రామయ్యకు శాస్త్రోక్తంగా నిత్యకల్యాణం

రామయ్యకు శాస్త్రోక్తంగా నిత్యకల్యాణం

భద్రాచలం: భద్రాచలం శ్రీ సీతారామచంద్ర స్వామి వారికి మంగళవారం శాస్త్రోక్తంగా నిత్యకల్యాణం నిర్వహించారు. తెల్లవారుజామున గర్భగుడిలో స్వామి వారికి సుప్రభాత సేవ, సేవా కాలం, ఆరాధన తదితర పూజలు చేశారు. అనంతరం బేడా మండపంలో కొలువుదీర్చి విశ్వక్సేన పూజ, పుణ్యావాచనం చేశారు. స్వామి వారికి కంకణధారణ, యజ్ఞోపవీత ధారణ, అమ్మవారికి కంకణధారణ, యోక్త్రధారణ గావించి నిత్యకల్యాణ ఘట్టాన్ని ఆలయ అర్చకులు వైభవంగా జరిపించారు. మంగళవారాన్ని పురస్కరించుకొని అభయాంజనేయ స్వామి వారికి అభిషేకం, ప్రత్యేక పూజలు గావించారు.

రామయ్యకు రూ.5లక్షల

విలువైన ఆభరణాలు

శ్రీ సీతారామ చంద్రస్వామికి హైదరాబాద్‌ వాస్తవ్యులు సుదర్శన్‌రెడ్డి – అరుంధతి రూ.5లక్షల విలువైన కాసుల పేరు, పచ్చరాయితో ఉన్న గొలుసును మంగళవారం బహూకరించారు. అలాగే, ఏపీలోని సింహాచలం వాస్తవ్యులు రాంకుమార్‌ రూ.1.18లక్షల విలువ చేసే 11గ్రాములతో చేయించిన నాలుగు బంగారు గాజులను ఆలయ అధికారులకు అందజేశారు.

సింగరేణిలో 15 మంది సర్వే అధికారుల బదిలీ

సింగరేణి(కొత్తగూడెం): సింగరేణిలోని వివిద ఏరియాల్లో విధులు నిర్వహిస్తున్న 15 మంది సర్వే అధికారులను బదిలీ చేస్తూ యాజమాన్యం మంగళవారం ఉత్తర్వులు జారీ చేసింది. వీరిలో ఏడుగురు సూపరింటెండెంట్‌ సర్వే అధికారులు, ఐదుగురు డిప్యూటీ ఎస్‌ఎస్‌ఓలు, సీనియర్‌ సర్వే అధికారి ఒకరు, మరో ఇద్దరు జూనియర్‌ సర్వే అధికారులు ఉన్నారు. వీరంతా ఫిబ్రవరి 7వ తేదీ లోగా వారికి కేటాయించిన ఏరియాల్లో చేరాలని ఉత్తర్వుల్లో పేర్కొంది.

బ్యాంకుల వద్ద పటిష్ట భద్రత : ఎస్పీ

కొత్తగూడెంటౌన్‌: బ్యాంకుల వద్ద పటిష్ట భద్రత ఏర్పాటు చేసుకోవాలని ఎస్పీ రోహిత్‌రాజ్‌ అన్నారు. మంగళవారం ఆయన జిల్లాలోని అన్ని బ్యాంకుల అధికారులతో సమీక్ష సమావేశం నిర్వహించారు. ఈ సందర్భంగా మాట్లాడుతూ.. ఇటీవల వరంగల్‌, బీదర్‌ ప్రాంతాల్లోని బ్యాంకుల్లో చోరీలు జరిగాయని, జిల్లాలో అలాంటి ఘటనలు చోటుచేసుకోకుండా ముందస్తు చర్యలు చేపట్టాలని సూచించారు. బ్యాంకు లోపల, బయట సీసీ కెమెరాలు, సెక్యూరిటీ సిబ్బందిని అప్రమత్తం చేయాలని చెప్పారు. సైబర్‌ మోసాలపై వాల్‌పోస్టర్లు, కరపత్రాల ద్వారా ప్రజలకు అవగాహన కల్పించాలన్నారు. సమావేశంలో భద్రాచలం ఏఎస్పీ విక్రాంత్‌సింగ్‌, బ్యాంక్‌ అధికారులు, డీఎస్పీలు పాల్గొన్నారు.

1/2

రామయ్యకు శాస్త్రోక్తంగా నిత్యకల్యాణం

2/2

రామయ్యకు శాస్త్రోక్తంగా నిత్యకల్యాణం