మిస్‌ ఫెమినా, మిస్‌ ఇండియా, మిస్‌ వరల్డ్‌లకు సినీ రంగంలో మంచి డిమాండ్‌ ఉంటుందని ప్రత్యేకంగా చెప్పనక్కర్లేదు. సుస్మితాసేన్, ఐశ్వర్యరాయ్‌ల నుంచి చాలామంది సిల్వర్‌స్క్రీన్‌పై వెలిగారు. తాజాగా మిస్‌ ఫెమినా 2015 కిరీటాన్ని గెలుచుకున్న తాన్య హోప్‌ కోలీవుడ్‌కు పరిచయం అవుతోంది. యువ నటుడు అరుణ్‌ విజయ్‌తో రొమాన్స్‌ చేస్తోంది. కుట్రం 23 వంటి విజయవంతమైన చిత్రం తరువాత అరుణ్‌విజయ్‌ నటిస్తున్న తాజా చిత్రం తడం. మగిళ్‌ తిరుమేణి దర్శకత్వం వహిస్తున్న ఈ చిత్రాన్ని రెదన్‌ ఫిలింస్‌ సంస్థ నిర్మిస్తోంది. జూన్‌ నెల నుంచే చిత్రీకరణ జరుపుకుంటున్న ఈ చిత్రంలో హీరోయిన్‌గా మిస్‌ ఫెమినా 2015 తాన్యా హోప్‌ను ఎంపిక చేశారు. ఈ చిత్రంలో నటించడం గురించి ఈ సుందరి మాట్లాడుతూ మిస్‌ ఫెమినా కీరీటం గెలుచుకున్న తరువాత పలు భాషా చిత్రాల్లో అవకాశాలు వస్తున్నాయన్నారు. మోడలింగ్‌లో కొనసాగుతున్న తనకు కోలీవుడ్‌లో తడమ్‌ చిత్రంలో నటించే అవకాశం రావడం సంతోషాన్ని కలిగించిందన్నారు. బాలీవుడ్‌ తరువాత అందరి దృష్టినీ ఆకర్షించేది కోలీవుడ్‌ చిత్రాలేనని పేర్కొన్నది. ఇక్కడ పేరు, ప్రఖ్యాతులు లభిస్తాయనే అభిప్రాయాన్ని వ్యక్తం చేసింది. ‘తడమ్‌’తో తనకు కోలీవుడ్‌లో మంచి పేరు వస్తుందనే నమ్మకం ఉందన్నారు. ఇక్కడ మరిన్ని చిత్రాలు చేయాలని కోరుకుంటున్నానని తన ఆకాంక్షను వ్యక్తం చేసింది. ఈ బ్యూటీ ఇప్పటికే టాలీవుడ్‌లో అప్పట్లో ఒకడుండేవాడు చిత్రం ద్వారా పరిచయం అయ్యారన్నది గమనార్హం.   


 కుట్రం 23 చిత్రంలో నటించే అవకాశం రావడం తన అదృష్టం అంటున్నారు యువ కథానాయకి మహిమా నంబియార్. ఎన్నై అరిందాల్ చిత్రంలో ప్రతినాయకుడిగా అజిత్‌తో పోటీ పడి నటించి ప్రశంసలు అందుకున్న అరుణ్‌విజయ్ చిన్న గ్యాప్ తరువాత కథానాయకుడిగా నటిస్తున్న చిత్రం కుట్రం 23. అదే విధంగా సాట్టై తదితర చిత్రాల్లో నాయకిగా నటించిన మహిమా నంబియార్ అంతే గ్యాప్ తరువాత తమిళంలో నటిస్తున్న చిత్రం ఇది. ఇందర్‌కుమార్ రేదర్ ది సినిమా పీపుల్ సంస్థతో కలిసి ఆర్తి అరుణ్ ఇన్ సినిమాస్ ఎంటర్‌టెయిన్‌మెంట్ ప్రయివేట్ లిమిటెడ్ పతాకంపై నిర్మిస్తున్న ఈ కుట్రం 23 చిత్రానికి అరివళగన్ దర్శకత్వం వహిస్తున్నారు.
 
 మెడికల్ క్రైమ్ థ్రిల్లర్ కథాంశంతో రూపొందుతున్న ఈ చిత్ర నిర్మాణం చివరి దశకు చేరుకుంది. మహిమా నంబియార్ తన ఆనందాన్ని పంచుకుంటూ దర్శకుడు అరివళగన్ కార్యాలయం నుంచి ఫోన్ రావడంతో కాస్త భయపడ్డానన్నారు. ఆ రోజు ఉదయం నిర్వహించిన అడిషన్‌లో తాను ఓకే అవ్వడంతో సాయంత్రమే ఒప్పంద పత్రాలపై సంతకాలు చేశానన్నారు. ఎన్నై అరిందాల్ చిత్రంలో అరుణ్‌విజయ్ నటనా ప్రతిభను చూసి ఆయన వీరాభిమానినైపోయానన్నారు. అయితే షూటింగ్ తొలి రోజు అరుణ్‌విజయ్‌తో నటించే ముందు వరకూ ఒక రకమైన భయం కలిగిందన్నారు. అరుణ్‌విజయ్ సౌమ్యత, స్నేహశీల ప్రవర్తన ఆ భయాన్ని దూరం చేశాయన్నారు. ఇప్పటి వరకూ గ్రామీణ కథా పాత్రల్లో నటించిన తనుకు ఇందులో సిటీ అమ్మాయిగా నటించే అవకాశం అభించడం సంతోషంగా ఉందన్నారు. ఇక దర్శకుడు అరివళగన్ తన చిత్రాలలో హీరోయిన్లను అందంగా చూపించడంతో పాటు వారి పాత్రలో నటనకు అవకాశం కల్పిస్తారన్నారు.
 
 తన నట జీవితంలో కుట్రం 23 ఇక ప్రత్యేక చిత్రంగా నిలిచిపోతుందనే అభిప్రాయాన్ని వ్యక్తం చేశారు. తెండ్రళ్ అనే పాత్రను చాలా ప్రేమిస్తూ నటిస్తున్నానని, దర్శకుడు కూడా ఈ పాత్రకు జీవం పోస్తున్నట్లు ప్రశంసించడం సంతోషంగా ఉందని, కుట్రం 23 చిత్రం తన సినీ జీవితాన్ని మలుపు తిప్పుతుందనే ఆశాభావాన్ని మహిమా నంబియార్ వ్యక్తం చేశారు.