గంగాధరనెల్లూరు: పల్లెల్లోని విద్యావంతులకు సాఫ్ట్‌వేర్‌ ఉద్యోగాలు కల్పించడమే స్మార్ట్‌ డీవీ లక్ష్యమని.. తమ కంపెనీలో 4,500 మందికి ఉద్యోగావకాశాలు కల్పిస్తామని కంపెనీ మేనేజింగ్‌ డైరెక్టర్‌ దీపక్‌కుమార్‌ తాళ్ల తెలిపారు.  చిత్తూరు జిల్లా గంగాధర నెల్లూరు మండలంలోని అగరమంగళంలో ఆయనతో పాటు ఏపీఎస్‌ ఆర్టీసీ వైస్‌ చైర్మన్‌ విజయానందరెడ్డి, ఎమ్మెల్యే ఆరణి శ్రీనివాసులు మీడియాతో మాట్లాడారు. ఎస్‌ఆర్‌ పురం మండలం కొట్టార్లపల్లి వద్ద స్మార్ట్‌ డీవీ కంపెనీ ఏర్పాటుకు సీఎం వైఎస్‌ జగన్‌ చేతుల మీదుగా ఎంవోయూ జరిగిందని, నిర్మాణ పనులు వేగంగా సాగుతున్నాయని తెలిపారు.  దీనిలో పనిచేసేందుకు ఆసక్తి గల అభ్యర్థులకు డిసెంబర్‌ 23న పరీక్షలు నిర్వహిస్తామని, తొలి విడతగా 600 మందిని తీసుకుంటామన్నారు. డిప్లొమా, బీటెక్‌ పూర్తి చేసిన వారితో పాటు ప్రస్తుతం చదువుతున్న వారూ అర్హులని తెలిపారు. ఎంపికైన ఫస్టియర్‌ డిప్లొమో, బీకాం, డిగ్రీ చేసిన వారికి రూ.2.70 లక్షలు, బీటెక్‌ చేసిన వారికి రూ.3.30 లక్షల ప్యాకేజీ ఉంటుందన్నారు. (క్లిక్ చేయండి: రాయలసీమకు కొత్తగా 9 జాతీయ రహదారులు)

కోట్లాది అభిమానులు ఎదురు చూస్తూ వచ్చిన పంచాయత్‌ వెబ్‌ సిరీస్‌ సెకండ్‌ సీజన్‌ వచ్చేసింది. ‘ఫులేరా’ అనే పల్లెటూళ్లో పంచాయతీ ఆఫీసులో ఆ ఆఫీసు ఉద్యోగికి, ఊళ్లోని వారికి మధ్య స్నేహంతో మొదటి సీజన్‌ సాగితే ఇప్పుడు ముఖ్యపాత్రలకు గట్టి విరోధులు ఈ సీజన్‌లో కనిపిస్తారు. సహజత్వం, హాస్యం, అనుబంధంతో ఆకట్టుకుంటున్న ఈ సిరీస్‌ అమేజాన్‌లో మళ్లీ ఒకసారి ప్రేక్షకులను బింజ్‌ వాచింగ్‌ చేయిస్తోంది. 8 ఎపిసోడ్ల సెకండ్‌ సీజన్‌ పరిచయం ఈ ఆదివారం. అదే ఊరు. అదే పంచాయతీ ఆఫీసు. వేరే గది తీసుకోకుండా ఆ పంచాయతీ ఆఫీసులోనే నివసించే ఉద్యోగి అభిషేక్‌. అతన్ని అభిమానంగా చూసుకునే పంచాయతీ సర్పంచ్, ఉప సర్పంచ్, ఆఫీసు అసిస్టెంట్‌ వికాస్‌... 2020లో ‘పంచాయత్‌’ వెబ్‌ సిరీస్‌ వచ్చినప్పుడు పాత దూరదర్శన్‌ సీరియల్స్‌లా అనిపించి దేశమంతా చూసింది. పంచాయత్‌ వెబ్‌ సిరీస్‌కు విపరీతంగా అభిమానులు ఏర్పడ్డారు. సెకండ్‌ సీజన్‌ కోసం విన్నపాలు, ఒత్తిళ్లు తెచ్చారు. లాక్‌డౌన్‌ వల్ల ఆ పనులన్నీ ఆగిపోయి ఇప్పుడు పూర్తయ్యి ‘పంచాయత్‌ సీజన్‌ 2’ స్ట్రీమ్‌ అవుతోంది. మళ్లీ అభిమానులను అలరిస్తోంది. ఫులేరాలో ప్రత్యర్థులు ఉత్తరప్రదేశ్‌లోని ‘ఫులేరా’ అనే కల్పిత ఊరిలో జరిగినట్టుగా చెప్పే ఈ కథలో అందరూ మంచివాళ్లే. అమాయకులే. ఒకరికొకరు సాయం చేసుకునేవారే. కాని ఆ ఊరికి గ్రామ సచివాలయ ఉద్యోగిగా వచ్చిన అభిషేక్‌కు ఎం.బి.ఏ చదివి వేరే ఉద్యోగం చేయాలని ఎంట్రన్స్‌ టెస్ట్‌కు ప్రిపేర్‌ అవుతూ ఉంటాడు. ఈ లోపల అతనికి ఆ ఊరి సర్పంచ్‌తో, ఉప సర్పంచ్‌తో, అసిస్టెంట్‌తో మంచి స్నేహం ఏర్పడుతుంది. నిజానికి ఆ ఊరి సర్పంచ్‌ స్త్రీ (నీనా గుప్తా) అయినా సర్పంచ్‌ భర్త (రఘువీర్‌ యాదవ్‌) వ్యవహారాలన్నీ చూస్తూ ఉంటాడు. అభిషేక్‌ (జితేంద్ర కుమార్‌) వారి ఇంటికి రాకపోకలు సాగిస్తూ ఉంటాడు. మొదటి సిరీస్‌లో సర్పంచ్‌ కూతురు ఉంటుంది కాని ఎక్కడా కనిపించదు. కాని ఈ సిరీస్‌లో ఆ కూతురు కనిపిస్తుంది. అభిషేక్‌తో స్నేహం చేస్తుంది. అయితే ఊరన్నాక ఒకరో ఇద్దరో ప్రత్యర్థులు ఉండకపోరు. ఈ ఊళ్లో కూడా ఒక ప్రత్యర్థి తయారవుతాడు. అతడే ఆ ఊరి టెంట్‌ హౌస్‌ ఓనర్‌. రాబోయే ఎన్నికలలో తన భార్యను నిలబెట్టి సర్పంచ్‌ భర్తగా చలాయించాలనుకుంటున్న ఆ టెంట్‌ హౌస్‌ ఓనర్‌ సర్పంచ్‌ను, సచివాలయ ఉద్యోగులను పరేషాన్‌ చేస్తుంటాడు. మరోవైపు ఆ నియోజక వర్గ ఎం.ఎల్‌.ఏ కూడా సర్పంచ్‌ని అవమానిస్తుంటాడు. సర్పంచ్‌ తన కుమార్తె కోసం సంబంధం చూస్తే ఆ పెళ్లికొడుకు సైకోలాగా మారి ఆ అమ్మాయికి తెగ ఫోన్లు చేస్తుంటాడు. వీళ్లందరూ ప్రత్యర్థులే అయినా అభిషేక్, సర్పంచ్, ఉప సర్పంచ్, అసిస్టెంట్‌ నలుగురూ కలిసి ఆ సమస్యలను ఎలా దాటారు అనేవే ఈ ఎపిసోడ్స్‌. నవ్వొచ్చే ఎపిసోడ్స్‌ గత సిరీస్‌లోలానే ఈ సిరీస్‌లో కూడా నవ్వొచ్చే ఉదంతాలు ఎన్నో ఉంటాయి. ఊరికి మరుగుదొడ్లు అలాట్‌ అయినా కొందరు ఉదయాన్నే బయటకు వెళుతుంటారు. అలా కనిపిస్తే ఊరుకునేది లేదని కలెక్టర్‌ విజిట్‌కు వస్తున్నట్టు తెలుస్తుంది. ఆమె ముందు ఊరి సర్పంచ్‌ను ఎలాగైనా బద్నామ్‌ చేయాలని టెంట్‌ హౌస్‌ ఓనర్‌ ఒకతణ్ణి నువ్వు ఎలాగైనా చెంబు పట్టుకుని పొద్దున్నే కలెక్టరుకు కనిపించు అంటాడు. కలెక్టరు విజిట్‌కు వస్తే కనిపించాలని అతను, అతణ్ణి ఎలాగైనా ఆపాలని మిత్రబృందం చేసే ప్రహసనాలు చాలా నవ్వు తెప్పిస్తాయి. గుడిలో టెంట్‌ హౌస్‌ ఓనర్‌ భార్య చెప్పులను పొరపాటున సర్పంచ్‌ భార్య తొడుక్కుని ఇంటికి వస్తుంది. తన చెప్పులు కనిపించని టెంట్‌ హౌస్‌ ఓనర్‌ భార్య సిసి టీవీలో చూసి సర్పంచ్‌ భార్యే దొంగ అని తెలుసుకుని పోలీస్‌ కేస్‌ పెడతానంటుంది. ఆ చెప్పులు ఆమె ఇంట్లో పడేయడానికి హీరో నానా విన్యాసాలు చేస్తాడు. అదీ నవ్వే. ఊరి రోడ్డు కోసం నిధులకు ఎంఎల్‌ఏ దగ్గరకు వెళితే ఆ ఎంఎల్‌ఏ ముందు ఎక్స్‌ప్రెస్‌ రైలును ఆపడానికి ధర్నా చేయమని పంపిస్తాడు. అక్కడ సర్పంచ్‌ను, ఉపసర్పంచ్‌ను పోలీసులు పట్టుకెళతారు. అదంతా చాలా సరదాగా ఉంటుంది. హీరోయిన్‌ను పెళ్లికొడుకు వేధిస్తూ ఉంటే ఆమె హీరో సాయం కోరుతుంది. అలాగే హీరోయిన్, హీరో పరిచయం పెంచుకునే సన్నివేశాలు గిలిగింతలు పెడతాయి. గంభీరమైన ముగింపు సాధారణంగా పంచాయత్‌ ఎపిసోడ్స్‌ అన్నీ సరదాగా ఉంటాయి. కాని ఈ సిరీస్‌లో చివరి ఎపిసోడ్‌ను ఒక ఉదాత్త సన్నివేశంతో గంభీరం చేశాడు దర్శకుడు. ఆ సన్నివేశంతో ప్రేక్షకులందరూ కన్నీరు కారుస్తారు. మనసులు బరువెక్కుతాయి. సంతోషంతోపాటు దుఃఖమూ మనుషుల జీవితాల్లో ఉంటుందని చెప్పడానికి కాబోలు. ఇంకా పాత్రలు, వాటి గమ్యం పూర్తిగా తేలకుండానే ఈ సిరీస్‌ కూడా ముగుస్తుంది. అంటే సీజన్‌ 3కు కథ మిగిలించుకున్నారన్న మాట. ‘పంచాయత్‌’ బలం అంతా దాని సహజత్వం. సున్నితత్వం. హాస్యం. మానవ నిజ ప్రవర్తనలు. వీటిని దర్శకుడు దీపక్‌ కుమార్‌ మిశ్రా, రచయిత చందన్‌ కుమార్‌ గట్టిగా పట్టుకోవడంతో సిరీస్‌ నిలబడింది. కథ ఉత్తరప్రదేశ్‌లో జరిగినా లొకేషన్‌ అంతా భొపాల్‌కు దగ్గరగా తీశారు. ఆ ఊరి వాతావరణమే సగం ఆకట్టుకుంటుంది. థియేటర్‌ చేసిన నటులు కావడం వల్ల అందరూ పాత్రలను అద్భుతంగా పండిస్తారు. బ్యాక్‌గ్రౌండ్‌ స్కోర్‌ కూడా అద్భుతం. ఇలాంటి జీవితాలు, పాత్రలు తెలుగు పల్లెల్లో ఎన్నెన్నో ఉంటాయి. గతంలో తెలుగులో కూడా మంచి సీరియల్స్‌ వచ్చేవి. ఇలాంటి కథలతో తెలుగులో కూడా వెబ్‌ సిరీస్‌ వస్తే ప్రేక్షకులు తప్పక ఆదరిస్తారు. పంచాయత్‌ చూడని వాళ్లు మొదటి సిరీస్, రెండో సిరీస్‌ హాయిగా చూడొచ్చు. హిందీలో మాత్రమే లభ్యం.

దోహా (ఖతర్‌): అంతర్జాతీయ వేదికపై మరోసారి సత్తా చాటిన భారత యువ షూటర్‌ మను భాకర్‌ ఆసియా చాంపియన్‌గా అవతరించింది. మంగళవారం మొదలైన ఈ మెగా ఈవెంట్‌లో హరియణాకు చెందిన 17 ఏళ్ల మను మహిళల 10 మీటర్ల ఎయిర్‌ పిస్టల్‌ వ్యక్తిగత విభాగంలో స్వర్ణ పతకాన్ని సొంతం చేసుకుంది. ఇప్పటికే టోక్యో ఒలింపిక్స్‌కు అర్హత పొందిన మను ఎనిమిది మంది షూటర్లు పాల్గొన్న ఫైనల్లో 244.3 పాయింట్లు స్కోరు చేసి టాప్‌ ర్యాంక్‌లో నిలిచింది. ఎలిమినేషన్‌ పద్ధతిలో జరిగిన ఫైనల్లో భారత్‌కే చెందిన యశస్విని సింగ్‌ ఐదో స్థానంలో నిలిచింది. కియాన్‌ వాంగ్‌ (చైనా–242.8 పాయింట్లు) రజతం నెగ్గగా... రాన్‌జిన్‌ జియాంగ్‌ (చైనా–220.2 పాయింట్లు) కాంస్యం కైవసం చేసుకుంది. క్వాలిఫయింగ్‌లో 584 పాయింట్లు సాధించిన మను టాప్‌ ర్యాంక్‌ హోదాలో ఫైనల్‌కు అర్హత సాధించింది. మను భాకర్, యశస్విని (578), అన్ను రాజ్‌ సింగ్‌ (569)లతో కూడిన భారత బృందానికి టీమ్‌ విభాగంలో కాంస్యం లభించింది. క్వాలిఫయింగ్‌లో ఈ త్రయం సాధించిన స్కోరు ఆధారంగా ఈ పతకం ఖాయమైంది. గతేడాది కామన్వెల్త్‌ గేమ్స్‌లో, యూత్‌ ఒలింపిక్స్‌ క్రీడల్లోనూ మను భాకర్‌ స్వర్ణ పతకాలను సాధించింది. డబుల్‌ ధమాకా...  పురుషుల 10 మీటర్ల ఎయిర్‌ రైఫిల్‌ విభాగంలో భారత షూటర్‌ దీపక్‌ కుమార్‌ ఒకేసారి రెండు లక్ష్యాలను సాధించాడు. ఫైనల్లో అతను 227.8 పాయింట్లు స్కోరు చేసి కాంస్య పతకం నెగ్గడంతోపాటు వచ్చే ఏడాది జరిగే టోక్యో ఒలింపిక్స్‌కు కూడా అర్హత పొందాడు. యుకున్‌ లియు (చైనా–250.5 పాయింట్లు) స్వర్ణం నెగ్గగా... హావోనన్‌ యు (చైనా–249.1 పాయింట్లు) రజతం గెలిచాడు. మంగళవారం తన 32వ జన్మదినాన్ని జరుపుకున్న దీపక్‌ ప్రదర్శనతో... ఇప్పటి వరకు టోక్యో ఒలింపిక్స్‌కు అర్హత పొందిన భారత షూటర్ల సంఖ్య 10కి చేరింది. ప్రతి ఈవెంట్‌లో ఒక దేశం నుంచి గరిష్టంగా ఇద్దరికి మాత్రమే అర్హత పొందే అవకాశం ఉంది. దీపక్‌కంటే ముందు ఈ ఈవెంట్‌లో భారత్‌ నుంచి దివ్యాంశ్‌ సింగ్‌ పన్వర్‌ ‘టోక్యో’ బెర్త్‌ సాధించాడు. మరోవైపు వివాన్‌ కపూర్, మనీషా కీర్‌లతో కూడిన భారత జట్టు జూనియర్‌ ట్రాప్‌ మిక్స్‌డ్‌ టీమ్‌ ఈవెంట్‌లో పసిడి పతకం గెలిచింది. మహిళల 10 మీటర్ల ఎయిర్‌ రైఫిల్‌ టీమ్‌ విభాగంలో ఇలవేనిల్‌ వలారివన్, అంజుమ్‌ మౌద్గిల్, అపూర్వీ చండేలాలతో కూడిన భారత బృందం 1883.2 పాయింట్లతో రజతం సాధించింది. వ్యక్తిగత విభాగంలో ఇలవేనిల్‌ ఐదో స్థానంలో నిలిచింది. ‘టోక్యో’ బెర్త్‌ సాధించిన భారత షూటర్లు  ►మహిళల 10 మీటర్ల  ఎయిర్‌ రైఫిల్‌ (2) అంజుమ్‌ మౌద్గిల్, అపూర్వీ చండేలా ►పురుషుల 10 మీటర్ల ఎయిర్‌ పిస్టల్‌ (2) సౌరభ్‌ చౌదరీ, అభిషేక్‌ వర్మ  ►పురుషుల 10 మీటర్ల ఎయిర్‌ రైఫిల్‌ (2) దివ్యాంశ్‌ సింగ్‌ పన్వర్, దీపక్‌ కుమార్‌  ►పురుషుల 50 మీటర్ల రైఫిల్‌ త్రీ పొజిషన్‌ (1) సంజీవ్‌ రాజ్‌పుత్‌  ►మహిళల 25 మీటర్ల ఎయిర్‌ పిస్టల్‌ (1) రాహీ సర్నోబత్‌  ►మహిళల 10 మీటర్ల ఎయిర్‌ పిస్టల్‌ (2) మను భాకర్, యశస్విని సింగ్‌

న్యూఢిల్లీ: సొంతగడ్డపై జరుగుతున్న ప్రపంచకప్‌లో తొలి రెండు రోజుల్లో ప్రపంచ రికార్డులు సృష్టించడంతోపాటు పసిడి పతకాలను సొంతం చేసుకున్న భారత షూటర్లకు మూడో రోజు మాత్రం నిరాశ ఎదురైంది. పురుషుల 10 మీటర్ల ఎయిర్‌ రైఫిల్‌ విభాగంలో బరిలోకి దిగిన ముగ్గురు భారత షూటర్లు దీపక్‌ కుమార్, రవి కుమార్, దివ్యాంశ్‌ సింగ్‌ పన్వర్‌ ఫైనల్‌కు చేరుకోవడంలో విఫలమయ్యారు. 95 మంది షూటర్లు పాల్గొన్న క్వాలిఫయింగ్‌లో దివ్యాంశ్‌ 627.2 పాయింట్లు స్కోరు చేసి 12వ స్థానంలో... రవి కుమార్‌ 627 పాయింట్లు సాధించి 14వ స్థానంలో... గతేడాది ఆసియా క్రీడల్లో రజతం నెగ్గిన దీపక్‌ కుమార్‌ 624.3 పాయింట్లు స్కోరు చేసి 34వ స్థానంలో నిలిచారు. ఫైనల్లో సెర్గీ కామెన్‌స్కీ (రష్యా–249.4 పాయింట్లు), యుకున్‌ లియు (చైనా–247 పాయింట్లు), జిచెంగ్‌ హుయ్‌ (చైనా–225.9 పాయింట్లు) వరుసగా స్వర్ణ, రజత, కాంస్య పతకాలను గెల్చుకున్నారు. మంగళవారం మూడు ఈవెంట్స్‌లో భారత షూటర్లు బరిలోకి దిగనున్నారు. మహిళల 50 మీటర్ల రైఫిల్‌ త్రీ పొజిషన్‌లో సునిధి చౌహాన్, గాయత్రి... 10 మీటర్ల ఎయిర్‌ పిస్టల్‌ విభాగంలో హీనా సిద్ధూ, మను భాకర్, శ్రీనివేథ... పురుషుల 25 మీటర్ల ర్యాపిడ్‌ ఫైర్‌ పిస్టల్‌ విభాగంలో భావేశ్‌ షెకావత్, గుర్‌ప్రీత్‌ సింగ్, ఆదర్శ్‌ సింగ్, అర్పిత్‌ గోయల్, అనీశ్‌ పోటీపడనున్నారు. ఈ మెగా ఈవెంట్‌లో తొలి రోజు మహిళల 10 మీటర్ల ఎయిర్‌ రైఫిల్‌ విభాగంలో అపూర్వీ చండేలా... రెండో రోజు పురుషుల 10 మీటర్ల ఎయిర్‌ పిస్టల్‌ విభాగంలో సౌరభ్‌ చౌధరీ ప్రపంచ రికార్డులు సృష్టించడంతోపాటు పసిడి పతకాలను గెల్చుకున్న సంగతి తెలిసిందే.    

న్యూఢిల్లీ: ఎంతో ప్రతిష్టాత్మకంగా ప్రారంభించిన దేశంలోనే తొలి సెమీ హైస్పీడ్‌ రైలు ‘వందే భారత్‌’కు ఆదిలోనే హంసపాదు ఎదురైంది. శుక్రవారం ఢిల్లీ నుంచి వారణాసికి బయలుదేరిన ఈ రైలు తిరుగు ప్రయాణంలో సాంకేతిక సమస్యతో తుండ్లా జంక్షన్‌ వద్ద నిలిచిపోయింది. పట్టాలను దాటుతున్న పశువులపై ఈ రైలు దూసుకెళ్లడంతో చక్రాలు పక్కకు జరిగాయని పశ్చిమ రైల్వే సీపీఆర్వో దీపక్‌ కుమార్‌ తెలిపారు. శుక్రవారం రాత్రి 10.30 గంటలకు వారణాసి జంక్షన్‌ నుంచి బయలుదేరిన ఈ హైస్పీడ్‌ రైలు.. శనివారం ఉదయం 15 కిలోమీటర్ల దూరంలో ఉన్న ఉత్తరప్రదేశ్‌లోని తుండ్లా జంక్షన్‌ వద్ద మొదటిసారి బ్రేక్‌ డౌన్‌ అయింది. దీంతో గంట సేపు అదే జంక్షన్‌లోనే రైలు నిలిచిపోయింది. ‘రైలు బ్రేక్‌ డౌన్‌ అయిన సమయంలో పలువురు జర్నలిస్టులు అందులో ప్రయాణిస్తున్నారు. రైలు తుండ్లా జంక్షన్‌కు వచ్చేటప్పుడు చివరి బోగీల్లో ఒకరకమైన శబ్దాలు వచ్చాయి. చివరి నాలుగు బోగీల్లో కరెంటు లేకపోవడంతో ఒక రకమైన దుర్వాసన వచ్చింది. దీంతో లోకో పైలట్‌లు అప్రమత్తమై కొద్ది సేపు రైలు స్పీడ్‌ తగ్గించారు. ఆ తర్వాత బ్రేక్‌లలో సాంకేతిక సమస్య తలెత్తిందని అధికారులకు పైలట్‌లు చెబుతుండగా తాను విన్నాను’అని ఓ ప్రయాణికుడు చెప్పాడు. ఆ తర్వాత ఉదయం 8.15 గంటలకు ఇంజనీర్లు సమస్యను పరిష్కరించారు. 8.55 గంటలకు మళ్లీ నిలిచిపోయింది. అందులో ప్రయాణిస్తున్న విలేకరులు, బోర్డు అధికారులను వేరే రైలులో ఢిల్లీకి పంపించారు. తర్వాత రైలుకు అవసరమైన మరమ్మతులు చేసి 100 కి.మీ.వేగంతో ఢిల్లీకి వచ్చిందని అధికారులు తెలిపారు. పశువులను ఢీకొట్టడం వల్లే రైలులో సాంకేతిక లోపం తలెత్తిందని రైల్వే ప్రతినిధి స్మితా శర్మ చెప్పారు. ఈ మేరకు సీపీఐ ప్రధాన కార్యదర్శి ట్విట్టర్‌లో స్పందిస్తూ.. ప్రధాని మోదీ ప్రభుత్వం ఏ రకంగా పనిచేస్తుందో ఈ రైలు ఓ మంచి ఉదాహరణ అని అన్నారు. ఈ రైలు గురించి ఎంతగా ప్రచారం చేశారో అంతా విఫలం అయిందని ఎద్దేవా చేశారు.

పాలెంబాంగ్‌లో భారత షూటర్లు దీపక్‌ కుమార్‌ 10 మీటర్ల రైఫిల్‌ ఈవెంట్‌లో... లక్షయ్‌ షెరాన్‌ ట్రాప్‌ పోటీలో రజత పతకాలు నెగ్గారు. ఈ రెండు ఈవెంట్లలో రవి కుమార్, మానవ్‌జీత్‌ సింగ్‌ సంధు నాలుగో స్థానంలో నిలిచి పతకం అవకాశాన్ని కోల్పోయారు. ఓ మెగా ఈవెంట్‌ పతకాన్వేషణలో దీపక్‌ కుమార్‌ది సుదీర్ఘ నిరీక్షణ. ఇండోనేసియాలో రజతంతో  ఎట్టకేలకు ఈ నిరీక్షణకు తెరపడింది. ఒకట్రెండు కాదు...  ఏకంగా 14 ఏళ్లుగా పతకం కోసం శ్రమించాడు. ఈ సారి మాత్రం 33 ఏళ్ల దీపక్‌ గురితప్పలేదు. సోమవారం జరిగిన పురుషుల 10 మీటర్ల రైఫిల్‌ పోటీలో అతను 17 షాట్ల వరకు రేసులోనే లేడు. 18వ షాట్‌ 10.9 పాయింట్లు తెచ్చిపెట్టడంతో అనూహ్యంగా పతకం రేసులోకి వచ్చాడు. 24 షాట్లలో 247.7 స్కోరుతో రెండో స్థానంలో నిలిచి రజతం గెలిచాడు. ఇందులో యంగ్‌ హరన్‌ (చైనా; 249.1) స్వర్ణం, లూ షావోచున్‌ (చైనీస్‌ తైపీ; 226.8) కాంస్యం నెగ్గారు.   రవి కుమార్‌ (205.2) నాలుగో స్థానం పొందాడు. సంస్కృతంలో నిష్ణాతుడైన దీపక్‌ పతక విజయంపై ఆధ్యాత్మిక ధోరణిలో స్పందించాడు. ‘ప్రతి ఒక్కరు తమకు దక్కేదానిపై ఆశావహ దృక్పథంతోనే ఉంటారు. నేనూ అంతే... జీవితంలో రాసిపెట్టి ఉంటే అదెప్పుడైనా దక్కుతుంది. అతిగా ఆశించి చింతించాల్సిన పనిలేదు. ఈ విషయాల్ని నేను గురుకుల్‌ అకాడమీలో పాఠశాల విద్యలోనే నేర్చుకున్నా’ అని దీపక్‌ అన్నాడు. ఢిల్లీకి చెందిన అతని తల్లిదండ్రులు నగర అలవాట్లకు దూరంగా ఉండాలనే ఉద్దేశంతో దీపక్‌ను డెహ్రాడూన్‌లోని గురుకుల్‌లో చేర్పించారు.  ట్రాప్‌ ఈవెంట్‌లో మరో భారత షూటర్‌ లక్షయ్‌ 43 పాయింట్లతో రజతం చేజిక్కించుకోగా, వెటరన్‌ షూటర్, మాజీ ప్రపంచ చాంపియన్‌ మానవ్‌జీత్‌ సింగ్‌ గురి తప్పింది. అతను 26 పాయింట్లతో నాలుగో స్థానంతో సరిపెట్టుకున్నాడు. ఈ ఈవెంట్‌లో యంగ్‌ కున్‌పి (చైనీస్‌ తైపీ; 48) ప్రపంచ రికార్డును సమం చేసి బంగారు పతకం గెలువగా, డేమియంగ్‌ అహ్న్‌ (కొరియా; 30) కాంస్యం నెగ్గాడు. మహిళల విభాగంలో భారత షూటర్లకు నిరాశే ఎదురైంది. 10 మీ. రైఫిల్‌ ఈవెంట్‌లో అపూర్వీ చండీలా ఐదో స్థానం, ట్రాప్‌లో సీమ తోమర్‌ ఆరో స్థానం పొందారు.  

జకార్తా: ఏషియన్‌ గేమ్స్‌-2018లో భారత్‌ పతకాల  వేట కొనసాగుతోంది. తొలి రోజు పసిడి, కాంస్య పతకాలు సాధించిన భారత్‌.. రెండో రోజు రజత పతకం సాధించింది. సోమవారం ఉదయం జరిగిన 10 మీటర్ల ఎయిర్‌ రైఫిల్‌ పురుషుల ఈవెంట్‌లో దీపక్‌ కుమార్‌ రజత పతకాన్ని సాధించాడు. ఆఖరి రౌండ్‌లో 10.9 పాయింట్లు సాధించిన దీపక్‌ కుమార్‌.. మొత్తంగా 247.7 పాయింట్ల సాధించి రజతాన్ని ఖాయం చేసుకున్నాడు. కాగా, ఇదే ఈవెంట్‌లో మరో భారత షూటర్‌ రవి కుమార్‌ నాల్గో స్థానంతో సరిపెట్టుకున్నాడు. చైనాకు చెందిన యాంగ్‌ హారాన్‌ 249.1 పాయింట్లతో స్వర్ణ పతకాం సాధించాడు. ఫలితంగా ఆసియన్‌ గేమ్స్‌లో తన డిఫెండింగ్‌ చాంపియన్‌షిప్‌ హోదాను నిలబెట్టుకున్నాడు. ఇక చైనీస్‌ తైపీకి చెందిన లు సాచువాన్‌ 226.8 పాయింట్లతో కాంస్య పతకం సాధించాడు. తొలి రోజు బజరంగ్‌ మినహా మిగతా భారత రెజ్లర్లు సందీప్, సుశీల్‌ కుమార్, పవన్, మౌజమ్‌ ఖత్రి పతకం నెగ్గడంలో విఫలమయ్యారు. మరోవైపు షూటింగ్‌లో 10 మీటర్ల ఎయిర్‌ రైఫిల్‌ మిక్స్‌డ్‌ ఈవెంట్‌లో రవికుమార్‌–అపూర్వీ చండేలా ద్వయం మూడో స్థానంలో నిలిచి కాంస్య పతకాన్ని దక్కించుకున్న సంగతి తెలిసిందే. చదవండి: బజరంగ్‌ బంగారం


 ప్రపంచకప్‌ షూటింగ్‌ టోర్నీ
 న్యూఢిల్లీ: సొంతగడ్డపై తొలిసారి జరుగుతున్న ప్రపంచకప్‌ షూటింగ్‌ టోర్నమెంట్‌లో తొలి రోజే భారత్‌ పతకాల బోణీ చేసింది. మహిళల 10 మీటర్ల ఎయిర్‌ రైఫిల్‌ ఈవెంట్‌లో పూజా ఘాట్కర్‌ మూడో స్థానంలో నిలిచి కాంస్య పతకాన్ని దక్కించుకుంది. మహారాష్ట్రకు చెందిన 27 ఏళ్ల పూజ ఫైనల్లో 228.8 పాయింట్లు స్కోరు చేసింది. గతంలో రెండుసార్లు ప్రపంచకప్‌ టోర్నీల్లో ఫైనల్‌కు చేరి పతకం నెగ్గలేకపోయిన పూజ మూడోసారి సఫలం కావడం విశేషం.
 మెంగ్‌యావో షి (చైనా) 252.1 పాయింట్లు స్కోరు చేసి కొత్త ప్రపంచ రికార్డు నెలకొల్పడంతోపాటు స్వర్ణ పతకాన్ని కైవసం చేసుకుంది. 248.9 పాయింట్లతో డాంగ్‌ లిజి (చైనా) రజత పతకాన్ని గెల్చుకుంది. 42 మంది షూటర్లు పాల్గొన్న క్వాలిఫయింగ్‌ రౌండ్‌లో పూజ 418 పాయింట్లు సాధించి రెండో స్థానంలో నిలిచింది. క్వాలిఫయింగ్‌లో టాప్‌–8లో నిలిచిన వారు ఫైనల్‌కు అర్హత సాధిస్తారు. క్వాలిఫయింగ్‌లో చేసిన స్కోరును ఫైనల్లో పరిగణలోకి తీసుకోరు. భారత్‌కే చెందిన మేఘన సజ్జనార్‌ (413.3 పాయింట్లు), వినిత భరద్వాజ్‌ (412.3 పాయింట్లు) వరుసగా 16వ, 20వ స్థానాల్లో నిలిచారు.
 
 మరోవైపు పురుషుల 10 మీటర్ల ఎయిర్‌ రైఫిల్‌ ఈవెంట్‌లో భారత్‌కు నిరాశ ఎదురైంది. ఫైనల్‌కు చేరిన భారత షూటర్లు దీపక్‌ కుమార్‌ (185.4 పాయింట్లు) ఐదో స్థానంలో, రవి కుమార్‌ 122 పాయింట్లతో ఎనిమిదో స్థానంలో నిలిచారు. చైనా షూటర్‌ బుహాన్  సాంగ్‌ (249.5 పాయింట్లు) కొత్త ప్రపంచ రికార్డు నమోదు చేయడంతోపాటు పసిడి పతకాన్ని దక్కించుకున్నాడు.


 హైదరాబాద్ : బాహుబలి చిత్రంలో మాల కులస్తులను అవమానపరిచే సన్నివేశాలను, మాటలు ఉన్నాయని వాటిని తక్షణమే తొలగించాలని తెలంగాణ మాలల జేఏసీ చైర్మన్ బి.దీపక్ కుమార్ డిమాండ్ చేశారు. ఆ దృశ్యాలను తొలగించకపోతే తెలంగాణలో ఆ చిత్రాన్ని అడ్డుకుంటామని ఆయన హెచ్చరించారు.
 
 యూట్యూబ్లో మాలలను కించపరుస్తూ ప్రసారమైన సినిమా క్లిప్పింగ్స్ను ఇప్పటికే పోలీసులకు అందచేస్తూ ఫిర్యాదు చేశామన్నారు. ఈ విషయంపై తెలంగాణ ప్రభుత్వం కూడా జోక్యం చేసుకోవాలని దీపక్ కుమార్ డిమాండ్ చేశారు. మరోవైపు బాహుబలి చిత్రం జూలై 10 శుక్రవారం ప్రపంచవ్యాప్తంగా విడుదల కానున్న విషయం తెలిసిందే.


 పాట్నా: రూ. 10 కోసం నలుగురు వ్యక్తులు ఒకరిని హత్య చేశారు. బీహార్‌లోని కటిహార్ పట్టణంలో మంగళవారం అర్ధరాత్రి ఈ దారుణం జరిగింది. దీపక్‌కుమార్ యాదవ్ అనే యువకుడిని నలుగురు వ్యక్తులు గుట్కూ కొనుక్కునేందుకు పది రూపాయలు అడిగారు. అతడు అందుకు నిరాకరించడంతో వారు మూకుమ్మడిగా దాడిచేసి, కత్తులతో పొడిచి చంపారు.