తెలుగు, తమిళ భాషల్లో అగ్ర కథానాయికగా ఇప్పటికీ వరుస సినిమాలతో హీరోయిన్ త్రిష బిజీగా ఉన్నారు.  40 ఏళ్ల వయసు దాటినా తరగని అందంతో యువతను మంత్రముగ్ధులను చేస్తోంది. ఆమె కీలక పాత్రలో నటించిన 'పొన్నియిన్‌ సెల్వన్‌-2'తో మరోసారి తనకంటూ ప్రత్యేకతను చాటుకుంది. ప్రస్తుతం కోలీవుడ్‌ టాప్‌ హీరో విజయ్‌ సినిమాకు ఆమె ఇప్పటికే గ్రీన్‌సిగ్నల్‌ ఇచ్చింది. అంతేకాకుండా  మెగాస్టార్‌ చిరంజీవితో కూడా మరోసారి కనిపించనుంది ఈ బ్యూటీ. ప్రస్తుతం ఆమె చేతిలో అజిత్‌ సినిమాతో పాటు సౌత్‌ ఇండస్ట్రీ నుంచి అరడజనుకు పైగా ప్రాజెక్ట్‌లు ఉన్నాయి. ఇదిలా ఉంటే త్రిష గురించి ప్రముఖ తమిళ నటి, బిగ్‌బాస్‌ ఫేం మీరా మీథున్‌ పలు ఆసక్తికరమైన వ్యాఖ్యలు చేసింది.  త్రిష గురించి మీరా మీథున్‌ కామెంట్స్‌ కోలీవుడ్‌లో ఓ ఇంటర్వ్యూలో పాల్గొన్న మీరా మిథున్‌.. హీరోయిన్‌ త్రిష గురించి ఇలా చెప్పింది. 'త్రిష నటిస్తున్న ఓ సినిమాలో నేను కూడా చిన్న పాత్రలో నటించాను.. అప్పుడు సెట్‌లో ఓ ప్రముఖ నటుడు త్రిషను తాకకూడని చోట పదేపదే టచ్‌ చేశాడు. అది నాకు ఏమాత్రం నచ్చలేదు. ఆ సందర్భంలో త్రిష కూడా ఇబ్బంది పడింది. ఎందుకంటే ఇలాంటి చర్య త్రిషకి కూడా ఏ మాత్రం ఇష్టం లేదు. కానీ కోపం వచ్చి అరుస్తే సినిమా అవకాశం పోతుందని మౌనం వహించింది. ఇండస్ట్రీలో ఓ ప్రముఖ హీరోయిన్‌కే ఇలాంటి పరిస్థితి ఎదురైతే.. నాలాంటి సాధారణ నటీమణుల పరిస్థితి ఎలా ఉంటుందో ఆలోచించండి.' అని మీరా తెలిపింది. (ఇదీ చదవండి: అందరిలా నేనెందుకు ఆనందంగా లేనంటే: టాప్‌ హీరోయిన్‌) మీరా మిథున్ ఇదివరకే నటి త్రిషపై తీవ్ర స్థాయిలో విమర్శలు గుప్పించింది. త్రిషకు కుల పిచ్చి ఉందని దాంతో చాలా సినిమా అవకాశాలు కోల్పోయానని మీరా ఫైర్‌ అయింది.  మళ్లీ ఇప్పుడు త్రిష గురించి ఇలాంటి కామెంట్లు చేయడంతో కోలీవుడ్‌లో వైరల్‌ అవుతున్నాయి. త్రిషను టచ్‌ చేసిన ఆ ప్రముఖ నటుడి పేరును ఆమె రివీల్‌ చేయలేదు. మరీ ఆమె చేసిన వ్యాఖ్యల్లో నిజం ఎంతవరకు ఉందో తెలియాల్సి ఉంది.

Court New Order On Meera Mithun Controversy Issue: ప్రముఖ నటి, బిగ్‌బాస్‌ ఫేం మీరా మీథున్‌ను మళ్లీ వార్తల్లో నిలిచింది. సోషల్‌ మీడియాలో ఏది అనిపిస్తే అది మాట్లాడి వివాదాల పాలవుతుంది ఈ అమ్మడు. ఈ భామపై అప్పట్లో అరెస్ట్‌ వారెంట్‌ జారీ అయింది. పలు తమిళ చిత్రాల్లో నటించిన మీరాకు అవకాశాలు రాకుండా కొంతమంది అడ్డుకుంటున్నారని, అందులో షెడ్యూల్ క్యాస్ట్ వాళ్లు కూడా ఉన్నారని ఆమె ఆరోపించింది. వారిని వెంటనే ఇండస్ట్రీ నుంచి తప్పించాలంటూ వారిని, వారి కులాన్ని కించపరుస్తూ గతంలో కాంట్రవర్సీ కామెంట్స్‌ చేసిన విషయం తెలిసిందే. అప్పట్లో ఈ వీడియో వైరల్‌ కాగా ఆ సామాజిక వర్గం నుంచి ఆందోళనలు మొదలయ్యాయి. ఆమె మీద పోలీసులకు ఫిర్యాదు చేయడంతో ఎస్సీ, ఎస్ట్రీ అట్రాసిటీ కేసుతోపాటు పలు కేసులు నమోదయ్యాయి.  ఆ తర్వాత మీరాను అరెస్ట్‌ చేయడానికి వెళ్లిన పోలీసులకు చుక్కలు చూపించింది ఈ అమ్మడు. అరెస్ట్‌ చేయడానికి వెళ్లిన పోలీసులతో 'ఇక్కడ ఆడవాళ్లకు రక్షణ లేదా? పోలీసులు టార్చర్‌ చేస్తున్నారు.. ప్రధాని మోదీ, తమిళనాడు సీఎం స్టాలిన్‌ స్పందించండి’ అంటూ అరుస్తున్న వీడియోను సోషల్‌ మీడియాలో షేర్‌ చేసింది. అంతేగాక ప్రతి ఒక్కరూ, పోలీసులు నన్ను టార్గెట్ చేస్తున్నారు. నన్ను టచ్ చేస్తే కత్తితో పొడుచుకుని ఆత్మహత్య చేసుకుంటాను అంటూ బెదిరించింది. ముఖ్యమంత్రి, ప్రధాని మోదీ.. ఇది తమిళనాడు పోలీసులు చేస్తున్న హింస అంటూ చెప్పుకొచ్చింది. దీనికి సంబంధించిన వీడియో కూడా వైరల్ అయింది.  ఇదంతా ఇలా ఉంటే చాలా రోజుల తర్వాత ఈ కేసుపై చెన్నై కోర్టు తీర్పు ఇచ్చింది. ఇప్పటివరకూ మీరా ఒక్క విచారణకు కూడా హాజరు కాకపోవడంతో ఆమెను అరెస్ట్‌ చేసి ఏప్రిల్‌ 4న కోర్టులో హాజరు పర్చాల్సిందిగా పోలీసులకు ఆదేశించింది. ఇప్పటిదాకా ఇంతలా రచ్చ చేసిన ఈ అమ్మడు ఈసారి ఏం చేస్తుందో చూడాలి. 

నటి మీరా మిథున్‌ కొత్త వివాదంలో చిక్కుకున్నారు. ఈమె కథానాయికగా నటించిన చిత్రం పేయ కానోమ్‌. గ్లోబల్‌ ఎంటర్‌టైన్‌మెంట్‌ పతాకంపై తేని భారత్‌ ఆర్‌.సురుళివేల్‌ నిర్మిస్తున్న చిత్రం ఇది. మీరాతో పాటు నటుడు కౌశిక్, సంధ్య రామచంద్రన్, కోదండం, ఫైట్‌ మాస్టర్‌ జాగ్వార్‌ తంగం ప్రధాన పాత్రలు పోషించారు. సెల్వ అన్భరసన్‌ దర్శకుడిగా పరిచయం అవుతున్నారు. చిత్ర ఫస్ట్‌లుక్‌ ఆవిష్కరణ కార్యక్రమం శనివారం రాత్రి చెన్నైలో నిర్వహించారు.దర్శకుడు మాట్లాడుతూ చిత్ర షూటింగ్‌ 80 శాతం పూర్తయిన తర్వాత మీరా మిథున్‌ను పోలీసులు అరెస్టు చేశారని, తర్వాత ఆమె జైలు నుంచి బయటకు రావడంతో మిగిలిన 20 శాతం షూటింగ్‌ను కొడైకెనాల్‌లో నిర్వహించామన్నారు. అయితే 2రోజుల్లో షూటింగ్‌ పూర్తి అవుతుందనగా మీరా మిథున్‌ తనతో వచ్చిన ఆరుగురు వ్యక్తులతో కలసి ఎవరికీ చెప్పకుండా పారి పోయిందన్నారు. దీంతో ఆమె లేకుండానే కథను మార్చి చిత్రాన్ని పూర్తి చేసినట్లు తెలిపారు.

ప్రముఖ నటి, బిగ్‌బాస్‌ ఫేం మీరా మీథున్‌ను చెన్నై క్రైం బ్రాంచ్‌ పోలీసులు శనివారం కేరళలో అరెస్టు చేశారు. ఇటీవల దళితులపై ఆమె అనుచిత వ్యాఖ్యలు చేసిన సంగతి తెలిసిందే. దీంతో మీరాను వెంటనే అరెస్టు చేయాలని నెటిజన్లు డిమాండ్‌ చేశారు. అంతేగాక దళిత-కేంద్రీకృత పార్టీ అయిన విడుదలై చిరుతైగళ్‌ కట్చి పార్టీ ఉప కార్యదర్శి వన్నీయరసు మీరాపై పోలీసులకు ఫిర్యాదు చేశారు. దీంతో పోలీసులు మీరా మీథున్‌పై ఏడు సెక్షన్‌ల కింద కేసులు నమోదు చేసి ఆమెకు సమాన్లు జారీ చేశారు. దీనిపై పోలీస్ కమిషనర్ కార్యాలయానికి వచ్చిన వివరణ ఇవ్వాలని మీరాకు పోలీసులు పోలీసులు నోటీసులో పేర్కొన్నారు. ఈ నోటీసులపై ఆమె స్పందిస్తూ.. పోలీసులు తనను అరెస్ట్ చేయలేరని.. కలలో మాత్రమే అది జరుగుతుందని.. సాధ్యమైతే అరెస్ట్ చేయాలంటూ పోలీసులకు సవాల్ విసురుతూ సంచలన వ్యాఖ్యలు చేసింది. దీంతో రంగంలోకి దిగిన పోలీసులు కేరళలో తలదాచుకున్న ఆమెను నిన్న అదుపులోకి తీసుకున్నారు. అయితే పోలీసులు అరెస్టు చేసే సమయంలో మీరా మీథున్‌ రచ్చ రచ్చ చేసిన వీడియో సోషల్‌ మీడియా వైరల్‌ అవుతోంది. ఇక్కడ ఆడవాళ్లకు రక్షణ లేదా? పోలీసులు చార్చర్‌ చేస్తున్నారు.. ప్రధాని మోదీ, తమిళనాడు సీఎం స్టాలిన్‌ స్పందించండి’ అంటూ అరుస్తున్న వీడియోను సోషల్‌ మీడియాలో షేర్‌ చేసింది. అంతేగాక ప్రతి ఒక్కరు, పోలీసులు నన్ను టార్గెట్ చేస్తున్నారు. నన్ను టచ్ చేస్తే కత్తితో పొడుచుకుని ఆత్మహత్య చేసుకుంటాను అంటూ బెదిరించింది. ముఖ్యమంత్రి, ప్రధాని మోదీ..ఇది తమిళనాడు పోలీసులు చేస్తున్న హింస అంటూ చెప్పుకొచ్చింది.  View this post on Instagram A post shared by @Thiruma_official (@thol.thirumavalavan)

సినిమాలకంటే వివాదాలతో పాపులర్‌ అయ్యారు తమిళ హీరోయిన్ మీరా మిథున్. ఏదో ఒక విషయంపై సంచలన వ్యాఖ్యలు చేస్తూ నిత్యం వార్తల్లో నిలుస్తోంది. ఈ బిగ్‌బాస్‌ బ్యూటీ. దళిత దర్శకులు, నటీనటులు సినిమాల్లోకి రావడం వల్ల తనకు సినీ అవకాశాలు తగ్గిపోయాయని, దళితులను ఇండస్ట్రీ నుంచి తరిమేయాలని మీరా మిథున్ వివాదాస్పద వ్యాఖ్యలు చేసిన సంగతి తెలిసిందే. దళితులను కించపరిచేలా మాట్లాడిన ఆమెపై ఎస్సీ, ఎస్టీ అట్రాసిటీ కేసుతో పాటు మరో ఏడు సెక్షన్ల కింద కేసులు నమోదయ్యాయి. ఈ క్రమంలో పోలీస్‌ కమిషనర్‌ కార్యాలయానికి హాజరు కావాల్సిందిగా మీరాకు చెన్నై పోలీసులు నోటీసులు జారీచేశారు. అయితే విచారణకు ఆమె వస్తుందని అనుకోగా.. పోలీసుల నోటీసులను లెక్కచేయకుండా విచారణకు హాజరు కాలేదు. దీంతో మీరాను పోలీసులు ఏ క్షణమైనా అరెస్ట్ చేయవచ్చనే సోషల్‌ మీడియాలో ప్రచారం సాగుతోంది. కాగా ఈ విషయంపై మీరా మిథున్ స్పందించింది. తనను అరెస్ట్ చేయడం కలలోనే జరుగుతుందని తెలిపింది. తనను పోలీసులు అరెస్ట్ చేయడం జరగదని, అది అసాధ్యం అని పేర్కొంది. సాధ్యమైతే తనను నిర్భయంగా అరెస్ట్ చేసుకోవచ్చని సవాల్‌ విసిరింది.

చెన్నై: తమిళ నటి, బిగ్‌ బాస్‌ ఫేం మీరా తన విచిత్రమైన వ్యవహర శైలితో తరచూ వార్తల్లో నిలిచే సంగతి తెలిసిందే. ఇతర నటీనటులు, ప్రముఖ రాజకీయ నాయకులపై వివాదాస్పద వ్యాఖ్యలు చేస్తూ హాట్‌టాపిక్‌గా మారుతుంటారు. సెలబ్రిటీల గురించి అంటే పర్లేదు కానీ ఈ సారి ఏకంగా ఓ సామాజిక వర్గంపై అనుచిత వ్యాఖ్యలు చేసి తీవ్ర విమర్శలు ఎదుర్కొంటున్నారు. తాజాగా దళితులపై అనుచిత వ్యాఖ్యలు చేసిన మీరా మిథున్‌ని చెన్నై పోలీసులు అరెస్ట్‌ చేశారు. దళిత-కేంద్రీకృత పార్టీ అయిన విదుతలై సిరుతైగల్ కట్చి నాయకుడు వన్నీ అరసు ఇచ్చిన ఫిర్యాదు మేరకు నటిని అరెస్ట్‌ చేశారు. కొన్ని మీడియా సంస్థల్లో వచ్చిన వార్తల ప్రకారం మీరా మిథున్‌ దళితుల గురించి అనుచిత వ్యాఖ్యలు చేసిన వీడియోను శనివారం సోషల్‌ మీడియాలో షేర్‌ చేశారు. ఇది కాస్త వైరల్‌ కావడంతో మీరా మిథున్‌ను అరెస్ట్‌ చేయాల్సిందిగా నెటిజనులు డిమాండ్‌ చేశారు.  మీరా మిథున్‌ షేర్‌ చేసిన వీడియోలో.. ఆమె ఓ డైరెక్టర్‌ అనుమతి లేకుండా తన ఫోటోని అతడి మూవీ ఫస్ట్‌లుక్‌ పోస్టర్‌ కోసం వాడుకున్నాడని ఆరోపించారు. అంతటితో ఊరుకోక.. ‘‘తక్కువ జాతి అనగా దళిత సామాజిక వర్గానికి చెందిన వారి ఆలోచనలు ఇలానే ఉంటాయి. చాలా చీప్‌గా ప్రవర్తిస్తారు’’ అంటూ నోటికొచ్చినట్లు విమర్శించారు. దళితులు నేరాలకు, అంసాఘిక కార్యకలపాలకు పాల్పడటం వల్లనే వారిని సమాజంలో నీచంగా చూస్తున్నారని వ్యాఖ్యానించారు. అంతేకాక తమిళ ఇండస్ట్రీలో ఉన్న దళిత దర్శకులను, నటీనటులను బయటకు గెంటేయాలని సూచించారు.  ఈ వీడియో కాస్త సోషల్‌ మీడియాలో వైరల్‌ కావడంతో నెటిజనులు మీరా మిథున్‌సై తీవ్ర ఆగ్రహం వ్యక్తం చేస్తున్నారు. ఆమెను తక్షణమే అరెస్ట్‌ చేయాలని డిమాండ్‌ చేస్తున్నారు. ఈ నేపథ్యంలో చెన్నై పోలీసులు మీరా మీద ఎస్సీ, ఎస్టీ అట్రాసిటీ యాక్ట్‌ కింద కేసు నమోదు చేసి.. అరెస్ట్‌ చేశారు. ఇక మీరా తమిళ్‌ బిగ్‌బాస్‌ సీజన్‌3లో పాల్గొన్నారు. కొన్ని సినిమాల్లో చిన్న చిన్న పాత్రలు పోషించారు.   Actress Meera Mithun has used very derogatory term against SC/ST people in her video. This shows her caste conceit mindset. She must be arrested soon. @mkstalin #CrushTheCaste pic.twitter.com/LghONRsKPv — Mission Ambedkar (@MissionAmbedkar) August 7, 2021

బిగ్‌బాస్‌ బ్యూటీ, ప్రముఖ తమిళ నటి మీరా మిథున్‌ వ్యవహర శైలి గురించి ప్రత్యేకంగా చెప్పక్కర్లలేదు. ఇటీవల ఈ అమ్మడు నటీనటులుపై వివాదాస్పద వ్యాఖ్యలు చేస్తూ హాట్‌టాపిక్‌గా మారుతుంది. ఎప్పుడూ ఏదో అంశంపై స్పందిస్తూ వార్తల్లో ఉండే మీరా ఈ సారి పరోక్షంగా వార్తల్లోకెక్కింది. తాజాగా ఈ అమ్మడు నటిస్తున్న ఓ చిత్రంలో తన అనుసరిస్తున్న పద్ధతిని మార్చుకోవాలంటూ సదరు చిత్ర దర్శకుడు వార్నింగ్‌ ఇచ్చాడంట. మీరా మిథున్‌ మొదట మోడలింగ్‌ రంగంలో రాణించి ఆ తర్వాత తమిళ వెండితెరపై మెరిసింది. ఈ క్రమంలోనే ఆమెకు తమిళ బిగ్‌బాస్‌ హౌజ్‌లోకి ఎంట్రీ ఇవ్వడంతో పాటు అక్కడ తనదైన మార్కుతో మరింత పాపులారిటీ సంపాదించింది. ప్రస్తుతం మీరా ‘పేయైు కాణోమ్‌’ చిత్రంలో నటిస్తోంది. ఇందులో కౌశిక్‌ అనే యువకుడు తొలిసారి హీరోగా పరిచయం కానున్నాడు. అన్బరసన్‌ అనే నూతన దర్శకుడు ఈ చిత్రానికి దర్శకత్వం వహిస్తున్నాడు. సాధారణంగానే సిగరెట్‌ తాగే అలవాటు ఉన్న మీరా, ఇటీవల షూటింగ్‌ లొకేషన్‌లో  సిగరెట్‌ తాగుతూ కెమెరాకు చిక్కడంపై దర్శకుడు కాస్త అసహనం వ్యక్తం చేశాడట.  ‘సిగరెట్‌ తాగడం, ఆమె వ్యక్తిగత వ్యవహారం. షూటింగ్‌ లొకేషన్‌లోనే అలా సిగెరెట్లు తాగడం సరికాదని, కేరవాన్‌లో తాగి రావాలని చెప్పాను. ఆ తర్వాత ఆమె ఇది రిపీట్‌ చేయలేద’ని సదరు దర్శకుడు తెలిపారు. కాగా ఇటీవల కంగనా రనౌత్‌పై మీరా తీవ్ర విమర్శలు చేసింది. జయలలిత పాత్రలో నటించే అర్హతే కంగనకు లేదని పేర్కొంటూ ఆ పాత్రకు ఆమెను ఎంపిక చేయటమే పెద్ద తప్పని వ్యాఖ్యానించిన సంగతి తెలిసిందే. 

ఈ మధ్య కాలంలో నటీమణులు అవకాశాల కోసం తెరపై తమ అందచందాలు ఆరబోస్తూ విమర్శలు ఎదుర్కొంటున్నారు. తాజాగా బిగ్‌బాస్‌ బ్యూటీ, ప్రముఖ తమిళ నటి మీరా మీథున్‌ నటిస్తున్న ఓ మూవీ పోస్టర్‌ సోషల్‌ మీడియాలో చర్చనీయాంశంగా మారింది. అయితే మీరా తన విచిత్రమైన వ్యవహర శైలితో తరచూ వార్తల్లో నిలుస్తుంది. ఇతర నటీనటులు, ప్రముఖ రాజకీయ నాయకులపై వివాదాస్పద వ్యాఖ్యలు చేస్తూ హాట్‌టాపిక్‌గా మారుతుంది. ఈ నేపథ్యంలో ఆమె నటిస్తున్న ఓ బయోపిక్‌ మూవీ నుంచి ఆసభ్యకరమైన పోస్టర్‌ను ఇటీవల తన ఇన్‌స్టాగ్రామ్‌లో షేర్‌ చేసింది. ఇందులో మీరా ఆభ్యంతరకరమైన దుస్తుల్లో దర్శనం ఇవ్వడంతో నెటిజన్లు, మహిళా సంఘాలు మండిపడుతూ రచ్చ రచ్చ చేస్తున్నారు. ఇందులో మీరా ‘లోదుస్తులు ధరించి హాట్‌ లుక్‌లో కనిపించగా.. ఆమె ప్రైవేటు పార్ట్స్‌పై చేయి వేస్తూ పక్కనే ఓ కుర్రాడు కుర్చోని ఉన్నాడు. దీనిని ‘చెక్‌ అవుట్‌ మై హాట్‌నెస్‌’ అంటూ షేర్‌ చేసింది. ఈ పోస్టర్‌ ఆసభ్యకరంగా ఉండటంతో ‘మీరా మరీ శృతిమించి పోతోంది’ అంటూ నెటిజన్‌లు ఆమెపై విమర్శలు గుప్పిస్తుంటే.. అభిమానులు మాత్రం ఆమెకు మద్దతుగా నిలబడుతున్నారు. ఎదేమైనా ఈ పోస్టర్‌ మాత్రం నెట్టింట హల్‌హల్‌ చేస్తోంది. పోస్టర్‌యే ఇలా ఉంటే ఇక మూవీ ఎలా ఉండబోతుందో అంటూ మరికొందరు వ్యాఖ్యానిస్తున్నారు. కాగా మొదట మోడలింగ్‌ రంగంలో రాణించిన మీరా ఆ తర్వాత తమిళ వెండితెరపై మెరిసింది. ఈ క్రమంలో మీరా తమిళ బిగ్‌బాస్‌ హౌజ్‌లోకి ఎంట్రీ ఇచ్చి మరింత పాపులర్‌ అయ్యింది.  చదవండి:  విశాల్‌ నన్ను పెళ్లి చేసుకుంటా అన్నారు! రజని, విజయ్‌లపై మీరామిథున్‌ ఫైర్‌  

సాక్షి, చెన్నై : నటి మీరామిథున్‌ తన వివాదస్పద వ్యాఖ్యలకు బ్రేక్‌ వేసే ఆలోచనలో ఉన్నట్టు కనిపించడం లేదు. ఆ మధ్య  హీరోలు విజయ్, సూర్యలను వ్యక్తిగతంగా విమర్శలు చేసి వారి అభిమానుల ఆగ్రహానికి గురయ్యారు. అంతేకాకుండా మీరామిథున్‌ చేసిన వ్యాఖ్యలపై ప్రముఖ దర్శకుడు భారతీరాజా ఆగ్రహం వ్యక్తం చేస్తూ ఆమెను తీవ్రంగా హెచ్చరించారు. అయినా నటి మీరామిథున్‌లో ఏ మాత్రం మార్పు రాలేదు.  ఇటీవలే రజనీకాంత్‌ రాజకీయ రంగ ప్రవేశం గురించి వివాదస్పద వ్యాఖ్యలు చేశారు. తాజాగా మరో వివాదస్పద అంశానికి తెర తీశారు. ఈసారి విశాల్‌ను టార్గెట్‌ చేశారు. ఈ సందర్భంగా ఆమె మాజీ మేనేజర్‌ విడుదల చేసిన ఒక వీడియో ఇప్పుడు సామాజిక మాధ్యమాలలో వైరల్‌ అవుతోంది. అందులో విశాల్‌ తనను పెళ్లి చేసుకుంటానని రెండు, మూడు ఏళ్లుగా అడుగుతూ వచ్చారని మీరా మిథున్‌ పేర్కొన్నారు. తన తల్లికి విశాల్‌ అంటే చాలా ఇష్టమని, అయితే  తనకు ధనవంతుడైన వ్యక్తిని పెళ్లి చేసుకోవడం ఇష్టం లేదని అందుకే విశాల్‌ను పెళ్లి చేసుకోవడానికి నిరాకరించినట్టు తెలిపారు. మరి దీనికి విశాల్‌ ఎలా స్పందిస్తారో చూడాలి. 

సినిమా: మీరామిథున్‌ తనపై హత్యా బెదిరింపులకు పాల్పడుతోందని నటి శాలు షమ్ము పోలీస్‌ కమిషనర్‌ కార్యాలయంలో ఫిర్యాదు చేసింది. వరుత్త పడాద వాలిబర్‌ సంఘం చిత్రంలో నటించిన నటి శాలుషమ్ము. కాగా సమీపకాలంలో నటి మీరామిథున్‌ సినీ పరిశ్రమలోని ప్రముఖుల గురించి తీవ్ర విమర్శలు చేస్తున్న విషయం తెలిసిందే. ఇలా ఉచిత ప్రచారం పొందే ప్రయత్నం చేస్తున్న ఈ అమ్మడు ప్రముఖ నటుడు విజయ్, సూర్యలడా అనుచిత వ్యాఖ్యలు చేసింది. దీంతో పలువురు సినీ ప్రముఖులు ఆమె చర్యలను తీవ్రంగా ఖండిస్తున్నారు. ప్రముఖ దర్శకుడు భారతీరాజా కూడా ఇటీవల మీరామిథున్‌కు హెచ్చరికలు జారీ చేశారు. ఇలాంటి పరిస్థితుల్లో తనపై మీరామిథున్‌ హత్యా వేధింపులకు పాల్పడుతొందని శాలుషమ్ము చెన్నై పోలీస్‌ కమిషనర్‌ కార్యాలయంలో ఫిర్యాదు చేసింది. అందులో ప్రముఖ నటులపై అనుచిత వ్యాఖ్యలు చేసిన నటి మీరా మిథున్‌ చర్యలను తాను ఖండించాలని పేర్కొంది. దీంతో ఆమె తన అనుచరులతో ఫోన్‌ ద్వారా హత్యా బెదిరింపులకు పాల్పడుతోందని చెప్పింది. సినీ రంగంలో తనకు ఆమెకు మధ్య పోటీ ఉందని తెలిపింది. అయితే ఆమెకు అవకాశాలు లేకపోవడంతో తనపై అసూయ పెంచుకుందని చెప్పింది. ఇలాంటి పరిస్థితుల్లో తనను వ్యభిచారిగా చిత్రీకరించి అవకాశం లేకుండా చేసి పరిశ్రమ నుంచి తరిమికొడతానని బెదిరిస్తున్నట్లు పేర్కొంది. అదేవిధంగా సామాజిక మాధ్యమాల్లో తన ఫొటోలను పొందుపరుస్తూ కించపరిచే విధంగా వ్యాఖ్యలు చేస్తోందని చెప్పింది. దీంతో తాను తీవ్ర మనస్తాపానికి గురవుతున్నానంది. ఆత్మహత్య చేసుకోవాలని అనిపిస్తోందని చెప్పింది. కాబట్టి మీరామిథున్‌పై ఆమె అనుచరులపై తగిన చర్యలు తీసుకోవాలని ఆ ఫిర్యాదులో పేర్కొంది. 

నటి మీరా మిథున్‌ సూపర్‌స్టార్‌ రజినీకాంత్, ఇళయదళపతి విజయ్‌లను వదలడం లేదు. వివాదాలకు పెట్టింది పేరుగా ముద్రవేసుకున్న నటి మీరా. 2016లో ఫెమీనా మిస్‌ సౌత్‌గా కిరీటాన్ని గెలుచుకున్న ఈ అమ్మడు ఆ తర్వాత పలు వివాదాలతో ఆ కిరీటం కోల్పోయింది. కాగా 8 తూట్టాగల్‌ చిత్రంలో కథానాయక నటించిన మీరామిథున్‌ ఆ తర్వాత కొన్ని చిత్రాల్లో గుర్తింపు లేని పాత్రలో నటించింది. అయితే బిగ్‌బాస్‌ రియాలిటీ గేమ్‌షో లో పాల్గొని మరోసారి వివాదాలకు కేంద్రంగా మారింది. ఆ గేమ్‌ షోలో దర్శకుడు చేరన్‌ తనతో అనుచితంగా ప్రవర్తించాడని ఆరోపణలు గుప్పించడంతో పాటు ఆ షోకు వ్యాఖ్యాత గా బాధ్యతలు నిర్వహించిన కమలహాసన్‌ను ఈ అమ్మడు వదల్లేదు. దర్శకుడు చేరన్‌ చర్యలు తెలిసి కూడా కమలహాసన్‌ ఖండించలేదు అని విమర్శించింది. ఇక బిగ్‌బాస్‌ షో నుంచి వచ్చిన తర్వాత సినీ అవకాశాలు ముంగిట వాలతాయని భావించిన మీరా మిథున్‌కు అక్కడ నిరాశే ఎదురైంది. దీంతో తనను తమిళ చిత్ర పరిశ్రమ పట్టించుకోవడంలేదని, బాలీవుడ్లో సెటిల్‌ కానున్నట్లు స్టేట్‌మెంట్‌ ఇచ్చింది. తనకు హిందీ చిత్రాల్లో అవకాశాలు వస్తున్నట్లు ప్రచారం చేసుకుంది. అయితే బాలీవుడ్లోనూ ఈ అమ్మడిని పట్టించుకున్న నాథుడే లేడు. దీంతో ఇప్పుడు తమిళ చిత్ర ప్రముఖులపై ఆరోపణలు చేస్తూ కాలం గడుపుతోంది. కోలీవుడ్లో తన ఎదుగుదలను నటుడు రజనీకాంత్, విజయ్‌ అడ్డుకుంటున్నారంటూ సంచలన ఆరోపణలు చేస్తూ సోమవారం తన ట్విట్టర్‌లో పేర్కొంది. అందులో తమిళనాడు తమిళులకు హిందువులకు చెందిందని, అయితే ఇక్కడ మలయాళీలు క్రిస్టియన్‌ ఆధిపత్యం సాగుతోందని వివాదాస్పద వ్యాఖ్యలు చేసింది. కండక్టర్‌ రజనీకాంత్, క్రిస్టియన్‌ విజయ్‌ తన పేరును చెడగొట్టే ప్రయత్నాలు చేస్తున్నారని ఆరోపించింది. సైబర్‌ కేసులను చట్టపరంగా ఎదుర్కొంటానని పేర్కొంది. ఇవన్నీ భగవంతుడు చూస్తున్నాడని అంది. కాబోయే తమిళనాడు ముఖ్యమంత్రి తానేనంటూ ట్విట్టర్లో పేర్కొంది. అదేవిధంగా కన్నగి మదురైని దహించినట్టుగా తాను తమిళనాడును దహించి వేస్తానని మరోసారి పేర్కొంది. ఇలా ఒకదానికి ఒకటి సంబంధంలేని వ్యాఖ్యలు చేస్తూ వివాదాస్పద వ్యాఖ్యలతో పబ్లిసిటీ పొందాలని చూస్తున్న నటి మీరామిథున్‌పై ఇప్పుడు రజనీకాంత్, విజయ అభిమానులు ఆగ్రహంతో మండి పడుతున్నారు. ట్విట్టర్‌లో ఆమెను ఏకేస్తున్నారు.  నటి మూడో పెళ్లిపై విమర్శలు..

చెన్నై : ‘నీకు ఆ.. అర్హతే లేదు’ అంటూ తమిళ నటి మీరా మిథున్‌ బాలీవుడ్‌ నటి కంగనా రనౌత్‌పై విరుచుకుపడింది. 8 తూటాకల్‌ తదితర కొన్ని చిత్రాల్లో నటించిన మీరా మిథున్‌ వివాదాస్పద నటిగా ముద్ర వేసుకుంది. ఫ్యాషన్‌ షో నిర్వహించి పలు ఆరోపణలను మూటకట్టుకుంది. ఈమెపై పలు కేసులు కూడా నమోదయ్యాయి. ఇటీవల బిగ్‌బాస్‌ 3 రియాలిటీ షో లో కూడా పాల్గొని తనదైన ముద్ర వేసింది. ఎప్పుడూ ఏదో అంశంపై స్పందిస్తూ వార్తల్లో ఉండే మీరా తాజాగా బాలీవుడ్‌ నటి కంగనా రనౌత్‌పై విమర్శలు గుప్పించి వార్తల్లో నానుతోంది. నటి  కంగనా రనౌత్‌ దివంగత ముఖ్యమంత్రి జయలలిత జీవిత చరిత్రతో తెరకెక్కుతున్న తలైవి చిత్రంలో టైటిల్‌ పాత్ర  పోషిస్తున్న విషయం తెలిసిందే. కాగా ఈమె ఇటీవల బాలీవుడ్‌ నటుడు సుశాంత్‌ సింగ్‌ ఆత్మహత్య సంఘటనఫై స్పందిస్తూ వారసత్వం తారల ఆధిక్యాన్ని ఖండిస్తూ తీవ్రంగా ఆరోపణలు చేసిన విషయం తెలిసిందే. కాగా నటి మీరా మిథున్‌ కంగనా రనౌత్‌ ఫై తీవ్రంగా విమర్శలు చేసింది. అసలు నీకు జయలలిత పాత్రలో నటించే అర్హతే లేదని నటి మీరా మిథున్‌ పేర్కొంది. ఆ పాత్రకు కంగనను ఎంపిక చేయటమే పెద్ద తప్పని అంది. అదే విధంగా నటుడు సుశాంత్‌ సింగ్‌ ఆత్మహత్య వ్యవహారం ఫై అనవసరంగా వ్యాఖ్యలు చేస్తున్నావ్‌.. అంటూ దుయ్యపట్టింది. కాగా, మీరా మిథున్‌ విమర్శలపై నటి కంగన రనౌత్‌ ఎలా స్పందిస్తుందో వేచి చూడాల్సి ఉంది.  

ముంబై: నటి, ప్రముఖ మోడల్‌ మీరా మిథున్‌ తన ఫోటోలతో సోషల్‌మీడియాలో హల్‌చల్‌ చేస్తోన్నారు. మిథున్‌ ఒక ఫోటో షూట్‌ కోసం సంప్రదాయ చీర కట్టులో ఫోజులిచ్చారు. సోషల్‌ మీడియాలో యాక్టివ్‌గా ఉంటూ మిథున్‌ ప్రతి రోజు తనకు సంబంధిన ఫోటోలను షేర్‌ చేస్తూ అభిమానులను అలరిస్తూ ఉంటారు. తాజాగా జరిగిన ఫోటో షూట్‌లో ఆమె కంజీవరం చీర కట్టుకొని, నగలు ధరించి సంప్రదాయం ఉట్టిపడేలా కనిపించారు. ఫోటోలకు ఫోజులిచ్చేందుకు ఆమె కొత్త పెళ్లి కూతురిలా ముస్తాబయ్యారు. ఇందుకు సంబంధించిన ఫోటోలను మిథున్‌ తన ఇన్‌స్టాగ్రామ్‌లో పోస్ట్‌ చేశారు. దీనితో పాటు బోల్డ్‌గా కనిపించే మరికొన్ని ఫోటోలను కూడా మిథున్‌ ఒకేసారి తన అకౌంట్‌లో షేర్‌ చేశారు. (సోదరి కోసం విమానం.. ఖండించిన అక్షయ్‌) View this post on Instagram Life is a series of thousands of miracles 🤩 @makeup_artistry_by_jayanthi @vikram.vickykapoor @ankaleshwargaddam_official A post shared by Meera Mitun (@meeramitun) on May 31, 2020 at 6:45am PDT View this post on Instagram En Nenjil Aanantha koothachu 🤫@vikram.vickykapoor @makeup_artistry_by_jayanthi @ankaleshwargaddam_official A post shared by Meera Mitun (@meeramitun) on May 30, 2020 at 6:57am PDT మొదట మోడల్‌గా తన కెరీర్‌ను ప్రారంభించిన మిథున్‌ తరువాత సినిమాల్లో సపోర్టింగ్‌ యాక్టర్‌గా నటించారు. 2017లో ‘8తొట్టకల్’‌ సినిమాలో మొదటిసారి నటించారు. అయితే తమిళ్‌ బిగ్‌బాస్‌3 లో పాల్గొన్న మిథున్‌ అనేక వివాదాలతో పాపులర్‌ అయ్యారు.  View this post on Instagram I am bringing sexy back 😉 A post shared by Meera Mitun (@meeramitun) on May 6, 2020 at 6:07am PDT

తమిళనాడు, పెరంబూరు:  ‘నాకిక్కడ రక్షణ లేదు.. పోలీసులు లంచాలు పుచ్చుకుని నాపై తప్పుడు కేసులు పెడుతున్నారు. తాను వేరే రాష్ట్రానికి వెళ్లిపోతాను. త్వరలో రాజకీయాల్లోకి వస్తాను’ అని సంచలన వ్యాఖ్యలు చేసంది నటి మీరామిథున్‌. మోడలింగ్‌ రంగం నుంచి సినీరంగానికి పరిచయం అయిన నటి మీరామిధున్‌. అందాల పోటీల్లో విస్‌ సౌత్‌ ఇండియా కిరీటాన్ని గెలుచుకున్న ఈ అమ్మడు, ఆ తరువాత తనే సొంతంగా అందాల పోటీలను నిర్వహించడానికి సిద్ధం అయ్యి పలు విమర్శలను ఎదుర్కొనడంతో పాటు గెలుచుకున్న మిస్‌ సౌత్‌ ఇండియా కిరీటాన్ని కోల్పోయింది. అదేవిధంగా అందాల పోటీలు నిర్వహిస్తున్నట్లు చెప్పి పలువురి వద్ద డబ్బు వసూలు చేసి, ఆ పోటీలను నిర్వహించకపోవడంతో ఈ అమ్మడిపై పోలీస్‌స్టేషన్‌లో పలు ఫిర్యాదులు నమోదయ్యాయి. ప్రస్తుతం ఆ కేసులను ఎదుర్కొంటున్న నటి మీరా మిథున్‌ ఇటీవలే ముగిసిన నటుడు కమలహాసన్‌ వ్యాఖ్యాతగా వ్యవహరించిన బిగ్‌బాస్‌ సీజన్‌ 3లో పాల్గొంది. ఆ హౌస్‌లోనూ దర్శకుడు చేరన్‌పై ఆరోపణలు చేసి వివాదాస్పదంగా మారిన మీరామిథున్‌ తాజాగా బిగ్‌బాస్‌ రియాలిటీ గేమ్‌ షో నిర్వాహకులపై ఆరోపణలు గుప్పించింది. శనివారం సాయంత్రం చెన్నైలో మీడియా సమావేశాన్ని ఏర్పాటు చేసిన ఈ అమ్మడు మాట్లాడుతూ తాను బిగ్‌బాస్‌ సీజన్‌ 3లో పాల్గొని అందులోంచి బయటకు వచ్చి రెండు నెలలు కావొచ్చిందని అంది. అయినా తాను బిగ్‌బాస్‌ రియాలిటీ గేమ్‌ షోలో పాల్గొనందుకు గానూ, ఆ గేమ్‌ షో నిర్వాహకులు తనకు ఒక్క పైసా కూడా ఇవ్వలేదని ఆరోపించింది. ఈ విషయమై విజయ్‌ టీవీ నిర్వాహ సంస్థకు వెళ్లి అడగ్గా అక్కడ ఎవరూ సరిగా బదులివ్వలేదని చెప్పింది. అది మోసపూరిత చర్యగా అనిపించిందని అంది. అదేవిధంగా తన గురించి తప్పుడు ప్రచారం చాలానే జరుగుతోందని ఆరోపించింది. మొత్తం మీద తమిళనాడులో నివశించడానికి తనకు రక్షణ లేని పరిస్థితి నెలకొందని వాపోయ్యింది. అందుకే వేరే రాష్ట్రానికి వెళ్లితేనే సురక్షితంగా జీవించగలనంది. ఇక్కడ పోలీసులు లంచం తీసుకుని తనపై తప్పుడు కేసులు బనాయిస్తున్నారని ఆరోపించింది. కాగా  సామాజిక అవగాహన కలిగించాలనీ, అందుకోసం త్వరలోనే రాజకీయాల్లోకి రానున్నానని చెప్పింది. అయితే ఏ పార్టీలో చేరతానన్నది ఇప్పుడే చెప్పనని నటి మీరామిథున్‌ పేర్కొంది.

‘‘హిందీ పరిశ్రమలో బంధుప్రీతి బాగా ఎక్కువ. వారసులకు ఇచ్చిన ప్రాధాన్యం బయటి నుంచి వచ్చినవారికి ఇవ్వరు’’ అని కథానాయిక కంగనా రనౌత్‌ విమర్శనాస్త్రాలు విసురుతుంటారు. ఇప్పుడు తమిళ పరిశ్రమలో ‘నెపోటిజమ్‌’ (బంధుప్రీతి) వివాదం మొదలైంది. ‘‘ఇక్కడ వారసులదే హవా. ప్రతిభను పట్టించుకోరు. బిగ్‌ డాడీ (కమల్‌ని ఉద్దేశించి మీరా ఇలా అంటారట)కి, చిత్రపరిశ్రమలోని పెద్దలకు వారసులు చాలు. పైగా ఎవరైనా (బయటనుంచి వచ్చిన ఆర్టిస్టులు) పాపులర్‌ అవుతుంటే భరించలేరు. వాళ్లు యాక్ట్‌ చేసిన సీన్స్‌ని కత్తిరించేస్తారు. సినిమాలు చేజారేలా చేస్తారు’’ అని తమిళ నటి మీరా మిథున్‌ సోషల్‌ మీడియా సాక్షిగా ఆరోపణలు చేశారు. మోడల్‌గా కెరీర్‌ ఆరంభించి, ‘8 తోటాక్కళ్‌’ (2017)తో సినిమా కెరీర్‌ మొదలుపెట్టారామె. ఆ తర్వాత నాలుగైదు సినిమాల్లో నటించిన మీరా ప్రస్తుతం  కమల్‌హాసన్‌ హోస్ట్‌ చేస్తున్న తమిళ ‘బిగ్‌ బాస్‌ 3’లో పాల్గొన్నారు. హౌస్‌ నుంచి బయటకు వచ్చేశారు కూడా. ‘బిగ్‌ బాస్‌ 3’ మీరాకి  కావాల్సినంత క్రేజ్‌ని తెచ్చింది. ఈ క్రేజ్‌తో తమిళంలో చాలా అవకాశాలు వస్తాయని కూడా ఊహించారామె. దానికి తగ్గట్టే మీరాకి అవకాశాలు వస్తున్నాయి. అయితే ‘అగ్ని శిరగుగళ్‌’ అనే íసినిమాలో నటించే అవకాశం వచ్చినట్లే వచ్చి చేజారింది. ఆ తర్వాత ఆ సినిమాలో అక్షరాహాసన్‌ని కథానాయికగా తీసుకున్నారు. ‘‘కోలీవుడ్‌లో నెపోజిటమ్‌ ఏ స్థాయిలో ఉందో ఇప్పుడు బాగా స్పష్టం అయిపోయింది. ఈ సినిమా నుంచి నన్ను తప్పించడానికి కమల్‌హాసన్‌ కారణం అయ్యుంటారు. ఎందుకంటే ఆయన సొంత కూతురు అక్షరాహాసన్‌ని తీసుకున్నారు. అక్షరాకి కొంచెం కూడా గిల్టీ అనిపించడంలేదా? నవీన్‌ (చిత్రదర్శకుడు), టి. శివమ్మా (నిర్మాత).. మీ ఇద్దరి ద్వంద్వ వైఖరి నాకు అర్థమైంది’’ అని మీరా మిథున్‌ ట్వీటర్‌లో పేర్కొన్నారు. అందుకు బదులుగా ‘‘మీరా మిథున్‌ని ఈ చిత్రంలో నటింపజేయాలని అనుకోలేదు. మాతో మాట కూడా చెప్పకుండా తనంతట తనే ఈ సినిమా చేస్తున్నట్లు మీడియాకి చెప్పింది. కానీ నేను వివాదం చేయదలచుకోలేదు. అందుకని మాట్లాడలేదు. మేం ముందు షాలినీ పాండేని అనుకున్నాం. ఇప్పుడు తన స్థానంలో అక్షరాహాసన్‌ని తీసుకున్నాం’’ అని ట్వీటర్‌ ద్వారా నవీన్‌ పేర్కొన్నారు. అయితే  మీరా మిథున్‌ జిమ్నాస్ట్‌ కాబట్టి, ఈ యాక్షన్‌ థ్రిల్లర్‌లో తనని తీసుకోవాలనుకుంటున్నాం అని  నవీన్‌ చెప్పిన ఇంటర్వ్యూని బయటపెట్టారు మీరా. ‘‘ఈ ఇంటర్వ్యూ ఇచ్చిన సంగతి మీకు గుర్తుందా? లేక ప్రెస్‌ కూడా అబద్ధం ఆడిందంటారా? ఏంజెలినా జోలీ (హాలీవుడ్‌ నటి) లాంటి నటి కావాలని నన్ను తీసుకుంటున్నట్లు మీరు చెప్పిన విషయం మరచిపోయారా? మీకు జ్ఞాపకశక్తికి సంబంధించిన సమస్య ఏమైనా ఉందేమో! అందుకే నేను గుర్తు చేస్తున్నాను’’ అంటూ మీరా ఘాటుగా స్పందించారు. అంతేకాదు.. ఓ పురుషుడివి అయ్యుండి నిజం చెప్పడానికి గట్స్‌ లేవా అంటూ ఓ ఇంటర్వ్యూలో నవీన్‌ని ఉద్దేశించి అన్నారు మీరా. అందుకు నవీన్‌ స్పందిస్తూ – ‘‘మగవాడిగా పుట్టినందుకు గర్వపడే వ్యక్తిని కాదు నేను. స్త్రీలు అయినప్పటికీ మా అమ్మ, సోదరి, నా భార్య నాకన్నా గట్స్‌ ఉన్నవాళ్లు. మీకేదో సమస్య ఉందనుకుంటా మీరా.. డాక్టర్‌ని సంప్రదించండి. మీ ‘సిల్లీ ట్వీట్స్‌’కి ఇదే నా చివరి సమాధానం. శుభాకాంక్షలు’’ అన్నారు. ‘‘మాటలు జాగ్రత్త. ఒక స్త్రీని డాక్టర్‌ని కలవమని చెప్పే అధికారం మీకెవరు ఇచ్చారు? ‘అగ్ని శిరగుగళ్‌’ సినిమా గురించి, నా పాత్ర గురించి మనం మాట్లాడినట్లు నిర్ధారించడానికి నా దగ్గర ఆడియో ఉంది. అది కనుక నేను బయటపెడితే మీకొక్కరికే కాదు మీ కుటుంబంలో ఉన్న స్త్రీల మీద కూడా ఆ ప్రభావం పడుతుంది. మరి.. నేను బయటపెట్టనా? ఎదుర్కొనే గట్స్‌ మీకున్నాయా?’’ అని ట్వీట్‌ చేశారు మీరా. అందుకు నవీన్‌ నుంచి సమాధానం రాకపోవడంతో ‘‘ఏమైంది నవీన్‌ కుమార్‌. ఎందుకు సైలెంట్‌ అయిపోయారు. సవాల్‌ని ఎదుర్కోకుండా ఎందుకు మౌనంగా ఉన్నారు’’ అని ట్వీట్‌ చేశారు మీరా.ఇలా వాడివేడి ట్వీట్స్‌తో మీరా మిథున్‌ టాక్‌ ఆఫ్‌ కోలీవుడ్‌ అయ్యారు. అయితే ఈ వివాదం గురించి మంగళవారం సాయంత్రం వరకూ కమల్, అక్షరా నుంచి ఎలాంటి స్పందన లేదు. మరి.. స్పందిస్తారో? సైలెంట్‌గా ఉండిపోతారో చూడాలి.

చెన్నై, టీ.నగర్‌: తమినాడు రాష్ట్రంలో శాంతి భద్రతలు పూర్తిగా క్షీణించినట్లు నటి మీరా మిథున్‌ అన్నారు. తానా సేంద కూట్టం వంటి చిత్రాల్లో నటించారు మీరామిథున్‌. మోడల్‌ అయిన ఈమె బ్యూటీ కాంటెస్ట్‌లో గెలుపొంది అవార్డును అందుకున్నారు. తర్వాత అనేక వివాదాల కారణంగా అవార్డు ఉపసంహరించుకోబడింది. మొదట్లో అందాల పోటీలు జరపనున్నట్లు తెలిపి పలువురు మహిళల వద్ద నగదు మోసం చేసినట్లు ఫిర్యాదుల్లో చిక్కుకున్నారు. దీంతో ఆమెకు అందజేసిన మిస్‌ సౌత్‌ ఇండియా బ్యూటీ అవార్డు వెనక్కి తీసుకున్నారు. బిగ్‌బాస్‌ కార్యక్రమంలోనూ పాల్గొన్నారు. దీని ద్వారా చేరన్‌పై పరువునష్టం ఫిర్యాదు చేయడంతో బిగ్‌బాస్‌ హౌస్‌ నుంచి ఆమెను తొలగించారు. ఆమెపై హత్యా బెదిరింపుల కేసు కూడా నమోదైంది. మీరామిథున్‌ ప్రస్తుతం పోలీసు శాఖపై ట్విటర్‌లో విమర్శలు చేశారు. అన్నా ద్రావిడ మున్నేట్ర కళగం ఉక్కు మహిళ మృతి తర్వాత రాష్ట్రంలో శాంతి భద్రతలు పూర్తిగా క్షీణించాయని అన్నారు. చదువుకున్నవారు రాష్ట్రాన్ని పాలించాలని, రాజకీయనేతగా ఉండేందుకు ఇదే పెద్ద అర్హతన్నారు. రాష్ట్రంలో క్షీణిస్తున్న శాంతి భద్రతలపై సీఎం దృష్టి సారించాలని కోరారు. రాష్ట్రంలో మహిళలపై అకృత్యాలు, అవినీతి పెచ్చుమీరాయన్నారు. తమిళనాడు పోలీసులు క్రిమినల్స్‌తో స్నేహం చేస్తున్నారని, తన ఫిర్యాదులపై కమిషనర్‌ సహా ఏ పోలీసు అధికారి చర్యలు తీసుకోలేదని విమర్శించారు. పోలీసుల వైఖరితో మనోవేదనకు గురైనట్లు తెలిపారు.

తమిళనాడు, పెరంబూరు: బిగ్‌బాస్‌ హౌస్‌లోకి మరోసారి పోలీసులు ప్రవేశించారు. దీంతో ఆ హౌస్‌లో కలకలం రేగింది. బిగ్‌బాస్‌ రియాలిటీ గేమ్‌ షో మొదటి నుంచి చర్చనీయాంశంగానే ఉంది. రియాలిటీ షో తొలి సీజన్‌లోనే నటి ఓవియా, నటుడు ఆరవ్‌ ప్రేమ వ్యవహారం పెద్ద చర్చకు దారితీసింది. ఆరవ్‌ పెళ్లి చేసుకుంటానని చెప్పి మోసం చేశాడన్న మనస్థాపంతో ఓవియా ఆత్మహత్యాయత్నానికి ప్రయత్నించిందనే ప్రచారం హోరెత్తింది. ఓవియను అంబులెన్స్‌లో ఆస్పత్రికి కూడా తీసుకెళ్లారు. పోలీసులు రంగప్రవేశం చేశారు. ఆ తరువాత గత ఏడాది జరిగిన సీజన్‌– 2లోనూ నటుడు దాడి బాలాజీ, భార్య వివాదం చర్చనీయాంశమైంది. ప్రస్తుతం జరుగుతున్న సీజన్‌– 3లో పాల్గొన్న నటి వనితావిజయకుమార్‌ తన కూతురిని కిడ్నాప్‌ చేసిందన్న ఆరోపణతో హైదరాబాద్‌ పోలీసులు, చెన్నై పోలీసులు విచారణలో భాగంగా బిగ్‌బాస్‌ హౌస్‌లోకి ప్రవేశించారు. ఆ సమయంలో నటి వనితావిజయకుమార్‌ అరెస్ట్‌ అయ్యే అవకాశం ఉందనే ప్రచారం జరిగింది. అయితే ఆమె కూతురు వాగ్మూలంతో వనితా విజయకుమార్‌ అరెస్ట్‌ నుంచి తప్పించుకుంది. తాజాగా నటి మీరా మిథున్‌ డబ్బు మోసం కేసులో పోలీసులు బిగ్‌బాస్‌ హౌస్‌లోకి ప్రవేశించారు. ఈ గేమ్‌ షోలో పాల్గొన్న నటి మీరా మిథున్‌ ఇటీవల దక్షిణ భారత అందాల పోటీలను నిర్వహించతలపెట్టి పోలీస్‌కేసుల వరకూ వెళ్లి వివాదాల నటిగా పేరు తెచ్చుకుంది. తరువాత ఈ అమ్మడు ఒక వ్యక్తికి అందాల పోటీలకు డిజైనర్‌గా అవకాశం ఇస్తానని చెప్పి రూ.50 వేలు అతని నుంచి తీసుకుందట. డిౖజైనింగ్‌ పని ఇవ్వలేదు, తీసుకున్న డబ్బు ఇవ్వలేదంటూ ఆ వ్యక్తి తేనంపేట పోలీస్‌స్టేషన్‌లో ఫిర్యాదు చేశారు. ఈ కేసు విచారణలో ఉంది. దీంతో నటి మీరా మిథున్‌ పోలీసులు తను అరెస్ట్‌ చేయకుండా చెన్నై హైకోర్టులో ముందస్తు బెయిల్‌ కోసం పిటిషన్‌ దాఖలు చేసుకుంది. అందులో తాను మోసం చేశానన్న ఆరోపణలో నిజం లేదని, ప్రస్తుతం బిగ్‌బాస్‌ హౌస్‌లో ఉన్నానని, బయటకు రాగానే తనపై కేసును చట్టపరంగా ఎదుర్కొంటానని, పోలీసుల విచారణకు సహకరిస్తానని పేర్కొంది. దీంతో ఈ అమ్మడికి ముందస్తు బెయిల్‌ను కోర్టు మంజూరు చేయడంతో ఊపిరి పీల్చుకుంది. అటాంటిది గురువారం అనూహ్యంగా పోలీసులు నటి మీరామిథున్‌ను విచారించడానికి బిగ్‌బాస్‌ హైస్‌లోకి ప్రవేశించారు. దీంతో నటి మీరామిథున్‌ అరెస్ట్‌ అవుతుందా? అనే ప్రశ్న తలెత్తుతోంది. ఆమెను అరెస్ట్‌ చేసే విషయాన్ని మాత్రం పోలీసులు నిర్దారించలేదు. మొత్తం మీద బిగ్‌బాస్‌ హౌస్‌లో మరోసారి కలకలానికి దారి తీసింది ఈ సంఘటన.

తమిళనాడు, పెరంబూరు: నటి మీరా మిథన్‌కు మద్రాసు హైకోర్టు నిబంధనలతో కూడిన ముందస్తు బెయిల్‌ను మంజూరు చేసింది. ఫిర్యాదులు, కేసులంటూ అంటూ సంచలన నటిగా మారిన మీరామిథున్‌కు చెన్నై హైకోర్టులో కాస్త ఊరట లభించింది. దీంతో బిగ్‌బాస్‌ గేమ్‌షో నిర్వాహకులు ఊపిరి పీల్చుకున్నారు. ఎందుకంటే ఈ అమ్మడిప్పుడు బిగ్‌బాస్‌ హౌస్‌లో ఉంది కాబట్టి. ఇదే బిగ్‌బాస్‌ రియాలిటీ గేమ్‌ షో 3లో పాల్గొన్న నటి వనితావిజయకుమార్‌ను ఆ మధ్య తన కూతురు కేసు వ్యవహారంలో తెలంగాణ పోలీసులు, చెన్నై పోలీసులు విచారణకు బిగ్‌బాస్‌ హౌస్‌లోకి రావడంతో కలకలం రేగింది. అయితే వనితా విజయకుమార్‌ కూతురు ఆమె వద్దనే ఉంటానని వాగ్మూలం ఇవ్వడంతో వివాదం సమిసిపోయింది. లేకుంటే వనితావిజయకుమార్‌ను పోలీసులు అరెస్ట్‌ చేసేవరకూ పరిస్థితి వెళ్లేది. అలాంటి పరిస్థితి నటి మీరా మిథున్‌ విషయంలోనూ తలెత్తింది. బిగ్‌బాస్‌ హౌస్‌లో వివాద సభ్యురాలిగా ముద్రపడిన ఈమెపై పోలీస్‌స్టేషన్‌లో నమోదైంది. నటి మీరా మిథున్‌ అందాల పోటీలను నిర్వహిస్తున్నట్లు చెప్పి తన వద్ద తీసుకున్న రూ.50 వేలను తిరిగి చెల్లించకుండా మోసం చేసిందంటూ రంజిత్‌ బండారి అనే వ్యక్తి స్థానిక తేనంపేట పోలీస్‌స్టేషన్‌లో ఫిర్యాదు చేశాడు. దీంతో మీరా మిథున్‌పై కేసు నమోదు చేసిన పోలీసులు ఆమెను అరెస్ట్‌ చేయడానికి రంగాన్ని సిద్ధం చేశారు. దీంతో నటి మీరా మిథన్‌ ముందస్తు బెయిల్‌ కోసం చెన్నైహైకోర్టును ఆశ్రయించింది. ఆమె కోర్టులో దాఖలు చేసిన పిటిషన్‌లో తనపై తప్పుడు కేసు పెట్టారని, ప్రస్తుతం తాను బిగ్‌బాస్‌ రియాలిటీ గేమ్‌ షోలో పాల్గొంటున్నానని పేర్కొంది. బయటకు రాగానే పోలీసుల విచారణకు పూర్తిగా సహకరిస్తానరి, తనపై కేసును చట్టబద్ధంగా ఎదుర్కొంటానని తెలిపింది. తనను పోలీసులు అరెస్ట్‌ చేయకుండా ముందస్తు బెయిల్‌ను మంజూరు చేయాల్సిందిగా కోరింది. నటి మీరామిథున్‌ కోరికను పరిగణనలోకి తీసుకున్న న్యాయస్థానం రూ.50 వేలు కోర్టులో జమ చేయాలని, విచారణ అధికారి సమక్షంలో సంతకం చేయాలి వంటి షరతులతో కూడిన ముందుస్త బెయిల్‌ను మంజూరు చేసింది.

చెన్నై ,పెరంబూరు: 8 తూట్టాగళ్‌ చిత్రంలో కథానాయకిగా పరిచయం అయిన నటి మీరామిథున్‌. దక్షిణ భారతీయ అందాల పోటీల్లో కిరీటాన్ని గెలుచుకుని ఈ అమ్మడు ఇటీవల సొంతంగా అందాల పోటీలను నిర్వహించ తలపెట్టి వివాదాల్లో చిక్కుకున్న విషయం తెలిసిందే. తాజాగా మరో మోసం కేసును ఎదుర్కొంటోంది. స్థానిక టీ.నగర్, ప్రకాశం వీధికి చెందిన రంజిత్‌ భద్రాశ్రీ అనే వ్యక్తి నటి మీరామిథున్‌పై పాండిబజార్‌ పోలీస్‌ స్టేషన్‌లో పిర్యాదు చేశాడు. అందులో.. తాను పూలదండల వ్యాపారం చేసుకుంటున్నానని, తనకు 2018లో నటి మీరామిథున్‌ పరిచయం అయ్యిందని  పేర్కొన్నారు. తాను మిస్‌ దక్షిణాది అందాల పోటీలో కిరీటాన్ని గెలుచుకున్నానని, త్వరలో సొంతంగా అందాల పోటీలను నిర్వహించనున్నట్లు చెప్పిందన్నారు. దానికి డిజైనింగ్‌ కాంట్రాక్ట్‌ను తనకు ఇస్తానని చెప్పి అడ్వాన్స్‌గా రూ.50 వేలు తీసుకుందన్నారు. అయితే ఆమె డిజైనింగ్‌ కాంట్రాక్ట్‌ ను తను ఇవ్వలేదని, తను నుంచి తీసుకున్న రూ.50 వేలు తిరిగి చెల్లించకుండా మోసం చేసిందని పేర్కొన్నారు. దీంతో కేసు నమోదు చేసుకున్న పోలీసులు నటి మీరామిథున్‌ను విచా రించడానికి సిద్ధం అయ్యారు. కాగా నటి మీరామిథున్‌ బిగ్‌బాస్‌ రియాలిటీ గేమ్‌ షోలో పాల్గొనడంతో ఆమెను విచారించడానికి బిగ్‌బాస్‌ హౌస్‌లోకి ప్రవేశించే విషయమై చర్చలు జరుపుతున్నట్లు తెలిసింది. ఇప్పటికే నటి వనితావిజయకుమార్‌ వ్యవహారంలో ఒకసారి పోలీసులు బిగ్‌బాస్‌ హౌ స్‌లోకి వెళ్లడం కలకలానికి దారి తీసిన విషయం తెలిసిందే. తాజాగా నటి మీరా మిథున్‌ కేసు వ్యవహారం మరోసారి కలకలానికి దారి తీస్తోంది.

చెన్నై : అందాల పోటీలు రద్దు కావడంతో కార్యక్రమ నిర్వాహకురాలు నటి మిరామిథున్‌ మీడియా ముందు కన్నీరు మున్నీరయ్యారు. దీనికి సంబంధించిన వివరాల్లోకి వెళితే...‘ 8 తోటాగళ్‌’  చిత్ర నాయకి మీరామిథున్‌ 2016 ఏడాది మిస్‌ సౌత్‌ ఇండియా అందాల పోటీల్లో పాల్గొని కిరీటాన్ని గెలుచుకోవడంతో....తనే అందాల పోటీలను నిర్వహించడానికి సిద్ధం అయ్యారు. దీంతో తనకు మిస్‌ సౌత్‌ ఇండియా పట్టాన్ని అందించిన నిర్వాహకులు ఆమెను పోటీలు నిర్వహించరాదని హెచ్చరించారు. అంతే కాకుండా తాము ఆమెకి అందించిన మిస్‌ సౌత్‌ ఇండియా కిరీటాన్ని తిరిగి తీసేసుకుని, ఆ పోటీల్లో రెండో స్థానంలో నిలిచిన నటి సనంశెట్టికి ఇస్తున్నట్లు ప్రకటించారు. ఆ పట్టాని నటి మీరామిథున్‌ ఉపయోగించుకోరాదని హెచ్చరించారు.  దీంతో వారిపై ఇటీవల నటి మీరా మిథున్‌ చెన్నై పోలీస్‌కమిషనర్‌ కార్యాలయంలో ఫిర్యాదు చేశారు. తాను నిర్వహించనున్న అందాల పోటీల కార్యక్రమానికి రక్షణ కల్పించాల్సిందిగా కోరారు. పోలీసులు  రక్షణ కల్పిస్తానని మాట ఇచ్చినట్లు మీడియాతో  పేర్కొన్న నటి మీరామిథున్‌ సోమవారం తాను నిర్ణయించినట్లుగా స్థానిక వడపళనిలోని ఒక నక్షత్ర  హోటళ్‌లో అందాల పోటీల ఏర్పాటుకు అన్ని సన్నాహాలు చేసుకున్నారు. అలాంటిది  అందాల పోటీలు జరగలేదు. ఈ విషయమై నటి మీరామిథున్‌  స్థానిక మైలాపూర్‌లో మీడియాతో తన గోడును వెల్లబోసుకున్నారు. తాను రెండు రోజులుగా రేయింబవళ్లు కష్టపడి అందాల పోటీలకు అన్ని ఏర్పాట్లను చేసుకున్నానని.. పోటీల్లో పాల్గొనడానికి 11 మంది మోడల్స్‌ సిద్ధం అయ్యారని చెప్పారు. సోమవారం  ఉదయం ఆర్గనైజర్లకు ఫోన్‌ చేయగా వారు ఫోన్‌ లిఫ్ట్‌ చేయలేదన్నారు. దీంతో తానే స్వయంగా వెళ్లి వారిని కలవగా అందాల పోటీలను నిర్వహించరాదని చెప్పారన్నారు. అంతేగాకుండా ఇద్దరు పోలీసులతో హోటల్‌కు వచ్చి తనను బెదిరించారని కంటతడి పెట్టారు. త్వరలో మళ్లీ అందాల పోటీలు నిర్వహించి తీరుతానని అన్నారు. 

పెరంబూరు: హత్యాబెదిరింపులపై నటి మీరామిథున్‌ చెన్నై పోలీస్‌కమిషనర్‌ కార్యాలయంలో ఫిర్యాదు చేసింది. వివరాలు చూస్తే 8 తోట్టాగళ్, తానా సేర్నద కూట్టం చిత్రాల్లో నటించిన నటి మీరామిథున్‌. ఈమె గురువారం ఉదయం 11గంటల ప్రాంతంలో స్థానిక వెప్పేరిలోని పోలీస్‌కమిషనర్‌ కార్యాలయంలో ఫిర్యాదు చేసింది. అంతకుముందు మీడియాతో మీరామిథున్‌ మాట్లాడుతూ తాను ఎంతో పారాడి మిస్‌ సౌత్‌ఇండియన్‌ కిరీటాన్ని గెలుచుకున్నానని చెప్పింది. అలా అందాల పోటీల్లో పాల్గొని కిరీటం గెలుచుకోవడం సులభమైన విషయం కాదంది. 15 ఏళ్లగా జరుగుతున్న మిస్‌ సౌత్‌ఇండియన్‌ పోటీల్లో తొలిసారిగా కిరీటం గెలుచుకున్న మహిళను తానేనని చెప్పింది. తన మాదిరి తమిళ యువతులు కష్టపడరాదన్న తలంపుతో తానే అందాల పోటీలను నిర్వహించడానికి సిద్ధం అయ్యానని చెప్పింది. మిస్‌ తమిళ్‌ దివా పేరుతో సోమవారం ఈ అందాల పోటీలను నిర్వహించనున్నట్లు చెప్పింది. ఈ పోటీలను నిర్వహించకూడదంటూ ఇతర రాష్ట్రాల నుంచి తనకు పలు బెదిరింపు ఫోన్లు వస్తున్నాయని చెప్పింది. ఈ పోటీల్లో పాల్గొనే మహిళలకు బెదిరింపు పోన్లు వస్తున్నాయని తెలిపింది. ఆరు నెలలుగా తాను వస్తున్న ఇలాంటి ఫోన్లను పక్కన పెడుతూ వచ్చానని,  వారం రోజులుగా తనకు హత్యాబెదిరింపు కాల్స్‌ వస్తున్నాయని చెప్పింది. దీంతో ఈ రోజు పోలీస్‌కమిషనర్‌ కార్యాలయంలో ఫిర్యాదు చేయడానికి వచ్చానని తెలిపింది. తాను నిర్వహించనున్న అందాల పోటీలకు పోలీసులు భద్రత కల్పిస్తారనే నమ్మకం ఉందని నటి మీరామిథున్‌ పేర్కొంది. మీరామిథున్‌ బాలీవుడ్‌ గాయకుడి పేరుతో మోసం పెరంబూరు: మోసపోయేవాళ్లు ఉన్నంత వరకూ మోసగాళ్లు పెరుగుతూనే ఉంటారు. ఏ విషయంలోనైనా జాగ్రత్త వహించాల్సి ఉంటుంది. లేకుంటే ఈ విధంగా మోసపోతుంటారు. కోవై, ఉళుందూర్‌కు చెందిన మహేంద్రవర్మన్‌ అనే బీఎడ్‌ పట్టభద్రుడు బాలీవుడ్‌ ప్రముఖ గాయకుడు అర్మాన్‌మాలిక్‌ పేరుతో నకిలీ ఫేస్‌బుక్‌ను రూపొందించి యువతులను బెదిరించి సొమ్ము చేసుకునేందుకు ప్రయత్నించాడు. హింది గాయకుడి పేరుతో నకిలీ ఫేస్‌బుక్‌ను ప్రారంభించి తద్వారా యువతులను ఆకర్షించాడు. ఆ తరువాత వారితో స్నేహం చేసి ట్విట్టర్‌ ద్వారా వారి ఆంతరంగిక ఫొటోలను రాబట్టుకున్నాడు. ఆ ఫొటోలను మార్ఫింగ్‌ చేసి ఫేస్‌బుక్‌లో పోస్ట్‌ చేస్తానని బెదిరించి వారి నుంచి డబ్బు గుంజుతున్నాడు. ఈ విధంగా 15 మంది వద్ద రూ.50 లక్షల వరకు దోచుకున్నాడు. అతని బాధితురాలైన కోవైకు చెందిన ఒక యువతి ధైర్యం చేసి కోవై నేర పరిశోధనా శాఖ పోలీసులకు ఫిర్యాదు చేసింది. కేసు నమోదు చేసిన ఇన్‌స్పెక్టర్‌ యమున, సబ్‌ఇన్‌స్పెక్టర్‌ అరుణ్‌ నిందితుడిని పట్టుకునేందుకు పకడ్బందీగా పథకం రూపొందించారు. ఫిర్యాదు చేసిన యువతిని మహేంద్రవర్మన్‌తో మాట్లాడించి డబ్బు ఇస్తానని ఒక చోటుకు రావలసిందిగా చెప్పించారు. బుధవారం అతను ఆ యువతి చెప్పిన ప్రాంతానికి రాగా అక్కడ దాగిఉన్న పోలీసులు చుట్టుముట్టి అరెస్ట్‌ చేశారు. విచారణలో మహేంద్రవర్మన్‌ గత ఏదాడిన్నరగా మహిళలను ఇలాంటి బెదిరింపులకు గురి చేస్తూ డబ్బు గుంజుతున్నట్లు తెలిసింది. దీంతో అతనిపై నమోదు చేసి విచారిస్తున్నారు.  

గ్లామర్‌ అంటే భయపడి పారిపోయే దానిని కానని అంటోంది నటి మీరా మిథున్‌. మోడలింగ్‌ రంగం నుంచి సిల్వర్‌స్క్రీన్‌లో రాణించాలని ఆరాటపడుతున్న బ్యూటీ ఈమె. ఇప్పటికే కోలీవుడ్‌లో రెండు చిత్రాల్లో నటించిన మీరా మిథున్‌ ప్రస్తుతం బోదై ఏరి బుద్ధిమారి అనే చిత్రంలో నటిస్తోంది. సినిమాల్లో నటిస్తున్నా మోడలింగ్‌ను మాత్రం వదలలేదు. ప్రపంచవ్యాప్తంగా చుట్టేస్తున్న ఈ బ్యూటీ సినిమాల్లోనూ నటిగా గుర్తింపు పొందాలని ఆశిస్తోంది. ఈ సందర్భంగా ఈ అమ్మడు చెప్పిన సంగతులు చూద్దాం. బోదై ఏరి బుద్ధిమారి చిత్రం గురించి చెప్పాలంటే ఇందులో నేను చాలా అర్థవంతమైన పాత్రలో నటిస్తున్నాను. చిత్రం పేరు చూడగానే ఇదేదో మద్యం ఆరోగ్యానికి హానికరం అని సలహా ఇచ్చే కథా చిత్రం అనుకుంటే పప్పులో కాలేసినట్లే. ఇటీవల తెరపైకి వచ్చిన తడం మాదిరి ఉత్కంఠభరితంగా సాగే థ్రిల్లర్‌ కథా చిత్రంగా ఉంటుంది. ఈ చిత్ర దర్శకుడు ఇంతకు ముందు లఘు చిత్రాలను రూపొందించారు. బోదై ఏరి బుద్ధిమారి చిత్ర కథను చెప్పగానే ఈ పాత్రను నేనే చేయాలనిపించింది. అయితే చిత్రంలో ప్రతి పాత్రకు ప్రాధాన్యత ఉంటుంది. దీన్ని ఒక చక్కని దృశ్య కావ్యంగా ఛాయాగ్రాహకుడు బాలసుబ్రమణియం తీర్చిదిద్దారు. ఈ చిత్రం కాకుండా మరో మూడు చిత్రాల్లో నటించే విషయమై చర్చలు జరుగుతున్నాయి. పాత్ర కోసం గుండు కొట్టించుకోవడానికైనా సిద్ధమే. నేను జాతీయ ఉత్తమ నటి అవార్డును పొందాలన్నది మా నాన్న కల. ఆయన ఇప్పుడు లేరు. అయినా ఆ అవార్డును సాధిస్తాను. అలాంటి పాత్రలో నటించే అవకాశం వస్తే పారితోషికం లేకుండా నటించానికి రెడీ. నేను చెన్నై అమ్మాయినే. తమిళ అమ్మాయిలు గ్లామర్‌ అంటేనే చెవులు మూసుకుని పారిపోతారనుకుంటే, మోడలింగ్‌ ప్రపంచంలో లేని గ్లామరా నేను అక్కడి నుంచి వచ్చాను. కాబట్టి నాకు హద్దులు తెలుసు. గ్లామర్‌ అంటే పారిపోను. కథకు అవసరం అయితే అందాలారబోతకు సిద్ధమే అని అంటోంది నటి మీరా మిథున్‌.

సూపర్‌స్టార్‌తో రొమాన్స్‌ చేసే అవకాశాన్ని కొద్దిలో మిస్‌ అయ్యానంటోంది అందాలభామ మీరామిథున్‌. మోడలింగ్‌ రంగంలో అంతర్జాతీయస్థాయిలో క్రేజ్‌ తెచ్చుకున్న మీరామిథున్‌ ఇటీవలే సినీరంగానికి పరిచయమైంది. నటుడు సూర్య కథానాయకుడిగా నటించిన తానాసేర్నద కూట్టం చిత్రంలో నటుడు కలైయరసన్‌కు జంటగా నటించింది. అదేవిధంగా 8 తూట్టాగళ్‌ చిత్రంలోనూ ముఖ్యపాత్రను పోషించింది. మిస్‌ సౌత్‌ ఇండియా సుందరి కిరీటాన్ని గెలుచుకున్న మీరామిథున్‌ చెన్నై అగ్‌మార్క్‌ చిన్నది. చదువు, నాట్యంపైనే దృష్టి పెట్టిన మీరామిథున్‌ను ఆమె పొడవు, మేని ఛాయ మోడలింగ్‌ రంగంలోకి అడుగుపెట్టేలా చేశాయట. ఒక కార్యక్రమంలో పాల్గొన్నప్పుడు ఈ అమ్మడిని చూసిన కొందరు మీరు మోడలా అని అడిగారట. అంతే మీరా మిథున్‌కు మోడలింగ్‌ రంగంపై ఆసక్తి పెరిగిందట. అయితే ఈమె తండ్రి కూడా మిస్టర్‌ మెడ్రాస్, మిస్టర్‌ తమిళనాడు పోటీల్లో గెలుపొందారు. ఆయన కూడా మీరామిథున్‌కు స్ఫూర్తిగా నిలవడంతో కో ఆప్‌టెక్స్‌కు మోడల్‌గా తన పయనానికి శ్రీకారం చుట్టి ఆ తరువాత ప్రముఖ వ్యాపార సంస్థలకు మోడల్‌గా మారిపోయింది. దీంతో పలువురు ఒత్తడితో నటిగా సినీరంగప్రవేశం చేసింది. అలా మొట్టమొదటి సారిగా గ్రహణం చిత్రంలో మోడల్‌గా ఎంట్రీ ఇచ్చింది. పలు అవకాశాలు మీరామిథున్‌ను వెతుక్కుంటూ వస్తున్నా, అవి సంతృప్తినివ్వకపోవడంతో అంగీకరించడం లేదట. సెలక్టివ్‌ చిత్రాలనే చేస్తున్న మీరామిథున్‌ 2019లో తెరపైకి రానున్న తాను నటించిన చిత్రాలు మంచి పేరు తెచ్చిపెడతాయనే ఆశాభావంతో ఉంది. ఇకపై కూడా హీరోయినా, క్యారెక్టర్‌ ఆర్టిస్టా అన్నది చూడకుండా నటనకు అవకాశం ఉన్న ఏలాంటి పాత్రనైనా చేయడానికి రెడీ అంటున్న మీరామిథుల సమీప కాలంలో చేసిన ఒక వాణిజ్య ప్రకటనలో చాలా గ్లామరస్‌గా నటించడంతో విమర్శలను ఎదుర్కొంది.  చాలా గ్లామర్‌గా ఉన్నావంటూ ప్రశంసించిన వారు ఉన్నారంటోంది ఈ అమ్మడు. అయితే ఆ ప్రకటనలో ఎందుకు నటించాల్సి వచ్చిందన్న విషయాన్ని మీరామిథున్‌ తెలుపుతూ తనను ఫొటో తీసిన ఒక ప్రముఖ ఫొటోగ్రాఫర్‌ ఒక యాడ్‌ ఉంది నటిస్తావా అని అడిగి నువ్వు చేయకపోతే ఏ నైజీరియాకో, ఆఫ్రికాకో చెందిన మోడల్‌తో నటింపజేస్తానని, అయితే మీరైతే బాగుంటుందని అన్నాడంది. దీంతో ఆ అవకాశాన్ని వదులుకోవడానికి తనకు మనసంగీకరించకపోవడంతో ఒప్పుకున్నానని, అయినా మోడలింగ్‌ అన్నది ఒక కళ అని దాన్ని ఆ దృష్టితోనే చూడాలని పేర్కొంది. మరో విషయం ఏమిటంటే తనను సినిమాల్లోకి రావాలని చెప్పింది నటుడు విశాలే అని చెప్పింది. పేట చిత్రంలో రజనీకాంత్‌కు జంటగా త్రిష పాత్రలో తానే నటించాల్సిందని, లుక్‌ టెస్ట్, స్క్రీన్‌ టెస్ట్‌ వరకూ వెళ్లిన తరువాత ఏవో కొన్ని కారణాలతో ఆ అవకాశాన్ని మిస్‌ అయ్యానని చెప్పింది. అదేవిధంగా విక్రమ్‌ హీరోగా కమలహాసన్‌ నిర్మిస్తున్న గడారం కొండాన్‌ చిత్రంలోనూ ముఖ్యపాత్రలో నటించడానికి ఒప్పందం చేసినా, అదీ చివరి క్షణంలో మిస్‌ అయ్యిందని చెప్పింది. అయితే మిస్‌ అయిన అవకాశాలు మరో రూపంలో తనను వెతుక్కుంటూ వస్తాయన్న నమ్మకాన్ని నటి మీరామిథున్‌ వ్యక్తం చేసింది.  

తమిళసినిమా: సూర్యతో రొమాన్స్‌ చేసే లక్కీఛాన్స్‌ను నటి మీరామిథున్‌ కొట్టేసింది. మిస్‌ ఫెమీనా సౌత్‌ కిరీటాన్ని గెలుచుకున్న ఆ బ్యూటీ, మోడలింగ్‌ రంగంలో వెలిగి ప్రస్తుతం వెండి తెరపై రాణించే పనిలో పడింది. అలా 8 తూట్టాకల్‌ చిత్రంతో కోలీవుడ్‌కు పరిచయమైన ఆ తమిళ చిన్నది తొలి చిత్రంతోనే మంచి గుర్తింపు తెచ్చుకుంది. ఆ తరువాత అవకాశాలేవనుకుంటున్న సమయంలో స్టార్‌ నటుడు సూర్యతో జతకట్టే అవకాశం తలుపు తట్టిందట. ప్రస్తుతం ఆయనతో తానాసేర్న్‌ద కూటం చిత్రంలో నటిస్తోంది. అదేమిటీ ఈ చిత్రంలో కథానాయకి కీర్తీసురేశ్‌ కదా అని ఆశ్యర్యపోతున్నారా? మరేంలేదు కీర్తీతో పాటు మీరా మిథున్‌ను తానాసేర్న్‌దకూటం చిత్రంలో చూడవచ్చు. ఈ చిత్రంలో నటించడం గురించి మీరామిథున్‌ చెబుతూ సూర్యకు జంటగా ఇందులో నటించే అవకాశం రావడానికి కారణం 8 తూట్టాకల్‌ చిత్రమేనని పేర్కొంది. చాలా రోజుల క్రితం ఈ చిత్ర యూనిట్‌ తనను అప్రోచ్‌ అయ్యారని చెప్పింది. ఇందులో తన పాత్ర ఏమిటన్నది ప్రస్తుతానికి చెప్పను గానీ, పాత్ర చాలా ఆసక్తిగా ఉంటుందని చెప్పింది. తానా సేర్న్‌దకూటం చిత్రంలో సూర్యతో కలిసి నటించడం చాలా హ్యాపీగా ఉందని అంది. నటి నయనతార లవర్‌గా ప్రచారంలో ఉన్న విఘ్నేశ్‌ శివ దర్శకత్వం వహిస్తున్న ఈ చిత్రాన్ని సూర్య చిత్ర నిర్మాణ సంస్థ 2డీ ఎంటర్‌టెయిన్‌మెంట్‌ నిర్మిస్తున్న విషయం తెలిసిందే. చిత్ర నిర్మాణ కార్యక్రమాలు తుది దశకు చేరుకున్న ఈ చిత్రాన్ని సంక్రాంతి బరిలోకి దింపడానికి  సన్నాహాలు చేస్తున్నారని సమాచారం.

తమిళ సినిమా: తొలి సినిమాతో మంచి పేరు తెచ్చుకున్న నటి మీరామిథున్‌ లక్కీ చాన్స్‌ కొట్టేసింది. మిస్‌ ఫెమీనా సౌత్‌ కిరీటాన్ని గెలుచుకున్న ఈ బ్యూటీ.. ఆ తర్వాత మోడలింగ్‌ రంగం నుంచి చిత్ర పరిశ్రమలోకి అడుగుపెట్టింది. '8 తూట్టాకల్‌' చిత్రంతో కోలీవుడ్‌కు పరిచయమైన మీరాకు తొలిచిత్రంతోనే మంచి గుర్తింపు తెచ్చుకుంది. ఆ తరువాత అవకాశాలు లేవనుకుంటున్న సమయంలో ఏకంగా స్టార్‌ హీరో సూర్యతో జతకట్టే అవకాశం తలుపు తట్టింది. ఇంతకంటే లక్కీ చాన్స్‌ ఏముంటుంది. సూర్య హీరోగా ప్రస్తుతం తెరకెక్కుతున్న 'తానాసేర్న్‌ద కూటం' చిత్రంలో ఈ అమ్మడు నటిస్తోంది. ఈ చిత్రంలో కథానాయికగా కీర్తీసురేశ్‌ నటిస్తుండగా.. మరో హీరోయిన్‌గా మీరా మిథున్‌ నటిస్తోంది. సూర్య సరసన నటించే అవకాశం రావడానికి కారణం తన తొలి చిత్రమేనని, చాలారోజుల క్రితం ఈ చిత్ర యూనిట్‌ తనను అప్రోచ్‌ అయిందని మీరా మిథున్‌ తెలిపింది. ఈ సినిమాలో తన పాత్ర ఏమిటన్నది ప్రస్తుతానికి చెప్పనని, కానీ, తన పాత్ర చాలా ఆసక్తిగా ఉంటుందని చెప్పింది.  ఈ చిత్రంలో సూర్యతో కలిసి నటించడం చాలా హ్యాపీగా ఉందని తెలిపింది. నటి నయనతార లవర్‌గా ప్రచారంలో ఉన్న విఘ్నేశ్‌ శివ దర్శకత్వం వహిస్తున్న ఈ చిత్రాన్ని సూర్య చిత్ర నిర్మాణ సంస్థ 2డీ ఎంటర్‌టెయిన్‌మెంట్‌ నిర్మిస్తోంది. చిత్ర నిర్మాణ కార్యక్రమాలు తుది దశకు చేరుకున్నాయి. సంక్రాంతి బరిలోకి ఈ సినిమా దింపడానికి చిత్ర వర్గాలు సన్నాహాలు చేస్తున్నాయి.