‘మోనో’ ప్రారంభం మళ్లీ వాయిదా

 సాక్షి, ముంబై: ముంబైకర్లకు మళ్లీ నిరాశే మిగిలింది. ప్రముఖులకు సమయం లేకపోవడంతో మోనో రైలు ప్రారంభ  కార్యక్రమం మరోసారి వాయిదాపడింది. ముందుగా నిర్ణయించిన ప్రకారం గణతంత్ర దినోత్సవం పురస్కరించుకుని 26న ప్రారంభం కావాల్సి ఉంది. ప్రధానమంత్రి మన్మోహన్‌సింగ్ గణతంత్ర వేడుకల్లో పాల్గొనాల్సి ఉండడంతో ఈ కార్యక్రమాన్ని వాయిదా వేయాలని సంబంధిత అధికారులు నిర్ణయించారు. విదేశీ పర్యటనలో ఉన్న ముఖ్యమంత్రి పృథ్వీరాజ్ చవాన్ శనివారం నగరానికి చేరుకునే అవకాశముంది. ఈ ఏడాది గణతంత్ర దినోత్సవ వేడుకలను శివాజీపార్కుకు బదులు మెరైన్ డ్రైవ్ ప్రాంతంలో నిర్వహించనున్నారు. ఆ రోజు త్రివిధ దళాలు సంయుక్తంగా విన్యాసాలు ప్రదర్శించనున్నాయి. ఈ కార్యక్రమాన్ని విజయవంతం చేయడం కోసం సంబంధిత అధికారులు అవసరమైన ఏర్పాట్లలో నిమగ్నమయ్యారు. ఈ కారణంగా మోనో రైలు ప్రాజెక్టు ప్రారంభ కార్యక్రమంపై ఎవరూ అంతగా దృష్టిసారించడం లేదు. అయితే ఈ నెలాఖరులోగా ప్రారంభించేందుకు సన్నాహాలు చేస్తున్నారు.