మల్లన్న భక్తులకు ఇబ్బందులు

శ్రీశైలం: మల్లన్న భక్తులు బుధవారంనానా అవస్థలు పడాల్సి వచ్చింది. క్షేత్రవ్యాప్తంగా పెద్ద నోట్లు ఎవరూ తీసుకోకపోవడంతో చిల్లర సమస్య ఎదురైది. అభిషేకాలు నిర్వహించుకునే సేవాకర్తలకు ఎలాంటి ఇబ్బందులు ఎదురు కాలేదు. రూ. 1500లు టికెట్‌ కావడంతో రూ. వెయ్యి, రూ.500ల నోట్లను దేవస్థానం వారు తీసుకుని టికెట్లను అందజేశారు. ప్రత్యేక దర్శనం రూ. 100ల టికెట్‌ తీసుకునే భక్తులకుమాత్రం చుక్కలు కనిపించాయి. దేవస్థానం  ప్రత్యేక దర్శన క్యూ కౌంటర్‌లో రూ. 100ల నోట్లు లేకపోవడంతో రూ. 500ల నోటు తీసుకుని ఇచ్చి రెండు లేక మూడు టికెట్లు అడిగిన భక్తులకు మిగిలిన సొమ్మును దర్శనానంతరం వచ్చి తీసుకుని వెళ్లవల్సిందిగా స్లిప్‌పై రాసి ఇవ్వడం కనిపించింది. శ్రీశైలక్షేత్రాన్ని సందర్శించడానికి వచ్చి ఏదో ఒక వస్తువు ఇంటికి తీసుకెళ్దామనుకున్న భక్తులకు వ్యాపారస్తుల నుంచి చుక్కెదురైంది. ఏటీఎంలు, బ్యాంకులు పనిచేయకపోవడంతో హోటళ్లలో సైతం చిల్లర దొరకలేదు.