చూస్తుండంగానే రోజులు చకచక గడిచిపోతున్నాయి. ఈ కొత్త ఏడాదిలో అప్పుడే 3 నెలలోకి ఎంట్రీ ఇచ్చాం. కొత్త నెలతోపాటు దేశంలో కొత్త కొత్త నిబంధనలు అమలులోకి వస్తాయి. దీంతో చాలా మందిపై ప్రభావం పడే అవకాశముంది. అందువల్ల వల్ల ఈరోజు నుంచే మారే అంశాలు ఏంటివో ఇప్పుడు తెలుసుకుందాం. అమూల్ సంస్థ తన లీటర్ పాల ప్యాకెట్ ధరలను రూ.2 పెంచుతున్నట్లు వెల్లడించింది. పెంచిన ధరలను మార్చి 1 నుంచి అమలలోకి రానున్నాయి. అమూల్ సంస్థ గోల్డ్, తాజా, శక్తి, టీ స్పెషల్ లాంటి వేరియంట్లలో పాల ప్యాకెట్లను ఉత్పత్తి చేస్తోంది. అమూల్ గోల్డ్ అరలీటర్ ప్యాకెట్ ప్రస్తుతం రూ.28గా ఉండగా మార్చి 1 నుంచి రూ.30కి పెరగనుంది. చమురు మార్కెటింగ్ కంపెనీలు కమర్షియల్‌ గ్యాస్‌ సిలిండర్‌ ధరలను పెంచాయి. 19 కేజీల సిలిండర్‌ ధరపై రూ.105లు, 5 కేజీల సిలిండర్‌పై రూ.27లు పెంచుతున్నట్లు ప్రకటించాయి. దీంతో దేశ రాజధానిలో కమర్షియల్‌ సిలిండర్‌ ధర రెండు వేలు దాటింది. 19 కేజీ సిలిండర్‌ ధర రూ. 2,012కి చేరగా 5 కేజీల సిలిండర్‌ ధర రూ. 569గా ఉంది. వివిధ నగరాల వారీగా 19 కేజీల సిలిండర్ల ధరను పరిశీలిస్తే చెన్నైలో రూ. 2185, ముంబై రూ.1962 , కోల్‌కతా రూ.2089లు, హైదరాబాద్‌లో రూ.1904లుగా ఉన్నాయి  అంతర్జాతీయ చమురు ధరలు ఏడేళ్ల గరిష్టానికి పెరగడంతో జెట్ ఇంధన ధరలు దేశవ్యాప్తంగా ఆల్ టైమ్ గరిష్ట స్థాయికి 3.3 శాతం పెరిగాయి. ప్రపంచ చమురు ధరలు పెరిగిన తర్వాత జెట్ ఇంధనం లేదా ఏవియేషన్ టర్బైన్ ఫ్యూయల్(ఏటిఎఫ్) ధర పెరగడం ఇది ఐదోసారి.  లక్ష్మీ విలాస్ బ్యాంక్ డిజిటల్'గా డబ్బును బదిలీ చేయడానికి ఉపయోగించే ఐఎఫ్ఎస్‌సీ కోడ్స్ మార్చి 1 నుంచి మారనున్నాయి. 2020 నవంబర్ నెలలో డీబీఎస్ బ్యాంక్ ఇండియా లిమిటెడ్(డీబీఎల్) విలీనం కావడంతో ఆ బ్యాంకుకు చెందిన ఐఎఫ్ఎస్‌సీ కోడ్స్ ఫిబ్రవరి 28, 2022 వరకు మాత్రమే చెల్లుతాయని డీబీఎస్ బ్యాంక్ ఒక ప్రకటనలో తెలిపింది.  చాలా రాష్ట్రాలలో కోవిడ్ 19 మహమ్మారి పెరగడంతో, సీనియర్ సిటిజన్స్ ఆరోగ్యాన్ని దృష్టిలో ఉంచుకొని గతంలో కేంద్ర ప్రభుత్వం లైఫ్ సర్టిఫికేట్ డెడ్ లైన్‌ను ఫిబ్రవరి 28, 2022 వరకు పొడిగించింది. దీంతో ప్రస్తుతం కేంద్ర ప్రభుత్వ పెన్షనర్లందరూ లైఫ్ సర్టిఫికేట్‌ను 28.02.2022 వరకు సమర్పించవచ్చు. ఒకవేళ లైఫ్ సర్టిఫికేట్ సమర్పించకపోతే మార్చి 1 నుంచి పెన్షన్ తీసుకునే సమయంలో ఇబ్బందులు ఎదుర్కొనే అవకాశం ఉంటుంది. ఇండియా పోస్టు పేమెంట్స్ బ్యాంకు(ఐపీపీబీ) డిజిటల్ సేవింగ్స్ అకౌంట్ క్లోజర్ ఛార్జీలను ప్రవేశపెట్టింది. మార్చి 5, 2022 నుంచి రూ.150 ప్లస్ జీఎస్టీ ఛార్జీలను విధించనున్నట్టు ఐపీపీబీ తెలిపింది. అయితే ఈ ఛార్జీలు కేవలం కేవైసీ అప్‌డేషన్ లేకుండా ఏడాది తర్వాత క్లోజ్ అయ్యే డిజిటల్ సేవింగ్స్ అకౌంట్లకు మాత్రమేనని తెలిపింది. మిగతా అకౌంట్ల మూసివేతకు ఈ ఛార్జీలు వర్తించవని పేర్కొంది. ఈ కొత్త నిబంధన మార్చి 5 2022 నుంచి అమల్లోకి వస్తుంది. చక్రవాహనాల పెండింగ్‌ చలాన్లకు 75 శాతం రాయితీ ఇస్తున్నట్లు ట్రాఫిక్‌ జాయింట్‌ సీపీ రంగనాథ్‌ స్పష్టం చేశారు. సోమవారం మీడియాతో మాట్లాడుతూ.. ఆన్‌లైన్‌ ద్వారా పెండింగ్ చలాన్లను చెల్లించవచ్చని, ఈ చలాన్ల రాయితీ మార్చి 1 నుంచి 31 వరకు అమలులో ఉంటుందని తెలిపారు. (చదవండి: Hero Electric Eddy: రూ.72 వేలకే హీరో ఎలక్ట్రిక్ స్కూటర్.. విడుదల అప్పుడే!)

2020... వస్తూవస్తూనే ‘కరోనా’ సునామీతో ప్రపంచానికి ‘మాస్క్‌‘ పడింది. ఈ మహమ్మారి దెబ్బకు ప్రజల జీవితాలతో పాటు ప్రపంచ ఆర్థిక వ్యవస్థ కూడా చెల్లాచెదురైంది. వివిధ దేశాల ఎకానమీలు మైనస్‌లలోకి జారిపోయి చరిత్రలో ఎన్నడూచూడని పతనాన్ని చవిచూశాయి. భారత్‌ జీడీపీ ఏకంగా 23.9 శాతం (క్యూ1లో) క్షీణించింది. కరోనా కల్లోలంతో స్టాక్‌ మార్కెట్లు ఒక్కసారిగా పాతాళానికి పడిపోయినప్పటికీ.. మళ్లీ అంతేవేగంగా కోలుకొని, ఆకాశమే హద్దుగా దూసుకుపోయాయి. సెన్సెక్స్‌ మార్చిలో 25,638 పాయింట్ల కనిష్టానికి కుప్పకూలి... కొద్ది నెలల్లోనే కొత్త రికార్డులను బద్దలు కొట్టింది. మరోపక్క, ప్రపంచ ఆర్థిక సంక్షోభంతో బంగారం భగ్గుమంది. భారత్‌లో తులం ధర రూ.55 వేల పైకి ఎగబాకింది. ముడి చమురు ధర చరిత్రలో తొలిసారిగా మైనస్‌లోకి జారిపోయింది. ఇక కరోనాతో దేశీయంగా పర్యాటకం, విమానయానం తదితర రంగాలు తీవ్రంగా దెబ్బతిని, భారీగా ఉద్యోగాల కోతకు దారితీసింది. అసలే మొండిబాకీలతో నెట్టుకొస్తున్న  బ్యాంకింగ్‌ రంగం పరిస్థితి పెనంమీంచి పొయ్యిలో పడినట్లయింది. పీఎంసీ, లక్ష్మీ విలాస్‌ బ్యాంకులు కుప్పకూలాయి. లాక్‌డౌన్‌ల కారణంగా వాహన రంగంలో ఎన్నడూలేని విధంగా సున్నా అమ్మకాలు నమోదయ్యాయి. మోదీ సర్కారు ‘ఆత్మనిర్భర్‌’ రూపంలో దాదాపు రూ. 29 లక్షల కోట్లకు పైగా ప్యాకేజీని ప్రకటించి ఎకానమీకి దన్నుగా నిలిచింది. ఆర్‌బీఐ కూడా వడ్డీరేట్లను అట్టడుగుకు దించేసింది. ఇంత కల్లోలంలోనూ ముకేశ్‌ అంబానీ నిధుల స్వారీ చేశారు. ఫేస్‌బుక్, గూగుల్, ఇంటెల్‌ ఇలా ఒకటేమిటి ప్రపంచాన్ని శాసిస్తున్న అనేక దిగ్గజ కంపెనీలన్నీ రిలయన్స్‌ జియో, రిటైల్‌లలో కోట్లాది డాలర్లు కుమ్మరించేందుకు క్యూ కట్టడం విశేషం. కరోనా పుణ్యమా అని సామాన్యుల నుంచి కార్పొరేట్ల దాకా అంతా డిజిటల్‌ బాట పట్టారు. వర్చువల్, ఆన్‌లైన్‌ అనేవి జీవితంలో భాగమైపోయాయి. ఇలా ఒక రోలర్‌ కోస్టర్‌ రైడ్‌లా సాగిన ఈ ‘కరోనా’నామ సంవత్సరంలో వ్యాపార రంగంలో చోటు చేసుకున్న పరిణామాలపై ‘సాక్షి బిజినెస్‌’ రివైండ్‌ ఇది... మార్కెట్‌ ఉద్దీపనల అండ! ఈ ఏడాది భారత స్టాక్‌ మార్కెట్‌ ప్రయాణం కరోనా విసిరిన సవాళ్లను అధిగమించి కొత్త శిఖరాల అధిరోహణ లక్ష్యంగా సాగింది.  ఏడాది ప్రారంభంలో ఆర్థిక మందగమనం, కోవిడ్‌ భయాలతో సెన్సెక్స్, నిఫ్టీలు మార్చి 24న రెండేళ్ల కనిష్టానికి పతనమయ్యాయి. ద్వితీయార్థంలో ఉద్దీపనల అండ, ఆర్థిక వ్యవస్థ రికవరీ, కోవిడ్‌–19 వ్యాక్సిన్‌ ఆశలు, అంతర్జాతీయ మార్కెట్ల నుంచి సహకారం అందడంతో రికార్డుల ర్యాలీ చేస్తున్నాయి. మరోవైపు కోవిడ్‌–19 వైరస్‌.... స్ట్రెయిన్‌ వైరస్‌గా రూపాంతరం చెంది ప్రపంచదేశాలను భయపెడుతుండటం ఈక్విటీ మార్కెట్లకు ఆందోళనను కలిగిస్తోంది. ఈ ఏడాది మొత్తం మీద సెన్సెక్స్‌ 6492 పాయింట్లు లాభపడగా, నిఫ్టీ 1814 పాయింట్లను ఆర్జించింది.  లాక్‌డౌన్‌ విధింపు ప్రకటనతో మార్చి 23న సెన్సెక్స్, నిఫ్టీలు తమ జీవితకాలంలోనే అతిపెద్ద నష్టాన్ని చవిచూశాయి. ట్రేడింగ్‌ ప్రారంభంలో ఇరు సూచీలు 10 శాతం పతనమవడంతో సర్క్యూట్‌ నిబంధల ప్రకారం ట్రేడింగ్‌ను 45 నిమిషాలు నిలిపేశారు. తర్వాత ట్రేడింగ్‌ ప్రారంభమైనా అమ్మకాలు ఆగకపోవడంతో సెన్సెక్స్‌ 3,935 పాయింట్లు, నిఫ్టీ 1,135 పాయింట్ల నష్టంతో ముగిశాయి. ఇక ఏప్రిల్‌ 7న సూచీలు ఒక్కరోజులో రికార్డు లాభాల్ని ఆర్జించాయి. ఈ ఒక్కరోజే సెన్సెక్స్‌ 2,476 పాయింట్లు, నిఫ్టీ 1,135 పాయింట్లను    ఆర్జించాయి. సూచీ    ఏడాది కనిష్టస్థాయి    ఏడాది గరిష్టస్థాయి సెన్సెక్స్‌    25,638 (మార్చి 24న)    47,807(డిసెంబర్‌ 30) నిఫ్టీ    7511 (మార్చి 24న)    13,997(డిసెంబర్‌ 30) ఎకానమీ మాంద్యం కోరలు... భారత ఆర్థిక వ్యవస్థను కరోనా వైరస్‌ గట్టి దెబ్బ కొట్టడంతో దేశ ఆర్థిక వ్యవస్థ మాంద్యం కోరల్లోకి వెళ్లింది. ప్రస్తుత ఆర్థిక సంవత్సరం మొదటి త్రైమాసికంలో స్థూల దేశీయోత్పత్తి (జీడీపీ) ఏకంగా మైనస్‌ 23.9 శాతానికి పడిపోయింది. అయితే లాక్‌డౌన్‌ ఆంక్షలు సడలింపుసహా ఎకానమీ కోలుకునేందుకు కేంద్రం, ఆర్‌బీఐలు తీసుకున్న ఉద్దీపన చర్యలతో రెండో త్రైమాసికానికి వ్యవస్థ కాస్త రికవరీని సాధించింది. క్షీణత మైనస్‌ 7.5 శాతానికి పరిమితమైంది. కేంద్రం అండ ఆత్మ నిర్భర్‌ అభియాన్‌ కరోనా కుదేలైన ఆర్థిక వ్యవస్థ, పరిశ్రమలకు భరోసానిస్తూ కేంద్రం ఆత్మ నిర్భర్‌ భారత్‌ అభియాన్‌ పథకం ద్వారా అభయమిచ్చింది. కోవిడ్‌ సంక్షోభం నాటి నుంచి ఈ ఏడాదిలో కేంద్రం, ఆర్‌బీఐలు సంయుక్తంగా మొత్తం రూ.29.87 లక్షల కోట్ల ఆర్థిక ఉద్దీపనలను ప్రకటించాయి.  జీడీపీలో 10 శాతం ఉంటుందని అంచనా. ల్యాండ్, లేబర్‌æ, లిక్విడిటీ, లా వీటిపై ప్రధానంగా దృష్టి పెడుతున్నట్లు కేంద్రం చెప్పుకొచ్చింది. ముఖ్యంగా సూక్ష్మ, స్థూల, మధ్య తరగతి పరిశ్రమకు ఎలాంటి షరతులు లేకుండా రుణాలు మంజూరు చేయడంలాంటి ఎన్నో బృహత్కర కార్యక్రమాలు ఇందులో ఉన్నాయి. బ్యాంకింగ్‌ కుదుపులు యస్‌ బ్యాంక్, లక్ష్మీవిలాస్‌ బ్యాంకు, పంజాబ్‌ అండ్‌ మహారాష్ట్ర కోపరేటివ్‌ బ్యాంక్‌(పీఎంసీ) ఉదంతాలతో ఈ ఏడాది భారత బ్యాంకింగ్‌ రంగం భారీగా కుదుపులకు లోనైంది. లక్ష్మీవిలాస్‌ బ్యాంకు ఆర్థిక పరిస్థితి బాగుండకపోవడంతో సింగపూర్‌కు చెందిన డీబీఎస్‌ బ్యాంకులో విలీనమైంది. హెచ్‌డీఐఎల్‌కు రుణాలను జారీ చేయడంలో అక్రమాలకు తెరతీయడంతో మహారాష్ట్ర కోపరేటివ్‌ బ్యాంక్‌ ఆర్‌బీఐ చేతుల్లోకి వెళ్లిపోయింది. అలాగే నిరర్థక ఆస్తులు పెరిగిపోయి నష్టాల ఊబిలో కూరుకుపోయిన యస్‌ బ్యాంక్‌ను రక్షించేందుకు ఆర్‌బీఐ ఆ బ్యాంక్‌లోని 49 శాతం షేర్లను ‘ఎస్‌బీఐ’ చేత కొనుగోలు చేయించింది. ఇక  బ్యాంకింగ్‌లో మొండి బకాయిల తీవ్రత కొనసాగుతోంది. ఆర్‌బీఐ పాలసీ భరోసా కరోనాతో కష్టాలపాలైన ఆర్థిక వ్యవస్థను ఆదుకునేందుకు ఈ ఏడాదిలో ఆర్‌బీఐ ద్రవ్యపాలసీ కమిటీ వడ్డీరేట్లను గణనీయంగా తగ్గించింది. రెపోరేటును 115 బేసిస్‌ పాయింట్లు తగ్గించి 5.15 శాతం నుంచి 4 శాతానికి పరిమితం చేసింది. అలాగే రివర్స్‌ రెపోరేటు 155 పాయింట్లను తగ్గించి 4.9 శాతం నుంచి 3.35 శాతానికి తీసుకొచ్చింది. ప్రతి ద్రవ్యపాలసీ సమీక్షలో సులభతరమైన విధానానికి కట్టుబడి ఉంటామని, ద్రవ్యోల్బణం దిగివస్తే, వడ్డీరేట్లపై మరింత కోత విధించేందుకు వెనకాడబోమని ఆర్‌బీఐ గవర్నర్‌ శక్తికాంత దాస్‌ వ్యాఖ్యలు ఆర్థిక వ్యవస్థ రికవరీకి దన్నుగా నిలుస్తున్నాయి. విమానయానం కుదేలు కరోనా వైరస్‌ కట్టడి చర్యల్లో భాగంగా కేంద్రం విధించిన లాక్‌డౌన్‌తో దేశీయ విమానయాన రంగం పూర్తిగా డీలాపడింది. వైరస్‌ వ్యాప్తి నియంత్రణకు కేంద్రం మార్చి  23 నుంచి అంతర్జాతీయ విమానాలను నిలిపివేసింది. మార్చి 25 నుంచి దేశీయ విమానాలపై ఆంక్షలను విధించింది. సర్వీసులన్నీ ఒక్కసారి స్తంభించిపోవడంతో విమానయాన కంపెనీలకు పైసా ఆదాయం లేకుండా పోయింది.  పైపెచ్చు ఆకస్మిక నిర్ణయంతో విమానయాన సంస్థలు ప్రయాణికులు బుక్‌ చేసుకున్న ముందస్తు టికెట్ల సొమ్మును తిరిగి చెల్లించాల్సి వచ్చింది. దీంతో దేశీయ విమాన కంపెనీలు దివాలా దిశగా ప్రయాణించాయి. అన్‌లాక్‌ ప్రక్రియలో భాగంగా దేశీయ విమాన సర్వీసుల పునరుద్ధరణకు మే 25న అనుమతులు లభించాయి. అలాగే జూలై నుంచి ఆయా దేశాలతో పరస్పర ఒప్పందంతో కొన్ని దేశాలకు విమానాలు నడుస్తున్నాయి. అయితే విమానయాన కంపెనీలకు అధిక ఆదాయాలను ఇచ్చే అంతర్జాతీయ సర్వీసులపైన ఆంక్షల పర్వం కొనసాగుతోంది. కోవిడ్‌–19 వ్యాక్సిన్‌ రాకతో అన్ని సర్వీసులు పునరుద్ధరణ జరిగి విమానయాన రంగం తిరిగి గాడిలో పడుతుందని విశ్లేషకులు ఆశాభావం వ్యక్తం చేస్తున్నారు. ఆటోమొబైల్‌ కరోనా బ్రేకులు ఈ 2020 ఏడాదిలో ఆటో మొబైల్‌ పరిశ్రమ తీవ్ర సంక్షోభాన్ని ఎదుర్కొంది. చరిత్రలోనే తొలిసారి ఒక నెల ఆటో అమ్మకాలు సున్నాగా నమోదయ్యాయి. దేశవ్యాప్త లాక్‌డౌన్‌తో ఉత్పత్తి పూర్తిగా స్తంభించడం, విక్రయాలకు బ్రేక్‌పడటంతో ఈ పరిస్థితి ఏర్పడింది. అయితే ఉద్దీపన ప్యాకేజీలో ఆటో పరిశ్రమకు పెద్దపీట వేయడం, భారత్‌లో ఉత్పాదక సామర్థ్యాలను, ఎగుమతులను పెంచే ఉద్దేశంతో ప్రవేశపెట్టిన అనుసంధాన ప్రోత్సాహక(పీఎల్‌ఐ) పథకంలో ఎక్కువగా దెబ్బతిన్న ఆటోమొబైల్‌ పరిశ్రమకు గరిష్టంగా రూ.57,042 కోట్ల ప్రోత్సాహకాలు లభించనుండటంతో చివరి రెండు క్వార్టర్ల నుంచి ఆటోపరిశ్రమ వీ–ఆకారపు రికవరీని సాధిస్తోంది.  రికవరీ స్పీడ్‌పై ఈ రంగం ఆధారపడి ఉంది. ఫోన్లు స్మార్ట్‌...స్మార్ట్‌ స్మార్ట్‌ఫోన్ల కంపెనీలకు ఈ 2020 ఏడాది కలిసొచ్చింది. ఏడాది ప్రథమార్ధంలో స్మార్ట్‌ఫోన్ల అమ్మకాలు ఆశించినస్థాయిలో నమోదుకాలేదు. అయితే చివరి రెండు క్వార్టర్ల నుంచి విక్రయాలు ఊపందుకున్నాయి. ఈ ఏడాదిలో మొత్తం స్మార్ట్‌ఫోన్‌ అమ్మకాలు 15 కోట్లను దాటినట్లు గణాంకాలు చెబుతున్నాయి.  సరిహద్దు వివాదాలు, కరోనా వైరస్‌ సృష్టికి కారణమైందనే వాదనల నేపథ్యంలో చైనా ఫోన్లపై బ్యాన్‌ నినాదంతో దేశంలో మొదటిసారి చైనా ఫోన్ల అమ్మకాలు రెండోస్థానానికి దిగివచ్చాయి. దీంతో దక్షిణ కొరియా టెక్‌ దిగ్గజం శాంసంగ్‌ కంపెనీ అమ్మకాల్లో ప్రథమ స్థానాన్ని ఆక్రమించింది. రిలయన్స్‌ అప్పు లేదు  కరోనాతో ఎకానమీ కకావికలమైన తరుణంలో రిలయన్స్‌ ఇండస్ట్రీస్‌ మాత్రం ఈ ఏడాదిలో వరుస పెట్టుబడులతో కలకలలాడింది. గూగుల్, ఫేస్‌బుక్, సిల్వర్‌లేక్‌ వంటి దిగ్గజ కంపెనీలకు జియో ప్లాట్‌ఫామ్‌లో 33 శాతం వాటాను విక్రయించి రూ.1.52 లక్షల కోట్లను చేకూర్చుకుంది. అలాగే రైట్స్‌ ఇష్యూ చేపట్టి అదనంగా రూ.53 వేల కోట్లను సమీకరించింది. తన మరో అనుబంధ సంస్థ రిలయన్స్‌ రిటైల్‌నూ 10 శాతం వాటాను విక్రయించి రూ.47 వేల కోట్లను సమకూర్చుకుంది. వాటా విక్రయాలు, ఇష్యూ ద్వారా సమీకరించిన నిధులతో ఆర్‌ఐఎల్‌ రుణ రహిత కంపెనీగా అవతరించింది. కంపెనీలోకి వెల్లువలా పెట్టుబడులు రావడంతో కంపెనీ షేరు సైతం ఈ 2020లో 35 శాతం ర్యాలీ చేసింది. ఈ ఏడాదిలో సెప్టెంబర్‌ 16న రూ.2,369 వద్ద కొత్త జీవితకాల గరిష్టాన్ని అందుకుంది. రూపాయి ఒడిదుడుకులు భారత ఈక్విటీల్లోకి విదేశీ పెట్టుబడులు రికార్డు స్థాయిలో వెల్లువెత్తినా ఈ ఏడాది డాలర్‌ మారకంలో రూపాయి బలపడలేకపోయింది. స్టాక్‌ మార్కెట్‌ పతనం వేళలో ఆర్‌బీఐ స్పాట్‌ మార్కెట్‌ నుంచి అధిక మొత్తంలో డాలర్లను కొనుగోలు చేయడంతో రూపాయి విలువ బలహీనపడిందని అంచనా. అలాగే కరోనాతో ఆర్థిక కార్యకలాపాలు స్తంభించడం కూడా రూపాయిపై ప్రతికూల ప్రభావాన్ని చూపింది. ఈ ఏడాది డాలర్‌ మారకంలో రూపాయి విలువ గరిష్ట స్థాయి 70.73 గానూ, కనిష్ట స్థాయి 76.92 గానూ నమోదైంది. వెరసి ఈ ఏడాదిలో రూపాయి విలువ 6 రూపాయల రేంజ్‌లో కదలాడింది. క్రూడాయిల్‌ మైనస్‌లోకి ఈ ఏడాది క్రూడాయిల్‌ ధరలు ఏకంగా మైనస్‌ల్లోకి వెళ్లిన సంఘటన జరిగింది. ఏడాది ఆరంభంలో అంతర్జాతీయ ఆర్థిక మాంద్యంతో  క్రూడాయిల్‌కు డిమాండ్‌ అంతంతగానే ఉంది. మరోవైపు చమురు ధరలపై ఆధిపత్యం కోసం సౌదీ– రష్యా దేశాలు ఒప్పంద పరిమితికి మించి క్రూడాయిల్‌ ఉత్పత్తి చేయడంతో నిల్వలు భారీగా పెరిగాయి. ఈ తరుణంలో కరోనా ప్రేరేపిత లాక్‌డౌన్‌ విధింపు క్రూడాయిల్‌ ధరలపై విరుచుకుపడింది. ఫలితంగా ఏప్రిల్‌ 21న నైమెక్స్‌ లైట్‌ స్వీట్‌ క్రూడ్‌ మే నెల ఫ్యూచర్‌ కాంట్రాక్ట్‌ బ్యారెల్‌ ధర తొలిసారి మైనస్‌లోకి వెళ్లిపోయింది. ఒక దశలో మైనస్‌ 40.32 డాలర్లకు చేరుకుంది. చివరికి 208 డాలర్లు నష్టపోయి మైనస్‌ 37.63 డాలర్ల వద్ద ముగిసింది. బంగారం @ రూ. 56,190 కరోనా వైరస్‌తో స్టాక్‌ మార్కెట్లు కుదేలవడం ఈ ఏడాది పసిడి ర్యాలీకి కలిసొచ్చింది. కోవిడ్‌–19 సంక్షోభ వేళ ఇన్వెస్టర్లు రక్షణాత్మక సాధనమైన బంగారంలో పెట్టుబడులకు మొగ్గుచూపారు. అలాగే ఆర్థికంగా చిన్నాభిన్నమైన వ్యవస్థను సరిదిద్దేందుకు పలు దేశాల కేంద్ర బ్యాంకులు సులభతర వడ్డీరేట్ల విధానానికి తెరతీయడం కూడా బంగారం ర్యాలీకి కలిసొచ్చింది. ప్రపంచమార్కెట్లో ఆగస్ట్‌ 7న  ఔన్స్‌ పసిడి ధర అత్యధికంగా 2,089 డాలర్ల స్థాయిని అందుకుంది. ఇదే ఆగస్ట్‌ 8న  దేశీయ ఎంసీఎక్స్‌ మార్కెట్లో 10 గ్రాముల బంగారం ధర రూ.56,190 చేరుకుంది. మొత్తంగా పసిడి ధరలు  ఏడాదిలో 20 శాతం పెరిగాయి. అయితే కోవిడ్‌ వ్యాక్సిన్‌ రాక, ఆర్థిక వ్యవస్థ పురోగతి నేపథ్యంలో బంగారం ధరలు ఏడాది ముగింపు సమయానికి కొంత దిగివచ్చాయి. వచ్చే ఏడాదిలో పసిడి నుంచి పెద్ద ర్యాలీ ఆశించకపోవడం మంచిదని బులియన్‌ నిపుణులు అభిప్రాయపడుతున్నారు.

న్యూఢిల్లీ: సంక్షోభంలో చిక్కుకున్న లక్ష్మీ విలాస్‌ బ్యాంక్‌ను (ఎల్‌వీబీ) డీబీఎస్‌ బ్యాంక్‌ ఇండియాలో విలీనం చేసే అంశం కొత్త మలుపు తిరిగింది. ఈ విలీన స్కీమ్‌పై స్టే విధించాలంటూ ఎల్‌వీబీ ప్రమోటర్‌ గ్రూప్‌ సంస్థలు, వాటాదారైన ఇండియాబుల్స్‌ హౌసింగ్‌ ఫైనాన్స్‌ .. బాంబే హైకోర్టులో పిటిషన్‌ వేశాయి. రిజర్వ్‌ బ్యాంక్, కేంద్ర ప్రభుత్వం, డీబీఎస్‌ బ్యాంక్‌లను ప్రతివాదులుగా పేర్కొన్నాయి. అయితే, విలీనంపై స్టే విధించడానికి న్యాయస్థానం నిరాకరించింది. ‘విలీనంపై స్టే విధించాలన్న పిటిషనర్ల విజ్ఞప్తిని తిరస్కరిస్తున్నాం. దీనిపై తదుపరి విచారణను డిసెంబర్‌ 14నకు వాయిదా వేస్తున్నాం. అప్పట్లోగా ప్రతివాదులు (ఆర్‌బీఐ, ఎల్‌వీబీ, డీబీఎస్‌ బ్యాంక్‌ ఇండియా) తమ అఫిడవిట్లు దాఖలు చేయాలి‘ అని జస్టిస్‌ నితిన్‌ జమ్‌దార్, జస్టిస్‌ మిలింద్‌ జాదవ్‌తో కూడిన డివిజన్‌ బెంచ్‌ ఉత్తర్వులు ఇచ్చింది. ఈ విలీనంతో తాము రూ. 188 కోట్లు నష్టపోనున్నట్లు కేసు విచారణ సందర్భంగా ఇండియాబుల్స్‌ వాదించింది. అయితే, ప్రజలు, డిపాజిటర్లు, ఎల్‌వీబీ ఉద్యోగుల విస్తృత ప్రయోజనాలను కాపాడే ఉద్దేశంతో విలీన నిర్ణయం తీసుకోవడం జరిగిందని ఆర్‌బీఐ తరఫు న్యాయవాది రవి కదమ్‌ తెలిపారు. నవంబర్‌ 27 నుంచే విలీనం అమల్లోకి రానుండగా, సరిగ్గా ఒక్క రోజు ముందు ఈ పరిణామం చోటు చేసుకోవడం ప్రాధాన్యం సంతరించుకుంది.  మరోవైపు, విలీన పథకంలో భాగంగా సుమారు రూ. 320 కోట్ల విలువ చేసే టియర్‌2 బాండ్లను కూడా రైటాఫ్‌ చేయాలని ఆర్‌బీఐ ఆదేశించింది. పథకం ఏంటంటే..: విలీనానికి సంబంధించిన తుది స్కీమ్‌ ప్రకారం ఎల్‌వీబీ పెయిడప్‌ షేర్‌ క్యాపిటల్‌ మొత్తం రైటాఫ్‌ చేయనున్నారు. దీంతో వాటాదారులకు దక్కేదేమీ లేదన్న నేపథ్యంలోనే తమ పెట్టుబడంతా కోల్పోనున్న ప్రమోటర్లు, సంస్థాగత ఇన్వెస్టర్లు కూడా.. చట్టపరమైన చర్యలపై దృష్టి పెట్టారు. ప్రమోటర్‌ గ్రూప్‌నకు ఎల్‌వీబీలో 6.8% వాటాలు ఉన్నాయి. ఇక  సెప్టెంబర్‌ ఆఖరు నాటికి ఎల్‌వీబీలో ఇండియాబుల్స్‌ హౌసింగ్‌ ఫైనాన్స్‌కు 4.99%, ప్రొలిఫిక్‌ ఫిన్‌వెస్ట్‌కు 3.36%, శ్రేయి ఇన్‌ఫ్రాకు 3.34%, ఎంఎన్‌ దస్తూర్‌ అండ్‌ కో సంస్థకు 1.89%, క్యాప్రి గ్లోబల్‌ హోల్డింగ్స్‌ 1.82%, క్యాప్రి గ్లోబల్‌ అడ్వైజరీ సర్వీసెస్‌ 2%, బయాన్స్‌ ఇన్‌ఫ్రాస్ట్రక్చర్‌కు 1.36%, ట్రినిటీ ఆల్టర్నేటివ్‌ ఇన్వెస్ట్‌మెంట్‌కు 1.61% వాటాలు ఉన్నాయి.

న్యూఢిల్లీ: సంక్షోభంలో చిక్కుకున్న లక్ష్మీ విలాస్‌ బ్యాంక్‌ (ఎల్‌వీబీ)ని డీబీఎస్‌ బ్యాంక్‌ ఇండియాలో (డీబీఐఎల్‌) విలీన ప్రతిపాదనకు అధికారికంగా ఆమోదముద్ర పడింది. విలీన స్కీమ్‌నకుకేంద్ర క్యాబినెట్‌ బుధవారం గ్రీన్‌ సిగ్నల్‌ ఇచ్చింది. ఆ తర్వాత కొద్ది గంటల వ్యవధిలోనే దీనిపై ఒక ప్రకటన చేసిన రిజర్వ్‌ బ్యాంక్‌ .. నవంబర్‌ 27 (శుక్రవారం) నుంచి విలీనం అమల్లోకి వస్తుందని తెలిపింది. ఆ రోజు నుంచి ఎల్‌వీబీపై విధించిన మారటోరియం కూడా తొలగిస్తున్నట్లు వెల్లడించింది. దీంతో రూ. 25,000 విత్‌డ్రాయల్‌ పరిమితులు తొలగిపోనున్నాయి. ‘‘నవంబర్‌ 27 నుంచి విలీనం అమల్లోకి వస్తుంది. ఎల్‌వీబీ శాఖలన్నీ కూడా ఆ రోజు నుంచి డీబీఎస్‌ బ్యాంక్‌ ఇండియా శాఖలుగా మారతాయి. ఎల్‌వీబీ డిపాజిటర్లంతా కూడా డీబీఎస్‌ ఖాతాదారులుగా మారతారు. అలాగే, ఎల్‌వీబీపై విధించిన మారటోరియం కూడా ఇక అమల్లో ఉండదు’’ అని ఆర్‌బీఐ పేర్కొంది. ఎల్‌వీబీ ఖాతాదారులకు యథాప్రకారంగా సర్వీసులు అందేలా చూసేందుకు డీబీఎస్‌ బ్యాంక్‌ ఇండియా అన్ని ఏర్పాట్లూ చేస్తోందని వివరించింది. వాస్తవానికి మారటోరియం గడువు డిసెంబర్‌ 16తో ముగియనున్నప్పటికీ అంతకన్నా ముందుగానే ఎత్తివేయనుండటం గమనార్హం. లక్ష్మీ విలాస్‌ బ్యాంక్‌ విలీన స్కీమ్‌పై కేంద్ర ప్రభుత్వం గెజిట్‌ నోటిఫికేషన్‌ జారీ చేసింది. దీని ప్రకారం ఎల్‌వీబీ ఉద్యోగులందరికీ కూడా నవంబర్‌ 17నకు ముందు నుంచి అందుకుంటున్న వేతనాలు, సర్వీసు నిబంధనలే ఇకపైనా వర్తిస్తాయి. సంక్షోభంలో చిక్కుకున్న ఎల్‌వీబీ బోర్డును ఆర్‌బీఐ నవంబర్‌ 17న రద్దు చేసి ప్రత్యేక అడ్మినిస్ట్రేటర్‌ను నియమించిన సంగతి తెలిసిందే. ఇదే క్రమంలో ఆర్‌బీఐ సిఫార్సుల మేరకు డిపాజిటర్లు రూ. 25,000కు మించి విత్‌డ్రా చేసుకోకుండా  కేంద్రం .. ఎల్‌వీబీపై 30 రోజుల మారటోరియం విధించింది. సింగపూర్‌కి చెందిన సంస్థ డీబీఎస్‌ భారత విభాగం డీబీఐఎల్‌లో లక్ష్మీ విలాస్‌ బ్యాంక్‌ను విలీనం చేసే ప్రతిపాదనను ఆర్‌బీఐ రూపొందించింది. తాజాగా ఇదే అమల్లోకి రానుంది. ఈ ఏడాది పెను సంక్షోభం ఎదుర్కొన్న బ్యాంకుల్లో యస్‌ బ్యాంక్‌ తర్వాత ఎల్‌వీబీ రెండోది. నిధుల కొరతతో కుదేలైన యస్‌ బ్యాంక్‌పై ప్రభుత్వం మార్చిలో మారటోరియం విధించిన సంగతి తెలిసిందే. ఆ తర్వాత ప్రభుత్వ రంగ దిగ్గజం ఎస్‌బీఐతో 45 శాతం వాటాలు కొనిపించి, రూ. 7,250 కోట్ల మేర పెట్టుబడులు పెట్టించి యస్‌ బ్యాంక్‌ను గట్టెక్కించింది.   షేరు జూమ్‌.. దాదాపు వారం రోజులుగా లోయర్‌ సర్క్యూట్‌లకు పడిపోతూ వస్తున్న ఎల్‌వీబీ షేర్లు తాజా పరిణామాలతో బుధవారం 5 శాతం పెరిగాయి. బీఎస్‌ఈలో రూ. 7.65 వద్ద (అప్పర్‌ సర్క్యూట్‌) ముగిశాయి. ఒక దశలో లోయర్‌ సర్క్యూట్‌ స్థాయి రూ. 6.95కి, ఏడాది కనిష్టానికి కూడా పడిపోయినప్పటికీ ఆ తర్వాత గణనీయంగా కోలుకోవడం గమనార్హం. ఆంక్షలు అమల్లోకి వచ్చిన తర్వాత నవంబర్‌ 17 నుంచి 24 మధ్య షేరు ధర 53 శాతం పడిపోయింది.   షేర్‌హోల్డర్లకు సున్నా..? ఈ మొత్తం లావాదేవీలో షేర్‌హోల్డర్లకు దక్కేదేమీ లేదు. విలీన ప్రతిపాదన తుది స్కీమ్‌ను బట్టి చూస్తే ముసాయిదాలో పేర్కొన్న ఈక్విటీ రైటాఫ్‌లో ఎలాంటి మార్పు లేదని సంబంధిత వర్గాలు తెలిపాయి. దీని ప్రకారం లావాదేవీ అనంతరం ఎల్‌వీబీ పెయిడప్‌ షేర్‌ క్యాపిటల్‌ మొత్తాన్ని రైటాఫ్‌ చేయనున్నారు. గురువారం నుంచి ట్రేడింగ్‌ను ఎన్‌ఎస్‌ఈ నిలిపివేయనుంది. శుక్రవారం ఎక్సే్చంజీల నుంచీ ఎల్‌వీబీ షేర్లను డీలిస్ట్‌ చేయనున్నారు. డిపాజిట్లు సురక్షితం.. ఎల్‌వీబీకి చెందిన 20 లక్షలకు పైగా ఖాతాదా రులు, 4,000 మంది పైగా ఉద్యోగులకు తాజా పరిణామం ఊరట కలిగిస్తుందని క్యాబినెట్‌ సమావేశం అనంతరం కేంద్ర సమాచార, ప్రసార శాఖ మంత్రి ప్రకాశ్‌ జవదేకర్‌ పేర్కొన్నారు. డిపాజిట్ల విత్‌డ్రాయల్‌పై ఇతరత్రా మరే ఆంక్షలు ఉండబోవని ఆయన చెప్పారు. ‘‘ఖాతాదారులు ఆందోళన చెందనవసరం లేదు. డిపాజిట్లు సురక్షితమైన చేతుల్లోనే ఉన్నాయి. విత్‌డ్రాయల్‌ కోసం పరుగెత్తాల్సిన అవసరం లేదు’’ అని మంత్రి తెలిపారు. డీబీఐఎల్‌కు తగినంత స్థాయిలో మూలధనం ఉన్నప్పటికీ  విలీనానంతరం కార్యకలాపాల వృద్ధి కోసం ముందుగానే మరో రూ. 2,500 కోట్ల నిధులను కూడా సమకూర్చుకుంటుందని చెప్పారు. ఎల్‌వీబీ కనుమరుగు.. సుమారు 94 ఏళ్ల చరిత్ర కలిగిన ఎల్‌వీబీని వీఎస్‌ఎన్‌ రామలింగ చెట్టియార్‌ సారథ్యంలో తమిళనాడులోని కరూర్‌కి చెందిన ఏడుగురు వ్యాపారవేత్తలు 1926లో ఏర్పాటు చేశారు. 19 రాష్ట్రాలు, 1 కేంద్ర పాలిత ప్రాంతంలో ఎల్‌వీబీకి 566 శాఖలు, 918 ఏటీఎంలు ఉన్నాయి. బడా సంస్థలకు భారీ స్థాయిలో రుణాలివ్వడం మొదలెట్టినప్పట్నుంచి ఎల్‌వీబీకి కష్టాలు మొదలయ్యాయి. మొండిబాకీలు భారీగా పేరుకుపోవడంతో బ్యాంకుపై ఆర్‌బీఐ గతేడాది  ఆంక్షలు కూడా విధించింది. ఇండియాబుల్స్‌ హౌసింగ్‌ ఫైనాన్స్, క్లిక్స్‌ క్యాపిటల్‌ సర్వీసెస్‌ సంస్థలతో విలీనమయ్యేందుకు ప్రయత్నించినప్పటికీ సాధ్యపడలేదు. 2019–20లో రూ. 836 కోట్ల నికర నష్టం ప్రకటించిన ఎల్‌వీబీ, ప్రస్తుత ఆర్థిక సంవత్సరం రెండో త్రైమాసికంలో రూ. 397 కోట్ల నష్టం నమోదు చేసింది. తాజా పరిణామాలతో ఎల్‌వీబీ ఇక పూర్తిగా కనుమరుగు కానుంది. పటిష్టంగా డీబీఐఎల్‌... సింగపూర్‌ కేంద్రంగా ఆర్థిక సేవలు అందిస్తున్న డీబీఎస్‌కు డీబీఐఎల్‌ భారతీయ  అనుబంధ సంస్థ. డీబీఎస్‌కు ఆసియాలోని 18 మార్కెట్లలో కార్యకలాపాలు ఉన్నాయి. ఎల్‌వీబీని విలీనం చేసుకోవడంతో డీబీఐఎల్‌ శాఖల సంఖ్య 600కు పెరుగుతుంది.     బాధ్యులపై చర్యలు ఉంటాయి.. ఎల్‌వీబీ ఆర్థిక పరిస్థితి దిగజారడానికి బాధ్యులైన వారిపై చర్యలు ఉంటాయని జవదేకర్‌ తెలిపారు. ‘‘తప్పులు చేసిన వారిపై చర్యలుంటాయి. ఇలాంటివి భవిష్యత్‌లో పునరావృతం కాకుండా పర్యవేక్షణ మెరుగుపరుస్తాం. బ్యాంకింగ్‌ వ్యవస్థను ప్రక్షాళన చేసే దిశగా చేస్తున్న ప్రయత్నాల్లో ఇవి కూడా భాగం’’ అని ఆయన చెప్పారు. ఆర్‌బీఐ కూడా పర్యవేక్షణను మెరుగుపర్చుకోవాల్సిన అవసరం ఉందన్నారు. ‘‘పరిస్థితి చేయి దాటిపోవడానికి ముందే సమస్యను ఆర్‌బీఐ అంచనా వేయగలగాలి. రాబోయే సమ స్యలను పసిగట్టగలిగితే పరిష్కారం సులువవుతుంది’’ అని జవదేకర్‌ వ్యాఖ్యానించారు.     

ముంబై: ప్రస్తుతం సంక్షోభంలో కూరుకుపోయిన లక్ష్మీ విలాస్‌ బ్యాంక్‌లో (ఎల్‌వీబీ) 50 శాతం వాటాలు కొనేందుకు సింగపూర్‌కి చెందిన డీబీఎస్‌ 2018లోనే ప్రయత్నించింది. కానీ రిజర్వ్‌ బ్యాంక్‌ అప్పట్లో ఈ డీల్‌ని తిరస్కరించింది. ఎల్‌వీబీలో అత్యధిక వాటాలు గల (4.8 శాతం) ఏకైక ప్రమోటర్‌ అయిన కేఆర్‌ ప్రదీప్‌ ఈ విషయాలు వెల్లడించారు. ‘2018లో మూలధన సమీకరణ ప్రణాళికల్లో భాగంగా ఇన్వెస్టర్లను అన్వేషించేందుకు జేపీ మోర్గాన్‌ సంస్థను ఎల్‌వీబీ నియమించుకుంది. ఈ క్రమంలో షేరు ఒక్కింటికి రూ. 100–155 శ్రేణిలో ఆఫర్లు వచ్చాయి. షేరుకి రూ. 100 చొప్పున కనీసం 50% వాటా తీసుకునేందుకు డీబీఎస్‌ ముందుకొచ్చింది. అయితే, ఆ సంస్థ ఎల్‌వీబీపై నియంత్రణాధికారాలు కావాలని కోరుకుంది. కానీ ఆర్‌బీఐ పెట్టిన నిబంధనలతో వెనక్కి తగ్గింది‘ అని చెప్పారు. ఒకవేళ అప్పుడే గ్రీన్‌ సిగ్నల్‌ లభించి ఉంటే డీబీఎస్‌ షేరుకి రూ. 100 ఇచ్చేదని, ఇప్పుడైతే పూర్తి ఉచితంగానే తీసుకున్నట్లవుతుందని ప్రదీప్‌ పేర్కొన్నారు. రిజర్వ్‌ బ్యాంక్‌ ఇప్పటికైనా షేర్‌హోల్డర్లు, ప్రమోటర్ల అభిప్రాయాలను పరిగణనలోకి తీసుకుంటుందని, వారిని ఉత్తి చేతులతో పోనివ్వదని ఆశిస్తున్నట్లు పేర్కొన్నారు. ఎల్‌వీబీ బోర్డును రద్దు చేసిన ఆర్‌బీఐ.. దాన్ని డీబీఎస్‌ బ్యాంక్‌ ఇండియాలో విలీనం చేసే ప్రతిపాదనపై కసరత్తు చేస్తున్న నేపథ్యంలో ప్రదీప్‌ వ్యాఖ్యలు ప్రాధాన్యం సంతరించుకున్నాయి.  ఎల్‌వీబీలో ప్రదీప్‌తో పాటు మరో ముగ్గురు ప్రమోటర్ల కుటుంబాలకు (ఎన్‌ రామామృతం, ఎన్‌టీ షా, ఎస్‌బీ ప్రభాకరన్‌) 2% వాటాలు ఉన్నాయి. మొత్తం మీద ప్రమోటర్లకు 6.8% వాటా ఉండగా, ఇండియాబుల్స్‌ హౌసింగ్‌ నేతృత్వంలోని సంస్థాగత ఇన్వెస్టర్లకు 20% వాటాలు ఉన్నాయి. రిటైల్‌ షేర్‌హోల్డర్లకు ఎల్‌వీబీలో మొత్తం 45 శాతం వాటాలు ఉన్నాయి. లక్ష్మీ విలాస్‌ బ్యాంకును డీబీఎస్‌లో విలీనం చేసిన పక్షంలో వీటికి విలువ లేకుండా పోతుందనేది షేర్‌హోల్డర్ల ఆందోళన   శుక్రవారం బీఎస్‌ఈలో ఎల్‌వీబీ షేరు 10 శాతం క్షీణించి రూ. 9 వద్ద క్లోజయ్యింది.    

ముంబై: రిజర్వ్‌ బ్యాంక్‌ ఆంక్షలు ఎదుర్కొంటున్న లక్ష్మీ విలాస్‌ బ్యాంక్‌ (ఎల్‌వీబీ) తమ ఖాతాదారులకు భరోసా కల్పించడంపై దృష్టి పెట్టింది. డిపాజిటర్ల సొమ్ము భద్రంగానే ఉందని రిజర్వ్‌ బ్యాంక్‌ నియమించిన అడ్మినిస్ట్రేటర్‌ టీఎన్‌ మనోహరన్‌ తెలిపారు. ఖాతాదారులకు చెల్లింపులు జరిపేందుకు బ్యాంకు వద్ద తగినన్ని నిధులు ఉన్నాయని ఆయన పేర్కొన్నారు. అలాగే ఆర్‌బీఐ నిర్దేశించిన గడువులోగా డీబీఎస్‌ బ్యాంక్‌ ఇండియాలో విలీన ప్రక్రియ పూర్తి చేయగలమని మనోహరన్‌ ధీమా వ్యక్తం చేశారు. ఎల్‌వీబీ వద్ద రూ. 20,000 కోట్ల మేర డిపాజిట్లు ఉండగా, ఇచ్చిన రుణాల పరిమాణం రూ. 17,000 కోట్ల స్థాయిలో ఉన్నాయి. సంక్షోభంలో చిక్కుకున్న ఎల్‌వీబీని గట్టెక్కించే ప్రయత్నాల్లో భాగంగా భారీ చెల్లింపులు చెల్లించకుండా నెల రోజుల పాటు (డిసెంబర్‌ 16 దాకా) బ్యాంకుపై ఆర్‌బీఐ ఆంక్షలు విధించిన సంగతి తెలిసిందే. దీనితో ఖాతాదారులు రూ. 25,000కు మించి విత్‌డ్రా చేసుకోవడానికి లేదు. డీబీఎస్‌లో ఎల్‌వీబీని విలీనం చేసే ప్రతిపాదనకు సంబంధించి నవంబర్‌ 20న ఆర్‌బీఐ తుది ప్రకటన చేయనుంది. దీని ప్రకారం ఎల్‌వీబీలో డీబీఎస్‌ సుమారు రూ. 2,500 కోట్ల దాకా ఇన్వెస్ట్‌ చేయనుంది. డీబీఎస్‌కు సానుకూలం: మూడీస్‌ సింగపూర్‌కి చెందిన డీబీఎస్‌ బ్యాంక్‌.. భారత్‌లో తన వ్యాపారాన్ని మరింత పటిష్టం చేసుకునేందుకు ఎల్‌వీబీ విలీనం ఉపయోగపడగలదని మూడీస్‌ ఇన్వెస్టర్స్‌ సర్వీస్‌ అభిప్రాయపడింది. కొత్తగా మరింత మంది రిటైల్, చిన్న, మధ్య స్థాయి కస్టమర్లను చేర్చుకోవడానికి ఇది తోడ్పడగలదని వివరించింది. ‘విలీనం తర్వాత డీబీఎస్‌ ఇండియా కస్టమర్ల డిపాజిట్లు, రుణాల పరిమాణం 50–70 శాతం దాకా పెరగవచ్చు‘ అని అంచనా వేసింది. డీబీఎస్‌ ఇండియాకు 27 శాఖలు ఉండగా విలీనంతో ఎల్‌వీబీకి చెందిన సుమారు 500 పైచిలుకు శాఖలు కూడా జత కానున్నాయి. డీబీఎస్‌కు కీలక మార్కెట్లలో భారత్‌ కూడా ఒకటి కావడంతో, ఆ సంస్థ కార్యకలాపాల విస్తరణ వ్యూహాలకు అనుగుణంగా ఎల్‌వీబీ డీల్‌ ఉండగలదని మూడీస్‌ తెలిపింది. ‘పటిష్టమైన మాతృసంస్థ దన్ను ఉంటుంది కాబట్టి డీబీఎస్‌లో విలీనం అంశం ఎల్‌వీబీ డిపాజిటర్లకు సానుకూలంగా ఉంటుంది‘ అని పేర్కొంది. బ్యాంకింగ్‌ సమస్యలను పరిష్కరించేందుకు భారత్‌లో అనుసరిస్తున్న విధానాల్లోని లోపాలను చూపే విధంగా .. ఎల్‌వీబీని గట్టెక్కించే ప్రక్రియ ఉందని తెలిపింది. మారటోరియం కారణంగా డిపాజిటర్లు, రుణదాతలకు సకాలంలో చెల్లింపులు జరపలేకపోవడం వల్ల బ్యాంకు తాత్కాలికంగా దివాలా తీసినట్లే అవుతుందని మూడీస్‌ తెలిపింది. మారటోరియం విధించే దాకా పరిస్థితి వెళ్లకుండా సమస్యాత్మక బ్యాంకులను చక్కదిద్దేందుకు ఆర్‌బీఐకి ప్రభుత్వం ఇటీవలే పూర్తి అధికారాలు ఇచ్చినప్పటికీ ఇలా జరగడం గమనార్హమని వ్యాఖ్యానించింది. తాజా పరిణామాలతో బుధవారం బీఎస్‌ఈలో ఎల్‌వీబీ షేరు 20 శాతం డౌన్‌ సర్క్యూట్‌ను తాకి రూ. 12.40 వద్ద క్లోజయ్యింది. విదేశీ బ్యాంకులో విలీనం వద్దు: ఏఐబీవోసీ డిమాండ్‌ విదేశీ బ్యాంకులో ఎల్‌వీబీని విలీనం చేసే ప్రతిపాదనను తాము వ్యతిరేకిస్తున్నట్లు ప్రభుత్వ రంగ బ్యాంకుల ఆఫీసర్ల యూనియన్‌ ఏఐబీవోసీ స్పష్టం చేసింది. ఈ ప్రతిపాదన చూస్తుంటే విదేశీ బ్యాంకులకు తలుపులు బార్లా తెరిచేందుకు ప్రయత్నాలు జరుగుతున్నట్లు కనిపిస్తోందని వ్యాఖ్యానించింది. దేశ ప్రయోజనాలను దృష్టిలో ఉంచుకుని డీబీఎస్‌లో ఎల్‌వీబీని విలీనం చేసే విషయంపై పునరాలోచన చేయాలంటూ ఆర్‌బీఐకి ఏఐబీవోసీ విజ్ఞప్తి చేసింది. పాతతరం బ్యాంకులు.. దాదాపు ప్రభుత్వ రంగ బ్యాంకుల్లాగానే దేశానికి స్వాతంత్య్రం రావడానికి ఎంతో ముందు నుంచీ సేవలు అందిస్తున్నాయని ఏఐబీవోసీ ప్రెసిడెంట్‌ సునీల్‌కుమార్‌ తెలిపారు.

ముంబై, సాక్షి: సుమారు మూడేళ్లుగా ఆర్థిక సంక్షోభాన్ని ఎదుర్కొంటున్న ప్రయివేట్‌ రంగ సంస్థ లక్ష్మీ విలాస్‌ బ్యాంకు(ఎల్‌వీబీ).. సింగపూర్‌ ప్రభుత్వ అనుబంధ సంస్థ డీబీఎస్‌ బ్యాంకులో విలీనమయ్యే అవకాశముంది. ఇందుకు వీలుగా ముసాయిదా ప్రతిపాదనను రిజర్వ్‌ బ్యాంక్‌(ఆర్‌బీఐ) మంగళవారం ప్రకటించింది. వెరసి ఆర్థికంగా పరిపుష్టమైన డీబీఎస్‌ బ్యాంకు ద్వారా ఎల్‌వీబీని ఆదుకునేందుకు కేంద్ర ప్రభుత్వం యోచిస్తున్నట్లు బ్యాంకింగ్‌ వర్గాలు పేర్కొన్నాయి. ఇప్పటికే దేశీయంగా కార్యకలాపాలు విస్తరించిన డీబీఎస్‌ బ్యాంకు ఇందుకు ఆసక్తిని వ్యక్తం చేయడంతోపాటు.. అవరసమైతే ఎల్‌వీబీని పటిష్టం చేసేందుకు అదనపు నిధులను వెచ్చించేందుకు సిద్ధంగా ఉ‍న్నట్లు తెలుస్తోంది. దీంతో ఎల్‌వీబీ ఖాతాదారులు, ఉద్యోగులకు ప్రయోజనం చేకూరే వీలున్నట్లు నిపుణులు చెబుతున్నారు.  వాటాదారులకు నిల్‌ సాధారణంగా బ్యాంకులు సంక్షోభంలో చిక్కుకున్నప్పటికీ ఆర్‌బీఐ నిబంధనల కారణంగా ఖాతాదారులకు పెద్దగా సమస్యలు ఎదురుకావని బ్యాంకింగ్‌ వర్గాలు తెలియజేశాయి. అయితే బ్యాంకు షేర్లను కొనుగోలుచేసిన వాటాదారులపై ప్రభావం ఉంటుందని పేర్కొన్నాయి. సాధారణంగా బిజినెస్‌లు వృద్ధిలో ఉన్న సంస్థల షేర్లు లాభపడినట్లే.. నష్టాల బాట పట్టిన కౌంటర్లు పతనమవుతుంటాయని మార్కెట్‌ నిపుణులు తెలియజేశారు. ఇక లక్ష్మీ విలాస్‌ బ్యాంకు నెట్‌వర్త్‌ మొత్తం తుడిచిపెట్టుకుపోవడంతో వాటాదారులకు నష్టం వాటిల్లడం సహజమేనని వివరించారు. సెప్టెంబర్‌కల్లా బ్యాంకు కనీస పెట్టుబడుల నిష్పత్తి(సీఏఆర్‌) -2.85 శాతానికి చేరగా.. మార్చి నుంచి టైర్‌-1 క్యాపిటల్‌ ప్రతికూలంగా నమోదవుతోంది. ప్రస్తుతం -4.85 శాతానికి జారింది. సెప్టంబర్‌తో ముగిసిన త్రైమాసికంలో బ్యాంకు రూ. 397 కోట్ల నికర నష్టం ప్రకటించింది. ఈ నేపథ్యంలో షేరు తాజాగా 20 శాతం కుప్పకూలి రూ. 12.5కు చేరింది. ఈ షేరు 2017 జూన్‌లో రూ. 187 స్థాయిలో ట్రేడ్‌కావడం ప్రస్తావించదగ్గ విషయం! వాటాదారుల జాబితా లక్ష్మీవిలాస్‌ బ్యాంకులో ఎన్‌బీఎఫ్‌సీ.. ఇండియాబుల్స్‌ హౌసింగ్‌ ఫైనాన్స్‌ 4.99 శాతం వాటాను కలిగి ఉంది. గతంలో ఎల్‌వీబీ విలీనానికి ఐబీ హౌసింగ్‌ ప్రయత్నించి విఫలమైన విషయం విదితమే. కాగా.. ఎల్‌వీబీలో శ్రేఈ ఇన్‌ఫ్రాస్ట్రక్చర్‌ ఫైనాన్స్‌కు 3.44 శాతం, కాప్రి గ్రూప్‌ హోల్డింగ్స్‌కు 3.82 శాతం వాటా, ఎల్‌ఐసీకి 1.6 శాతం చొప్పున వాటాలు ఉ‍న్నాయి. ఇదేవిధంగా ఆదిత్య బిర్లా సన్‌ లైఫ్‌ ఇన్సూరెన్స్‌కు 1.83 శాతం, ప్రమెరికా లైఫ్‌ ఇన్సూరెన్స్‌కు 2.73 శాతం చొప్పున వాటా ఉంది. ప్రమోటర్ల వాటా 6.8 శాతానికి పరిమితమైనట్లు తెలుస్తోంది. 

సాక్షి, ముంబై: బ్యాంకు కార్యకలాపాలపై కేంద్ర ప్రభుత్వం దాదాపు నెల రోజులపాటు మారటోరియంను విధించిన నేపథ్యంలో ప్రయివేట్‌ రంగ బ్యాంకు లక్ష్మీ విలాస్‌ బ్యాంక్‌ కౌంటర్లో ఉన్నట్టుండి అమ్మకాలు ఊపందుకున్నాయి. ఇన్వెస్టర్లు అమ్మకాలకు క్యూ కట్టడంతో ఎన్‌ఎస్‌ఈలో ఈ షేరు 20 శాతం డౌన్‌ సర్క్యూట్‌ను తాకింది. అమ్మేవాళ్లు అధికంకాగా.. కొనేవాళ్లు కరవుకావడంతో రూ. 3.10 నష్టంతో రూ. 12.45 వద్ద ఫ్రీజయ్యింది. తద్వారా ఇంతక్రితం మార్చి 31న నమోదైన ఏడాది కనిష్టం రూ. 10.40కు చేరువైంది. ట్రేడింగ్‌ ప్రారంభమైన తొలి అర్ధగంటలోనే కౌంటర్లో 3.5 కోట్లకుపైగా షేర్ల విక్రయానికి సెల్‌ ఆర్డర్లు(బీఎస్‌ఈ, ఎన్‌ఎస్‌ఈ) నమోదైనట్లు మార్కెట్‌ విశ్లేషకులు తెలియజేశారు.  ఏం జరిగిందంటే? చెన్నై కేంద్రంగా పనిచేస్తున్న లక్ష్మీ విలాస్‌ బ్యాంక్‌ (ఎల్‌వీబీ)పై కేంద్రం మంగళవారం మారటోరియం విధించింది. ఈ నెల 17 నుంచి డిసెంబర్‌ 16 వరకూ 30 రోజులపాటు మారటోరియం అమల్లో ఉంటుంది. ప్రభుత్వ నిర్ణయం ప్రకారం.. బ్యాంక్‌ ఖాతాదారుడు తన ఖాతాలో ఎంత మొత్తం ఉన్నాగానీ రూ.25,000 వరకూ మాత్రమే వెనక్కు తీసుకోగలుగుతాడు. అయితే ఆరోగ్య వ్యయాలు, ఉన్నత విద్యకు చెల్లింపులు, వివాహ ఖర్చుల వంటి అత్యవసరాలకు ఆర్‌బీఐ ముందస్తు అనుమతితో ఖాతాదారుడు రూ.25,000కు మించి తన డబ్బును విత్‌డ్రా చేసుకునేందుకు వీలుంటుందని ఆర్థిక శాఖ స్పష్టం చేసింది. బ్యాంక్‌ బోర్డ్‌ను పక్కనబెట్టి కేంద్రం తాజా నిర్ణయాన్ని తీసుకుంది. బ్యాంక్‌ ఆర్థిక పరిస్థితి దిగజారుతున్న నేపథ్యంలో రిజర్వ్‌ బ్యాంక్‌(ఆర్‌బీఐ) సలహా మేరకు అత్యవసర ప్రాతిపదికన కేంద్రం ఈ నిర్ణయాన్ని తీసుకుంది.  బ్యాంక్‌ అడ్మినిస్ట్రేటర్‌గా కెనరాబ్యాంక్‌ మాజీ నాన్‌–ఎగ్జిక్యూటివ్‌ చైర్మన్‌ టీఎన్‌ మనోహరన్‌ను నియమించింది. తొలిసారి దేశీ బ్యాంకింగ్‌ చరిత్రలో తొలిసారి విదేశీ బ్యాంకుకు చెందిన దేశీ యూనిట్‌తో దేశీయ బ్యాంకును విలీనం చేసేందుకు ఆర్‌బీఐ ప్రతిపాదించినట్లు విశ్లేషకులు తెలియజేశారు. ఇందుకు ప్రధానంగా డీబీఎస్‌ బ్యాంకు ఆర్థికంగా పరిపుష్టంగా ఉండటం, విలీనంతో ఎల్‌వీబీ ఖాతాదారులు, ఉద్యోగులకు ప్రయోజనం కలిగే వీలుండటం వంటి అంశాలను ఆర్‌బీఐ పరిగణనలోకి తీసుకుని ఉండవచ్చని బ్యాంకింగ్‌ వర్గాలు పేర్కొన్నాయి. గతంలో ఇండియాబుల్స్‌ హౌసింగ్‌ ఫైనాన్స్‌ ఇందుకు ఆర్‌బీఐను సంప్రదించినప్పటికీ అనుమతించకపోవడం గమనార్హం. ఇదే విధంగా క్లిక్స్‌ క్యాపిటల్‌ ప్రతిపాదనకు సైతం నో చెప్పింది. విలీనానికి సంబంధించి రెండు సంస్థల మధ్య ప్రతిపాదించిన వేల్యుయేషన్స్‌ సక్రమంగా లేవన్న కారణం ప్రభావం చూపినట్లు నిపుణులు పేర్కొన్నారు. డీబీఎస్‌ బ్యాంక్‌తో విలీనం  తాజా పరిణామాల నేపథ్యంలో లక్ష్మీ విలాస్‌ బ్యాంక్‌ను సింగపూర్‌ కేంద్రంగా పనిచేస్తున్న బ్యాంకింగ్‌ సేవల దిగ్గజం... డీబీఎస్‌ బ్యాంక్‌ ఇండియా (డీబీఐఎల్‌)తో విలీనానికి ఆర్‌బీఐ ముసాయిదా పథకాన్ని వెలువరించింది. లక్ష్మీ విలాస్‌ బ్యాంక్‌ విలీన ప్రతిపాదనకు గ్రీన్  సిగ్నల్‌ లభిస్తే.. భారత్‌లో తమ అనుబంధ సంస్థ  డీబీఐఎల్‌ రూ. 2,500 కోట్ల మేర నిధులు ఇవ్వనున్నట్లు డీబీఎస్‌ వెల్లడించింది. దేశీయంగా డీబీఎస్‌ బ్యాంకు 26 ఏళ్లుగా కార్యకలాపాలు నిర్వహిస్తోంది. 13 రాష్టాలు, 24 పట్టణాలలో సేవలు విస్తరించింది. ఎల్‌వీబీకి ఎన్‌ఆర్ఐ కస్టమర్లు అధికంగా ఉన్నట్లు బ్యాంకింగ్‌ వర్గాలు పేర్కొంటున్నాయి. దీంతో ఆసియాలో కార్యకలాపాలు విస్తరించిన డీబీఎస్‌ ఈ కస్టమర్లకు మరింత సులభంగా సర్వీసులు అందించగలుగుతుందని అభిప్రాయపడ్డాయి. డీబీఎస్‌ బ్యాంకులో సింగపూర్‌ ప్రభుత్వానికి చెందిన టెమాసెక్‌ వాటాదారుకావడంతో ఆర్థిక పరిపుష్టిని కలిగి ఉన్నట్లు తెలియజేశాయి. దీంతో ఎల్‌వీబీ విలీనం తదుపరి అవసరమైతే మరిన్ని నిధులతో బ్యాంకు కార్యకలాపాలను విస్తరించగలదని పేర్కొన్నాయి. డీబీఎస్‌ బ్యాంకు ఇంతక్రితం దేశీయంగా మురుగప్ప గ్రూప్‌తో ఏర్పాటు చేసిన ఎన్‌బీఎఫ్‌సీ జేవీ చోళమండలం ఇన్వెస్ట్‌మెంట్ ఫైనాన్స్‌లోనూ 37.5 శాతం వాటాను సొంతం చేసుకుంది. కాగా.. ఎల్‌వీబీని విలీనం చేసుకుంటే దక్షిణాదిలో కార్యకలాపాలను విస్తరించేందుకు వీలు కలుగుతుందని విశ్లేషకులు తెలియజేశారు. ఎల్‌వీబీ ప్రస్తుతం 563 బ్రాంచీలు, 974 ఏటీఎంలను కలిగి ఉంది. డీబీఎస్‌ బ్యాంకులో ఎల్‌వీబీ విలీనమైతే సంయుక్త సంస్థ 12.51 శాతం సీఆర్‌ఏఆర్‌ను, 9.61 శాతం సీఈటీ-1 క్యాపిటల్‌నూ సమకూర్చుకోగలదని వివరించారు.

ముంబై: ప్రైవేటు రంగంలోని లక్ష్మీ విలాస్‌ బ్యాంక్‌ (ఎల్‌వీబీ)పై కేంద్రం మంగళవారం మారటోరియం అ్రస్తాన్ని ప్రయోగించింది.  చెన్నై కేంద్రంగా పనిచేస్తున్న ఈ బ్యాంక్‌పై  మంగళవారం నుంచి (17వ తేదీ) నుంచి 30 రోజులపాటు– డిసెంబర్‌ 16 వరకూ మారటోరియం అమల్లో ఉంటుంది. ఆర్థికశాఖ ఈ మేరకు ఒక ప్రకటన విడుదల చేసింది.  ప్రభుత్వ నిర్ణయం ప్రకారం,  ఒక బ్యాంక్‌ ఖాతాదారుడు తన ఖాతాలో ఎంత మొత్తం ఉన్నా,  కేవలం రూ.25,000 వరకూ మాత్రమే (30 రోజుల వరకూ)  వెనక్కు తీసుకోగలుగుతాడు. అయితే ఆరోగ్య వ్యయాలు, ఉన్నత విద్యకు చెల్లింపులు, వివాహ ఖర్చుల వంటి అత్యవసరాలకు ఆర్‌బీఐ ముందస్తు అనుమతితో ఖాతాదారుడు రూ.25,000కు మించి తన డబ్బును విత్‌డ్రా చేసుకునేందుకు వీలుంటుందని ఆర్థిక శాఖ స్పష్టం చేసింది.  బ్యాంక్‌ బోర్డ్‌ను పక్కనబెట్టి కేంద్రం తాజా నిర్ణయాన్ని తీసుకుంది. బ్యాంక్‌ ఆర్థిక పరిస్థితి దిగజారుతున్న నేపథ్యంలో రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) సలహా మేరకు కేంద్రం ఈ అత్యవసర నిర్ణయాన్ని తీసుకుంది.  బ్యాంక్‌ అడ్మినిస్ట్రేటర్‌గా కెనరాబ్యాంక్‌ మాజీ నాన్‌–ఎగ్జిక్యూటివ్‌ చైర్మన్‌ టీఎన్‌ మనోహరన్‌ నియమితులయ్యారు.   ప్రత్యామ్నాయం లేకే...: ఆర్‌బీఐ  ‘‘బ్యాంకుకు సంబంధించి విశ్వసనీయ పునరుద్ధరణ ప్రణాళికలేని పరిస్థితుల్లో డిపాజిటర్ల ప్రయోజనాలు, బ్యాంకింగ్‌ స్థిరత్వం, ఫైనాన్షియల్‌ వ్యవహారాల పటిష్టత ముఖ్యం. ఈ పరిస్థితుల్లో బ్యాంకింగ్‌ రెగ్యులేషన్‌ యాక్ట్, 1949 సెక్షన్‌ 45 కింద బ్యాంక్‌పై మారటోరియం విధించాలని కేంద్రానికి సిఫారసు చేయడం మినహా వేరే ప్రత్యామ్నాయం లేదు. ఆర్‌బీఐ విజ్ఞప్తిని పరిగణనలోకి తీసుకున్న కేంద్ర ప్రభుత్వం 17వ తేదీ నుంచి 30 రోజులపాటు... అంటే డిసెంబర్‌ 16వ తేదీ వరకూ అమలుజరిగే విధంగా బ్యాంక్‌పై మారటోరియం విధించింది’’ అని ఈ పరిణామానికి సంబంధించి వెలువడిన ఆర్‌బీఐ ప్రకటన ఒకటి తెలిపింది. తాజా మారటోరియం ప్రకారం, సేవింగ్స్, కరెంట్‌ లేదా మరే డిపాజిట్‌ అకౌంట్‌ నుంచీ లక్ష్మీ విలాస్‌ బ్యాంక్‌ తనకు తానుగా, ఆర్‌బీఐ నుంచి అనుమతి పొందకుండా రూ.25,000 మించి ఖాతాదారుకు చెల్లించలేదని కూడా స్పష్టం చేసింది. డీబీఎస్‌ బ్యాంక్‌తో విలీన ప్రతిపాదన  తాజా పరిణామాల నేపథ్యంలో లక్ష్మీ విలాస్‌ బ్యాంక్‌ను సింగపూర్‌ కేంద్రంగా పనిచేస్తున్న బ్యాంకింగ్‌ సేవల దిగ్గజం... డీబీఎస్‌ బ్యాంక్‌ ఇండియా (డీబీఐఎల్‌)తో విలీనానికి సంబంధించి ముసాయిదా పథకాన్ని కూడా ఆర్‌బీఐ వెలువరించింది. లక్ష్మీ విలాస్‌ బ్యాంక్‌ విలీన ప్రతిపాదనకు గ్రీన్  సిగ్నల్‌ లభిస్తే.. భారత్‌లో తమ అనుబంధ సంస్థ  డీబీఐఎల్‌ రూ. 2,500 కోట్ల మేర నిధులు ఇవ్వనున్నట్లు డీబీఎస్‌ వెల్లడించింది. సర్వత్రా అనిశ్చితి నెలకొన్న ప్రస్తుత పరిస్థితుల్లో.. ఈ విలీన డీల్‌తో ఎల్‌వీబీ డిపాజిటర్లు, కస్టమర్లు, ఉద్యోగులకు కొంత ఊరట లభించగలదని పేర్కొంది. అలాగే డీబీఐఎల్‌ ముఖ్యంగా దక్షిణ భారతదేశంలో తన నెట్‌వర్క్‌ను మరింతగా పెంచుకునేందుకు ఇది తోడ్పడగలదని తెలిపింది.  బీఎస్‌ఈలో బ్యాంక్‌ షేరు మంగళవారం 1% నష్టంతో రూ. 15.50 వద్ద ముగిసింది. ట్రేడింగ్‌ ముగిసిన తర్వాత ఆర్‌బీఐ మారటోరియం ఆదేశాలు వెలువడ్డాయి. బ్యాంక్‌ వ్యాపారం ఇలా...  రిటైల్, మిడ్‌–మార్కెట్, కార్పొరేట్‌ రంగాల్లో బిజినెస్‌ చేస్తున్న లక్ష్మీ విలాస్‌ బ్యాంకు– వీఎస్‌ఎన్‌ రామలింగ చెట్టియార్‌ నేతృత్వంలో ఏడుగురు వ్యాపారవేత్తలు 1926లో స్థాపించారు.  2019 జూన్‌ 30వ తేదీ నాటికి 569 బ్రాంచీలు ఉన్నాయి. ఇందులో ఏడు కమర్షియల్‌ బ్యాంక్‌ బ్రాంచీలుకాగా, ఒకటి శాటిలైట్‌ బ్రాంచ్‌. ఐదు ఎక్స్‌టెన్షన్‌ కౌంటర్లు, ఏడు ప్రాంతీయ కార్యాలయాలు పనిచేస్తున్నాయి. మొత్తం 16 రాష్ట్రాలు, 3 కేంద్ర పాలిత ప్రాంతాల్లో బ్యాంకుకు బ్రాంచీలు ఉన్నాయి. దాదాపు 1,047 ఏటీఎంలు సేవలు అందిస్తున్నాయి. 2020 సెప్టెంబర్‌తో ముగిసిన కాలానికి బ్యాంక్‌ వ్యాపారం రూ.37,595 కోట్లు. నికర నష్టాలు రూ.397 కోట్లు. స్థూల మొండిబకాయిల (ఎన్‌పీఏ)ల పరిమాణం 24.45 శాతంగా ఉంటే, నికరంగా చూస్తే ఇది 7.01 శాతంగా ఉంది. బ్యాంకులో దాదాపు నాలుగువేల మందికిపైగా ఉద్యోగులు పనిచేస్తున్నారు. 

ఆర్‌బీఐ పాలసీ నిర్ణయాల నేపథ్యంలో మార్కెట్లు లాభాలతో ట్రేడవుతున్నాయి. ప్రస్తుతం సెన్సెక్స్‌ 307 పాయింట్లు జంప్‌చేసి 40,450ను తాకింది. కాగా.. పీఈ సంస్థ క్లిక్స్‌ గ్రూప్‌ నుంచి నాన్‌బైండింగ్‌ ఆఫర్‌ వచ్చిన వార్తలతో ప్రయివేట్‌ రంగ సంస్థ లక్ష్మీ విలాస్‌ బ్యాంక్‌ కౌంటర్‌కు డిమాండ్‌ పుట్టింది. మరోవైపు గుజరాత్‌ ప్లాంటు నుంచి సిమెంట్‌ విక్రయాలు ప్రారంభమైనట్లు వెల్లడించడంతో జేకే సిమెంట్‌ కౌంటర్‌ వెలుగులోకి వచ్చింది. ఇన్వెస్టర్లు కొనుగోళ్లకు ఎగబడటంతో ఈ రెండు కౌంటర్లూ భారీ లాభాలతో కళకళలాడుతున్నాయి. వివరాలు చూద్దాం.. లక్ష్మీ విలాస్‌ బ్యాంక్ పీఈ సంస్థ క్లిక్స్‌ గ్రూప్‌ నుంచి విలీనానికి సంబంధించి నాన్‌బైండింగ్‌ ఆఫర్‌ లభించినట్లు లక్ష్మీ విలాస్‌ బ్యాంక్ పేర్కొంది. క్లిక్స్‌ గ్రూప్‌నకు చెందిన క్యాపిటల్‌ సర్వీసెస్‌, క్లిక్స్‌ ఫైనాన్స్‌ ఇండియా, క్లిక్స్‌ హౌసింగ్‌ ఫైనాన్స్‌లను లక్ష్మీ విలాస్‌ బ్యాంక్‌లో విలీనం చేసేందుకు నాన్‌బైండింగ్‌ ఆఫర్‌ను ఇచ్చినట్లు తెలియజేసింది. ఈ నేపథ్యంలో లక్ష్మీ విలాస్‌ బ్యాంక్‌ షేరు ఎన్‌ఎస్‌ఈలో 9 శాతం దూసుకెళ్లింది. రూ. 19.4 వద్ద ట్రేడవుతోంది. తొలుత 16 శాతం జంప్‌చేసి రూ. 20.70 వరకూ ఎగసింది. జేకే సిమెంట్‌ లిమిటెడ్‌ గుజరాత్‌లోని బాలసినోర్‌లో ఏర్పాటు చేసిన 0.7 మిలియన్‌ టన్నుల గ్రే సిమెంట్‌ గ్రైండింగ్‌ యూనిట్‌ కార్యకలాపాలు ప్రారంభించినట్లు జేకే సిమెంట్‌ పేర్కొంది. వాణిజ్య ప్రాతిపదికన వీటి డిస్పాచెస్‌ సైతం ప్రారంభించినట్లు తెలియజేసింది. దీంతో రాజస్తాన్‌, ఉత్తర ప్రదేశ్‌, గుజరాత్‌ యూనిట్లతో కలిపి మొత్తం గ్రే సిమెంట్‌ సామర్థ్యం 4.2 మిలియన్‌ టన్నులకు చేరినట్లు వెల్లడించింది. ఈ నేపథ్యంలో జేకే సిమెంట్‌ షేరు తొలుత 4.5 శాతం జంప్‌చేసి రూ. 1,660ను తాకింది. ఇది 52 వారాల గరిష్టంకాగా.. ప్రస్తుతం 3.2 శాతం లాభంతో రూ. 1,638 వద్ద ట్రేడవుతోంది. 

ఊగిసలాట మధ్య దేశీ స్టాక్‌ మార్కెట్లు సానుకూలంగా కదులుతున్నాయి. ప్రస్తుతం సెన్సెక్స్‌ 96 పాయింట్లు పుంజుకుని 39,140ను తాకగా.. నిఫ్టీ 25 పాయింట్లు బలపడి 11,547 వద్ద ట్రేడవుతోంది. కాగా..  సానుకూల వార్తల నేపథ్యంలో ప్రయివేట్‌ రంగ సంస్థ లక్ష్మీ విలాస్‌ బ్యాంక్‌, ఆప్టికల్‌ ఫైబర్‌ సేవల కంపెనీ స్టెరిలైట్‌ టెక్నాలజీస్‌ కౌంటర్లు ఇన్వెస్టర్లను ఆకట్టుకుంటున్నాయి. వెరసి భారీ లాభాలతో ఈ రెండు కౌంటర్లూ కళకళలాడుతున్నాయి. వివరాలు చూద్దాం.. లక్ష్మీ విలాస్‌ బ్యాంక్‌ క్లిక్స్‌ గ్రూప్‌తో విలీనానికి వీలుగా సాధ్యాసాధ్యాల నివేదికను సిద్ధం చేసుకున్నట్లు లక్ష్మీ విలాస్‌ బ్యాంక్‌ తాజాగా వెల్లడించింది. రెండు సంస్థల మధ్యా ఇందుకు అవసరమైన పరిశీలన పూర్తయినట్లు తెలియజేసింది. ఈ ఏడాది జూన్‌లో క్లిక్స్‌ గ్రూప్‌ను బ్యాంకులో విలీనం చేసుకునేందుకు ప్రాథమిక ఒప్పందాన్ని కుదుర్చుకున్న విషయం విదితమే. తద్వారా క్లిక్స్‌ క్యాపిటల్‌కున్న రూ. 1900 కోట్ల ఫండ్‌తోపాటు.. రూ. 4,600 కోట్ల ఆస్తులు బ్యాంకుకు బదిలీకానున్నాయి. ఈ నేపథ్యంలో లక్ష్మీ విలాస్‌ బ్యాంక్‌ షేరు జోరందుకుంది. ఎన్‌ఎస్‌ఈలో ప్రస్తుతం 10 శాతం అప్పర్‌ సర్క్యూట్‌ను తాకి రూ. 22.40 వద్ద ఫ్రీజయ్యింది. స్టెరిలైట్‌ టెక్నాలజీస్‌ ఆధునిక ఆప్టికల్‌ ఫైబర్‌ నెట్‌వర్క్‌ ఏర్పాటు చేసేందుకు మొబైల్‌ సేవల దిగ్గజం భారతీ ఎయిర్‌టెల్‌తో భాగస్వామ్యాన్ని కుదుర్చుకున్నట్లు స్టెరిలైట్‌ టెక్నాలజీస్‌ తాజాగా పేర్కొంది. తద్వారా కస్టమర్లకు ప్రపంచస్థాయి సర్వీసులను ఎయిర్‌టెల్‌ అందించే వీలుంటుందని తెలియజేసింది. ఎయిర్‌టెల్‌కు చెందిన 10 సర్కిళ్లలో ఆప్టికల్‌ నెట్‌వర్క్‌ను ఏర్పాటు చేయనున్నట్లు పేర్కొంది. తాజా నెట్‌వర్క్‌ ద్వారా 5జీ, ఫైబర్‌ టు హోమ్‌, ఐవోటీ తదితర సర్వీసులను ఎయిర్‌టెల్‌ సమర్ధవంతంగా అందజేయవచ్చని వివరించింది. ఈ నేపథ్యంలో స్టెరిలైట్‌ టెక్నాలజీస్‌ కౌంటర్‌ వెలుగులోకి వచ్చింది. ప్రస్తుతం ఎన్‌ఎస్‌ఈలో ఈ షేరు 5 శాతం జంప్‌చేసి రూ. 165 వద్ద ట్రేడవుతోంది. తొలుత ఒక దశలో రూ. 167 వరకూ ఎగసింది.

ఇటీవల కొద్ది రోజులుగా ర్యాలీ బాటలో సాగుతున్న ఐటీ సేవల సంస్థ రామ్‌కో సిస్టమ్స్‌ మరోసారి ఇన్వెస్టర్లను ఆకట్టుకుంటోంది. కాగా.. మరోపక్క క్లిక్స్‌ క్యాపిటల్‌తో నాన్‌బైండింగ్‌ ఒప్పందం(ఎల్‌వోఐ) కుదుర్చుకున్నట్లు వెల్లడికావడంతో ప్రయివేట్‌ రంగ సంస్థ లక్ష్మీ విలాస్‌ బ్యాంక్‌ కౌంటర్‌కు డిమాండ్‌ పెరిగింది. వెరసి ఈ రెండు కౌంటర్లూ భారీ లాభాలతో కళకళలాడుతున్నాయి. వివరాలు చూద్దాం.. రామ్‌కో సిస్టమ్స్‌  ప్రసిద్ధ ఇన్వెస్టర్‌ విజయ్‌ కేడియా కంపెనీలో 1 శాతం వాటా కొనుగోలు చేసినట్లు వెల్లడయ్యాక జోరందుకున్న సాఫ్ట్‌వేర్‌ సేవల సంస్థ రామ్‌కో సిస్టమ్స్‌ కౌంటర్‌ మళ్లీ వెలుగులోకి వచ్చింది. ఎన్‌ఎస్‌ఈలో ఈ షేరు ప్రస్తుతం  10 శాతం అప్పర్‌ సర్క్యూట్‌ను తాకింది. రూ. 13 పెరిగి రూ. 147 సమీపంలో ఫ్రీజయ్యింది.  వెరసి వరుసగా ఐదో రోజు అప్పర్‌ సర్క్యూట్‌కు చేరింది. ఫలితంగా గత వారం రోజుల్లో ఈ కౌంటర్‌ ఏకంగా 90 శాతం దూసుకెళ్లింది. ఈ నెల 9న రామ్‌కో సిస్టమ్స్‌ షేరు రూ. 77 సమీపంలో ముగిసింది. కాగా.. గత వారం విజయ్‌ కేడియా ఓపెన్‌ మార్కెట్‌ ద్వారా రామ్‌కో సిస్టమ్స్‌లో షేరుకి రూ. 87.8 ధరలో 1.1 శాతం ఈక్విటీని కొనుగోలు చేశారు. 3.4 లక్షల షేర్ల కొనుగోలుకి రూ. 3 కోట్లు వెచ్చించారు. కంపెనీ శుక్రవారం(19న) క్యూ4 ఫలితాలు ప్రకటించనుంది. లక్ష్మీ విలాస్‌ బ్యాంక్‌ క్లిక్స్‌ క్యాపిటల్‌ సర్వీసెస్‌, క్లిక్‌ ఫైనాన్స్‌ ఇండియాలతో ప్రాథమిక నాన్‌బైండింగ్‌ ఒప్పందాన్ని(ఎల్‌వోఐ) కుదుర్చుకున్నట్లు లక్ష్మీ విలాస్‌ బ్యాంక్‌ తాజాగా వెల్లడించింది. బ్యాంకులో క్లిక్స్‌ గ్రూప్‌ విలీనానికి సంబంధించి ఎల్‌వోఐపై సంతకాలు చేసినట్లు పేర్కొంది. తద్వారా 45 రోజుల్లోగా ఇందుకు సంబంధించి నియంత్రణ సంస్థల అనుమతి తదితర సన్నాహాలు చేపట్టనున్నట్లు తెలియజేసింది. పీఈ సంస్థ అయాన్‌ క్యాపిటల్‌ పార్టనర్స్‌కు చెందినదే క్లిక్స్‌ క్యాపిటల్‌. అయాన్‌ క్యాపిటల్‌ పార్టనర్స్‌లో న్యూయార్క్‌ సంస్థ అపోలో గ్లోబల్‌ మేనేజ్‌మెంట్‌, దేశీ సంస్థ ఐసీఐసీఐ వెంచర్‌ భాగస్వాములుగా ఉన్నట్లు తెలుస్తోంది. ఈ నేపథ్యంలో లక్ష్మీ విలాస్‌ బ్యాంక్‌ షేరు ఎన్‌ఎస్‌ఈలో 5 శాతం అప్పర్‌ సర్క్యూట్‌ను తాకింది. రూ. 16 వద్ద ఫ్రీజయ్యింది. ఇంతక్రితం నియంత్రణ సంస్థలు అనుమతించకపోవడంతో ఇండియాబుల్స్‌ హౌసింగ్‌ ఫైనాన్స్‌తో విలీనానికి లక్ష్మీ విలాస్‌ బ్యాంక్‌ చేసిన ప్రయత్నాలు విఫలమైన సంగతి తెలిసిందే.

న్యూఢిల్లీ: అకారణంగా ఓ ఖాతా నుంచి లక్ష్మీ విలాస్‌ బ్యాంకు నగదును డెబిట్‌ చేసినందుకు.. ఆ మొత్తంతో పాటు పరిహారం కూడా చెల్లించాలని వినియోగదారుల వివాదాల జాతీయ కమిషన్‌ (ఎన్‌సీడీఆర్‌సీ) ఆదేశించింది. తమ సేవా లోపం లేదన్న బ్యాంకు వాదనను తిరస్కరించింది. పరిహారం కింద రూ.25,000తోపాటు, నగదును డెబిట్‌ చేసి నాటి నుంచి ఆ మొత్తంపై వడ్డీ కూడా చెల్లించాలని తీర్పు చెప్పింది. కర్ణాటక రాష్ట్రానికి చెందిన వ్యాపారి గోపాల్‌ ఖాతా నుంచి లక్ష్మీ విలాస్‌ బ్యాంకు రూ.40,85,254ను 2015 ఏప్రిల్‌ 11న డెబిట్‌ చేసింది. అయితే, ఇందుకు తగిన కారణాన్ని చూపలేకపోయింది. దీంతో సేవా లోపంగా కమిషన్‌ పరిగణించింది. దీనివల్ల గోపాల్‌కు నష్టం జరిగినట్టు గుర్తించి ఈ ఆదేశాలు ఇచ్చింది.  

సాక్షి, ముంబై:  రిజర్వ్‌బ్యాంకు ఆఫ్‌ ఇండియా మరో రెండు బ్యాంకులపై భారీ జరిమానా విధించింది.  నిబంధనలను ఉల్లఘించిన కారణంగా లక్ష్మి విలాస్ బ్యాంకుకు కోటి రూపాయలు, సిండికేట్ బ్యాంకుకు రూ.  75 లక్షల రూపాయల జరిమానా విధించింది.  ఈ మేరకు నేడు ( సోమవారం, అక్టోబర్ 14) ఉత్తర్వు లు జారీ చేసింది.  ఆస్తి వర్గీకరణ,  మోసాలను గుర్తించే నిబంధనలను ఉల్లంఘించినందుకు లక్ష్మి విలాస్ బ్యాంక్ లిమిటెట్‌కు కోటి  రూపాయలు, మోసాల వర్గీకరణ , రిపోర్టింగ్‌పై ఆర్‌బిఐ జారీ చేసిన ఆదేశాలను పాటించనందుకు సిండికేట్ బ్యాంక్‌కు రూ .75 లక్షల ద్రవ్య జరిమానా విధించినట్లు ఆర్‌బీఐ ఒక ప్రకటనలో తెలిపింది.

న్యూఢిల్లీ: మరో ప్రైవేటు బ్యాంకులో ముసలం మొదలైంది. చెన్నై కేంద్రంగా దక్షిణాదిలో ప్రధానంగా కార్యకలాపాలు నిర్వహించే లక్ష్మీ విలాస్‌ బ్యాంకు ఆరోపణల్లో చిక్కుకుంది. బ్యాంకు బోర్డు డైరెక్టర్లకు వ్యతిరేకంగా మోసం, నేరపూరిత కుట్ర, నమ్మకద్రోహం అభియోగాలతో ఢిల్లీలో ఎఫ్‌ఐఆర్‌ దాఖలైంది. ‘‘ఢిల్లీ పోలీసు విభాగంలోని ఆర్థిక నేరాల దర్యాప్తు విభాగం 2019 సెప్టెంబర్‌ 23న ఎల్‌వీబీ బోర్డు డైరెక్టర్లు, తదితరులపై మోసం, విశ్వాస ఘాతుకం, నేరపూరిత కుట్ర తదితర అభియోగాలతో కన్నాట్‌ పోలీసు స్టేషన్‌లో ఎఫ్‌ఐఆర్‌ దాఖలు చేసింది’’అంటూ ఎల్‌వీబీ బీఎస్‌ఈకి సమాచారం అందించింది. చట్టపరంగా తగిన చర్యలు తీసుకోనున్నట్టు తెలిపింది. రెలిగేర్‌ ఫిన్‌వెస్ట్‌ లిమిటెడ్‌ ఇచ్చిన ఫిర్యాదు ఆధారంగా ఈ ఎఫ్‌ఐఆర్‌ దాఖలు చేసినట్టు వివరించింది. తాము చేసిన రూ.790 కోట్ల డిపాజిట్‌ను లక్ష్మీ విలాస్‌ బ్యాంకు దుర్వినియోగం చేసిందన్నది రెలిగేర్‌ ఫిన్‌వెస్ట్‌ ఆరోపణ. ‘‘రెలిగేర్‌ ఫిన్‌వెస్ట్‌ లిమిటెడ్‌ నిధులను చట్టవిరుద్ధంగా దుర్వినియోగం చేయడం వెనుక పెద్ద కుట్ర ఉన్నట్టు కనిపిస్తోంది. ఇందుకు ఎల్‌వీబీ కేంద్రంగా పనిచేసింది’’ అని ఫిర్యాదులో రెలిగేర్‌ ఫిన్‌వెస్ట్‌ ఆరోపించినట్టు సమాచారం. అయితే, బ్యాంకు డైరెక్టర్ల బోర్డు మొత్తంపై ఈ ఆరోపణలు చేసిందా లేక కొందరు డైరెక్టర్లపైనేనా అన్న స్పష్టత అయితే ఇంకా రాలేదు. ఇటీవలే పీఎంసీ బ్యాంకు ఒకటి సంక్షోభంలో పడిన విషయం తెలిసిందే. ప్రముఖ హౌసింగ్‌ ఫైనాన్స్‌ కంపెనీ ఇండియాబుల్స్‌ హౌసింగ్‌ ఫైనాన్స్‌ను లక్ష్మీ విలాస్‌ బ్యాంకు విలీనం చేసుకునేందుకు ఒప్పందం చేసుకున్న విషయం తెలిసిందే. విలీనానికి అనుమతి కోరుతూ ఈ సంస్థలు ఆర్‌బీఐ వద్ద దరఖాస్తు కూడా దాఖలు చేశాయి. తాజా పరిణామాలు విలీనంపై ప్రభావం చూపించే అవకాశం లేకపోలేదు. అయితే, రెలిగేర్‌ ఫిన్‌వెస్ట్‌ 2018 మే నెలలో మొదటిసారి ఈ అంశాన్ని లేవనెత్తిందని, విలీన చర్చలు ఆ తర్వాతే మొదలైనందున కేసు ప్రభావం విలీనంపై ఉండబోదన్న అభిప్రాయం బ్యాంకు వర్గాల నుంచి వ్యక్తమైంది.  మార్కెట్లో షేర్‌ లోయర్‌ సర్క్యూట్‌..  మోసం సహా పలు ఆరోపణల ఆధారంగా లక్ష్మీ విలాస్‌ బ్యాంకు (ఎల్‌వీబీ) డైరెక్టర్లకు వ్యతిరేకంగా ఎఫ్‌ఐఆర్‌ దాఖలవడం శుక్రవారం కంపెనీ షేర్లను కిందకు పడదోసింది. అమ్మకాల సెగకు షేరు 5 శాతం లోయర్‌ సర్క్యూట్‌ను తాకింది. ఎన్‌ఎస్‌ఈలో రూ.36.50 వద్ద, బీఎస్‌ఈలో రూ.36.55 వద్ద షేరు ముగిసింది.

న్యూఢిల్లీ: దేశీ బ్యాంకింగ్‌ రంగంలో మరో విలీనానికి తెరతీస్తూ గృహ రుణాల సంస్థ ఇండియాబుల్స్‌ హౌసింగ్‌ ఫైనాన్స్‌ (ఐహెచ్‌ఎఫ్‌)లో విలీనానికి ప్రైవేట్‌ రంగ లక్ష్మీ విలాస్‌ బ్యాంక్‌ (ఎల్‌వీబీ) బోర్డు శుక్రవారం ఆమోదముద్ర వేసింది. విలీన ప్రతిపాదన ప్రకారం.. ప్రతీ 100 ఎల్‌వీబీ షేర్లకు (రూ. 10 ముఖవిలువ) ఐహెచ్‌ఎఫ్‌ షేర్లు 14 (రూ. 2 ముఖవిలువ) కేటాయించనున్నారు. విలీన సంస్థకు ఇండియాబుల్స్‌ గ్రూప్‌ ప్రమోటరు సమీర్‌ గెహ్లాట్‌ .. వైస్‌ చైర్మన్‌గా వ్యవహరించనున్నారు. ఐహెచ్‌ఎఫ్‌ ఎండీ గగన్‌ బంగా, ఎల్‌వీబీ సీఈవో పార్థసారథి ముఖర్జీ జాయింట్‌ ఎండీలుగాను,  ఐహెచ్‌ఎఫ్‌ ఈడీ అజిత్‌ మిట్టల్‌.. ఎగ్జిక్యూటివ్‌ డైరెక్టరుగా ఉంటారు. ఎల్‌వీబీ, ఐహెచ్‌ఎఫ్‌లు శుక్రవారం ఈ విషయాలు వెల్లడించాయి. కార్యకలాపాలు మరింత మెరుగుపర్చుకునేందుకు, కొత్త విభాగాల్లోకి కూడా ప్రవేశించేందుకు ఈ విలీనంతో తోడ్పాటు లభించగలదని ఎల్‌వీబీ పేర్కొంది. నిధుల సమీకరణ వ్యయాలు తగ్గడంతో పాటు, వ్యాపార పరిమాణాన్ని పెంచుకునేందుకు ఉపయోగపడగలదని ఐహెచ్‌ఎఫ్‌ వివరించింది. విలీనంతో దేశీయంగా వ్యాపార పరిమాణం, లాభదాయకత విషయంలో టాప్‌ 8 ప్రైవేట్‌ బ్యాంకుల్లో ఒకటిగా తమది ఆవిర్భవిస్తుందని ఐహెచ్‌ఎఫ్‌ పేర్కొంది.   రెండు సంస్థల వ్యాపార పరిమాణం ఇలా ..  తమిళనాడులోని కరూర్‌కి చెందిన ఏడుగురు వ్యాపారవేత్తలు స్థానిక ప్రజల ఆర్థిక అవసరాల కోసం 1926లో లక్ష్మీ విలాస్‌ బ్యాంకును ఏర్పాటు చేశారు. ప్రస్తుతం.. ఎల్‌వీబీ డిపాజిట్లు రూ. 30,787 కోట్లు కాగా, ఇచ్చిన రుణాల పరిమాణం రూ. 24,123 కోట్లు. గత ఆర్థిక సంవత్సరం తొలి 9 నెలల కాలానికి రూ. 630 కోట్ల నష్టం నమోదు చేసింది. స్థూల మొండిబాకీలు 13.9%  నికర మొండిబాకీలు 7.6%గా ఉన్నాయి. దాదాపు 21.86 లక్షల ఖాతాదారులు, 4,881 మంది ఉద్యోగులు ఉండగా, దేశవ్యాప్తంగా 19 రాష్ట్రాల్లోని 150 పట్టణాల్లో 569 శాఖలు ఉన్నాయి. మరోవైపు,  ఇండియాబుల్స్‌ గ్రూప్‌లో భాగమైన ఇండియాబుల్స్‌ హౌసింగ్‌ ఫైనాన్స్‌ నికర విలువ ప్రస్తుతం రూ. 17,792 కోట్లు. గత ఆర్థిక సంవత్సరం తొలి 9 నెలలకు రూ. 3,084 కోట్ల లాభాలు ఆర్జించింది. స్థూల నిరర్థక ఆస్తులు 0.79%, నికర నిరర్థక ఆస్తులు 0.59%గా ఉంది. గృహ రుణాల మార్కెట్‌లో హౌసింగ్‌ ఫైనాన్స్‌ కంపెనీలకు సంబంధించి మూడో స్థానంలో ఉంది. దేశవ్యాప్తంగా 22 రాష్ట్రాల్లో కార్యకలాపాలతో ఇప్పటిదాకా మొత్తం రూ. 2.4 లక్షల కోట్ల రుణాలు మంజూరు చేసింది.   విలీనానంతరం 40వేల కోట్ల మార్కెట్‌ క్యాప్‌ ..  గతేడాది డిసెంబర్‌ చివరి నాటికి విలీన సంస్థ నికర విలువ రూ. 19,472 కోట్లుగాను, లోన్‌ బుక్‌ దాదాపు రూ. 1,23,393 కోట్లుగానూ ఉంటుంది.  క్యాపిటల్‌ అడెక్వసీ నిష్పత్తి 20.6 శాతంగా ఉండనుంది. నియంత్రణ సంస్థ నిబంధనల ప్రకారం ఇది 10.875 శాతంగా ఉంటే సరిపోతుంది. అటు స్థూల మొండిబాకీలు 3.5 శాతానికి, నికర ఎన్‌పీఏలు 2 శాతానికి పరిమితం అవుతాయి. 800 శాఖలు, 14,302 మంది ఉద్యోగులు ఉండనున్నారు. మార్కెట్‌ క్యాపిటలైజేషన్‌ దాదాపు రూ. 40,000 కోట్ల పైచిలుకు ఉంటుందని గగన్‌ బంగా తెలిపారు.   విలీనానికి కారణాలు..  ఇన్‌ఫ్రా ఫైనాన్స్‌ సంస్థ ఐఎల్‌అండ్‌ఎఫ్‌ఎస్‌ వరుసగా రుణాల చెల్లింపుల్లో డిఫాల్ట్‌ అయిన ప్రభావంతో 2018 సెప్టెంబర్‌లో ఆర్థిక మార్కెట్లు అస్తవ్యస్తంగా మారినప్పట్నుంచి ఐహెచ్‌ఎఫ్‌ లాంటి నాన్‌ బ్యాంకింగ్‌ ఫైనాన్స్‌ సంస్థలకు నిధుల సమీకరణ కష్టతరంగా మారింది. డిసెంబర్‌ క్వార్టర్‌లో ఐహెచ్‌ఎఫ్‌ రుణాల మంజూరీ అంతక్రితం త్రై మాసికంతో పోలిస్తే 65% పడిపోయింది. మార్చి క్వార్టర్‌లో కాస్త మెరుగుపడినప్పటికీ.. సాధారణ స్థాయికన్నా తక్కు వే ఉంటోంది. సంక్షోభం రాకముందు ప్రతి క్వార్టర్‌లో ఐహెచ్‌ఎఫ్‌ సుమారు రూ. 10,000 కోట్ల మేర రుణా లు మంజూ రు చేసేది. ఇది గణనీయంగా తగ్గింది. నిధుల సమీకరణ వ్యయాలు పెరిగిపోయాయి. మరోవైపు, ఎల్‌వీబీ మొండిబాకీలు ఏకంగా 13.95 శాతానికి పెరిగిపోగా, క్యాపిటల్‌ అడెక్వసీ రేషియో నియంత్రణ సంస్థ నిర్దేశిత స్థాయికన్నా తక్కువగా 7.57 శాతానికి పడిపోయింది. ఈ నేపథ్యంలో విలీనంతో ఇరు సంస్థలకు లబ్ధి చేకూరగలదని అంచనా.  విలీన వార్తలతో శుక్రవారం బీఎస్‌ఈలో లక్ష్మీ విలాస్‌ బ్యాంక్‌ షేరు సుమారు 5 శాతం పెరిగి రూ. 92.75 వద్ద క్లోజయ్యింది. అటు ఇండియాబుల్స్‌ హౌసింగ్‌ ఫైనాన్స్‌ షేరు దాదాపు అరశాతం పెరిగి రూ. 903.15 వద్ద ముగిసింది.    ఇరు సంస్థలకు ప్రయోజనాలేంటంటే..  ఇండియాబుల్స్‌ హౌసింగ్‌ ఫైనాన్స్‌ (ఐహెచ్‌ఎఫ్‌) నిధుల సమీకరణ వ్యయాలు తగ్గుతాయి. అలాగే ఆస్తులు, అప్పుల మధ్య భారీ వ్యత్యాసాల సమస్య పరిష్కారమవుతుంది. ఇక, ఇతరత్రా రిటైల్‌ బ్యాంకింగ్‌ పథకాలను ప్రవేశపెట్టేందుకు కూడా సాధ్యపడుతుంది. ఐబీహెచ్‌ ప్రధానంగా పశ్చిమ, ఉత్తరాది రాష్ట్రాల్లో కార్యకలాపాలు సాగిస్తుండగా.. ఎల్‌వీబీ దక్షిణాదిలో ఎక్కువగా విస్తరించి ఉంది. దీంతో ఈ విలీనం ద్వారా ఐబీహెచ్‌ దక్షిణాదిలో కూడా కార్యకలాపాలు విస్తరించడానికి వీలుపడనుంది.  మరోవైపు లక్ష్మీ విలాస్‌ బ్యాంక్‌ (ఎల్‌వీబీ) విషయానికొస్తే.. విలీనంతో క్యాపిటల్‌ అడెక్వసీ నిష్పత్తి మెరుగుపడటంతో పాటు వ్యాపార పరిమాణం కూడా పెరుగుతుంది. అటు వ్యాపార వృద్ధికి మరిన్ని పెట్టుబడులు లభిస్తాయి. అటు క్లయింట్స్‌ సంఖ్య కూడా పెరుగుతుంది. ఆర్‌బీఐ అనుమతులు కీలకం..  ఈ విలీన ప్రతిపాదనకు రిజర్వ్‌ బ్యాంక్‌ ఆమోదముద్ర వేయాల్సి ఉంది. సాధారణంగా ఇలాంటి విలీనాల్లో బ్యాంకు లైసెన్సును వేరే సంస్థకు బదలాయించేందుకు ఆర్‌బీఐ అంగీకరించదని, కాబట్టి లైసెన్సు ఎల్‌వీబీ పేరు మీదే కొనసాగవచ్చని పరిశ్రమ వర్గాలు తెలిపాయి. విలీనానంతరం ఏర్పడే సంస్థలో ఐహెచ్‌ఎఫ్‌ ప్రమోటర్లకు 19.5% వాటాలు ఉంటాయి. ప్రస్తుతం వారికి ఐహెచ్‌ఎఫ్‌లో 21.6% వాటాలు ఉన్నాయి. నిబంధనల ప్రకారం బ్యాంకులో ప్రమోటర్లు పది శాతానికి మించి వాటాలు ఉంచుకునేందుకు ఆర్‌బీఐ నుంచి ప్రత్యేకంగా అనుమతి తీసుకోవాల్సి ఉంటుంది. ఇండియాబుల్స్‌ గ్రూప్‌ అటు రియల్‌ ఎస్టేట్‌ వ్యాపార కార్యకలాపాలు కూడా సాగిస్తున్న నేపథ్యంలో రియల్టీ, బ్యాంకింగ్‌ వ్యాపారాల విలీనానికి ఆర్‌బీఐ ఎలా స్పందిస్తుందన్నది కూడా చూడాల్సిన విషయమని పరిశీలకులు అభిప్రాయపడ్డారు. గతంలో ఇలాంటి డీల్స్‌పై ఆర్‌బీఐ అంత సానుకూలత చూపలేదని వారు పేర్కొన్నారు. అటు షేర్‌హోల్డర్లతో పాటు కాంపిటీషన్‌ కమిషన్‌ ఆఫ్‌ ఇండియా (సీసీఐ), నేషనల్‌ హౌసింగ్‌ బ్యాంక్‌ (ఎన్‌హెచ్‌బీ), నేషనల్‌ కంపెనీ లా ట్రిబ్యునల్‌ (ఎన్‌సీఎల్‌టీ) మొదలైన నియంత్రణ సంస్థల నుంచి కూడా అనుమతులు పొందాల్సి ఉంటుందని గగన్‌ బంగా చెప్పారు.    


 ముంబై:  చెన్నై ప్రధాన  కేంద్రంగా  పనిచేస్తున్న లక్ష్మీ విలాస్ బ్యాంక్  సెప్టెంబర్ త్రైమాసిక ఫలితాలను   ప్రకటించింది.  క్యూ2  నికర లాభాల్లో 44.6 శాతం వృద్ధితో రూ..64.85 కోట్లను నమోదు చేసింది. మొత్తం ఆదాయం19 శాతం ఎగిసి రూ. 830.30 కోట్లు, ఆపరేటింగ్ ప్రాఫిట్స్ 70 శాతం పెరిగి రూ.158.42 కోట్లకు సాధించినట్టు మేనేజింగ్ డైరెక్టర్  మరియు  చీఫ్ ఎగ్జిక్యూటివ్ ఆఫీసర్ పి ముఖర్జీ   ప్రకటించారు. స్లిప్ పేజెస్  ఫలితంగా స్థూల నిరర్థక ఆస్తులు సెప్టెంబర్ 30, 2016  నాటికి  2.70 శాతం దగ్గర నమోదైనట్టు తెలిపారు.
 గత సెప్టెంబర్ తో  పోలిస్తే  ప్రస్తుత ఖాతా పొదుపు ఖాతా నిష్పత్తి17.31 శాతం వరకు వృద్ధిచెందింది.  బ్యాంకు మొత్తం డిపాజిట్లు 13.8 శాతం రూ.26,680 కోట్లుగా ఉన్నట్టు రిపోర్టు చేసింది.  క్రెడిట్ పోర్ట్ఫోలియో రూ. 17,573.80 కోట్లనుంచి మెరుగుపడి  రూ. 20,253 కోట్లకు   మెరుగుపడింది.
  


 అక్రమ ఆస్తుల కేసులో పట్టుబడిన పశ్చిమగోదావరి జిల్లా పంచాయతీ అధికారి ఎల్. శ్రీధర్ బినామీ ఆస్తులపై ఏసీబీ దాడులు ఇంకా కొనసాగుతూనే ఉన్నాయి. తాజాగా ఆయన బినామీ పేరు మీద ఉన్న లక్ష్మీ విలాస్ బ్యాంక్ లాకర్‌పై ఏసీబీ అధికారులు దృష్టి సారించారు.
 
 ఏలూరు రామచంద్రరావు పేటలోని లక్ష్మీ విలాస్ బ్యాంక్ లాకర్‌ను తెరిచిన ఏసీబీ అధికారులు అందులోంచి బయటపడుతున్న నగలను చూసి అవాక్కయ్యారు. ఇప్పటికే లాకర్‌లోనుంచి అర కిలోకి పైగా బంగారు ఆభరణాలు, 3 కిలోల వెండి ఆభరణాలతో పాటు కొద్దిపాటి నగదును స్వాధీనం చేసుకున్నారు. ఇంకా సోదాలు కొనసాగుతున్నాయి. ఇంకా మరెన్ని లాకర్లు ఉన్నాయో, వాటిలో ఏవేం ఉన్నాయోనని ఆరా తీస్తున్నారు.


 న్యూఢిల్లీ: ఇటీవల మార్కెట్ల పురోగతి నేపథ్యంలో నాలుగు కంపెనీలు రైట్స్ ఇష్యూలను చేపట్టేందుకు సిద్ధపడుతున్నాయి. లక్ష్మీ విలాస్ బ్యాంక్, ఐఎల్‌అండ్‌ఎఫ్‌ఎస్ ఇంజినీరింగ్ తదితర నాలుగు కంపెనీలు రూ. 800 కోట్లకుపైగా సమీకరించనున్నాయి. ఒనిడా బ్రాండ్ టీవీలను విక్రయించే మిర్క్ ఎలక్ట్రానిక్స్, న్యూలాండ్ లేబొరేటరీస్ సైతం రైట్స్ ద్వారా నిధులను సమీకరించాలని భావిస్తున్నాయి. ఇందుకు వీలుగా ఈ నాలుగు కంపెనీలు ఇప్పటికే మార్కెట్ల నియంత్రణ సంస్థ సెబీకి ముసాయిదా పత్రాలను దాఖలు చేశాయి.
 
 రైట్స్ ఇష్యూ అంటే... బోర్డు నిర్ణయించిన నిష్పత్తిలో మార్కెట్ ధర కంటే తక్కువలో ప్రస్తుత వాటాదారులకు కొత్తగా షేర్లను జారీ చేస్తాయి. తద్వారా కంపెనీలు నిధులను సమీకరిస్తాయి. లక్ష్మీ విలాస్ బ్యాంక్ రూ. 505 కోట్లను సమీకరించనుండగా, ఐఎల్‌అండ్‌ఎఫ్‌ఎస్ ఇంజినీరింగ్ రూ. 300 కోట్లు, మిర్క్ ఎలక్ట్రానిక్స్ రూ. 33 కోట్లు, న్యూలాండ్ ల్యాబ్ రూ. 25 కోట్లు చొప్పున సమీకరించనున్నాయి.