in Class 12 Daughter of a small private company executive, Prachi got 96.2% with 100/100 in Eco, 99/100 in Math, #DelhiEducationRevolution pic.twitter.com/lQ4eqCXAi8 — Manish Sisodia (@msisodia) May 26, 2018 Was wonderful to talk to a very excited Chitra Kaushik, topper of Delhi Govt school, Arts stream in Class 12 Daughter of an ASI in Delhi Police, she got 95.6% with 100/100 in History, 97/100 in Pol. Science#DelhiEducationRevolution pic.twitter.com/1xr4qZkXOV — Manish Sisodia (@msisodia) May 26, 2018

సాక్షి, న్యూఢిల్లీ : గత నెల రోజులుగా విద్యార్థులు ఎప్పుడెప్పుడా అని ఎదురుచూస్తున్న సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌(సీబీఎస్‌ఈ) పన్నెండో తరగతి ఫలితాలను శనివారం వెల్లడించారు. అయితే ఎప్పటిలాగే ఈసారి కూడా ఉత్తీర్ణత శాతంలో విద్యార్థినులే ముందున్నారు. అదేవిధంగా మొదటి మూడు స్థానాల్లోనూ నిలిచి మరోసారి సత్తా చాటారు. ఉత్తరప్రదేశ్‌కు చెందిన మేఘన శ్రీవాస్తవ 500 మార్కులకు గానూ 499 మార్కులు సాధించి మొదటి స్థానంలో నిలవగా, అదే రాష్ట్రానికి చెందిన మరో విద్యార్థిని అనౌష్క చంద్ర 498 మార్కులతో రెండో స్థానంలో నిలిచారు. రాజస్థాన్‌కు చెందిన చాహత్‌ బోద్‌రాజ్‌ 497 మార్కులు సాధించి మరో ఆరుగురు విద్యార్థినులతో సంయుక్తంగా మూడో స్థానాన్ని ఆక్రమించారు. అసలు ఊహించలేదు... సీబీఎస్‌ఈ ఆలిండియా టాపర్‌ మేఘన శ్రీవాత్సవ మీడియాతో మాట్లాడుతూ.. ‘  టాపర్‌గా నిలవడానికి నేను ప్రత్యేకంగా ట్యూషన్‌కి కూడా వెళ్లలేదు. మంచి మార్కులు వస్తాయని ఊహించాను. కానీ టాపర్‌గా నిలుస్తాననుకోలేదు. చాలా సంతోషంగా ఉంది. సంవత్సరమంతా ఎంతో కష్టపడి చదివాను. అందుకు ఫలితంగా నేడు నా కల నిజమైంది. హార్డ్‌వర్క్‌ చేయడంతోపాటు.. నిలకడ, నిబద్ధత కూడా చాలా ముఖ్యం. ఒత్తిడికి లోనైతే ఏమీ సాధించలేమంటూ’  తన విజయ రహస్యాన్ని వెల్లడించారు. హ్యుమానిటీస్‌ అభ్యసించిన తాను సైకాలజిస్ట్‌ కావాలనుకుంటున్నానని మేఘన తెలిపారు. మరో విద్యార్థిని చాహత్‌ బోద్‌రాజ్‌ కూడా సైకాలజిస్ట్‌గా మంచి పేరు తెచ్చుకోవడమే తన ముం​దున్న లక్ష్యమని పేర్కొన్నారు. కాగా ఫలితాల్లో త్రివేండ్రం (97.32 శాతం), చెన్నై (93.87 శాతం), ఢిల్లీ (89 శాతం) తొలి మూడు స్థానాల్లో నిలిచాయి. గత ఏడాది కంటే ఈ ఏడాది ఉత్తీర్ణత శాతం పెరిగింది. 2017లో 82.02మంది విద్యార్థులు ఉత్తీర్ణులు కాగా, ఈ ఏడాది 83.01 శాతం మంది ఉత్తీర్ణత సాధించారు. అయితే ఈసారి కూడా 88.31 శాతం ఉత్తీర్ణతో విద్యార్థినులే ముందంజలో ఉండగా.. విద్యార్థులు 78.09 శాతం ఉత్తీర్ణత సాధించారు.

తొమ్మిదో తరగతి నుంచి 12వ తరగతి వరకు ప్రతి రోజూ క్రీడా తరగతిని తప్పనిసరి చేస్తూ సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌ఈ) తీసుకున్న నిర్ణయాన్ని  దిగ్గజ క్రికెటర్‌ సచిన్‌ టెండూల్కర్‌ ప్రశంసించాడు. ఇదే విధానాన్ని మిగతా అన్ని తరగతుల వారికి వర్తింపజేయాలని కోరాడు. తద్వారా విద్యార్థుల్లో చురుకుదనం పెంపొందేందుకు వీలుంటుందని పేర్కొన్నాడు.   

సాక్షి, అమరావతి: దేశవ్యాప్తంగా ఎంబీబీఎస్, డెంటల్‌ కోర్సుల్లో ప్రవేశానికి నిర్వహించే జాతీయ అర్హత ప్రవేశపరీక్ష (నీట్‌)ను నేడు (ఆదివారం) నిర్వహించనున్నారు. విశాఖపట్నం, విజయవాడ, తిరుపతి, గుంటూరు, కాకినాడ, కర్నూలు, నెల్లూరు, విజయనగరం, రాజమండ్రిలో పరీక్ష కేంద్రాలు ఏర్పాటు చేశారు. ఆంధ్రప్రదేశ్‌లో 49,210 మంది, తెలంగాణలో 50,856 మంది నీట్‌ రాస్తున్నారు. ఉదయం 10 గంటల నుంచి మధ్యాహ్నం 1 గంట వరకు పరీక్ష జరుగుతుంది. అభ్యర్థులు పరీక్ష కేంద్రాల లోపలికి ఉదయం 7.30 నుంచి 9.30 గంటల్లోపు చేరుకోవాలి. ఆ తర్వాత వచ్చినవారిని లోపలికి అనుమతించరు. దేశవ్యాప్తంగా దాదాపు 13,26,725 మంది పరీక్షకు హాజరవుతున్నారని సీబీఎస్‌ఈ తెలిపింది. నిబంధనలివే.. నేడు నిర్వహించనున్న నీట్‌కు ఎలాంటి అవాంతరాలు ఎదురుకాకుండా, పొరపాట్లకు తావు లేకుండా అన్ని చర్యలు తీసుకున్నామని అధికారులు తెలిపారు. నిబంధనల మేరకు అభ్యర్థులు ఎలాంటి ఆభరణాలు ధరించకూడదని, రింగులు, చైన్‌లు, వాచీలు నిషిద్ధమని చెప్పారు. అదేవిధంగా ఎలక్ట్రానిక్‌ వస్తువు (ఫోన్లు, ట్యాబ్‌లు, బ్లూటూత్‌లు, కాలిక్యులేటర్లు)లను అనుమతించబోమని వెల్లడించారు. అమ్మాయిలు జడ వేసుకుని పరీక్షకు రావాలని పేర్కొన్నారు. అబ్బాయిలు ఫార్మల్‌ డ్రెస్‌లో రావాలని బిగుతుగా ఉన్న జీన్స్‌ ధరించకూడదన్నారు. అబ్బాయిలైనా, అమ్మాయిలైనా బూట్లు ధరించి పరీక్షకు రాకూడదని తెలిపారు. పరీక్ష రాయడానికి పెన్ను, పెన్సిల్‌ను కూడా నిర్వాహకులే ఇస్తారని చెప్పారు. ఈ ఏడాది జాతీయ పూల్‌లో.. ఈ ఏడాది ఒక్క జమ్మూకశ్మీర్‌ మినహా అన్ని రాష్ట్రాలు జాతీయ పూల్‌లోకి వచ్చాయి. ప్రభుత్వ వైద్య కళాశాలల్లో ఉన్న మొత్తం సీట్లలో 15 శాతం జాతీయ పూల్‌కు ఇస్తే.. మిగతా రాష్ట్రాలు ఇచ్చే సీట్లలో మనమూ పోటీ పడొచ్చు. మన రాష్ట్రంలో ప్రభుత్వ పరిధిలో 1900 సీట్లు, ప్రైవేటులో 2200కు పైగా సీట్లు ఉన్నాయి. ప్రభుత్వ కళాశాలల్లోని 1900 సీట్లలో 15 శాతం సీట్లు జాతీయ పూల్‌ కోటా కింద ఇస్తారు. దేశవ్యాప్తంగా 52,105 ఎంబీబీఎస్‌ సీట్లుండగా అందులో ప్రభుత్వ వైద్య కళాశాలల్లో 27,710 సీట్లున్నాయి. ఇందులో 15 శాతం అంటే 4,157 సీట్లు వస్తాయి. ఏపీ నుంచి మరో 285 సీట్లు కలిపితే మొత్తం 4,442 సీట్లు అందుబాటులో ఉంటాయి.  

న్యూఢిల్లీ: గూగుల్‌ సెర్చ్‌లో నేరుగా విద్యార్థులు పరీక్ష ఫలితాలు చూసుకునేందుకు వీలుగా సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌(సీబీఎస్‌ఈ)తో ఒప్పందం కుదుర్చుకున్నట్లు సెర్చ్‌ ఇంజన్‌ దిగ్గజం గూగుల్‌ ప్రకటించింది. తాజాగా విడుదలైన జేఈఈ మెయిన్‌ పరీక్ష ఫలితాలు సహా పరీక్షాసంబంధ సమాచారాన్ని ‘గూగుల్‌ సెర్చ్‌ పేజీ’లో చూడొచ్చు. దీంతో స్మార్ట్‌ఫోన్, డెస్క్‌టాప్‌లలో చాలా త్వరగా, భద్రమైన సమాచారాన్ని పొందొచ్చని గూగుల్‌ పేర్కొంది. గేట్, ఎస్‌ఎస్‌సీ సీజీఎల్, క్యాట్‌ వంటి పరీక్షలకు సంబంధించిన పరీక్ష నిర్వహణ, రిజిస్ట్రేషన్‌ తేదీలు, ముఖ్యమైన లింక్‌లుసహా ఇతర కీలకమైన సమాచారాన్ని గూగుల్‌ సెర్చ్‌ పేజీలో పొందవచ్చు.

సాక్షి, హైదరాబాద్‌: జేఈఈ మెయిన్‌లో తెలుగు విద్యార్థులు మరోసారి సత్తా చాటారు. జాతీయ స్థాయిలో టాప్‌–10 ర్యాంకుల్లో 5 ర్యాంకులు సాధించి భేష్‌ అనిపించుకున్నారు. 360 మార్కులకు నిర్వహించిన ఈ పరీక్షలో.. 350 మార్కులతో ఆంధ్రప్రదేశ్‌కు చెందిన భోగి సూరజ్‌ కృష్ణ మొదటి ర్యాంకును కైవసం చేసుకున్నారు. అవే 350 మార్కులతో ఏపీకి చెందిన కేవీఆర్‌ హేమంత్‌ కుమార్‌ రెండో ర్యాంకు, తెలంగాణకు చెందిన గట్టు మైత్రేయ 5వ ర్యాంకు సాధించారు. ఏపీకి చెందిన దాకారాపు భరత్‌ 345 మార్కులతో 8వ ర్యాంకు, తెలంగాణకు చెందిన గోసుల వినాయక శ్రీవర్ధన్‌ 341 మార్కులతో 10వ ర్యాంకు సాధించారు. 340 మార్కులతో తెలంగాణ విద్యార్థి జాతోతు శివతరుణ్‌ 14వ ర్యాంకు, ఏపీకి చెందిన పిన్నంరెడ్డి లోకేశ్‌రెడ్డి 15వ ర్యాంకు పొందారు. ఇవే కాకుండా టాప్‌–100 లోపు 35 ర్యాంకులను తెలుగు విద్యార్థులే సాధించినట్టు విద్యాసంస్థలు వెల్లడించాయి. భద్రాద్రి కొత్తగూడెం జిల్లా అశ్వారావుపేట మండలం తిరుమలకుంటకు చెందిన కొత్తపల్లి దిలీప్‌ 24వ ర్యాంకు, రంగారెడ్డి జిల్లా మంచాలకు చెందిన అనిరెడ్డి అరవింద్‌రెడ్డి 308 మార్కులతో 157వ ర్యాంకు సాధించారు. ఫలితాలు విడుదల చేసిన సీబీఎస్‌ఈ ఎన్‌ఐటీ, ట్రిపుల్‌ ఐటీ, కేంద్ర ప్రభుత్వ ఆర్థిక సహకారంతో కొనసాగే విద్యాసంస్థల్లో (జీఎఫ్‌టీఐ) ప్రవేశాలకు.. ఐఐటీల్లో ప్రవేశాల కోసం నిర్వహించే జేఈఈ అడ్వాన్స్‌డ్‌కు అర్హులను ఎంపిక చేసేందుకు జేఈఈ మెయిన్‌ పరీక్ష నిర్వహించారు. ఈనెల 8న ఆఫ్‌లైన్‌లో, 15, 16 తేదీల్లో ఆన్‌లైన్‌లో నిర్వహించిన ఈ పరీక్ష ఫలితాలను సెంట్రల్‌ బోర్డు ఆఫ్‌ సెకండరీ ఎడ్యుకేషన్‌ (సీబీఎస్‌ఈ) సోమవారం సాయంత్రం విడుదల చేసింది. 10,74,319 మంది పరీక్షలకు హాజరుకాగా.. తెలంగాణ, ఏపీల నుంచి 75 వేల మంది చొప్పున హాజరయినట్టు అంచనా. అడ్వాన్స్‌డ్‌కు 2,31,024 మంది ఎంపిక ఐఐటీల్లో ప్రవేశాల కోసం మే 20న నిర్వహించనున్న జేఈఈ అడ్వాన్స్‌డ్‌కు ముందుగా ప్రకటించిన ప్రకారం 2.24 లక్షల మంది విద్యార్థులను ఎంపిక చేయాల్సి ఉంది. అయితే దానికి అదనంగా 7,024 మంది కలిపి 2,31,024 మందిని ఎంపిక చేశారు. వివిధ కేటగిరీల్లో సమాన ర్యాంకులు రావడంతో ఈ మేరకు అదనంగా అడ్వాన్స్‌డ్‌కు ఎంపిక చేసినట్టు తెలిసింది. 21 మంది బీసీ గురుకుల విద్యార్థులకు ర్యాంకులు జేఈఈ మెయిన్‌లో 21 మంది బీసీ గురుకుల విద్యార్థులు మంచి ర్యాంకులు సాధించి అడ్వాన్స్‌డ్‌కు అర్హత సాధించారని మహాత్మా జ్యోతిబాపూలే బీసీ గురుకుల విద్యాసంస్థల సొసైటీ కార్యదర్శి మల్లయ్య భట్టు ఓ ప్రకటనలో తెలిపారు. అందులో 9 మంది బాలికలు, 12 మంది బాలురు ఉన్నారని చెప్పారు. ఓబీసీలో గరిష్ట మార్కులు 73 ఓపెన్‌ కేటగిరీలో గరిష్ట మార్కులు 350కాగా.. అడ్వాన్స్‌డ్‌కు కనీస అర్హత మార్కులను (కటాఫ్‌గా) 74గా నిర్ణయించారు. ఓపెన్‌ కేటగిరీ అనంతరం ఓబీసీ నాన్‌ క్రీమీలేయర్, ఎస్సీ, ఎస్టీ, వికలాంగుల కేటగిరీల్లో గరిష్ట అర్హత మార్కులు 73గా తేలాయి. ఇక ఓబీసీ నాన్‌ క్రీమీలేయర్‌లో కటాఫ్‌ 45గా, ఎస్సీల్లో 29గా, ఎస్టీల్లో 24గా, వికలాంగుల్లో 35గా పరిగణనలోకి తీసుకున్నారు. మే 2 నుంచి అడ్వాన్స్‌డ్‌కు దరఖాస్తులు జేఈఈ మెయిన్‌లో అర్హత సాధించిన విద్యార్థులు అడ్వాన్స్‌డ్‌ పరీక్ష కోసం మే 2వ తేదీ నుంచి 7వ తేదీ వరకు ఆన్‌లైన్‌లో దరఖాస్తు చేసుకునేలా ఐఐటీ కాన్పూర్‌ ఏర్పాట్లు చేసింది. ఆన్‌లైన్‌లో రిజిస్టర్‌ చేసుకున్న విద్యార్థులు మే 8వ తేదీ వరకు ఫీజు చెల్లించవచ్చని పేర్కొంది. మే 14 నుంచి 20వ తేదీ వరకు హాల్‌టికెట్లను డౌన్‌లోడ్‌ చేసుకోవచ్చు. 20న పరీక్ష జరుగుతుంది. ఫలితాలను జూన్‌ 10న ప్రకటించేలా షెడ్యూల్‌ రూపొందించారు. ఏటేటా తగ్గిపోతున్న కటాఫ్‌ జేఈఈ అడ్వాన్స్‌డ్‌ పరీక్ష రాసేందుకు అర్హులుగా పరిగణనలోకి తీసుకునే విద్యార్థుల కటాఫ్‌ మార్కులు ఏటేటా తగ్గిపోతున్నాయి. ప్రశ్నపత్రం కఠినంగా ఉంటుండటంతోనే కటాఫ్‌ తగ్గిపోతోందని విద్యా రంగ నిపుణులు పేర్కొంటున్నారు. 2014లో జనరల్‌ కటాఫ్‌ 115 మార్కులుగా ఉండగా.. అది ఇప్పుడు 74 మార్కులకు తగ్గింది. ఓబీసీలో 74 నుంచి 45 మార్కులకు, ఎస్సీలో 53 నుంచి 29 మార్కులకు, ఎస్టీలో 47 నుంచి 24 మార్కులకు కటాఫ్‌ తగ్గిపోయింది. ఇక ఈసారి టాప్‌ మార్కులు కూడా తగ్గిపోయాయి. 360 మార్కులకు నిర్వహించిన పరీక్షలో గతేడాది 354 టాప్‌ మార్కులురాగా.. ఈసారి టాప్‌ మార్కులు 350 మాత్రమే కావడం గమనార్హం.

సాక్షి, న్యూఢిల్లీ : సెంట్రల్ బోర్డ్ ఆఫ్ సెకండరీ ఎడ్యుకేషన్ (సీబీఎస్‌ఈ) సోమవారం జాయింట్ ఎంట్రన్స్ ఎగ్జామినేషన్ (జేఈఈ) మెయిన్స్‌ పేపర్‌-1 ఫలితాలను, ఆల్‌ ఇండియా ర్యాంకులను విడుదల చేసింది. తెలుగు విద్యార్థులు సత్తా చాటారు. విజయవాడకు చెందిన సూరజ్‌ కృష్ణ ఫస్ట్‌ ర్యాంకు, విశాఖకు చెందిన హేమంత్‌కు రెండో ర్యాంకు కైవసం చేసుకున్నారు. ఇక హైదరాబాద్‌ కు గట్టు మైత్రేయకు ఐదో వచ్చింది. జేఈఈ మెయిన్స్‌-2018 ఫలితాల వివరాలను jeemain.nic.inలో చూసుకోవచ్చు. ఈ ఏడాది జేఈఈ మెయిన్స్‌ పరీక్షలకు దేశవ్యాప్తంగా 11 లక్షల మంది విద్యార్థులు హాజరయ్యారు. ఉభయ తెలుగు రాష్ట్రాల నుంచి దాదాపు 1.50 లక్షల మంది ఈ పరీక్షలు రాశారు. మెయిన్స్‌ కటాఫ్‌ ద్వారా 2.24 లక్షల మంది విద్యార్థులు జేఈఈ అడ్వాన్స్‌డ్‌ పరీక్షలకు అర్హత సాధిస్తారు. వచ్చే నెల 20న జరిగే జేఈఈ అడ్వాన్స్‌డ్ పరీక్షలు జరుగుతాయి. సీబీఎస్‌ఈ బోర్డు సైతం జేఈఈ మెయిన్ 2018 ఫలితాలను cbseresults.nic.in, results.nic.in వెబ్‌సైట్ల ద్వారా విడుదల చేయనుంది. మెయిన్స్‌ పేపర్‌-2 ఫలితాలను వచ్చే నెల 31న సీబీఎస్‌ఈ విడుదల చేయనుంది. తగ్గుతున్న ఆసక్తి 2015–16 విద్యా సంవత్సరంలో 12.93 లక్షల మంది విద్యార్థులు జేఈఈ మెయిన్‌ రాసేందుకు దరఖాస్తు చేసుకోగా, 2018–19లో 11.35 లక్షల మంది మాత్రమే దరఖాస్తు చేసుకోవడం ఇందుకు ఉదాహరణ. ఏదో పరీక్ష రాద్దామనే ఉద్దేశంతో కాకుండా సీరియస్‌గా ప్రిపేర్‌ అయ్యే విద్యార్థులే దరఖాస్తు చేసుకుంటున్నారని, దరఖాస్తులు తగ్గడానికి అదే కారణమని విద్యావేత్తలు పేర్కొంటున్నారు. ఇక ప్రవేశాల విషయానికి వస్తే.. నాలుగేళ్ల కిందటి పరిస్థితితో పోల్చితే కొంత మెరుగైనా ఇంకా సీట్లు ఖాళీగానే ఉంటున్నాయి. ఇంకా మిగులే.. ఐఐటీ, ఎన్‌ఐటీ, ట్రిపుల్‌ఐటీ, కేంద్ర ప్రభుత్వ ఆర్థిక సహకారంతో కొనసాగే జాతీయ స్థాయి విద్యా సంస్థల్లో (జీఎఫ్‌టీఐ) ప్రవేశాలు తగ్గిపోతున్నాయి. గతంలో కంటే సీట్ల మిగులు అధికంగా ఉంటోంది. జేఈఈ మెయిన్‌ ర్యాంకుల ఖరారులో ఇంటర్‌ మార్కులకు వెయిటేజీ తొలగించడం, జేఈఈ అడ్వాన్స్‌డ్‌ పరీక్ష రాసేందుకు ఇంటర్‌ మార్కులు 75% (ఎస్సీ, ఎస్టీలకు 65%) ఉంటే చాలన్న సడలింపు ఇచ్చినా సీట్ల మిగులు తగ్గడం లేదు. సీట్ల మిగులు ఉండకుండా చూసేందుకు మూడేళ్ల నుంచి కేంద్ర ప్రభుత్వం వెయిటేజీ తొలగింపు, సడలింపులు వంటి చర్యలు చేపట్టడంతోపాటు ఏడు విడతలుగా ప్రవేశాల కౌన్సెలింగ్‌ నిర్వహిస్తోంది. అయినప్పటికీ మార్పు రావడం లేదు. 2014–15 విద్యా సంవత్సరంలో ఐఐటీల్లో కేవలం 3 సీట్లు మిగిలిపోగా, 2017–18లో 121 సీట్లు మిగిలిపోయాయి. అడ్వాన్స్‌డ్‌కు అర్హుల సంఖ్య పెంచినా.. జేఈఈ మెయిన్‌లో అర్హత సాధించిన వారి నుంచి జేఈఈ అడ్వాన్స్‌డ్‌కు పరిగణనలోకి తీసుకునే విద్యార్థుల సంఖ్యను క్రమంగా పెంచుతున్నా పరిస్థితి అలానే ఉంది. జేఈఈ మెయిన్‌లో అర్హత సాధించిన వారిలో టాప్‌ 1.5 లక్షల మంది విద్యార్థులను గతంలో జేఈఈ అడ్వాన్స్‌డ్‌కు అర్హులుగా తీసుకునేవారు. క్రమంగా దాన్ని టాప్‌ 2 లక్షలకు, టాప్‌ 2.2 లక్షలకు, ప్రస్తుతం టాప్‌ 2.24 లక్షలకు పెంచింది. అయినా సీట్ల మిగులు పెరుగుతోంది. అయితే కాన్పూర్, హైదరాబాద్‌ ఐఐటీల్లో మాత్రం నాలుగేళ్లుగా ఒక్కసీటు కూడా మిగలకపోవడం విశేషం.

న్యూఢిల్లీ: తన అనుబంధ పాఠశాలలన్నీ వచ్చే సంవత్సరం నుంచి విధిగా రోజూ క్రీడలకే ఒక పీరియడ్‌ కేటాయించాలని సీబీఎస్‌ఈ ఆదేశించింది. 9–12 తరగతి విద్యార్థుల్లో శారీరక, మానసిక ఉల్లాసం నింపేలా ఆటలు ఆడించాలని సూచిస్తూ 150 పేజీల మార్గదర్శకాలను విడుదల చేసింది. హెల్త్, ఫిజికల్‌ విద్య(హెచ్‌పీఈ)ని అకడమిక్స్‌లో భాగం చేస్తూ రూపొందించిన కొత్త మార్గదర్శకాల ప్రకారం..పాఠశాలల్లో రోజూ జరిగే ఆటల పీరియడ్‌లో విద్యార్థులంతా మైదానానికి వెళ్లి, బోర్డు పేర్కొన్న జాబితాలోని ఏదో ఒక ఆట లేదా వ్యాయామం చేయాల్సి ఉంటుంది. అందులో విద్యార్థులకు ఇచ్చే గ్రేడ్లను పాఠశాలలు సీబీఎస్‌ఈ వెబ్‌సైట్‌లో పొందుపర్చాలి. విద్యార్థులు వార్షిక పరీక్షలకు హాజరవ్వాలంటే హెచ్‌పీఈలో పాల్గొనడం తప్పనిసరి. అయితే ఇలా వచ్చే గ్రేడ్లను ప్రధాన పరీక్షలో వచ్చిన మార్కులకు కలపరు.

సాక్షి, హైదరాబాద్‌ : రాష్ట్రంలో ఎండలు మండిపోతున్నాయి. రోజురోజుకూ పెరుగుతున్న ఉష్ణోగ్రతలతో నిప్పుల కొలిమిలా మారిపోతోంది. ఇంత ఎండల్లోనూ సీబీఎస్‌ఈ స్కూళ్లలో చదివే విద్యార్థులు.. పాఠశాలలకు వెళ్లక తప్పడం లేదు. సీబీఎస్‌ఈ పాఠశాలల్లో వార్షిక పరీక్షలు ముగిసినా.. యాజమాన్యాలు కొత్త విద్యా సంవత్సరాన్ని ప్రారంభించి తరగతులను కొనసాగిస్తుండటమే దీనికి కారణం. ఎండల తీవ్రతతో పిల్లలు ఇబ్బందులు పడుతున్నా.. విద్యాశాఖ, ప్రభుత్వం స్పందించడం లేదు. గతేడాది ఇలానే.. గతేడాది ఏప్రిల్‌లో రాష్ట్రవ్యాప్తంగా పలుచోట్ల ఉష్ణోగ్రతలు 43 డిగ్రీలకు చేరడంతో.. ప్రభుత్వం పాఠశాలలకు అత్యవసరంగా సెలవులు ప్రకటించింది. ఏప్రిల్‌ 20వ తేదీ నుంచే సీబీఎస్‌ఈ స్కూళ్లు సహా అన్ని పాఠశాలలకు సెలవులు ప్రకటించింది. ఇప్పుడు కూడా ఉష్ణోగ్రతలు 43 డిగ్రీలకు చేరాయి. అయినా సీబీఎస్‌ఈ స్కూళ్లు కొనసాగుతున్నాయి. ఎండలు ఇంతగా ఉన్నా సీబీఎస్‌ఈ పాఠశాలల్లో బోధన కొనసాగుతుండటంతో రాష్ట్రవ్యాప్తంగా సుమారు ఐదు లక్షల మంది వరకు విద్యార్థులు ఇబ్బందులు పడుతున్నారు. స్పందించే వారెవరు? ఎండల తీవ్రత సాధారణం కంటే మూడు డిగ్రీలు అధికంగా ఉన్నా, వడగాడ్పుల తీవ్రత అధికంగా ఉన్నా ఉదయం 11 గంటలలోపు పాఠశాలల్లో బోధనను పూర్తి చేసి విద్యార్థులను ఇళ్లకు పంపించాలన్న నిబంధన ఉంది. ప్రస్తుతం గతంలో కంటే వేసవి తీవ్రత ఎక్కువగా ఉంటుందని వాతావరణ శాఖ స్పష్టం చేసింది. అయితే ఇప్పటికే రాష్ట్ర ప్రభుత్వ అధీనంలోని పాఠశాలకు ఈనెల 12 నుంచే సెలవులు ప్రకటించినా.. సీబీఎస్‌ఈ స్కూళ్ల గురించి విద్యాశాఖ పట్టించుకోలేదు. ఆయా స్కూళ్లు సీబీఎస్‌ఈ అకడమిక్‌ కేలండర్‌ ప్రకారం తరగతులను కొనసాగిస్తూనే ఉన్నాయి.  కల్పించుకునే అధికారమున్నా..  రాష్ట్రంలోని పాఠశాలల నిర్వహణకు సంబంధించిన అంశాల్లో రాష్ట్ర ప్రభుత్వ అజమాయిషీ తప్పకుండా ఉంటుందని ఇదివరకే సీబీఎస్‌ఈ కూడా స్పష్టం చేసింది. ఈ లెక్కన సీబీఎస్‌ఈ స్కూళ్లకు సెలవులు ప్రకటించాల్సిందిగా రాష్ట్ర ప్రభుత్వం ఆదేశించవచ్చు. కానీ ప్రభుత్వం, విద్యాశాఖ స్పందించడం లేదు. ఎండలు పెరిగిపోయిన నేపథ్యంలో.. వెంటనే సెలవులు ప్రకటించాల్సిన అవసరం ఉందని విద్యార్థుల తల్లిదండ్రులు కోరుతున్నారు.  కొన్ని స్కూళ్లు మాత్రం..  గతేడాది వేసవిలో అత్యవసరంగా సెలవులు ప్రకటించిన నేపథ్యంలో.. సీబీఎస్‌ఈ స్కూళ్లు కూడా సెలవులు ఇవ్వాల్సిందేనని, ఆ మేరకు పనిదినాలను సర్దుబాటు చేసుకోవాలని విద్యాశాఖ సూచించింది. దాని ప్రకారం ఈసారి కూడా కొన్ని సీబీఎస్‌ఈ స్కూళ్ల యాజమాన్యాలు పనిదినాలను సర్దుబాటు చేసుకుని పాఠశాలలకు సెలవులను ప్రకటించాయి. కానీ చాలా పాఠశాలలు మాత్రం సెలవులను ప్రకటించకుండా.. పాఠశాలల్లో బోధనను కొనసాగిస్తున్నాయి. దీంతో విద్యార్థులు ఇబ్బందులు పడకతప్పడం లేదు.

సాక్షి, హైదరాబాద్‌: జేఈఈ మెయిన్‌ పరీక్ష కటాఫ్‌ ఈసారి పెరిగే అవకాశం ఉంది. గతేడాదితో పోల్చితే ఈసారి కొంత సులభంగానే ప్రశ్నపత్రం వచ్చినట్లు విద్యార్థులు పేర్కొన్నారు. అయితే ఈసారి సుదీర్ఘ జవాబులు ఉన్న ప్రశ్నలు, కాలిక్యులేటెడ్‌ ప్రశ్నలు రావడంతో వాటిని రాసేందుకు తంటాలు పడాల్సి వచ్చిందని తెలిపారు. వాటి కారణంగా అన్ని ప్రశ్నలకు సమాధానాలు రాయలేని పరిస్థితి నెలకొందని చెప్పారు. గతే డాది కంటే సులభతర ప్రశ్నలు ఎక్కువగా ఉన్నందున ఈసారి జేఈఈ మెయిన్‌ కటాఫ్‌ పెరగనుందని సబ్జెక్టు నిపుణులు భావిస్తున్నారు. మరోవైపు ఫిజిక్స్‌లో వచ్చిన ప్రశ్నలు కొంత తికమక పెట్టేలా ఉండటంతో విద్యార్థులు గందరగోళానికి గురయ్యారు. హైదరాబాద్, వరంగల్, ఖమ్మంలో ఏర్పాటు చేసిన 115 పరీక్ష కేంద్రాల్లో ఆదివారం జేఈఈ మెయిన్‌ పరీక్షలు జరిగాయి. 74,580 మంది దరఖాస్తు చేసుకోగా.. దాదాపు 95 శాతం మంది పరీక్షకు హాజరైనట్లు మూడు ప్రాంతాల్లోని కోఆర్డినేషన్‌ కేంద్రాల ప్రతినిధులు వెల్లడించారు. ఇక జేఈఈ మెయిన్‌ ఆన్‌లైన్‌ పరీక్షలను ఈ నెల 15, 16 తేదీల్లో సీబీఎస్‌ఈ నిర్వహించనుంది. ఈనెల 24న జవాబుల ‘కీ’లను ప్రకటించి, 27 వరకు అభ్యంతరాలను స్వీకరించనుంది. 30న మెయిన్‌ ఫలితాలను ప్రకటించి, 31న ఆలిం డియా ర్యాంకులను వెల్లడించనుంది.  ఫిజిక్స్‌లో 4, మ్యాథ్స్‌లో 3, కెమిస్ట్రీలో 3..  ఎన్‌ఐటీ, ట్రిపుల్‌ఐటీ, ప్రభుత్వ ఆర్థిక సహకారం తో కొనసాగే జాతీయ స్థాయి విద్యా సంస్థల్లో ప్రవేశాలకు, ఐఐటీల్లో ప్రవేశాలకు నిర్వహించే జేఈఈ అడ్వాన్స్‌డ్‌కు విద్యార్థులను ఎంపిక చేసేందుకు సెంట్రల్‌ బోర్డు ఆఫ్‌ సెకండరీ ఎడ్యుకేషన్‌ (సీబీఎస్‌ఈ) జేఈఈ మెయిన్‌ పరీక్షను ఆఫ్‌లైన్‌లో నిర్వహించింది. ఇందులో 90 ప్రశ్నలకు పరీక్ష నిర్వహించింది. మ్యాథ్స్, ఫిజిక్స్, కెమిస్ట్రీ లో 30 చొప్పున ప్రశ్నలు ఉండగా, ఒక్కో ప్రశ్నను 3 మార్కులకు నిర్వహించింది. ఫిజిక్స్‌లో 4 ప్రశ్నలు, మ్యాథ్స్, కెమిస్ట్రీలో మూడు చొప్పున కఠినతరమైన ప్రశ్నలు వచ్చినట్లు సబ్జెక్టు నిపుణులు రామకృష్ణ, ఎంఎన్‌రావు వెల్లడించారు. మ్యాథ్స్, ఫిజిక్స్‌లో సుదీర్ఘ సమాధానాలు ఉన్న ప్రశ్నలు, కాలిక్యులేటెడ్‌ ప్రశ్నలు మరో 10కి పైగా ఉండటంతో విద్యార్థులు వాటిని చేసేందుకు ఎక్కువ సమయం వెచ్చించాల్సి వచ్చింది. దీంతో ప్రతిభావంతులైన విద్యా ర్థులు కాకుండా కొంత బాగా చదవగలిగే వారు వాటికి ఎక్కువ సమ యం తీసుకున్నారు. దీంతో అన్నింటికి సమాధానాలు రాయలేకపోయారు. ఇక సాధారణ విద్యార్థులైతే ఎక్కువ ఇబ్బంది పడాల్సి వచ్చింది. కాగా, ప్రశ్నల సరళి కారణంగా ఈసారి కటాఫ్‌ మార్కులు పెరగన్నాయి. గతేడాదితో పోల్చితే ఈసారి కటాఫ్‌ మార్కులు 15కు పైగా పెరిగే అవకాశ ముంది. గతేడాది జనరల్‌ కేటగిరీలో కటాఫ్‌ మార్కు లు 81 ఉండగా, ఈసారి 98పైనే ఉండనున్నాయి. గతేడాది కాకుండా అంతకుముందు సంవత్సరాల్లో కటాఫ్‌ మార్కులు ఎక్కువగా ఉండగా, గతేడాది తగ్గాయి. ఈసారి మళ్లీ కటాఫ్‌ మార్కులు పెరిగే అవకాశం ఉన్నట్లు సబ్జెక్టు నిపుణులు పేర్కొంటున్నారు. 

న్యూఢిల్లీ : సీబీఎస్‌ఈ పేపర్ల లీకేజీ కేసులో న్యూఢిల్లీ క్రైమ్‌ బ్రాంచ్‌ పోలీసులు శనివారం ముగ్గురిని అరెస్టు చేశారు. ఇటీవల పన్నెండో తరగతి ఆర్థిక శాస్త్రం పరీక్ష పేపర్లు చేతితో రాసినవి  పరీక్షకు ముందే సోషల్ మీడియాలో చక్కర్లు కొట్టిన విషయం తెలిసిందే. పరీక్ష పేపర్ల లీకేజీ కేసులో హిమాచల్‌ప్రదేశ్‌లోని డీఏవీ స్కూలుకు చెందిన ఎగ్జామ్‌ సెంటర్‌ సూపరింటెండెంట్‌ రాకేశ్‌, క్లర్క్‌ అమిత్‌ సహా అశోక్‌ మరో వ్యక్తిని శనివారం పోలీసులు అరెస్టు చేశారు. అనంతరం వీరిని ఢిల్లీకి తరలించారు. ఇటీవల సీబీఎస్ఈ టెన్త్ క్లాస్ మ్యాథ్స్ పేపర్‌తో పాటు ఇంటర్ ఎకనామిక్స్ పరీక్షా పత్రాలను వాట్సాప్‌లో షేర్ చేయడంతో వైరల్ అయ్యాయి. ఇప్పటికే ఈ కేసులో పలువురిని అదుపులోకి తీసుకుని విచారణ చేస్తున్న పోలీసులు తాజాగా ముగ్గురిని అరెస్ట్ చేసి దర్యాప్తు ముమ్మరం చేశారు. రద్దు చేసిన ఇంటర్ ఎకనామిక్స్ పరీక్షను ఈ 25వ తేదీన నిర్వహిస్తామని సీబీఎస్ఈ వెల్లడించింది.

సాక్షి, హైదరాబాద్‌: దేశవ్యాప్తంగా ఇంజనీరింగ్‌ కోర్సుల్లో ప్రవేశాల కోసం నిర్వహించే జేఈఈ మెయిన్‌ రాత పరీక్షలను ఆదివారం (8వ తేదీన) నిర్వహించేందుకు సెంట్రల్‌ బోర్డు ఆఫ్‌ సెకండరీ ఎడ్యుకేషన్‌ (సీబీఎస్‌ఈ) ఏరాట్లు పూర్తి చేసింది. బీఈ/బీటెక్‌లో ప్రవేశాల కోసం పేపర్‌–1 పరీక్ష ఉదయం 9:30 గంటల నుంచి.. బీఆర్క్‌/బీప్లానింగ్‌లో ప్రవేశాల కోసం పేపర్‌–2 పరీక్ష మధ్యాహ్నం 2 గంటల నుంచి జరుగుతాయి. ఈ పరీక్షలకు దేశవ్యాప్తంగా 13 లక్షల మంది విద్యార్థులు హాజరుకానుండగా.. తెలంగాణ నుంచి 74,580 మంది పరీక్ష రాయనున్నారు. వీరికోసం రాష్ట్రంలో హైదరాబాద్, వరంగల్, ఖమ్మంలలో 115 పరీక్షా కేంద్రాలు ఏర్పాటు చేశారు. ఇక ఈ నెల 15, 16వ తేదీల్లో ఆన్‌లైన్‌లో పరీక్షలు నిర్వహించనుండగా.. వాటికి రాష్ట్రం నుంచి మరో 15 వేల మంది విద్యార్థులు హాజరుకానున్నారు. రాతపరీక్ష జరిగే మూడు నగరాలతోపాటు కరీంనగర్, మహబూబ్‌నగర్, నల్లగొండల్లో ఆన్‌లైన్‌ పరీక్షలు జరుగుతాయి.  అత్యధికంగా హైదరాబాద్‌ నుంచే..  ఎన్‌ఐటీ, ట్రిపుల్‌ఐటీ, ఇతర ప్రభుత్వ ఆర్థిక సహాయం పొందే జాతీయ స్థాయి ఇంజనీరింగ్‌ విద్యా సంస్థల్లో (జీఎఫ్‌టీఐ) ప్రవేశాలకు, ఐఐటీల్లో ప్రవేశాల కోసం నిర్వహించే జేఈఈ అడ్వాన్స్‌డ్‌కు అర్హులను ఎంపిక చేసేందుకు సీబీఎస్‌ఈ జేఈఈ మెయిన్‌ పరీక్షను నిర్వహిస్తోంది. దీనికి ఏటా రాష్ట్రం నుంచి 70 వేలకు పైగా విద్యార్థులు హాజరవుతుండగా.. హైదరాబాద్‌ నుంచే అత్యధికంగా పరీక్ష రాస్తున్నారు. ఈసారి కూడా హైదరాబాద్‌లో ఏర్పాటు చేసిన 88 పరీక్షా కేంద్రాల్లో 58,500 మంది విద్యార్థులు పరీక్ష రాయనున్నారు. ఖమ్మంలోని 10 కేంద్రాల్లో 5,280 మంది, వరంగల్‌లోని 17 కేంద్రాల్లో 10,800 మంది విద్యార్థులు హాజరవుతున్నారు.  పెన్నులూ పరీక్షా హాల్లోనే ఇస్తారు..  జేఈఈ మెయిన్‌ పరీక్షకు హాజరయ్యే విద్యార్థులు ఎలాంటి ఎలక్ట్రానిక్‌ పరికరాలు వెంట తెచ్చుకోవద్దని సీబీఎస్‌ఈ స్పష్టం చేసింది. పరీక్ష రాసేందుకు అవసరమైన బాల్‌ పాయింట్‌ పెన్నులను కూడా పరీక్ష హాల్లోనే అందజేస్తామని తెలిపింది. విద్యార్థులు హాల్‌టికెట్‌తోపాటు ఏదైనా ఒరిజినల్‌ గుర్తింపు కార్డు వెంట తెచ్చుకోవాలని సూచించింది. ఉదయం 9:30కు జరిగే పరీక్షకు ఉదయం 7 గంటల నుంచే.. మధ్యాహ్నం 2కు ప్రారంభమయ్యే పరీక్షకు 12:45 గంటల నుంచే పరీక్ష హాల్లోకి అనుమతిస్తామని పేర్కొంది. పరీక్ష ప్రారంభ సమయం తరువాత నిమిషం ఆలస్యమైనా అనుమతించేది లేదని స్పష్టం చేసింది.  

న్యూఢిల్లీ: సీబీఎస్‌ఈ పరీక్షల నిర్వహణ, లోపాలపై సమీక్షించేందుకు కేంద్ర మానవ వనరుల శాఖ ఓ ఉన్నతస్థాయి కమిటీని ఏర్పాటు చేసింది. లీక్‌ తదితర లోపాల్లేకుండా సాంకేతికత సాయంతో భద్రమైన పద్ధతిలో పరీక్షలు నిర్వహించేందుకు ఈ కమిటీ తగు సూచనలు చేయనుంది. బుధవారం ఏర్పాటుచేసిన ఈ ఏడుగురు సభ్యుల కమిటీకి హెచ్చార్డీ మాజీ కార్యదర్శి వినయ్‌శీల్‌ ఒబెరాయ్‌ నేతృత్వం వహిస్తారు. మే 31కల్లా ఈ కమిటీ కేంద్రానికి నివేదిక అందజేస్తుందని పాఠశాల విద్యాశాఖ కార్యదర్శి అనిల్‌ స్వరూప్‌ వెల్లడించారు. సీబీఎస్‌ఈ వ్యవస్థలో భద్రతాపరమైన లోపాలను ఈ కమిటీ సమీక్షిస్తుందని, ట్యాంపరింగ్‌ లేకుండా ప్రశ్నపత్రాలు నేరుగా పరీక్షాకేంద్రాలకు చేరటంపైనా సూచనలు చేస్తుందన్నారు.    పునఃపరీక్ష బోర్డు విచక్షణాధికారమే ప్రశ్నపత్రం లీక్‌ అయిన 12వ తరగతి ఎకనమిక్స్‌ పరీక్షను మళ్లీ నిర్వహించాలన్న సీబీఎస్‌ఈ నిర్ణయాన్ని వ్యతిరేకిస్తూ దాఖలైన ఐదు పిటిషన్లను సుప్రీంకోర్టు కొట్టేసింది. పునఃపరీక్ష నిర్వహించటం సీబీఎస్‌ఈ విచక్షణ పరిధిలోకి వస్తుందని.. దీన్ని కోర్టు ప్రశ్నించలేదని జస్టిస్‌ లావు నాగేశ్వరరావు, జస్టిస్‌ ఎస్‌ఏ బాబ్డేల ధర్మాసనం స్పష్టం చేసింది. 

న్యూఢిల్లీ: దేశాన్ని కుదిపేస్తోన్న సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌(సీబీఎస్‌ఈ) ప్రశ్నాపత్రాల లీకేజీ వ్యవహారం రాజకీయ మలుపు తిరిగింది. సిట్‌ ఆధికారుల బృందం చేపట్టిన దర్యాప్తులో అనేకానేక విషయాలు బయటపడుతున్నాయి. లీకేజీలో కీలక సూత్రధారులుగా భావిస్తోన్న వ్యక్తులంతా బీజేపీ అనుబంధ విద్యార్థి సంఘం ఏబీవీపీలో కీలక నేతలు కావడం విమర్శలకు దారితీసింది. పదో తరగతి మ్యాథ్స్‌ పేపర్‌ లీకేజీలో ప్రధాన ముద్దాయిగా అనుమానిస్తున్న సతీశ్‌ పాండేను ఇప్పటికే జార్ఖండ్‌ పోలీసులు అరెస్ట్‌ చేశారు. జత్రాహిబాగ్‌(జార్ఖండ్‌)లో‘స్టడీ విజన్‌’  పేరుతో  కోచింగ్‌ సెంటర్‌ నిర్వహిస్తోన్న పాండే.. ఛాత్రా జిల్లా ఏబీవీపీ అధ్యక్షుడు కూడా. ఇటు ప్రభుత్వానికి, సీబీఎస్‌ఈ బోర్డుకు వ్యతిరేకంగా జరుగుతోన్న ఆందోళనల్లో ఏబీవీపీ పాలుపంచుకోవడంపైనా మిగతా విద్యార్థి సంఘాలు అభ్యంతరాలు వ్యక్తం చేస్తున్నాయి. జేఎన్‌యూ విద్యార్థి సంఘం నాయకురాలు షైలా రషీద్‌ శనివారం ఈ మేరకు చేసిన వరుస ట్వీట్లు వైరల్‌ అయ్యాయి. ‘‘మీరే లీకేజీలు చేస్తూ, తప్పును కప్పిపుచ్చుకోవడానికి మీరే ఆందోళనలకు నాయకత్వం వహించడం ఎంత దారుణం..’ అని షైలా మండిపడ్డారు. అటు కాంగ్రెస్‌ అనుబంధ సంఘాలు కూడా సతీశ్‌ పాండే ఫొటోలను సర్క్యులేట్‌చేస్తూ ఏబీవీపీ, దాని మాతృసంస్థ బీజేపీపై విమర్శలు గుప్పిస్తోంది. 12వ తరగతి ఎకనామిక్స్‌కు 25న రీ ఎగ్జామ్‌: పేపర్‌ లీకేజీ నేపథ్యంలో 12వ తరగతి ఎకనామిక్స్‌ పరీక్షను తిరిగి నిర్వహిస్తామని చెప్పిన సీబీఎస్‌ఈ బోర్డు.. ఆ తేదిని ఏప్రిల్‌ 25గా పేర్కొంది. అయితే 10వ తరగతి మ్యాథ్స్‌ రీ ఎగ్జామ్‌ తీదీలపై ఇంకా స్పష్టత రాలేదు. కేవలం ఢిల్లీ, హరియాణాలో మాత్రమే టెన్త్‌ మ్యాథ్స్‌ రీ ఎగ్జామ్‌ నిర్వహించే అవకాశం ఉండొచ్చని స్కూల్‌ ఎడ్యుకేషన్‌ కార్యదర్శి అనిల్‌ స్వరూప్‌ శనివారం మీడియాతో చెప్పారు.

న్యూఢిల్లీ: లీకైన∙సీబీఎస్‌ఈ పదవ తరగతి గణితం, 12వ తరగతి ఆర్థికశాస్త్రం పేపర్ల రీ ఎగ్జామ్‌పై ప్రభుత్వం స్పష్టతనిచ్చింది. ‘ఏప్రిల్‌ 25న దేశవ్యాప్తంగా సీబీఎస్‌ఈ 12వ తరగతి ఎకనమిక్స్‌ పరీక్షను నిర్వహిస్తాం. టెన్త్‌ మాథ్స్‌ పరీక్షకు సంబంధించి, పునఃపరీక్ష అవసరమని భావిస్తే.. జూలైలో ఆ పరీక్ష పెడతాం. అదీ లీక్‌ జరిగిందని భావిస్తున్న ఢిల్లీ, దేశ రాజధాని ప్రాంతం(ఢిల్లీ– ఎన్‌సీఆర్‌), హరియాణాల్లో మాత్రమే రీఎగ్జామ్‌ ఉంటుంది. దీనిపై 15 రోజుల్లో నిర్ణయం తీసుకుంటాం’  అని పేర్కొంది. విద్యార్థుల భవిష్యత్తును దృష్టిలో పెట్టుకుని ఈ నిర్ణయం తీసుకున్నట్లు హెచ్చార్డీ మంత్రి జవదేకర్‌ తెలిపారు. ఈ లీక్‌ ఢిల్లీ, హరియాణాలకే పరిమితమైనందున.. దేశవ్యాప్తంగా గణిత పరీక్షను మళ్లీ నిర్వహించదలచుకోలేదని పాఠశాల విద్యాశాఖ కార్యదర్శి అనిల్‌ స్వరూప్‌ స్పష్టం చేశారు. ఇదే అంశాన్ని కేంద్ర హెచ్చార్డీ మంత్రి ప్రకాశ్‌ జవదేకర్‌ ట్వీట్‌ చేశారు. అటు సీబీఎస్‌ఈ పేపర్‌ లీక్‌ ఘటనకు సంబంధించి జార్ఖండ్‌లో ఆరుగురిని అదుపులోకి తీసుకున్నారు. ఈ ఘటనకు సంబంధిం చి కోచింగ్‌ సెంటర్‌ యజమానులు, 18 మంది విద్యార్థులు, పదిమంది వాట్సప్‌ గ్రూప్‌ అడ్మిన్‌లు సహా 45 మందిని ఢిల్లీ పోలీసులు విచారించారు. కాగా, పదోతరగతి గణిత ప్రశ్నాపత్రం లీక్‌ అయిందంటూ.. ఈ పరీక్షకు ముందురోజే సీబీఎస్‌ఈ చైర్‌పర్సన్‌కు అజ్ఞాతవ్యక్తి నుంచి ఈ–మెయిల్‌ వచ్చిందని పోలీసులు వెల్లడించారు. ఈ ఈ–మెయిల్‌ వివరాలివ్వాలంటూ గూగుల్‌కు లేఖ రాశారు.   రాజకీయ దుమారం... తమ తప్పులేకున్నా లీకేజీతో విద్యార్థులు నష్టపోతున్నారని.. ఇదో దురదృష్టకర ఘటన అని కేంద్ర మంత్రి జవదేకర్‌ పేర్కొన్నారు. తీవ్రమైన ఈ సమస్య పరిష్కారాన్ని విద్యార్థులే సవాల్‌గా తీసుకోవాలని ఢిల్లీలో స్మార్ట్‌ ఇండియా హ్యాకథాన్‌ 2018 (సాఫ్ట్‌వేర్‌ ఎడిషన్‌)లో ఆయన పేర్కొన్నారు. ప్రధాని ఇటీవలే విడుదల చేసిన ‘ఎగ్జామ్‌ వారియర్స్‌’ çపుస్తకాన్ని ఉటంకిస్తూ కాంగ్రెస్‌ అధ్యక్షుడు రాహుల్‌ విమర్శించారు. ‘ఎగ్జామ్‌ వారియర్స్‌ 2: పరీక్షపత్రాల లీకేజీ తర్వాత తమ జీవితాలు నాశనమయ్యాయని భావిస్తున్న విద్యార్థులు, తల్లిదండ్రులు తమ ఒత్తిడిని తగ్గించుకునే విధానం’ అనే పేరుతో ప్రధాని పుస్తకం రాయాలని ఎద్దేవా చేశారు. అటు, ఢిల్లీలో సీబీఎస్‌ఈ విద్యార్థులు, ఎన్‌ఎస్‌యూఐ, కాంగ్రెస్‌ కార్యకర్తలు నిరసనలు చేపట్టారు.  

లీకులకు ఆస్కారం లేకుండా, కాపీ రాయుళ్లకు అవకాశమీయకుండా పరీక్షలు నిర్వహించడం తమ వల్ల కాదని పరీక్షల నిర్వహణ బోర్డులు మన దేశంలో తరచు నిరూపించుకుంటున్నాయి. ఈ విషయంలో మిగిలిన బోర్డులకు ఏమాత్రం తీసి పోని కేంద్ర మాధ్యమిక విద్యామండలి(సీబీఎస్‌ఈ) ఈ పరీక్షల సీజన్‌లో లక్షలాది మంది విద్యార్థుల ముందు దోషిగా నిలబడింది. ఇతర బోర్డులతో పోలిస్తే సీబీ ఎస్‌ఈ నెత్తిన బృహత్తర బాధ్యతలున్నాయి. అది దేశవ్యాప్తంగా అన్ని రాష్ట్రాల్లో మాత్రమే కాదు... విదేశాల్లో ఉంటున్న విద్యార్థులకు సైతం పరీక్షలు నిర్వహించాల్సి ఉంటుంది.  ఈసారి పదో తరగతి పరీక్షలకు మొత్తం 16,38,428మంది విద్యార్థులు హాజరుకాగా, 12వ తరగతి పరీక్షలను 11,86,306మంది రాస్తున్నారు. మొత్తం అన్ని బోర్డులు నిర్వహించే పరీక్షలకు హాజరయ్యే విద్యార్థుల్లో సీబీఎస్‌ఈ వాటా 9 శాతం ఉంటుందని అంచనా. మూడేళ్లనుంచి సీబీఎస్‌ఈ అఖిల భారత వైద్య ప్రవేశ పరీక్ష(నీట్‌)ను కూడా నిర్వహిస్తున్నది.  పదో తరగతి విద్యార్థులందరూ ఎంతో కష్ట మని భావించే పరీక్ష లెక్కలు. దాన్ని విజయవంతంగా ముగించుకుని పిల్లలందరూ హోటళ్లలో, రెస్టరెంట్లలో, చాయ్‌ దుకాణాల్లో అనుభవాలను కలబోసుకుంటుండగా బుధవారం మధ్యాహ్నం పరీక్ష రద్దయిన వార్త వెలువడి లక్షలమంది విద్యార్థులను దిగ్భ్రాంతిపరిచింది.  మిగిలిన పాఠ్యాంశాల్లో ప్రతిభను ప్రదర్శించే చాలామంది పిల్లలకు సైతం లెక్కలు ఓపట్టాన కొరుకుడు పడదు. వారి దృష్టిలో అది దాటక తప్పని మహాసాగరం. అలాంటి సంక్లిష్టమైన పాఠ్యాంశంలో మరో మూడు నెలల తర్వాత రెండోసారి పరీక్ష రాయకతప్పని స్థితి ఏర్పడింది. ‘అవసరమనుకుంటే’ లెక్కల పరీక్షను వచ్చే జూలైలో నిర్వహిస్తామని సీబీఎస్‌ఈ చెబుతోంది. అయితే ఆ పరీక్షను ఢిల్లీ, హర్యానాలకే పరిమితం చేయాలా... లేక ఇతర ప్రాంతాల్లో కూడా నిర్వహించాల్సి ఉంటుందా అన్నది బోర్డు ఇంకా తేల్చుకోలేదు. పరీక్షల బాదర బందీ అంతా పూర్తయ్యాక ఫలితాలొచ్చేలోగా సెలవుల్లో ఎటైనా వెళ్లి హాయిగా గడుపుదామనుకునే విద్యార్థులకు ఇదెంత నరకమో వేరే చెప్పనవసరం లేదు. 12వ తరగతి ఎకనమిక్స్‌ పాఠ్యాంశంలో ఏప్రిల్‌ 25న పరీక్ష ఉంటుందని బోర్డు ప్రక టించింది. ఆ తేదీలోగా నిర్వహిస్తే తప్ప యూనివర్సిటీ ప్రవేశాలకు విద్యార్థులు అర్హత కోల్పోతారు.  ప్రశ్నపత్రాలు ఎలా లీకయ్యాయో, ఎక్కడ లీకయ్యాయో 48 గంటలు గడు స్తున్నా బోర్డు పెద్దలకు బోధపడలేదు. అర్థరాత్రి లీకు సంగతి తెలిశాక తనకు నిద్రపట్టలేదని కేంద్ర మానవ వనరుల మంత్రి ప్రకాష్‌ జవడేకర్‌ బాధపడ్డారు. ఆయన బాధపడటంలో అర్ధం ఉంది. ఎందుకంటే ఈ వ్యవహారంలో సీబీఎస్‌ఈ మాత్రమే కాదు... ఆయన శాఖ కూడా బోనెక్కాల్సి ఉంటుంది. తమ వైఫల్యాన్ని అంగీకరించాల్సి ఉంటుంది.  కానీ ఏ నేరమూ చేయని పిల్లలు, వారి తల్లిదండ్రులు పడే బాధ వర్ణానాతీతం. తమ తప్పేమీ లేకుండానే వారు శిక్ష అనుభవించాల్సి ఉంటుంది. పరీక్షల నిర్వహణ కోసం నాలుగు దశాబ్దాలుగా అనుసరిస్తూ వస్తున్న విధానాలను నిరుడు బోర్డు పక్కనబెట్టింది.  గతంలోనూ కొన్ని పర్యాయాలు పరీక్ష పత్రాలు లీకయ్యాయి. కానీ పాత విధానంలో ఏ ప్రశ్నపత్రం లీకయిందో చూసుకుని అది వెళ్లిన కేంద్రాల్లోని విద్యార్థులకు మాత్రమే తిరిగి పరీక్ష నిర్వహిస్తే సరిపోయేది. ఇప్పుడు కూడా ఢిల్లీ, హర్యానాల్లో మరోసారి పరీక్ష పెడితే సరిపోతుందని బోర్డు చెబుతోందిగానీ అదెంతవరకూ సబబైన నిర్ణయమో చెప్పలేం. పాత విధానంలో మూడు రకాల ప్రశ్నపత్రాలు రూపొందేవి. అందులో ఒకటి ఢిల్లీ ప్రాంతానికి, మరొకటి దేశంలోని ఇతర ప్రాంతాలకూ, మూడో రకం ప్రశ్నపత్రం విదేశాల్లో పరీక్ష రాసే విద్యార్థుల కోసం తయారుచేసేవారు. వీటిలో కేవలం 30 శాతం ప్రశ్నలు మాత్రమే ఉమ్మడిగా ఉంటాయి. మిగిలిన 70శాతం ప్రశ్నలూ వేర్వేరుగా ఉంటాయి. మళ్లీ ప్రతి సెట్‌లోనూ మూడు సబ్‌–సెట్‌లు, అన్నిటిలోనూ వేర్వేరు ప్రశ్నలక్రమం ఈ విధానంలోని విశిష్టత. దీనికి సీబీఎస్‌ఈ నిరుడు స్వస్తి పలికింది.  ఒకే రకమైన ప్రశ్నల సెట్‌ రూపొందించి ఆ ప్రశ్నల క్రమం మాత్రం వేర్వేరు ప్రాంతాలకు వేర్వే రుగా ఉండేలా తయారుచేసింది. కనుకనే ఇప్పుడు లీకైన ప్రాంతంలో మాత్రమే కాక... అన్నిచోట్లా పరీక్షలు నిర్వహించక తప్పకపోవచ్చునన్న వాదన వినిపిస్తోంది.  అసలు ప్రశ్నపత్రాలు లీకైన తీరే వింతగా ఉంది. 28న అర్థరాత్రి ఒంటిగంటన్నర దాటాక సీబీఎస్‌ఈ చైర్‌పర్సన్‌ మెయిల్‌కు గుర్తు తెలియని వ్యక్తి మూడు మెయిల్స్‌ పంపాడు. అందులో చేతిరాతతో ఉన్న 12 అటాచ్‌మెంట్లు ఉన్నాయి. అవన్నీ లెక్కల ప్రశ్నపత్రానివే. వాట్సాప్‌ గ్రూపుల్లో ఇవి చక్కర్లు కొడుతున్నట్టు అతడు వెల్లడించాడు.  ప్రధాని నరేంద్ర మోదీ పరీక్షలకెళ్లే పిల్లల కోసం తానే స్వయంగా రాసిన ‘ఎగ్జామ్‌ వారియర్స్‌’ పుస్తకాన్ని గత నెల్లో విడుదల చేశారు. పరీక్షలంటే కంగారు పడాల్సిన అవసరం లేదని, వాటిని పండగలా భావించాలని అందులో ఉద్బో ధించారు. కానీ పిల్లల పరిజ్ఞానాన్ని తెలుసుకోవడానికి ఉపకరించాల్సిన పరీక్షలు సారాంశంలో వారి జ్ఞాపకశక్తిని మాత్రమే మదింపు వేస్తున్నాయి. బట్టీపట్టడాన్ని ప్రోత్సహిస్తున్నాయి. సృజనాత్మకత చోటీయడంలేదు. కనీసం ఏడెనిమిది నెలలు రాత్రింబగళ్లు కష్టపడితే తప్ప ఫలితమీయని పరీక్షల్ని పిల్లలు పండగలా ఎలా భావించగలుగుతారు?  పరీక్షల్లో ఒక్క మార్కు తగ్గితే గ్రేడ్‌ గల్లంతవుతుంది. ఇత రుల కంటే గ్రేడ్‌ బాగుంటేనే ‘మెరుగైనచోట’ చదవడం సాధ్యమవుతుంది. ఈ లీకుల పర్యవసానంగా కొందరు అయాచితంగా అందలాలెక్కుతుంటే ఏటికేడాదీ కష్టపడినా చాలామంది నాసిరకం గ్రేడ్లతో సరిపెట్టుకుంటున్నారు. ఇకపై సీబీ ఎస్‌ఈ, ఏఐసీటీఈ వగైరా బోర్డుల పరీక్షలన్నిటి నిర్వహణకూ జాతీయ పరీక్షా సంస్థ (ఎన్‌టీఏ) రంగంలోకి రాబోతోంది. మరి దాని తీరెలా ఉంటుందో చూడాలి. ఇప్పు డనుసరిస్తున్న విధానానికి స్వస్తి చెప్పి విద్యార్థుల్లో నిపుణత, మేధో సంపత్తి, సంక్లి ష్టతలను అధిగమించే శక్తి వగైరాలెలా ఉన్నాయో మదింపు వేసే పరీక్షా విధానం అమల్లోకొస్తేనే ఎంతో కొంత ప్రయోజనకరం.

సీబీఎస్‌ఈ 12వ తరగతి ఎకనామిక్స్‌, 10వ తరగతి మ్యాథ్స్‌ పరీక్షకు సంబంధించిన ప్రశ్నాపత్రం లీకేజీ వ్యవహారంపై దేశవ్యాప్తంగా సీబీఎస్‌ఈపై నిరసనలు వెల్లువెత్తుతున్న సంగతి తెలిసిందే. ఈ వ్యవహారంపై బాలీవుడ్‌ నటి రాణి ముఖర్జీ స్పందించారు. పరీక్షలను మళ్లీ నిర్వహిస్తామన్న సీబీఎస్‌ఈ నిర్ణయాన్ని ఆమె స్వాగతించారు. స్టూడెంట్స్‌ పరీక్షలకు బాగా సిధ్దమై ఉంటే సమస్యే ఉండదన్నారు. అటాంటప్పుడు సీబీఎస్‌ఈ పరీక్షల్ని మళ్లీ నిర్వహించడం పట్ల విద్యార్థులు కలత చెందాల్సిన పనిలేదని సూచించారు. రీ-టెస్ట్‌తో సిలబస్‌లో మార్పులేమీ ఉండవు గనుక పరీక్షలకు చక్కగా ప్రిపేర్‌ అయిన స్టూడెంట్స్‌కు సమస్య లేదన్నారు. అయితే ఆదరాబాదరాగా పరీక్షలకు సిద్ధమయ్యే విద్యార్థులకు సమస్యలు తప్పవని అభిప్రాయపడ్డారు. మొదటినుంచీ  ప్రిపరేషన్‌ మొదలుపెడితే పరీక్షల్లో మంచి మార్కులు పొందొచ్చని విద్యార్థులకు ఆమె సూచించారు. రాణీ ప్రధాన పాత్రలో నటించిన ‘హిచ్కీ’ సినిమా సక్సెస్‌ మీట్‌లో ఆమె ఈ విషయాలు వెల్లడించారు. ఈ సినిమాలో ఆమె ‘టురేట్‌ సిండ్రోమ్‌’ అనే వ్యాధితో బాధపడే స్కూల్‌ టీచర్‌ పాత్రలో నటించారు. కాగా 12వ తరగతి ఎకనామిక్స్‌ పరీక్షను ఏప్రిల్‌ 25న తిరిగి నిర్వహించనున్నారు. అలాగే పదో తరగతి మ్యాథ్స్‌ పరీక్షను కేవలం ఢిల్లీ, హర్యానాలో మాత్రమే నిర్వహించాలని కేంద్ర విద్యాశాఖ యోచిస్తోంది. ఇందుకు సంబంధించి 15 రోజుల్లో నిర్ణయం తీసుకోనున్నట్లు తెలిపింది.

న్యూఢిల్లీ: సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌(సీబీఎస్‌ఈ) పరీక్షా పత్రాల లీకేజీ వ్యవహారంపై నిరసనలు హోరెత్తుతున్నాయి. 12వ తరగతి ఎకనామిక్స్‌, 10వ తరగతి మ్యాథ్స్‌ సబ్జెక్టులకు మళ్లీ పరిక్ష నిర్వహిస్తామని అధికారులు ప్రకటించడంపై విద్యార్థులు, తల్లిదండ్రులు ఆగ్రహావేశాలు వ్యక్తం చేశారు. గురువారం జంతర్‌ మంతర్‌ వద్ద ఆందోళన చేసిన విద్యార్థులు.. శుక్రవారం సీబీఎస్‌ఈ ప్రధాన కార్యాలయం ఎదుట నిరసనలకు దిగారు. ‘పరీక్షలు సజావుగా నిర్వహించడంలో సీబీఎస్‌ఈ విఫలమైంది. వారు చేసిన తప్పులకు మేం బాధను అనుభవించాలా?’ అని విద్యార్థులు నినదించారు. ‘కొందరు చేసిన నేరానికి అందరికీ శిక్షలెందుకు’ అని వాదిస్తున్నారు. ఇంకొందరైతే సీబీఎస్‌ఈపై తీవ్ర ఆరోపణలతో కూడిన రాతలను ప్లకార్డుల్లో ప్రదర్శించారు. లీకేజీ తర్వాత పటిష్ఠచర్యలు: మార్చి 28న జరిగిన(12వ తరగతి ఎకనామిక్స్‌, 10వ తరగతి మ్యాథ్స్‌) పరీక్షకు సంబంధించిన ప్రశ్నాపత్రం.. ఒక రోజు ముందే లీకైంది. ఓ కోచింగ్‌ సెంటర్‌ నిర్వాహకుడు బోర్డు నుంచి ఫ్యాక్స్‌ ద్వారా క్వశ్చన్‌ పేపర్‌ను రాబట్టి, వాట్సప్‌ ద్వారా విద్యార్థులకు చేరవేశాడని, ఇందుకుగానూ భారీ మొత్తంలో డబ్బులు చేతులు మారినట్లు పోలీసు దర్యాప్తులో తేలింది. ఈ వ్యవహారానికి సంబంధించి మొత్తం 25 మందిని పోలీసులు ప్రశ్నించారు. లీకేజీ వెలుగులోకి రావడంతో ఆ రెండు పరీక్షలను రద్దుచేస్తున్నట్లు సీబీఎస్‌ఈ అధికారులు ప్రకటించారు. ఈ మేరకు ఒకటిరెండు రోజుల్లో కొత్త తేదీలను వెల్లడిస్తామని చెప్పినా.. ఆ మేరకు ముందడుగు పడలేదు. దీంతో విద్యార్థుల్లో ఆందోళన రెట్టింపైంది. లీకేజీ కలకలంతో అప్రమత్తమైన అధికారులు మిగతా పరీక్షల్లో కొత్త పద్ధతిలో క్వశ్చన్‌ పేపర్లను పంపిణీ చేయనున్నారు. ఢిల్లీ సర్కార్‌ ముందే హెచ్చరించినా..: సీబీఎస్‌ఈ ప్రశ్నాపత్రాల లీకేజీకి సంబంధించి తమకు కొన్ని ఫిర్యాదులు అందాయని ఢిల్లీ సర్కార్‌ మార్చి 15నే వెల్లడించింది. ఈ వ్యవహారంపై దృష్టిసారించాలని సీబీఎస్‌ఈని హెచ్చరించింది. కానీ అధికారులు మాత్రం లీకేజీ ఫిర్యాదులను కొట్టిపారేశారు. అన్ని పరీక్షా కేంద్రాల నుంచీ సమాచారం తెప్పించుకున్నామనీ, పేపర్‌ లీక్‌ కాలేదని, పరీక్షల ప్రతిష్టను దెబ్బతీసేందుకు కొందరు దుండగులు పేపర్‌ లీక్‌ అయినట్లుగా సామాజిక మాధ్యమాల్లో  పోస్ట్‌లు పెట్టి ఉంటారని సీబీఎస్‌ఈ పేర్కొంది. చివరికి లీకేజీ నిజమని తేలడంతో నాలుక కరుచుకున్నారు. తేలికగా తీసుకోవద్దు: లీకేజీ వ్యవహారం ఇటు రాజకీయంగానూ దుమారం రేపుతోంది. పరీక్షల నిర్వహణలో విఫలమైన మానవ వనరుల శాఖ మంత్రి ప్రకాశ్‌ జవదేకర్‌ తక్షణమే పదవి నుంచి తప్పుకోవాలని కాంగ్రెస్‌ అధికార ప్రతినిధి రణదీప్ సుర్జేవాలా అన్నారు. ఢిల్లీ మాజీ సీఎం షీలా దీక్షిత్‌.. శుక్రవారం మీడియాతో మాట్లాడుతూ లీకేజీ అంశాన్ని ఏమాత్రం తేలికగా తీసుకోవద్దని, సమగ్ర దర్యాప్తు చేపట్టాలని ప్రభుత్వానికి సూచించారు.

తిరుపతి ఎడ్యుకేషన్‌ : సీబీఎస్‌ఈ మ్యాథ్స్‌(గణితం) పరీక్ష ప్రశ్న పత్రం లీకైన వార్త విద్యార్థులు, తల్లిదండ్రులను ఆందోళనకు గురిచేసింది. పరీక్షలు ముగిశాయనే సంతోషం మటుమాయమైంది. ఎక్కడో ప్రశ్న పత్రం లీకేజీ అయితే దేశవ్యాప్తంగా ఉన్న విద్యార్థులను శిక్షించ డం సరికాదని విద్యార్థుల తల్లిదండ్రులు మండిపడు తున్నారు.సెంట్రల్‌ బోర్డు ఆఫ్‌ సెకండరీ ఎడ్యుకేషన్‌(సీబీఎస్‌ఈ) పదో తరగతి పరీక్షలు ఈ నెల 5న దేశవ్యాప్తంగా ప్రారంభమయ్యాయి. ఎంతో పకడ్బందీగా పరీక్షలను నిర్వహిస్తున్నారు. దేశవ్యాప్తంగా దాదాపు 16.35లక్షలకు పైగా విద్యార్థులు పదో తరగతి పరీక్షను రాశారు. ఈ నెల 28న మ్యాథ్స్‌ పరీక్ష జరిగింది. సాధారణంగా సీబీఎస్‌ఈ పరీక్షల్లో మ్యాథ్స్‌ పరీక్ష చాలా కఠినంగా ఉం టుందని నిపుణులు చెబుతున్నారు. సోషియల్‌ పరీక్షకు, మ్యాథ్స్‌ పరీక్షకు మధ్య నాలుగు రోజులు సమయం ఉండడంతో విద్యార్థులు రేయింబవళ్లు  చదివారు. ఈ ఏడాది ఒకింత సులువుగా ప్రశ్నలు ఉండడంతో విద్యార్థులు సంతోషంతో పరీక్షలు రాశారు. చిత్తూరు జిల్లాలో దాదాపు 15సీబీఎస్‌ఈ స్కూల్స్‌ ఉన్నాయి. ఒక్క తిరుపతి నగర పరిసరాల్లో కేంద్రీయ విద్యాలయ నెం 1, 2, భారతీయ విద్యాభవన్, ఎడిఫై, అకార్డ్, శ్రీవిద్యానికేతన్, సిల్వర్‌బెల్స్, చిత్తూరులో బీవి.రెడ్డి,  పీఈఎస్, చౌడేపల్లె వద్ద విజయవాణి, మనదపల్లెలోని జవహర్‌ నవోదయ వంటి పాఠశాలలు సీబీ ఎస్‌ఈ పరిధిలోకి వస్తాయి. ఈ ఏడాది ఆయా పాఠశాలల నుంచి సుమారు వెయ్యికిపైగా విద్యార్థులు పరీక్షలు రాశారు.  పరీక్షలు ముగిసిన ఆనందంలో ఉన్న విద్యార్థులకు రెండు గంటల వ్యవధిలోనే మ్యాథ్స్‌ పేపర్‌ లీకై నట్లు వచ్చిన వార్తతో షాక్‌కు గురయ్యారు. అదే రోజు 12వ తరగతి విద్యార్థులకు ఎకనామిక్స్‌ పరీక్ష జరిగింది. ఈ రెండు పేపర్లూ లీక్‌ అయ్యాయని, ఈ రెండింటికి తిరిగి పరీక్షను నిర్వహిస్తామని, దానికి సంబంధించిన తేదీని వారంలోపు ప్రకటిస్తామని సీబీఎస్‌ఈ ప్రకటించింది. దీంతో విద్యార్థులు డీలా పడ్డారు. గత ఏడాది మ్యాథ్స్‌లో 7చాప్టర్లే ఉన్నాయని, ఈ ఏడాది 15కి పెంచారని, మ్యాథ్స్‌ పరీక్ష అంటేనే చాలా కష్టమని, అలాంటిది తిరిగి నిర్వహిస్తామనడం మళ్లీ టెన్షన్‌కు గురిచేస్తోందని నవశక్తి, కీర్తి, సంజన తదితరులు వాపోయారు.  మ్యాథ్స్‌ పేపర్‌ లీక్‌ వ్యవహారం ఢిల్లీలో జరిగిందంటూ తల్లిదండ్రులు చెబుతున్నారు. అలాంటప్పుడు ఢిల్లీ రీజియన్‌లో రీ–ఎగ్జామ్‌ నిర్వహించాలని, అలా కాకుండా దేశవ్యాప్తంగా మ్యాథ్స్‌ పరీక్షను తిరిగి నిర్వహిస్తామని చెప్పడం ఎంతవరకు సమంజసమంటూ ఇటు తల్లిదండ్రులు, అటు సీబీఎస్‌ఈ పాఠశాలల యాజమాన్యాలు ప్రశ్నిస్తున్నాయి. బాధ్యులపై కఠినంగా వ్యవహ రించాలేగానీ ఏకంగా పరీక్షనే రద్దు చేయడం సరికాదని  , ఇప్పటికైనా కేంద్ర ప్రభుత్వం, సీబీఎస్‌ఈ అధికారులు పునరాలోచించాలని, లీక్‌ అయిన డిల్లీ రీజియన్‌లో రీ–ఎగ్జామ్‌ నిర్వహించాలని కోరుతున్నారు. చాలా కష్టపడి చదివాం సీబీఎస్‌ఈ పదో తరగతి పరీక్షలో మ్యాథ్స్‌ ప్రశ్నపత్రం చాలా కష్టంగా ఉంటుంది. పైగా ఈ ఏడాది 7నుంచి 15కు చాప్టర్లను పెంచారు. మొదటి నుంచే మ్యాథ్స్‌ సబ్జెక్టుపై దృష్టి సారించి బాగా చదివాం. పరీక్షను బాగా రాశాం. ఇప్పుడు పేపర్‌ లీక్‌ అయిందని, తిరిగి పరీక్ష నిర్వహిస్తామని చెబుతుండడం ఆందోళన కలిగిస్తోంది.     – ఆర్‌.నవశక్తి, సీబీఎస్‌ఈ విద్యార్థిని అందరినీ శిక్షిస్తున్నారు ఎక్కడో ప్రశ్నపత్రం లీక్‌ అయితే దేశవ్యాప్తంగా ఉన్న విద్యార్థులను శిక్షిస్తున్నారు. ఎక్కడ ప్రశ్నపత్రం లీకయ్యిందో ఆ రీజియన్‌లో రీ–ఎగ్జామ్‌ నిర్వహించాల్సింది పోయి అందరికీ పరీక్ష పెట్టడం విద్యార్థులందరికి శిక్షే. ఈసారి మరింత కఠినంగా ప్రశ్నపత్రం తయారు చేస్తారేమోనని టెన్షన్‌గా ఉంది.         –బి.ధనుష్‌ విహారి, సీబీఎస్‌ఈ విద్యార్థి

న్యూఢిల్లీ: సీబీఎస్‌ఈ పదో తరగతి గణితం, 12వ తరగతి ఎకనామిక్స్‌ పరీక్షల కొత్త తేదీలను మూడు రోజుల్లో ప్రకటిస్తామని కేంద్ర మానవ వనరుల అభివృద్ధి శాఖ మంత్రి జవదేకర్‌ వెల్లడించారు. ఈ రెండు ప్రశ్నపత్రాలు లీకయ్యాయని వార్తలు వెలువడిన నేపథ్యంలో తిరిగి పరీక్ష నిర్వహించాలని సీబీఎస్‌ఈ నిర్ణయించిన సంగతి తెలిసిందే. పేపర్‌ లీకేజీని దురదృష్టకర సంఘటనగా పేర్కొన్న జవడేకర్‌.. దోషులెవరైనా వదిలిపెట్టమని గురువారం హెచ్చరించారు. విద్యార్థులు, తల్లిదండ్రుల భయాందోళనలను ప్రభుత్వం అర్థం చేసుకుంటుందని తెలిపారు. విద్యార్థులకు న్యాయం జరగాలనే రెండు సబ్జెక్టులకు మళ్లీ పరీక్ష నిర్వహించాలని నిర్ణయం తీసుకున్నట్లు సీబీఎస్‌ఈ చైర్‌పర్సన్‌ అనితా కార్వాల్‌ చెప్పారు. ఈ కేసులో ఇప్పటి వరకు ఢిల్లీ పోలీసులు 25 మందిని విచారించారు.   జంతర్‌మంతర్‌ వద్ద విద్యార్థుల నిరసన.. రెండు సబ్జెక్టులకు తిరిగి పరీక్షలు నిర్వహించాలన్న నిర్ణయంపై విద్యార్థులు ఆందోళనకు దిగారు. ఢిల్లీలోని జంతర్‌మంతర్‌ వద్ద గురువారం ఉదయం భారీగా గుమిగూడిన విద్యార్థులు ‘వుయ్‌ వాంట్‌ జస్టిస్‌’ అని నినదించారు. ‘ మా జీవితాలతో ఆటలు ఆపండి’, ‘ మళ్లీ పరీక్షలను విద్యార్థులకు కాకుండా వ్యవస్థకు నిర్వహించండి’ అని రాసి ఉన్న ప్లకార్డులు ప్రదర్శించారు. పరీక్షల ముందు రోజు దాదాపు అన్ని ప్రశ్నాపత్రాలు బహిర్గతమయ్యాయని, పునఃపరీక్ష జరిగితే అన్ని సబ్జెక్టులకు జరగాలని చాలా మంది విద్యార్థులు డిమాండ్‌ చేశారు. కొందరు చేసిన తప్పుకు విద్యార్థులందరినీ శిక్షించడం సరికాదని పదో తరగతి విద్యార్థిని భవికా యాదవ్‌ ఆవేదన వ్యక్తం చేసింది. జవదేకర్‌ను తొలగించండి: కాంగ్రెస్‌ సీబీఎస్‌ఈ ప్రశ్నపత్రాల లీకేజీ ఉదంతానికి సంబంధించి జవదేకర్, సీబీఎస్‌ఈ చైర్‌పర్సన్‌ కార్వాల్‌లను తొలగించాలని కాంగ్రెస్‌ డిమాండ్‌ చేసింది. మోదీ ప్రభుత్వం ఎగ్జామ్‌ మాఫియాను ప్రోత్సహిస్తోందని, లీకేజీ లాంటి సంఘటనలు లక్షలాది విద్యార్థుల ఆశలు, భవిష్యత్తును చిదిమేస్తాయని కాంగ్రెస్‌ అధ్యక్షుడు రాహుల్‌ హెచ్చరించారు. రోజుకో లీకు(డేటా లీకేజీని ప్రస్తావిస్తూ) బయటికి రావడం ‘చౌకీదార్‌’ బలహీనతకు నిదర్శనమని ప్రధాని మోదీకి పరోక్షంగా చురకలంటించారు.  

సాక్షి, న్యూఢిల్లీ : దేశవ్యాప్తంగా ప్రకంపనలు సృష్టించిన సీబీఎస్‌ఈ పేపర్‌ లీక్‌ వ్యవహారం నానాటికి ముదురుతోంది. 12వ తరగతి ఎకానామిక్స్‌, 10వ తరగతి మ్యాథ్స్‌ పేపర్లు లీక్‌  కావడంపై విద్యార్థులు, తల్లిదండ్రులు తీవ్ర ఆగ్రహాం వ్యక్తం చేశారు. న్యాయం చేయాలంటూ ఢిల్లీతో పాటు ఇతర ప్రధాన నగరాల్లో స్టూడెంట్‌ యూనియన్లు, విద్యార్థుల తల్లిదండ్రులు నిరసనలకు దిగారు. అంతేకాకుండా సీబీఎస్‌ఈ కార్యాలయం వద్ద విద్యార్థులు పెద్ద ఎత్తున ఆందోళన నిర్వహించారు. ఇతర పేపర్లలో కూడా ప్రశ్నలు చాలా సులువుగా ఉన్నాయని విద్యార్థులు ఆరోపించారు. విద్యార్థుల అందరికీ లీకైన పేపర్ల పరీక్ష నిర్వహించాలని వారు డిమాండ్‌ చేస్తున్నారు. నేను అందులో ఒక్కడిని : మంత్రి పేపర్‌ లీక్‌ వ్యవహారంపై కేంద్ర మానవ వనరుల అభివృద్ధి శాఖ మంత్రి ప్రకాశ్‌ జవదేకర్‌ స్పందించారు. ఈ ఘటన చాలా దురదృష్టకరమన్నారు. నేరస్తుల్ని తప్పకుండా శిక్షిస్తామని తెలిపారు. భవిష్యత్తులో ఇలాంటి ఘటనలు పునరావృతం కాకుండా చర్యలు తీసుకుంటామన్నారు. విద్యార్థుల తల్లిదండ్రుల బాధను అర్థం చేసుకోగలనని, తాను వారిలో ఒక్కడినేనని ఆయన పేర్కొన్నారు.

సాక్షి, న్యూఢిల్లీ:  సీబీఎస్‌ఈ ప్రశ్నాపత్రాలు లీక్‌ కావడం దేశవ్యాప్తంగా సంచలనం సృష్టించింది. అంతకుముందు కర్ణాటక ఎన్నికల తేదీని బీజేపీ నాయకుడు ఒకరు లీక్‌ చేయడం, బీజేపీ, కాంగ్రెస్‌ పార్టీలు ప్రజల వ్యక్తిగత సమాచారాన్ని కేంబ్రిడ్జ్‌ అనలీటీకా అనే సంస్థకు చేరవేస్తున్నాయనే వార్తాలు రాజకీయంగా పెను దూమారాన్నే స్పష్టించాయి. ఈ లీకులపై స్పందించిన జాతీయ కాంగ్రెస్‌ అధ్యక్షుడు రాహుల్‌, పరోక్షంగా ప్రధాని మోదీని  టార్గెట్‌ చేస్తూ.. ‘వీక్‌ చౌకీదార్‌’ అని వ్యాఖ్యానించారు. చౌకీదార్‌ వీక్‌గా ఉండటమే ఈ లీకులకు కారణమని రాహుల్‌ మండిపడ్డారు. ఇప్పటివరకు డేటా లీక్‌, ఆధార్‌ లీక్‌, ఎస్‌ఎస్‌సీ పరీక్ష లీక్‌, ఎన్నికల తేదీ లీక్‌, ఇప్పుడు సీబీఎస్‌ఈ లీక్‌ అంటూ రాహుల్‌ ట్విటర్‌లో ఎద్దేవా చేశారు. ఇదే విషయంపై ఇతర కాంగ్రెస్‌ నాయకులు జ్యోతిరాదిత్య సింథియా, కపిల్‌ సిబల్‌ కూడా కేంద్ర ప్రభుత్వంపై ట్వీట్లతో దాడి చేశారు.  कितने लीक? डेटा लीक ! आधार लीक ! SSC Exam लीक ! Election Date लीक ! CBSE पेपर्स लीक ! हर चीज में लीक है चौकीदार वीक है#BasEkAurSaal — Rahul Gandhi (@RahulGandhi) March 29, 2018

సాక్షి, ముంబై : ఇటీవల నిర్వహించిన పరీక్షలను రద్దు చేస్తూ, త్వరలోనే పదో తరగతి, ప్లస్‌ టూ విద్యార్థులకు తిరిగి పరీక్ష నిర్వహిస్తామని సీబీఎస్‌ఈ ప్రకటించిన విషయం తెలిసిందే. పరీక్ష పేపర్లు లీకయిన నేపథ్యంలో మళ్లీ పరీక్షలు నిర్వహించబోవడంపై పలువురు బాలీవుడ్‌ నటులు భిన్నాభిప్రాయాలు వెల్లడించారు. ఫర్హాన్‌ అక్తర్‌ :  ‘వారి తప్పేం లేకున్నా విద్యార్థులు మళ్లీ పరీక్ష రాయాల్సి వస్తుంది. ఇది దురదృష్టకరమైన విషయం. దీన్ని ఎదుర్కొవడానికి కావాల్సిన శక్తిని ఇవ్వాల్సిందిగా కోరుకుంటున్నా’ అంటూ ట్వీట్‌ చేశారు. వివేక్‌ ఒబేరాయ్‌ : ‘పేపర్‌ లీక్‌ అవ్వడం అన్యాయం. ఇన్నాళ్లు కష్టపడి చదివిన విద్యార్థులకు నష్టం జరిగింది. రెండోసారి పరీక్ష రాసేవారికి మరో అవకాశం లభించినట్లు. గతంలో కంటే ఈ సారి ఇంకా బాగా పరీక్ష రాయండి’ అని పేర్కొన్నారు. రాహుల్‌ ధోలకియా : ‘పరీక్ష పేపర్లు లీక్‌ అయ్యాయని తెలిసి నేను చాలా నిరాశచెందాను. పరీక్షలంటేనే నాకు చాలా కోపం. విద్యార్థులకు మళ్లీ పరీక్ష నిర్వహిస్తామంటే నాకు చాలా కోపం వస్తుంది. పేపర్‌ లీక్‌ చేసిన వారిని కఠినంగా శిక్షించాలని’ అభిప్రాయపడ్డారు. ఈ సంవత్సరం 16,38,428 విద్యార్థులు పదో తరగతి కోసం, 11,86,306 మంది విద్యార్థులు ప్లస్‌ టూ తరగతి బోర్డు పరీక్షలకు నమోదు చేసుకున్నారు. వీరికి తిరిగి పరీక్షలు ఏ తేదీలలో నిర్వహిస్తారనే అంశం, ఇతర అంశాలకు సంబంధించిన సమాచారాన్ని ఒక వారంలోపు సీబీఎస్‌ఈ వెబ్సైట్‌లో పెడతామని బోర్డు తెలిపింది.  ప్లస్‌ టూ ఎకనామిక్స్‌ పేపర్‌, పదో తరగతి మ్యాథ్స్‌ పేపర్లు లీక్‌ అయ్యాయి. ఈ పేపర్స్‌కు సంబంధించిన ప్రశ్నాపత్రాలు అంటూ  పరీక్షలకు కొద్ది రోజుల ముందు చేతితో  ప్రశ్నలు రాసి ఉన్న పేపర్ సోషలో మీడియాలో వైరల్ అయింది. అందులో ఉన్న ప్రశ్నలే సీబీఎస్‌ఈ తయారు చేసిన ప్రశ్న పత్రాల్లో ఉన్నట్లు గుర్తించారు.