TV
న్యూలుక్‌తో ‘భాయ్’
మంచి పాత్రలు ఎన్ని పోషించినా... ఇంకా కొత్తదనం కోసం ఉవ్విళ్లూరుతుంటారు. నాగార్జున. తన ప్రతి సినిమాలోనూ కొత్తగా కనిపించాలని ప్రయత్నిస్తుంటారు. ఇటీవలే విడుదల చేసిన ‘భాయ్’ ఫస్ట్‌లుక్ చూస్తే... అది నిజమని ఎవరైనా అంగీకరించాల్సిందే. వీరభద్రం చౌదరి దర్శకత్వంలో నాగార్జున నిర్మిస్తున్న ఈ చిత్రంలో నాగ్ ఆహార్యమే కాదు, పాత్ర చిత్రణ కూడా కొత్తగా ఉంటుందని చిత్ర వర్గాలు చెబుతున్నాయి.
నేడు ఈ చిత్రం ప్రచార చిత్రాన్ని విడుదల చేస్తున్నారు. ఈ సందర్భంగా కార్యనిర్వాహక నిర్మాత ఎన్.సాయిబాబు మాట్లాడుతూ -‘‘ప్రేక్షకుల అంచనాలకు అందని స్థాయిలో వీరభద్రం చౌదరి ఈ చిత్రాన్ని తీర్చిదిద్దుతున్నారు. దర్శకునిగా ఆయనకిది మూడో సినిమా. కచ్చితంగా హేట్రిక్ విజయాన్ని సాధిస్తారు. అన్ని వర్గాల ప్రేక్షకులనూ అలరించే సినిమా ఇది.
‘భాయ్’ ఫస్ట్‌లుక్‌కు మంచి స్పందన లభిస్తోంది. నేటి సాయంత్రం 8 గంటలకు అన్నపూర్ణ స్టూడియో వారి అధికారిక యూ ట్యూబ్ ఛానెల్ ద్వారా ఈ చిత్రం ప్రచార చిత్రాన్ని విడుదల చేస్తున్నాం. సెప్టెంబర్ 1న పాటలను, అదే నెలలో సినిమాను విడుదల చేస్తాం’’ అని తెలిపారు. రిచా గంగోపాధ్యాయ కథానాయికగా నటిస్తున్న ఈ చిత్రంలో నథాలియాకౌర్, కామ్నాజఠ్మలాని, హంసానందిని ప్రత్యేక పాత్రలు పోషిస్తున్నారు.
పరుచూరి వెంకటేశ్వరరావు, డా.బ్రహ్మానందం, చలపతిరావు, ఎమ్మెస్ నారాయణ, జయప్రకాష్‌రెడ్డి, సోనూసూద్, ఆశిష్ విద్యార్థి, సయాజీషిండే, రాహుల్‌దేవ్, ఆదిత్యమీనన్, సుప్రీత్, అజయ్, నాగినీడు, గీతాంజలి, తదితరులు ఇతర పాత్రలు పోషిస్తున్న ఈ చిత్రానికి మాటలు: సందీప్, రత్నబాబు, సంగీతం: దేవిశ్రీప్రసాద్, ఛాయగ్రహణం: సమీర్‌రెడ్డి, కూర్పు: కార్తీక శ్రీనివాస్, కళ: నాగేంద్ర, సమర్పణ: రిలయన్స్ ఎంటర్‌టైన్‌మెంట్స్.
