దద్దరిల్లుతోంది... దండకారణ్యం

దద్దరిల్లుతోంది... దండకారణ్యం

 ‘‘అభివృద్ధి పేరుతో ఆదివాసీలకు రాజ్యాంగం క ల్పించిన హక్కులను కేంద్ర ప్రభుత్వం నాశనం చేసి, అక్కడి సంపదను కార్పొరేట్ కంపెనీలకు ధారాదత్తం చేస్తోంది. అందమైన ప్రకృతికి నిలయమైన దండకారణ్యాలు దద్దరిల్లుతున్నాయి. భవిష్యత్తులోనైనా ఈ పరిస్థితి మారాలన్న కథాంశంతో రూపొందిన చిత్రం ఇది’’ అని ఆర్.నారాయణమూర్తి అన్నారు. స్వీయదర్శకత్వంలో ఆయన హీరోగా నటిస్తూ, నిర్మిస్తున్న ‘దండకారణ్యం’ చిత్రం ఈ మార్చి 4న విడుదల కానుంది. ఆర్. నారాయణమూర్తి మాట్లాడుతూ- ‘‘మావోయిస్టు నాయకుడు కిషన్‌జీ పాత్రలో ఈ చిత్రంలో కనిపిస్తాను.
 
  అడవి తల్లి కోసం పోరాడుతున్న వారు, ప్రభుత్వం తరపున ఉద్యోగాలు చేస్తున్న పోలీసులు యుద్ధం చేసుకుంటూ ప్రాణాలు కోల్పోతున్నారు. ఈ ఇద్దరూ తమ కన్నతల్లులకు కడుపుకోత మిగులుస్తున్నారు. ఇకనైనా కాల్పుల విరమణ పాటించి, అడవిని ప్రశాంతంగా ఉంచాలనే అంశాన్ని మా చిత్రం ద్వారా చెబుతున్నాం. ఈ నెల 20న పాటలను విడుదల చేయనున్నాం. సెన్సార్ కార్యక్రమాలు పూర్తయ్యాయి’’ అని చెప్పారు. ఈ చిత్రానికి కెమెరా: శివకుమార్, ఎడిటింగ్-సంగీతం: ఆర్.నారాయణమూర్తి.