25న జేఈఈ అడ్వాన్స్‌డ్ పరీక్ష

సాక్షి, హైదరాబాద్: జేఈఈ అడ్వాన్స్‌డ్ పరీక్షను ఈనెల 25న నిర్వహించనున్నట్లు నిర్వాహక సంస్థలు ప్రకటించాయి. ఈనెల 9 వరకు రిజిస్ట్రేషన్ చేసుకునేందుకు సెంట్రల్ బోర్డు ఆఫ్ సెకండరీ ఎడ్యుకేషన్(సీబీఎస్‌ఈ) అవకాశం కల్పించాయి. ఈసారి పరీక్షను ముంబై, ఢిల్లీ, గౌహతి, కాన్పూర్, ఖరగ్‌పూర్, మద్రాసు, రూర్కీ ఐఐటీలు సంయుక్తంగా నిర్వహించనున్నట్లు ప్రకటించాయి. ఈనెల 25న ఉదయం, మధ్యాహ్నం ఈ పరీక్షలను నిర్వహించేందుకు చర్యలు చేపట్టాయి. ఐఐటీలో చేరాలంటే జేఈఈ-అడ్వాన్స్‌డ్ పరీక్షలో ర్యాంకు సాధించాల్సి ఉంటుంది. జేఈఈ-మెయిన్ పరీక్షలో తొలి 1,50,000లోపు ర్యాంకు వారే జేఈఈ-అడ్వాన్స్‌డ్ పరీక్ష రాసేందుకు అర్హులు.

ఈ అడ్వాన్స్‌డ్ పరీక్షలో కేటగిరీ వారీగా అభ్యర్థులు సాధించిన జాతీయస్థాయి ర్యాంకుల ఆధారంగా ఐఐటీల్లో సీట్లు కేటాయిస్తారు. అయితే వీరంతా ఆయా రాష్ట్రాల బోర్డులు నిర్వహించిన 12వ తరగతిలో టాప్ 20 పర్సంటైల్‌లో ఉండాలి.