పారిస్‌: టెన్నిస్‌ సీజన్‌ రెండో గ్రాండ్‌స్లామ్‌ టోర్నమెంట్‌ ఫ్రెంచ్‌ ఓపెన్‌ సంచలన ఫలితాలతో ప్రారంభమైంది. టోర్నీ మొదటి రోజు ఆదివారం మహిళల సింగిల్స్‌లో 2016 చాంపియన్, పదో సీడ్‌ గార్బిన్‌ ముగురుజా (స్పెయిన్‌), ఆరో సీడ్‌ ఆన్స్‌ జెబర్‌ (ట్యూనిసియా) తొలి రౌండ్‌లోనే ఇంటిముఖం పట్టారు. ప్రపంచ 46వ ర్యాంకర్‌ కయా కనెపి (ఎస్టోనియా) 2–6, 6–3, 6–4తో పదో ర్యాంకర్‌ ముగురుజాను ఓడించగా... ప్రపంచ 52వ ర్యాంకర్‌ మాగ్దా లినెట్‌ (పోలాండ్‌) 3–6, 7–6 (7/4), 7–5తో ఆరో ర్యాంకర్‌ ఆన్స్‌ జెబర్‌పై విజయం సాధించి రెండో రౌండ్‌కు చేరుకున్నారు. 2011 జూనియర్‌ ఫ్రెంచ్‌ ఓపెన్‌ చాంపియన్‌గా నిలిచిన ఆన్స్‌ జెబర్‌ ఇటీవల మాడ్రిడ్‌ ఓపెన్‌–1000 టోర్నీలో టైటిల్‌ సాధించడంతోపాటు ఇటాలియన్‌ ఓపెన్‌లో రన్నరప్‌గా నిలిచింది. క్లే కోర్టులపై 17 విజయాలు నమోదు చేసి అద్భుతమైన ఫామ్‌లో ఉన్న జెబర్‌ను ఈసారి ఫ్రెంచ్‌ ఓపెన్‌ టైటిల్‌ ఫేవరెట్స్‌లో ఒకరిగా పరిగణించారు. అయితే మాగ్దా లినెట్‌తో 2 గంటల 28 నిమిషాలపాటు జరిగిన మ్యాచ్‌లో జెబర్‌ 47 అనవసర తప్పిదాలు చేసి మూల్యం చెల్లించుకుంది. పురుషుల సింగిల్స్‌లో 2018, 2019 రన్నరప్‌ డొమినిక్‌ థీమ్‌ (ఆస్ట్రియా) తొలి రౌండ్‌లోనే వెనుదిరిగాడు. గాయం కారణంగా కొంతకాలం ఆటకు దూరమై 194వ ర్యాంక్‌కు పడిపోయిన థీమ్‌ 3–6, 2–6, 4–6తో హుగో డెలియన్‌ (బొలీవియా) చేతిలో ఓడిపోయాడు.  

మెల్‌బోర్న్‌: టెన్నిస్‌ సీజన్‌ తొలి గ్రాండ్‌స్లామ్‌ టోర్నీ ఆస్ట్రేలియన్‌ ఓపెన్‌లో నాలుగో రోజు సంచలన ఫలితాలు నమోదయ్యాయి. మహిళల సింగిల్స్‌లో టైటిల్‌ ఫేవరెట్స్‌గా భావించిన మూడో సీడ్‌ ముగురుజా (స్పెయిన్‌), యూఎస్‌ ఓపెన్‌ చాంపియన్, బ్రిటన్‌ టీనేజర్‌ ఎమ్మా రాడుకాను, ఆరో సీడ్‌ అనెట్‌ కొంటావీట్‌ (ఎస్తోనియా) రెండో రౌండ్‌లోనే ఇంటిదారి పట్టారు. గురువారం జరిగిన మహిళల సింగిల్స్‌ రెండో రౌండ్‌ మ్యాచ్‌ల్లో ప్రపంచ మాజీ నంబర్‌వన్, మూడో ర్యాంకర్‌ ముగురుజా 3–6, 3–6తో 61వ ర్యాంకర్‌ అలిజె కార్నె (ఫ్రాన్స్‌) చేతిలో... 17వ సీడ్‌ రాడుకాను 4–6, 6–4, 3–6తో 98వ ర్యాంకర్‌ డాంకా కొవినిచ్‌ (మోంటెనిగ్రో) చేతిలో... కొంటావీట్‌ 2–6, 4–6తో 39వ ర్యాంకర్‌ క్లారా టౌసన్‌ (డెన్మార్క్‌) చేతిలో ఓడిపోయారు. అలిజె కార్నెతో జరిగిన మ్యాచ్‌లో 2016 ఫ్రెంచ్‌ ఓపెన్‌ చాంపియన్, 2017 వింబుల్డన్‌ టోర్నీ విజేత అయిన ముగురుజా 33 అనవసర తప్పిదాలు చేయడంతోపాటు తన సర్వీస్‌ను మూడుసార్లు కోల్పోయి మూల్యం చెల్లించుకుంది. గత ఏడాది యూఎస్‌ ఓపెన్‌లో క్వాలిఫయర్‌ హోదాలో బరిలోకి దిగి ఏకంగా టైటిల్‌ను సాధించి పెను సంచలనం సృష్టించిన బ్రిటన్‌ టీనేజర్‌ రాడుకాను ఇక్కడ మాత్రం అద్భుతం చేయలేకపోయింది. కొవినిచ్‌తో 2 గంటల 38 నిమిషాలపాటు జరిగిన మ్యాచ్‌లో రాడుకాను నాలుగు డబుల్‌ ఫాల్ట్‌లు, 39 అనవసర తప్పిదాలు చేసింది. కొవినిచ్‌ సర్వీస్‌లో 15 సార్లు బ్రేక్‌ పాయింట్‌ అవకాశాలు వస్తే రాడుకాను ఆరుసార్లు సద్వినియోగం చేసుకుంది. తన సర్వీస్‌ను ఏడుసార్లు చేజార్చుకుంది. ఈ గెలుపుతో కొవినిచ్‌ గ్రాండ్‌స్లామ్‌ టోర్నీలలో మూడో రౌండ్‌కు చేరిన తొలి మోంటెనిగ్రో ప్లేయర్‌గా చరిత్ర సృష్టించింది.    మరోవైపు రెండో సీడ్‌ సబలెంకా (బెలారస్‌), 14వ సీడ్‌ సిమోనా హలెప్‌ (రొమేనియా), ఏడో సీడ్‌ స్వియాటెక్‌ (పోలాండ్‌) మూడో రౌండ్‌లోకి ప్రవేశించారు. సబలెంకా 1–6, 6–4, 6–2తో జిన్‌యు వాంగ్‌ (చైనా)పై, హలెప్‌ 6–2, 6–0తో బీట్రిజ్‌ (బ్రెజిల్‌)పై, స్వియాటెక్‌ 6–2, 6–2తో రెబెకా పీటర్సన్‌ (స్వీడన్‌)పై గెలిచారు.   మెద్వెదెవ్‌ కష్టపడి... పురుషుల సింగిల్స్‌లో రెండో సీడ్‌ మెద్వెదెవ్‌ (రష్యా), నాలుగో సీడ్‌ సిట్సిపాస్‌ (గ్రీస్‌) కష్టపడి మూడో రౌండ్‌లోకి చేరుకున్నారు. మెద్వెదెవ్‌ 2 గంటల 58 నిమిషాల్లో 7–6 (7/1), 4–6, 6–4, 6–2తో నిక్‌ కిరియోస్‌ (ఆస్ట్రేలియా)పై నెగ్గగా... సిట్సిపాస్‌ 3 గంటల 22 నిమిషాల్లో 7–6 (7/1), 6–7 (5/7), 6–3, 6–4తో సెబాస్టియన్‌ బేజ్‌ (అర్జెంటీనా)ను ఓడించాడు. ఐదో సీడ్‌ రుబ్లెవ్‌ (రష్యా) 6–4, 6–2, 6–0తో బెరాన్‌కిస్‌ (లిథువేనియా)పై, తొమ్మిదో సీడ్‌ ఫిలిక్స్‌ అలియాసిమ్‌ (కెనడా) 4 గంటల 19 నిమిషాల్లో 7–6 (7/4), 6–7 (4/7), 7–6 (7/5), 7–6 (7/4)తో ఫోకినా (స్పెయిన్‌)పై గెలిచి మూడో రౌండ్‌లోకి ప్రవేశించారు. మరోవైపు ఐదుసార్లు రన్నరప్‌ ఆండీ ముర్రే (బ్రిటన్‌) 4–6, 4–6, 4–6తో టారో డానియల్‌ (జపాన్‌) చేతిలో... 13వ సీడ్‌ ష్వార్ట్‌జ్‌మన్‌ (అర్జెంటీనా) 6–7 (6/8), 4–6, 4–6తో క్రిస్టోఫర్‌ ఒకానెల్‌ (ఆస్ట్రేలియా) చేతిలో ఓడిపోయారు.  

లండన్‌: టెన్నిస్‌ సీజన్‌ మూడో గ్రాండ్‌స్లామ్‌ టోర్నమెంట్‌ వింబుల్డన్‌లో మహిళల సింగిల్స్‌ విభాగంలో సీడెడ్‌ క్రీడాకారిణుల నిష్క్రమణ పర్వం కొనసాగుతోంది. ఇప్పటికే రెండో సీడ్‌ వొజ్నియాకి (డెన్మార్క్‌), నాలుగో సీడ్‌ స్లోన్‌ స్టీఫెన్స్‌ (అమెరికా), ఐదో సీడ్‌ స్వితోలినా (ఉక్రెయిన్‌), ఆరో సీడ్‌ కరోలినా గార్సియా (ఫ్రాన్స్‌), ఎనిమిదో సీడ్‌ క్విటోవా (చెక్‌ రిపబ్లిక్‌) ఇంటిముఖం పట్టగా... ఈ ఐదుగురి సరసన మూడో సీడ్, డిఫెండింగ్‌ చాంపియన్‌ గార్బిన్‌ ముగురుజా (స్పెయిన్‌), తొమ్మిదో సీడ్‌ వీనస్‌ విలియమ్స్‌ (అమెరికా), పదో సీడ్‌ మాడిసన్‌ కీస్‌ (అమెరికా) చేరడం గమనార్హం.   భారత కాలమానం ప్రకారం గురువారం అర్ధరాత్రి దాటాక ముగిసిన మహిళల సింగిల్స్‌ రెండో రౌండ్‌ మ్యాచ్‌లో డిఫెండింగ్‌ చాంపియన్‌ ముగురుజా 7–5, 2–6, 1–6తో ప్రపంచ 47వ ర్యాంకర్‌ అలీసన్‌ వాన్‌ ఉత్వానక్‌ (బెల్జియం) చేతిలో ఓడిపోయింది. గంటా 52 నిమిషాలపాటు జరిగిన ఈ మ్యాచ్‌లో ముగురుజా సర్వీస్‌ను ఏడుసార్లు బ్రేక్‌ చేసిన ఉత్వానక్‌ తన కెరీర్‌లో తొలిసారి టాప్‌–10లోపు క్రీడాకారిణిపై గెలిచింది. శుక్రవారం జరిగిన మూడో రౌండ్‌ మ్యాచ్‌ల్లో మాజీ విజేత సెరెనా విలియమ్స్‌ (అమెరికా) 7–5, 7–6 (7/2)తో మ్లాడెనోవిచ్‌ (ఫ్రాన్స్‌)ను ఓడించి ప్రిక్వార్టర్‌ ఫైనల్లోకి దూసుకెళ్లగా... ఆమె సోదరి వీనస్‌ 2–6, 7–6 (7/5), 6–8తో కికి బెర్‌టెన్స్‌ (నెదర్లాండ్స్‌) చేతిలో ఓడిపోయింది. మరో మూడో రౌండ్‌ మ్యాచ్‌లో ఎవగెనియా రొడినా (రష్యా) 7–5, 5–7, 6–4తో పదో సీడ్‌ మాడిసన్‌ కీస్‌పై సంచలన విజయం సాధించింది. పురుషుల సింగిల్స్‌ విభాగం మూడో రౌండ్‌ మ్యాచ్‌లో డిఫెండింగ్‌ చాంపియన్‌ ఫెడరర్‌ (స్విట్జర్లాండ్‌) 6–3, 7–5, 6–2తో స్ట్రఫ్‌ (జర్మనీ)పై గెలిచి ప్రిక్వార్టర్‌ ఫైనల్‌కు చేరాడు. అన్‌సీడెడ్‌ గేల్‌ మోన్‌ఫిల్స్‌ (ఫ్రాన్స్‌) 5–7, 6–4, 6–4, 6–2తో 11వ సీడ్‌ సామ్‌ క్వెరీ (అమెరికా)పై గెలుపొందాడు.    బోపన్న జంట ఓటమి  పురుషుల డబుల్స్‌ రెండో రౌండ్‌లో రోహన్‌ బోపన్న (భారత్‌)–రోజర్‌ వాసెలిన్‌ (ఫ్రాన్స్‌) జంట పరాజయం పాలైంది. ఫ్రెడరిక్‌ నీల్సన్‌ (డెన్మార్క్‌)–సాలిస్‌బరీ (బ్రిటన్‌)తో జరిగిన మ్యాచ్‌లో బోపన్న ద్వయం 4–6, 6–7 (4/7)తో తొలి రెండు సెట్‌లను కోల్పోయి... మూడో సెట్‌లో 1–2తో వెనుకబడిన దశలో గాయం కారణంగా వైదొలిగింది.    


 ♦ వింబుల్డన్‌ మహిళల సింగిల్స్‌ టైటిల్‌ కైవసం
 ♦ ఫైనల్లో వీనస్‌పై విజయం
 ♦ రూ. 18 కోట్ల 53 లక్షల ప్రైజ్‌మనీ సొంతం
 
 అనుభవంపై పట్టుదల గెలిచింది. స్పెయిన్‌ యువతార గార్బిన్‌ ముగురుజా వింబుల్డన్‌ గ్రాండ్‌స్లామ్‌ టోర్నీ మహిళల సింగిల్స్‌ చాంపియన్‌గా అవతరించింది. ఐదుసార్లు చాంపియన్, 37 ఏళ్ల వీనస్‌ విలియమ్స్‌తో జరిగిన ఫైనల్లో 23 ఏళ్ల ముగురుజా కళ్లు చెదిరే ఆటతీరును ప్రదర్శించింది. ఆరోసారి ఈ ప్రతిష్టాత్మక టైటిల్‌ను సాధించడంతోపాటు ఓపెన్‌ శకంలో గ్రాండ్‌స్లామ్‌ టైటిల్‌ నెగ్గిన పెద్ద వయస్కురాలిగా రికార్డు సృష్టించాలని ఆశించిన వీనస్‌కు నిరాశే మిగిలింది.  
 
 లండన్‌: తన ప్రత్యర్థి అపార అనుభవజ్ఞురాలైనా... వింబుల్డన్‌ గ్రాస్‌కోర్టులపై అద్భుత రికార్డు కలిగినా... అవేమీ పట్టించుకోకుండా స్పెయిన్‌ స్టార్‌ గార్బిన్‌ ముగురుజా ఒక వ్యూహం ప్రకారం ఆడింది. వీనస్‌ను ఎక్కువ భాగం బేస్‌లైన్‌కే పరిమితం చేస్తూ... సుదీర్ఘ ర్యాలీల్లో పైచేయి సాధిస్తూ... అనవసర తప్పిదాలు చేసేలా ఆడుతూ ముగురుజా అనుకున్న ఫలితాన్ని సాధించింది. రెండేళ్ల క్రితం వింబుల్డన్‌ సెంటర్‌ కోర్టులో సెరెనా విలియమ్స్‌ చేతిలో ఫైనల్లో ఎదురైన పరాజయానికి... ఈసారి అదే వేదికపై సెరెనా అక్క వీనస్‌పై ముగురుజా ప్రతీకారం తీర్చుకుంది.
 
 తన కెరీర్‌లో రెండో గ్రాండ్‌స్లామ్‌ టైటిల్‌ను సొంతం చేసుకోవడంతోపాటు తొలిసారి వింబుల్డన్‌ టైటిల్‌ను కైవసం చేసుకుంది. శనివారం జరిగిన మహిళల సింగిల్స్‌ ఫైనల్లో 14వ సీడ్‌ ముగురుజా 7–5, 6–0తో పదో సీడ్‌ వీనస్‌ విలియమ్స్‌ (అమెరికా)ను ఓడించింది. విజేతగా నిలిచిన ముగురుజాకు 22 లక్షల పౌండ్లు (రూ. 18 కోట్ల 53 లక్షలు), రన్నరప్‌ వీనస్‌కు 11 లక్షల పౌండ్లు (రూ. 9 కోట్ల 26 లక్షలు) ప్రైజ్‌మనీగా లభించాయి. తొమ్మిదోసారి వింబుల్డన్‌ ఫైనల్‌ ఆడిన వీనస్‌ నాలుగోసారి రన్నరప్‌ ట్రోఫీతో సరిపెట్టుకుంది.
 
 తాజా విజయంతో గ్రాండ్‌స్లామ్‌ టోర్నీ ఫైనల్స్‌లో విలియమ్స్‌ సిస్టర్స్‌ సెరెనా, వీనస్‌లను ఓడించిన ఏకైక క్రీడాకారిణిగా ముగురుజా గుర్తింపు పొందింది. గత ఏడాది ఫ్రెంచ్‌ ఓపెన్‌ ఫైనల్లో సెరెనాను ఓడించి ముగురుజా చాంపియన్‌గా నిలిచింది. కొంచిటా మార్టినెజ్‌ (1994లో) తర్వాత వింబుల్డన్‌ మహిళల సింగిల్స్‌ చాంపియన్‌గా నిలిచిన స్పెయిన్‌ క్రీడాకారిణిగా ముగురుజా ఘనత వహించింది. ఈ టోర్నీలో ముగురుజాకు కొంచిటా కోచ్‌గా ఉండటం మరో విశేషం.
 
 బ్రేక్‌ పాయింట్లు కాపాడుకొని...
 ఇద్దరూ ప్రతీ పాయింట్‌ కోసం పోరాడటంతో తొలి సెట్‌ ఆసక్తికరంగా సాగింది. స్కోరు 5–4 వద్ద ఉన్నపుడు ముగురుజా సర్వీస్‌లో వీనస్‌కు రెండు సెట్‌ పాయింట్లు లభించాయి. అయితే ముగురుజా కచ్చితమైన సర్వీస్‌లు చేసి ఈ గేమ్‌ను కాపాడుకుంది. దాంతో స్కోరు 5–5తో సమమైంది. 11వ గేమ్‌లో వీనస్‌ సర్వీస్‌ను బ్రేక్‌ చేసిన ముగురుజా ఆ తర్వాత తన సర్వీస్‌ను నిలబెట్టుకొని తొలి సెట్‌ను సొంతం చేసుకుంది. ఇక రెండో సెట్‌లో ముగురుజా పూర్తి ఆధిపత్యం చలాయించింది. మూడుసార్లు వీనస్‌ సర్వీస్‌ను బ్రేక్‌ చేయడంతోపాటు తన సర్వీస్‌లను కాపాడుకొని చిరస్మరణీయ విజయాన్ని దక్కించుకుంది. మ్యాచ్‌ మొత్తం లో ముగురుజా 14 విన్నర్స్‌ కొట్టి, 11 అనవసర తప్పిదాలు చేసింది. మరోవైపు వీనస్‌ ఐదు డబుల్‌ ఫాల్ట్‌లు, 25 అనవసర తప్పిదాలు చేసింది.
 
 సిలిచ్‌ @ ఫెడరర్‌
 నేడు పురుషుల సింగిల్స్‌ ఫైనల్‌ సాయంత్రం గం. 6.30 నుంచి స్టార్‌ స్పోర్ట్స్‌ సెలెక్ట్‌–1లో ప్రత్యక్ష ప్రసారం


 లండన్‌: స్పెయిన్‌ టెన్నిస్‌ స్టార్‌ ముగురుజ రెండో సారి వింబుల్డన్‌ మహిళల సింగిల్స్‌ ఫైనల్స్‌లో అడుగుపెట్టింది. సెమీస్‌లో 64 నిమిషాల పాటు జరిగిన గేమ్‌లో స్లొవేకియా స్టార్‌ రిబరికోవాను 6-1, 6-1 తేడాతో  ముగురుజ చిత్తుగా ఓడించింది. ఏ దశలో రిబరికోవా పోటీని ఇవ్వలేకపోయింది. ఫ్రీక్వార్టర్‌లో ఎంజెలిక్‌ కెర్బర్‌ (జర్మనీ)ని ఓడించి సంచలన విజయం నమోదు చేసిన ముగురుజ అదే ఉత్సాహంతో ఫైనల్‌కు చేరింది.
  
 ఇక ఫైనల్లో ముగురుజ రెండో సెమీస్‌లో తలపడే కోంటా, వీనస్ లలో ఒకరితో పోటీపడనుంది. 2015 వింబుల్డన్‌ ఫైనల్స్‌కు చేరి సెరినా విలియమ్స్‌ చేతిలో ఖంగుతిన్నఈ స్పెయిన్‌ స్టార్‌ సంచలన విజయంతో మరోసారి ఫైనల్‌కు దూసుకెళ్లింది. గతేడాది ఫ్రేంచ్‌ ఓపెన్‌ గెలుచుకున్న ముగురుజ వింబుల్డన్‌ టైటిల్‌ కొట్టాలని భావిస్తోంది. రెండో సారి వింబుల్డన్‌ ఫైనల్‌కు వెళ్లిన తొలి స్పెయిన్‌ స్టార్‌గా ముగురుజ రికార్డు నమోదు చేసింది. అంతకు ముందు స్పెయిన్‌ స్టార్‌ సాంచెజ్ వికారియో 1990 వింబుల్డన్‌ ఫైనల్‌ చేరింది.


 ♦ శ్రమించి నెగ్గిన టాప్‌ సీడ్‌
 ♦ ప్రిక్వార్టర్స్‌లో ముగురుజా, రద్వాన్‌స్కా
 ♦ వింబుల్డన్‌ టెన్నిస్‌ టోర్నీ
 
 లండన్‌: ‘నంబర్‌వన్‌’ ర్యాంక్‌ను నిలబెట్టుకునే క్రమంలో టాప్‌ సీడ్‌ ఎంజెలిక్‌ కెర్బర్‌ (జర్మనీ) మరో అడుగు ముందుకేసింది. వింబుల్డన్‌ గ్రాండ్‌స్లామ్‌ టెన్నిస్‌ టోర్నమెంట్‌లో ప్రిక్వార్టర్‌ ఫైనల్‌ బెర్త్‌ను ఖాయం చేసుకుంది. ప్రపంచ 70వ ర్యాంకర్‌ షెల్బీ రోజర్స్‌ (అమెరికా)తో శనివారం జరిగిన మహిళల సింగిల్స్‌ మూడో రౌండ్‌ మ్యాచ్‌లో కెర్బర్‌ 2 గంటల 17 నిమిషాల్లో 4–6, 7–6 (7/2), 6–4తో విజయం సాధించి ఊపిరి పీల్చుకుంది.
 
 తొలి సెట్‌ను కోల్పోయి, రెండో సెట్‌లో 2–4తో వెనుకబడిన కెర్బర్‌ ఆ తర్వాత పుంజుకుంది. స్కోరును సమం చేయడంతోపాటు సెట్‌ను టైబ్రేక్‌లో గెలిచి మ్యాచ్‌లో నిలిచింది. నిర్ణాయక మూడో సెట్‌లో కెర్బర్‌ తొలి గేమ్‌లోనే షెల్బీ సర్వీస్‌ను బ్రేక్‌ చేసింది. ఆ తర్వాత తన సర్వీస్‌లను నిలబెట్టుకొని విజయాన్ని ఖాయం చేసుకుంది. ఈ మ్యాచ్‌లో కెర్బర్‌ నాలుగు డబుల్‌ ఫాల్ట్‌లు, 14 అనవసర తప్పిదాలు చేసింది. మరోవైపు షెల్బీ ఏకంగా 47 అనవసర తప్పిదాలు చేసింది.
 
 ఇతర మూడో రౌండ్‌ మ్యాచ్‌ల్లో 14వ సీడ్‌ ముగురుజా (స్పెయిన్‌) 6–2, 6–2తో సొరానా కిర్‌స్టీ (రొమేనియా)పై, 9వ సీడ్‌ అగ్నెస్కా రద్వాన్‌స్కా (పోలాండ్‌) 3–6, 6–4, 6–1తో తిమియా బాసిన్‌స్కీ (స్విట్జర్లాండ్‌)పై, ఐదో సీడ్‌ కరోలైన్‌ వొజ్నియాకి (డెన్మార్క్‌) 3–6, 7–6 (7/3), 6–2తో కొంటావీట్‌ (ఎస్తోనియా)పై, ఏడో సీడ్‌ స్వెత్లానా కుజ్‌నెత్సోవా (రష్యా) 6–4, 6–0తో పొలోనా హెర్‌కాగ్‌ (స్లొవేనియా)పై గెలిచారు. మూడో రౌండ్‌లో నెగ్గిన 24వ సీడ్‌ కోకో వాండెవాగె (అమెరికా), అన్‌సీడెడ్స్‌ మగ్దలీనా రిబరికోవా (స్లొవేకియా), పెట్రా మార్టిక్‌ (క్రొయేషియా) కూడా ప్రిక్వార్టర్‌ ఫైనల్లోకి ప్రవేశించారు.
 
 జొకోవిచ్‌ జోరు...
 పురుషుల సింగిల్స్‌లో రెండో సీడ్‌ జొకోవిచ్‌ (సెర్బియా), ఆరో సీడ్‌ మిలోస్‌ రావ్‌నిచ్‌ (కెనడా) ప్రిక్వార్టర్‌ ఫైనల్లోకి ప్రవేశించారు. మూడో రౌండ్‌లో జొకోవిచ్‌ 6–4, 6–1, 7–6 (7/2)తో గుల్‌బైస్‌ (లాత్వియా)పై, రావ్‌నిచ్‌ 7–6 (7/3), 6–4, 7–5తో రామోస్‌ (స్పెయిన్‌)పై నెగ్గారు. పదో సీడ్‌ అలెగ్జాండర్‌ జ్వెరెవ్‌ (జర్మనీ), 11వ సీడ్‌ బెర్డిచ్‌ (చెక్‌ రిపబ్లిక్‌), 15వ సీడ్‌ మోన్‌ఫిల్స్‌ (ఫ్రాన్స్‌), 13వ సీడ్‌ దిమిత్రోవ్‌ (బల్గేరియా) కూడా ప్రిక్వార్టర్‌ ఫైనల్లోకి అడుగుపెట్టారు. అయితే 12వ సీడ్‌ సోంగా (ఫ్రాన్స్‌) 2–6, 6–3, 6–7 (5/7), 6–1, 5–7తో సామ్‌ క్వెరీ (అమెరికా) చేతిలో ఓడిపోయాడు.
 
 మూడో రౌండ్‌లో సానియా జంట
 మహిళల డబుల్స్‌ రెండో రౌండ్‌లో సానియా మీర్జా (భారత్‌)–ఫ్లిప్‌కెన్స్‌ (బెల్జియం) ద్వయం 6–3, 3–6, 6–4తో నవోమి బ్రాడీ–హితెర్‌ వాట్సన్‌ (బ్రిటన్‌) జంటపై గెలిచి మూడో రౌండ్‌లోకి ప్రవేశించింది. మిక్స్‌డ్‌ డబుల్స్‌ రెండో రౌండ్‌లో రోహన్‌ బోపన్న (భారత్‌)–గాబ్రియెలా దబ్రౌస్కీ (కెనడా) జోడీ 7–6 (7/2), 7–5తో మార్టిన్‌ (ఫ్రాన్స్‌)–ఒలారూ (రొమేనియా) జంటపై గెలిచింది.


 సిడ్నీ:  ఆస్ట్రేలియా ఓపెన్ గ్రాండ్ స్లామ్ లో అమెరికా క్రీడాకారిణి వాందివేగీ మరో సంచలన విజయాన్ని నమోదు చేసింది. గత రెండు రోజుల క్రితం ప్రపంచ నంబర్ వన్ టెన్నిస్ క్రీడాకారణి ఎంజెలిక్ కెర్బర్ ను ఓడించి సంచలనం సృష్టించిన వాందివేగీ.. తాజాగా స్పెయిన్ కు చెందిన ఏడో సీడ్ గార్బెన్ ముగురుజాను ఓడించింది.
  
 మంగళవారం జరిగిన మహిళల సింగిల్స్ క్వార్టర్స్ పోరులో 6-4, 6-0 తేడాతో ముగురుజాపై విజయం సాధించి సెమీస్లోకి ప్రవేశించింది. తొలి రెండు సెట్లను అవలీలగా గెలిచిన వాందివేగీ.. తాను కూడా ఆస్ట్రేలియా ఓపెన్ బరిలో ఉన్నానంటూ మేటి క్రీడాకారిణులకు సవాల్ విసిరింది. మరో క్వార్టర్ ఫైనల్ పోరులో గెలిచిన వీనస్ విలియమ్స్ తో  వాందివేగీ అమీతుమీ తేల్చుకోవడానికి సిద్ధమైంది. వీనస్ విలియమ్స్ 6-4, 7-6(3)తేడాతో అనస్తసియాపై గెలిచి సెమీస్ కు చేరింది.


 * యూఎస్ ఓపెన్ మూడో రౌండ్లో రెండో సీడ్
 * ముగురుజా అవుట్  
 * నాదల్, జొకోవిచ్ ముందంజ  
 న్యూయార్క్: యూఎస్ ఓపెన్ గ్రాండ్‌స్లామ్ టోర్నమెంట్‌లో జర్మనీ స్టార్, రెండో సీడ్ ఎంజెలిక్ కెర్బర్ మూడో రౌండ్లోకి ప్రవేశించింది. అయితే మూడో సీడ్ ముగురుజా (స్పెయిన్) రెండో రౌండ్లోనే ఇంటిదారి పట్టింది. గురువారం జరిగిన మహిళల సింగిల్స్ రెండో రౌండ్లో కెర్బర్ 6-2, 7-6 (9/7)తో లుసిక్ బెరోని (క్రొయేషియా)పై విజయం సాధించింది. ఆస్ట్రేలియన్ ఓపెన్ చాంపియన్ కెర్బర్‌కు రెండో రౌండ్లో ఆమె ప్రత్యర్థి నుంచి పోటీ ఎదురైంది. తొలి సెట్‌ను అలవోకగా చేజిక్కించుకున్నా... రెండో సెట్లో బెరోని పుంజుకోవడంతో టైబ్రేక్ దాకా పోరాడాల్సి వచ్చింది.
 
 గంటా 32 నిమిషాల పాటు జరిగిన ఈ మ్యాచ్‌లో  కెర్బర్ 2 ఏస్‌లు సంధిస్తే... బెరోని 4 ఏస్‌లు సాధించింది. అరుుతే బెరోని 55 అనవసర తప్పిదాలు, 7 డబుల్ ఫాల్ట్‌లు చేస్తే... జర్మనీ క్రీడాకారిణి 15 తప్పిదాలు, రెండు డబుల్ ఫాల్ట్‌లే  చేసింది.
  
 ముగురుజాకు షాక్
 ఫ్రెంచ్ ఓపెన్ చాంపియన్, మూడో సీడ్ గార్బిన్ ముగురుజాకు రెండో రౌండ్లోనే చుక్కెదురైంది. అన్‌సీడెడ్ అనస్తసిజా సెవస్తొవా (లాత్వియా) వరుస సెట్లలో 7-5, 6-4తో ముగురుజాకు షాకిచ్చింది. గంటా 39 నిమిషాల్లో స్పెరుున్‌స్టార్ ఆట కట్టించింది. రొమేనియాకు చెందిన ఐదో సీడ్ సిమోనా హలెప్ 6-3, 6-4తో లూసి సఫరొవా (చెక్‌రిపబ్లిక్)పై గెలిచింది.  ఇతర మ్యాచ్‌ల్లో తొమ్మిదో సీడ్ స్వెత్లానా కుజ్‌నెత్సొవా (రష్యా) 4-6, 4-6తో వోజ్నియాకి (డెన్మార్క్) చేతిలో కంగుతినగా, ఏడో సీడ్ రాబెర్ట విన్సీ (ఇటలీ) 6-1, 6-3తో క్రిస్టినా మెక్ హేల్ (అమెరికా)పై గెలిచింది. 8వ సీడ్ మాడిసన్ కీస్ (అమెరికా) 6-1, 6-1తో కేలా డే (అమెరికా)పై, 12వ సీడ్ డొమినికా సిబుల్కొవా (స్లోవేకియా) 6-7 (5/7), 6-2, 6-2తో ఎవ్జీనియా రొదినా (రష్యా)పై విజయం సాధించారు.
  
 జొకోవిచ్ ఆడకుండానే మూడో రౌండ్లోకి...
 పురుషుల విభాగంలో డిఫెండింగ్ చాంపియన్, నంబర్‌వన్ నోవాక్ జొకోవిచ్ కోర్టులో దిగకుండానే మూడో రౌండ్లోకి ప్రవేశించాడు. పురుషుల సింగిల్స్ రెండో రౌండ్లో అతని ప్రత్యర్థి జిరి వెసెలి (చెక్ రిపబ్లిక్) నుంచి టాప్‌సీడ్ సెర్బియన్ స్టార్‌కు వాకోవర్ లభించింది. భారత నంబర్‌వన్ సాకేత్ మైనేనిపై తొలిరౌండ్లో నెగ్గిన వెసెలి గాయంతో వైదొలిగాడు.
 
 దీంతో రెండో రౌండ్లో టాప్‌సీడ్ ఆటగాడికి రాకెట్ పట్టాల్సిన అవసరం రాలేదు. మిగతా మ్యాచ్‌ల్లో స్పెయిన్ స్టార్,  నాలుగో సీడ్ రాఫెల్ నాదల్ 6-0, 7-5, 6-1తో అండ్రియస్ సెప్పి (ఇటలీ)పై సునాయాస విజయం సాధించాడు. ఏడో సీడ్ మారిన్ సిలిచ్ (క్రొయేషియా) 6-1, 6-2, 6-3తో సెర్గి స్టాఖోవ్‌స్కీ (ఉక్రెరుున్)పై, తొమ్మిదో సీడ్ జో విల్‌ఫ్రెడ్ సోంగా (ఫ్రాన్‌‌స) 6-4, 3-6, 6-3, 6-4తో జేమ్స్ డక్‌వర్త్ (ఆస్ట్రేలియా)పై, పదో సీడ్ గేల్ మోన్‌ఫిల్స్ (ఫ్రాన్‌‌స) 7-5, 6-4, 6-3తో జాన్ సట్రాల్ (చెక్ రిపబ్లిక్)పై, 20వ సీడ్ జాన్ ఇస్నెర్ (అమెరికా) 6-3, 6-4, 6-7 (7/10), 6-3తో స్టీవ్ డార్కిస్ (బెల్జియం)పై గెలుపొందారు.
 
 భారత జోడీల శుభారంభం
 సీజన్ చివరి గ్రౌండ్‌స్లామ్ టోర్నీలో భారత క్రీడాకారులు వారి భాగస్వాములతో కలిసి శుభారంభం చేశారు. తొలి రౌండ్ మ్యాచ్‌ల్లో డిఫెండింగ్ మిక్స్‌డ్ డబుల్స్ చాంపియన్ లియాండర్ పేస్-మార్టినా హింగిస్ (స్విట్జర్లాండ్) జోడి 6-3, 6-2తో సచియా వికెరి-ఫ్రాన్సెస్ టైఫో (అమెరికా) జంటపై అలవోక విజయం సాధించింది. మహిళల డబుల్స్‌లో హైదరాబాదీ స్టార్, ఏడో సీడ్ సానియా మీర్జా-బార్బరా స్టిక్రోవా (చెక్ రిపబ్లిక్) ద్వయం 6-3, 6-2తో జెడ మైరుు హర్ట్-ఎనా షిబహర (అమెరికా) జోడీపై గెలుపొందింది. పురుషుల డబుల్స్‌లో రోహన్ బోపన్న-ఫ్రెడరిక్ నీల్సన్ (డెన్మార్క్)జంట 6-3, 6-7 (3/7), 6-3తో 16వ సీడ్ రాడెక్ స్టెపానెక్(చెక్ రిపబ్లిక్)- నెనద్ జిమొంజిక్ (సెర్బియా) ద్వయంపై గెలుపొందింది.


 * వింబుల్డన్ రెండో రౌండ్‌లోనే ఇంటిముఖం
 * అన్‌సీడెడ్ సెపలోవా చేతిలో ఓటమి
 * మూడోరౌండ్‌లో ముర్రే, నిషికోరి, రావోనిక్
 లండన్: గత మూడు రోజులు సాఫీగా సాగిన వింబుల్డన్‌లో నాలుగో రోజు పెను సంచలనం నమోదైంది. ఫ్రెంచ్ ఓపెన్ విజేత, ప్రపంచ రెండో ర్యాంకర్ గార్బిని ముగురుజా (స్పెయిన్) రెండో రౌండ్‌లోనే ఇంటిముఖం పట్టింది. గురువారం జరిగిన మహిళల సింగిల్స్‌లో ప్రపంచ 127వ ర్యాంకర్ జానా సెపలోవా (స్లొవేకియా) 6-3, 6-2తో రెండోసీడ్ ముగురుజాపై నెగ్గి మూడో రౌండ్‌లోకి ప్రవేశించింది.
 
 59 నిమిషాల పాటు జరిగిన ఈ మ్యాచ్‌లో సెపలోవా సర్వీస్‌లో చెలరేగిపోయింది. బలమైన ఫోర్, బ్యాక్ హ్యాండ్ షాట్లతో స్పెయిన్ ప్లేయర్ ఆట కట్టించింది. తొలిసెట్ రెండో గేమ్‌లోనే సర్వీస్‌ను కోల్పోవడం ముగురుజాపై ప్రభావం చూపింది. నాలుగు, ఏడు, ఎనిమిది గేమ్‌ల్లో సర్వీస్‌ను కాపాడుకున్నా ఫలితం లేకపోయింది. ఇక రెండో సెట్‌లో సెపలోవా మరింత జోరు చూపెట్టింది. రెండుసార్లు సర్వీస్‌ను కాపాడుకున్న ఆమె రెండుసార్లు ప్రత్యర్థి సర్వీస్‌ను బ్రేక్ చేసి 4-0 ఆధిక్యంలోకి వెళ్లింది.
 
 చివరి నాలుగు గేమ్‌ల్లో ముగురుజా రెండుసార్లు సర్వీస్‌ను కాపాడుకున్నా... ప్రత్యర్థి సర్వీస్‌ను బ్రేక్ చేయలేక మ్యాచ్‌ను చేజార్చుకుంది. ఓవరాల్‌గా ముగురుజా మ్యాచ్ మొత్తంలో 22సార్లు అనవసర తప్పిదాలు చేసి మూల్యం చెల్లించుకుంది. ఇతర మ్యాచ్‌ల్లో 4వ సీడ్ కెర్బర్ (జర్మనీ) 6-1, 6-4తో లెప్‌చెంకో (అమెరికా)పై; 5వ సీడ్ హలెప్ (రొమేనియా) 6-1, 6-1తో షియావోన్ (ఇటలీ)పై; 8వ సీడ్ వీనస్ (అమెరికా) 7-5, 4-6, 6-3తో మరియా సక్కారి (గ్రీక్)పై; 9వ సీడ్ మాడిసన్ కీస్ (అమెరికా) 6-4, 4-6, 6-3తో ఫ్లిప్‌కెన్స్ (బెల్జియం)పై; 11వ సీడ్ బాసిన్‌స్కీ (స్విట్జర్లాండ్) 6-4, 6-2తో కుమ్‌కుమ్ (థాయ్‌లాండ్)పై; 12వ సీడ్ నవారో (స్విట్జర్లాండ్) 3-6, 6-2, 6-1తో అలెర్టోవా (చెక్)పై; లిసికి (జర్మనీ) 6-4, 6-2తో 14వ సీడ్ స్టోసుర్ (ఆస్ట్రేలియా)పై గెలిచి తదుపరి రౌండ్‌లోకి అడుగుపెట్టారు. బొసెరుప్ (అమెరికా) 6-4, 1-0 ఉన్న దశలో ఏడోసీడ్ బెనిసిచ్ (స్విట్జర్లాండ్) మ్యాచ్ నుంచి వైదొలిగింది.
  
 ముర్రే జోరు...  
 పురుషుల సింగిల్స్‌లో రెండోసీడ్ ఆండీ ముర్రే (బ్రిటన్) జోరు కొనసాగిస్తున్నాడు. రెండోరౌండ్‌లో 6-3, 6-2, 6-1తో యెన్ సున్ లూ (తైపీ)పై నెగ్గి మూడోరౌండ్‌లోకి ప్రవేశించాడు. ఇతర మ్యాచ్‌ల్లో ఐదోసీడ్ నిషికోరి (జపాన్) 4-6, 6-4, 6-4, 6-2తో బెన్నెట్ (ఫ్రాన్స్)పై; 6వ సీడ్ రావోనిక్ (కెనడా) 7-6 (5), 6-4, 6-2తో సెప్పీ (ఇటలీ)పై; 9వ సీడ్ సిలిచ్ (క్రొయేషియా) 6-2, 6-7 (6), 6-4, 6-4తో స్టాకోవోస్కీ (ఉక్రెయిన్)పై; 11వ సీడ్ గోఫిన్ (బెల్జియం) 6-4, 6-0, 6-3తో రోజెర్ వాసెలిన్ (ఫ్రాన్స్)పై; మహుట్ (ఫ్రాన్స్) 6-1, 6-4, 6-3తో 13వ సీడ్ ఫెరర్ (స్పెయిన్)పై;  దిమిత్రోవ్ (బల్గేరియా) 6-3, 7-6 (1), 4-6, 6-4తో 16వ సీడ్ సిమోన్స్ (ఫ్రాన్స్)పై గెలిచారు. 14వ సీడ్ అగుట్ (స్పెయిన్)కు... కుష్‌కిన్ (కజకిస్తాన్) నుంచి వాకోవర్ లభించింది.


 వింబుల్డన్ మహిళల సింగిల్స్ ఫైనల్ నేడు
  
 లండన్: ఒకవైపు అపార అనుభవమున్న అగ్రశ్రేణి తార... మరోవైపు కెరీర్‌లో తొలి గ్రాండ్‌స్లామ్ ఫైనల్ ఆడుతోన్న యువతార... ఈ నేపథ్యంలో సెరెనా విలియమ్స్ (అమెరికా), ముగురుజా (స్పెయిన్) శనివారం వింబుల్డన్ మహిళల సింగిల్స్ టైటిల్ కోసం అమీతుమీకి సిద్ధమయ్యారు. భారత కాలమాన ప్రకారం శనివారం సాయంత్రం  ఫైనల్ సమరం ప్రారంభమైంది.
  
 ఇప్పటికే 20 గ్రాండ్‌స్లామ్ సింగిల్స్ టైటిల్ నెగ్గిన సెరెనాను టైటిల్ ఫేవరెట్‌గా భావిస్తున్నప్పటికీ, సంచలన ప్రదర్శనతో ఫైనల్‌కు చేరిన ముగురుజాను తక్కువ అంచనా వేయలేం. ముఖాముఖి రికార్డులో సెరెనా 2-1తో ఆధిక్యంలో ఉంది.  ఒకవేళ సెరెనా గెలిస్తే ఓపెన్ శకంలో అత్యధికంగా 21 గ్రాండ్‌స్లామ్ టైటిల్స్ నెగ్గిన రెండో ప్లేయర్‌గా నిలుస్తుంది.


 లండన్:వింబుల్డన్ గ్రాండ్ స్లామ్ టోర్నీలో వెనిజులా క్రీడాకారిణి గార్బైన్ ముగురుజా సంచలనం సృష్టించింది. గురువారం జరిగిన సెమీ ఫైనల్లో ముగురుజా 6-2, 3-6, 6-3  తేడాతో రద్వాన్ స్కాపై విజయం సాధించి తొలిసారి గ్రాండ్ స్లామ్ టోర్నీ  ఫైనల్లోకి ప్రవేశించింది. ఆద్యంతం ఉత్కంఠ భరితంగా సాగిన పోరులో తొలిసెట్ ను ముగురుజా అవలీలగా గెలుచుకున్నా..  అనవసర తప్పిదాలతో రెండో సెట్ ను కోల్పోయింది. 
  
 అయితే నిర్ణయాత్మక మూడో సెట్ లో ముకురుజా దూకుడుగా ఆడి  రద్వాన్ స్కాకు కళ్లెం వేసింది. దీంతో ఈరోజు సెరెనా విలియమ్స్-మరియా షరపోవాల మధ్య జరిగే మరో సెమీ ఫైనల్ మ్యాచ్ విజేతతో తలపడటానికి ముకురుజా సన్నద్ధమైంది.