ముగిసిన శాసనమండలి ఓటర్ల నమోదు గడువు

 

కర్నూలు(అగ్రికల్చర్‌): శాసనమండలి ఎన్నికలకు సంబంధించి ఓటర్లుగా నమోదు అయ్యేందుకు దరఖాస్తు గడువు శనివారం నాటితో ముగిసింది. చివరి రోజు కావడంతో అటు పట్టభద్రులు, ఇటు ఉపాధ్యాయుల దరఖాస్తులు వెల్లువెత్తాయి. అక్టోబర్‌ 5న మొదలైన ఓటర్ల నమోదు ప్రక్రియ నెలరోజులు కొనసాగింది. ఓటర్లుగా నమోదు అయ్యేందుకు దరఖాస్తు చేసుకునే గడువు పొడిగిస్తారనే ఉద్దేశంతో దరఖాస్తు చేయడంలో పట్టభధ్రులు, ఉపాధ్యాయులు కొంత అలసత్వం వహించారు. పొడిగింపు లేదని స్పష్టం కావడంతో మూడు, నాలుగు రోజుల నుంచి దరఖాస్తు ప్రక్రియ ఉపందుకుంది. శుక్రవారం నాటికి పట్టభద్రులు 43,058 మంది, ఉపాధ్యాయులు 4,337 మంది దరఖాస్తు చేసుకున్నారు. శనివారం చివరి రోజు కావడంతో ఆలస్యంగా కూడా ఓటరు నమోదుకు దరఖాస్తులు స్వీకరించేలా ఎన్నికల కమిషన్‌ సూచించింది. రాత్రి పొద్దుపోయో వరకు చివరి రోజు ఎన్ని దరఖాస్తులు వచ్చాయనే వివరాలు రాలేదు. చివరి రోజు పట్టభద్రుల నుంచి దాదాపు 30వేలకు పైగా దరఖాస్తులు వచ్చినట్లు సమాచారం. ఉపాధ్యాయుల నుంచి దాదాపు 1500 వరకు దరఖాస్తులు వచ్చినట్లు తెలుస్తోంది. మొత్తంగా పట్టభద్రులు దాదాపు 80వేల మంది, ఉపాధ్యాయులు 6వేల మంది దరఖాస్తు చేసుకున్నట్లు అధికార వర్గాలు తెలిపారు. 2011 నాటి ఓటర్లతో పోలిస్తే ఓటర్ల సంఖ్య భారీగా పెరగాల్సి ఉంది. అయితే పెరుగుదల నామమాత్రంగా ఉండటం గమనార్హం. ఓటర్లుగా నమోదు అయ్యేందుకు యువత అంతగా ఆసక్తి చూపలేదనే అభిప్రాయం వ్యక్తమవుతోంది.