వరల్డ్‌ తైక్వాండో రిఫరీగా వెంకటేశ్వరరావు

వరల్డ్‌ తైక్వాండో రిఫరీగా వెంకటేశ్వరరావు

నిజాంపట్నం: ఈనెల 17 నుంచి 26వ తేదీ వరకు వరల్డ్‌ తైక్వాండో వారు ఇండియా తైక్వాండో ఆధ్వర్యంలో మహారాష్ట్ర పూణేలో నిర్వహించిన ఇంటర్నేషనల్‌ రిఫరే కోర్స్‌లో ఆంధ్రప్రదేశ్‌ బాపట్ల జిల్లా రేపల్లెకు చెందిన రాష్ట్ర తైక్వాండో ప్రధాన కార్యదర్శి వెంకటేశ్వరరావు పాల్గొని అంతర్జాతీయ రెఫరీగా అర్హత సాధించారు. వెంకటేశ్వరరావు మాట్లాడుతూ అంతర్జాతీయ తైక్వాండో క్రీడాకారులను తయారు చేయటానికి అవకాశం లభించటం అదృష్టంగా పేర్కొన్నారు. నేటి వరకు వేలాది మంది క్రీడాకారులకు శిక్షణ ఇచ్చామని, తన వద్ద శిక్షణ పొందిన అనేక మంది జాతీయ స్థాయిలో పతకాలు సాధించారని తెలిపారు.

వైన్‌ షాపులో చోరీ

రూ.4 లక్షల విలువగల

మద్యం అపహరణ

అద్దంకి రూరల్‌: వైన్‌ షాపు వెనుక రేకులను పగులగొట్టి మద్యం కేసులను దొంగిలించారు. ఈ ఘటన అద్దంకి మండలంలోని శాంతినగర్‌ వద్ద ఉన్న వైన్‌షాపులో సోమవారం అర్ధరాత్రి జరగ్గా మంగళవారం వెలుగులోకి వచ్చింది. ఘటనా స్థలానికి చేరుకుని సీఐ సుబ్బారాజు దొంగతనం జరిగిన తీరును తెలుసుకున్నారు. సీఐ తెలిపిన వివరాల మేరకు.. వైన్‌ షాపు యజమాని సోమ వారం రాత్రి వ్యాపారం ముగించుకుని షాపునకు తాళం వేసుకుని ఇంటికి వెళ్లారు. ఈనేపథ్యంలో మంగళవారం ఉదయం షాపు తెరచి చూడగా షాపులో రూ.4 లక్షల విలువచేసే మద్యం కేసులు, సీసీ కెమెరాల మోనిటర్‌ సిస్టంలు కనబడలేదు. షాపు వెనుకవైపు ఉన్న రేకులు తొలగించి ఉన్నాయి. దొంగతనం జరిగిందని అద్దంకి పోలీస్‌స్టేషన్‌కు సమాచారం ఇవ్వడంతో సీఐ, ఎస్సైలు ఘటనా స్థలానికి చేరుకుని పరిశీలించారు. యజ మాని ఫిర్యాదు మేరకు కేసు నమోదు చేశారు.

భర్త తల పగలగొట్టిన భార్య

చినగంజాం: భర్తతో గొడవపడిన భార్య అతనిని రాయితో తలపై కొట్టడంతో గాయలపాలైన సంఘటన మండలంలోని కడవకుదురు గ్రామంలో సోమవారం రాత్రి చోటుచేసుకుంది. పోలీసుల సమాచారం ప్రకారం మండలంలోని కడవకుదురు గ్రామంలోని యానాది కాలనీకి చెందిన బొజ్జా రాజా, వెంకటరమణలకు 18 నెలలు కిందట వివాహమయింది. వీరికి ఒక బాబు ఉన్నాడు. వెంకటరమణ కడవకుదురు గ్రామంలో అంగన్‌వాడీ కేంద్రంలో పనిచేస్తోంది. భర్త రాజా ఇల్లు తాకట్టు పెట్టి రూ.5 లక్షలు రుణం తీసుకొని ఆమెకు బంగారం చేయించాడు. అటు తరువాత డబ్బు అవసరమై కొంత బంగారాన్ని తాకట్టు పెట్టుకొని రూ.1.20 రుణం తీసుకున్నాడు. ఈ క్రమంలో ఆమె ఏడాది కిందట భర్తతో విడిపోయి దూరంగా చినగంజాంలోని మహాలక్ష్మీ కాలనీలో నివాసముంటోంది. సోమవారం సాయంత్రం కడవకుదురులో భర్త తమ్ముని దుకాణం దగ్గర ఉన్న సమయంలో ఆమె భర్తను నిలదీసి తన బంగారం ఇవ్వాల్సిందిగా కోరింది. రోడ్డు మీద గొడవ ఎందుకు అంటూ ఆమె తమ యానాది కాలనీలోని సంగంలోనికి తీసుకెళ్లింది. భర్త ఆమెను తాకట్టు నగదు ఇచ్చేసి ఆమె బంగారాన్ని తెచ్చుకొమ్మని కోరాడు. దీంతో వారిద్దరి మధ్య మాటమాట పెరిగింది. ఆమె పక్కనే రాయితో భర్త తలపగలగొట్టింది. గాయాలపాలైన రాజా చీరాల ఆస్పత్రిలో చేరి పోలీసులకు ఫిర్యాదు చేయడంతో కేసు నమోదు చేసి దర్యాప్తు చేస్తున్నట్లు హెడ్‌ కానిస్టేబుల్‌ పేర్నాటి ప్రకాష్‌ తెలిపారు.

కేరళలో ఎయిర్‌ మెన్‌

రిక్రూట్‌మెంట్‌ ర్యాలీ

గుంటూరు ఎడ్యుకేషన్‌: భారత వైమానిక రంగంలో ఎయిర్‌ మెన్‌ (మెడికల్‌ అసిస్టెంట్‌) ఉద్యోగాలకు కేరళ కొచ్చిలోని 14 ఎయిర్‌మెన్‌ ఎంపిక కేంద్రంలో రిక్రూట్‌మెంట్‌ ర్యాలీ జరగనున్నట్లు యువజన సర్వీసుల శాఖ కార్యాలయం మంగళవారం ఓ ప్రకటనలో తెలిపింది. ఇంటర్‌ బయాలజీ అర్హత కలిగిన అభ్యర్థులు ఫిబ్రవరి 1న, డిప్లొమా, బీఎస్సీ ఇన్‌ ఫార్మసీ అభ్యర్థులు ఫిబ్రవరి 4న ఉదయం 6 గంటలకు ఎంపిక కేంద్రంలో హాజరు కావాలని సూచించారు. ఇతర వివరాలకు ఎయిర్‌ఫోర్స్‌ వెబ్‌సైట్‌ ఎయిర్‌మెన్‌ సెలక్షన్‌. సీడాక్‌.ఇన్‌ను సందర్శించాలని సూచించింది.

1/1

వరల్డ్‌ తైక్వాండో రిఫరీగా వెంకటేశ్వరరావు