దరఖాస్తుల స్వీకరణ నిరంతర ప్రక్రియ

దరఖాస్తుల స్వీకరణ నిరంతర ప్రక్రియ

మెట్‌పల్లి: ప్రభుత్వ పథకాలకు దరఖాస్తులు స్వీకరించే ప్రక్రియ నిరంతరం కొనసాగుతుందని కలెక్టర్‌ సత్యప్రసాద్‌ అన్నారు. స్థానిక మున్సిపల్‌ కార్యాలయాన్ని బుధవారం సందర్శించారు. రికార్డులను పరిశీలించి అధికారులకు సూచనలు చేశారు. మినీ స్టేడియంలో నిలిచిపోయిన భవన నిర్మాణ పనులు తెలుసుకున్నారు. వైకుంఠధామం, డంపింగ్‌యార్డులను సందర్శించారు. ఆయన వెంట ఆర్డీఓ శ్రీనివాస్‌, తహశీల్దార్‌ శ్రీనివాస్‌, కమిషనర్‌ మోహన్‌, డీఈఈ నాగేశ్వర్‌రావు తదితరులున్నారు.

అమల్లోకి ఎమ్మెల్సీ కోడ్‌

జగిత్యాల: ఎమ్మెల్సీ ఎన్నికలకు ఎన్నికల సంఘం నోటిఫికేషన్‌ జారీ చేసిన నేపథ్యంలో జిల్లాలో గురువారం నుంచి కోడ్‌ అమలులో ఉంటుందని కలెక్టర్‌ తెలిపారు. మెదక్‌, నిజామాబాద్‌, ఆదిలాబాద్‌, కరీంనగర్‌ పట్టభద్రులు, మెదక్‌, నిజామాబాద్‌, ఆదిలాబాద్‌, కరీంనగర్‌ టీచర్స్‌, వరంగల్‌, ఖమ్మం, నల్గొండ టీచర్స్‌ ఎన్నికకు నోటిఫికేషన్‌ విడుదలైందన్నారు.

విద్యార్థులు అన్ని రంగాల్లో రాణించాలి

విద్యార్థులు చదువుతోపాటు అన్ని రంగాల్లో రాణించాలని కలెక్టర్‌ సత్యప్రసాద్‌ అన్నారు. ఇటీవల పుదుచ్చేరిలో జరిగిన దక్షిణ భారత సైన్స్‌ ఫెస్టివల్‌లో ప్రతిభ కనబర్చిన విద్యార్థి మణిదీప్‌, వర్షిత, గైడ్‌ టీచర్‌ సతీశ్‌, ఉపాధ్యాయుడు అభయ్‌రాజ్‌ను అభినందించారు. కార్యక్రమంలో అదనపు కలెక్టర్‌ గౌతంరెడ్డి, డీఈవో రాము, జిల్లా సైన్స్‌ అధికారి మచ్చ రాజశేఖర్‌ ఉన్నారు.

పారిశుధ్యంపై శ్రద్ధ తీసుకోవాలి

గ్రామీణ ప్రాంతాల్లో పారిశుధ్యంపై ప్రత్యేక శ్రద్ధ తీసుకోవాలని కలెక్టర్‌ అన్నారు. బుధవారం ఎంపీడీవో, ఎంపీవోలతో సమీక్షించారు. ఇంటి పన్ను వందశాతం వసూలు చేయాలన్నారు. ఎమ్మెల్సీ ఎన్నికల కోడ్‌ అమలులోకి వచ్చిన నేపథ్యంలో ప్రభుత్వ, ప్రైవేటు స్థలాల్లో ఉన్న ఫ్లెక్సీలు, హోర్డింగ్‌లు, గోడరాతలను తొలగించాలని ఆదేశించారు.