సందీప్‌ కిషన్, శ్రీ, రెజీనా ముఖ్య పాత్రల్లో తెరకెక్కిన తమిళ చిత్రం ‘మానగరం’. ‘నగరం’ టైటిల్‌తో తెలుగులో విడుదలైంది. లోకేష్‌ కనగరాజ్‌ దర్శకత్వం వహించిన ఈ చిత్రం సూపర్‌ హిట్‌గా నిలిచింది. ఒక్క రాత్రిలో జరిగే కథాంశంగా ఈ సినిమా ఉంటుంది.  ఇప్పుడు ఈ సినిమాను హిందీలోకి రీమేక్‌ చేస్తున్నారు. విక్రాంత్‌ మాస్సీ కీలక పాత్రలో నటించనున్నారు. ఈ చిత్రాన్ని ప్రముఖ కెమెరామేన్‌ సంతోష్‌ శివన్‌ డైరెక్ట్‌ చేయబోతున్నారు. జనవరిలో ఈ సినిమా చిత్రీకరణ ప్రారంభం కానుంది.

అడంగమరు చిత్రం ఫేమ్‌ కార్తీక్‌ తంగవేల్‌కు నటుడు కార్తీ అవకాశం ఇచ్చినట్లు తాజా సమాచారం. నటుడు జయంరవి కథానాయకుడిగా నటించిన చిత్రం అడంగమరు. రాశీఖన్నా నాయకిగా నటించిన ఈ చిత్రం 2018లో తెరపైకి వచ్చి మంచి విజయాన్ని అందుకుంది. ఈ చిత్రం ద్వారా పరిచయమైన దర్శకుడే కార్తీక్‌ తంగవేల్‌. ప్రస్తుతం కార్తీ చేతిలో మూడు చిత్రాలు ఉన్నాయి. వాటిలో మలయాళ దర్శకుడు జీతు జోసఫ్‌ తెరకెక్కిస్తున్న చిత్రం ఒకటి. ఇంకా పేరు నిర్ణయించని ఈ చిత్రంలో నటి జ్యోతిక ప్రధాన పాత్రలో నటిస్తున్నారు. నిఖిలావిమల్‌ నాయకిగా నటిస్తున్న ఇందులో సత్యరాజ్, అమ్ము అభిరామి ముఖ్య పాత్రల్లో నటిస్తున్నారు. ఈ చిత్రం తరువాత ఇరుంబుతిరై చిత్ర దర్శకుడు పీఎస్‌.మిత్రన్‌ దర్శకత్వంలో కార్తీ నటించనున్నారు. మానగరం చిత్రం ఫేమ్‌ లోకేశ్‌ కనకరాజ్‌ దర్శకత్వంలో కార్తీ నటించిన ఖైదీ చిత్రం షూటింగ్‌ను పూర్తి చేసుకుంది. జూలైలో ఖైదీని విడుదల చేయడానికి సన్నాహాలు జరుగుతున్నాయి. కాగా కార్తీక్‌ తంగవేల్‌ దర్శకత్వం వహించనున్న చిత్రాన్ని ప్రిన్స్‌ పిక్చర్స్‌ సంస్థ నిర్మించనున్నట్లు సమాచారం. ఈ సంస్థ ఇంతకు ముందు కార్తీ హీరోగా దేవ్‌ చిత్రాన్ని నిర్మించింది. ఆ చిత్రం ఆడకపోవడంతో కార్తీ ప్రిన్స్‌ పిక్చర్స్‌ సంస్థకు వెంటనే మరో చిత్రం చేయడానికి కాల్‌షీట్స్‌ ఇచ్చినట్లు తెలిసింది. వీటితో పాటు కార్తీ, మణిరత్నం దర్శకత్వంలో పొన్నియిన్‌ సెల్వన్‌ చిత్రంలోనూ నటించడానికి సమ్మతించారన్నది గమనార్హం. చాలా నమ్మకం పెట్టుకుని ఇష్టపడి చేసిన రొమాంటిక్‌ లవ్‌స్టోరీతో కూడిన దేవ్‌ చిత్రం నిరాశ పరచడంతో కార్తీ వేగం పెంచేశారు. వరుసగా చిత్రాలను అంగీకరిస్తున్నారు.


 నా డ్రీమ్ పాత్ర ఏమిటి? అనే ప్రశ్నను నాలో నేనే చాలా సార్లు వేసుకున్నాను అని పేర్కొన్నారు నటి రెజీనా. కోలీవుడ్‌లో కేడీబిల్లా కిలాడిరంగా చిత్రంతో తొలి విజయాన్ని అందుకున్న ఈ బ్యూటీ తరువాత కొన్ని చిత్రాల్లో నటించినా అవేవీ సక్సెస్‌ను అందించలేదు. దీంతో టాలీవుడ్‌పై దృష్టి సారించి అక్కడ మంచి అవకాశాలతో సక్సెస్‌ఫుల్ నాయకిగా గుర్తింపు పొందారు. ఆ తరువాత కో-2, వేలన్ను వందుట్టా వెళ్లక్కారన్ చిత్రాల సక్సెస్‌తో మంచి గుర్తింపు పొందారు. ఇప్పుడు కోలీవుడ్‌లో ఈ అమ్మడికి అవకాశాలు వరుస కడుతున్నాయి. ప్రస్తుతం మానగరం, నెంజమ్ మరప్పదిల్‌లై తదితర చిత్రాల్లో నటిస్తున్నారు.
 
 చిన్న గ్యాప్ తరువాత సెల్వరాఘవన్ దర్శకత్వం వహిస్తున్న చిత్రం నెంజమ్ మరప్పదిల్‌లై. ఇందులో కథానాయకుడిగా నటిస్తున్న ఎస్‌జే. సూర్యకు జంటగా రెజీనా నటిస్తున్నారు. ఇది హారర్ థ్రిల్లర్ కథా చిత్రం అన్నది గమనార్హం. స్థానిక ఈసీఆర్ రోడ్డులోని బంగ్లాలో అధిక భాగం చిత్రీకరణ జరుపుకున్న ఈ చిత్రంపై కోలీవుడ్‌లో చాలా ఆసక్తే నెలకొంది. కారణం సెల్వరాఘవన్ హ్యాండిల్ చేస్తున్న తొలి హారర్ కథా చిత్రం కావడమే. అదే విధంగా చాలా గ్యాప్ తరువాత సెల్వరాఘవన్ దర్శకత్వం వహిస్తున్న చిత్రానికి యువన్ శంకర్‌రాజా సంగీతాన్ని అందిస్తున్నారు.
 
 ఈ చిత్రంలో నటించడంపై నటి రెజీనా సంతోషాన్ని వ్యక్తం చేస్తూ చాలా కాలంగా తన డ్రీమ్ పాత్ర ఏదని తనలో తానే ప్రశ్నించుకునే దాన్నని, దానికి జవాబు ఆ చిత్రం ద్వారా లభించిందని పేర్కొన్నారు. ఇందులో మరిమయ్ అనే పాత్రలో నటిస్తున్నానన్నారు. తాను ఇంతకు ముందు ఈ తరహా పాత్రను పోషించలేదన్నారు. ఇలాంటి వైవిధ్యమైన పాత్రలో నటించే అవకాశం కల్పించిన దర్శకుడు సెల్వరాఘవన్‌కు కృతజ్ఞతలు తెలుపుకుంటున్నానన్నారు. కాగా ఇందులో తనది పని మనిషి పాత్ర అని, కొందరి దురాగతానికి బలై దెయ్యంగా వచ్చి పగ తీర్చుకుంటారని రెజీనా వివరించింది.


 నటి రెజీనా ఇప్పుడు టాక్ ఆఫ్ ది ఇండస్ట్రీగా మారింది. ఈ బ్యూటీ ప్రేమ వ్యవహారం మీడియాలో హల్‌చల్ చేస్తోంది. ఇది రెజీనా వ్యక్తి గతం అయితే వృత్తిపరంగా చెప్పాలంటే రెజీనా ప్రస్తుతం తమిళంలో కంటే తెలుగులోనే మంచి ఫామ్‌లో ఉన్నారు. తమిళంలో కొంచెం గ్యాప్ తరువాత మానగరం అనే చిత్రంలో నటిస్తున్నారు. ఇందులో సందీప్ కిషన్, శ్రీ హీరోలుగా నటిస్తున్నారు. నవ దర్శకుడు లోకేష్ కనకరాజ్ దర్శకత్వం వహిస్తున్న ఈ చిత్రం సిటీ బ్యాగ్‌డ్రాప్‌లో రూపొందుతున్న విభిన్న కథాచిత్రం అని అంటున్నారాయన.
 
 ఉద్యోగం కోసం చెన్నైకి వచ్చిన నలుగురు మిత్రుల ఇతివృత్తంగా తెరకెక్కిస్తున్న చిత్రం మానగరం అని వెల్లడించారు.ఈ సందర్భంగా వారికి ఎదురైన సంఘటనలు, సమస్యలు,వాటి నుంచి ఎలా బయట పడ్డారన్న సన్నివేశాల సమాహారమే చిత్రం అన్నారు.అయితే సందీప్ కిషన్, శ్రీలలో రెజీనా ఎవరిని ప్రేమిస్తుందన్నది ప్రస్తుతానికి సస్పెన్స్ అన్నారు. చిత్రం షూటింగ్ పూర్తి అయ్యిందని ప్రస్తుతం నిర్మాణాంతర కార్యక్రమాలు జరుగుతున్నాయని వెల్లడించారు.