‘ఈవీఎంల ట్యాంపరింగ్‌ ఎలాగో నేను చెప్తా’

న్యూఢిల్లీ: ఈవీఎంల ట్యాంపరింగ్‌ విషయంపై ముఖ్యమంత్రి అరవింద్‌ కేజ్రీవాల్‌ మరోసారి అనుమానం వ్యక్తం చేశారు. ట్యాంపరింగ్‌ విషయాన్ని తోసిపుచ్చలేమని అన్నారు. తాను కూడా ఒక ఐఐటీ ఇంజినీర్‌ను అని, ఈవీఎంలు ఎలా ట్యాంపరింగ్‌ చేయొచ్చో తానొక పది మార్గాలు చెబుతానని అన్నారు. శుక్రవారం ఓ మీడియాతో మాట్లాడిన ఆయన ఈవీఎంల ట్యాంపరింగ్‌ చేయొచ్చని ఒక ఉదాహరణ కూడా ఎత్తి చూపారు.

పుణెలో ఓ వ్యక్తి స్వతంత్ర్య అభ్యర్థిగా బరిలోకి దిగాడని, ఆ వ్యక్తికి ఒక్క ఓటు కూడా పడినట్లు చూపించలేదని, దాని ప్రకారం కనీసం అతడి ఓటు అయినా చూపించాలి కదా.. మరీ ఆ ఓటు ఏమైనట్లు అని ప్రశ్నించారు. అలాంటప్పుడు ఎందుకు ఈవీఎంల అంశాన్ని ప్రశ్నించరాదు అని అన్నారు. ఇలాంటివి చూస్తూ కళ్లు మూసుకోలేమని చెప్పుకొచ్చారు. బీజేపీకి ఢిల్లీలో ఆమ్‌ఆద్మీపార్టీని ఓడించడమే లక్ష్యం అని, అందుకోసం తమ పార్టీని చీల్చడంతోపాటు ఎలాంటి చర్యలకైనా దిగుతుందని విమర్శించారు.