అది పంజాబ్‌లోని బటిండా ప్రాంతంలోని ఒక ప్రభుత్వ పాఠశాల. ఆ బడిలో ఏదో ఒక ప్రత్యేక కార్యక్రమానికి ఏర్పాట్లు జరుగుతున్నాయి. పిల్లలంతా సందడిగా, టీచర్లు బిజీబిజీగా ఉన్నారు. వాతావరణం ఎంతో ఆహ్లాదకరంగా ఉంది. అప్పుడే అక్కడికి ముఖ్య అతిథిగా ఆహ్వానించిన వ్యక్తి వచ్చారు. అంతా నమస్కారాలు, పూల దండలతో స్వాగతం పలుకుతున్నారు. స్కూలు ఆవరణలో ఒకావిడ తన పనిలో నిమగ్నమై ఉంది. వచ్చిన ప్రముఖుడు ఎవరా అని ఆమె తలెత్తి కూడా చూడకుండా తన పని తాను చేసుకుంటూ పోతోంది. ఆమె ఆ ముఖ్య అతిథిని పట్టించుకోకపోవడానికి కారణం.. ఆ వ్యక్తి ఆమె కొడుకే అవ్వడం. సాధారణంగా ఇటువంటి సీన్లు ఎక్కువగా సినిమాల్లోనే చూస్తుంటాం. అయితే అక్కడ చూపించే వాటిలో.. పెద్ద హోదాలో ఉన్న వ్యక్తి కూలిపని చేస్తోన్న తల్లిని దగ్గరకు చేరదీయకపోవడం ఎక్కువగా కనిపిస్తుంటుంది. లభ్‌ సింగ్‌ ఉగోకే కానీ ఇక్కడ అలా జరగలేదు. తన కొడుకు ఉన్నత స్థాయికి ఎదిగినప్పటికీ తన తల్లి కొన్నేళ్లుగా చేస్తోన్న స్వీపర్‌ పనిని వదిలేయకుండా కొనసాగిస్తోంది. అందుకు ఆమె కొడుకు కూడా అభ్యంతరం చెప్పకపోవడం తెలపడం విశేషం. ఈ తల్లీ కొడుకులు మరెవరో కాదు ఆమ్‌ ఆద్మీ పార్టీ తరపున ఇటీవల ఎంఎల్‌ఏగా గెలిచిన లభ్‌ సింగ్‌ ఉగోకే, ఆమె తల్లి బల్‌దేవ్‌ కౌర్‌.   జీవితంలో ఎన్నో ఒడిదుడుకులు, అవమానాలు ఎదుర్కొని ఉన్నతస్థాయికి చేరుకున్నాక తమని తాము మరచిపోయి విజయ గర్వంతో ప్రవర్తిస్తుంటారు చాలామంది. కానీ కొందరు ఎంత ఎత్తుకు ఎదిగినప్పటికీ తాము ఎక్కడి నుంచి వచ్చామో అది మాత్రం మర్చిపోరు. తమ నిరాడంబరతను కొనసాగిస్తుంటారు. ఈ కోవకు చెందిన వారే బలదేవ్‌ కౌర్‌. ఇటీవల పంజాబ్‌ అసెంబ్లీ ఎన్నికల్లో ..మిగతా పార్టీలన్నింటిని పక్కకు నెట్టేసి ఆమ్‌ఆద్మీ పార్టీ క్లీన్‌ స్వీప్‌ చేసింది. ఈ ఎన్నికల్లో బదౌర్‌ నియోజక వర్గంలో పోటీచేసి పంజాబ్‌ మాజీ సీఎం చరణ్‌జీత్‌ సింగ్‌ చన్నీని ఓడించి లభ్‌ సింగ్‌ ఉగోకే గెలిచాడు. ప్రస్తుతం లభ్‌ సింగ్‌ ఉగోకే ఎంఎల్‌ఏ. అయితే ఇతని తల్లి బల్‌దేవ్‌ కౌర్‌ గత ఇరవైఐదేళ్లుగా స్కూల్లో స్వీపర్‌గా పనిచేస్తోంది. కొడుకు ఎంఎల్‌ఏ అయినప్పటికీ ఆమె మాత్రం తన ఉద్యోగాన్ని వదులుకోలేదు. ఇటీవల తన తల్లి పనిచేస్తోన్న స్కూలుకు ఎంఎల్‌ఏగా అధికారిక హోదాలో వచ్చారు. అయినా తల్లీకొడుకులు ఇద్దరూ ఆ విషయంలో ఏమాత్రం ఆత్మన్యూనతకు గురి కాలేదు..ఆ విషయాన్ని సంతోషంగానే స్వీకరించారు.   దర్శన్‌ సింగ్, బల్‌దేవ్‌ కౌర్‌ దంపతులకు ఇద్దరు సంతానం. వీరిలో ఒకరు లభ్‌ సింగ్‌. నిరుపేద కుటుంబం కావడంతో రెండు గదులున్న చిన్న పూరిల్లే వారి నివాసం. దర్శన్‌ సింగ్‌ కూలిపనిచేస్తే, భర్తకు చేదోడుగా బల్‌దేవ్‌ కౌర్‌ స్కూల్లో స్వీపర్‌గా పనిచేసి పిల్లలిద్దరిని కష్టపడి చదివించారు. చదువుకున్న లభ్‌సింగ్‌ రాజకీయాలవైపు ఆకర్షితుడై పదేళ్ల క్రితం ఆప్‌లో చేరి చురుకైన కార్యకర్తగా పనిచేస్తూ మంచి పేరు సంపాదించుకుని ఎంఎల్‌ఏగా ఎదిగారు. కొడుకు ఎంఎల్‌ఏ అయ్యాడని తల్లి అబ్బుర పడిందే తప్ప స్వీపర్‌ పనిని వదల్లేదు. అయినా ఇప్పటికీ ఈ కుటుంబం రెండు గదులున్న ఇంట్లోనే ఉండడం, ఎప్పుడో కొనుక్కున్న పాత మోటర్‌ సైకిల్‌నే వాడడం విశేషం.   ‘‘మేము బతికేందుకు కష్టపడి పనిచేసి డబ్బులు సంపాదిస్తున్నాం. ఇప్పుడు నా కొడుకు ఎంఎల్‌ఏ అయ్యాడని నేను 25 ఏళ్లుగా చేస్తోన్న పనిని వదులుకోలేను. అతని పని అతనిదే, నా పని నాదే అని సగర్వంగా చెబుతోంది బల్‌దేవ్‌ కౌర్‌. నాకొడుకు ఇదే స్కూల్లో చదువుకున్నాడు. స్కూలో ఉన్నప్పుడు ఇటు స్కూలుకు, అటు గ్రామానికి అనేక పురస్కారాలు తీసుకొచ్చాడు. ఇప్పుడు ఎంఎల్‌ఏగా ఎదిగి ఎంతోమందికి మంచి పాలన అందించబోతున్నాడు. మరీ నేను ఎందుకు ఖాళీగా ఉండాలి. నా పనిలో నేను ముందుకు సాగితేనే నాకు ఆనందంగా ఉంటుంది’’ అని కౌర్‌ చెబుతోంది. ఎంత ఎత్తుకు ఎదిగినా ఒదిగి ఉండడం అంటే ఇదే.  

న్యూఢిల్లీ: భగత్ సింగ్ పూర్వీకుల గ్రామమైన ఖట్కర్ కలాన్‌లో పార్టీ కన్వీనర్ అరవింద్ కేజ్రీవాల్, ఆ పార్టీ ఎమ్మెల్యేలు, తదితరుల సమక్షంలో భగవంత్ మాన్ పంజాబ్ ముఖ్యమంత్రిగా ప్రమాణ స్వీకారం చేశారు. ఈ ప్రమాణ స్వీకారోత్సవానికి మాజీ ముఖ్యమంత్రి చరణ్‌జిత్ సింగ్ చన్నీకి ఆహ్వానం లేదు. ఈ మేరకు కాంగ్రెస్‌ ఎంపీ మనీష్ తివారీ ట్విట్టర్‌లో మాట్లాడుతూ.. "ముఖ్యమంత్రిగా ప్రమాణ స్వీకారం చేసిన భగవంత్ మాన్‌ను నేను అభినందిస్తున్నాను. ఆయన ప్రమాణ స్వీకారానికి నన్ను ఆహ్వానించినందుకు ధన్యవాదాలు తెలియజేస్తున్నాను. పార్లమెంటు సమావేశాలు ఉన్నందున నేను హాజరు కాలేక పోతున్నాను. కానీ పంజాబ్‌ మాజీ ముఖ్య మంత్రి చరణ్‌జిత్ సింగ్‌ నన్ను ఆహ్వానించకపోవడం విడ్డూరం." అని తివారీ ఈ సందర్భంగా పేర్కొన్నారు. అయితే పంజాబ్‌లోని ఆనంద్‌పూర్‌కు చెందిన లోక్‌సభ ఎంపీ సాహిబ్ కూడా పార్లమెంటు సమావేశాలు ఉన్నందున తాను వేడుకకు హాజరు కాలేనని చెప్పారు. అంతేకాదు తివారీ పంజాబ్‌ సీఎం ఆహ్వాన కార్డును కూడా ట్విట్టర్‌లో పోస్ట్‌ చేశారు. పంజాబ్ అసెంబ్లీ ఎన్నికలలోని 117 స్థానాలకు గానూ ఆమ్ ఆద్మీ పార్టీ (ఆప్) 92 స్థానాలతో భారీ విజయాన్ని నమోదు చేసింది.  కాంగ్రెస్ 18 సీట్లకు పరిమితమైంది. పంజాబ్‌లో కాంగ్రెస్‌ స్పష్టమైన ఓట్ల చీలికను చవి చూసింది.  అయితే తివారీ అసెంబ్లీ ఎన్నికలకు సంబంధించిన పార్టీ స్టార్ క్యాంపెయినర్ల జాబితాలో ఆయన లేరు. అయితే  భగవంత్ మాన్ తన ప్రమాణ స్వీకారోత్సవానికి పెద్దగా కేంద్ర మంత్రి లేదా జాతీయ స్థాయిలోని పెద్ద నాయకులెవరిని ఆహ్వానించ లేదు.  I congratulate @BhagwantMann on being sworn in as Chief Minister I thank him for inviting me to his swearing in . Due to Parliament being in session I will not be able to make it . It is ironic I was not invited to @CHARANJITCHANNI ‘s swearing in though he was one of my MLA’s pic.twitter.com/AyW91uNyYE — Manish Tewari (@ManishTewari) March 16, 2022 (చదవండి: రెండోసారి సీఎంలుగా ప్రమోద్‌ సావంత్‌, బీరేన్‌ సింగ్‌)

చండీగఢ్‌: ‘పంజాబ్‌ కొత్త కేబినెట్‌ ప్రమాణస్వీకార కార్యక్రమం రాజ్‌భవన్‌లో జరగదు. స్వాతంత్య్ర సమరయోధుడు భగత్‌సింగ్‌ పూర్వీకుల గ్రామమైన ఖట్కర్‌ కలన్‌లో నిర్వహిస్తాం’ అని ఆమ్‌ ఆద్మీ పార్టీ ముఖ్యమంత్రి అభ్యర్థి భగవంత్‌ మాన్‌ వెల్లడించారు. కార్యక్రమం తేదీలను తర్వాత ప్రకటిస్తామని చెప్పారు. ఏ సర్కారు ఆఫీసులో కూడా ముఖ్యమంత్రి చిత్రపటాలు ఉండవని స్పష్టం చేశారు. బదులుగా భగత్‌సింగ్, అంబేద్కర్‌ ఫొటోలు ఉంటాయన్నారు. ఇప్పుడిక పంజాబ్‌ను మళ్లీ పంజాబ్‌గా మారుస్తామని చెప్పారు. పంజాబ్‌ ప్రజలు ఆప్‌కు పట్టం కట్టారని ట్రెండ్‌ను బట్టి తెలియడంతో ధురిలో పార్టీ కార్యకర్తలు, మద్దతుదారులతో మాన్‌ మాట్లాడారు. పాఠశాలల స్థితిగతులను మెరుగుపరచడం, ఆరోగ్య మౌలిక సదుపాయాలు పెంచడం, పరిశ్రమలను తీసుకురావడం, సాగును లాభసాటిగా మార్చడం, మహిళలకు భద్రత కల్పించడం, క్రీడా మౌలిక సదుపాయాలను పెంచడం ప్రాధాన్యాంశాలని ఆయన వివరించారు. క్రీడలను ప్రోత్సహించడానికి గ్రామాల్లో ట్రాక్స్, స్టేడియంలు ఏర్పాటు చేస్తామన్నారు. అన్ని ప్రాంతాల్లో మంత్రులు ఎప్పటికప్పుడు పర్యటిస్తుంటారని.. ప్రజల కష్టనష్టాలు తెలుసుకుంటారని చెప్పారు. ‘ఆప్‌కు ఓటేయని వాళ్లు ఆందోళన చెందాల్సిన అవసరం లేదు. అన్ని వర్గాల ప్రజల కోసం పార్టీ పని చేస్తుంది’ అని చెప్పారు.  ఉక్రెయిన్‌ నుంచి భారత విద్యార్థులను తిరిగి తీసుకురావడంపై స్పందిస్తూ.. ‘మన పిల్లలు చదువుకోవడానికి బయటకు ఎందుకు వెళ్లాలి. మనమే తక్కువకు సదుపాయాలు ఎందుకు కల్పించకూడదు’ అన్నారు.  

హాస్యం.. మనిషిని కవ్వించేది. అలాంటప్పుడు విరుద్ధమైన రాజకీయం ఆయన ఎందుకు ఎంచుకున్నాడనే అనుమానాలు రావొచ్చు. జనాల్ని నవ్వించడమే కాదు.. అవసరమైతే ప్రజల కన్నీళ్లూ తుడవాలని తండ్రి చెప్పిన మాటకు కట్టుబడే రాజకీయాల్లో అడుగుపెట్టాడు భగవంత్‌ మాన్‌. ప్రజాభిప్రాయంతోనే ఆమ్‌ ఆద్మీ పార్టీ సీఎం అభ్యర్థిగా నిలిచాడు.  పంజాబ్‌ కోటలో పాగా వెయ్యాలని వ్యూహాలు పన్నిన ఆప్‌కు.. ఒక బూస్టర్‌ షాట్‌లా పనికొచ్చాడు. ఆప్‌ ఘన విజయంలో ముఖ్యభూమిక పోషించి.. ముఖ్యమంత్రిగా ప్రమాణం చేయబోతున్నాడు 48 ఏళ్ల భగవంత్‌ మాన్‌.  ‘ఒకప్పుడు జనం నన్ను చూసి తెగ నవ్వేవారు. కానీ ఇప్పుడు అందరూ రోదిస్తున్నారు. తమను కాపాడమని కోరుతున్నారు’ సీఎం అభ్యర్థిగా ఎంపికైన రోజు మాన్ చేసిన వ్యాఖ్యలు ఇవి. అదే రోజు నుంచి ఆయనలో నవ్వు మాయమై.. రాజకీయాలపై సీరియనెస్‌ మొదలైంది.  భగవంత్‌ సింగ్‌ మాన్‌.. 1973, అక్టోబర్‌ 17న పంజాబ్‌లోని సంగ్రూర్‌లో ఓ జాట్‌ సిక్కు కుటుంబంలో జన్మించారు. సాధారణ రైతు కుటుంబం ఆయనది. కాలేజీ రోజుల్లోనే ఉండగానే కామెడీ షోలతో గుర్తింపు దక్కించుకున్నాడాయన. సునామ్‌లో ఎస్‌యూఎస్‌ ప్రభుత్వ∙కాలేజీ తరఫున రెండు గోల్డ్‌ మెడల్స్‌ గెలిచారు. కానీ యాక్టింగ్‌ వల్ల కనీసం డిగ్రీ కూడా పూర్తి చేయనివ్వలేదు. ఆపై ఇందర్‌ప్రీత్‌ కౌర్‌ని పెళ్లి చేసుకున్నారు. ఈ జంటకు ఇద్దరు పిల్లలు. 2015లో తన భార్యతో విడాకులు తీసుకున్నారు. పిల్లలిద్దరూ ఇప్పుడు విదేశాల్లో ఉన్నారు.  ►మొదట్లో.. నటుడు జగ్తర్‌ జగ్గీతో కలిసి కామెడీ ఆల్బమ్‌ చేశారు. జుగ్ను ఖెండా హై అనే టీవీ సీరియల్‌తో తన పాపులారిటీ పెంచుకున్నారు. రాజకీయ నాయకులపై సెటైర్లు వేస్తూ కార్యక్రమాన్ని రక్తికట్టించారు. 2008లో గ్రేట్‌ ఇండియా లాఫ్టర్‌ చాలెంజ్‌ అనే రియాల్టీ షోలో పాల్గొన్న తర్వాత దేశవ్యాప్తంగా భగవంత్‌ మాన్‌ పేరు మారు మోగిపోయింది. జాతీయ అవార్డు లభించిన ‘‘మైనే మా పంజాబ్‌ దీ’’ సినిమాలో అద్భుతమైన నటనని ప్రదర్శించారు. ► 2011లో  మన్‌ప్రీత్‌ బాదల్‌కు చెందిన పీపుల్స్‌ పార్టీ ఆఫ్‌ పంజాబ్‌ తీర్థం పుచ్చుకొని రాజకీయ అరంగేట్రం చేశారు. 2012లో జరిగిన అసెంబ్లీ ఎన్నికల్లో లెహ్రా నుంచి పోటీ చేసి ఓటమిపాలయ్యారు. 2014లో ఆమ్‌ ఆద్మీ పార్టీ (ఆప్‌)లో చేరి సంగ్రూర్‌ లోక్‌సభ నియోజకవర్గం నుంచి 2 లక్షల పై చిలుకు మెజార్టీతో విజయం సాధించారు. 2014, 2019లలో సంగ్రూర్ లోక్ సభ నియోజక వర్గం నుంచి ఆప్ ఎంపీగా వరుస విజయాలు సాధించారు. ప్రస్తుతం పంజాబ్ ఆప్ శాఖకు కూడా మాన్ చీఫ్ గా ఉన్నారు.  ► 2017లో అసెంబ్లీ ఎన్నికల్లో అకాలీదళ్‌ అధ్యక్షుడు సుఖ్‌బీర్‌ బాదల్‌పై ఆప్‌ భగవంత్‌ మాన్‌ను నిలబెట్టింది. కానీ ఆ ఎన్నికల్లో ఆయన ఓడిపోయారు. మళ్లీ 2019 లోక్‌సభ ఎన్నికల్లో సంగ్రూర్‌ నియోజకవర్గం నుంచి విజయం సాధించారు. 2019 జనవరిలో ఆప్‌ పార్టీ పంజాబ్‌ రాష్ట్ర అధ్యక్షుడిగా నియమితులయ్యారు. ప్రచారంలో దిట్ట..  లోక్‌ లెహర్‌ ఫౌండేషన్‌ అనే స్వచ్ఛంద సంస్థను విజయవంతంగా నడుపుతూ ప్రజల్లో వారికున్న హక్కులపై అవగాహన పెంచుతున్నారు. కలుషిత నీరు తాగి రోగాలపాలవుతున్న ప్రజలకి సాయపడుతున్నారు. టీవీ సెలబ్రిటీగా దక్కిన పేరుతో..  పంజాబ్‌లో ఆప్‌ పార్టీలో క్రౌడ్‌ పుల్లర్‌గా పేరు తెచ్చుకున్నారు భగవంత్‌ మాన్‌. ఆప్‌ సీఎం అభ్యర్థి ఎంపిక కోసం దేశంలో మరే పార్టీ చేయని విధంగా టెలి ఓటింగ్‌ పెడితే, అందులో ఏకంగా 93శాతం ఓట్లను కొల్లగొట్టారు. స్టాండప్‌ కమెడియన్‌గా పేరు తెచ్చుకున్న భగవంత్‌ మాన్‌.. పంజాబ్‌ బహుముఖ పోటీలో ఆప్‌ విజయంలో కీలక పాత్ర పోషించాడు.   ► నయా పంజాబ్‌ పిలుపు.. నిరుద్యోగం పంజాబ్‌ను వేధిస్తు‍న్న ప్రధాన సమస్య. అందుకే అధికారంలోకి వస్తే ఆ సమస్యపైనే మొదటి ఫోకస్‌ ఉంటుందని చెప్పాడు భగవంత్‌.  ‘అతనో పచ్చి తాగుబోతు.. డ్రగ్స్ కూడా వాడతాడు.. నిత్యం నిషాలో జోగుతుండే మాన్. బఫూన్‌ వేశాలేసుకునేటోడు. అతన్నే గనుక గెలిపిస్తే పంజాబ్ మొత్తాన్నీ మత్తులో ముంచేస్తాడు.. ’ ఇదీ.. ఎన్నికల ప్రచారంలో ప్రత్యర్థులు భగవంత్ మాన్‌పై చేసిన ఆరోపణ. భగవంత్‌ మాన్‌ మద్యం సేవించి పార్లమెంటుకు వస్తారని ఆరోపణలున్నాయి. సహచర ఎంపీలు ఆయన నుంచి  వచ్చే మద్యం వాసన భరించలేక ఫిర్యాదులు కూడా చేశారు. అయితే.. రెండేళ్ల క్రితం బర్నాలాలో జరిగిన ఒక ర్యాలీలో తాను ఇంక మద్యం జోలికి వెళ్లనంటూ ప్రజలందరి మధ్య ప్రతిజ్ఞ చేశారు. మద్యం మానేశానని, ప్రజాప్రతినిధిగా, పంజాబ్ సీఎంగా కళ్లు నెత్తికెక్కించుకోకుండా.. బాధ్యతగా మసలుకుంటానని ఎన్నికల ప్రచారంలో మాన్ ప్రజలకు చెప్పారు. ఆ మాటలను నమ్మే భారీ మెజార్టీతో ఆయనకు, ఆప్‌కు పంజాబ్‌ ప్రజలు పట్టం కట్టారు. ::సాక్షి, వెబ్‌స్పెషల్‌

పంజాబ్‌ పీసీసీ అధ్యక్షుడు నవజోత్‌ సింగ్‌ సిద్ధూ స్వరం మారుతోంది. ముఖ్యమంత్రి కావాలని కలలు కంటున్న ఆయన ఇన్నాళ్లూ సీఎం అభ్యర్థి ఎంపిక కాంగ్రెస్‌ అధిష్టానం చేతుల్లోనే ఉందని అంటూ వచ్చారు. పార్టీ ఎవరిని ఎంపిక చేసినా కట్టుబడి ఉంటానని చెప్పారు. ఆమ్‌ ఆద్మీ పార్టీ (ఆప్‌) తరహాలో సీఎం అభ్యర్థి ఎంపిక ప్రక్రియను టెలి ఓటింగ్‌ ద్వారా ప్రారంభించిన కాంగ్రెస్‌ రేపో మాపో ఒక ప్రకటన చేస్తుందనుకున్న సమయంలో ఇప్పుడు యూటర్న్‌ తీసుకున్నారు. ఇసుక మాఫియా ఆరోపణలపై సీఎం చరణ్‌జిత్‌ సింగ్‌ చన్నీ మేనల్లుడు భూపేంద్ర సింగ్‌ను ఈడీ అరెస్ట్‌ చేసిన రోజు సిద్ధూ నేరుగా చన్నీపైనే తన అస్త్రాలను సంధించారు. ఎన్‌డీటీవీకిచ్చిన ఇంటర్వ్యూలో సీఎం అభ్యర్థికి  నీతినిజాయితీలే ముఖ్యమంటూ కుండబద్దలు కొట్టినట్టు మాట్లాడారు. అధిష్టానం నిర్ణయం ఒక్కటే చాలదని ఎమ్మెల్యేల మద్దతు కూడా ఉండాలంటూ తాను ఎంతకైనా తెగిస్తానని పరోక్ష సంకేతాలు ఇచ్చారు. ప్రశ్న: కాంగ్రెస్‌ సీఎం అభ్యర్థి ఎలాంటివారై ఉండాలి ?   జవాబు: కాంగ్రెస్‌ పార్టీ సీఎం అభ్యర్థిగా నీతి నిజాయితీ కలిగిన వ్యక్తిని, క్లీన్‌ ఇమేజ్‌ ఉన్నవారిని ఎంపిక చేయాలి. కనీసం 17 ఏళ్ల ట్రాక్‌ రికార్డు చూడాలి. నైతికత కోల్పోయిన వారిని, అవినీతి, బంధుప్రీతి, మాఫియాతో సంబంధాలున్న వారిని ఎంపిక చేస్తే ప్రజలు మార్పు కోరుకుంటారు. ఎన్నికల్లో పార్టీని నిలువునా పాతిపెడతారు.   ప్రశ్న: మీరు సీఎం అభ్యర్థి అయ్యే అవకాశాలు ఏమేరకు ఉన్నాయంటారు?   జవాబు: నేనే సీఎం అభ్యర్థినని అనుకోవడం లేదు. అలా చెబితే అది అహంకారమే అవుతుంది.  కానీ నేను ఒక్క మాట చెప్పగలను. నవజోత్‌ సింగ్‌ సిద్ధూ అంటే అల్లాటప్పా వ్యక్తి కాదు. సెలెబ్రిటీ హోదాలో ఉండి ఆరు ఎన్నికల్లో విజయం సాధించిన వ్యక్తుల్ని మీరు ఎంతమందిని చూశారో చెప్పండి. వాస్తవానికి ప్రజలే ముఖ్యమంత్రిని ఎన్నుకోవాలి. ప్రజావాణినే ఆ దేవదేవుడి శాసనంగా భావించాలి.     ప్రశ్న: కాంగ్రెస్‌ హైకమాండ్‌ ఏ నిర్ణయం తీసుకున్నా మీకు ఆమోదయోగ్యమేనా?   జవాబు: నాకు అంగీకారమా కాదా అన్నది విషయం కాదు. ఆ నాయకుడికి ప్రజామోదం లభించాలి. ఎమ్మెల్యేల మద్దతు కూడా కచ్చితంగా ఉండాలి. ఎమ్మెల్యేల మద్దతు లేకుండా ఎవరైనా సీఎం కాగలరా?  కనీసం 60 మంది ఎమ్మెల్యేల మద్దతైనా ఉండాలి.   ప్రశ్న: ఈసారి ఎన్నికల్లో కాంగ్రెస్‌ పార్టీ భవిష్యత్‌ ఎలా ఉండబోతోంది?   జవాబు: ప్రస్తుతం కాంగ్రెస్‌ పార్టీకి నీతి నిజాయితీ కలిగిన వారి నాయకత్వం అత్యంత అవసరం.  సీఎం అభ్యర్థిగా ఎవరిని ఎంపిక చేస్తుందన్న దానిపైనే పార్టీ భవిష్యత్‌ ఆధారపడి ఉంది. సీఎం అభ్యర్థి ఎప్పుడైనా ఛాయిస్‌ అవాలి. అంతే తప్ప చాన్స్‌ తీసుకోకూడదు (విస్తృత ప్రజామోదం ఉన్న నాయకుడు కావాలేగాని... అధిష్టానం ఎంపిక చేసిన ఎవరో ఒకరు కాకూడదు). ఎవరికి పార్టీని గెలిపించే సత్తా ఉందో కాంగ్రెస్‌ పెద్దలు తెలుసుకోవాలి. మాఫియా దందాలు చేసే వ్యక్తి పార్టీ కార్యక్రమాలను అమలు చేయగలరా? అవినీతిపరుల్ని కాపాడేవారికి పగ్గాలు అప్పగిస్తే, వాళ్లు మాఫియాను ఎలా అంతం చేయగలరు?   ప్రశ్న: అమృత్‌సర్‌ (తూర్పు) నియోజకవర్గం అభ్యర్థిగా మీ లక్ష్యం ఏమిటి? శిరోమణి అకాలీదళ్‌ నాయకుడు బిక్రమ్‌సింగ్‌ మజితాయి ఎంతవరకు పోటీ ఇస్తారు?   జవాబు: నేను భావితరం బాగోగుల కోసం పోరాటం చేస్తాను. భావితరం బాగుంటేనే దేశ భవిష్యత్‌ బాగుంటుంది. ఇప్పుడు జరుగుతున్నది ధర్మపోరాటం.ధర్మం ఎటువైపు ఉంటే విజయం అటువైపే ఉంటుంది. ధర్మయుద్ధంలో అకాలీదళ్‌ ఎప్పటికీ నెగ్గలేదు.

చండీగఢ్‌: పంజాబ్‌లో ఎన్నికలు సమీపిస్తున్నవేళ రాజకీయాలు ఆసక్తికరంగా వాడివేడిగా రసవత్తరంగా సాగుతున్నాయి. అందులో భాగంగానే ఫ్రిబ్రవరి 20న జరగనున్న పంజాబ్‌ అసెంబ్లీ ఎన్నికలలో శిరోమణి అకాలీదళ్ పార్టీ పంజాబ్‌ రాష్ట్ర మాజీ క్యాబినెట్‌మంత్రి బిక్రమ్ సింగ్ మజితియా భార్య గనీవ్ కౌర్‌ని పోటీలోకి తెరంగేట్రం చేసింది. కౌర్‌ రాజీకీయ కుటుంబ నేపథ్యం ఉన్న వ్యక్తిని వివాహం చేసుకున్నప్పటికీ ఇప్పటివరకు ఆమె రాజకీయాలకు దూరంగానే ఉన్నారు. అయితే తాను రాజకీయాల్లోకి వస్తానని అనుకోలేదని, పరిస్థితుల రీత్యా ఎన్నికల్లో పోటీ చేస్తున్నాని కౌర్‌ చెప్పుకొచ్చారు. ఈ మేరకు  గనీవ్ కౌర్‌ సోమవారం మజిత స్థానం నుంచి నామినేషన్ దాఖలు చేసిన సంగతి తెలిసిందే. పైగా తాను ఎప్పుడూ తన కుటుంబ సభ్యులు లేదా తన భర్త ఎన్నికల్లో పోటీ చేసినప్పుడూ ఓటు వేయాలంటూ ఎన్నకల్లో వారికి మద్దతుగా ప్రచారం చేయకపోయినప్పటికి తన కుటుంబం తనకు మద్దతుగా నిలిచిందంటూ ఆనందం వ‍్యక్తం చేశారు.   అంతేకాదు కేంద్ర మాజీ మంత్రి, శిరోమణి అకాలీదళ్ పార్టీ నాయకురాలు హర్​ సిమ్రత్​ కౌర్ నుండి ప్రేరణ పొందానని ఆమెలా ఉండాలనుకుంటున్నానని గనీవ్‌ కౌర్‌ చెప్పారు. తాను తన పిల్లలను చూసుకుంటున్నట్లే తన నియోజకవర్గాన్ని చూసుకుంటానని మీడియాకి ఇచ్చిన ఇంటర్వ్యూలో తెలిపారు. 2007లో తన భర్త పంజాబ్ అసెంబ్లీ ఎన్నికలలో మజితా స్థానానికి ప్రాతినిధ్యం వహించినప్పుడూ ఏవిధంగానైతే మద్దతు ఇచ్చారో అలాగే తనకు మద్దతు ఇస్తారని భావిస్తున్నానని అన్నారు. తాను కళారంగం నుండి రాజకీయాల్లోకి ప్రవేశించలేదని, కుటుంబం నుంచి రాజకీయాల్లోకి వచ్చానని, తన నియోజకవర్గమే తన పెద్ద కుటుంబం అని కౌర్‌ వ్యాఖ్యానించారు

PM Modi Security Breach ఢిల్లీ:  ప్రధాని పర్యటనపై భద్రతా వైఫల్యంపై బుధవారం దాఖలైన పిటిషన్‌ను విచారించేందుకు సుప్రీంకోర్టు అంగీకరించింది. ఈ మేరకు లాయర్స్ వాయిస్ సంస్థ దాఖలు చేసిన ఈ పిటిషన్‌ను రేపు (శుక్రవారం) ఉన్నత న్యాయస్థానం విచారించనుంది. నిన్న (బుధవారం) ఫిరోజ్‌పూర్‌లో కొంత మంది నిరసనకారులు ప్రధాని నరేంద్రమోదీ కాన్వాయ్‌ను ఫ్లైఓవర్‌పై 20 నిముషాలపాటు అడ్డుకోవడంతో ప్రధాని ర్యాలి రద్దయ్యింది. భటిండా విమానాశ్రయం నుంచి హుస్సేనివాలాలోని జాతీయ అమరవీరుల స్మారక స్థూపం వద్దకు ప్రధాని మోదీ వెళ్తుండగా ఈ ఘటన చోటుచేసుకుంది. దీంతో పంజాబ్‌లో ప్రధాని కాన్వాయ్‌కు భద్రతా వైఫల్యంపై అత్యున్నతస్థాయి విచారణ కోరుతూ సుప్రీంలో పిటిషన్ దాఖలయ్యింది. పంజాబ్ పాలకులు దురుద్దేశంతోనే భద్రతా వైఫల్యం సృష్టించారని, దేశ భద్రతకే ఇది తీవ్రమైన విఘాతమని పిటిషనర్‌ పేర్కొన్నారు. ప్రొటోకాల్ ప్రకారం ప్రధాని కాన్వాయ్‌లో చీఫ్ సెక్రటరీ, డీజీపీ కూడా ఉండాలని, కానీ వారిద్దరూ లేరని అన్నారు. భద్రతా ఏర్పాట్లపై ఆధారాలను భఠిండా జిల్లా జడ్జి వద్ద ఉంచేలా ఆదేశాలివ్వాలని న్యాయస్థానాన్ని అభ్యర్థించారు. కేసు విచారణ తక్షణమే చేపట్టాల్సిందిగా సీనియర్ న్యాయవాది మణీందర్ సింగ్ ఉన్నత న్యాయస్థానాన్ని కోరారు. పంజాబ్ పోలీసులు, రాష్ట్ర ప్రభుత్వ లోపాలను ఎత్తి చూపుతూ, క్షుద్ర రాజకీయాలు చేస్తున్నారంటూ కేంద్ర హోం మంత్రిత్వ అమిత్‌ షా ఆరోపించారు. ప్రధాని ప్రయాణించే మార్గం గురించిన సమాచారం లీక్ అయిందా? అని కేంద్ర మంత్రి స్మృతి ఇరానీ ప్రశ్నించారు. మరోవైపు పంజాబ్‌ ముఖ్యమంత్రి చరణ్‌జిత్‌ సింగ్‌ చన్నీ ఘటనపై విచారం వ్యక్తం చేసినప్పటికీ బీజేపీ ఆరోపణలను తోసిపుచ్చారు. ఈ మేరకు మీడియాతో మాట్లాడుతూ ప్రధాని కాన్వాయ్‌ రోడ్డు మార్గం గుండా వెళ్తున్నట్లు తమ ప్రభుత్వానికి సమాచారం అందలేదన్నారు. ప్రధాని మోదీ రాష్ట్ర పర్యటనలో జరిగిన పొరపాట్లపై విచారణకు పంజాబ్‌ రాష్ట్ర ప్రభుత్వం ఈరోజు ఉన్నతస్థాయి కమిటీని ఏర్పాటు చేసింది. మూడు రోజుల్లోగా నివేదికను సమర్పించాలని ప్యానెల్‌ను ఆదేశించినట్లు ప్రభుత్వ అధికార ప్రతినిధి మీడియాకు తెలిపారు. చదవండి: Inspirational Story: నా కొడుకుకు కళ్లులేకపోతేనేం.. నా కళ్లతో లోకాన్ని పరిచయం చేస్తా!

Ahead Of Punjab Election Ex Cricketer Joins BJP: పంజాబ్‌ అసెంబ్లీ ఎన్నికల నేపథ్యంలో.. అక్కడి రాజకీయాలు వేడిపుట్టిస్తున్నాయి. కీలక నేతలతో పాటు ప్రముఖులను సైతం లాగేందుకు పార్టీలు పోటీపడుతున్నాయి. ఈ క్రమంలో సెలబ్రిటీలకు గాలం వేస్తున్నాయి.  తాజాగా టీమిండియా వెటరన్‌ క్రికెటర్‌ దినేశ్‌ మోంగియా బీజేపీ కండువా కప్పుకున్నారు. భారత్‌ తరపున పరిమిత ఓవర్లలో ఆడిన మోంగియా.. ఆటకు దూరమైన 12 ఏళ్లకు 2019లో క్రికెట్‌ అన్ని ఫార్మాట్‌లకు రిటైర్‌మెంట్‌ ప్రకటించిన విషయం తెలిసిందే. పంజాబ్‌కు చెందిన ఈ మాజీ క్రికెటర్‌కు స్థానిక కోటాలో పార్టీ కీలక బాధ్యతలు అప్పగించే అవకాశం లేకపోలేదు. ఇక పంజాబ్‌లో కాంగ్రెస్‌ పార్టీకి మరో షాక్‌ తగిలింది. సిట్టింగ్‌ ఎమ్మెల్యేలు సీటు నిరాకరణతో బీజేపీలో చేరిపోయారు. దినేశ్‌ మోంగియాతోపాటు ముగ్గురు ఎమ్మెల్యేలు ఫతేహ్‌జంగ్‌ బజ్వా, బల్వీందర్‌ సింగ్‌, రానా గుర్మీత్‌ సోధి సైతం మంగళవారం మధ్యాహ్నం అధికారికంగా బీజేపీలో చేరారు. రానా గుర్మీత్‌ వారం క్రితమే కాంగగ్రెస్‌కు గుడ్‌బై ప్రకటించారు. ఇక ఫతేహ్‌.. తన అనుచరుడు బల్వీందర్‌తో ఇవాళ కాషాయ పార్టీ కండువా కప్పుకున్నారు.  Former Congress MLA Fateh Bajwa, Former MLA Akali Dal Gurtej Singh Gudhiyana, Former Member of Parliament United Akali Dal Rajdev Singh Khalsa, and Retired ADC and Advocate in Punjab Haryana High Court Madhumeet joins BJP today in Delhi pic.twitter.com/bJJEVnsSNQ — ANI (@ANI) December 28, 2021 ఇదిలా మాజీ ఆటగాళ్లు రాజకీయాల్లో చేరడం కొత్తేం కాదు కదా. నవజ్యోత్‌సింగ్‌ సిద్దూ ఆల్రెడీ పంజాబ్‌ బరిలో ఉన్న విషయం తెలిసిందే.  తాజాగా  మరో వెటరన్‌ హర్భజన్‌ సింగ్‌ను కాంగ్రెస్‌ పార్టీ లాగే ప్రయత్నం చేస్తోంది.  2019లో బీజేపీ తరపున ఎంపీగా ఎన్నికైన గౌతం గంభీర్‌ను పంజాబ్‌ ఎన్నికల్లో స్టార్‌ క్యాంపెయినర్‌గా వాడుకోవాలని బీజేపీ భావిస్తోంది. 2017 ఎన్నికల్లో మొత్తం 117 స్థానాలకుగానూ కాంగ్రెస్‌ 77 సీట్లు దక్కించుకోగా, ఆమ్‌ఆద్మీ పార్టీ 20 సీట్లు, అకాలీదళ్‌ 15, బీజేపీ 3 స్థానాలు కైవసం చేసుకున్న విషయం తెలిసిందే. చదవండి: ఢిల్లీలో పంజాబ్‌ హీట్‌.. అమిత్‌షాతో అమరీందర్‌ సింగ్‌ భేటీ

చండీగఢ్‌: పంజాబ్‌ ఎన్నికల్లో తాము పోటీ చేయడం లేదని రైతు సంఘాల ఐక్య వేదిక సంయుక్త కిసాన్‌ మోర్చా(ఎస్‌కేఎం) స్పష్టం చేసింది. అదేవిధంగా, రాజకీయాల్లోకి ప్రవేశించాలని నిర్ణయించుకున్న పంజాబ్‌లోని 22 సంఘాల కూటమి ‘సంయుక్త సమాజ్‌ మోర్చా’ఎస్‌కేఎం పేరు వాడుకోరాదని పేర్కొంది. కేవలం రైతు సమస్యల సాధన కోసం దేశవ్యాప్తంగా ఉన్న 475 వేర్వేరు సంస్థలతో ఏర్పడిన వేదిక ఎస్‌కేఎం కాగా, పంజాబ్‌లోని 32 రైతు సంఘాలు అందులో ఒక భాగమని పేర్కొంటూ ఎస్‌కేఎం నేతలు దర్శన్‌ సింగ్‌ పాల్, జగ్జీత్‌ సింగ్‌ దల్లేవాల్‌ శనివారం ఒక ప్రకటన విడుదల చేశారు. ఒక వేళ ఎస్‌కేఎం పేరును ఎవరైనా వాడుకుంటే చట్టపరంగా ముందుకు వెళతామన్నారు. ప్రభుత్వం వ్యవసాయ చట్టాలను ఉపసంహరించుకున్న తర్వాత ఉద్యమాన్ని వాయిదా వేసినట్లు వారు చెప్పారు. రైతుల ఇతర డిమాండ్లపై తదుపరి కార్యాచరణను జనవరి 15న ఖరారు చేస్తామన్నారు. పంజాబ్‌లో రైతు సంఘాల రాజకీయ వేదిక వ్యవసాయ చట్టాలకు వ్యతిరేకంగా ఏడాదిపాటు నిరసనలు సాగించిన పంజాబ్‌లోని 22 రైతు సంఘాలు రాజకీయ కూటమిగా ఏర్పడ్డాయి. రాజకీయ మార్పే లక్ష్యంగా రాష్ట్రంలో జరగనున్న అసెంబ్లీ ఎన్నికల్లో పోటీ చేస్తామని శనివారం ప్రకటించాయి. పంజాబ్‌లోని మొత్తం 32 రైతు సంఘాలకు గాను 22 రైతు సంఘాల ప్రతినిధులు శనివారం ఇక్కడ సమావేశమయ్యారు. పంజాబ్‌ అసెంబ్లీ ఎన్నికల్లో సంయుక్త సమాజ్‌ మోర్చా పేరుతో పోటీ చేస్తామని భేటీ అనంతరం రైతు నేత హర్మీత్‌ సింగ్‌ కడియన్‌ మీడియాకు తెలిపారు. భారతీయ కిసాన్‌ యూనియన్‌(రాజేవాల్‌) నేత బల్బీర్‌ సింగ్‌ సింగ్‌ రాజేవాల్‌ తమ మోర్చాకు నేతగా ఉంటారన్నారు. ఆమ్‌ ఆద్మీ పార్టీతో జట్టుకట్టే విషయంలో ఇంకా నిర్ణయం తీసుకోలేదని చెప్పారు. ఎన్నికల్లో ఎస్‌కేఎం పేరును మాత్రం వాడుకోబోమన్నారు.  

చండీగఢ్‌: పంజాబ్‌ అసెంబ్లీకి మరికొద్ది నెలల్లో ఎన్నికలు జరగనున్న సమయంలో కీలక పరిణామం చోటుచేసుకుంది. రానున్న ఎన్నికల్లో ఆమ్‌ ఆద్మీ పార్టీతో కలిసి పోటీ చేయనున్నట్లు సంయుక్త కిసాన్‌ మోర్చా(ఎస్‌కేఎం)లో భాగంగా ఉన్న 25 రైతు సంఘాలు ప్రకటించాయి. కేంద్ర వ్యవసాయ చట్టాలకు వ్యతిరేకంగా ఎస్‌కేఎం నేతృత్వంలో రైతు సంఘాలు ఏడాదిపాటు ఆందోళనలు కొనసాగించిన విషయం తెలిసిందే. శుక్రవారం సాయంత్రం లూథియానాలో జరిగిన సమావేశంలో ఎస్‌కేఎంలోని 32 రైతు సంఘాలకు 7 సంఘాలు ఎన్నికలకు దూరంగా ఉంటామని స్పష్టం చేశాయి. అదేవిధంగా, ఎన్నికల్లో ఎస్‌కేఎం పేరును వాడుకోరాదని మిగతా సంఘాలను కోరాయి. రాజకీయాల్లోకి ప్రవేశించాలనుకుంటున్న 25 రైతు సంఘాలు తమ నిర్ణయాన్ని శనివారం అధికారికంగా ప్రకటించే అవకాశాలున్నాయి. ఎన్నికలకు దూరంగా ఉండే సంఘాలు.. కీర్తి కిసాన్‌ యూనియన్, క్రాంతి కారీ కిసాన్‌ యూనియన్, బీకేయూ క్రాంతికారీ, బీకేయూ సింధుపూర్, దోఆబా సంఘర్‌‡్ష కమిటీ, జై కిసాన్‌ ఆందోళన్‌. ఎన్నికల బరిలో దిగాలనుకుంటున్న సంఘాల్లో సుమారు 12 వరకు ఆప్‌తో కూటమిగా ఏర్పడేందుకు మొగ్గు చూపుతున్నట్లు సమాచారం. పంజాబ్‌ రైతుల ఆందోళనలకు ఆప్‌ మొదట్నుంచీ మద్దతు పలుకుతున్న విషయం తెలిసిందే. రైతు నేతలైన బల్బీర్‌ సింగ్‌ రాజేవాల్, హర్మీత్‌ సింగ్‌ కదియాన్‌లు ఆప్‌ టికెట్‌పై పోటీ చేయనున్నారంటూ ఊహాగానాలు వచ్చాయి. 

న్యూఢిల్లీ: రానున్న పంజాబ్‌ అసెంబ్లీ ఎన్నికల్లో పంజాబ్‌ లోక్‌ కాంగ్రెస్‌(పీఎల్‌సీ)తో కలిసి బరిలోకి దిగనున్నట్లు బీజేపీ ప్రకటించింది. పీఎల్‌సీ చీఫ్, పంజాబ్‌ మాజీ సీఎం అమరీందర్‌ సింగ్‌తో బీజేపీ పంజాబ్‌ ఇంఛార్జ్‌ గజేంద్ర షెకావత్‌ సమావేశం అనంతరం రెండు పార్టీల మధ్య పొత్తును శుక్రవారం అధికారికంగా ప్రకటించారు. ఇరుపార్టీల పొత్తుతో రానున్న ఎన్నికల్లో గెలుపు ఖాయమని, సీట్ల పంపకాల వివరాలను సరైన సమయంలో వెల్లడిస్తామని వారు తెలిపారు. ముఖ్యమంత్రిగా రాజీనామా చేసిన అనంతరం కాంగ్రెస్‌ను వదిలిన అమరీందర్‌.. పంజాబ్‌ లోక్‌ కాంగ్రెస్‌ను స్థాపించారు. ఇక శిరోమణి అకాలీదళ్‌తో బీజేపీకి ఉన్న చిరకాల బంధం మూడు వ్యవసాయ చట్టాల సమస్యతో తెగిపోయింది. ఈ  నేపథ్యంలో ఎన్నికలు కూడా సమీపిస్తుండటంతో బీజేపీ, పీఎల్సీతో సంప్రదింపులు మొదలుపెట్టింది.

చండీగఢ్‌: అసెంబ్లీ ఎన్నికలు సమీపిస్తుండటంతో గెలుపే లక్ష్యంగా అధికార కాంగ్రెస్‌ పార్టీ పంజాబ్‌లో విద్యుత్‌ చార్జీలను తగ్గించింది. గృహ వినియోగదారులకు ఇచ్చే కరెంట్‌ను ఒక్కో యూనిట్‌కు రూ.3 తగ్గిస్తున్నట్లు పంజాబ్‌ ప్రభుత్వం సోమవారం ప్రకటించింది. చార్జీలు తగ్గించడంతో రాష్ట్ర ప్రభుత్వంపై అదనంగా ఏటా రూ.3,316 కోట్ల ఆర్థికభారం పడనుంది. చార్జీల తగ్గింపుతో రాష్ట్రంలోని 72 లక్షల గృహ వినియోగదారులకు లబ్ధి చేకూరుతుందని సీఎం చరణ్‌జీత్‌ చన్నీ చెప్పారు. 100 యూనిట్ల వరకు ఉన్న పవర్‌ టారీఫ్‌లో ఒక యూనిట్‌కు ఇప్పటిదాకా రూ.4.19 చార్జీ ఉండగా అది ఇకపై రూ.1.19గా ఉండనుంది. దీంతో ప్రతీ యూనిట్‌పై గృహ వినియోగదారులకు రూ.3 లబ్ధి చేకూరుతుంది. 101–300 యూనిట్ల టారిఫ్‌లో ఒక్కో యూనిట్‌కు రూ.4.01 వసూలు చేయనున్నారు. 300 యూనిట్లు మించితే ఒక్కో యూనిట్‌కు రూ.5.76 చెల్లించాల్సి ఉంటుంది. పంజాబ్‌లో విద్యుత్‌ చార్జీలు తగ్గించాలని కాంగ్రెస్‌ నేత నవ్‌జ్యోత్‌సింగ్‌ సిద్ధూ రాష్ట్రంలో సొంత కాంగ్రెస్‌ ప్రభుత్వంపైనే నిరసన జెండా ఎగరేసిన సంగతి తెల్సిందే. తాజా నిర్ణయంపై సిద్ధూ స్పందించారు. ఎన్నికలను దృష్టిలో పెట్టుకుని ప్రభుత్వం ప్రజలకు తాయిలాలు ప్రకటిస్తోందన్నారు.

చండీగఢ్‌: పంజాబ్‌ అసెంబ్లీ ఎన్నికలకు ఐదు నెలలే గడువు ఉండగా రాష్ట్ర కాంగ్రెస్‌లో తాజాగా మరో రాజకీయ సంక్షోభం నెలకొంది. పంజాబ్‌ ప్రదేశ్‌ కాంగ్రెస్‌ కమిటీ (పీసీసీ) అధ్యక్షుడిగా నియమితులై మూడు నెలలు తిరక్కుండానే నవజోత్‌ సింగ్‌ సిద్ధూ పదవికి రాజీనామా చేశారు. ఈ మేరకు  కాంగ్రెస్‌ పార్టీ అధ్యక్షురాలు సోనియాగాంధీకి రాజీనామా లేఖను  పంపించారు. ముఖ్యమంత్రిని మార్చడం ద్వారా పంజాబ్‌ తలనొప్పి వదలిపోయిందని ఊపిరి తీసుకున్న అధిష్టానానికి సిద్ధూ రాజీనామా గట్టి షాక్‌నిచ్చింది. ‘రాజీపడటం మొదలైతే వ్యక్తిత్వాన్ని కోల్పోతాం. పంజాబ్‌ రాష్ట్ర సంక్షేమం,  భవిష్యత్‌ విషయంలో నేను ఎన్నటికీ రాజీపడను. అందుకే పీసీసీ అధ్యక్ష పదవికి రాజీనామా చేస్తున్నాను. కాంగ్రెస్‌లోనే ఉంటూ పార్టీకి సేవలందిస్తాను’ అని సోనియాకు రాసిన రాజీనామా లేఖను మంగళవారం సోషల్‌ మీడియాలో సిద్ధూ షేర్‌ చేశారు.  సిద్ధూ రాజీనామా చేసిన కొన్ని గంటల్లోనే ఆయనకు మద్దతుగా చన్నీ కేబినెట్‌లో మంత్రి పదవి పొందిన రజియా సుల్తానా రాజీనామా చేశారు. సిద్ధూకి సంఘీభావంగాS రాజీనామా చేస్తున్నట్టుగా సీఎంకు పంపిన లేఖలో ఆమె పేర్కొన్నారు.  అమరీందర్‌ సింగ్‌ను ముఖ్యమంత్రి పదవి నుంచి దింపే వరకు నిత్య అసమ్మతివాదిగా కెప్టెన్‌పై విమర్శనాస్త్రాలు సంధిస్తూనే ఉన్న సిద్ధూ పీసీసీ అధ్యక్షుడయ్యాక సూపర్‌ చీఫ్‌ మినిస్టర్‌గా వ్యవహరిస్తున్నారన్న ఆరోపణలున్నాయి. ఇప్పుడు హఠాత్తుగా పీసీసీ పదవికే రాజీనామా చేసి కాంగ్రెస్‌ అధిష్టానంపై గుగ్లీ విసిరారు. అన్నీ సర్దుకుంటాయి: కాంగ్రెస్‌: సిద్ధూ రాజీనామా విషయంలో కాంగ్రెస్‌ వేచిచూసే ధోరణిని అవలంభిస్తోంది. రాజీనామాను ‘భావోద్వేగ స్పందన’గా కాంగ్రెస్‌ ప్రధాన కార్యదర్శి కేసీ వేణుగోపాల్‌ అభివర్ణించారు. అన్నీ సర్దుకుంటాయని చెప్పారు. కాంగ్రెస్‌ అధ్యక్షురాలు సోనియా గాంధీ ఈ అంశంపై పార్టీ నేతలతో సమాలోచనలు జరిపారని, సిద్ధూను బుజ్జగించే ప్రయత్నాలు చేస్తారని పార్టీవర్గాలు తెలిపాయి. ప్రియాంక గాంధీ... సిద్ధూతో మాట్లాడతారని, రాజీనామా వెనక్కి తీసుకోవాలని కోరతారని చెప్పాయి. ఎందుకీ నిర్ణయం ?  పంజాబ్‌  కేబినెట్‌ విస్తరణ జరిగిన రెండు రోజులకే సిద్ధూ పీసీసీ చీఫ్‌గా రాజీనామా చేయడంతో రకరకాల విశ్లేషణలు వెలువడుతున్నాయి. అమరీందర్‌సింగ్‌ స్థానంలో సిద్ధూకి  సన్నిహితుడైన దళిత నాయకుడు చరణ్‌జిత్‌ సింగ్‌ చన్నీ ముఖ్యమంత్రి అయినప్పటికీ ఆయన కేబినెట్‌ మంత్రుల విషయంలో  సిద్ధూ మాటల్ని అధిష్టానం పట్టించుకోలేదు. కేబినెట్‌ కూర్పు అంతా రాహుల్‌ గాంధీ ఇష్టం మేరకే సాగింది. వచ్చే ఏడాది ఎన్నికల్లో కాంగ్రెస్‌ పార్టీ గెలిస్తే సీఎం పీఠాన్ని ఆశిస్తున్న సిద్ధూ ఇటీవల జరిగిన మంత్రివర్గ విస్తరణ, ఇతర అధికారిక నియామకాల్లో తన మాట చెల్లుబాటు కాలేదని అసహనంగా ఉన్నట్టు రాజకీయ పరిశీలకులు భావిస్తునారు.   ►సిద్ధూ ఇష్టానికి వ్యతిరేకంగా రాష్ట్ర ఉప ముఖ్యమంత్రిగా సుఖ్‌జీందర్‌ సింగ్‌ రాంధావాను అధిష్టానం ఎంపిక చేసింది. ఆయన జాట్‌ సిక్కు కావడం సిద్ధూకి మింగుడు పడలేదు. సిద్ధూ కూడా జాట్‌ సిక్కు కావడంతో వచ్చే ఎన్నికల్లో కాంగ్రెస్‌ గెలిస్తే సీఎంగా ఉండాలన్న తన కల నెరవేరడానికి రాంధావా అడ్డు పడతారని సిద్ధూ భావిస్తున్నారు. పైగా మంగళవారం జరిపిన శాఖల కేటాయింపుల్లో రాంధావాకు అత్యంత ముఖ్యమైన హోంశాఖను కట్టబెట్టారు.   ►సిద్ధూ తనకు నమ్మకస్తులైన కుల్‌జిత్‌ సింగ్‌ నగ్రా, సుర్జిత్‌ సింగ్‌ ధైమన్‌కు కేబినెట్‌లో చోటు కోసం ప్రయత్నించి విఫమయ్యారు  ►సిద్ధూ అనుచరులకు మంత్రి పదవులు లభించకపోగా తాను తీవ్రంగా వ్యతిరేకించిన,  ఇసుక మైనింగ్‌లో అవినీతి ఆరోపణలు ఎదుర్కొంటున్న రాణా గుర్జీత్‌సింగ్‌కు కేబినెట్‌లో చోటు దక్కడం పుండు మీద కారం చల్లినట్టుగా అయింది. అక్ర మ మైనింగ్‌పై పోరాడుతున్న సిద్ధూ... రాణా కు మంత్రిపదవి ఇవ్వడాన్ని సహించలేకపోయారు.   ►ముఖ్యమంత్రిగా తాను మద్దతు ఇచ్చిన చన్నీ వివిధ పదవుల నియామకంలో తనకు నచ్చినవారికే కట్టబెట్టడం సిద్ధూకి మింగుడు పడడం లేదు.  రాష్ట్ర డీజీపీగా సిద్ధార్థ చటోపాధ్యాయ, అడ్వొకేట్‌ జనరల్‌గా పట్వాలియాను నియమించాలన్న సిద్ధూ సూచనల్ని సీఎం పట్టించుకోలేదు. డీజీపీగా ఇక్బాల్‌ సిహŸతా, రాష్ట్ర అడ్వొకేట్‌ జనరల్‌గా డియోల్‌ను నియమించారు. డియోల్‌ నియామకంపై సిద్ధూ అసంతృప్తిగా ఉన్నారు. విజిలెన్స్‌ కేసుల్లో ఇరుక్కున్న మాజీ డీజీపీ సుమేధ్‌సింగ్‌ సైనికి న్యాయవాదిగా వ్యవహరించి.. ఆయనని ఆ కేసుల నుంచి డియోల్‌ బయటపడేశారు. అలాంటి వ్యక్తికి అత్యున్నత స్థాయి పదవి కట్టబెట్టడాన్ని సిద్ధూ తీవ్రంగా వ్యతిరేకిస్తున్నారు. –నేషనల్‌ డెస్క్, సాక్షి  నేను చెప్పానా.. ముందే చెప్పానా!  సిద్ధూఅసమ్మతి సెగలకు ఉక్కిరిబిక్కిరై.. అవమాన భారాన్ని భరించలేక సీఎం పదవిని వీడిన కెప్టెన్‌ అమరీందర్‌ సింగ్‌ సిద్ధూ రాజీనామాపై వ్యంగ్యాస్త్రాలు ఎక్కు పెట్టారు. సిద్ధూ ఇచ్చిన ఝలక్‌ నుంచి ఇంకా తేరుకోని అధిష్టానాన్ని ఉద్దేశిస్తూ ఒక ట్వీట్‌ చేశారు. ‘మీకు ముందే చెప్పాను. సిద్ధూకి స్థిరత్వం లేదు. సరిహద్దు రాష్ట్రమైన పంజాబ్‌కి అతను తగిన వ్యక్తి కాదు’ అని ఆ ట్వీట్‌లో పేర్కొన్నారు. ఆ తర్వాత వ్యక్తిగత పర్యటన మీద ఢిల్లీ చేరుకున్న అమరీందర్‌ విలేకరులతో మాట్లాడారు. పార్టీకి అధ్యక్ష పదవిని చేపట్టి మూడు నెలలు తిరక్కుండా వెళ్లిపోతే అతనిపై ఎవరికి నమ్మకం ఉంటుందని ప్రశ్నించారు. కాంగ్రెస్‌ను వీడి మరో పార్టీతో చేతులు కలపడానికి సిద్ధూ సిద్ధమవుతున్నారని ఆరోపించారు. ఆప్‌ చీఫ్‌ కేజ్రీవాల్‌ పంజాబ్‌ పర్యటనకు ఒక్క రోజు ముందే సిద్ధూ రాజీనామా చేసిన నేపథ్యంలో అమరీందర్‌ చేసిన ఆరోపణలు రాజకీయంగా కలకలం రేపుతున్నాయి.    ఢిల్లీకి అమరీందర్‌  అమరీందర్‌ మంగళవారం ఢిల్లీకి చేరుకున్నారు. సెప్టెంబర్‌ 18న సీఎం పదవికి రాజీనామా చేసిన తర్వాత ఆయన ఢిల్లీకి వెళ్లడం ఇదే తొలిసారి. అమరీందర్‌ బీజేపీలో చేరుతారని, కేంద్ర హోంశాఖ మంత్రి అమిత్‌ షా, బీజేపీ జాతీయ అధ్యక్షుడు జేపీ నడ్డాను కలవడానికే ఢిల్లీకి వెళుతున్నారని ప్రచారం జరిగింది. అయితే అమరీందర్‌ మీడియా సలహాదారు రవీణ్‌ తుక్రల్‌ అలాంటిదేమీ లేదని కొట్టిపారేశారు. వ్యక్తిగత పనుల నిమిత్తమే అమరీందర్‌ ఢిల్లీకి వెళ్లారని చెప్పారు. ‘ఇది ఆయన వ్యక్తిగత పర్యటన. దాంతో పాటు ఢిల్లీలోని కపుర్తలా హౌస్‌ (ఢిల్లీలో పంజాబ్‌ సీఎం అధికారిక నివాసం)ను ఖాళీ చేసి కొత్త సీఎం చన్నీకి అప్పగిస్తారు’ అని తుక్రల్‌ ట్వీట్‌ చేశారు. అమరీందర్‌ చండీగఢ్‌ విమానాశ్రయంలో విలేకరులతో మాట్లాడుతూ తన పర్యటనపై అనవసరమైన ఊహాగానాలు చెయ్యొద్దని కపుర్తలా హౌస్‌ను ఖాళీ చేయడానికే వెళుతున్నానని చెప్పారు. అమరీందర్‌ ఢిల్లీకి వెళ్లడానికి విమానాశ్రయానికి వెళ్లినప్పుడే హిమాచల్‌ప్రదేశ్‌ నుంచి ఢిల్లీ వెళ్లడం కోసం కాంగ్రెస్‌ అధ్యక్షురాలు సోనియాగాంధీ, పార్టీ నాయకుడు రాహుల్‌ గాంధీ కూడా విమానాశ్రయానికి చేరుకోవడం విశేషం.  

న్యూఢిల్లీ: పంజాబ్‌ పీసీసీ అధ్యక్షుడిగా నవజ్యోత్‌ సింగ్‌ సిద్ధూని కాంగ్రెస్‌ అధిష్టానం ఎంపిక చేసింది. రాష్ట్ర కాంగ్రెస్‌లో సిద్ధూ, ముఖ్యమంత్రి అమరీందర్‌ సింగ్‌ల మధ్య తీవ్ర స్థాయిలో విబేధాలు నెలకొని ఉన్న సమయంలో పార్టీ చీఫ్‌ సోనియాగాంధీ ఈ నిర్ణయం తీసుకున్నారు. వచ్చే సంవత్సరం పంజాబ్‌లో అసెంబ్లీ ఎన్నికలు జరగనున్నాయి. పీసీసీ చీఫ్‌గా సిద్దూని నియమించిన సోనియా.. మరో నలుగురిని కార్యనిర్వాహక అధ్యక్షులుగా నియమించారు. వివిధ సామాజిక సమీకరణాలను పరిగణనలోకి తీసుకుని సంగత్‌ సింగ్‌ గిల్జియాన్, సుఖ్వీందర్‌ సింగ్‌ డానీ, పవన్‌ గోయెల్, కుల్జీత్‌ సింగ్‌ నాగ్రాలను వర్కింగ్‌ ప్రెసిడెంట్స్‌గా నియమించారు. ఒకే పార్టీలో కీలక నేతలుగా ఉన్న అమరీందర్‌ సింగ్, నవజ్యోత్‌ సింగ్‌ సిద్ధూ బహిరంగంగానే పరస్పరం విమర్శలు, ఆరోపణలు చేసుకుంటున్న విషయం తెలిసిందే. రాష్ట్ర కాంగ్రెస్‌ కూడా వారిద్దరి మద్దతుదారులతో రెండు వర్గాలుగా విడిపోయిన పరిస్థితి నెలకొంది. వారిద్దరి మధ్య సయోధ్య కోసం పార్టీ అధిష్టానం కూడా ప్రయత్నించింది. ‘పంజాబ్‌ ప్రదేశ్‌ కాంగ్రెస్‌ కమిటీ అధ్యక్షుడిగా, తక్షణమే అమల్లోకి వచ్చేలా, నవజ్యోత్‌ సింగ్‌ సిద్ధూని నియమిస్తున్నాం’ అని కాంగ్రెస్‌ పార్టీ ఆదివారం ఒక ప్రకటన విడుదల చేసింది. ఇప్పటివరకు పీసీసీ చీఫ్‌గా ఉన్న సునీల్‌ జాఖడ్‌ సేవలను ఈ ప్రకటనలో పార్టీ కొనియాడింది. 2017లో గత అసెంబ్లీ ఎన్నికల ముందు సిద్ధూ బీజేపీని వీడి కాంగ్రెస్‌లో చేరారు. ఆ తరువాత క్రమంగా, పార్టీలో పట్టు సాధించారు. పీసీసీ చీఫ్‌ నియామకం విషయంలో సీఎం అమరీందర్‌ సింగ్‌ వ్యతిరేకతను కాదని, సిద్ధూ వైపే అధిష్టానం మొగ్గు చూపడం గమనార్హం. రానున్న అసెంబ్లీ ఎన్నికల్లో సిద్ధూ నాయకత్వంతో పార్టీ శ్రేణులు కొత్త ఉత్సాహంతో పనిచేస్తాయని అధిష్టానం భావించినట్లు తెలుస్తోంది. సిద్ధూ ప్రసంగ శైలి ప్రజలను ఆకట్టుకుంటుందని, ఎన్నికల ప్రచారంలో సిద్ధూ సేవలు అవసరమని సోనియాగాంధీ తదితర సీనియర్‌ నాయకులు విశ్వసించారని పార్టీ వర్గాలు తెలిపాయి. రాహుల్‌ గాంధీ, ప్రియాంక గాంధీ వాద్రా కూడా సిద్ధూ వైపే మొగ్గు చూపారని వెల్లడించాయి. అమరిందర్‌ సింగ్‌తో సయోధ్య, ఒకవేళ అది కుదరని పక్షంలో ఆయన వర్గీయుల వ్యతిరేకతను తట్టుకుని పార్టీని ఏకం చేయడం, పార్టీ నాయకులను, కార్యకర్తలను ఎన్నికల కోసం సిద్ధం చేయడం నూతనంగా పార్టీ రాష్ట్ర అధ్యక్ష బాధ్యతలను స్వీకరిస్తున్న నవజ్యోత్‌ సింగ్‌ సిద్ధూ ముందున్న ప్రధాన సవాళ్లు. తనపై చేసిన ఆరోపణలు తప్పు అని అంగీకరిస్తూ, బహిరం గంగా క్షమాపణలు కోరితే తప్ప సిద్ధూని కలిసే ప్రసక్తే లేదని ఇటీవల ఢిల్లీలో పార్టీ చీఫ్‌ సోనియాతో సీఎం అమరీందర్‌ చెప్పారని సమాచారం. సీనియర్‌ నేతల మధ్య విబేధాలు తొలగనట్లయితే, రానున్న ఎన్నికల్లో పార్టీ అధికారం కోల్పోవడం ఖాయమని సీనియర్లు హెచ్చరిస్తున్నారు. అమరీందర్‌ ప్రభుత్వంలో మంత్రిగా సిద్ధూ ఉన్నప్పటి నుంచే వారి మధ్య విబేధాలు ఉన్నాయి. అమరీందర్‌ వ్యతిరేకతను పట్టించుకోకుండా, అయన మంత్రివర్గంలో ఉన్న సిద్ధూ పాక్‌ ప్రధానిగా ఇమ్రాన్‌ ప్రమాణ స్వీకార కార్యక్రమానికి హాజరు కావడం, పాక్‌ ఆర్మీ చీఫ్‌ బాజ్వాను కౌగిలించుకోవడం.. మొదలైనవి ఇరువురి మధ్య విబేధాలు తీవ్రమవడానికి కారణమయ్యాయి.   

సాక్షి, న్యూఢిల్లీ: వచ్చే ఏడాది అసెంబ్లీ ఎన్నికలు జరుగనున్న పంజాబ్‌లో రాజకీయ పరిణామాలు చాలా వేగంగా మారుతున్నాయి. అధికార కాంగ్రెస్‌లో ముఖ్యమంత్రి కెప్టెన్‌ అమరీందర్‌ సింగ్, నవజ్యోత్‌ సింగ్‌ సిద్ధూ మధ్య నెలకొన్న ప్రతిష్టంభనను తెరదించేందుకు అధిష్టానం సర్వశక్తులు ఒడ్డుతోంది. అందులోభాగంగా ఎన్నికలకు కెప్టెన్‌ సారథ్యం వహిస్తారని, సిద్ధూకి పీసీసీ అధ్యక్ష పదవి వంటి కీలక బాధ్యతలు అప్పగించే అవకాశాలున్నాయంటూ పార్టీ రాష్ట్ర వ్యవహారాల ఇంఛార్జ్‌ హరీష్‌ రావత్‌ గురువారం ఇచ్చిన స్నిగల్‌ పరిస్థితిని చక్కదిద్దకపోగా, మరింత ఆందోళనలకు కారణమైంది. కెప్టెన్‌ అమరీందర్‌పై సిద్ధూ అసంతృప్తి, తిరుగుబాటు శైలిని చూసి రాష్ట్ర పార్టీ బాధ్యతలు అప్పగించాలనుకున్న హైకమాండ్‌ ప్లాన్‌ క్యాంపు రాజకీయాలకు ఆజ్యం పోసినట్లయింది. సిద్ధూ, కెప్టెన్‌ తమకు అనుకూలంగా ఉన్న మంత్రులు, శాసనసభ్యులతో క్యాంపు సమావేశాలు జరిపారు.   నవ్‌జ్యోత్‌సింగ్‌ సిద్ధూ శుక్రవారం ఢిల్లీలో సోనియాగాంధీని కలవడం రాజకీయ ప్రాధాన్యం సంతరించుకుంది. సిద్ధూ అంతకుముందు జూన్‌ 30 న ఢిల్లీకి వచ్చి ప్రియాంకా గాంధీని కలిశారు. అదే సమయంలో కెప్టెన్‌ అమరీందర్‌ సింగ్‌ సైతం పార్టీ అధినేత్రితో భేటీ అయ్యారు. సోనియాతో జరిగిన సమావేశంలో రాహుల్‌గాంధీ, పార్టీ రాష్ట్ర వ్యవహారాల ఇంఛార్జ్‌ హరీష్‌ రావత్‌ పాల్గొన్నారు. కాగా సిద్ధూ సోనియాగాంధీని కలిసే ముందే ముఖ్యమంత్రి కెప్టెన్‌ అమరీందర్‌ పార్టీ అధినేత్రికి ఒక లేఖ పంపించారని తెలిసింది.   వచ్చే ఏడాది జరిగే పంజాబ్‌ అసెంబ్లీ ఎన్నికల్లో పార్టీ గెలుపుకు కెప్టెన్, సిద్ధూలు కలిసి పనిచేయగల శాంతి సూత్రాన్ని కేంద్ర నాయకత్వం రూపొందిస్తోందని రావత్‌ అభిప్రాయపడ్డారు. సమావేశం తరువాత మీడియాతో మాట్లాడిన రావత్‌ ‘నేను పంజాబ్లో పార్టీకి సంబంధించి నివేదికను సమర్పించడానికి పార్టీ అ«ధినేత్రిని కలిశాను. పంజాబ్‌ కాంగ్రెస్‌ విషయంలో పార్టీ అధ్యక్షురాలు తీసుకున్న నిర్ణయం గురించి నాకు సమాచారం వచ్చిన వెంటనే, మీ అందరికీ చెబుతాను’అని అన్నారు. అంతేగాక సిద్ధూను పంజాబ్‌ కాంగ్రెస్‌ అధ్యక్షునిగా చేస్తున్నారంటూ తను చేసిన వ్యాఖ్యలను మీడియా తప్పుగా అర్థం చేసుకుందన్నారు. కాగా, పంజాబ్‌లో సిద్ధూ, ఆయన ప్రత్యర్థి శిబిరం మధ్య పోస్టర్‌ల యుద్ధం మొదలైంది. సిద్ధూ మద్దతుదారులు అమృత్‌సర్, లూధియానాతో సహా పంజాబ్‌లోని పలు చోట్ల వేసిన పోస్టర్లలో లూధియానాలో కొన్ని పోస్టర్లను చింపేశారు. పార్టీ తీసుకొనే కొన్ని నిర్ణయాలపై పంజాబ్‌ ముఖ్యమంత్రి కెప్టెన్‌ అమరీందర్‌ సింగ్‌ అసంతృప్తిగా ఉన్నారన్న ఊహాగానాలకు హరీష్‌ రావత్‌ తెరదించారు. ఈ విషయంలో కెప్టెన్‌కి ఏదైనా కమ్యూనికేషన్‌ గ్యాప్‌ ఉంటే, దాన్ని సరిదిద్దడానికి ప్రయత్నిస్తామని రావత్‌ అన్నారు.   మరోవైపు ముఖ్యమంత్రి కెప్టెన్‌ అమరీందర్‌ సింగ్‌కు సన్నిహితుడైన ఎంపీ,  సీనియర్‌ నేత మనీష్‌ తివారీ కూడా ఈ వివాదంలో తనదైన శైలిలో అభిప్రాయాన్ని వ్యక్తపరిచారు.  సామాజిక సమూహాల మధ్య సమతుల్యతను కాపాడటం ముఖ్యమని, సమానత్వం సామాజిక న్యాయానికి పునాది అని వ్యాఖ్యానించారు. పంజాబ్‌లో సిక్కులు 57.75 శాతం, హిందువులు 38.49 శాతం, దళితులు 31.94 శాతం ఉన్నారని తెలిపారు. లోక్‌సభ సభ్యుడు మనీష్‌ తివారీ తన ట్వీట్‌లో కాంగ్రెస్‌ పంజాబ్‌ ఇన్‌ఛార్జ్‌ హరీష్‌ రావత్‌ను ట్యాగ్‌ చేశారు. దీంతో సిద్ధూకి చెక్‌ పెట్టేలా సీఎం అమరీందర్‌కు అనుకూలంగా తివారీ ఈ ట్వీట్‌ చేసినట్లు భావిస్తున్నారు.  


 ► రిజర్వుడు నియోజకవర్గాలపై టీపీసీసీ దృష్టి
 ► ఏఐసీసీ పర్యవేక్షణలో అమలు
 ► ఇప్పటికే కొన్ని జిల్లాల్లో పర్యటించిన టీపీసీసీ సమన్వయకర్త
 
 సాక్షి, హైదరాబాద్‌: రాష్ట్రంలోని రిజర్వుడు నియోజకవర్గాలను వచ్చే ఎన్నికల్లో కైవసం చేసుకోవడానికి కాంగ్రెస్‌ పార్టీ ప్రత్యేక వ్యూహాన్ని అమలుచేయనుంది. దేశవ్యాప్తంగా అమలు చేయాలనుకుంటున్న ఈ వ్యూహం ఇటీవల జరిగిన పంజాబ్‌ అసెంబ్లీ ఎన్నికల్లో సత్ఫలితాలనిచ్చింది. అదే స్ఫూర్తితో తెలంగాణలోనూ ఈ వ్యూహాన్ని అమలు చేయడానికి టీపీసీసీ నిర్ణయించింది. ఈ వ్యూహాన్ని ఏఐసీసీ స్థాయిలో ఎప్పటికప్పుడు పర్యవేక్షించాలని నిర్ణయం తీసుకున్నారు. దేశవ్యాప్తంగా పార్టీ బలోపేతం కోసం రాహుల్‌ గాంధీ కొత్త విధానాలు ప్రవేశపెడుతున్నారని, దీనిలో భాగంగానే రాష్ట్రంలోనూ పలు సంస్కరణలను, వ్యూహాలను అమలు చేయాలని నిర్ణయించారని టీపీసీసీ ముఖ్యుడొకరు వెల్లడించారు.
 దేశవ్యాప్త వ్యూహంలో భాగంగా‘లీడర్‌ షిప్‌ డెవలప్‌ మెంట్‌ మిషన్‌’పేరుతో రిజర్వుడు నియోజకవర్గాల్లో క్షేత్రస్థాయిలో పనిచేసి, మొదటగా పంజాబ్‌లో దీనిని కాంగ్రెస్‌ అమలుచేసింది. ఇటీవల పంజాబ్‌లో జరిగిన ఎన్నికల్లో 33 రిజర్వుడు నియోజకవర్గాలలో ఈ వ్యూహాన్ని అమలుచేయగా 23 స్థానాల్లో కాంగ్రెస్‌ పార్టీ విజయాన్ని సాధించింది. ఇదే ఫార్ములాను తెలంగాణలో అమలు చేయనున్నారు. దీనిలో భాగంగా ఏఐసీసీ నుంచి ఒకరు కన్వీనరుగా, రాష్ట్రం నుంచి ఒకరు సమన్వయకర్తగా వ్యవహరిస్తారు. జాతీయ స్థాయిలో ఏఐసీసీ ఎస్సీ సెల్‌ చైర్మన్‌ కొప్పుల రాజు అన్ని రాష్ట్రాల్లో ఈ ఫార్ములా అమలుకోసం పనిచేస్తున్నారు. ఈ నేపథ్యంలో ఆయన తెలంగాణపై దృష్టిపెట్టారు.
 
 31 నియోజకవర్గాలు..310 మంది...
 రాష్ట్రంలో 31 ఎస్సీ, ఎస్టీ నియోజకవర్గాలు ఉన్నాయి. వ్యూహంలో భాగంగా టీపీసీసీ నిర్ధిష్టమైన కార్యాచరణతో పనిచేయనుంది. టీపీసీసీ నుంచి ప్రధాన కార్యదర్శి వేణుగోపాల్‌రావు సమన్వయకర్తగా వ్యవహరించనున్నా రు. ఇప్పటికే ఆయన కరీంనగర్, వరంగల్, నిజామాబాద్, హైదరాబాద్‌ పాత జిల్లాల్లోని రిజర్వుడు నియోజకవర్గాల్లో పర్యటించారు. మిగిలిన జిల్లాల్లో కూడా పర్యటన పూర్తయిన తరువాత నియోజకవర్గాల స్వరూపంపై దృష్టిపెట్టనున్నారు. ఈ ఫార్ములాలో భాగంగా ముందుగా ప్రతీ నియోజవర్గం నుంచి పదిమంది కార్యకర్తలను ఎంపిక చేసుకుంటారు. ఆయా నియోజకవర్గాల్లో రిజర్వుడు సామాజిక వర్గాలను కాకుండా ఇతర బలమైన సామాజికవర్గాలను ఎంపిక చేసుకుంటారు.
 మొత్తం 31 నియోజకవర్గాలకు గాను 310 మందిని ఎంపిక చేసుకున్న తరువాత నేరుగా ఏఐసీసీ ఉపాధ్యక్షుడు రాహుల్‌ గాంధీతో వీరి సమావేశం ఏర్పాటు చేస్తారు. వీరికి ప్రత్యేకంగా రెండు రోజుల పాటు శిక్షణ కూడా ఉంటుంది. శిక్షణ పూర్తయిన తర్వాత ఈ పది మంది నియోజకవర్గాల్లో పర్యటిస్తారు. వీరు ప్రతీ గ్రామంలో ఐదు నుంచి పది మందిని ఎంపిక చేసుకుని, వారిని పార్టీకోసం పనిచేసే విధంగా సిద్ధం చేస్తారు.
 వీరంతా పార్టీ నియోజకవర్గ ఇన్‌చార్జ్‌కు లేదా ఎమ్మెల్యే అభ్యర్థికి ఎప్పటికప్పుడు సమాచారాన్ని ఇవ్వడంతో పాటు పార్టీ విస్తరణ, అభివృద్ధి కార్యక్రమాలకోసం సలహాలను ఇస్తారు. దీనితోపాటు ఎన్నికల్లో పోటీచేసే అభ్యర్థికి ఆర్థికంగా ఏఐసీసీ, టీపీసీసీ నుంచి నేరుగా సహాయం అందించాలని కూడా నిర్ణయించారు. ఈ వ్యూహంలో ఏఐఐసీ పర్యవేక్షణ ఉన్నా టీపీసీసీ ప్రధానపాత్ర పోషించనుంది. ఈ వ్యూహం కచ్చితంగా సానుకూల ఫలితాలను ఇస్తుందనే విశ్వాసంతో టీపీసీసీ ఉంది.


 ► మీడియా సర్వే అంచనా
 ► పంజాబ్‌లో 75%, గోవాలో 83% పోలింగ్‌
 న్యూఢిల్లీ/చండీగఢ్‌/పణజి: నోట్ల రద్దు పరిణామాలతో బీజేపీకి, ప్రధాని మోదీకి ప్రతిష్టాత్మకంగా మారిన పంజాబ్‌ అసెంబ్లీ ఎన్నికలు సంచలన తీర్పు ఇవ్వనున్నాయా? పదేళ్లుగా అధికారంలో కొనసాగుతున్న శిరోమణి అకాలీ దళ్‌(ఎస్‌ఏడీ)–బీజేపీ కూటమి దారుణంగా ఓడిపోనుందా? విపక్ష  కాంగ్రెస్, ఆమ్‌ ఆద్మీ పార్టీ(ఆప్‌) మధ్య హోరాహోరీ పోరు సాగి, ఆప్‌ అతిపెద్ద పార్టీగా అవతరించనుందా? శనివారం పంజాబ్‌ అసెంబ్లీ ఎన్నికలు ముగిశాక మీడియా ప్రతినిధులు పలు ప్రాంతాల్లో జరిపిన సర్వే ఫలితాలు ఈ ప్రశ్నలకు అవుననే సమాధానం చెబుతున్నాయి. అకాలీ–బీజేపీ, కాంగ్రెస్, ఆప్‌ల మధ్య త్రిముఖ పోటీలో ఆప్‌ పైచేయి సాధిస్తుందని పలువురు ఓటర్లు చెప్పారు. కాంగ్రెస్‌కు కూడా విజయావకాశాలు ఉన్నాయని కొందరు చెప్పగా, అధికార కూటమికి ఫలితాలు తీసికట్టుగా ఉంటాయని సర్వేలో పాల్గొన్న వారిలో చాలామంది చెప్పారు.
 మొత్తం 117 సీట్లకుగాను చీపురు పార్టీకి(ఆప్‌) దాదాపు 60, హస్తానికి 40 వస్తాయన్నారు. మార్పు కోసం తాము ఆప్‌ ‘జాడూ’కు ఓటేశామని పలువురు తెలిపారు. దాదాపు 800 జనాభా ఉన్న ఒక గ్రామంలో అయితే ఏకంగా 600 మంది కేజ్రీ పార్టీకి ఓటేసి ఉంటారని స్థానికులు చెప్పారు. పదేళ్ల ప్రభుత్వంపై వ్యతిరేకత చాలామందిలో కనిపించింది. రాష్ట్రం అవినీతి, నిరుద్యోగంతో కుదేలైందని, నోట్ల రద్దుతో చిన్నవ్యాపారాలు దెబ్బతిన్నాయని అన్నారు. అవినీతి ప్రక్షాళనకు నడుం కట్టిన ఆప్‌కు ఒకసారి అవకాశమిచ్చి చూడాలనుకుంటున్నామని చెప్పారు. గత లోక్‌సభ ఎన్నికల్లో పంజాబ్‌లో 4 స్థానాలు గెలుచుకున్న ఆప్‌.. రాష్ట్ర అసెంబ్లీ ఎన్నికల్లో తొలిసారి బరిలోకి దిగి 112 సీట్లలో పోటీ చేసింది. దాని మిత్రపక్షం లోన్ ఇన్సాఫ్‌ 5 స్థానాల్లో బరిలో ఉంది.
 
 ప్రశాంతంగా పోలింగ్‌
 నోట్ల రద్దు తర్వాత దేశంలో తొలిసారి శనివారం రెండు రాష్ట్రాల్లో జరిగిన అసెంబ్లీ ఎన్నికల్లో రికార్డు స్థాయి పోలింగ్‌ నమోదైంది. పంజాబ్‌లో 75 శాతం, గోవాలో 83 శాతం మంది ఓటేశారు. 117 స్థానాలున్న పంజాబ్‌లో 1,145 మంది, 40 స్థానాలున్న గోవాలో 251 మంది అభ్యర్థులు పోటీలో నిలిచారు. చెదురుమదురు ఘటనలు మినహా రెండు రాష్ట్రాల్లో పోలింగ్‌ ప్రశాంతంగా ముగిసింది. మార్చి 11న ఎన్నికల ఫలితాలు వెలువడనున్నాయి.  పంజాబ్‌లో ప్రాథమిక వివరాల ప్రకారం సుమారు 75 శాతం పోలింగ్‌ నమోదైంది. సంగ్రూర్‌ జిల్లా సుల్తాన్ పూర్‌ గ్రామంలో ఆప్, కాంగ్రెస్‌ కార్యకర్తల మధ్య ఘర్షణల్లో ఇద్దరు గాయపడ్డారు.  తరన్ తారన్  జిల్లా లాలూ గుమాన్లో అకాలీదళ్‌ మద్దతుదారుడు పోలింగ్‌ బూత్‌ వద్ద కాల్పులు జరపడంతో కాంగ్రెస్‌ కార్యకర్త ఒకరు గాయపడ్డారు. ఫతేఘర్‌ చురియన్ నియోజకవర్గంలోని రోపోవాలి గ్రామంలో కాంగ్రెస్, అకాలీదళ్‌ కార్యకర్తలకు మధ్య జరిగిన ఘర్షణల్లో ఆరుగురు గాయపడ్డారు.
 
 ‘సాంకేతిక’ ఇబ్బందులు
 పంజాబ్‌ ఎన్నికల్లో ఓటు ఎవరికి వేశామో తెలియజేసే ఓటర్‌ వెరిఫైడ్‌ పేపర్‌ ఆడిట్‌ ట్రయల్‌(వీవీపీఏటీ) యంత్రాలను తొలిసారిగా వినియోగించారు. 6వేలకుపైగా పోలింగ్‌ బూత్‌లలో వాడారు. మజితా, సంగ్రూర్‌ల్లోని కొన్ని చోట్ల వీవీపీఏటీ యంత్రాల్లో సాంకేతిక ఇబ్బందులు తలెత్తాయని, దీనిని ఎన్నికల సంఘానికి తెలియజేశామని అధికారులు చెప్పారు.
 
 యంత్రాల్లో సాంకేతిక సమస్యలతో చాలా ప్రాంతాల్లో పోలింగ్‌కు అంతరాయం కలిగిందని పంజాబ్‌ ముఖ్య ఎన్నికల అధికారి వీకే సింగ్‌ చెప్పారు. అమృత్‌సర్‌ లోక్‌సభ స్థానానికి ఉప ఎన్నికలకు కట్టుదిట్టమైన భద్రత మధ్య పోలింగ్‌ జరిగింది. పంజాబ్, గోవా ఎన్నికలు అద్భుతమని, అవి ఒక విప్లవంలా సాగాయని  కేజ్రీవాల్‌ చెప్పారు. తామే అధికారంలోకి వస్తామన్నారు. పోలింగ్‌ ప్రశాంతంగా సాగినందుకు పంజాబ్‌ సీఎం ప్రకాశ్‌ సింగ్‌ బాదల్‌ ప్రజలకు ధన్యవాదాలు తెలిపారు.
 
 గోవాలో రికార్డు పోలింగ్‌
 గోవాలో రికార్డు స్థాయిలో 83 శాతం పోలింగ్‌ నమోదైంది. ఇంత ఎక్కువ పోలింగ్‌ శాతం నమోదవడం ఇక్కడ ఇదే మొదటిసారి. బీజేపీ, కాంగ్రెస్, ఆప్‌తో పాటు ఎంజీపీ–శివసేన–జీఎస్‌ఎం పార్టీల కూటమి కూడా పోటీ పడటంతో పోరు ఉత్కంఠభరితంగా సాగినా.. పోలింగ్‌ ప్రశాంతంగా ముగిసింది. ప్రాథమిక అంచనా ప్రకారం 83 శాతం పోలింగ్‌ నమోదైనా.. ఇది మరింత పెరిగే అవకాశం ఉందని ఈసీ వర్గాలు తెలిపాయి. పణజీలో ఓటు హక్కు వినియోగించుకోవడానికి పోలింగ్‌ బూత్‌ బయట నిలబడిన 78 ఏళ్ల వృద్ధుడు గుండెపోటుతో మరణించాడు. 2012 అసెంబ్లీ ఎన్నికల్లో గోవాలో 81.8 శాతం పోలింగ్‌ నమోదైంది.


 పంజాబ్‌ ఎన్నికల ప్రచారంలో భాగంగా ఢిల్లీ సీఎం అరవింద్‌ కేజ్రీవాల్‌ శనివారం రాత్రి ఓ మాజీ మిలిటెంట్‌ నివాసంలో బస చేయడం తీవ్ర దుమారం రేపుతోంది. ఎన్నికల్లో లబ్ధి పొందేందుకు రాడికల్స్‌తో కేజ్రీవాల్‌ రాసుకుపూసుకు తిరుగుతున్నారని అకాలీదళ్‌, కాంగ్రెస్‌ పార్టీ మండిపడుతున్నాయి.
 
 పంజాబ్‌లోని జిరాలో ఎన్నికల సభలో పాల్గొన్న అనంతరం రహస్యంగా మోగాకు చేరుకున్న కేజ్రీవాల్‌ శనివారం రాత్రి.. ఖలిస్థాన్‌ కమాండో ఫోర్స్‌ (కేసీఎఫ్‌) మిలిటెంట్‌ గురిందర్‌ సింగ్‌ నివాసంలో విశ్రాంతి తీసుకున్నారని పోలీసు వర్గాలు తెలిపాయి. మిలిటెంట్‌ కేసు నుంచి బయటపడిన గురిందర్‌ సింగ్‌ ప్రస్తుతం ఇంగ్లండ్‌లో ఉంటున్నారు. మోగలోని తన స్వగ్రామం ఘాల్‌లో ఉన్న నివాసాన్ని ఇంగ్లండ్‌కు చెందిన తన స్నేహితుడు సత్నాం సింగ్‌కు లీజుకు ఇచ్చారు. సత్నాం సింగ్‌ తన నివాసంలోకి కేజ్రీవాల్‌ను సాదరంగా ఆహ్వానించినట్టు పోలీసు వర్గాలు తెలిపాయి.
 
 కేసీఎఫ్‌ మిలిటెంట్‌ మాడ్యూల్‌ ఏర్పాటులో కీలక పాత్ర పోషించిన గురిందర్‌ సింగ్‌.. 1997లో మోగా జిల్లా బఘాపురానాలో జరిగిన బాంబు పేలుళ్ల కేసులో నిందితుడిగా ఉన్నాడు. అతన్ని కోర్టు నిర్దోషిగా విడుదల చేసింది. మాజీ మిలిటెంట్‌ నివాసంలో సీఎం కేజ్రీవాల్‌ బస చేయడంపై ప్రత్యర్థి పార్టీలు మండిపడుతున్నాయి. 'మాజీ మిలిటెంట్‌ ఇంట్లో గడుపడం ద్వారా పంజాబ్‌లో అధికారం కోసం తాను ఎంతకైనా తెగిస్తానని కేజ్రీవాల్‌ మరోసారి నిరూపించుకున్నారు' అని శిరోమణి అకాలీదళ్‌ చీఫ్‌ సుఖ్‌బీర్‌ సింగ్‌ బాదల్‌ విమర్శించారు. కేజ్రీవాల్‌ రాడికల్స్‌ జతకట్టడం పంజాబ్‌లో శాంతిభద్రతలకు తీవ్ర ప్రమాదకరని ఆయన ఆందోళన వ్యక్తం చేశారు. అయితే, ఆప్‌ మాత్రం ఈ ఆరోపణలను తోసిపుచ్చుతోంది. తమ అధినేత మాజీ మిలిటెంట్‌ నివాసంలో గడుపలేదని పేర్కొంటున్నది.
  


 సాక్షి నాలెడ్జ్‌ సెంటర్‌ : పంజాబ్‌ అసెంబ్లీ ఎన్నికల్లో తొలిసారి త్రిముఖ పోటీకి రంగం సిద్ధమైంది. మొత్తం 117 సీట్లకు వచ్చే నెల 4న పోలింగ్‌ జరుగుతుంది. శిరోమణి అకాలీదళ్‌–బీజేపీ సంకీర్ణ సర్కారు నేతగా ప్రకాశ్‌ బాదల్‌ గత పదేళ్లుగా సీఎం పదవిలో కొనసాగుతున్నారు. పంజాబ్‌ 1980 నుంచి 15 ఏళ్లు మతతత్వం – ఉగ్రవాదంతో ఇబ్బందులు పడిం ది. ఆ తర్వాత 20 ఏళ్లు రాజకీయ సుస్థిరత సాధ్యమైంది. అయితే రాష్ట్రాన్ని తీవ్ర ఆర్థిక, సామాజిక సంక్షోభాలు చుట్టుముట్టాయి. దాదాపు 58% సిక్కులు, 38% హిందువులున్న పంజాబ్‌ ‘కల్చర్‌’(సంస్కృతి) అగ్రికల్చర్‌–అనే రీతిలో వ్యవసాయాభివృద్ధి సాధించింది.
 సాగునీటి సమస్య, పెరిగిన సాగు వ్యయం, అప్పుల బాధలతో రాష్ట్ర రైతాంగానికి ఆత్మహత్యలే దిక్కయ్యాయి. యువతలో నిరుద్యోగ సమస్య, మాదక ద్రవ్యాల వాడకం ఎక్కువైంది. ఈ పరిస్థితుల్లో ఆమ్‌ ఆద్మీ పార్టీ 2014 లోక్‌సభ ఎన్నికల్లో రాష్ట్రంలోని మొత్తం 13 సీట్లలో పోటీ చేసి 4 గెలుచుకుంది. అకాలీ–బీజేపీ కూటమి, ప్రతిపక్షాలకు మరో ప్రత్యామ్నాయంగా కనిపించింది.
 
 మేలుకున్న కాంగ్రెస్‌
 తమిళనాడులా ఇక్కడా ప్రతి ఐదేళ్లకు పాలకపక్షాన్ని జనం మారుస్తారనే అతి విశ్వాసంతో ఉన్న కాంగ్రెస్‌ 2012 అసెంబ్లీ ఎన్నికల్లో  ఓడిపోయింది. అప్పుడు అకాలీదళ్‌ బలం 48 నుంచి 56 సీట్లకు పెరిగింది.  కాంగ్రెస్‌ బలం 48 నుంచి 46కు తగ్గింది. డిప్యూటీ సీఎం సుఖ్‌బీర్‌సింగ్‌ ప్రచార వ్యూహం ఫలించింది. గణనీయ సంఖ్యలో ఎస్సీల్లోని చమార్‌(చర్మకారులు)లు అకాలీ–బీజేపీ కూటమికి ఓటేశారు. పటియాలా మాజీ సంస్థానాధీశుని కుమారుడైన కాంగ్రెస్‌ మాజీ సీఎం కెప్టెన్ అమరీందర్‌కు ఇలా అనుకోని పరాజయం ఎదురైంది. మారిన పరిస్థితులకు అనుగుణంగా ఇప్పుడు ‘కెప్టెన్’ కొత్త ఎత్తుగడలతో సాగుతున్నారు. బీజేపీ మాజీ ఎంపీ నవజోత్‌సింగ్‌ సిద్ధూను కాంగ్రెస్‌కు చేరువ చేస్తున్నారు. ఎన్నికల వ్యూహ నిపుణుడు ప్రశాంత్‌ కిశోర్‌ మాటలను అనుసరిస్తున్నారు.
 
 బాదల్‌ కుటుంబంపై అవినీతి మచ్చ
 1997 నుంచి అధికారంలో ఉన్నప్పుడల్లా సీఎం బాదల్‌ కుటుంబం అక్రమ మార్గాల్లో అడ్డగోలుగా సంపాదిస్తోందనే ఆరోపణలొస్తున్నాయి. మాదకద్రవ్యాల వ్యాపారం ఈ కుటుంబం మద్దతుతో సాగుతోందని ఆప్‌ నేత కేజ్రీవాల్‌ నిందిస్తున్నారు. రాష్ట్రంలోని ప్రైవేటు బస్సుల్లో 60 శాతం బాదల్‌ కుటుంబ సభ్యుల ట్రాన్స్ పోర్ట్‌ కంపెనీలవే. ఇంకా మద్యం, మీడియా, హోటల్స్, ఇంధన రంగాల్లో ఈ కుటుంబానికి వ్యాపారాలున్నాయి.
 
 కాంగ్రెస్‌కు 62 సీట్లు!
 ఇండియాటుడే–యాక్సిస్‌ తాజా సర్వే.. పంజాబ్‌లో కాంగ్రెస్‌కు 56–62, ఆప్‌కు 36–41 సీట్లు వస్తాయని అంచనా వేసింది. అకాలీ–బీజేపీ కూటమి 18–22 సీట్లతో కుదేలవుతుందని పేర్కొంది.  రెండున్నరేళ్ల క్రితం రాష్ట్రంలో 3, దేశంలో 44 లోక్‌సభ సీట్లే సాధించి పరువు కోల్పోయిన కాంగ్రెస్‌ పంజాబ్‌లో గెలిస్తే పార్టీ పునరుత్తేజానికి దారులు పడతాయి.


 న్యూఢిల్లీ: మాజీ క్రికెటర్‌, రాజకీయ నాయకుడు నవజ్యోత్‌ సింగ్‌ సిద్ధు పంజాబ్‌ అసెంబ్లీ ఎన్నికల్లో పోటీచేసేందుకు సిద్ధమవుతున్నారు. అమృత్‌సర్‌ ఈస్ట్‌ నియోజకవర్గం నుంచి ఆయన పోటీచేసే అవకాశముందని ఆయన భార్య నవజ్యోత్‌ కౌర్‌ సిద్ధు బుధవారం మీడియాకు తెలిపారు. 'మా ఆయన అమృత్‌ సర్‌ ఈస్ట్‌ నుంచి అసెంబ్లీ ఎన్నికల్లో పోటీచేసే అవకాశముంది' అని ఆమె పేర్కొన్నారు.
 
 నవజ్యోత్‌ సింగ్‌ సిద్ధు, ఆయన భార్య గత ఏడాది బీజేపీకి రాజీనామా చేసి బయటకు వచ్చిన సంగతి తెలిసిందే. సిద్ధు భార్య కౌర్‌ ప్రస్తుతం కాంగ్రెస్‌ పార్టీలో చేరారు. సిద్ధు కూడా కాంగ్రెస్‌ గూటికి చేరే అవకాశముందని తెలుస్తోంది. 2012 ఎన్నికల్లో సిధ్దు పటియాల నియోజకవర్గం నుంచి పోటీ చేసి గెలుపొందారు. 2004 ఎన్నికల్లో అమృత్‌సర్‌ లోక్‌సభ స్థానం నుంచి ఆయన గెలుపొందారు. తనను పంజాబ్‌కు దూరం పెట్టాలనే కుట్రతో బీజేపీ వ్యవహరిస్తున్నదని, అందుకే ఆ పార్టీకి రాంరాం చెప్పినట్టు సిద్ధు గతంలో పేర్కొన్న సంగతి తెలిసిందే.