'మనోహరి' చిత్రం ద్వారా నటి ధన్సిక తొలిసారి ద్విపాత్రాభినయం చేస్తున్నారు. గీత రచయిత స్నేహాన్‌ భార్య కన్నిక స్నేహాన్‌ ముఖ్య పాత్ర పోషిస్తున్న ఈ చిత్రాన్ని సూర్య ఫిలిం ప్రొడక్షన్‌ పతాకంపై మహేశ్వరన్‌ నందగోపాల్‌ నిర్మిస్తున్నారు. నవాజ్‌ మహ్మద్‌ దర్శకత్వం వహిస్తున్న ఈ చిత్రం శుక్రవారం ఉదయం చెన్నైలో పూజా కార్యక్రమాలతో ప్రారంభమైంది. సస్పెన్స్‌ థ్రిల్లర్‌ కథాచిత్రంగా ఉంటుందని దర్శకుడు తెలిపారు. కేవీ మణి ఛాయాగ్రహణం, కార్తీక్‌ రాజా సంగీతాన్ని అందిస్తున్నారు.

కన్నడ పరిశ్రమలో వినూత్న సినిమాలతో పేరు పొందారు దర్శకుడు సునీల్‌ కుమార్‌ దేశాయ్‌. ఆయన తెరకెక్కించిన లేటెస్ట్‌ చిత్రం ‘ఉద్ఘర్ష’. అనూప్‌ సింగ్‌ ఠాకూర్, తాన్యా హోప్, ధన్సిక, శ్రద్ధా కపూర్‌ ముఖ్య పాత్రల్లో నటించారు. దేవరాజ్‌ నిర్మించిన ఈ చిత్రం కన్నడ, తెలుగు, తమిళ, మలయాళ భాషల్లో రిలీజ్‌ కానుంది. ఈ మర్డర్‌ మిస్టరీ ట్రైలర్‌ లాంచ్‌ బెంగళూర్‌లో జరిగింది. ‘కిచ్చ’ సుదీప్‌ వాయిస్‌ ఓవర్‌ అందించిన ఈ ట్రైలర్‌ను కన్నడ చాలెంజింగ్‌ స్టార్‌ దర్శన్, నటి ప్రేమ విడుదల చేశారు. ఈ సందర్భంగా అనూప్‌ సింగ్‌ మాట్లాడుతూ – ‘‘నా కెరీర్‌లో మోస్ట్‌ చాలెంజింగ్‌ పాత్ర ఇది. సినిమా చేయడంలో కొంచెం ఆలస్యం అయింది. అయినా ఎక్కడా నా కాన్ఫిడెన్స్‌ కోల్పోకుండా చూసుకున్నారు దర్శకుడు దేశాయ్‌. ఆయన సినిమాలో పని చేయడం గర్వంగా ఫీల్‌ అవుతున్నాను. గొప్ప థ్రిల్లర్‌ను చూశారన్న అనుభూతిని పొందుతారు’’ అన్నారు. ‘‘సునీల్‌గారి సినిమా అనగానే ఓకే అన్నాను. సునీల్‌కుమార్‌గారితో ఆల్రెడీ ‘రే’ అనే సినిమా చేశాను. ఇందులో నా క్యారెక్టర్‌ ఏంటో చెప్పకూడదు. సస్పెన్స్‌. కానీ కచ్చితంగా షాక్‌ అవుతారు’’ అన్నారు హర్షిక పొన్నాడ ‘‘కన్నడ నేర్చుకొని మరీ డబ్బింగ్‌ చెప్పాడు ఠాకూర్‌. తనని అభినందించి తీరాలి’’ అన్నారు దర్శన్‌. ‘‘వాయిస్‌ ఓవర్‌ అందించిన సుదీప్‌కు థ్యాంక్స్‌. టీమ్‌ అందరూ కష్టపడ్డాం. సినిమా అందరికీ నచ్చుతుందనే నమ్మకం ఉంది’’ అన్నారు సునీల్‌కుమార్‌ దేశాయ్‌.

సూపర్‌ స్టార్‌ రజనీకాంత్‌ హీరోగా తెరకెక్కిన కబాలి సినిమాతో అందరి దృష్టిని ఆకర్షించిన నటి ధన్సిక. తొలి సినిమాతోనే టాలీవుడ్‌లో సైతం అభిమానులను సంపాదించుకున్న ఈ బ్యూటి తెలుగులో వాలు జడ సినిమాతో పాటు తమిళ్‌లో యోగి డా అనే సినిమాలో నటిస్తున్నారు. ఈ సినిమా షూటింగ్‌ సందర్భంగా జరిగిన ప్రమాదంలో ధన్సికకు గాయాలయ్యాయి. బార్‌లో యాక్షన్ సీన్‌ చిత్రీకరిస్తుండగా ఈ ప్రమాదం జరిగింది. కొంత మంది రౌడీలు ధన్సిక పైకి బీర్‌ బాటిళ్లను విసిరే సన్నివేశం షూట్ చేస్తుండగా పగిలిన గాజు ముక్క ఒకటి ధన్సిక కంటి కింది భాగంలో గుచ్చుకుంది. వెంటనే స్పందించిన యూనిట్ సభ్యులు ఆమె దగ్గరలోని హాస్పిటల్‌కు తరలించారు. ధన్సిక ట్రీట్‌మెంట్ పూర్తి అయిన వెంటనే గాయంతోనే తిరిగి షూటింగ్‌లో పాల్గొన్నారు.

సూపర్‌ స్టార్‌ రజనీకాంత్‌ హీరోగా తెరకెక్కిన కబాలి సినిమాతో అందరి దృష్టిని ఆకర్షించిన నటి ధన్సిక. తొలి సినిమాతోనే టాలీవుడ్‌లో సైతం అభిమానులను సంపాదించుకున్న ఈ బ్యూటి ప్రస్తుతం వాలుజడ అనే స్ట్రయిట్‌ తెలుగు సినిమాలో నటిస్తున్నారు. తాజాగా ఈ భామకు సంబంధించిన వీడియో ఒకటి సోషల్‌ మీడియాలో వైరల్‌గా మారింది. కబాలి సినిమాలో యాక్షన్‌ సీన్స్‌లో కనిపించిన ధన్సిక తాజాగా కర్రసాము చేస్తూ అలరించారు. ఈ వీడియోను ధన్సిక పర్సనల్‌ పీఆర్‌వో ప్రియా అభిమానుల కోసం సోషల్‌ మీడియాలో షేర్‌ చేశారు. ప్రస్తుతం మూడు సినిమాలతో బిజీగా ఉన్న ధన్సిక.. తమిళంతో పాటు తెలుగు, కన్నడ, మలయాళ సినిమాల్లోనూ నటిస్తున్నారు.

దుల్కర్‌ సల్మాన్‌ హీరోగా బిజోయ్‌ నంబియార్‌ దర్శకత్వంలో మలయాళం, తమిళం భాషల్లో రూపొందిన చిత్రం ‘సోలో’ బాక్సాఫీస్‌ వద్ద హిట్‌ సాధించింది. నేహా శర్మ, ధన్సిక కథానాయికలుగా నటించిన ఈ సినిమాలో నాజర్, సుహాసిని కీలక పాత్రలు చేశారు. ఈ చిత్రాన్ని నిర్మాత గాజుల వెంకటేశ్‌ ‘అతడే’ పేరుతో తెలుగు ప్రేక్షకులకు అందిస్తున్నారు. ఈ చిత్రం ఆడియో విడుదల వేడుకలో సీడీని నిర్మాత రాజ్‌కందుకూరి విడుదల చేసి, డాక్టర్‌ గౌతమ్‌ కశ్యప్, నిర్మాత వెంకటేశ్‌కు అందించారు. రాజ్‌ కందుకూరి మాట్లాడుతూ– ‘‘4 వినూత్న కథలు ఈ సినిమాలో ఉంటాయి. అన్ని షేడ్స్‌లోనూ హీరో బాగా నటించారు. మూవీ చూస్తుంటే డబ్బింగ్‌ అనే ఫీలింగ్‌ కలగదు’’ అన్నారు. ‘‘ఎంతో ఇష్టపడి తీసుకున్న ఈ సినిమా తెలుగులో కూడా హిట్టవ్వాలని కోరుకుంటున్నాను’’ అన్నారు వెంకటేశ్‌. మాటల రచయిత గౌతమ్‌ కశ్యప్, లిరిక్‌ రైటర్‌ పూర్ణాచారి పాల్గొన్నారు.

సూర్యతేజ్, ధన్సిక, సిమ్రాన్, సోని చరిష్టా ప్రధాన పాత్రల్లో రూపొందుతోన్న చిత్రం ‘మేళా’. కిరణ్‌ శ్రీపురం దర్శకత్వంలో మామిడి వెంకటలక్ష్మి సమర్పణలో సంతోష్‌ కుమార్‌ కొంకా నిర్మిస్తున్నారు. ఈ సినిమా టీజర్‌ని హాస్య నటుడు అలీ, కెమెరామెన్‌ ఎస్‌.గోపాల్‌ రెడ్డి విడుదల చేశారు.  కిరణ్‌ శ్రీపురం మాట్లాడుతూ– ‘‘మనం మాట్లాడటం కంటే పనే మాట్లాడాలనే దానికి మా సినిమానే నిదర్శనం. మూడు వేరియేషన్స్‌లో సాగుతుంది’’ అన్నారు. ‘‘మర్డర్‌ మిస్టరీ నేపథ్యంలో తెరకెక్కిన చిత్రమిది’’ అన్నారు సూర్యతేజ్‌. సిమ్రాన్, సోని చరిష్టా,  మ్యూజిక్‌ డైరెక్టర్‌ సుక్కు పాల్గొన్నారు. ఈ చిత్రానికి కెమెరా: ఎస్‌.మురళీమోహన్‌రెడ్డి, సహ నిర్మాత: పంతం అరుణ రెడ్డి.

కబాలి సినిమాతో టాలీవుడ్ ప్రేక్షకులకు కూడా పరిచయం అయిన నటి సాయి ధన్సిక. తాజాగా సాయి ధన్సిక సినమ్‌ అనే లఘు చిత్రంలో అద్భుతంగా నటించి మెప్పించారు. ఆ చిత్రం కోల్‌కతా అంతర్జాతీయ కల్ట్‌ చిత్రోత్సవాల్లో ప్రదర్శింపబడి ఉత్తమ లఘు చిత్రం, ఉత్తమ నటి తదితర 8 అవార్డులను గెలుచుకుంది. అదే విధంగా కాలిఫోర్నియాలో జరిగిన అంతర్జాతీయ చిత్రోత్సవాల్లో పలు అవార్డులను గెలుచుకుంది.  ప్రస్తుతం ఈ భామ ఓ స్ట్రయిట్ తెలుగు సినిమాలో నటిస్తోంది. మేళా అనే చిత్రం ద్వారా ఈ బ్యూటీ టాలీవుడ్‌ ప్రేక్షకులను పలకరించడానికి రెడీ అవుతున్నారు. దీనిపై సాయి ధన్సిక మాట్లాడుతూ తెలుగు చిత్రసీమలో ప్రముఖ రచయిత కిరణ్‌ తనను కలిసి మిమ్మల్ని దృష్టిలో పెట్టుకునే ఒక కథను తయారు చేసి తానే దర్శకత్వం వహించడానికి సిద్ధం అయ్యానని చెప్పారన్నారు.  యథార్థ సంఘటనల ఆధారంగా లేడీ ఓరియంటెడ్‌ కథగా ఈ సినిమా ఉంటుందన్నారు. ప్రేక్షకులకు ద్విపాత్రాభినంలా అనిపిస్తుందని, తాను ఈ చిత్రంలో రెండు విభిన్న గెటప్‌లలో కనిపిస్తానని, ఒక గెటప్‌లో దెయ్యంగా కనిపిస్తానని తెలిపారు. ఇందులో తనకు జోడీ ఎవరూ ఉండరని, అయితే  తెలుగు, తమిళ ప్రముఖ నటీనటులు ప్రధాన పాత్రల్లో నటిస్తున్నారని చెప్పారు. తెలుగు నటుడు సూర్యతేజ కథానాయకుడిగా, అలీ, భరత్‌రెడ్డి, మునీష్‌కాంత్, జాంగిరి మధుమిత నటిస్తున్నారని తెలిపారు. ఈ చిత్రంలో ఫైటింగ్‌ సన్నివేశాల్లో డూప్‌ లేకుండా నటించానని అన్నారు. మేళా చిత్రం తెలుగు, తమిళ భాషల్లో ఏక కాలంలో విడుదల కానుందని ఆమె తెలిపారు.

మాలీవుడ్ యంగ్ హీరో దుల్కర్‌ సల్మాన్‌ హీరోగా తెరకెక్కిన విభిన్న కథా చిత్రం సోలో. ఈ సినిమాలో దుల్కర్ సల్మాన్ రుద్ర,  శివ, శేఖర్, త్రిలోక్ లు గా నాలుగు భిన్నమైన పాత్రల్లో కనిపించాడు. మాలీవుడ్ లో మంచి సక్సెస్‌సాధించిన ఈసినిమాను ఇప్పుడు తెలుగు ప్రేక్షకుల ముందుకు తీసుకువస్తున్నారు. దుల్కర్  సరసన ధన్సిక, నేహ శర్మ, శ్రుతి హరిహరన్‌లు హీరోయిన్ లుగా నటించారు. ఈ సినిమాను తెలుగులో వెంకట సాయి ప్రియాన్సి క్రియేషన్స్ బ్యానర్ పై మాస్టర్ వెంకట్ సాయి విశాల్ సమర్పణలో గాజుల వెంకటేష్ నిర్మిస్తున్నారు. ప్రస్తుతం ఈ సినిమా డబ్బింగ్‌ పనులు శర వేగంగా జరుపుకుంటూ త్వరలో విడుదలకు సిద్దమవుతోంది. బెజోయ్ నంబియార్ దర్శకత‍్వంలో తెరకెక్కిన ఈ సినిమాకు గౌతమ్‌ కశ్యప్‌, ఉమర్జి అనురాధలు తెలుగు వర్షన్‌ మాటలు అందిస్తున్నారు.

సూర్యతేజ్, ‘కబాలి’ ఫేమ్‌ ధన్సిక, సిమ్రాన్, సోని చరిష్టా ప్రధాన పాత్రల్లో రూపొందుతోన్న సస్పెన్స్‌ థ్రిల్లర్‌ ‘మేళా’. కిరణ్‌ శ్రీపురం దర్శకత్వంలో మామిడి వెంకటలక్ష్మి సమర్పణలో సంతోష్‌ కుమార్‌ కొంకా నిర్మిస్తున్నారు. కిరణ్‌ శ్రీపురం మాట్లాడుతూ– ‘‘2006లో ముంబైలో జరిగిన వాస్తవ సంఘటన ఆధారంగా తెరకెక్కిస్తోన్న చిత్రమిది. 50–60 శాతం చిత్రీకరణ పూర్తయింది. కథానుగుణంగా ధన్సిక, సూర్యతేజ, సోని చరిష్టా పాత్రలకు రెండు, మూడు వెర్షన్స్‌ ఉంటాయి. ప్రస్తుతం క్లైమాక్స్‌ లీడ్‌ సాంగ్‌ చిత్రీకరిస్తున్నాం. త్వరలోనే ట్రైలర్‌ విడుదల చేస్తున్నాం’’ అన్నారు. ‘‘విభిన్నమైన కథ, కథనంతో కూడిన చిత్రమిది. కిరణ్‌గారు సినిమాను పక్కా ప్లానింగ్‌తో పూర్తి చేస్తున్నారు’’ అన్నారు సంతోష్‌కుమార్‌. ‘‘నా కెరీర్‌లో చాలా ముఖ్యమైన సినిమా ఇది. లవ్, కామెడీ, ఎమోషన్స్‌ వంటి అన్ని ఎలిమెంట్స్‌ ఉన్నాయి. తప్పకుండా ప్రేక్షకులకు నచ్చేలా ఉంటుంది’’ అన్నారు సాయి ధన్సిక. ‘‘వైవిధ్యమైన కథతో రూపొందుతోన్న చిత్రమిది. ఇందులో కీలక పాత్రలో కనిపిస్తా’’ అన్నారు రాజా రవీంద్ర. ఈ సమావేశంలో సోని చరిష్టా కూడా పాల్గొన్నారు. ఈ చిత్రానికి సంగీతం: సుక్కు, కెమెరా: ఎస్‌.మురళీమోహన్‌రెడ్డి, సహ నిర్మాత: పంతం అరుణరెడ్డి.

ఇటీవల తమిళనాట సీనియర్ నటుడు దర్శకుడు టీ రాజేందర్, హీరోయిన్ ధన్సికల మధ్య జరిగిన వివాదం సంచలనం సృష్టించిన సంగతి తెలిసిందే. ఓ సినిమా వేడుకలతో తన పేరు ప్రస్తావించలేదంటూ రాజేందర్, ధన్సికను ఉద్దేశించి స్టేజ్ మీదే అవమానకరంగా మాట్లాడటం, ఆమె కన్నీరు పెట్టుకోవటంతో అప్పట్లో హాట్ టాపిక్ గా మారింది. ఈ విషయంలో పలువురు తమిళ సినీ నటులు ధన్సికకు మద్ధతు తెలిపారు. తాజాగా ఈ సంఘటనపై ఓ మీడియా సమావేశంలో స్పందించిన ధన్సిక, ఆ సంఘటన గురించి వివరించారు. రాజేందర్ మాటలు తనను తీవ్రంగా బాధించాయని, ఆ సంఘటన తరువాత తనకు వారం రోజుల పాటు నిద్రపట్టలేదని తెలిపింది. అంతేకాదు టి రాజేందర్ ఆధ్యాత్మిక వేత్త అని చెపుతుంటారన్న ధన్సిక ఆధ్యాత్మిక భావాలున్న వ్యక్తి అలా మాట్లాడరని, అందరి ముందూ అలా కేకలు వేయరని తెలిపింది. తాను గతంలోనూ ఇలాంటి పరిస్థితులు ఎదుర్కొన్నానని, మహిళలకు ఏ రంగంలో అయినా ఈ బాధలు తప్పవని తెలిపింది.

చెన్నై: ప్రముఖ నటుడు, దర్శకుడు టి. రాజేందర్ అందరి ముందు ఓ హీరోయిన్‌ను కడిగిపారేశారు. చెన్నైలో జరిగిన విలేకరుల సమావేశంలో యువనటి ధన్షికపై శివాలెత్తిపోయారు. ధన్షిక ప్రసంగంలో తన పేరు ప్రస్తావించలేదని ఆగ్రహంతో ఊగిపోయారు. ఎంత పొగరంటూ దుర్భాషలాడినంత పనిచేశారు. పొరపాటున మరచిపోయానని చెప్పినా రాజేందర్ లక్ష్యపెట్టలేదు. సారీ చెప్పినా కనికరించలేదు. దీంతో ధన్షిక వేదికపైనే కన్నీటి పర్యంతమయింది. రాజేందర్-ధన్షిక వివాదానికి ‘విళితిరు’ చిత్ర  ప్రెస్‌మీట్ వేదికైంది. చిత్రంలో హీరోయిన్‌గా నటించిన ధన్షిక సినిమా గురించి మాట్లాడింది. నటీనటులు, టెక్నీషియన్స్‌ అందరి గురించి ప్రస్తావించింది. కానీ సినిమాలో ఓ పాట పాడిన రాజేందర్‌ పేరు చెప్పడం మరచిపోయింది. దీన్ని అవమానంగా భావించిన రాజేందర్‌.. స్టేజ్‌పైనే ఆగ్రహం ప్రదర్శించారు. కబాలి చిత్రంలో రజినీకాంత్‌తో నటించి మాత్రాన హీరోయిన్లు అయిపోరని, పెద్దలను గౌరవించాలని చురకలంటించారు. సహచర ఆర్టిస్టులకు మర్యాద ఇవ్వడం నేర్చుకోవాలని గద్దించారు. పెద్ద ఆర్టిస్టులకు గౌరవించకపోతే భవిష్యత్‌ ఉండదని హెచ్చరిస్తూ ఆమె వైఖరిని కఠినంగా తప్పుబట్టారు. స్టేజ్‌పై ప్రసంగించడం తనకు అలవాటు లేదని, అంతేతప్ప కావాలని చేసింది కాదని ధన్షిక ఎంత సర్దిచెప్పే ప్రయత్నం చేసినా వినిపించుకోలేదు. రాజేందర్‌ వైఖరితో ఖిన్నురాలైన ఆమె మౌనంగా ఉండిపోయింది. హీరో శింబు తండ్రి అయిన రాజేందర్‌ గతంలోనూ వివాదస్పద వ్యాఖ్యలు చేశారు.  


 పెళ్లి చేసుకోను, ఆధ్యాత్మిక బాటలో పయనిస్తున్నానంటోంది నటి ధన్సిక. పేరాన్మై చిత్రం ద్వారా కోలీవుడ్‌ తెరపై మెరిసిన ఈ భామ ఆ తరువాత పలు చిత్రాల్లో నటించినా పెద్దగా గుర్తింపు రాలేదు. అలాంటిది కబాలి చిత్రంలో రజనీకాంత్‌కు కూతురిగా నటించింది కాసేపే అయినా ఇరగదీసింది. అందుకు మంచి పేరే తెచ్చుకుంది కూడా. తాజాగా కోలీవుడ్‌తో పాటు మాలీవుడ్, శాండిల్‌వుడ్‌లోకి పరిచయమైన నటి ధన్సిక నటించిన తాజా చిత్రం ఉరు. త్వరలో విడుదలకు సిద్ధమవుతున్న ఈ చిత్రం గురించి ధన్సిక తెలుపుతూ ఇందులో రచయిత అయిన కలైయరసన్‌కు అర్ధాంగిగా నటించానని చెప్పింది. వాణిజ్య అంశాలతో కథ రాయమని ఒత్తిడి చేయడంతో అలాంటి కథను రాయడానికి కలైయరసన్‌ కోడైక్కానల్‌ వెళతానన్నారు.
 
 అక్కడ జరిగే అనూహ్య సంఘటనలే ఉరు చిత్రం అని చెప్పింది. ఉరు అంటే భయం అని దర్శకుడు విక్కీఆనంద్‌ తెలిపారని అంది. గ్లామర్‌ గురించి మీ అభిప్రాయం ఏమిటన్న ప్రశ్నకు ధన్సిక బదులిస్తూ కొత్తలో తెలియక గ్లామర్‌ పాత్రల్లో నటించానని చెప్పింది. అయితే ఇకపై గ్లామరస్‌గా నటించేది లేదని చెప్పింది. తాను సాయి భక్తురాలినని,అందుకే తన పేరును కూడా సాయి ధన్సికగా మార్చుకున్నానని తెలిపింది. ఆధ్యాత్మిక బాటలో పయనిస్తున్న తనకు పెళ్లి చేసుకునే ఆలోచన కూడా లేదని అంది.
 
 అనాథాశ్రమాన్ని కట్టించనున్నానని తెలిపింది. అదే విధంగా నటిగా తనకు తగ్గ పాత్రలనే ఎంపిక చేసుకుని నటించాలని నిర్ణయించుకున్నాని చెప్పింది. మరో నటిని చూసి అసూయ పడే మనస్తత్వం తనది కాదని ధన్సిక పేర్కొంది. అన్నట్లు ఈ అమ్మడు మలయాళ చిత్రంలో అంధురాలిగా నటిస్తున్నారట.


 పూరి దర్శకత్వంలో తెరకెక్కిన రోగ్ సినిమాతో విలన్గా దక్షిణాది ప్రేక్షకులను పలకరించాడు థాకూర్ అనూప్ సింగ్. మిస్టర్ వరల్డ్గా అంతర్జాతీయ స్థాయిలో గుర్తింపు తెచ్చుకున్న అనూప్, బాలీవుడ్లో తెరకెక్కిన మహాభారత్ సీరియల్లో ధృతరాష్ట్రుడిగా నటించాడు. సౌత్లో ముందుగా రోగ్ సినిమాలో నటించినా.. సింగం 3 సినిమా ముందు రిలీజ్ అయ్యింది. తరువాత విన్నర్, రోగ్ సినిమాల్లో ఆకట్టుకున్న థాకూర్ అనూప్ సింగ్ త్వరలో హీరోగా ఎంట్రీ ఇవ్వబోతున్నాడు.
 
 కన్నడ, తెలుగు భాషల్లో తెరకెక్కుతున్న సునీల్ కుమార్ దేశాయ్ తెరకెక్కిస్తున్న సస్పెన్స్ థ్రిల్లర్ మూవీతో హీరోగా మారుతున్నాడు అనూప్. ఈ సినిమాలో కబాలి ఫేం ధన్సిక హీరోయిన్గా నటిస్తోంది. తన తొలిచిత్రం నుంచే ఓన్గా డబ్బింగ్ చెప్పుకుంటున్న అనూప్, కన్నడ వర్షన్కు కూడా స్వయంగా డబ్బింగ్ చెప్పేందుకు రెడీ అవుతున్నాడు. ఇప్పటి వరకు బ్యాడ్ బాయ్ పాత్రల్లోనే ఆకట్టుకున్న ఈ యువ నటుడు, హీరోగానూ మెప్పిస్తానంటున్నాడు.


 యువన్‌శంకర్‌రాజా లాగా ఇసైజ్ఞాని ఇళయరాజా సంగీత బాణీలను కట్టాలని దర్శకుడు కరు.పళనివేల్ విజ్ఞప్తి చేశారు. ఎంకే ఫిలింస్ పతాకంపై సి.ముత్తుకృష్ణన్ నిర్మిస్తున్న చిత్రం రాణి. ఎస్.పాణి దర్శకత్వం వహిస్తున్న ఈ చిత్రంలో సాయి, కబాలి చిత్రం ఫేమ్ ధన్సిక ప్రధాన పాత్రలు పోషిస్తున్నారు. సంగీత జ్ఞాని ఇళయరాజా సంగీతాన్ని అందిస్తున్నారు. ఈ చిత్ర ఆడిమో ఆవిష్కరణ కార్యక్రమం ఆదివారం సాయంత్రం స్థానిక సాలిగ్రామంలోని ప్రసాద్ ల్యాబ్‌లో జరిగింది.  కార్యక్రమంలో అతిథిగా పాల్గొన్న దర్శకుడు కరు.పళనియప్పన్ మాట్లాడుతూ తానింత వరకూ ఎవరినీ ఏ కోరిక కోరలేదన్నారు. అలా కోరితే సమస్యలు తలెత్తుతాయని అన్నారు. అరుునా తానీరోజున ఇసైజ్ఞాని ఇళయరాజాను ఒక కోరిక కోరుతున్నానన్నారు.
  
   ఆయన యువ సంగీత దర్శకుడు యువన్‌శంకర్‌రాజా లాగా ఈ తరానికి తగ్గట్టుగా సంగీతాన్ని అందించాలన్నారు. ఎందుకంటే ఆయన చాలా ఏళ్ల క్రితం బాణీలు కట్టిన పాటలను మనం ఇప్పటికీ విని ఆనందిస్తున్నామన్నారు. అలానే యువన్‌శంకర్‌రాజా తరహాలో పాటలను అందిస్తే ఈ తరం వారికి మరి కొన్నేళ్ల ఇళయరాజా పాటలను వినే భాగ్యం కలుగుతుందన్నారు. మరో కోరిక ఏమిటంటే కార్తీక్‌రాజా, యువన్‌శంకర్‌రాజాలు ఆయన తండ్రి ఇళయరాజా ఇప్పటి వరకూ సంగీతాన్ని అందించిన చిత్రాల వివరాలను సేకరించి ఆయనకు బ్రహ్మాండమైన అభినందన సభను ఏర్పాటు చేయాలని అన్నారు. 
  
  ఇళయరాజాకు అభినందన సభ అంటే సంగీత ప్రియులందరూ చూసి సంతోషిస్తారని అన్నాను. నాలుగు శతాబ్దాల ఘన చరిత్ర కలిగిన ఇళయరాజా ఇందుకు అంగీకరించరని, అయితే ఈ విషయమై తాను యువన్‌శంకర్‌రాజాతో మాట్లాడతానని దర్శకుడు కరు.పళనీయప్పన్ అన్నారు. ఈ కార్యక్రమంలో నటి ధన్సిక, చిత్ర దర్శకుడు పాణి, నిర్మా త ముత్తుకృష్ణన్, దర్శకుడు పేరరసు, సముద్రఖని, నమో నారాయణ, మనోజ్‌కుమార్, తమిళ నిర్మాతల మండలి ఉపాధ్యక్షుడు పీఎల్.తేనప్పన్ తదితరులు పాల్గొన్నారు. 
  


 రెండు సినిమాలు భారీ డిజాస్టర్లు అయిన తరువాత ఎంతటి స్టార్ హీరోకయినా వెనకడుగు తప్పదు. ఆ తరువాత చేయబోయే సినిమాల రికార్డ్లు, బిజినెస్ విషయంలో ఆ ఫ్లాప్ సినిమాల ప్రభావం బాగానే కనిపిస్తోంది. కానీ సౌత్ సూపర్ స్టార్ రజనీకాంత్ మాత్రం ఇలాంటి వాటికి అతీతుడని మరోసారి ప్రూవ్ చేసుకున్నాడు. రజనీ హీరోగా తెరకెక్కిన కొచ్చాడయాన్, లింగా సినిమాలు భారీ డిజాస్టర్లు అయినా, కొత్త సినిమా కబాలీ సరికొత్త రికార్డ్లు సృష్టిస్తోంది.
 
 రజనీ పుట్టిన రోజు కానుకగా రిలీజ్ అయిన కబాలీ టీజర్ హాలీవుడ్ సినిమాలకు కూడా చెమటలు పట్టిస్తోంది. ఇప్పటికే 2 కోట్లకు పైగా వ్యూస్తో రికార్డ్ సృష్టించిన కబాలీ ప్రపంచంలో అత్యధిక మంది వీక్షించిన టీజర్గా రికార్డ్ సృష్టించింది. అవేంజర్స్ లాంటి హాలీవుడ్ సినిమాలను కూడా వెనక్కి నెట్టి రజనీ సాధించిన రికార్డ్తో ఫ్యాన్స్ పండగ చేసుకుంటున్నారు.
 
 ఇక బిజినెస్ విషయంలో కూడా రజనీ తన స్టామినాను ప్రూవ్ చేసుకుంటున్నాడు. డిజాస్టర్ టాక్తో కూడా రజనీ లింగా వంద కోట్లకు పైగా వసూళ్లు సాధించటంతో ఇప్పుడు కబాలీ మీద భారీ అంచనాలు ఏర్పడ్డాయి. అందుకు తగ్గట్టుగా రిలీజ్కు ముందే కబాలీ 200 కోట్ల వరకు బిజినెస్ చేసే అవకాశం ఉందంటున్నారు విశ్లేషకులు. ఇండియాతో పాటు రజనీకి బాగా పట్టున్న జపాన్, తొలిసారిగా మలేషియాలో కూడా భారీగా కబాలీ సినిమాను రిలీజ్ చేస్తున్నారు.
 
 రజనీ సరసన రాధికా ఆప్టే హీరోయిన్గా నటిస్తున్న ఈ సినిమాకు పా రంజిత్ దర్శకుడు. తమిళ బ్యూటి ధన్సిక లేడీ డాన్గా కనిపిస్తుండగా, మరికొంత మంది హాలీవుడ్ స్టార్లు విలన్లుగా నటించారు. కలైపులి ఎస్ థాను నిర్మిస్తున్న ఈ సినిమా ఆడియోను ఈ నెల 11న,  సినిమాను జులై 1న రిలీజ్ చేయనున్నారు.


 కబాలి చిత్రంలో సూపర్‌స్టార్ రజనీకాంత్‌తో నటించిన ధన్సిక తాజాగా కాత్తాడి అనే చిత్రంలో పవర్‌ఫుల్ పోలీస్‌అధికారిణిగా రఫ్ ఆడిస్తున్నారు. గ్యాలక్సీ పిక్చర్స్ పతాకంపై రూపొందుతున్న చిత్రం కాత్తాడి. ఈ చిత్రం ద్వారా అతిలోక సుందరి శ్రీదేవి పిన్ని కొడుకు, నటి మహేశ్వరి సోదరుడు అభిషేక్ కథానాయకుడిగా నటిస్తున్నారు. కథానాయకిగా నటి ధన్సిక నటిస్తున్నారు. ఇతర ముఖ్య పాత్రలో సంపత్, జాన్‌విజయ్, మనోబాలా, కోటాశ్రీనివాసరావు, వీఎస్.రాఘవన్, కాళీవెంకట్, సుమార్‌మూంజి కుమార్ డేనియల్, నాన్‌కడవుల్ రాజేంద్రన్, పసంగ శివకుమార్, లొల్లుసభ మనోహర్, వినోదిని, మధుమిత, సూపర్‌గుడ్ సుబ్రమణి చరణ్‌రాజ్ నటిస్తున్నారు. డి. ఇమాన్ సంగీతాన్ని అందిస్తున్న ఈ చిత్రానికి కథ, కథనం, మాటలు, దర్శకత్వం బాధ్యతల్ని ఎస్.కల్యాణ్ నిర్వహిస్తున్నారు. ఈయన ఇంతకు ముందు కథ సొల్లపోరోమ్ వంటి సక్సెస్‌ఫుల్ చిత్రాన్ని తెరకెక్కించారన్నది గమనార్హం. తాజా చిత్రం కాత్తాడి గురించి దర్శకుడు కల్యాణ్ తెలుపుతూ ఇది వినోదం మేళవించిన యాక్షన్ కథా చిత్రం అని తెలిపారు. ప్రముఖ వ్యాపారవేత్త సంపత్ కూతురు చైతన్యను దొంగలైన హీరో అవినేష్, సుమార్ మూంజి కుమార్ డేనియల్ కిడ్నాప్ చేస్తారన్నారు.
 వారి నుంచి పోలీస్ అధికారిణి ధన్సిక ఆ పాపలు ఎలా కాపాడిందన్నదే చిత్ర కథ అని తెలిపారు. తన తొలి చిత్రం కథై సొల్లపోరోమ్ చిత్రం విజయం సాధించడానికి ప్రధాన కారణం అందులోని సెంటిమెట్‌నేననీ అన్నారు. ఈ చిత్రంలోనూ అది సన్నివేశాలకు తగ్గట్టుగా ఉంటుందన్నారు. చిత్రం బాగా నచ్చడంతో కథ సొల్లపోరోమ్ చిత్రాన్ని డిస్ట్రిబ్యూషన్ చేసిన లిప్పీ సినీ క్రాఫ్ట్స్ రంజిత్‌కుమార్ ఈ చిత్ర విడుదల హక్కుల్ని పొందారని చెప్పారు. త్వరలోనే ఈ చిత్రాన్ని విడుదలకు సన్నాహాలు చేస్తున్నట్లు చెప్పారు.


 సరిగ్గా మరో పదిరోజుల్లో పూజా కార్యక్రమాలు జరుపుకోనున్న వేళ సౌతిండియన్ సూపర్‌స్టార్ రజనీకాంత్ తాజా సినిమా గురించి రోజుకో వార్త వెలుగులోకి వస్తోంది. తాజా కబురేమిటంటే, ‘అట్ట కత్తి’, ‘మద్రాస్’ లాంటి చిత్రాలు రూపొందించిన రంజిత్ దర్శకత్వంలో తయారయ్యే ఈ సినిమాలో రజనీకాంత్‌కు ఒక కూతురు పాత్ర కూడా ఉంటుందట! కూతురు పాత్ర అంటే, ఎవరో బాల నటి నటించే పాత్ర కాదు. ఏకంగా హీరోయిన్ తరహా నటి చేయాల్సిన పాత్రే! ఈ పాత్ర కోసం ప్రముఖ తమిళ నటి ధన్సికను చిత్ర యూనిట్ సంప్రతిస్తోందట! ఈ చిత్రంలో వయసు మీద పడుతున్న గ్యాంగ్‌స్టర్ పాత్రను రజనీకాంత్ పోషిస్తున్నట్లు సమాచారం. ‘లెజెండ్’, ‘లయన్’ చిత్రాల్లో బాలకృష్ణ పక్కన కనిపించిన బాలీవుడ్ నటి రాధికా ఆప్తే ఆయన భార్య పాత్ర ధరిస్తున్నారు.
  
  కాగా, రజనీ కుమార్తె పాత్ర కోసం ఇప్పుడు అన్వేషణ సాగుతోంది. తమిళ నటి అక్షర (‘ఆరంబమ్’ ఫేమ్)తో సహా కొంతమంది కొత్తవాళ్ళను కూడా ఆ పాత్ర కోసం అడిగారట. చివరకు తమిళ చిత్రాలు ‘అరవాన్’, ‘పరదేశి’ ఫేమ్ అయిన యువ నటి ధన్సికతో చర్చలు జరుగుతున్నాయి. దర్శకుడు రంజిత్ సైతం ఈ చర్చల విషయం నిజమేనని ధ్రువీకరించారు. గత ఏడాది చివరలో వచ్చిన రజనీకాంత్ సినిమా ‘లింగ’ బాక్సాఫీస్ వద్ద ఘోరంగా పరాజయం పాలైన సంగతి తెలిసిందే.
  
  దాంతో, ఇప్పుడీ కొత్త చిత్రాన్ని మరింత జాగ్రత్తగా రూపొందించాలని రజనీ బృందం సిద్ధమవుతోంది. రజనీకాంత్‌కు కలిసొచ్చిన ‘కాళీ’ అనే టైటిల్‌నే ఈ సినిమాకూ పెడతారని సమాచారం. ఈ నెల 21న జరగనున్న పూజా కార్యక్రమాల సమయంలో మరిన్ని వివరాలు బయటకు రావచ్చు. సెప్టెంబర్ నుంచి మలేసియాలో ఈ చిత్రం రెగ్యులర్ షూటింగ్ జరుగుతుందని కోడంబాకమ్ కబురు.
  


 మొదట సందిగ్ధంలో పడ్డా,  ఇప్పుడు నేను హ్యాపీ అంటోంది నటి ధన్సిక. ఇంతకు ఈమె ఏ విషయం గురించి మాట్లాడుతుందనేగా మీ ప్రశ్న. పేరాన్మై చిత్రంతో నటిగా తానేమిటో నిరూపించుకున్న ఈ అమ్మడు తాజాగా నటించిన చిత్రం తిరుందిడుసిసే సుధాస్ ప్రొడక్షన్స్ పతాకంపై రూపొందిన ఈ చిత్రంలో నవ నటులు వీరవన్ స్టాలిన్, నారాయణ్, అంజెనా కీర్తి  ముఖ్య పాత్రలు పోషించారు. దర్శకుడు శంకర్ శిష్యుడు నిమేష్ వర్షన్ దర్శకుడిగా పరిచయం అయిన ఈ చిత్రం శుక్రవారం తెరపైకి వచ్చింది. ఈ చిత్రంలో నటించిన అనుభవాన్ని నటి ధన్సిక తెలుపుతూ తిరుందిడు సిసే యథార్థ సంఘటన ఆధారంగా రూపొందించిన కథా చిత్రం అని పేర్కొంది. ఈ చిత్ర కథను దర్శకుడు తనకు చెప్పినప్పుడు చాలా ఎగ్జైట్ అయ్యానని చెప్పింది. అయితే మొదట చిత్రం చేద్దామా? వద్దా అన్న సందిగ్ధంలో పడ్డానని అంది.
  
   కారణం ఇందులోని పాత్రకు న్యాయం చేయగలనా? అన్న సందేహమేనని పేర్కొంది. అయితే ఇప్పుడు చాలా హ్యాపీ అని అంది. ఈ చిత్రంలో చార్మి అనే పాత్రలో నటించానని తెలిపింది. ఇది అత్యాచారానికి గురైన యువతి పాత్ర అని చెప్పింది. ఈ పాత్రలో తన నటనకు పలువురి నుంచి ప్రశంసలు లభిస్తున్నాయని చెప్పింది. తనది చాలా బ్యాలెన్సింగా నటించాల్సిన పాత్ర అని ఏ మాత్రం అటూ ఇటూ అయినా దాన్ని స్వభావం మారిపోతుందని అంది. ఇది సమాజంపై చెడు ప్రభావం చూపే అంశాలపై కనువిప్పు కలిగించే కథాచిత్రం అని ముఖ్యంగా మద్యానికి బానిసలైన వ్యక్తులు అత్యాచారాలు లాంటి అంశాలను చర్చించే చిత్రం అని పేర్కొంది. సమాజానికి చక్కని సందేశాన్నిచ్చే ఇలాంటి చిత్ర యూనిట్‌తో కలిసి పని చేయడం సంతోషంగా ఉందని నటి ధన్సిక అంది.
  


  నటి దన్సిక హాలీవుడ్‌కు బాటలు వేసుకునే ప్రయత్నంలో ఉంది. పరదేశి వంటి చిత్రాల్లో తన నటనా ప్రతిభను నిరూపించుకున్న ఈ భామ ప్రస్తుతం చేతినిండా చిత్రాలతో యమ బిజీగా ఉంది. త్వరలో తమిళం, తెలుగు, కన్నడం మొదలగు మూడు భాషల్లో తెరకెక్కనున్న చిత్రంలో నటించే అవకాశాన్ని దక్కించుకుంది. దీని గురించి ఈ బ్యూటీ మాట్లాడుతూ ప్రస్తుతం తమిళంలో మంచి అవకాశాలు లభిస్తున్నాయని చెప్పింది. ప్రస్తుతం తాను నటిస్తున్న చిత్రాల వివరాలు తెలుపుతూ విళిత్తురు చిత్ర షూటింగ్ పూర్తయిందని తెలిపింది. ఇందులో తాను స్లమ్ ఏరియా అమ్మాయిగా నటించానని చెప్పింది. తిరందిరుసిసే సస్పెన్స్ థ్రిల్లర్ కథా చిత్రం అని తెలిపింది. ఇది ఒక క్లబ్‌లో జరిగే కథా చిత్రం అని పేర్కొంది.
  
  ఇక కాత్తాడి చిత్రంలో యాక్షన్ హీరోయిన్‌గా అవతారమెత్తుతున్నానని వెల్లడించింది. తదుపరి సముద్రకని దర్శకత్వంలో రూపొందనున్న త్రిభాషా (తమిళం, తెలుగు, కన్నడం) చిత్రం కిట్టా చిత్రంలో నటించనున్నట్లు తెలిపింది. ఈ చిత్రంలో నాలుగు గెటప్‌ల్లో  కనిపించనున్నట్లు చెప్పింది. అదేవిధంగా ఛాయా గ్రాహకుడు డేని దర్శకత్వంలో మాల్ అనే చిత్రంలో నటించడానికి అంగీకరించినట్లు తెలిపింది. ఈ చిత్రం తెలుగులో కూడా తెరకెక్కనుందని వెల్లడించింది. అదే విధంగా త్వరలో ఒక హాలీవుడ్ చిత్రంలోనూ నటించనున్నట్లు, ఈ విషయమై చర్చలు జరుగుతున్నాయని ఆమె వివరించింది. తానిప్పుడు పలు చిత్రాల్లో నటిస్తున్నా కాల్‌షీట్స్, సమస్య తలెత్తకుండా జాగ్రత్త పడుతున్నట్లు భామ దన్సిక చెప్పింది.
  


 దర్శక నటుడు సముద్రకని చిత్రంలో నటించనున్నట్టు ధన్సిక తెలిపారు. ఈ పేరాన్మై చిత్రం ఫేమ్ బ్యూటీ పరదేశి చిత్రంలోని అభినయం విమర్శకుల్ని సైతం మెప్పించింది. కాగా నిమిర్ద్ను నిల్ చిత్రం తరువాత నటనపై దృష్టి సారించిన దర్శకుడు సముద్రకని ఇటీవల విడుదలైన వేలై ఇల్లా పట్టదారి చిత్రంలో ధనుష్ తండ్రి పాత్రలో నటించి మంచి పేరు తెచ్చుకున్నారు. తాజాగా మళ్లీ మెగాఫోన్ పట్టనున్నారు. లేడీ ఓరియంటెడ్ కథాంశంతో కూడిన ఈ చిత్రానికి కిట్నా అనే టైటిల్‌ను నిర్ణయించారు.
  
  ఈ చిత్రంలో నటి అమలాపాల్ ప్రధాన పాత్ర పోషించనున్నట్లు మొదట ప్రకటించారు. అయితే ఆమె, దర్శకుడు విజయ్‌ను పెళ్లి చేసుకుని నటనకు దూరంగా ఉన్నారు. ఈ పరిస్థితిలో కిట్నా చిత్రంలో తాను నటించనున్నట్లు ధన్సిక వెల్లడించారు. సముద్రకని దర్శకత్వంలో నటించనుండడం సంతోషంగా ఉందని ఈ బ్యూటీ పేర్కొన్నారు. చిత్ర షూటింగ్ అక్టోబర్‌లో ప్రారంభం కానుందని చెప్పారు. ఇది 18 నుంచి 48 ఏళ్ల మధ్య జరిగే ఒక మహిల ఇతివృత్తం అని తెలిపారు. చిత్ర కథ ప్రధానంగా నాలుగు పాత్రల చుట్టూ తిరుగుతుందన్నారు.
  
  ఇందులో ఒక పాత్రను దర్శకుడు సముద్రకని, మరో పాత్రను ప్రముఖ కన్నడ నటుడు యోగి చేయనున్నారని తెలిపారు. ఇంకో పాత్ర కోసం నటి అమలాపాల్‌ను నటింప జేసే విషయమై దర్శక నిర్మాతలు చర్చలు జరుపుతున్నారని చెప్పారు. అమలాపాల్ ఓకే అంటే వివాహానంతరం ఆమె నటించే తొలి చిత్రం ఇదే అవుతుందన్నారు. యాయా చిత్రం తరువాత తాను నటించిన తిరుందిరుసేసే, కాత్తాడి, వెళ్లిత్తిరు మొదలగు మూడు చిత్రాల విడుదలకు సిద్ధం అవుతున్నాయని ధన్సిక తెలిపారు.