అనుమానాస్పద స్థితిలో యువకుడి మృతి

అనుమానాస్పద స్థితిలో యువకుడి మృతి

భూపాలపల్లి అర్బన్‌ : అనుమానాస్పద స్థితిలో ఓ యువకుడు మృతి చెందిన సంఘటన మున్సిపాలిటీ పరిధిలోని కాశీంపల్లి శివారు బాలాజీనగర్‌ కాలనీలో సోమవారం తెల్లవారుజామున చోటు చేసుకుంది. మృతుడి తల్లి కందుల సుగుణ పోలీసులకు ఇచ్చిన ఫిర్యాదు ప్రకారం వివరాలు ఇలా ఉన్నాయి. సుగుణ కొడుకు కందుల సురేశ్‌ (37) కాశీంపల్లిలో ఆదివారం రాత్రి నిర్వహించిన కబడ్డీ పోటీలు చూడడానికి వెళ్లి రాత్రి 9 గంటలకు ఇంటికి చేరుకుని ఇంటి ముందు పడుకున్నాడు. తెల్లవారుజామున 5 గంటలకు చూసేసరికి మృతి చెందినట్లు తెలిపారు. ఎవరో రాత్రి సమయంలో హత్య చేసి ఎవరికి అనుమానం రాకుండా మంచంమీద పడుకోబెట్టి వెళ్లారని విలపిస్తూ తెలిపింది. పథకం ప్రకారమే ఇద్దరు వ్యక్తులు కలిసి తన కొడుకును హత్య చేసి ఉంటారని పోలీసులకు ఇచ్చిన ఫిర్యాదులో పేర్కొంది. మృతుడి నడుం భాగంలో గాయాలు కనిపించడంతో పక్కాగా ఇద్దరు కలిసి హత్య చేసి ఉంటారని తల్లి అనుమానాన్ని వ్యక్తం చేసింది. మృతుడు లారీడ్రైవర్‌ కాగా అతనికి భార్య ఇద్దరు పిల్లలు ఉన్నారు. కేసు నమోదు చేసి దర్యాప్తు చేస్తున్నట్లు సీఐ నరేశ్‌ కుమార్‌ తెలిపారు.

పట్టపగలే ఇంట్లో చోరీ

కేసముద్రం: పట్టపగలే ఓ ఇంట్లో చోరీ జరిగిన సంఘటన మండలంలోని అన్నారంలో సోమవారం చోటుచేసుకుంది. బాధితుల కథనం ప్రకారం..గ్రామానికి చెందిన యాకూబ్‌ తన కుటుంబ సభ్యులతో కలిసి ఎప్పటిలాగే ఇంటికి తాళం వేసి కూలీ పనికి వెళ్లారు. ఈ క్రమంలో మధ్యాహ్నం గుర్తుతెలియని వ్యక్తులు ఆ ఇంటితాళం పగులగొట్టి లోపలికి ప్రవేశించారు. ఇంట్లోకి ఉన్న అర తులం బంగారు, వెండి ఆభరణాలు, రూ.6వేల నగదు అపహరించుకెళ్లారు. సాయంత్రం ఇంటికి వచ్చాక తాళం పగులగొట్టి ఉండడంతో చోరీ జరిగినట్లు గుర్తించారు. ఈ విషయంపై ఎస్సై మురళీధర్‌రాజును వివరణ కోరగా చోరీ ఘటన విషయం తమ దృష్టికి రాలేదన్నారు. దీనిపై విచారణ జరపనున్నట్లు ఆయన తెలిపారు.

1/1

అనుమానాస్పద స్థితిలో యువకుడి మృతి